[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.32 # The Compendium of Suśruta 4.32: dvātriṃśattamo+adhyāyaḥ/ Suśrutasaṃhitā 4.32 - **Language:** Sanskrit ### dvātriṃśattamo+adhyāyaḥ/ ### [4.32.1](https://indike.org/pramana/in.med.samhita.susruta.4.32.1) athātaḥ svedāvacāraṇīyaṃ cikitsitaṃ vyākhyāsyāmaḥ// ### [4.32.2](https://indike.org/pramana/in.med.samhita.susruta.4.32.2) yathovāca bhagavān dhanvantariḥ// ### [4.32.3](https://indike.org/pramana/in.med.samhita.susruta.4.32.3) caturvidhaḥ svedaḥ tadyathā tāpasveda, ūṣmasveda, upanāhasvedo, dravasveda iti atra sarvasvedavikalpāvarodhaḥ// ### [4.32.4](https://indike.org/pramana/in.med.samhita.susruta.4.32.4) tatra tāpasvedaḥ pāṇikāṃsyakandukakapālavālukāvastraiḥ prayujyate, śayānasya cāṅgatāpo bahuśaḥ khādirāṅgārairiti†// ### [4.32.5](https://indike.org/pramana/in.med.samhita.susruta.4.32.5) ūṣmasvedastu kapālapāṣāśeṣṭakālohapiṇḍānagnivarṇānadbhirāsiñcedamladravyairvā, tairārdrālaktakapariveṣṭitairaṅgapradeśaṃ† svedayet/ māṃsarasapayodadhisnehadhānyāmlavātaharapatrabhaṅgakvāthapūrṇāṃ vā kumbhīmanutaptāṃ prāvṛtyoṣmāṇaṃ gṛhṇīyāt/ pārśvacchidreṇa vā kumbhenādhomukhena tasyā mukhamabhisandhāya tasmiñchidrehastiśuṇḍākārāṃ nāḍīṃ praṇidhāya taṃ svedayet// ### [4.32.6](https://indike.org/pramana/in.med.samhita.susruta.4.32.6) sukhopaviṣṭaṃ svabhyaktaṃ guruprāvaraṇāvṛtam/ hastiśuṇḍikayā nāḍyā svedayedvātarogiṇam/ sukhā sarvāṅgagā hyeṣā na ca kliśnāti mānavam// ### [4.32.7](https://indike.org/pramana/in.med.samhita.susruta.4.32.7) vyāmārdhamātrā trirvakrā hastihastasamākṛtiḥ/ svedanārthe hitā nāḍī kailiñjī hastiśuṇḍikā// ### [4.32.8](https://indike.org/pramana/in.med.samhita.susruta.4.32.8) puruṣāyāmamātrāṃ ca bhūmimutkīrya khādiraiḥ/ kāṣṭhairdagdhvā tathā+abhyukṣya kṣīradhānyāmlavāribhiḥ// ### [4.32.9](https://indike.org/pramana/in.med.samhita.susruta.4.32.9) patrabhaṅgairavacchādya śayānaṃ svedayettataḥ/ pūrvavat svedayeddagdhvā bhasmāpohyāpi vā śilām// ### [4.32.10](https://indike.org/pramana/in.med.samhita.susruta.4.32.10) pūrvavat kuṭīṃ vā caturdvārāṃ kṛtvā tasyāmupaviṣṭasyāntaścaturdvāre+aṅgārānupasandhāya taṃ svedayet// ### [4.32.11](https://indike.org/pramana/in.med.samhita.susruta.4.32.11) †kośadhānyāni vā samyagupasvedyāstīrya kiliñje+anyasmin vā tatpratirūpake śayānaṃ prāvṛtya svedayet; evaṃ pāṃśugośakṛttuṣabusapalāloṣmabhiḥ svedayet// ### [4.32.12](https://indike.org/pramana/in.med.samhita.susruta.4.32.12) upanāhasvedastu vātaharamūlakalkairamlapiṣṭairlavaṇapragāḍhaiḥ susnigdhaiḥ sukhoṣṇaiḥ pradihya svedayet/ evaṃ kākolyādibhirelādibhiḥ surasādibhistilātasīsarṣapakalkaiḥ kṛśarāpāyasotkārikābhirveśavāraiḥ sālvaṇairvā tanuvastrāvanaddhaiḥ svedayet// ### [4.32.13](https://indike.org/pramana/in.med.samhita.susruta.4.32.13) dravasvedastu vātaharadravyakvāthapūrṇe koṣṇakaṭāhe† droṇyāṃ vā+avagāhya svedayet, evaṃ payomāṃsarasayūṣatailadhānyāmlaghṛtavasāmūtreṣvavagāheta; etaireva †sukhoṣṇaiḥ kaṣāyaiśca pariṣiñcediti// ### [4.32.14](https://indike.org/pramana/in.med.samhita.susruta.4.32.14) tatra tāpoṣmasvedau viśeṣataḥ śleṣmaghnau, upanāhasvedo vātaghnaḥ, anyatarasmin pittasaṃsṛṣṭe dravasveda iti// ### [4.32.15](https://indike.org/pramana/in.med.samhita.susruta.4.32.15) kaphamedonvite vāyau nivātātapaguruprāvaraṇaniyuddhādhvavyāyāmabhāraharaṇāmarṣaiḥ svedamutpādayediti// ### [4.32.16](https://indike.org/pramana/in.med.samhita.susruta.4.32.16) bhavanti cātra caturvidho yo+abhihito dvidhā svedaḥ prayujyate/ sarvasminneva dehe tu dehasyāvayave tathā// ### [4.32.17](https://indike.org/pramana/in.med.samhita.susruta.4.32.17) yeṣāṃ nasyaṃ vidhātavyaṃ bastiścaiva hi dehinām/ śodhanīyāśca ye kecit pūrvaṃ svedyāstu te matāḥ// ### [4.32.18](https://indike.org/pramana/in.med.samhita.susruta.4.32.18) paścāt svedyā hṛte śalye mūḍhagarbhā+anupadravā/ samyak prajātā kāle yā paścāt svedyā vijānatā// ### [4.32.19](https://indike.org/pramana/in.med.samhita.susruta.4.32.19) svedyaḥ pūrvaṃ ca paścācca bhagandaryarśasastathā/ aśmaryā cāturo jantuḥ śeṣāñchāstre pracakṣmahe// ### [4.32.20](https://indike.org/pramana/in.med.samhita.susruta.4.32.20) nānabhyakte nāpi cāsnigdhadehe svedo yojyaḥ svedavidbhiḥ kathañcit/ dṛṣṭaṃ loke kāṣṭhamasnigdhamāśu gacchedbhaṅgaṃ svedayogairgṛhītam// ### [4.32.21](https://indike.org/pramana/in.med.samhita.susruta.4.32.21) snehaklinnā dhātusaṃsthāśca doṣāḥ svasthānasthā ye ca mārgeṣu līnāḥ/ samyak svedairyojitaiste dravatvaṃ prāptāḥ koṣṭhaṃ †śodhanairyāntyaśeṣam// ### [4.32.22](https://indike.org/pramana/in.med.samhita.susruta.4.32.22) agnerdīptiṃ mārdavaṃ tvakprasādaṃ bhaktaśraddhāṃ srotasāṃ nirmalatvam/ kuryāt svedo hanti nidrāṃ satandrāṃ sandhīn stabdhāṃśceṣṭayedāśu yuktaḥ// ### [4.32.23](https://indike.org/pramana/in.med.samhita.susruta.4.32.23) svedāsrāvo vyādhihānirlaghutvaṃ śītārthitvaṃ mārdavaṃ cāturasya/ samyaksvinne lakṣaṇaṃ prāhuretanmithyāsvinne vyatyayenaitadeva// ### [4.32.24](https://indike.org/pramana/in.med.samhita.susruta.4.32.24) svinne+atyarthaṃ sandhipīḍā vidāhaḥ sphoṭotpattiḥ pittaraktaprakopaḥ/ mūrcchā bhrāntirdāhatṛṣṇe klamaśca kuryāttūrṇaṃ tatra śītaṃ vidhānam// ### [4.32.25](https://indike.org/pramana/in.med.samhita.susruta.4.32.25) pāṇḍurmehī pittaraktī kṣayārtaḥ kṣāmo+ajīrṇī †codarārto viṣārtaḥ/ tṛḍcchardyārto garbhiṇī pītamadyo †naite svedyā yaśca martyo†atisārī/ svedādeṣāṃ yānti dehā vināśaṃ nosādhyatvaṃ yānti caiṣāṃ vikārāḥ// ### [4.32.26](https://indike.org/pramana/in.med.samhita.susruta.4.32.26) svedaiḥ sādhyo durbalo+ajīrṇabhaktaḥ syātāṃ ceddvau svedanīyau tatastau/ eteṣāṃ svedasādhyā ye vyādhayasteṣu buddhimān/ mṛdūn svedān prayuñjīta tathā hṛnmuṣkadṛṣṭiṣu// ### [4.32.27](https://indike.org/pramana/in.med.samhita.susruta.4.32.27) sarvān svedānnivāte ca jīrṇānnasyāvacārayet/ snehābhyaktaśarīrasya śītairācchādya cakṣuṣī// ### [4.32.28](https://indike.org/pramana/in.med.samhita.susruta.4.32.28) svidyamānasya ca muhurhṛdayaṃ śītalaiḥ spṛśet/ samyaksvinnaṃ vimṛditaṃ snātamuṣṇāmbubhiḥ śanaiḥ// ### [4.32.29](https://indike.org/pramana/in.med.samhita.susruta.4.32.29) svabhyaktaṃ prāvṛtāṅgaṃ ca nivātaśaraṇasthitam/ bhojayedanabhiṣyandi sarvaṃ cācāramādiśet// ### [4.32.29\_1](https://indike.org/pramana/in.med.samhita.susruta.4.32.29_1) iti suśrutasaṃhitāyāṃ cikitsāsthāne svedāvacāraṇīyaṃ cikitsitaṃ nāma dvātriṃśo+adhyāyaḥ //32// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.116.2) — Ḍalhaṇa, Sanskrit ## Linked texts (7) - [Siddhayoga (Vṛndamādhava)](https://indike.org/pramana/in.med.sangraha.siddhayoga.72.3) — Vṛnda, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.4.19) — Śārṅgadhara (physician), Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.68.12) — Cakrapāṇidatta, Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.10.15) — Trimalla, Sanskrit - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.10.15) — Trimalla, Sanskrit - [Gadanigraha](https://indike.org/pramana/in.med.sangraha.gadanigraha.114.33) — Soḍhala, Sanskrit - [Vīrasiṃhāvaloka](https://indike.org/pramana/in.med.sangraha.karmavipaka.virasimhavaloka.33.p4.2) — Vīrasiṃha, Sanskrit --- Source: [https://indike.org/pramana/in.med.samhita.susruta.4.32](https://indike.org/pramana/in.med.samhita.susruta.4.32) · Pramāṇa