[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.16 # The Compendium of Suśruta 4.16: ṣoḍaśo+adhyāyaḥ/ Suśrutasaṃhitā 4.16 - **Language:** Sanskrit ### ṣoḍaśo+adhyāyaḥ/ ### [4.16.1](https://indike.org/pramana/in.med.samhita.susruta.4.16.1) athāto vidradhītāṃ cikitsitaṃ vyākhyāsyāmaḥ// ### [4.16.2](https://indike.org/pramana/in.med.samhita.susruta.4.16.2) yathovāca bhagavān dhanvantariḥ// ### [4.16.3](https://indike.org/pramana/in.med.samhita.susruta.4.16.3) ukta vidradhayaḥ ṣaḍye teṣvasādhyastu sarvajaḥ/ śeṣeṣvāmeṣu kartavyā tvaritaṃ śophavat kriyā// ### [4.16.4](https://indike.org/pramana/in.med.samhita.susruta.4.16.4) vātaghnamūlakalkaistu ghṛtatailavasāyutaiḥ/ sukhoṣṇo bahalo lepaḥ prayojyo vātavidradhau// ### [4.16.5](https://indike.org/pramana/in.med.samhita.susruta.4.16.5) sānūpaudakamāṃsastu kākolyādiḥ satarpaṇaḥ/ snehāmlasiddho lavaṇaḥ prayojyaścopanāhane// ### [4.16.6](https://indike.org/pramana/in.med.samhita.susruta.4.16.6) veśavāraiḥ sakṛśaraiḥ payobhiḥ pāyasaistathā/ svedayet satataṃ cāpi nirhareccāpi śoṇitam// ### [4.16.7](https://indike.org/pramana/in.med.samhita.susruta.4.16.7) sa cedevamupakrāntaḥ pākāyābhimukho yadi/ taṃ pācayitvā śastreṇa bhindyādbhinnaṃ ca śodhayet†// ### [4.16.8](https://indike.org/pramana/in.med.samhita.susruta.4.16.8) pañcamūlakaṣāyeṇa prakṣālya lavaṇottaraiḥ/ tailairbhadrādimadhukasaṃyuktaiḥ pratipūrayet// ### [4.16.9](https://indike.org/pramana/in.med.samhita.susruta.4.16.9) vairecanikayuktena traivṛtena viśodhya ca/ pṛthakparṇyādisiddhena traivṛtena ca ropayet// ### [4.16.10](https://indike.org/pramana/in.med.samhita.susruta.4.16.10) paittikaṃ śarkarālājāmadhukaiḥ sārivāyutaiḥ/ pradihyāt kṣīrapiṣṭairvā payasyośīracandanaiḥ// ### [4.16.11](https://indike.org/pramana/in.med.samhita.susruta.4.16.11) pākyaiḥ śītakaṣāyairvā kṣīrairikṣurasaistathā/ jīvanīyaghṛtairvā+api secayeccharkarāyutaiḥ// ### [4.16.12](https://indike.org/pramana/in.med.samhita.susruta.4.16.12) trivṛddharītakīnāṃ ca cūrṇaṃ lihyānmadhudravam/ jalaukobhirhareccāsṛk pakvaṃ cāpaṭhya buddhimān// ### [4.16.13](https://indike.org/pramana/in.med.samhita.susruta.4.16.13) kṣīravṛkṣakaṣāyeṇa prakṣālyaudakajena vā/ tilaiḥ sayaṣṭīmadhukaiḥ sakṣaudraiḥ sarpiṣā yutaiḥ// ### [4.16.14](https://indike.org/pramana/in.med.samhita.susruta.4.16.14) upadihya pratanunā vāsasā veṣṭayedvraṇam/ prapauṇḍarīkamañjiṣṭhāmadhukośīrapadmakaiḥ// ### [4.16.15](https://indike.org/pramana/in.med.samhita.susruta.4.16.15) saharidraiḥ kṛtaṃ sarpiḥ sakṣīraṃ vraṇaropaṇam/ kṣīraśuklāpṛthakparṇīsamaṅgārodhracandanaiḥ// ### [4.16.16](https://indike.org/pramana/in.med.samhita.susruta.4.16.16) nyagrodhādipravāleṣu teṣāṃ tvakṣvathavā kṛtam/ naktamālasya patrāṇi taruṇāni phalāni ca// ### [4.16.17](https://indike.org/pramana/in.med.samhita.susruta.4.16.17) sumanāyāśca patrāṇi paṭolāriṣṭayostathā/ dve haridre madhūcchiṣṭaṃ madhukaṃ tiktarohiṇī// ### [4.16.18](https://indike.org/pramana/in.med.samhita.susruta.4.16.18) priyaṅguḥ kuśamūlaṃ ca niculasya tvageva ca/ mañjiṣṭhācandanośīramutpalaṃ sārive trivṛt// ### [4.16.19](https://indike.org/pramana/in.med.samhita.susruta.4.16.19) eteṣāṃ kārṣikairbhāgairghṛtaprasthaṃ vipācayet/ duṣṭavraṇapraśamanaṃ nāḍīvraṇaviśodhanam// ### [4.16.20](https://indike.org/pramana/in.med.samhita.susruta.4.16.20) sadyaśchinnavraṇānāṃ ca karañjādyamidaṃ śubham/ duṣṭavraṇāśca ye kecidye cotsṛṣṭakriyā vraṇāḥ// ### [4.16.21](https://indike.org/pramana/in.med.samhita.susruta.4.16.21) nāḍyo gambhīrikā yāśca sadyaścchinnāstathaiva ca/ agnikṣārakṛtāścaiva ye vraṇā dāruṇā api// ### [4.16.22](https://indike.org/pramana/in.med.samhita.susruta.4.16.22) karañjādyena haviṣā †praśāmyanti na saṃśayaḥ/ iṣṭakāsikatāloṣṭagośakṛttuṣapāṃśubhiḥ// ### [4.16.23](https://indike.org/pramana/in.med.samhita.susruta.4.16.23) mūtrairuṣṇaiśca satataṃ svedayecchlaṣmavidradhim/ kaṣāyapānairvamanairālepairupanāhanaiḥ// ### [4.16.24](https://indike.org/pramana/in.med.samhita.susruta.4.16.24) hareddoṣānabhīkṣṇaṃ cāpyalābvā+asṛk tathaiva ca/ āragvadhakaṣāyeṇa pakvaṃ cāpāṭhya dhāvayet// ### [4.16.25](https://indike.org/pramana/in.med.samhita.susruta.4.16.25) haridrātrivṛtāśaktutilairmadhusamāyutaiḥ/ pūrayitvā vraṇaṃ samyagbadhnīyāt kīrtitaṃ yathā// ### [4.16.26](https://indike.org/pramana/in.med.samhita.susruta.4.16.26) tataḥ kulatthikādantītrivṛcchyāmārkatilvakaiḥ/ kuryāttailaṃ sagomūtraṃ hitaṃ tatra sasaindhavam// ### [4.16.27](https://indike.org/pramana/in.med.samhita.susruta.4.16.27) pittavidradhivat sarvāḥ kriyā niravaśeṣataḥ/ vidradhyoḥ kuśalaḥ kuryādraktāgantunimittayoḥ// ### [4.16.28](https://indike.org/pramana/in.med.samhita.susruta.4.16.28) varuṇādigaṇakvāthamapakve+abhyantarotthite/ ūṣakādipratīvāpaṃ pibet sukhakaraṃ naraḥ// ### [4.16.29](https://indike.org/pramana/in.med.samhita.susruta.4.16.29) anayorvargayoḥ siddhaṃ sarpirvairecanena ca/ acirādvidradhiṃ hanti prātaḥ prātarniṣevitam// ### [4.16.30](https://indike.org/pramana/in.med.samhita.susruta.4.16.30) ebhireva gaṇaiścāpi saṃsiddhaṃ snehasaṃyutam/ kāryamāsthāpanaṃ kṣipraṃ tathaivāpyanuvāsanam// ### [4.16.31](https://indike.org/pramana/in.med.samhita.susruta.4.16.31) pānālepanabhojyeṣu madhuśigrudrumo+api vā/ dattāvāpo yathādoṣamapakvaṃ hanti vidradhim// ### [4.16.32](https://indike.org/pramana/in.med.samhita.susruta.4.16.32) toyadhānyāmlamūtraistu peyo vā+api surādibhiḥ/ yathādoṣagaṇakvāthaiḥ pibedvā+api śilājatu// ### [4.16.33](https://indike.org/pramana/in.med.samhita.susruta.4.16.33) pradhānaṃ guggulaṃ cāpi śuṇṭhīṃ ca suradāru ca/ snehopanāhau kuryācca sadā cāpyanulomanam// ### [4.16.34](https://indike.org/pramana/in.med.samhita.susruta.4.16.34) yathoddiṣṭāṃ sirāṃ vidhyet kaphaje vidradhau bhiṣak/ raktapittānilottheṣu kecidbāhau vadanti tu// ### [4.16.35](https://indike.org/pramana/in.med.samhita.susruta.4.16.35) pakvaṃ vā bahirunnaddhaṃ bhittvā vraṇavadācaret/ sruteṣūrdhvamadho vā+api maireyāmlasurāsavaiḥ// ### [4.16.36](https://indike.org/pramana/in.med.samhita.susruta.4.16.36) peyo varuṇakādistu madhuśigrudrumo+api vā/ śigrumūlajale siddhaṃ sasiddhārthakamodanam// ### [4.16.37](https://indike.org/pramana/in.med.samhita.susruta.4.16.37) yavakolakulatthānāṃ yūṣairbhuñjīta mānavaḥ/ prātaḥ prātaśca seveta mātrayā tailvakaṃ ghṛtam// ### [4.16.38](https://indike.org/pramana/in.med.samhita.susruta.4.16.38) trivṛtādigaṇakvāthasiddhaṃ vā+apyupaśāntaye/ nopagacchedyathāpākaṃ prayateta tathā bhiṣak// ### [4.16.39](https://indike.org/pramana/in.med.samhita.susruta.4.16.39) paryāgate vidradhau tu siddhirnaikāntikī smṛtā/ pratyākhyāya tu kurvīta majjajāte tu vidradhau// ### [4.16.40](https://indike.org/pramana/in.med.samhita.susruta.4.16.40) snehasvedopapannānāṃ kuryādraktāvasecana/ vidradhyuktāṃ kriyāṃ kuryāt pakve vā+asthi tu bhedayet// ### [4.16.41](https://indike.org/pramana/in.med.samhita.susruta.4.16.41) niḥśalyamatha vijñāya kartavyaṃ vraṇaśodhanam/ dhāvettiktakaṣāyeṇa tiktaṃ sarpistathā hitam// ### [4.16.42](https://indike.org/pramana/in.med.samhita.susruta.4.16.42) yadi majjaparisrāvo na nivarteta dehinaḥ/ kuryāt saṃśodhanīyāni kaṣāyādīni buddhimān// ### [4.16.43](https://indike.org/pramana/in.med.samhita.susruta.4.16.43) priyaṅgudhātakīrodhrakaṭphalaṃ tinisaindhavam/ etaistailaṃ vipaktavyaṃ vidradhivraṇaropaṇam// ### [4.16.43\_1](https://indike.org/pramana/in.med.samhita.susruta.4.16.43_1) iti suśrutasaṃhitāyāṃ cikitsāsthāne vidradhicikitsitaṃ nāma ṣoḍaśo+adhyāyaḥ //16// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.100.9) — Ḍalhaṇa, Sanskrit --- Source: [https://indike.org/pramana/in.med.samhita.susruta.4.16](https://indike.org/pramana/in.med.samhita.susruta.4.16) · Pramāṇa