[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.17 # The Compendium of Suśruta 4.17: saptadaśo+adhyāyaḥ/ Suśrutasaṃhitā 4.17 - **Language:** Sanskrit ### saptadaśo+adhyāyaḥ/ ### [4.17.1](https://indike.org/pramana/in.med.samhita.susruta.4.17.1) athāto visarpanāḍīstanarogacikitsitaṃ vyākhyāsyāmaḥ// ### [4.17.2](https://indike.org/pramana/in.med.samhita.susruta.4.17.2) yathovāca bhagavān dhanvantariḥ// ### [4.17.3](https://indike.org/pramana/in.med.samhita.susruta.4.17.3) sādhyā visarpāstraya ādito ye na sannipātakṣatajau hi sādhyau/ sādhyeṣu tatpathyagaṇairvidadhyādghṛtāni sekāṃśca tathopadehān// ### [4.17.4](https://indike.org/pramana/in.med.samhita.susruta.4.17.4) mustāśatāhvāsuradārukuṣṭhavārāhikustumburukṛṣṇagandhāḥ/ vātātmako coṣṇagaṇāḥ prayojyāḥ sekeṣu lepeṣu tathā †śṛteṣu// ### [4.17.5](https://indike.org/pramana/in.med.samhita.susruta.4.17.5) yat pañcamūlaṃ khalu kaṇṭakākhyamalpaṃ mahaccāpyatha vallijaṃ ca/ taccopayojyaṃ bhiṣajā pardehe seke ghṛte cāpi tathaiva taile// ### [4.17.6](https://indike.org/pramana/in.med.samhita.susruta.4.17.6) kaseruśṛṅgāṭakapadmagundrāḥ saśaivalāḥ sotpalakardamāśca/ vastrāntarāḥ pittakṛte visarpe lepā vidheyāḥ saghṛtāḥ suśītāḥ// ### [4.17.7](https://indike.org/pramana/in.med.samhita.susruta.4.17.7) hrīveralāmajjakacandanāni srotojamuktāmaṇigairikāśca/ kṣīreṇa piṣṭāḥ saghṛtāḥ suśītā lepāḥ prayojyāstanavaḥ sukhāya// ### [4.17.8](https://indike.org/pramana/in.med.samhita.susruta.4.17.8) prapauṇḍarīkaṃ madhukaṃ payasyā mañjiṣṭhikā padmakacandane ca/ sugandhikā ceti sukhāya lepaḥ paitte visarpe bhiṣajā prayojyaḥ// ### [4.17.9](https://indike.org/pramana/in.med.samhita.susruta.4.17.9) nyagrodhavargaiḥ pariṣecanaṃ ca ghṛtaṃ ca kuryāt svarasena tasya/ śītaiḥ payobhiśca madhūdakaiśca saśarkarairikṣurasaiśca sekān// ### [4.17.10](https://indike.org/pramana/in.med.samhita.susruta.4.17.10) ghṛtasya gaurīmadhukāravindarodhrāmburājādanagairikeṣu/ tatharṣabhe padmakasārivāsu kākolimedākumudotpaleṣu†// ### [4.17.11](https://indike.org/pramana/in.med.samhita.susruta.4.17.11) sacandanāyāṃ madhuśarkarāyāṃ drākṣāsthirāpṛśniśatāhvayāsu/ kalkīkṛtāsūdakamatra dattvā nyagrodhavargasya tathā sthirādeḥ// ### [4.17.12](https://indike.org/pramana/in.med.samhita.susruta.4.17.12) gaṇasya bilvādikapañcamūlyāścaturguṇaṃ kṣīramathāpi tadvat/ prasthaṃ vipakvaṃ pariṣecanena paittīrnihanyāttu visarpanāḍīḥ// ### [4.17.13](https://indike.org/pramana/in.med.samhita.susruta.4.17.13) visphoṭaduṣṭavraṇaśīrṣarogān pākaṃ tathā++āsyasya nihanti pānāt/ grahārdite śoṣiṇi cāpi bāle ghṛtaṃ hi gauryādikametadiṣṭam// ### [4.17.14](https://indike.org/pramana/in.med.samhita.susruta.4.17.14) ajā+aśvagandhā saralā sakālā saikaiṣikā cāpyathavā+ajaśṛṅgī/ gomūtrapiṣṭo vihitaḥ pradeho hanyādvisarpaṃ kaphajaṃ sa śīghram// ### [4.17.15](https://indike.org/pramana/in.med.samhita.susruta.4.17.15) kālānusāryāgurucocaguñjārāsnāvacāśītaśivedraparṇyaḥ/ pālindimuñjātamahīkadambā hitā visarpeṣu kaphātmakeṣu// ### [4.17.16](https://indike.org/pramana/in.med.samhita.susruta.4.17.16) gaṇastu yojyo varuṇapravṛttaḥ kriyāsu sarvāsu vicakṣaṇena/ saṃśodhanaṃ śoṇitamokṣaṇaṃ ca śreṣṭhaṃ visarpeṣu cikitsitaṃ hi// ### [4.17.17](https://indike.org/pramana/in.med.samhita.susruta.4.17.17) sarvāṃśca pakvān pariśodhya dhīmān vraṇakrameṇopacaredyathoktam/ nāḍī tridoṣaprabhavā na sidhyeccheṣāścatasraḥ khalu† yatnasādhyāḥ// ### [4.17.18](https://indike.org/pramana/in.med.samhita.susruta.4.17.18) tatrānilotthāmupanāhya pūrvamaśeṣataḥ pūyagatiṃ vidārya/ tilairapāmārgaphalaiśca piṣṭvā sasaindhavairbandhanamatra kuryāt// ### [4.17.19](https://indike.org/pramana/in.med.samhita.susruta.4.17.19) prakṣālane cāpi sadā varaṇasya yojyaṃ mahadyat khalu pañcamūlam/ hiṃsrāṃ haridrāṃ kaṭukāṃ balāṃ ca gojihvikāṃ cāpi sabilvamūlām// ### [4.17.20](https://indike.org/pramana/in.med.samhita.susruta.4.17.20) saṃhṛtya tailaṃ vipacedvraṇasya saṃśodhanaṃ pūraṇaropaṇaṃ ca/ pittātmikāṃ prāgupanāhya dhīmānutkārikābhiḥ sapayoghṛtābhiḥ// ### [4.17.21](https://indike.org/pramana/in.med.samhita.susruta.4.17.21) nipātya śastraṃ tilanāgadantīyaṣṭyāhvakalkaiḥ paripūrayettām/ prakṣālane cāpi sasomanimbā niśā prayojyā kuśalena nityam// ### [4.17.22](https://indike.org/pramana/in.med.samhita.susruta.4.17.22) śyāmātribhaṇḍītriphalāsu siddhaṃ haridrayo rodhrakavṛkṣayośca/ ghṛtaṃ sadugdhaṃ vraṇatarpaṇena hanyādgatiṃ koṣṭhagatā+api yā syāt// ### [4.17.23](https://indike.org/pramana/in.med.samhita.susruta.4.17.23) nāḍīṃ kaphotthāmupanāhya samyak kulatthasiddhārthakaśaktukiṇvaiḥ/ mṛdūkṛtāmeṣya gatiṃ viditvā nipātayecchastramaśeṣakārī// ### [4.17.24](https://indike.org/pramana/in.med.samhita.susruta.4.17.24) dadyādvraṇe nimbatilān †sadantīn surāṣṭrajāsaindhavasaṃprayuktān/ prakṣālane cāpi karañjanimbajātyakṣapīlusvarasāḥ prayojyāḥ// ### [4.17.25](https://indike.org/pramana/in.med.samhita.susruta.4.17.25) suvarcikāsaindhavacitrakeṣu nikumbhatālītalarūpikāsu/ phaleṣvapāmārgabhaveṣu caiva kuryāt samūtreṣu hitāya tailam// ### [4.17.26](https://indike.org/pramana/in.med.samhita.susruta.4.17.26) nāḍīṃ tu śalyaprabhavāṃ vidārya nirhṛtya śalyaṃ praviśodhya mārgam/ saṃśodhayet kṣaudraghṛtapragāḍhaistilaistato ropaṇamāśu kuryāt// ### [4.17.27](https://indike.org/pramana/in.med.samhita.susruta.4.17.27) kumbhīkakharjūrakapitthabilvavanaspatīnāṃ ca śalāṭuvargaiḥ/ kṛtvā kaṣāyaṃ vipacettu tailamāvāpya mustāsaralāpriyaṅgūḥ// ### [4.17.28](https://indike.org/pramana/in.med.samhita.susruta.4.17.28) sugandhikāmocarasāhipuṣoaṃ rodhraṃ vidadhyādapi dhātakīṃ ca/ etena śalyaprabhavā tu nāḍī rohedvraṇo vā sukhabhāśu caiva// ### [4.17.29](https://indike.org/pramana/in.med.samhita.susruta.4.17.29) kṛśadurbalabhīrūṇāṃ nāḍī marmāśritā ca yā/ kṣārasūtreṇa tāṃ cchindyānna tu śastreṇa buddhimān// ### [4.17.30](https://indike.org/pramana/in.med.samhita.susruta.4.17.30) eṣaṇyā gatimanviṣya ārasūtrānusāriṇīm/ sūcīṃ nidadhyādgatyante tahonnamyāśu nirharet// ### [4.17.31](https://indike.org/pramana/in.med.samhita.susruta.4.17.31) sūtrasyāntaṃ samānīya gāḍhaṃ bandhaṃ samācaret/ tataḥ kṣārabalaṃ vīkṣya sūtramanyat praveśayet// ### [4.17.32](https://indike.org/pramana/in.med.samhita.susruta.4.17.32) kṣārāktaṃ matimān vaidyo yāvanna †chidyate gatiḥ/ bhagandare+apyeṣa vidhiḥ kāryo vaidyena jānatā// ### [4.17.33](https://indike.org/pramana/in.med.samhita.susruta.4.17.33) sūcībhiryavavaktrābhirācitān vā samantataḥ/ mūle sūtreṇa badhnīyācchinne copavaredvraṇam// ### [4.17.34](https://indike.org/pramana/in.med.samhita.susruta.4.17.34) yā dvivraṇīye+abhihitāstu vartyastāḥ sarvanāḍīṣu bhiṣagvidadhyāt/ ghoṇṭāphalatvaglavaṇāni lākṣāpūgīphalaṃ cālavaṇaṃ ca patram// ### [4.17.35](https://indike.org/pramana/in.med.samhita.susruta.4.17.35) sruhyarkadugdhena tu kalka eṣa vartīkṛto hantyacireṇa nāḍīḥ/ bibhītakāmrāsthivaṭapravālā hareṇukāśaṅkhinibījamasyaḥ// ### [4.17.36](https://indike.org/pramana/in.med.samhita.susruta.4.17.36) vārāhikandaśca tathā pradeyo nāḍīṣu tailena ca miśrayitvā// ### [4.17.37](https://indike.org/pramana/in.med.samhita.susruta.4.17.37) dhattūrajaṃ madanakodravajaṃ ca bījaṃ kośātakī śukanasā mṛgabhojinī ca/ aṅkoṭabījakusumaṃ gatiṣu prayojyaṃ lākṣodakāhṛtamalāsu vikṛtya† cūrṇam// ### [4.17.38](https://indike.org/pramana/in.med.samhita.susruta.4.17.38) tathā ca gomāṃsamasīṃ hitāya koṣṭhāśritasyādarato diśanti/ varīkṛtaṃ mākṣikasaṃprayuktaṃ nāḍīghnamuktaṃ lavaṇottamaṃ vā// ### [4.17.39](https://indike.org/pramana/in.med.samhita.susruta.4.17.39) duṣṭavraṇe yadvihitaṃ ca tailaṃ tat sarvanāḍīṣu bhiṣagvidadhyāt/ cūrṇīkṛtairatha vimiśritamebhireva tailaṃ prayuktamacireṇa gatiṃ nihanti// ### [4.17.40](https://indike.org/pramana/in.med.samhita.susruta.4.17.40) eṣveva mūtrasahiteṣu vidhāya tailaṃ tat sādhitaṃ gatimapohati saptarātrāt/ piṇḍītakasya tu varāhavibhāvitasya mūleṣu kandaśakaleṣu ca sauvaheṣu// ### [4.17.41](https://indike.org/pramana/in.med.samhita.susruta.4.17.41) tailaṃ kṛtaṃ gatimapohati śīghrametat kandeṣu cāmaravarāyudhasāhvayeṣu/ bhallātakārkamaricairlavaṇottamena siddhaṃ viḍaṅgarajanīdvayacitrakaiśca// ### [4.17.42](https://indike.org/pramana/in.med.samhita.susruta.4.17.42) syānmārkavasya ca rasena nihanti tailaṃ nāḍīṃ kaphānilakṛtāmapacīṃ vraṇāṃśca/ stanye gate vikṛtimāśu bhiṣak tu dhātrīṃ pītāṃ ghṛtaṃ pariṇate+ahani vāmayettu// ### [4.17.43](https://indike.org/pramana/in.med.samhita.susruta.4.17.43) nimbodakena madhumāgadhikāyutena vāntāgate+ahani ca mudgarasāśanā syāt/ evaṃ tryahaṃ caturahaṃ ṣaḍahaṃ vamedvā sarpiḥ pibettriphalayā saha saṃyutaṃ vā// ### [4.17.44](https://indike.org/pramana/in.med.samhita.susruta.4.17.44) bhārgīṃ pibettu payasaḥ pariśodhanārthamāragvadhādiṣu varaṃ madhunā kaṣāyam// ### [4.17.45](https://indike.org/pramana/in.med.samhita.susruta.4.17.45) sāmānyametadupadiṣṭamato viśeṣāddoṣān payonipatitān śamayedyathāsvam/ rogaṃ stanotthitamavekṣya bhiṣagvidadhyādyadvidradhāvabhihitaṃ bahuśo vidhānam// ### [4.17.46](https://indike.org/pramana/in.med.samhita.susruta.4.17.46) saṃpacyamānamapi taṃ tu vinopanāhaiḥ saṃbhojanena khalu pācayituṃ yateta/ śīghraṃ stano hi mṛdumāṃsatayopanaddhaḥ sarvaṃ prakothamupayātyavadīryate ca// ### [4.17.47](https://indike.org/pramana/in.med.samhita.susruta.4.17.47) pakve tu dugdhahariṇīḥ parihṛtya nāḍīḥ kṛṣṇaṃ ca cūcukayugaṃ vidadhīta śastram/ āme vidāhini tathaiva gate ca pākaṃ dhātryāḥ stanau satatameva ca nirduhīta// ### [4.17.47\_1](https://indike.org/pramana/in.med.samhita.susruta.4.17.47_1) iti suśrutasaṃhitāyāṃ cikitsāsthāne visarpanāḍīstanarogacikitsitaṃ nāma saptadaśo+adhyāyaḥ//17// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.101.41) — Ḍalhaṇa, Sanskrit ## Linked texts (3) - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.6.10) — Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.63.8) — Vaṅgasena, Sanskrit - [Vaidyamanoramā](https://indike.org/pramana/in.med.cikitsa.vaidyamanorama.12.p370) — Kālidāsa, Sanskrit --- Source: [https://indike.org/pramana/in.med.samhita.susruta.4.17](https://indike.org/pramana/in.med.samhita.susruta.4.17) · Pramāṇa