[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.29 # The Compendium of Suśruta 4.29: ekonatriṃśattamo+adhyāyaḥ/ Suśrutasaṃhitā 4.29 - **Language:** Sanskrit ### ekonatriṃśattamo+adhyāyaḥ/ ### [4.29.1](https://indike.org/pramana/in.med.samhita.susruta.4.29.1) athātaḥ svabhāvavyādhipratiṣedhanīyaṃ rasāyanaṃ vyākhyāsyāmaḥ// ### [4.29.2](https://indike.org/pramana/in.med.samhita.susruta.4.29.2) yathovāca bhagavān dhanvantariḥ// ### [4.29.3](https://indike.org/pramana/in.med.samhita.susruta.4.29.3) brahmādayo+asṛjan pūrvamamṛtaṃ somasaṃjñitam/ jarāmṛtyuvināśāya vidhānaṃ tasya vakṣyate// ### [4.29.4](https://indike.org/pramana/in.med.samhita.susruta.4.29.4) eka eva khalu bhagavān somaḥ sthānanāmākṛtivīryaviśeṣaiścaturviṃśatidhā bhidyate// ### [4.29.5](https://indike.org/pramana/in.med.samhita.susruta.4.29.5) aṃśumān muñjavāṃścaiva candramā rajataprabhaḥ/ dūrvāsomaḥ kanīyāṃśca śvetākṣaḥ kanakaprabhaḥ// ### [4.29.6](https://indike.org/pramana/in.med.samhita.susruta.4.29.6) pratānavāṃstālavṛntaḥ karavīro+aṃśavānapi/ svayaṃprabho mahāsomo yaścāpi garuḍāhṛtaḥ// ### [4.29.7](https://indike.org/pramana/in.med.samhita.susruta.4.29.7) gāyatrastraiṣṭubhaḥ pāṅkto jāgataḥ śākvarastathā/ agniṣṭomo raivataśca yathokta iti saṃjñitaḥ// ### [4.29.8](https://indike.org/pramana/in.med.samhita.susruta.4.29.8) gāyatryā tripadā yukto yaścoḍupatirucyate/ ete somāḥ samākhyātā vedoktairnāmabhiḥ śubhaiḥ// ### [4.29.9](https://indike.org/pramana/in.med.samhita.susruta.4.29.9) sarveṣāmeva caiteṣāmeko vidhirupāsane/ sarve tulyaguṇāścaiva vidhānaṃ teṣu vakṣyate// ### [4.29.10](https://indike.org/pramana/in.med.samhita.susruta.4.29.10) ato+anyatamaṃ somamupayuyukṣuḥ sarvopakaraṇaparicārakopetaḥ praśaste deśe trivṛtamāgāraṃ kārayitvā hṛtadoṣaḥ pratisaṃsṛṣṭabhaktaḥ praśasteṣu tithikaraṇamuhūrtanakṣatreṣu aṃśumantamādāyādhvarakalpenāhṛtamabhiṣutamabhihutaṃ cāntarāgāre kṛtamaṅgalasvastivācanaḥ somakandaṃ suvarṇasūcyā vidārya payo gṛhṇīyāt sauvarṇe (†rājate vā) pātre+añjalimātraṃ, tataḥ sakṛdevopayuñjīta nāsvādayan, tata upaspṛśya śeṣamapsvavasādya yamaniyamābhyāmātmānaṃ saṃyojya vāgyato+abhyantarataḥ suhṛdbhirupāsyamāno viharet// ### [4.29.11](https://indike.org/pramana/in.med.samhita.susruta.4.29.11) rasāyanaṃ pītavāṃstu nivāte tanmanāḥ śuciḥ/ āsīta tiṣṭhet krāmecca na kathaṃcana saṃviśet// ### [4.29.12](https://indike.org/pramana/in.med.samhita.susruta.4.29.12) sāyaṃ vā bhuktavānupaśrutaśāntiḥ kuśaśayyāyāṃ kṛṣṇājinottarāyāṃ suhṛdbhirupāsyamānaḥ śayīta, tṛṣito vā śītodakamātrāṃ pibet (†aśanāyito vā kṣīraṃ); tataḥ prātarutthāyopaśrutaśāntiḥ kṛtamaṅgalo gāṃ spṛṣṭvā tatahaivāsīta, tasya jīrṇe some chardirutpadyate, tataḥ śoṇitāktaṃ kṛmivyāmiśraṃ charditavate sāyaṃ śṛtaśītaṃ kṣīraṃ vitaret; tatastṛtīye+ahani kṛmivyāmiśramatisāryate, sa tenāniṣṭapratigrahabhuktaprabhṛtibhirviśeṣairvinirmuktaḥ śuddhatanurbhavati, tataḥ sāyaṃ snātāya pūrvavadeva kṣīraṃ vitaret, kṣaumavastrāstṛtāyāṃ cainaṃ śayyāyāṃ śāyayet; tataścaturthe+ahani tasya śvayathurutpadyate, tataḥ sarvāṅgebhyaḥ kṛmayo niṣkrāmanti, tadahaśca †śayyāyāṃ pāṃśubhiravakīryamāṇaḥ śayīta, tataḥ sāyaṃ pūrvavadeva kṣīraṃ vitaret; evaṃ pañcamaṣaṣṭhayordivasayorvarteta, kevalamubhayakālamasmai kṣīraṃ vitaret; tataḥ saptame+ahani nirmāṃsastvagasthibhūtaḥ kevalaṃ somaparigrahādevocchvasiti, tadahaśca kṣīreṇa sukhoṣṇena pariṣicya tilamadhukacandanānuliptadehaṃ payaḥ pāyayet; tato+aṣṭame+ahani prātareva kṣīrapariṣiktaṃ candanapradigdhāgātraṃ payaḥ pāyayitvā pāṃśuśayyāṃ samutsṛjya kṣaumavastrāstṛtāyāṃ śayyāyāṃ śāyayet, tato+asya māṃsamāpyāyyate, tvak cāvadalati, dantanakharomāṇi cāsya patanti; tasya navamadivasāt prabhṛtyaṇutailābhyaṅgaḥ somavalkakaṣāyapariṣekaḥ; tato daśame+ahanyetadeva vitaret, tato+asya tvak sthiratāmupaiti; evamekādaśadvādaśayorvarteta; tatastrayodaśāt prabhṛti somavalkakaṣāyapariṣekaḥ, evamāṣoḍaśādvarteta; tataḥ saptadaśāṣṭādaśayordivasayordaśanā jāyante śikhariṇaḥ snigdhavajravaidūryasphaṭikaprakāśāḥ samāḥ sthirāḥ sahiṣṇavaḥ, tadā prabhṛti cānavaiḥ śālitaṇḍulaiḥ kṣīrayavāgūmupaseveta yāvat pañcaviṃśatiriti; tato+asmai dadyācchālyodanaṃ mṛdūbhayakālaṃ payasā, tato+asya nakhā jāyante vidrumendragopakataruṇādityaprakāśāḥ, sthirāḥ snigdhā lakṣaṇasaṃpannāḥ keśāśca sūkṣmā jāyante, tvak ca nīlotpalātasīpuṣpavaidūryaprakāśā; ūrdhvaṃ ca māsāt keśān vāpayet, vāpayitvā cośīracandanakṛṣṇatilakalkaiḥ śiraḥ pradihyāt payasā vā snāpayet; tato+asyānantaraṃ saptarātrāt keśā jāyante bhramarāñjananibhāḥ kuñcitāḥ sthirāḥ snigdhāḥ; tatastrirātrāt† prathamāvasathaparisarānniṣkramya muhūrtaṃ sthitvā punarevāntaḥ praviśet, tato+asya balātailamabhyaṅgārthe+avacāryaṃ, yavapiṣṭamudvartanārthe, sukhoṣṇaṃ ca payaḥ pariṣekārthe, ajakarṇakaṣāyamutsādanārthe, sośīraṃ kūpodakaṃ snānārthe, candanamanulepārthe, āmalakarasavimiśrāścāsya yūṣasūpavikalpāḥ, kṣīramadhukasiddhaṃ ca kṛṣṇatilamavacāraṇārthe, evaṃ daśarātraṃ; tato+anyaddaśarātraṃ dvitīye parisare varteta; tatastṛtīye parisare sthirīkurvannātmānamanyaddaśarātramāsīta, kiñcidātapapavanān vā seveta, punaścāntaḥ praviśet, na cātmānamādarśe+apsu vā nirīkṣeta rūpaśālitvāt; tato+anyaddaśarātraṃ krodhādīn †pariharet, evaṃ sarveṣāmupayogavikalpaḥ/ viśeṣatastu vallīpratānakṣupakādayaḥ somā brāhmaṇakṣatriyavaiśyairbhakṣayitavyāḥ/ teṣāṃ tu pramāṇamardhacatuṣkamuṣṭayaḥ// ### [4.29.13](https://indike.org/pramana/in.med.samhita.susruta.4.29.13) aṃśumantaṃ sauvarṇe pātre+abhiṣuṇuyāt, candramasaṃ rājate; tāvupayujyāṣṭaguṇamaiśvaryamavāpyeśānaṃ devamanupraviśati, śeṣāṃstu tāmramaye mṛnmaye vā rohite vā carmaṇi vitate; śūdravarjaṃ tribhirvarṇaiḥ somā upayoktavyāḥ/ tataścaturthe māse paurṇamāsyāṃ śucau deśe brāhmaṇānarcayitvā kṛtamaṅgalo niṣkramya yathoktaṃ vrajediti// ### [4.29.14](https://indike.org/pramana/in.med.samhita.susruta.4.29.14) oṣadhīnāṃ patiṃ somamupayujya vicakṣaṇaḥ/ daśavarṣasahasrāṇi navāṃ dhārayate tanum// ### [4.29.15](https://indike.org/pramana/in.med.samhita.susruta.4.29.15) nāgnirna toyaṃ na viṣaṃ na śastraṃ nāstrameva ca/ tasyālamāyuḥkṣapaṇe samarthāni bhavanti// ### [4.29.16](https://indike.org/pramana/in.med.samhita.susruta.4.29.16) bhadrāṇāṃ ṣaṣṭivarṣāṇāṃ prasrutānāmanekadhā/ kuñjarāṇāṃ sahasrasya balaṃ samadhigacchati// ### [4.29.17](https://indike.org/pramana/in.med.samhita.susruta.4.29.17) kṣīrodaṃ śakrasadanamuttarāṃśca kurūnapi/ yatrecchati sa gantuṃ vā tatrāpratihatā gatiḥ// ### [4.29.18](https://indike.org/pramana/in.med.samhita.susruta.4.29.18) kandarpa iva rūpeṇa kāntyā candra ivāparaḥ/ prahlādayati bhūtānāṃ manāṃsi sa mahādyutiḥ// ### [4.29.19](https://indike.org/pramana/in.med.samhita.susruta.4.29.19) sāṅgopāṅgāṃśca nikhilān vedān vindati tattvataḥ/ caratyamoghasaṅkalpo devavaccākhilaṃ jagat// ### [4.29.20](https://indike.org/pramana/in.med.samhita.susruta.4.29.20) sarveṣāmeva somānāṃ patrāṇi daśa pañca ca/ tāni śukle ca kṛṣṇe ca jāyante nipatanti ca// ### [4.29.21](https://indike.org/pramana/in.med.samhita.susruta.4.29.21) ekaikaṃ jāyate patraṃ somasyāharahastadā/ śuklasya paurṇamāsyāṃ tu bhavet pañcadaśacchadaḥ// ### [4.29.22](https://indike.org/pramana/in.med.samhita.susruta.4.29.22) śīryate patramekaikaṃ divase divase punaḥ/ kṛṣṇapakṣakṣaye cāpi latā bhavati kevalā// ### [4.29.23](https://indike.org/pramana/in.med.samhita.susruta.4.29.23) aṃśumānājyagandhastu kandavān rajataprabhaḥ/ kadalyākārakandastu muñjavāṃllaśunacchadaḥ// ### [4.29.24](https://indike.org/pramana/in.med.samhita.susruta.4.29.24) candramāḥ kanakābhāso jale carati sarvadā/ garuḍāhṛtanāmā ca śvetākṣaścāpi pāṇḍurau// ### [4.29.25](https://indike.org/pramana/in.med.samhita.susruta.4.29.25) sarpanirmokasadṛśau tau vṛkṣāgrāvalambinau/ †tathā+anye maṇḍalaiścitraiścitritā iva bhānti te// ### [4.29.26](https://indike.org/pramana/in.med.samhita.susruta.4.29.26) sarva eva tu vijñeyāḥ somāḥ pañcadaśacchadāḥ/ kṣīrakandalatāvantaḥ patrairnānāvidhaiḥ smṛtāḥ// ### [4.29.27](https://indike.org/pramana/in.med.samhita.susruta.4.29.27) himavatyarbude sahye mahendre malaye tathā/ śrīparvate devagirau girau devasahe tathā// ### [4.29.28](https://indike.org/pramana/in.med.samhita.susruta.4.29.28) pāriyātre ca vindhye ca devasunde hrade tathā/ uttareṇa vitastāyāḥ pravṛddhā ye mahīdharāḥ// ### [4.29.29](https://indike.org/pramana/in.med.samhita.susruta.4.29.29) haṣṭhavat plavate tatra candramāḥ somasattamaḥ/ tasyoddeśeṣu cāpyanti muñjavānaṃśumānapi// ### [4.29.30](https://indike.org/pramana/in.med.samhita.susruta.4.29.30) tasyoddeśeṣu cāpyasti muñjavānaṃśumānapi/ kāśmīreṣu saro divyaṃ nāmnā kṣudrakamānasam// ### [4.29.31](https://indike.org/pramana/in.med.samhita.susruta.4.29.31) gāyatrastraiṣṭubhaḥ pāṅkto jāgataḥ †śākvarastathā/ atra santyapare cāpi somāḥ somasamaprabhāḥ// ### [4.29.32](https://indike.org/pramana/in.med.samhita.susruta.4.29.32) yaiścātra mandabhāgyaiste bhiṣajaścāpamānitāḥ/ na tān paśyantyadharmiṣṭhāḥ kṛtaghnāścāpi mānavāḥ/ bheṣajadveṣiṇaścāpi brāhmaṇadveṣiṇastathā// ### [4.29.32\_1](https://indike.org/pramana/in.med.samhita.susruta.4.29.32_1) iti suśrutasaṃhitāyāṃ cikitsāsthāne svabhāvavyādhipratiṣedhanīyaṃ rasāyanacikitsitaṃ nāmaikonatriṃśo+adhyāyaḥ //29// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.113.2) — Ḍalhaṇa, Sanskrit ## Linked texts (1) - [Śabdakalpadruma](https://indike.org/pramana/in.art.kosa.sabdakalpadruma.811.257.1) — Rājā Sir Rādhākānta Deb, Sanskrit --- Source: [https://indike.org/pramana/in.med.samhita.susruta.4.29](https://indike.org/pramana/in.med.samhita.susruta.4.29) · Pramāṇa