[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.21 # The Compendium of Suśruta 4.21: ekaviṃśatitamo+adhyāyaḥ/ Suśrutasaṃhitā 4.21 - **Language:** Sanskrit ### ekaviṃśatitamo+adhyāyaḥ/ ### [4.21.1](https://indike.org/pramana/in.med.samhita.susruta.4.21.1) athātaḥ śūkadoṣacikitsitaṃ vyākhyāsyāmaḥ// ### [4.21.2](https://indike.org/pramana/in.med.samhita.susruta.4.21.2) yathovāca bhagavān dhanvantariḥ// ### [4.21.3](https://indike.org/pramana/in.med.samhita.susruta.4.21.3) saṃlikhya sarṣapīṃ samyak kaṣāyairavacūrṇayet/ kaṣāyeṣveva tailaṃ ca kurvīta vraṇaropaṇam// ### [4.21.4](https://indike.org/pramana/in.med.samhita.susruta.4.21.4) aṣṭhīlikāṃ jalaukobhirgrāhayecca† punaḥ punaḥ/ tathā cānupaśāmyantīṃ kaphagranthivaduddharet// ### [4.21.5](https://indike.org/pramana/in.med.samhita.susruta.4.21.5) svedayedgrathitaṃ śaśvannāḍīsvedena buddhimān/ sukhoṣṇairupanāhaiśca susnigdhairupanāhayet// ### [4.21.6](https://indike.org/pramana/in.med.samhita.susruta.4.21.6) kumbhīkāṃ pākamāpannāṃ bhindyācchuddhāṃ tu ropayet/ tailena triphalālodhratindukāmrātakena tu// ### [4.21.7](https://indike.org/pramana/in.med.samhita.susruta.4.21.7) grāhayitvā jalaukobhiralajīṃ secayettataḥ/ kaṣāyaisteṣu siddhaṃ ca tailaṃ ropaṇamiṣyate// ### [4.21.8](https://indike.org/pramana/in.med.samhita.susruta.4.21.8) balātailena koṣṇena mṛditaṃ pariṣecayet/ bhadhuraiḥ sarpiṣā snigdhaiḥ sukhoṣṇairupanāhayet// ### [4.21.9](https://indike.org/pramana/in.med.samhita.susruta.4.21.9) saṃmūḍhapiḍakāṃ kṣipraṃ jalaukobhirupācaret/ bhittvā paryāgatāṃ cāpi lepayet kṣaudrasarpiṣā// ### [4.21.10](https://indike.org/pramana/in.med.samhita.susruta.4.21.10) avamanthe gate pākaṃ bhinne tailaṃ vidhīyate/ dhavāśvakarṇapattaṅgasallakītindukīkṛtam// ### [4.21.11](https://indike.org/pramana/in.med.samhita.susruta.4.21.11) kriyāṃ puṣkarikāyāṃ tu śītāṃ sarvāṃ prayojayet/ jalaukobhirhareccāsṛk sarpiṣā cāvasecayet// ### [4.21.12](https://indike.org/pramana/in.med.samhita.susruta.4.21.12) sparśahānyāṃ haredraktaṃ pradihyānmadhurairapi/ kṣīrekṣurasarpirbhir secayecca suśītalaiḥ// ### [4.21.13](https://indike.org/pramana/in.med.samhita.susruta.4.21.13) piḍakāmuttamākhyāṃ ca baḍiśenoddharedbhiṣak/ uddhṛtya madhusaṃyuktaiḥ kaṣāyairavacūrṇayet// ### [4.21.14](https://indike.org/pramana/in.med.samhita.susruta.4.21.14) rasakriyā vidhātavyā likhite śataponake/ pṛthakparṇyādisiddhaṃ ca deyaṃ tailamanantaram// ### [4.21.15](https://indike.org/pramana/in.med.samhita.susruta.4.21.15) kriyāṃ kuryādbhiṣak prājñastvakpākasya visarpavat/ raktavidradhivaccāpi kriyā śoṇitaje+arbude// ### [4.21.16](https://indike.org/pramana/in.med.samhita.susruta.4.21.16) kaṣāyakalkasarpīṃṣi tailaṃ cūrṇaṃ rasakriyām/ śodhanaṃ ropaṇaṃ caiva vīkṣya vīkṣyāvacārayet// ### [4.21.17](https://indike.org/pramana/in.med.samhita.susruta.4.21.17) hitaṃ ca sarpiṣaḥ pānaṃ pathyaṃ cāpi cirecanam/ hitaḥ śoṇitamokṣaśca yaccāpi laghu bhojanam// ### [4.21.18](https://indike.org/pramana/in.med.samhita.susruta.4.21.18) arbudaṃ māṃsapākaṃ ca vidradhiṃ tilakālakam/ pratyākhyāya prakurvīta bhiṣak samyak pratikriyām// ### [4.21.18\_1](https://indike.org/pramana/in.med.samhita.susruta.4.21.18_1) iti suśrutasaṃhitāyāṃ cikitsāsthāne śūkarogacikitsitaṃ nāmaikaviṃśo+adhyāyaḥ //21// --- Source: [https://indike.org/pramana/in.med.samhita.susruta.4.21](https://indike.org/pramana/in.med.samhita.susruta.4.21) · Pramāṇa