[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.2 # The Compendium of Suśruta 4.2: dvitīyo+adhyāyaḥ/ Suśrutasaṃhitā 4.2 - **Language:** Sanskrit ### dvitīyo+adhyāyaḥ/ ### [4.2.1](https://indike.org/pramana/in.med.samhita.susruta.4.2.1) athātaḥ sadyovraṇacikitsitaṃ vyākhyāsyāmaḥ// ### [4.2.2](https://indike.org/pramana/in.med.samhita.susruta.4.2.2) yathovāca bhagavān dhanvantariḥ// ### [4.2.3](https://indike.org/pramana/in.med.samhita.susruta.4.2.3) dhanvantarirdharmabhṛtāṃ variṣṭho vāgviśāradaḥ/ †viśvāmitrasutaṃ śiṣyamṛṣiṃ suśrutamanvaśāt// ### [4.2.4](https://indike.org/pramana/in.med.samhita.susruta.4.2.4) nānādhārāmukhaiḥ śastrairnānāsthānanipātitaiḥ/ nānārūpā vraṇā ye syusteṣāṃ vakṣyāmi lakṣaṇam// ### [4.2.5](https://indike.org/pramana/in.med.samhita.susruta.4.2.5) āyatāścaturasrāśca tryasrā maṇḍalinastathā/ ardhacandrapratīkāśā viśālāḥ kuṭilāstathā// ### [4.2.6](https://indike.org/pramana/in.med.samhita.susruta.4.2.6) †śarāvanimnamadhyāśca yavamadhyāstathā+apare/ evaṃprakārākṛtayo bhavantyāgantavo vraṇāḥ// ### [4.2.7](https://indike.org/pramana/in.med.samhita.susruta.4.2.7) doṣajā vā svayaṃ bhinnā na tu vaidyanimittajāḥ/ bhiṣagvraṇākṛtijño hi na mohamadhigacchati// ### [4.2.8](https://indike.org/pramana/in.med.samhita.susruta.4.2.8) bhṛśaṃ durdarśarūpeṣu vraṇeṣu vikṛteṣvapi/ †anantākṛtirāgantuḥ sa bhiṣagbhiḥ purātanaiḥ// ### [4.2.9](https://indike.org/pramana/in.med.samhita.susruta.4.2.9) samāsato lakṣaṇataḥ ṣaṅvidhaḥ parikīrtitaḥ/ chinnaṃ bhinnaṃ tathā viddhaṃ kṣataṃ piccitameva ca// ### [4.2.10](https://indike.org/pramana/in.med.samhita.susruta.4.2.10) ghṛṣṭamāhustathā ṣaṣṭhaṃ teṣāṃ vakṣyāmi lakṣaṇam/ tiraścīna ṛjurvā+api yo vraṇaścāyato bhavet// ### [4.2.11](https://indike.org/pramana/in.med.samhita.susruta.4.2.11) gātrasya pātanaṃ cāpi chinnamityupadiśyate/ kuntaśaktyṛṣṭikhaṅgāgraviṣāṇādibhirāśayaḥ// ### [4.2.12](https://indike.org/pramana/in.med.samhita.susruta.4.2.12) †hataḥ kiñcit sravettaddhi bhinnalakṣaṇamucyate/ sthānānyāmāgnipakvānāṃ mūtrasya rudhirasya ca// ### [4.2.13](https://indike.org/pramana/in.med.samhita.susruta.4.2.13) hṛduṇḍukaḥ phupphusaśca koṣṭha ityabhidhīyate/ tasmin bhinne raktapūrṇe jvaro dāhaśca jāyate// ### [4.2.14](https://indike.org/pramana/in.med.samhita.susruta.4.2.14) mūtramārgagudāsyebhyo raktaṃ ghrāṇācca gacchati/ mūrcchāśvāsatṛḍādhmānamabhaktacchanda eva ca// ### [4.2.15](https://indike.org/pramana/in.med.samhita.susruta.4.2.15) viṇmūtravātasaṅgaśca svedāsrāvo+akṣiraktatā/ lohagandhitvamāsyasya gātradaurgandhyameva ca// ### [4.2.16](https://indike.org/pramana/in.med.samhita.susruta.4.2.16) hṛcchūlaṃ pārśvayoścāpi viśeṣaṃ cātra me śṛṇu/ āmāśayasthe rudhire rudhiraṃ †chardayet punaḥ// ### [4.2.17](https://indike.org/pramana/in.med.samhita.susruta.4.2.17) ādhmānamatimātraṃ ca śūlaṃ ca bhṛśadāruṇam/ pakvāśayagate cāpi rujo gauravameva ca// ### [4.2.18](https://indike.org/pramana/in.med.samhita.susruta.4.2.18) śītatā cāpyadho nāmeḥ khebhyo raktasya cāgamaḥ/ abhinne+apyāśaye+antrāṇāṃ khaiḥ sūkṣmairantrapūraṇam// ### [4.2.19](https://indike.org/pramana/in.med.samhita.susruta.4.2.19) pihitāsye ghaṭe yadvallakṣyate tasya gauravam/ sūkṣmāsyaśalyābhihataṃ yadaṅgaṃ tvāśayādvinā// ### [4.2.20](https://indike.org/pramana/in.med.samhita.susruta.4.2.20) uttuṇḍitaṃ nirgataṃ vā tadviddhamiti nirdiśet/ nāticchinnaṃ nātibhinnamubhayorlakṣaṇānvitam// ### [4.2.21](https://indike.org/pramana/in.med.samhita.susruta.4.2.21) viṣamaṃ vraṇamaṅge yattat kṣataṃ tvabhinirdiśet/ prahārapīḍanābhyāṃ tu yadaṅgaṃ pṛthutāṃ gatam// ### [4.2.22](https://indike.org/pramana/in.med.samhita.susruta.4.2.22) sāsthi tat piccitaṃ vidyānmajjaraktapariplutam/ vigatatvagyadaṅgaṃ hi saṃgharṣādanyathā+api vā// ### [4.2.23](https://indike.org/pramana/in.med.samhita.susruta.4.2.23) uṣāsrāvānvitaṃ tattu ghṛṣṭamityupadiśyate/ chinne bhinne tathā viddhe kṣate vā+asṛgatisravet// ### [4.2.24](https://indike.org/pramana/in.med.samhita.susruta.4.2.24) raktakṣayādrujastatra karoti pavano bhṛśam/ snehapānaṃ hitaṃ tatra tatseko vihitastathā// ### [4.2.25](https://indike.org/pramana/in.med.samhita.susruta.4.2.25) veśavāraiḥ sakṛśaraiḥ susnigdhaiścopanāhanam/ dhānyasvedāṃśca kurvīta snigdhānyālepanāni ca// ### [4.2.26](https://indike.org/pramana/in.med.samhita.susruta.4.2.26) vātaghnauṣadhasiddhaiśca snehairbastirvidhīyate/ piccite ca vighṛṣṭe ca nātisravapi śoṇitam// ### [4.2.27](https://indike.org/pramana/in.med.samhita.susruta.4.2.27) agacchati bhṛśaṃ tasmin dāhaḥ pākaśca jāyate/ tatroṣmaṇo nigrahārthaṃ tathā dāhaprapākayoḥ// ### [4.2.28](https://indike.org/pramana/in.med.samhita.susruta.4.2.28) śītamālepanaṃ kāryaṃ pariṣekaśca śītalaḥ/ ṣaṭsveteṣu yathokteṣu chinnādiṣu samāsataḥ// ### [4.2.29](https://indike.org/pramana/in.med.samhita.susruta.4.2.29) jñeyaṃ samarpitaṃ sarvaṃ sadyovraṇacikitsitam/ ata ūrdhvaṃ pravakṣyāmi chinnānāṃ tu cikitsitam// ### [4.2.30](https://indike.org/pramana/in.med.samhita.susruta.4.2.30) ye vraṇā vivṛtāḥ kecicchiraḥpārśvāvalambinaḥ/ tān sīvyedvidhinoktena badhnīyādgāḍhameva ca// ### [4.2.31](https://indike.org/pramana/in.med.samhita.susruta.4.2.31) karṇaṃ sthānādapahṛtaṃ sthāpayitvā yathāsthitam/ sīvyedyathoktaṃ tailena srotaścābhipratarpayet// ### [4.2.32](https://indike.org/pramana/in.med.samhita.susruta.4.2.32) kṛkāṭikānte chinne tu gacchatyapi samīraṇe/ samyaṅniveśya badhnīyāt sīvyeccāpi nirantaram// ### [4.2.33](https://indike.org/pramana/in.med.samhita.susruta.4.2.33) ājena sapiṣā caivaṃ pariṣekaṃ tu kārayet/ uttāno+annaṃ samaśnīyācchayīta ca suyantritaḥ// ### [4.2.34](https://indike.org/pramana/in.med.samhita.susruta.4.2.34) śākhāsu patitāṃstiryak prahārān vivṛtān bhṛśam/ sīvyet samyaṅniveśyāśu sandhyasthīnyanupūrvaśaḥ// ### [4.2.35](https://indike.org/pramana/in.med.samhita.susruta.4.2.35) baddhvā vellitakenāśu tatastailena secayet/ carmaṇā gophaṇābandhaḥ kāryo yo vā hito bhavet// ### [4.2.36](https://indike.org/pramana/in.med.samhita.susruta.4.2.36) pṛṣṭhe vraṇo yasya bhaveduttānaṃ śāyayettu tam/ ato+anyathā corasije śāyayet puruṣaṃ vraṇe// ### [4.2.37](https://indike.org/pramana/in.med.samhita.susruta.4.2.37) chinnāṃ niḥśeṣataḥ śākhāṃ dagdhvā tailena buddhimān/ badhnīyāt kośabandhena prāptaṃ kāryaṃ ca ropaṇam// ### [4.2.38](https://indike.org/pramana/in.med.samhita.susruta.4.2.38) candanaṃ padmakaṃ rodhramutpalāni priyaṅgavaḥ/ haridrā madhukaṃ caiva payaḥ syādatra cāṣṭamam// ### [4.2.39](https://indike.org/pramana/in.med.samhita.susruta.4.2.39) tailamebhirvipakvaṃ tu pradhānaṃ vraṇaropaṇam/ candanaṃ karkaṭākhyā ca sahe māṃsyāhvayā+amṛtā// ### [4.2.40](https://indike.org/pramana/in.med.samhita.susruta.4.2.40) hareṇavo mṛṇālaṃ ca triphalā padmakotpale/ trayodaśāṅgaṃ trivṛtametadvā payasā+anvitam// ### [4.2.41](https://indike.org/pramana/in.med.samhita.susruta.4.2.41) tailaṃ vipakvaṃ sekārthe hitaṃ tu vraṇaropaṇe/ ata ūrdhvaṃ pravakṣyāmi bhinnānāṃ tu cikitsitam// ### [4.2.42](https://indike.org/pramana/in.med.samhita.susruta.4.2.42) bhinnaṃ netramakarmaṇyamabhinnaṃ lambate tu yat/ tanniveśya yathāsthānamavyāviddhasiraṃ śanaiḥ// ### [4.2.43](https://indike.org/pramana/in.med.samhita.susruta.4.2.43) pīḍayet pāṇinā samyak padmapattrāntareṇa tu/ tato+asya tarpaṇaṃ kāryaṃ nasyaṃ cānena sarpiṣā// ### [4.2.44](https://indike.org/pramana/in.med.samhita.susruta.4.2.44) ājaṃ ghṛtaṃ kṣīrapātraṃ madhukaṃ cotpalāni ca/ jīvakarṣabhakau caiva piṣṭvā sarpirvipācayet// ### [4.2.45](https://indike.org/pramana/in.med.samhita.susruta.4.2.45) sarvanetrābhighāte tu sarpiretat praśasyate/ udarānmedaso vartirnirgatā yasya dehinaḥ// ### [4.2.46](https://indike.org/pramana/in.med.samhita.susruta.4.2.46) kaṣāyabhasmamṛtkīrṇāṃ baddhvā sūtreṇa sūtravit/ agnitaptena śastreṇa chindyānmadhusamāyutam// ### [4.2.47](https://indike.org/pramana/in.med.samhita.susruta.4.2.47) baddhvā vraṇaṃ sujīrṇe+anne sarpiṣaḥ pānamiṣyate/ snehapānādṛte cāpi payaḥpānaṃ vidhīyate// ### [4.2.48](https://indike.org/pramana/in.med.samhita.susruta.4.2.48) śarkarāmadhuyaṣṭibhyāṃ lākṣayā vā śvadaṃṣṭrayā/ citrāsamanvitaṃ caiva rujādāhavināśanam// ### [4.2.49](https://indike.org/pramana/in.med.samhita.susruta.4.2.49) āṭopo maraṇaṃ vā syācchūlo vā+acchidyamānayā/ medogranthau tu yattailaṃ vakṣyate tacca yojayet// ### [4.2.50](https://indike.org/pramana/in.med.samhita.susruta.4.2.50) tvaco+atītya sirādīni bhittvā vā parihṛtya vā/ koṣṭhe pratiṣṭhitaṃ śalyaṃ kuryāduktānupadravān// ### [4.2.51](https://indike.org/pramana/in.med.samhita.susruta.4.2.51) tatrāntarlohitaṃ pāṇḍuṃ śītapādakarānanam/ śītocchvāsaṃ raktanetramānaddhaṃ ca vivarjayet// ### [4.2.52](https://indike.org/pramana/in.med.samhita.susruta.4.2.52) āmāśayasthe rudhire vamanaṃ pathyamucyate/ pakvāśayasthe deyaṃ ca virecanamasaṃśayam// ### [4.2.53](https://indike.org/pramana/in.med.samhita.susruta.4.2.53) āsthāpanaṃ ca niḥshehaṃ kāryamuṣṇairviśodhanaiḥ/ yavakolakulatthānāṃ niḥsnehena rasena ca// ### [4.2.54](https://indike.org/pramana/in.med.samhita.susruta.4.2.54) bhuñjītānnaṃ yavāgūṃ vā pibet saindhavasaṃyutām/ atiniḥsrutarakto vā bhinnakoṣṭhaḥ pibedasṛk// ### [4.2.55](https://indike.org/pramana/in.med.samhita.susruta.4.2.55) svamārgapratipannāstu yasya viṇmūtramārutāḥ/ vyupadravaḥ sa bhinne+api koṣṭhe jīvati mānavaḥ// ### [4.2.56](https://indike.org/pramana/in.med.samhita.susruta.4.2.56) abhinnamantraṃ niṣkrāntaṃ praveśyaṃ nānyathā bhavet/ pipīlikāśirograstaṃ tadapyeke vadanti tu// ### [4.2.57](https://indike.org/pramana/in.med.samhita.susruta.4.2.57) prakṣālya payasā digdhaṃ tṛṇśoṇitapāṃśubhiḥ/ praveśayet kṛttanakho ghṛtenāktaṃ śanaiḥ śanaiḥ// ### [4.2.58](https://indike.org/pramana/in.med.samhita.susruta.4.2.58) praveśayet kṣīrasiktaṃ śuṣkamatraṃ ghṛtāplutam/ aṅgulyā+abhimṛśet kaṇṭhaṃ jalenodvejayedapi// ### [4.2.59](https://indike.org/pramana/in.med.samhita.susruta.4.2.59) hastapādeṣu† saṃgṛhya samutthāpya† mahābalāḥ/ bhavatyantaḥpraveśastu yathā nirdhunuyustathā// ### [4.2.60](https://indike.org/pramana/in.med.samhita.susruta.4.2.60) tathā+antrāṇi viśantyantaḥ svāṃ kalāṃ pīḍayanti ca/ vraṇālpatvādbahutvādvā duṣpraveśaṃ bhavettu yat// ### [4.2.61](https://indike.org/pramana/in.med.samhita.susruta.4.2.61) tadāpāṭhya pramāṇena bhiṣagantraṃ parveśayet/ yathāsthānaṃ niveṣṭe ca vraṇaṃ sīvyedatandriyaḥ// ### [4.2.62](https://indike.org/pramana/in.med.samhita.susruta.4.2.62) sthānādapetamādatte prāṇān gupitameva vā/ veṣṭayitvā tu paṭṭena ghṛtasekaṃ pradāpayet// ### [4.2.63](https://indike.org/pramana/in.med.samhita.susruta.4.2.63) ghṛtaṃ pibet sukhoṣṇaṃ ca citrātailasamanvitam/ mṛdukriyārthaṃ śakṛto vāyoścādhaḥpravṛttaye// ### [4.2.64](https://indike.org/pramana/in.med.samhita.susruta.4.2.64) tatastailamidaṃ kuryādropaṇārthaṃ cikitsakaḥ/ tvaco+aśvakarṇadhavayormocakīmeṣaśṛṅgayoḥ// ### [4.2.65](https://indike.org/pramana/in.med.samhita.susruta.4.2.65) śallakyarjunayoścāpi vidāryāḥ kṣīriṇāṃ tathā/ balāmūlāni cāhṛtya tailametairvipācayet// ### [4.2.66](https://indike.org/pramana/in.med.samhita.susruta.4.2.66) vraṇaṃ saṃropayettena varṣamātraṃ yateta ca/ pādau nirastamuṣkasya jalena prokṣya cākṣiṇī// ### [4.2.67](https://indike.org/pramana/in.med.samhita.susruta.4.2.67) praveśya tunnasevanyā muṣkau sīvyettataḥ param/ kāryo gophaṇikābandhaḥ kaṭhyāmāveśya† yantrakam// ### [4.2.68](https://indike.org/pramana/in.med.samhita.susruta.4.2.68) na kuryāt snehasekaṃ ca tena klidyati hi vraṇaḥ/ kālānusāryāgurvelājātīcandanapadmakaiḥ// ### [4.2.69](https://indike.org/pramana/in.med.samhita.susruta.4.2.69) śilādārvyamṛtātutthaistailaṃ kurvīta ropaṇam/ śiraso+apahṛte śalye bālavartiṃ niveśayet// ### [4.2.70](https://indike.org/pramana/in.med.samhita.susruta.4.2.70) bālavartyāmadattāyāṃ mastuluṅgaṃ vraṇāt sravet/ hanyādenaṃ tato vāyustasmādevamupācaret// ### [4.2.71](https://indike.org/pramana/in.med.samhita.susruta.4.2.71) vraṇe rohati caikaikaṃ śanairbālamapakṣipet/ gātrādapahṛte+anyasmāt snehavartiṃ praveśayet// ### [4.2.72](https://indike.org/pramana/in.med.samhita.susruta.4.2.72) kṛte niḥśoṇite cāpi vidhiḥ sadyaḥkṣate hitaḥ/ dūrābagāḍhāḥ sūkṣmāḥ syurye vraṇāstān viśoṇitān// ### [4.2.73](https://indike.org/pramana/in.med.samhita.susruta.4.2.73) kṛtvā sūkṣmeṇa netreṇa cakratailena tarpayet/ samaṅgāṃ rajanīṃ padmāṃ trivargaṃ tutthameva ca// ### [4.2.74](https://indike.org/pramana/in.med.samhita.susruta.4.2.74) viḍaṅgaṃ kaṭukāṃ pathyāṃ guḍūcīṃ sakarañjikām/ saṃhṛtya vipacet kāle tailaṃ ropaṇamuttamam// ### [4.2.75](https://indike.org/pramana/in.med.samhita.susruta.4.2.75) tālīśaṃ padmakaṃ māṃsī hareṇvagurucandanam/ haridre padmabījāni sośīraṃ madhukaṃ ca taiḥ// ### [4.2.76](https://indike.org/pramana/in.med.samhita.susruta.4.2.76) pakvaṃ sadyovraṇeṣūktaṃ tailaṃ ropaṇamuttamam/ kṣate kṣatavidhiḥ kāryaḥ piccite bhagnavadvidhiḥ// ### [4.2.77](https://indike.org/pramana/in.med.samhita.susruta.4.2.77) ghṛṣṭe rujo nigṛhyāśu cūrṇairupacaredvraṇam/ viśliṣṭadehaṃ patitaṃ mathitaṃ hatameva ca// ### [4.2.78](https://indike.org/pramana/in.med.samhita.susruta.4.2.78) vāsayettailapūrṇāyāṃ droṇyāṃ māṃsarasāśanam/ ayameva vidhiḥ kāryaḥ kṣīṇe marmahate tathā// ### [4.2.79](https://indike.org/pramana/in.med.samhita.susruta.4.2.79) ropaṇe saparīṣeke pāne ca vraṇināṃ sadā/ tailaṃ ghṛtaṃ vā saṃyojyaṃ śarīrartūnavekṣya hi// ### [4.2.80](https://indike.org/pramana/in.med.samhita.susruta.4.2.80) ghṛtāni yāni vakṣyāmi yatnataḥ pittavidradhau/ sadyovraṇeṣu deyāni tāni vaidyena jānatā// ### [4.2.81](https://indike.org/pramana/in.med.samhita.susruta.4.2.81) sadyaḥkṣatavraṇaṃ vaidyaḥ saśūlaṃ pariṣecayet/ sarpiṣā nātiśītena balātailena vā punaḥ// ### [4.2.82](https://indike.org/pramana/in.med.samhita.susruta.4.2.82) samaṅgāṃ rajanīṃ padmāṃ pathyāṃ tutthaṃ suvarcalām/ padmakaṃ rodhramadhukaṃ viḍaṅgāni hareṇukām// ### [4.2.83](https://indike.org/pramana/in.med.samhita.susruta.4.2.83) tālīśapatraṃ naladaṃ candanaṃ padmakeśaram/ mañjiṣṭhośīralākṣāśca kṣīriṇāṃ cāpi pallavān// ### [4.2.84](https://indike.org/pramana/in.med.samhita.susruta.4.2.84) priyālabījaṃ tindukyāstaruṇāni phalāni ca/ yathālābhaṃ samāhṛtya tailamebhirvipācayet// ### [4.2.85](https://indike.org/pramana/in.med.samhita.susruta.4.2.85) sadyovraṇānāṃ sarveṣāmaduṣṭānāṃ tu ropaṇam/ kaṣāyamadhurāḥ śītāḥ kriyāḥ snigdhāśca yojayet// ### [4.2.86](https://indike.org/pramana/in.med.samhita.susruta.4.2.86) sadyovraṇānāṃ saptāhaṃ paścāt pūrvoktamācaret/ duṣṭavraṇeṣu kartavyamūrdhvaṃ cādhaśca śodhanam// ### [4.2.87](https://indike.org/pramana/in.med.samhita.susruta.4.2.87) viśoṣaṇaṃ tathā++āhāraḥ śoṇitasya ca mokṣaṇam/ kaṣāyaṃ rājavṛkṣādau surasādau ca dhāvanam// ### [4.2.88](https://indike.org/pramana/in.med.samhita.susruta.4.2.88) tayoreva kaṣāyeṇa tailaṃ śodhanamiṣyate/ †kṣārakalpena vā tailaṃ kṣāradravyeṣu sādhitam// ### [4.2.89](https://indike.org/pramana/in.med.samhita.susruta.4.2.89) dravantī cirabilvaśca dantī citrakameva ca/ pṛthvīkā nimbapatrāṇi kāsīsaṃ tutthameva ca// ### [4.2.90](https://indike.org/pramana/in.med.samhita.susruta.4.2.90) trivṛttejovatī nīlī haridre saindhavaṃ tilāḥ/ bhūmikadambaḥ suvahā śukākhyā lāṅgalāhvayā// ### [4.2.91](https://indike.org/pramana/in.med.samhita.susruta.4.2.91) naipālī jālinī caiva madayantī mṛgādanī/ sudhāmūrvārkakīṭāriharitālakarañjikāḥ// ### [4.2.92](https://indike.org/pramana/in.med.samhita.susruta.4.2.92) yathopapatti kartavyaṃ tailametaistu śodhanam/ ghṛtaṃ vā yadi vā prāptaṃ kalkāḥ saṃśodhanāstathā// ### [4.2.93](https://indike.org/pramana/in.med.samhita.susruta.4.2.93) saindhavatrivṛderaṇḍapatrakalkastu vātike/ trivṛddharidrāmadhukakalkaḥ paitte tilairyutaḥ// ### [4.2.94](https://indike.org/pramana/in.med.samhita.susruta.4.2.94) kaphaje tilatejohvādantīsvarjikacitrakāḥ/ duṣṭavraṇavidhiḥ kāryo †mehakuṣṭhavraṇeṣvapi// ### [4.2.95](https://indike.org/pramana/in.med.samhita.susruta.4.2.95) ṣaḍvidhaḥ prāk pradiṣṭo yaḥ sadyovraṇaviniścayaḥ/ nātaḥ śakyaṃ paraṃ vaktumapi niścitavādibhiḥ// ### [4.2.96](https://indike.org/pramana/in.med.samhita.susruta.4.2.96) upasargairnipātaiśca tattu paṇḍitamāninaḥ/ kecit saṃyojya bhāṣante bahudhā mānagarvitāḥ// ### [4.2.97](https://indike.org/pramana/in.med.samhita.susruta.4.2.97) bahu tadbhāṣitaṃ teṣāṃ ṣaṭsveṣvevāvatiṣṭhate/ viśeṣā iva sāmānye ṣaṭtvaṃ tu paramaṃ matam// ### [4.2.97\_1](https://indike.org/pramana/in.med.samhita.susruta.4.2.97_1) iti suśrutasaṃhitāyāṃ cikitsāsthāne sadyocraṇacikitsitaṃ nāma dvitīyo+adhyāyaḥ //2// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.85.138) — Ḍalhaṇa, Sanskrit ## Linked texts (7) - [Aṣṭāṅgahṛdayasaṃhitā](https://indike.org/pramana/in.med.samhita.astangahrdaya.6953) — Vāgbhaṭa, Sanskrit - [Aṣṭāṅgasaṃgraha](https://indike.org/pramana/in.med.samhita.astangasamgraha.31.37) — Vāgbhaṭa, Sanskrit - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.3-19.87) — Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.60.2) — Vaṅgasena, Sanskrit - [Yogaratnākara (Mayūrapāda Bhikṣu)](https://indike.org/pramana/in.med.yoga.yogaratnakara-mayurapada-bhiksu.176.4-2) — Mayūrapāda Bhikṣu 1700, Sanskrit - [Yogaratnasamuccaya (Anantakumāra)](https://indike.org/pramana/in.med.yoga.yogaratnasamuccaya-anantakumara.8.155) — Anantakumāra, Sanskrit - [Parahitasaṃhitā](https://indike.org/pramana/in.med.sangraha.samhitasara.parahitasamhita.2.160) — Śrīnātha Paṇḍita, Sanskrit --- Source: [https://indike.org/pramana/in.med.samhita.susruta.4.2](https://indike.org/pramana/in.med.samhita.susruta.4.2) · Pramāṇa