[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.31 # The Compendium of Suśruta 4.31: ekatriṃśattamo+adhyāyaḥ/ Suśrutasaṃhitā 4.31 - **Language:** Sanskrit ### ekatriṃśattamo+adhyāyaḥ/ ### [4.31.1](https://indike.org/pramana/in.med.samhita.susruta.4.31.1) athātaḥ snehopayaugikacikitsitaṃ vyākhyāsyāmaḥ// ### [4.31.2](https://indike.org/pramana/in.med.samhita.susruta.4.31.2) yathovāca bhagavān dhanvantariḥ// ### [4.31.3](https://indike.org/pramana/in.med.samhita.susruta.4.31.3) snehasāro+ayaṃ puruṣaḥ, prāṇāśca snehabhūyiṣṭāḥ snehasādhyāśca bhavanti/ sneho hi pānānuvāsanamastiṣkaśirovastyuttarabastinasyakarṇapūraṇagātrābhyaṅgabhojaneṣūpayojyaḥ// ### [4.31.4](https://indike.org/pramana/in.med.samhita.susruta.4.31.4) tatra dviyoniścaturvikalpo+abhihitaḥ snehaḥ snehaguṇāśca/ tatra jaṅgamebhyo gavyaṃ ghṛtaṃ pradhānaṃ, sthāvarebhyastilatailaṃ pradhānamiti// ### [4.31.5](https://indike.org/pramana/in.med.samhita.susruta.4.31.5) ata ūrdhvaṃ yathāprayojanaṃ †yathāpradhānaṃ ca sthāvarasnehānupadekṣyāmaḥ tatra tilvakairaṇḍakośāmradantīdravantīsaptalāśaṅkhinīpalāśaviṣāṇikāgavākṣīkampillakaśampākanīlinīsnehā virecayanti, jīmūtakakuṭajakṛtavedhanekṣvākudhāmārgavamadanasnehā vāmayanti, viḍaṅgakharamañjarīmadhuśigrusūryavallīpīlusiddhārthakajyotiṣmatīsnehāḥ śiro virecayanti, karañjapūtīkakṛtamālamātuluṅgeṅgudīkirātatiktakasnehā duṣṭavraṇeṣūpayujyante, tuvarakakapitthakampillakabhallātakapaṭolasnehā mahāvyādhiṣu, trapusairvārukakarkārukatumbīkūṣmāṇḍasnehā mūtrasaṅgeṣu, kapotavaṅkāvalgujaharītakīsnehāḥ śarkarāśmarīṣu, kusumbhasarṣapātasīpicumardātimuktakabhāṇḍīkaṭutumbīkaṭabhīsnehāḥ prameheṣu, tālanārikelapanasamocapriyālabilvamadhūkaśleṣmātakāmrātakaphalasnehāḥ pittasaṃsṛṣṭe vāyau, bibhītakabhallātakapiṇḍītakasnehāḥ kṛṣṇīkaraṇe, śravaṇakaṅgukaṭuṇṭukasnehāḥ pāṇḍūkaraṇe, saralapītadāruśiṃśapāgurusārasnehā dadrukuṣṭhakiṭimeṣu, sarva eva snehā vātamupaghnanti, tailaguṇāśca samāsena vyākhyātāḥ// ### [4.31.6](https://indike.org/pramana/in.med.samhita.susruta.4.31.6) ata ūrdhvaṃ kaṣāyasnehapākakramamupadekṣyāmaḥ/ tatra kecidāhuḥ tvakpatraphalamūlādīnāṃ bhāgastaccaturguṇaṃ jalaṃ caturbhāgāvaśeṣaṃ niṣkvāthyāpaharedityeṣa kaṣāyapākakalpaḥ; snehaprasṛteṣu ṣaṭsu caturguṇaṃ dravamāvapya caturaścākṣasamān †bheṣajapiṇḍānityeṣa snehapākakalpaḥ/ etattu na samyak; kasmāt āgamāsiddhatvāt// ### [4.31.7](https://indike.org/pramana/in.med.samhita.susruta.4.31.7) palakuḍavādīnāmato mānaṃ tu vyākhyāsyāmaḥ tatra dvādaśa dhānyamāṣā madhyamāḥ suvarṇamāṣakaḥ, te ṣoḍaśa suvarṇam; athavā madhyamaniṣpāvā ekonaviṃśatirdharaṇaṃ, tāvyardhatṛtīyāni karṣaḥ; tataścordhvaṃ caturguṇamabhivardhayantaḥ palakuḍavaprasthāḍhakadroṇā ityabhiniṣpadyante, tulā punaḥ palaśataṃ, tāḥ punarviṃśatirbhāraḥ; śuṣkāṇāmidaṃ mānam, †ārdradravāṇāṃ ca dviguṇamiti// ### [4.31.8](https://indike.org/pramana/in.med.samhita.susruta.4.31.8) tatrānyatamaparimāṇasaṃmitānāṃ yathāyogaṃ tvakpatraphalamūlādīnāmātapapariśoṣitānāṃ chedyāni khaṇḍaśaśchedayitvā bhedyānyaṇuśo bhedayitvā+avakuṭyāṣṭaguṇena ṣoḍaśaguṇena vā+ambhasā+abhiṣicyasthālyāṃ caturbhāgāvaśiṣṭaṃ kvāthayitvā+apaharedityeṣa kaṣāyayākakalpaḥ/ snehāccaturbhāgāvaśiṣṭaṃ kvāthayitvā+apaharedityeṣa kaṣāyapākakalpaḥ/ snehāccaturguṇo dravaḥ, snehacaturthaṃśo bheṣajakalkaḥ, tadaikadhyaṃ saṃṛjya vipacedityeṣa snehapākakalpaḥ/ athavā tatrodakadroṇe tvakpatraphalamūlādīnāṃ tulāmāvāpya caturbhāgāvaśiṣṭaṃ niṣkvāthyāpaharedityeṣa kaṣāyapākakalpaḥ; snehakuḍave bheṣajapalaṃ piṣṭaṃ kalkaṃ caturguṇaṃ dravamāvāpya vipacedityeṣa snehapākakalpaḥ// ### [4.31.9](https://indike.org/pramana/in.med.samhita.susruta.4.31.9) bhavataścātra snehabheṣajatoyānāṃ pramāṇaṃ yatra neritam/ tatrāyaṃ vidhirāstheyo nirdiṣṭe tadvadeva tu// ### [4.31.10](https://indike.org/pramana/in.med.samhita.susruta.4.31.10) anukte dravakārye tu sarvatra salilaṃ matam/ kalkakvāthāvanirdeśe gaṇāttasmāt prayojayet// ### [4.31.11](https://indike.org/pramana/in.med.samhita.susruta.4.31.11) ata ūrdhvaṃ snehapākakramamupadekṣyāmaḥ/ sa tu trividhaḥ; tadyathā mṛduḥ, madhyamaḥ, khara iti/ tatra snehauṣadhivivekamātraṃ yatra bheṣajaṃ sa mṛduriti, madhūcchiṣṭamiva viśadamavilepi yatra bheṣajaṃ sa madhyamaḥ, kṛṣṇamavasannamīṣadviśadaṃ cikkaṇaṃ ca yatra bheṣajaṃ sa khara iti; ata ūrdhvaṃ dagdhasneho bhavati, taṃ punaḥ sādhu sādhayet/ tatra pānābhyavahārayormṛduḥ, nasyābhyaṅgayormadhyamaḥ, bastikarṇapūraṇayostu khara iti// ### [4.31.12](https://indike.org/pramana/in.med.samhita.susruta.4.31.12) bhavataścātra śabdasyoparame prāpte phenasyopaśame tathā/ gandhavarṇarasādīnāṃ saṃpattau siddhimādiśet// ### [4.31.13](https://indike.org/pramana/in.med.samhita.susruta.4.31.13) ghṛtasyaivaṃ vipakvasya jānīyāt kuśalo bhiṣak/ pheno+atimātraṃ tailasya śeṣaṃ ghṛtavadādiśet// ### [4.31.14](https://indike.org/pramana/in.med.samhita.susruta.4.31.14) ata ūrdhvaṃ snehapānakramamupadekṣyāmaḥ atha khalu laghukoṣṭhāyāturāya kṛtamaṅgalasvastivācanāyodayagiriśikharasaṃsthite prataptakanakanikarapītalohite savitari yathābalaṃ tailasya ghṛtasya vā mātrāṃ pātuṃ prayacchet/ pītamātre coṣṇodakenopaspṛśya sopānatko yathāsukhaṃ viharet// ### [4.31.15](https://indike.org/pramana/in.med.samhita.susruta.4.31.15) rūkṣakṣataviṣārtānāṃ vātapittavikāriṇām/ hīnamedhāsmṛtīnāṃ ca sarpiḥpānaṃ praśasyate// ### [4.31.16](https://indike.org/pramana/in.med.samhita.susruta.4.31.16) kṛmikoṣṭhānilāviṣṭāḥ pravṛddhakaphamedasaḥ/ pibeyustailasātmyāśca tailaṃ dārḍhyārthinaśca ye// ### [4.31.17](https://indike.org/pramana/in.med.samhita.susruta.4.31.17) vyāyāmakarśitāḥ śuṣkaretoraktā mahārujaḥ/ mahāgnimārutaprāṇā vasāyogyā narāḥ smṛtāḥ// ### [4.31.18](https://indike.org/pramana/in.med.samhita.susruta.4.31.18) krūrāśayāḥ kleśasahā vātārtā dīptavahnayaḥ/ majjānamāpnuyuḥ sarve sarpirvā svauṣadhānvitam// ### [4.31.19](https://indike.org/pramana/in.med.samhita.susruta.4.31.19) kevalaṃ paittike sarpirvātike lavaṇānvitam/ deyaṃ bahukaphe cāpi vyoṣakṣārasamāyutam// ### [4.31.20](https://indike.org/pramana/in.med.samhita.susruta.4.31.20) doṣāṇāmalpabhūyastvaṃ saṃsargaṃ samavekṣya ca/ yuñjyāttriṣaṣṭidhābhinnaiḥ samāsavyāsato rasaiḥ// ### [4.31.21](https://indike.org/pramana/in.med.samhita.susruta.4.31.21) snehasātmyaḥ kleśasahaḥ kāle nātyuṣṇaśītale/ acchameva pibet snehamacchapānaṃ hi pūjitam// ### [4.31.22](https://indike.org/pramana/in.med.samhita.susruta.4.31.22) śītakāle divā snehamuṣṇakāle pibenniśi/ vātapittādhiko rātrau vātaśleṣmādhiko divā// ### [4.31.23](https://indike.org/pramana/in.med.samhita.susruta.4.31.23) vātapittādhikasyoṣṇe tṛṇamūrcchonmādakārakaḥ/ śīte vātakaphārtasya gauravāruciśūlakṛt// ### [4.31.24](https://indike.org/pramana/in.med.samhita.susruta.4.31.24) snehapītasya cettṛṣṇā pibeduṣṇodakaṃ naraḥ/ evaṃ cānupaśāmyantyāṃ snehamuṣṇāmbunā vamet// ### [4.31.25](https://indike.org/pramana/in.med.samhita.susruta.4.31.25) dihyācchītaiḥ śiraḥ śītaṃ toyaṃ cāpyavagāhayet/ yā mātrā parijīryeta caturbhāgagate+ahani// ### [4.31.26](https://indike.org/pramana/in.med.samhita.susruta.4.31.26) sā mātrā dīpayatyagnimalpadoṣe ca pūjitā/ yā mātrā parijīryeta tathā+ardhadivase gate// ### [4.31.27](https://indike.org/pramana/in.med.samhita.susruta.4.31.27) sā vṛṣyā bṛṃhaṇī yā ca madhyadoṣe ca pūjitā/ yā mātrā parijīryeta caturbhāgāvaśeṣite// ### [4.31.28](https://indike.org/pramana/in.med.samhita.susruta.4.31.28) snehanīyā ca sā mātrā bahudoṣe ca pūjitā/ yā mātrā parijīryettu tathā pariṇate+ahani// ### [4.31.29](https://indike.org/pramana/in.med.samhita.susruta.4.31.29) glānimūrcchāmadān hitvā sā mātrā pūjitā bhavet/ ahorātrādasaṃduṣṭā yā mātrā parijīryati// ### [4.31.30](https://indike.org/pramana/in.med.samhita.susruta.4.31.30) sā tu kuṣṭhavoṣonmādagrahāpasmāranāśinī/ yathāgni prathamāṃ mātrāṃ pāyayeta vicakṣaṇaḥ// ### [4.31.31](https://indike.org/pramana/in.med.samhita.susruta.4.31.31) pīto hyatibahuḥ sneho janayet prāṇasaṃśayam/ mithyācārādbahutvādvā yasya sneho na jīryati// ### [4.31.32](https://indike.org/pramana/in.med.samhita.susruta.4.31.32) viṣṭabhya cāpi jīryettaṃ vāriṇoṣṇena vāmayet/ tataḥ snehaṃ punardadyāllaghukoṣṭhāya dehine/ jīrṇājīrṇaviśaṅkāyāṃ snehasyoṣṇodakaṃ pibet// ### [4.31.33](https://indike.org/pramana/in.med.samhita.susruta.4.31.33) tenodgāro bhavecchuddho bhaktaṃ rucistathā/ syuḥ pacyamāne tṛḍdāhabhramasādāratiklamāḥ// ### [4.31.34](https://indike.org/pramana/in.med.samhita.susruta.4.31.34) pariṣicyādbhiruṣṇābhirjīrṇasnehaṃ tato naram/ yavāgūṃ pāyayeccoṣṇāṃ kāmaṃ klinnālpataṇḍulām// ### [4.31.35](https://indike.org/pramana/in.med.samhita.susruta.4.31.35) deyau yūṣarasau vā+api sugandhī snehavarjitau/ kṛtau vā+atyalpasarpiṣkau vilepī vā† vidhīyate// ### [4.31.36](https://indike.org/pramana/in.med.samhita.susruta.4.31.36) pibettryahaṃ caturahaṃ pañcāhaṃ ṣaḍahaṃ tathā/ saptarātrāt paraṃ snehaḥ sātmyībhavati sevitaḥ// ### [4.31.37](https://indike.org/pramana/in.med.samhita.susruta.4.31.37) sukumāraṃ kṛśaṃ vṛddhaṃ śiśuṃ snehadviṣaṃ tathā/ tṛṣṇārtamuṣṇakāle ca saha bhaktena pāyayet// ### [4.31.38](https://indike.org/pramana/in.med.samhita.susruta.4.31.38) pippalyo lavaṇaṃ snehāścatvāro dadhimastukaḥ/ pītamaikadhyametaddhi sadyaḥsnehanamucyate// ### [4.31.39](https://indike.org/pramana/in.med.samhita.susruta.4.31.39) bhṛṣṭā māṃsarase snigdhā yavāgūḥ sūpakalpitā/ †prakṣudrā pīyamānā tu sadyaḥsnehanamucyate// ### [4.31.40](https://indike.org/pramana/in.med.samhita.susruta.4.31.40) sarpiṣmatī payaḥsiddhā yavāgūḥ svalpataṇḍulā/ sasvoṣṇā sevyamānā tu sadyaḥsnehanamucyate// ### [4.31.41](https://indike.org/pramana/in.med.samhita.susruta.4.31.41) pippalyo lavaṇaṃ sarpistilapiṣṭaṃ varāhajā/ vasā ca pītamaikadhyaṃ sadyaḥsnehanamucyate// ### [4.31.42](https://indike.org/pramana/in.med.samhita.susruta.4.31.42) śarkarācūrṇasaṃsṛṣṭe dohanasthe ghṛte tu gām/ dugdhvā kṣīraṃ pibedrūkṣaḥ sadyaḥsnehanamucyate// ### [4.31.43](https://indike.org/pramana/in.med.samhita.susruta.4.31.43) yavakolakulatthānāṃ kvātho māgadhikānvitaḥ/ payo dadhi surā ceti ghṛtamapyaṣṭamaṃ bhavet†// ### [4.31.44](https://indike.org/pramana/in.med.samhita.susruta.4.31.44) siddhametairghṛtaṃ pītaṃ sadyaḥsnehanamuttamam/ rājñe rājasamebhyo vā deyametadghṛtottamam// ### [4.31.45](https://indike.org/pramana/in.med.samhita.susruta.4.31.45) balahīneṣu vṛddheṣu mṛdvagnistrīhatātmasu/ alpadoṣeṣu yojyāḥ syurye yogāḥ samyagīritāḥ// ### [4.31.46](https://indike.org/pramana/in.med.samhita.susruta.4.31.46) vivarjayet snehapānamajīrṇī taruṇajvarī†/ durbalo+arocakī sthūlo mūrcchārto madapīḍitaḥ// ### [4.31.47](https://indike.org/pramana/in.med.samhita.susruta.4.31.47) chardyarditaḥ pipāsārtaḥ śrāntaḥ pānaklamānvitaḥ/ dattabastirviriktaśca vānto yaścāpi mānavaḥ// ### [4.31.48](https://indike.org/pramana/in.med.samhita.susruta.4.31.48) akāle durdine caiva na ca snehaṃ pibennaraḥ/ akāle ca prasūtā strī snehapānaṃ vivarjayet// ### [4.31.49](https://indike.org/pramana/in.med.samhita.susruta.4.31.49) snehapānādbhavantyeṣāṃ nṝṇāṃ nānāvidhā gadāḥ/ gadā vā kṛcchratāṃ yānti na sidhyantyathavā punaḥ// ### [4.31.50](https://indike.org/pramana/in.med.samhita.susruta.4.31.50) garbhāśaye+avaśeṣāḥ syū raktakledamalāstataḥ/ snehaṃ jahyānniṣeveta pācanaṃ rūkṣameva ca// ### [4.31.51](https://indike.org/pramana/in.med.samhita.susruta.4.31.51) daśarātrāttataḥ snehaṃ yathāvadavacārayet/ purīṣaṃ grathitaṃ rūkṣaṃ kṛcchrādannaṃ vipacyate// ### [4.31.52](https://indike.org/pramana/in.med.samhita.susruta.4.31.52) uro vidahate vāyuḥ koṣṭhādupari dhāvati/ durvarṇo durbalaścaiva rūkṣo bhavati mānavaḥ// ### [4.31.53](https://indike.org/pramana/in.med.samhita.susruta.4.31.53) susnigdhā tvagviṭśaithilyaṃ dīpto+agnirmṛdugātratā/ glānirlāghavamaṅgānāmadhastāt snehadarśanam/ samyaksnigdhasya liṅgāni snehodvegastathaiva ca// ### [4.31.54](https://indike.org/pramana/in.med.samhita.susruta.4.31.54) bhaktadveṣo mukhasrāvo gudadāhaḥ pravāhikā/ purīṣātipravṛttiśca bhṛśasnigdhasya lakṣaṇam// ### [4.31.55](https://indike.org/pramana/in.med.samhita.susruta.4.31.55) rūkṣasya snehanaṃ snehairatisnigdhasya rūkṣaṇam/ śyāmākakoradūṣānnatakrapiṇyākaśaktubhiḥ// ### [4.31.56](https://indike.org/pramana/in.med.samhita.susruta.4.31.56) dīptāntaragniḥ pariśuddhakoṣṭhaḥ pratyagradhāturbalavarṇayuktaḥ/ dṛḍhendriyo mandajaraḥ śatāyuḥ snehopasevī† puruṣo bhavettu// ### [4.31.57](https://indike.org/pramana/in.med.samhita.susruta.4.31.57) sneho hito durbalahnidehasandhukṣaṇe vyādhinipīḍitasya/ balānvitau bhojanadoṣajātaiḥ pramardituṃ tau sahasā na sādhyau// ### [4.31.57\_1](https://indike.org/pramana/in.med.samhita.susruta.4.31.57_1) iti suśrutasaṃhitāyāṃ cikitsāsthāne snehopayaugikacikitsitaṃ nāmaikatriṃśattamo+adhyāyaḥ //31// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.115.2) — Ḍalhaṇa, Sanskrit ## Linked texts (9) - [Siddhayoga (Vṛndamādhava)](https://indike.org/pramana/in.med.sangraha.siddhayoga.71.2) — Vṛnda, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.1.13) — Śārṅgadhara (physician), Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.67.2) — Cakrapāṇidatta, Sanskrit - [ĀYURVEDĪYAPARIBHĀṢĀ](https://indike.org/pramana/in.med.paribhasa.ayurvediyaparibhasa.2.38) — Gaṅgādhara, Sanskrit - [Gadanigraha](https://indike.org/pramana/in.med.sangraha.gadanigraha.113.21) — Soḍhala, Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.8.10) — Trimalla, Sanskrit - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.8.10) — Trimalla, Sanskrit - [Ārogyacintāmaṇi (Dāmodaramiśra)](https://indike.org/pramana/in.med.sangraha.arogyacintamani-damodara.94.3) — Dāmodaramiśra, Sanskrit - [Vīrasiṃhāvaloka](https://indike.org/pramana/in.med.sangraha.karmavipaka.virasimhavaloka.33.p4.1) — Vīrasiṃha, Sanskrit --- Source: [https://indike.org/pramana/in.med.samhita.susruta.4.31](https://indike.org/pramana/in.med.samhita.susruta.4.31) · Pramāṇa