[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.15 # The Compendium of Suśruta 4.15: pañcadaśo+adhyāyaḥ/ Suśrutasaṃhitā 4.15 - **Language:** Sanskrit ### pañcadaśo+adhyāyaḥ/ ### [4.15.1](https://indike.org/pramana/in.med.samhita.susruta.4.15.1) athāto mūḍhagarbhacikitsitaṃ vyākhyāsyāmaḥ// ### [4.15.2](https://indike.org/pramana/in.med.samhita.susruta.4.15.2) yathovāca bhagavān dhanvantariḥ// ### [4.15.3](https://indike.org/pramana/in.med.samhita.susruta.4.15.3) nāto+anyat kaṣṭatamamasti yathā mūḍhagarbhaśalyoddharaṇam; atra hi yoniyakṛtplīhāntravivaragarbhāśayānāṃ madhye karma kartavyaṃ sparśena, utkarṣaṇāpakarṣaṇasthānāpavartanotkartanabhedanacchedanapīḍanarjūkaraṇadāraṇāni caikahastena garbhaṃ garbhiṇīṃ cāhiṃsatā, tasmādadhipatimāpṛcchya paraṃ ca yatnamāsthāyopakrameta// ### [4.15.4](https://indike.org/pramana/in.med.samhita.susruta.4.15.4) tatra samāsenāṣṭavidhā mūḍhagarbhagatiruddiṣṭā; svabhāvagatā api trayaḥ saṅgā bhavanti śiraso vaiguṇyādaṃsayorjaghanasya vā// ### [4.15.5](https://indike.org/pramana/in.med.samhita.susruta.4.15.5) jīvati tu garbhe sūtikāgarbhanirharaṇe prayateta/ nirhartumaśakye cyāvanān mantrānupaśṛṇuyāt; tān vakṣyāmaḥ// ### [4.15.6](https://indike.org/pramana/in.med.samhita.susruta.4.15.6) ihāmṛtaṃ ca somaśca citrabhānuśca bhāmini/ uccaiḥśravāśca turago mandire nivasantu te// ### [4.15.7](https://indike.org/pramana/in.med.samhita.susruta.4.15.7) idamamṛtamapāṃ samuddhṛtaṃ vai tava laghu garbhamimaṃ pramuñcatu stri/ tadanalapavanārkavāsavāste saha lavaṇāmbudharairdiśantu śāntim// ### [4.15.8](https://indike.org/pramana/in.med.samhita.susruta.4.15.8) muktāḥ †paśorvipāśāśca muktāḥ sūryeṇa raśmayaḥ/ muktaḥ sarvabhayādgarbha ehyehi viramāvitaḥ// ### [4.15.9](https://indike.org/pramana/in.med.samhita.susruta.4.15.9) auṣadhāni ca vidadhyādyathoktāni/ mṛte cottānāyā ābhugnasakthyā vastrādhārakonnamitakaṭhyā †dhanvananagavṛttikāśālmalīmṛtsnaghṛtābhyāṃ mrakṣayitvā hastaṃ yonau praveśya garbhamupaharet/ tatra sakthibhyāmāgatamanulomamevāñchet, ekasakthnā pratipannasyetarasakthi prasāryāpaharet, sphigdeśenāgatasya sphigdeśaṃ prapīḍyordhvamutkṣipya sakthinī prasāryāpaharet, tiryagāgatasya parighasyeva tiraścīnasya paścādardhamūrdhvamutkṣipya pūrvārdhamapatyapathaṃ pratyārjavamānīyāpaharet, pārśvāpavṛttaśirasamaṃsaṃ prapīḍyordhvamutkṣipya śiro+apatyapathamānīyāpaharet, bāhudvayapratipannasyordhvamutpīḍyāṃsau śiro+anulomamānīyāpaharet, dvāvantyāvasādhyau mūḍhagarbhau, evamaśakye śastramavacārayet// ### [4.15.10](https://indike.org/pramana/in.med.samhita.susruta.4.15.10) sacetanaṃ ca śastreṇa na kathañcana dārayet/ dāryamāṇo hi jananīmātmānaṃ caiva ghātayet// ### [4.15.11](https://indike.org/pramana/in.med.samhita.susruta.4.15.11) aviṣahye vikāre tu śreyo garbhasya pātanam/ na garbhiṇyā viparyāsastasmātprāptaṃ na hāpayet// ### [4.15.12](https://indike.org/pramana/in.med.samhita.susruta.4.15.12) tataḥ striyamāśvāsya maṇḍalāgreṇāṅgulīśastreṇa vā śiro vidārya, śiraḥkapālānyāhṛtya, śaṅkunā gṛhītvorasi kakṣāyāṃ vā+apaharet; abhinnaśirasamakṣikūṭe gaṇḍe vā, aṃsasaṃsaktasyāṃsadeśe bāhū chittvā, dṛtimivātataṃ vātapūrṇodaraṃ vā vidārya nirasyāntrāṇi śithilībhūtamāharet, jaghanasaktasya vā jaghanakapālānīti// ### [4.15.13](https://indike.org/pramana/in.med.samhita.susruta.4.15.13) kiṃbahunā yadyadaṅgaṃ hi garbhasya tasya sajjati tadbhiṣak/ samyagvinirharecchittvā rakṣennārīṃ ca yatnataḥ// ### [4.15.14](https://indike.org/pramana/in.med.samhita.susruta.4.15.14) garbhasya gatayaścitrā jāyante+anilakopataḥ/ tatrānalpamatirvaidyo varteta vidhipūrvakam// ### [4.15.15](https://indike.org/pramana/in.med.samhita.susruta.4.15.15) nopekṣeta mṛtaṃ garbhaṃ muhūrtamapi paṇḍitaḥ/ sa hyāśu jananīṃ hanti nirucchvāsaṃ paśuṃ yathā// ### [4.15.16](https://indike.org/pramana/in.med.samhita.susruta.4.15.16) maṇḍalāgreṇa kartavyaṃ chedyamantarvijānatā/ vṛddhipatraṃ hi tīkṣṇāgraṃ nārīṃ hiṃsyāt kadācana// ### [4.15.17](https://indike.org/pramana/in.med.samhita.susruta.4.15.17) athāpatantīmaparāṃ pātayet pūrvavadbhiṣak/ hastenāpaharedvā+api pārśvabhyāṃ paripīḍya vā// ### [4.15.18](https://indike.org/pramana/in.med.samhita.susruta.4.15.18) dhunuyācca muhurnārīṃ pīḍayedvā+aṃsapiṇḍikām†/ tailāktayonerevaṃ tāṃ pātayenmatimān bhiṣak// ### [4.15.19](https://indike.org/pramana/in.med.samhita.susruta.4.15.19) evaṃ nirhṛtaśalyāṃ tu siñceduṣṇena vāriṇā/ tato+abhyaktaśarīrāyā yonau snehaṃ nidhāpayet// ### [4.15.20](https://indike.org/pramana/in.med.samhita.susruta.4.15.20) evaṃ mṛdvī bhavedyonistacchūlaṃ copaśāmyati/ kṛṣṇātanmūlaśuṇṭhyelāhiṅgubhārgīḥ sadīpyakāḥ// ### [4.15.21](https://indike.org/pramana/in.med.samhita.susruta.4.15.21) vacāmativiṣāṃ rāsnāṃ cavyaṃ saṃcūrṇya pāyayet/ snehena doṣasyandārthaṃ vedanopaśamāya ca// ### [4.15.22](https://indike.org/pramana/in.med.samhita.susruta.4.15.22) kvāthaṃ caiṣāṃ tathā kalkaṃ cūrṇaṃ vā snehavarjitam/ śākatvagghiṅgvativiṣāpāṭhākaṭukarohiṇīḥ// ### [4.15.23](https://indike.org/pramana/in.med.samhita.susruta.4.15.23) tathā tejovatīṃ cāpi pāyayet pūrvavadbhiṣak/ trirātraṃ pañcasaptāhaṃ† tataḥ snehaṃ punaḥ pibet// ### [4.15.24](https://indike.org/pramana/in.med.samhita.susruta.4.15.24) pāyayetāsavaṃ naktamariṣṭaṃ vā susaṃskṛtam/ śirīṣakakubhābhyāṃ ca toyamācamane hitam// ### [4.15.25](https://indike.org/pramana/in.med.samhita.susruta.4.15.25) upadravāśca ye+anye syustān yathāsvamupācaret/ sarvataḥ pariśuddhā ca snigdhapathyālpabhojanā// ### [4.15.26](https://indike.org/pramana/in.med.samhita.susruta.4.15.26) svedābhyaṅgaparā nityaṃ bhavet krodhavivarjitā/ payo vātaharaiḥ siddhaṃ daśāhaṃ bhojane hitam// ### [4.15.27](https://indike.org/pramana/in.med.samhita.susruta.4.15.27) rasaṃ daśāhaṃ śeṣe tu yathāyogamupācaret/ vyupadravāṃ viśuddhāṃ ca jñātvā ca varavarṇinīm// ### [4.15.28](https://indike.org/pramana/in.med.samhita.susruta.4.15.28) ūrdhvaṃ caturbhyo māsebhyo visṛjet parihārataḥ/ yonisantarpaṇe+abhyaṅge pāne bastiṣu bhojane// ### [4.15.29](https://indike.org/pramana/in.med.samhita.susruta.4.15.29) balātailamidaṃ cāsyai dadyādanilavāraṇam/ balāmūlakaṣāyasya daśamūlīśṛtasya ca// ### [4.15.30](https://indike.org/pramana/in.med.samhita.susruta.4.15.30) yavakolakulatthānāṃ kvāthasya payasastathā/ aṣṭāvaṣṭau śubhā bhāgāstailādekastadekataḥ// ### [4.15.31](https://indike.org/pramana/in.med.samhita.susruta.4.15.31) pacedāvāpya madhuraṃ gaṇaṃ saindhavasaṃyutam/ tathā+aguruṃ sarjarasaṃ saralaṃ devadāru ca// ### [4.15.32](https://indike.org/pramana/in.med.samhita.susruta.4.15.32) mañjiṣṭhāṃ candanaṃ kuṣṭhamelāṃ kālānusārivām/ māṃsīṃ śaileyakaṃ patraṃ tagaraṃ sārivāṃ vacām// ### [4.15.33](https://indike.org/pramana/in.med.samhita.susruta.4.15.33) śatāvarīmaśvagandhāṃ śatapuṣpāṃ punarnavām/ tat sādhusiddhaṃ sauvarṇe rājate mṛnmaye+api vā// ### [4.15.34](https://indike.org/pramana/in.med.samhita.susruta.4.15.34) prakṣipya kalaśe samyak svanuguptaṃ nidhāpayet/ balātailamidaṃ khyātaṃ sarvavātavikāranut// ### [4.15.35](https://indike.org/pramana/in.med.samhita.susruta.4.15.35) yathābalamato mātrāṃ sūtikāyai pradāpayet/ yā ca garbhārthinī nārī kṣīṇaśukraśca yaḥ pumān// ### [4.15.36](https://indike.org/pramana/in.med.samhita.susruta.4.15.36) vātakṣīṇe marmahate mathite+abhihate tathā/ bhagne śramābhipanne ca sarvathaivopayujyate// ### [4.15.37](https://indike.org/pramana/in.med.samhita.susruta.4.15.37) etadākṣepakādīn vai vātavyādhīnapohati/ hikkāṃ kāsamadhīmanthaṃ gulmaṃ śvāsaṃ ca dustaram// ### [4.15.38](https://indike.org/pramana/in.med.samhita.susruta.4.15.38) ṣaṇmāsānupayujyaitadantravṛddhimapohati/ pratyagradhātuḥ puruṣo bhavecca sthirayauvanaḥ// ### [4.15.39](https://indike.org/pramana/in.med.samhita.susruta.4.15.39) rājñāmetaddhi kartavyaṃ rājamātrāśca ye narāḥ/ sukhinaḥ sukumārāśca dhaninaścāpi ye narāḥ// ### [4.15.40](https://indike.org/pramana/in.med.samhita.susruta.4.15.40) balākaṣāyapītebhyastilebhyo vā+apyanekaśaḥ/ tailamutpādya †tatkvāthaśatapākaṃ kṛtaṃ śubham// ### [4.15.41](https://indike.org/pramana/in.med.samhita.susruta.4.15.41) nivāte nibhṛtāgāre prayuñjīta yathābalam/ jīrṇe+asmin payasā snigdhamaśnīyāt ṣaṣṭikaudanam// ### [4.15.42](https://indike.org/pramana/in.med.samhita.susruta.4.15.42) anena vidhinā droṇamupayujyānnamīritam/ bhuñjīta dviguṇaṃ kālaṃ balavarṇānvitastataḥ// ### [4.15.43](https://indike.org/pramana/in.med.samhita.susruta.4.15.43) sarvapāpairvinirmuktaḥ śatāyuḥ puruṣo bhavet/ śataṃ śataṃ tathotkarṣo droṇe droṇe prakīrtitaḥ// ### [4.15.44](https://indike.org/pramana/in.med.samhita.susruta.4.15.44) balākalpenātibalāguḍūcyādityaparṇiṣu/ saireyake vīratarau śatāvaryāṃ trikaṇṭake// ### [4.15.45](https://indike.org/pramana/in.med.samhita.susruta.4.15.45) tailāni madhuke kuryāt prasāriṇyāṃ ca buddhimān/ nīlotpalaṃ varīmūlaṃ gavye kṣīre vipācayet// ### [4.15.46](https://indike.org/pramana/in.med.samhita.susruta.4.15.46) śatapākaṃ tatastena tilatailaṃ pacedbhiṣak/ balātailasya kalkāṃstu supiṣṭāṃstatra dāpayet// ### [4.15.47](https://indike.org/pramana/in.med.samhita.susruta.4.15.47) sarveṣāmeva jānīyādupayogaṃ cikitsakaḥ/ balātailavadeteṣāṃ guṇāṃścaiva viśeṣataḥ// ### [4.15.47\_1](https://indike.org/pramana/in.med.samhita.susruta.4.15.47_1) iti suśrutasaṃhitāyāṃ cikitsāsthāne mūḍhagarbhacikitsitaṃ nāma pañcadaśo+adhyāyaḥ //15// ## Linked texts (1) - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.22.97) — Cakrapāṇidatta, Sanskrit --- Source: [https://indike.org/pramana/in.med.samhita.susruta.4.15](https://indike.org/pramana/in.med.samhita.susruta.4.15) · Pramāṇa