[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.19 # The Compendium of Suśruta 4.19: ekonaviṃśo+adhyāyaḥ/ Suśrutasaṃhitā 4.19 - **Language:** Sanskrit ### ekonaviṃśo+adhyāyaḥ/ ### [4.19.1](https://indike.org/pramana/in.med.samhita.susruta.4.19.1) athāto vṛddhyupadaṃśaślīpadacikitsitaṃ vyākhyāsyāmaḥ// ### [4.19.2](https://indike.org/pramana/in.med.samhita.susruta.4.19.2) yathovāca bhagavān dhanvantariḥ// ### [4.19.3](https://indike.org/pramana/in.med.samhita.susruta.4.19.3) antravṛddhyā vinā ṣaḍyā vṛddhayastāsu varjayet/ aśvādiyānaṃ vyāyāmaṃ maithunaṃ veganigraham// ### [4.19.4](https://indike.org/pramana/in.med.samhita.susruta.4.19.4) atyāsanaṃ caṅkramaṇamupavāsaṃ gurūṇi ca/ tatrādito vātavṛddhau traivṛtasnigdhamāturam// ### [4.19.5](https://indike.org/pramana/in.med.samhita.susruta.4.19.5) svinnaṃ cainaṃ yathānyāyaṃ pāyayeta virecanam/ kośāmratilvakairaṇḍaphalatailāni vā naram// ### [4.19.6](https://indike.org/pramana/in.med.samhita.susruta.4.19.6) sakṣīraṃ vā pibenmāsaṃ tailameraṇḍasaṃbhavam/ tataḥ kāle+anilaghnānāṃ kvāthaiḥ kalkaiśca buddhimān// ### [4.19.7](https://indike.org/pramana/in.med.samhita.susruta.4.19.7) nirūhayennirūḍhaṃ ca bhuktavantaṃ rasaudanam/ yaṣṭīmadhukasiddhena tatastailena yojayet// ### [4.19.8](https://indike.org/pramana/in.med.samhita.susruta.4.19.8) snehopanāhau kuryācca pradehāṃścānilāpahān/ vidagdhāṃ pācayitvā vā sevanīṃ parivarjayet// ### [4.19.9](https://indike.org/pramana/in.med.samhita.susruta.4.19.9) bhindyāttataḥ prabhinnāyāṃ yathoktaṃ kramamācaret/ pittajāyāmapakvāyāṃ pittagranthikramo hitaḥ// ### [4.19.10](https://indike.org/pramana/in.med.samhita.susruta.4.19.10) pakvāṃ vā bhedayedbhinnāṃ śodhayet kṣaudrasarpiṣā/ śuddhāyāṃ ca bhiṣagdadyāttailaṃ kalkaṃ ca ropaṇam// ### [4.19.11](https://indike.org/pramana/in.med.samhita.susruta.4.19.11) raktajāyāṃ jalaukobhiḥ †śoṇitaṃ nirharedbhiṣak/ pibedvirecanaṃ vā+api śarkarākṣaudrasaṃyutam// ### [4.19.12](https://indike.org/pramana/in.med.samhita.susruta.4.19.12) pittagranthikramaṃ kuryādāme pakve ca sarvadā/ vṛddhiṃ kaphātmikāmuṣṇairmūtrapiṣṭaiḥ pralepayet// ### [4.19.13](https://indike.org/pramana/in.med.samhita.susruta.4.19.13) pītadārukaṣāyaṃ ca pibenmūtreṇa saṃyutam/ vimlāpanādṛte vā+api śleṣmagranthikramo hitaḥ// ### [4.19.14](https://indike.org/pramana/in.med.samhita.susruta.4.19.14) pakvāyāṃ ca vibhinnāyāṃ tailaṃ śodhanamiṣyate/ sumanāruṣkarāṅkoṭhasaptaparṇeṣu sādhitam// ### [4.19.15](https://indike.org/pramana/in.med.samhita.susruta.4.19.15) medaḥsamutthāṃ saṃsvedya lepayet surasādinā/ śirovirekadravyairvā sukhoṣṇairmūtrasaṃyutaiḥ// ### [4.19.16](https://indike.org/pramana/in.med.samhita.susruta.4.19.16) svinnāṃ cāveṣṭya paṭṭena samāśvāsya tu mānavam/ rakṣan phale sevanīṃ ca vṛddhipatreṇa dārayet// ### [4.19.17](https://indike.org/pramana/in.med.samhita.susruta.4.19.17) medastataḥ samuddhṛtya dadyāt kāsīsasaindhave/ badhnīyācca yathoddiṣṭaṃ śuddhe tailaṃ ca dāpayet// ### [4.19.18](https://indike.org/pramana/in.med.samhita.susruta.4.19.18) manaḥśilālalavaṇaiḥ siddhamāruṣkareṣu ca/ mūtrajāṃ svedayitvā tu vastrapaṭṭena veṣṭayet// ### [4.19.19](https://indike.org/pramana/in.med.samhita.susruta.4.19.19) sevanyāḥ pārśvato+adhastādvidhyed vrīhimukhena tu/ athātra dvimukhāṃ nāḍīṃ dattvā visrāvayedbhiṣak// ### [4.19.20](https://indike.org/pramana/in.med.samhita.susruta.4.19.20) mūtraṃ nāḍīmathoddhṛtya sthagikābandhamācaret/ śuddhāyāṃ ropaṇaṃ dadyādvarjayedantrahaitukīm// ### [4.19.21](https://indike.org/pramana/in.med.samhita.susruta.4.19.21) aprāptaphalakoṣāyāṃ vātavṛddhikramo hitaḥ/ tatra yā vaṅkhaṇasthā †tāṃ dahedardhenduvattrayā// ### [4.19.22](https://indike.org/pramana/in.med.samhita.susruta.4.19.22) samyaṅmārgāvarodhārthaṃ kośaprāptāṃ tu varjayet/ tvacaṃ bhittvā+aṅguṣṭhamadhye daheccāṅgaviparyayāt// ### [4.19.23](https://indike.org/pramana/in.med.samhita.susruta.4.19.23) anenaiva vidhānena vṛddhī vātakaphātmike/ pradahet prayataḥ kiṃtu snāyucchedo+adhikastayoḥ// ### [4.19.24](https://indike.org/pramana/in.med.samhita.susruta.4.19.24) śaṅkhopari ca karṇānte tyaktvā yatnena sevanīm/ vyatyāsādvā sirāṃ vidhyedantravṛddhinivṛttaye// ### [4.19.25](https://indike.org/pramana/in.med.samhita.susruta.4.19.25) upadaṃśeṣu sādhyeṣu snigdhasvinnasya dehinaḥ/ sirāṃ vidhyenmeḍhramadhye pātayedvā jalaukasaḥ// ### [4.19.26](https://indike.org/pramana/in.med.samhita.susruta.4.19.26) haredubhayataścāpi doṣānatyarthamucchritān/ sadyo+apahṛtadoṣasya rukśophāvupaśāmyataḥ// ### [4.19.27](https://indike.org/pramana/in.med.samhita.susruta.4.19.27) yadi vā durbalo janturna vā prāptaṃ virecanam/ nirūheṇa harettasya doṣānatyarthamucchritān// ### [4.19.28](https://indike.org/pramana/in.med.samhita.susruta.4.19.28) prapauṇḍarīkayaṣṭyāhvavarṣābhūkuṣṭhadārubhiḥ/ saralāgururāsnābhirvātajaṃ saṃpralepayet// ### [4.19.29](https://indike.org/pramana/in.med.samhita.susruta.4.19.29) niculairaṇḍabījāni yavagodhūmasaktavaḥ/ etaiśca vātajaṃ snigdhaiḥ sukhoṣṇaiḥ saṃpralepayet// ### [4.19.30](https://indike.org/pramana/in.med.samhita.susruta.4.19.30) prapauṇḍarīkapūrvaiśca dravyaiḥ sekaḥ praśasyate/ gaurikāñjanayaṣṭyāhvārivośīrapadmakaiḥ// ### [4.19.31](https://indike.org/pramana/in.med.samhita.susruta.4.19.31) sacandanotpalaiḥ snigdhaiḥ paittikaṃ saṃpralepayet/ padmotpalamṛṇālaiśca sasarjārjunavetasaiḥ// ### [4.19.32](https://indike.org/pramana/in.med.samhita.susruta.4.19.32) sarpiḥsnigdhaiḥ samadhukaiḥ paittikaṃ saṃpralepayet/ secayecca ghṛtakṣīraśarkarekṣuadhūdakaiḥ// ### [4.19.33](https://indike.org/pramana/in.med.samhita.susruta.4.19.33) athavā+api suśītena kaṣāyeṇa vaṭādinā/ sālāśvakarṇājakarṇadhavatvagbhiḥ kaphotthitam// ### [4.19.34](https://indike.org/pramana/in.med.samhita.susruta.4.19.34) surāpiṣṭābhiruṣṇābhiḥ satailābhiḥ pralepayet/ rajanyativiṣāmustāsurāsuradārubhiḥ†// ### [4.19.35](https://indike.org/pramana/in.med.samhita.susruta.4.19.35) saptrapāṭhāpattūrairathavā saṃpralepayet/ surasāragvadhādyośca kvāthābhyāṃ paribecayet// ### [4.19.36](https://indike.org/pramana/in.med.samhita.susruta.4.19.36) evaṃ saṃśodhanālepasekaśoṇitamokṣaṇaiḥ/ pratikuryāt kriyāyogaiḥ prāksthānoktairhitairapi// ### [4.19.37](https://indike.org/pramana/in.med.samhita.susruta.4.19.37) na yāti ca yathā pākaṃ prayateta tathā bhiṣak/ vidagdhaistu sirāsnāyutvaṅmāṃsaiḥ kṣīyate dhvajaḥ// ### [4.19.38](https://indike.org/pramana/in.med.samhita.susruta.4.19.38) śastreṇopacareccāpi pākamāgatamāśu vai/ tadā+apohya tilaiḥ sarpiḥkṣaudrayuktaiḥ pralepayet// ### [4.19.39](https://indike.org/pramana/in.med.samhita.susruta.4.19.39) karavīrasya patrāṇi jātyāragvadhayostathā/ prakṣālane prayojyāni vaijayantyarkayorapi// ### [4.19.40](https://indike.org/pramana/in.med.samhita.susruta.4.19.40) saurāṣṭrīṃ gairikaṃ tutthaṃ puṣpakāsīsasaindhavam/ rodhraṃ rasāñjanaṃ dārvīṃ haritālaṃ manaḥśilām// ### [4.19.41](https://indike.org/pramana/in.med.samhita.susruta.4.19.41) hareṇukaile ca tathā sūkṣmacūrṇāni kārayet/ taccūrṇaṃ kṣaudrasaṃyuktamupadaṃśeṣu pūjitam// ### [4.19.42](https://indike.org/pramana/in.med.samhita.susruta.4.19.42) jambvāmrasumanānimbaśvetakāmbojipallavāḥ/ śallakībadarībilvapalāśatiniśatvacaḥ// ### [4.19.43](https://indike.org/pramana/in.med.samhita.susruta.4.19.43) kṣīriṇāṃ ca tvaco yojyāḥ kvāthe triphalayā saha/ tena kvāthena niyataṃ vraṇaṃ prākṣālayedbhiṣak// ### [4.19.44](https://indike.org/pramana/in.med.samhita.susruta.4.19.44) asminneva kaṣāye tu tailaṃ dhīro vipācayet/ gojīviḍaṅgayaṣṭībhiḥ sarvagandhaiśca saṃyutam// ### [4.19.45](https://indike.org/pramana/in.med.samhita.susruta.4.19.45) etat sarvopadaṃśeṣu śreṣṭhaṃ ropaṇamiṣyate/ svarjikātutthakāsīsaṃ śaileyaṃ ca rasāñjanam// ### [4.19.46](https://indike.org/pramana/in.med.samhita.susruta.4.19.46) manaḥśilāsamaiścūrṇaṃ vraṇavīsśarpanāśanam/ gundrāṃ dagdhvā kṛtaṃ bhasma haritālaṃ manaḥśilā// ### [4.19.47](https://indike.org/pramana/in.med.samhita.susruta.4.19.47) upadaṃśabisarpāṇāmetacchantikaraṃ param/ mārkavastriphalā dantī tāmracūrṇamayorajaḥ// ### [4.19.48](https://indike.org/pramana/in.med.samhita.susruta.4.19.48) upadaṃśaṃ nihantyeṣa vṛkṣamindrāśaniryathā/ upadaṃśadvaye+apyetāṃ pratyākhyāyācaret kriyām// ### [4.19.49](https://indike.org/pramana/in.med.samhita.susruta.4.19.49) tayoreva ca yā yogyā vīkṣya doṣabalābalam/ upadaṃśe viśeṣeṇa śṛṇu bhūyastridoṣaje// ### [4.19.50](https://indike.org/pramana/in.med.samhita.susruta.4.19.50) duṣṭavraṇavidhiṃ kuryāt kuthitaṃ mehanaṃ tyajet/ jambvoṣṭhenāgnivarṇena paścāccheṣaṃ dahedbhiṣak// ### [4.19.51](https://indike.org/pramana/in.med.samhita.susruta.4.19.51) samyagdagdhaṃ ca vijñāya madhusarpiḥ prayojayet/ śuddhe ca ropaṇaṃ dadyāt kalkaṃ tailaṃ hitaṃ ca yat// ### [4.19.52](https://indike.org/pramana/in.med.samhita.susruta.4.19.52) snehasvedopapanne tu ślīpade+anilane bhiṣak/ kṛtvā gulphopari sirāṃ vidhyettu caturaṅgule// ### [4.19.53](https://indike.org/pramana/in.med.samhita.susruta.4.19.53) samāpyāyitadehaṃ ca bastibhiḥ samupācaret/ māsameraṇḍajaṃ tailaṃ pibenmūtreṇa saṃyutam// ### [4.19.54](https://indike.org/pramana/in.med.samhita.susruta.4.19.54) payasaudanamaśnīyānnāgarakvathitena ca/ taivṛtaṃ copayuñjīta śasto dāhastathā+agninā// ### [4.19.55](https://indike.org/pramana/in.med.samhita.susruta.4.19.55) gulphasyādhaḥ sirāṃ vidhyecchlīpade pittasaṃbhave/ pītaghnīṃ ca kriyāṃ kuryāt pittārbudavisarpavat// ### [4.19.56](https://indike.org/pramana/in.med.samhita.susruta.4.19.56) sirāṃ suviditāṃ vidhyedaṅguṣṭhe ślaiṣmike bhiṣak/ madhuyuktāni cābhīkṣṇaṃ kaṣāyāṇi pibennaraḥ// ### [4.19.57](https://indike.org/pramana/in.med.samhita.susruta.4.19.57) pibedvā+apyabhayākalkaṃ mūtreṇānyatamena ca/ kaṭukāmamṛtāṃ śuṇṭhīṃ viḍaṅgaṃ dāru citrakam// ### [4.19.58](https://indike.org/pramana/in.med.samhita.susruta.4.19.58) hitaṃ vā lepane nityaṃ bhadradāru sacitrakam/ viḍaṅgamaricārkeṣu nāgare citrake+athavā// ### [4.19.59](https://indike.org/pramana/in.med.samhita.susruta.4.19.59) bhadradārvelukākhye ca sarveṣu lavaṇeṣu ca/ tailaṃ pakvaṃ pibedvā+api yavānnaṃ ca hitaṃ sadā// ### [4.19.60](https://indike.org/pramana/in.med.samhita.susruta.4.19.60) pibet sarṣapatailaṃ vā ślīpadānāṃ nivṛttaye/ pūtīkarañjapatrāṇāṃ rasaṃ vā+api yathābalam// ### [4.19.61](https://indike.org/pramana/in.med.samhita.susruta.4.19.61) anenaiva vidhānena putrañjīvakajaṃ rasam/ prayuñjīta bhiṣak prājñaḥ kālasātmyavibhāgavit// ### [4.19.62](https://indike.org/pramana/in.med.samhita.susruta.4.19.62) kevukākandaniryāsaṃ lavaṇaṃ tvatha pākimam/ rasaṃ dattvā+atha pūrvoktaṃ peyametadbhiṣagjitam// ### [4.19.63](https://indike.org/pramana/in.med.samhita.susruta.4.19.63) kākādanīṃ kākajaṅghāṃ bṛhatīṃ kaṇṭakārikām/ kadambapuṣpīṃ mandārīṃ lambāṃ śukanasāṃ tathā// ### [4.19.64](https://indike.org/pramana/in.med.samhita.susruta.4.19.64) dagdhvā mūtreṇa tadbhasma srāvayet kṣārakalpavat/ tatra dadyāt pratīvāpaṃ kākodumbarikārasam// ### [4.19.65](https://indike.org/pramana/in.med.samhita.susruta.4.19.65) madanācca phalāt kvāthaṃ śukākhyasvarasaṃ tathā/ eṣa kṣārastu pānīyaḥ ślīpadaṃ hanti sevitaḥ// ### [4.19.66](https://indike.org/pramana/in.med.samhita.susruta.4.19.66) apacīṃ galagaṇḍaṃ ca grahaṇīdoṣameva ca/ bhaktasyānaśanaṃ caiva hanyāt sarvaviṣāṇi ca// ### [4.19.67](https://indike.org/pramana/in.med.samhita.susruta.4.19.67) eṣveva tailaṃ saṃsiddhaṃ nasyābhyaṅgeṣu pūjitam/ etānevāmayān hanti ye ca duṣṭavraṇā nṛṇām// ### [4.19.68](https://indike.org/pramana/in.med.samhita.susruta.4.19.68) dravantīṃ trivṛtāṃ dantīṃ nīlīṃ śyāmāṃ tathaiva ca/ saptalāṃ śaṅkhinīṃ caiva dagdhvā mūtreṇa gālayet// ### [4.19.69](https://indike.org/pramana/in.med.samhita.susruta.4.19.69) dadyācca triphalākvāthameṣa kṣārastu sādhitaḥ/ adho gacchati pītastu pūrvaiścāpyāśiṣaḥ samāḥ// ### [4.19.69\_1](https://indike.org/pramana/in.med.samhita.susruta.4.19.69_1) iti suśrutasaṃhitāyāṃ cikitsitasthāne vṛddhyupadaṃśaślīpaḥ cikitsitaṃ nāmaikonaviṃśo+adhyāyaḥ //19// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.103.29) — Ḍalhaṇa, Sanskrit ## Linked texts (4) - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.8.6) — Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.41.6) — Cakrapāṇidatta, Sanskrit - [Siddhayoga (Vṛndamādhava)](https://indike.org/pramana/in.med.sangraha.siddhayoga.42.6) — Vṛnda, Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.65.8) — Vaṅgasena, Sanskrit --- Source: [https://indike.org/pramana/in.med.samhita.susruta.4.19](https://indike.org/pramana/in.med.samhita.susruta.4.19) · Pramāṇa