[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.18 # The Compendium of Suśruta 4.18: aṣṭādaśo+adhyāyaḥ/ Suśrutasaṃhitā 4.18 - **Language:** Sanskrit ### aṣṭādaśo+adhyāyaḥ/ ### [4.18.1](https://indike.org/pramana/in.med.samhita.susruta.4.18.1) athāto granthyapacyarbudagalagaṇḍacikitsitaṃ vyākhyāsyāmaḥ// ### [4.18.2](https://indike.org/pramana/in.med.samhita.susruta.4.18.2) yathovāca bhagavān dhanvantariḥ// ### [4.18.3](https://indike.org/pramana/in.med.samhita.susruta.4.18.3) granthiṣvathāmeṣu bhiṣagvidadhyācchophakriyāṃ vistaraśo† vidhijñaḥ/ rakṣedbalaṃ cāpi narasya nityaṃ tadrakṣitaṃ vyādhibalaṃ nihanti// ### [4.18.4](https://indike.org/pramana/in.med.samhita.susruta.4.18.4) tailaṃ pibet sarpiratho dvayaṃ vā dattvā vasāṃ vā trivṛtaṃ vidadhyāt/ apehivātādaśamūlasiddhaṃ vaidyaścatuḥsnehamatho dvayaṃ vā// ### [4.18.5](https://indike.org/pramana/in.med.samhita.susruta.4.18.5) hiṃsrā+atha rohiṇyamṛtā+atha bhargī śyonākabilvāgurukṛṣṇagandhāḥ/ gojī ca piṣṭā saha tālapatryā granthau vidheyo+anilaje pralepaḥ// ### [4.18.6](https://indike.org/pramana/in.med.samhita.susruta.4.18.6) svedopanāhān vividhāṃśca kuryāttathā prasiddhānaparāṃśca lepān/ vidārya vā pakvamapohya pūyaṃ prakṣālya bilvārkanarendratoyaiḥ// ### [4.18.7](https://indike.org/pramana/in.med.samhita.susruta.4.18.7) tilaiḥ sapañcāṅgulapatramiśraiḥ saṃśodhayet saindhavasaṃprayuktaiḥ/ śuddhaṃ vraṇaṃ vā+apyuparopayettu tailena rāsnāsaralānvitena// ### [4.18.8](https://indike.org/pramana/in.med.samhita.susruta.4.18.8) viḍaṅgayaṣṭīmadhukāmṛtābhiḥ siddhena vā kṣīrasamanvitena/ jalaukasaḥ pittakṛte hitāstu kṣīrodakābhyāṃ paribecanaṃ ca// ### [4.18.9](https://indike.org/pramana/in.med.samhita.susruta.4.18.9) kākolivargasya ca śītalāni pibet kaṣāyāṇi saśarkarāṇi/ drākṣārasenekṣurasena vā+api cūrṇaṃ pibeccāpi harītakīnām// ### [4.18.10](https://indike.org/pramana/in.med.samhita.susruta.4.18.10) madhūkajambvarjunavetasānāṃ tvagbhiḥ pradehānavacārayeta/ saśarkarairvā tṛṇaśūnyakandairdihyādabhīkṣṇaṃ muculundajairvā// ### [4.18.11](https://indike.org/pramana/in.med.samhita.susruta.4.18.11) vidārya vā pakvamapohya pūyaṃ dhāvet kaṣāyeṇa vanaspatīnām/ tilaiḥ sayaṣṭīmadhukairviśodhya sarpiḥ prayojyaṃ madhurairvipakvam// ### [4.18.12](https://indike.org/pramana/in.med.samhita.susruta.4.18.12) hṛteṣu doṣeṣu yathānupūrvyā granthau bhiṣak śleṣmasamutthite tu/ svinnasya vimlāpanameva kuryādaṅguṣṭhalohopalaveṇudaṇḍaiḥ// ### [4.18.13](https://indike.org/pramana/in.med.samhita.susruta.4.18.13) vikaṅkatāragvadhakākaṇantīkākādanītāpasavṛkṣamūlaiḥ/ ālepayet piṇḍaphalārkabhārgīkarañjakālāmadanaiśca vidvān// ### [4.18.14](https://indike.org/pramana/in.med.samhita.susruta.4.18.14) amarmajātaṃ śamamaprayāntamapakvamevāpaharedvidārya/ dahet sthite cāsṛji siddhakarmā sadyaḥkṣatoktaṃ ca vidhiṃ vidadhyāt// ### [4.18.15](https://indike.org/pramana/in.med.samhita.susruta.4.18.15) yā māṃsakandyaḥ kaṭhinā bṛhatyastāsveṣa yojyaśca vidhirvidhijñaiḥ/ śastreṇa vā++āpāṭhya supakvamāśu prakṣālayet pathyatamaiḥ kaṣāyaiḥ// ### [4.18.16](https://indike.org/pramana/in.med.samhita.susruta.4.18.16) saṃśodhanaistaṃ ca viśodhayettu kṣārottaraiḥ kṣaudraguḍapragāḍhaiḥ/ śuddhe ca tailaṃ tvavacāraṇīyaṃ viḍaṅgapāṭhārajanīvipakvam// ### [4.18.17](https://indike.org/pramana/in.med.samhita.susruta.4.18.17) medaḥsamutthe tilakalkadigdhaṃ dattvopariṣṭādviguṇaṃ paṭāntam/ hutāśataptena muhuḥ pramṛjyāllohena dhīmānadahan hitāya// ### [4.18.18](https://indike.org/pramana/in.med.samhita.susruta.4.18.18) pralipya dārvīmatha lākṣayā vā prataptayā svedanamasya kāryam/ nipātya vā śastramapohya medo dahet supakvaṃ tvathavā vidārya// ### [4.18.19](https://indike.org/pramana/in.med.samhita.susruta.4.18.19) prakṣālya mūtreṇa tilaiḥ supiṣṭaiḥ suvarcikādyairharitālamiśraiḥ/ sasaindhavaiḥ kṣaudraghṛtapragāḍhaiḥ kṣārottarairenamabhipraśodhya// ### [4.18.20](https://indike.org/pramana/in.med.samhita.susruta.4.18.20) tailaṃ vidadyāddvikarañjaguñjāvaṃśāvalekheṅgudamūtrasiddham/ jīmūtakaiḥ kośavatīphalaiśca dantīdravantītrivṛtāsu caiva// ### [4.18.21](https://indike.org/pramana/in.med.samhita.susruta.4.18.21) sarpiḥ kṛtaṃ hantyapacīṃ pravṛddhāṃ dvidhā pravṛttaṃ tadudāravīryam/ nirguṇḍijātībarihiṣṭhayuktaṃ jīmūtakaṃ mākṣikasaindhavāḍhyam// ### [4.18.22](https://indike.org/pramana/in.med.samhita.susruta.4.18.22) abhiprataptaṃ vamanaṃ pragāḍhaṃ duṣṭāpacīṣūttamamādiśanti/ kaiḍaryabimbīkaravīrasiddhaṃ tailaṃ hitaṃ mūrdhavirecanaṃ ca// ### [4.18.23](https://indike.org/pramana/in.med.samhita.susruta.4.18.23) śāsvoṭakasya svarasena siddhaṃ tailaṃ hitaṃ nasyavirecaneṣu/ madhūkasāraśca hito+avapīḍe phalāni śigroḥ kharamañjarervā// ### [4.18.24](https://indike.org/pramana/in.med.samhita.susruta.4.18.24) granthīnamarmaprabhavānapakvānuddhṛtya cāgniṃ vidadhīta paścāt/ kṣāreṇa vā+api pratisārayettu saṃlikhya śastreṇa yathopadeśam// ### [4.18.25](https://indike.org/pramana/in.med.samhita.susruta.4.18.25) pārṣṇi prati dve daśa cāṅgulāni mitvendrabastiṃ parivarjya dhīmān/ vidārya matsyāṇḍanibhāni vaidyo niṣkṛṣya jālānyanalaṃ vidadhyāt// ### [4.18.26](https://indike.org/pramana/in.med.samhita.susruta.4.18.26) ā gulphakarṇāt sumitasya jantostasyāṣṭabhāgaṃ khuḍakādvibhajya/ ghoṇarjuvedhaḥ surarājabasterhitvā+akṣimātraṃ tvapare vadanti// ### [4.18.27](https://indike.org/pramana/in.med.samhita.susruta.4.18.27) maṇibandhopariṣṭādvā kuryādrekhātrayaṃ bhiṣak/ aṅgulyantaritaṃ samyagapacīnāṃ nivṛttaye// ### [4.18.28](https://indike.org/pramana/in.med.samhita.susruta.4.18.28) cūrṇasya kāle parcalākakākagodhāhikūrmaprabhavāṃ masīṃ tu/ dadyācca tailena saheṅgudīnāṃ yadvakṣyate ślīpadināṃ ca tailam// ### [4.18.29](https://indike.org/pramana/in.med.samhita.susruta.4.18.29) virecanaṃ dhūmamupādadīta bhavecca nityaṃ yavamudgabhojī/ karkārukairvārukanāsirkelapriyālapañcāṅgulabījacūrṇaiḥ// ### [4.18.30](https://indike.org/pramana/in.med.samhita.susruta.4.18.30) vātārbudaṃ kṣīraghṛtāmbusiddhairuṣṇaiḥ satailairupanāhayettu/ kuryācca mukhyānyupanāhanāni siddhaiśca māṃsairatha vesavāraiḥ// ### [4.18.31](https://indike.org/pramana/in.med.samhita.susruta.4.18.31) svedaṃ vidadhyāt kuśalastu nāḍyā śṛṅgeṇa raktaṃ bahuśo harecca/ vātaghnaniryūhapayomlabhāgaiḥ siddhaṃ śatākhyaṃ trivṛtaṃ pibedvā// ### [4.18.32](https://indike.org/pramana/in.med.samhita.susruta.4.18.32) svedopanāhā mṛdavastu †kāryāḥ pittārbude kāyavirecanaṃ ca/ vighṛṣya codumbaraśākagojīpatrairbhṛśaṃ kṣaudrayutaiḥ pralimpet// ### [4.18.33](https://indike.org/pramana/in.med.samhita.susruta.4.18.33) ślakṣṇīkṛtaiḥ sarjarasapriyaṅgupattaṅgarodhrāñjanayaṣṭikāhvaiḥ/ visrāvya cāragvadhāgojisomāḥ śyāmā ca yojyā kuśalena lepe// ### [4.18.34](https://indike.org/pramana/in.med.samhita.susruta.4.18.34) śyāmāgirihvāñjanakīraseṣu drākṣārase saptalikārase ca/ ghṛtaṃ pibet klītakasaṃprasiddhaṃ pittārbudī tajjaṭharī ca jantuḥ// ### [4.18.35](https://indike.org/pramana/in.med.samhita.susruta.4.18.35) śuddhasya jantoḥ kaphaje+arbude tu rakte+avasikte tu tato+arbudaṃ tat/ dravyāṇi yānyūrdhvamadhaśca doṣān haranti taiḥ kalkakṛtaiḥ pradihyāt// ### [4.18.36](https://indike.org/pramana/in.med.samhita.susruta.4.18.36) kapotapārāvataviṅvimiśraiḥ sakāṃsyanīlaiḥ śukalāṅgalākhyaiḥ/ mūtraistu kākādanimūlamiśraiḥ kṣārapradigdhairathavā pradihyāt// ### [4.18.37](https://indike.org/pramana/in.med.samhita.susruta.4.18.37) niṣpāvapiṇyākakulatthakalkairmāṃsapragāḍhairdadhimastuyuktaiḥ/ lepaṃ vidadhyāt kṛmayo yathā+atra mūrcchanti muñcantyatha makṣikāśca// ### [4.18.38](https://indike.org/pramana/in.med.samhita.susruta.4.18.38) alpāvaśiṣṭe kṛmibhakṣite† ca likhettato+agniṃ vidadhīta paścāt/ yadalpamūlaṃ traputāmrasīsapaṭṭaiḥ samāveṣṭya tadāyasairvā// ### [4.18.39](https://indike.org/pramana/in.med.samhita.susruta.4.18.39) kṣārāgniśastrāṇyasakṛdvidadhyāt prāṇānahiṃsan bhiṣagpramattaḥ/ āsphotajātīkaravīrapatraiḥ kaṣāyamiṣṭaṃ vraṇaśodhanārtham// ### [4.18.40](https://indike.org/pramana/in.med.samhita.susruta.4.18.40) śuddhe ca tailaṃ vidadhīta bhārgīviḍaṅgapāṭhātriphalāvipakvam/ yadṛcchayā copagatāni pākaṃ pākakrameṇopacaredvidhijñaḥ// ### [4.18.41](https://indike.org/pramana/in.med.samhita.susruta.4.18.41) medorbudaṃ svinnamatho vidārya viśodhya sīvyedgataraktamāśu/ tato haridrāgṛhadhūmarodhrapataṅgacūrṇaiḥ samanaḥ śilālaiḥ// ### [4.18.42](https://indike.org/pramana/in.med.samhita.susruta.4.18.42) vraṇaṃ pratigrāhya madhupragāḍhaiḥ karañjatailaṃ vidadhīta śuddhe/ saśeṣadoṣāṇi hi yo+arbudāni karoti tasyāśu punarbhavanti// ### [4.18.43](https://indike.org/pramana/in.med.samhita.susruta.4.18.43) tasmādaśeṣāṇi samuddharettu hanyuḥ saśeṣāṇi yathā hi vahniḥ/ saṃsvedya gaṇḍaṃ pavanotthamādau nāḍyā+anilaghnauṣadhapatrabhaṅgaiḥ// ### [4.18.44](https://indike.org/pramana/in.med.samhita.susruta.4.18.44) amlaiḥ samūtrairvividhaiḥ payobhiruṣṇaiḥ satailaiḥ piśitaiśca vidvān/ visrāvayet svinnamatandriyaśca śuddhaṃ vraṇaṃ cāpyupanāhayettu// ### [4.18.45](https://indike.org/pramana/in.med.samhita.susruta.4.18.45) śaṇātasīmūlakaśigrukiṇvapriyālamajjānuyutaistilaistu/ kālāmṛtāśigrupunarnavārkagajādināmākarahāṭakuṣṭhaiḥ// ### [4.18.46](https://indike.org/pramana/in.med.samhita.susruta.4.18.46) ekaiṣikāvṛkṣakatilvakaiśca surāmlapiṣṭairasakṛt pradihyāt// ### [4.18.47](https://indike.org/pramana/in.med.samhita.susruta.4.18.47) tailaṃ pibeccāmṛtavallinimbahaṃsāhvayāvṛkṣakapippalībhiḥ/ siddhaṃ balābhyāṃ ca sadevadāru hitāya nityaṃ galagaṇḍaroge// ### [4.18.48](https://indike.org/pramana/in.med.samhita.susruta.4.18.48) svedopanāhaiḥ kaphasaṃbhavaṃ tu saṃsvedaya visrāvaṇameva kuryāt/ tato+ajagandhātiviṣāviśalyāviṣāṇikākuṣṭhaśukāhvayābhiḥ// ### [4.18.49](https://indike.org/pramana/in.med.samhita.susruta.4.18.49) palāśabhasmodakapeṣitābhirdihyāt suguñjābhiraśītalābhiḥ/ daśārdhasaṅkhyairlavaṇaiśca yuktaṃ tailaṃ pibenmāgadhikādisiddham// ### [4.18.50](https://indike.org/pramana/in.med.samhita.susruta.4.18.50) pracchardanaṃ mūrdhavirecanaṃ ca dhūmaśca vairecaniko hitastu/ pākakramo vā+api sadā vidheyo vaidyena pākaṅgatayoḥ kathañcit// ### [4.18.51](https://indike.org/pramana/in.med.samhita.susruta.4.18.51) kaṭutrikakṣaudrayutāḥ samūtrā bhakṣyā yavānnāni rasāśca maudgāḥ/ saśṛṅgaverāḥ sapaṭolanimbā hitāya deyā galagaṇḍaroge// ### [4.18.52](https://indike.org/pramana/in.med.samhita.susruta.4.18.52) medaḥsamutthe tu yathopadiṣṭāṃ vidhyet sirāṃ snigdhatanornarasya/ śyāmāsudhālohapurīṣadantīrasāñjanaiścāpi hitaḥ pradehaḥ// ### [4.18.53](https://indike.org/pramana/in.med.samhita.susruta.4.18.53) mūtreṇa vā+āloḍya hitāya sāraṃ prātaḥ pibet sālamahīruhāṇām/ śastreṇa vā++āpāṭya vidārya cainaṃ medaḥ samuddhṛtya hitāya sīvyet// ### [4.18.54](https://indike.org/pramana/in.med.samhita.susruta.4.18.54) majjājyamedomadhubhirdahedvā dagdhe ca sarpirmadhu cāvacāryam/ kāsīsatutthe ca tato+atra deye cūrṇīkṛte rocanayā samete// ### [4.18.55](https://indike.org/pramana/in.med.samhita.susruta.4.18.55) tailena cābhyajya hitāya dadyāt sārodbhavaṃ gomayajaṃ ca bhasma/ hitaśca nityaṃ triphalākaṣāyo gāḍhaśca bandho yavabhojanaṃ ca// ### [4.18.55\_1](https://indike.org/pramana/in.med.samhita.susruta.4.18.55_1) iti suśrutasaṃhitāyāṃ cikitsāsthāne granthyapacyarbudagalagaṇḍacikitsitaṃ nāmāṣṭādaśo+adhyāyaḥ //18// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.102.3) — Ḍalhaṇa, Sanskrit ## Linked texts (4) - [Siddhayoga (Vṛndamādhava)](https://indike.org/pramana/in.med.sangraha.siddhayoga.41.27) — Vṛnda, Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.40.41) — Cakrapāṇidatta, Sanskrit - [Yogaratnākara (Mayūrapāda Bhikṣu)](https://indike.org/pramana/in.med.yoga.yogaratnakara-mayurapada-bhiksu.189.7) — Mayūrapāda Bhikṣu 1700, Sanskrit - [Yogaratnasamuccaya (Anantakumāra)](https://indike.org/pramana/in.med.yoga.yogaratnasamuccaya-anantakumara.11.30) — Anantakumāra, Sanskrit --- Source: [https://indike.org/pramana/in.med.samhita.susruta.4.18](https://indike.org/pramana/in.med.samhita.susruta.4.18) · Pramāṇa