[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.33 # The Compendium of Suśruta 4.33: trayastriṃśattamo+adhyāyaḥ/ Suśrutasaṃhitā 4.33 - **Language:** Sanskrit ### trayastriṃśattamo+adhyāyaḥ/ ### [4.33.1](https://indike.org/pramana/in.med.samhita.susruta.4.33.1) athāto vamanavirecanasādhyopadravacikitsitaṃ vyākhyāsyāmaḥ// ### [4.33.2](https://indike.org/pramana/in.med.samhita.susruta.4.33.2) yathovāca bhagavān dhanvantariḥ// ### [4.33.3](https://indike.org/pramana/in.med.samhita.susruta.4.33.3) doṣāḥ kṣīṇā bṛṃhayitavyāḥ, kupitāḥ praśamayitavyāḥ, vṛddhā nirhartavyāḥ, samāḥ paripālyā iti siddhāntaḥ// ### [4.33.4](https://indike.org/pramana/in.med.samhita.susruta.4.33.4) prādhānyena vamanavirecane vartate nirharaṇe doṣāṇām/ tasmāttayorvidhānamucyamānamupadhāraya// ### [4.33.5](https://indike.org/pramana/in.med.samhita.susruta.4.33.5) athāturaṃ snigdhaṃ svinnamabhiṣyandibhirāhārairanavabaddhadoṣamavalokya śvo vamanaṃ pāyayitā+asmīti saṃbhojayettīkṣṇāgniṃ balavantaṃ bahudoṣaṃ mahāvyādhiparītaṃ vamanasātmyaṃ ca// ### [4.33.6](https://indike.org/pramana/in.med.samhita.susruta.4.33.6) bhavati cātra peśalairvividhairannairdoṣānutkleśya dehinaḥ/ snigdhasvinnāya vamanaṃ dattaṃ samyak pravartate// ### [4.33.7](https://indike.org/pramana/in.med.samhita.susruta.4.33.7) athāparedyuḥ pūrvāhṇe sādhāraṇe kāle vamanadravyakaṣāyakalkacūrṇasnehānāmanyatamasya mātrāṃ pāyayitvā vāmayedyathāyogaṃ koṣṭhaviśeṣamavekṣya; asātmyabībhatsadurgandhadurdarśanāni ca vamanāni vidadhyāt, ato viparītāni virecanāni; tatra sukumāraṃ kṛśaṃ bālaṃ vṛddhaṃ bhīruṃ vā vamanasādhyeṣu vikāreṣu kṣīradadhitakrayavāgūnāmanyatamamākaṇṭhaṃ pāyayet, pītauṣadhaṃ ca pāṇibhiragnitaptaiḥ pratāpyamānaṃ muhūrtamupekṣeta; tasya ca svedaprādurbhāveṇa śithilatāmāpannaṃ svebhyaḥ sthānebhyaḥ pracalitaṃ kukṣimanusṛtaṃ jānīyāt, tataḥ pravṛttahṛllāsaṃ jñātvā jānumātrāsanopaviṣṭamāptairlalāṭe pṛṣṭhe pārśvayoḥ kaṇṭhe ca pāṇibhiḥ suparigṛhītamaṅgulīgandharvahastotpalanālānāmanyatamena kaṇṭhamabhispṛśantaṃ vāmayettāvadyāvat samyagvāntaliṅgānīti// ### [4.33.8](https://indike.org/pramana/in.med.samhita.susruta.4.33.8) bhavataścātra kaphaprasekaṃ hṛdyāviśuddhiṃ kaṇḍūṃ ca duścharditaliṅgamāhuḥ/ pittātiyogaṃ ca cisaṃjñatāṃ ca hṛtkaṇṭhapīḍāmapi cātivānte// ### [4.33.9](https://indike.org/pramana/in.med.samhita.susruta.4.33.9) pitte kaphasyānu sukhaṃ pravṛtte śuddheṣu hṛtkaṇṭhaśiraḥsu cāpi/ laghau ca dehe kaphasaṃsrave ca sthite suvāntaṃ puruṣaṃ vyavasyet// ### [4.33.10](https://indike.org/pramana/in.med.samhita.susruta.4.33.10) samyagvāntaṃ cainamabhisamīkṣya snehanavirecanaśamanānāṃ dhūmānāmanyatamaṃ sāmarthyataḥ pāyayitvā++ācārikamādiśet// ### [4.33.11](https://indike.org/pramana/in.med.samhita.susruta.4.33.11) bhavanti cātra tato+aparāhṇe śuciśuddhadehamuṣṇābhiraddbhiḥ pariṣiktagātram/ kulatthamudgāḍhakijāṅgalānāṃ yūṣai rasairvā+apyupabhojayettu// ### [4.33.12](https://indike.org/pramana/in.med.samhita.susruta.4.33.12) kāsopalepasvarabhedanidrātandrāsyadaurgandhyaviṣopasargāḥ/ kaphaprasekagrahaṇīpradoṣā na santi jantorvamataḥ kadācit// ### [4.33.13](https://indike.org/pramana/in.med.samhita.susruta.4.33.13) chinne tarau puṣpaphalaprarohā yathā vināśaṃ sahasā vrajanti/ tathā hṛte śleṣmaṇi śodhanena tajjā vikārāḥ praśamaṃ prayānti// ### [4.33.14](https://indike.org/pramana/in.med.samhita.susruta.4.33.14) na vāmayettaimirikordhvavātagulmodaraplīhakṛmiśramārtān†/ sthūlakṣatakṣīṇakṛśātivṛddhamūtrāturān kevalavātarogān// ### [4.33.15](https://indike.org/pramana/in.med.samhita.susruta.4.33.15) svaropaghātādhyayanaprasaktaduśchardiduḥkoṣṭhatṛḍārtabālām/ ūrdhvāsrapittikṣudhitātirūkṣagarbhiṇyudāvartirūhitāṃśca// ### [4.33.16](https://indike.org/pramana/in.med.samhita.susruta.4.33.16) avamyavamanādrogāḥ kṛcchratāṃ yānti dehinām/ asādhyatāṃ vā gacchanti naite vāmyāstataḥ smṛtāḥ// ### [4.33.17](https://indike.org/pramana/in.med.samhita.susruta.4.33.17) ete+apyajīrṇavyathitā vāmyā ye ca viṣāturāḥ/ atīva colbaṇakaphāste ca syurmadhukāmbunā// ### [4.33.18](https://indike.org/pramana/in.med.samhita.susruta.4.33.18) vāmyāstu viṣaśoṣastanyadoṣamandāgnyunmādāpasmāraślīpadārbudavidārikāmedomehagarajvarārucyapacyāmātīsārahṛdrogacittavibhramavisarpavidradhyajīrṇamukhaprasekahṛllāsaśvāsakāsapīnasapūtīnāsakaṇṭhauṣṭhavaktrapākakarṇasrāvādhijihvopajihvikāgalaśuṇḍikādhaḥśoṇitapittinaḥ kaphasthānajeṣu vikāreṣvanye ca kaphavyādhiparītā iti// ### [4.33.19](https://indike.org/pramana/in.med.samhita.susruta.4.33.19) virecanamapi snigdhasvinnāya vāntāya ca deyam; avāntasya hi samyagviriktasyāpi sato+adhaḥ srastaḥ śleṣmā grahaṇīṃ chādayati, gauravamāpādayati, pravāhikāṃ vā janayati// ### [4.33.20](https://indike.org/pramana/in.med.samhita.susruta.4.33.20) athāturaṃ śvo virecanaṃ pāyayitā+asmīti pūrvāhṇe laghu bhojayet, phalāmlamuṣṇodakaṃ cainamanupāyayet/ athāpare+ahani vigataśleṣmadhātumāturopakramaṇīyādavekṣyāturamathāsmai auṣadhamātrāṃ pātuṃ prayacchet// ### [4.33.21](https://indike.org/pramana/in.med.samhita.susruta.4.33.21) tatra mṛduḥ, krūro, madhyama iti trividhaḥ koṣṭho bhavati/ tatra bahupitto mṛduḥ, sa dugdhenāpi viricyate; bahuvātaśleṣmā krūraḥ, sa durvirecyaḥ; samadoṣo madhyamaḥ, sa sādhāraṇa iti/ tatra mṛdau mātrā mṛdvī, tīkṣṇā krūre, madhye madhyā kartavyeti/ pītauṣadhaśca tanmanāḥ śayyābhyāśe virecyate// ### [4.33.22](https://indike.org/pramana/in.med.samhita.susruta.4.33.22) virecanaṃ pītavāṃstu na vegān dhārayedbudhaḥ/ nivātaśāyī śītāmbu na spṛśenna pravāhayet// ### [4.33.23](https://indike.org/pramana/in.med.samhita.susruta.4.33.23) yathā ca vamane prasekauṣadhakaphapittānilāḥ krameṇa gacchanti, evaṃ virecane mūtrapurīṣapittauṣadhakaphā iti// ### [4.33.24](https://indike.org/pramana/in.med.samhita.susruta.4.33.24) bhavanti cātra hṛtkukṣyaśuddhiḥ paridāhakaṇḍūviṇmūtrasaṅgāśca na sadvirikte/ mūrcchāgudabhraṃśakaphātiyogāḥ śūlodgamaścātiviriktaliṅgam// ### [4.33.25](https://indike.org/pramana/in.med.samhita.susruta.4.33.25) gateṣu doṣeṣu kaphānviteṣu nābhyā† laghutve manasaśca tuṣṭau/ gate+anile cāpyanulomabhāvaṃ samyagviriktaṃ manujaṃ vyavasyet// ### [4.33.26](https://indike.org/pramana/in.med.samhita.susruta.4.33.26) mandāgnimakṣīṇamasadviriktaṃ na pāyayetāhani tatra peyām/ kṣīṇaṃ tṛṣārtaṃ suvirecitaṃ ca tanvīṃ sukhoṣṇāṃ laghu pāyayecca// ### [4.33.27](https://indike.org/pramana/in.med.samhita.susruta.4.33.27) buddheḥ prasādaṃ balamindiryāṇāṃ dhātusthiratvaṃ balamagnidīptim/ cirācca pākaṃ vayasaḥ karoti virecanaṃ samyagupāsyamānam// ### [4.33.28](https://indike.org/pramana/in.med.samhita.susruta.4.33.28) yathaudakānāmudake+apanīte carasthirāṇāṃ bhavati praṇāśaḥ/ pitte hṛte tvevamupadravāṇāṃ pittātmakānāṃ bhavati praṇāśaḥ// ### [4.33.29](https://indike.org/pramana/in.med.samhita.susruta.4.33.29) mandāgnyatisnehitabālavṛddhasthūlāḥ kṣatakṣīṇabhayopataptāḥ/ śrāntastṛṣārto+aparijīrṇabhakto garbhiṇyadho gacchati yasya cāsṛk// ### [4.33.30](https://indike.org/pramana/in.med.samhita.susruta.4.33.30) navapraviśyāyamadātyayī ca navajravī yā ca navaprasūtā/ śalyārditāścāpyavirecanīyāḥ snehādibhirye tvanupaskṛtāśca// ### [4.33.31](https://indike.org/pramana/in.med.samhita.susruta.4.33.31) virecanairyānti narā vināśamajñaprayuktairavirecanīyāḥ// ### [4.33.32](https://indike.org/pramana/in.med.samhita.susruta.4.33.32) virecyāstu jvaragarārucyarśo+arbudodaragranthividradhipāṇḍurogāpasmārahṛdrogavātaraktabhagandaracchardiyonirogavisarpagulmapakvāśayarugvibandhavisūcikālasakamūtrāghātakuṣṭhavisphoṭakapramehānāhaplīhaśophavṛddhiśastrakṣatakṣārāgnidagdhaduṣṭavraṇākṣipākakācatimirābhiṣyandaśiraḥkarṇākṣināsāsyagudameḍhradāhordhvaraktapittakṛmikoṣṭhinaḥ pittasthānajeṣvanyeṣu ca vikāreṣvanye ca paittikavyādhiparītā iti// ### [4.33.33](https://indike.org/pramana/in.med.samhita.susruta.4.33.33) saratvasaukṣmyataikṣṇyauṣṇyavikāśitvairvirecanam/ vamanaṃ tu hareddoṣaṃ prakṛtyā gatamanyathā// ### [4.33.34](https://indike.org/pramana/in.med.samhita.susruta.4.33.34) yātyadho doṣamādāya pacyamānaṃ virecanam/ guṇotkarṣāhvrajatyūrdhvamapakvaṃ vamanaṃ punaḥ// ### [4.33.35](https://indike.org/pramana/in.med.samhita.susruta.4.33.35) mṛdukoṣṭhasya dīptāgneratitīkṣṇaṃ virecanam/ na samyaṅnirhareddoṣānativegapradhāvitam†// ### [4.33.36](https://indike.org/pramana/in.med.samhita.susruta.4.33.36) pītaṃ yadauṣadhaṃ prātarbhuktapākasame kṣaṇe/ paktiṃ gacchati doṣāṃśca nirharettat praśasyate// ### [4.33.37](https://indike.org/pramana/in.med.samhita.susruta.4.33.37) durbalasya calān doṣānalpānalpān punaḥ punaḥ/ haret prabhūtānakpāṃstu śamayet pracyutānapi// ### [4.33.38](https://indike.org/pramana/in.med.samhita.susruta.4.33.38) hareddoṣāṃścalān pakvān balino durbalasya vā/ calā hyupekṣitā doṣāḥ kleśayeyuściraṃ naram// ### [4.33.39](https://indike.org/pramana/in.med.samhita.susruta.4.33.39) mandāgniṃ krūrakoṣṭhaṃ ca sakṣāralavaṇairghṛtaiḥ/ sandhukṣitāgniṃ snigdhaṃ ca svinnaṃ caiva virecayet// ### [4.33.40](https://indike.org/pramana/in.med.samhita.susruta.4.33.40) snigdhasvinnasya bhaiṣajyairdoṣastūtkleśito balāt/ nilīyate na mārgeṣu snigdhe bhāṇḍa ivodakam// ### [4.33.41](https://indike.org/pramana/in.med.samhita.susruta.4.33.41) na cātisnehapītastu pibet snehavirecanam/ doṣāḥ pracalitāḥ† sthānādbhūyaḥ śliṣyanti vartmasu// ### [4.33.42](https://indike.org/pramana/in.med.samhita.susruta.4.33.42) viṣābhighātapiḍakāśophapāṇḍuvisarpiṇaḥ/ nātisnigdhā viśodhyāḥ syustathā kuṣṭhipramehiṇaḥ// ### [4.33.43](https://indike.org/pramana/in.med.samhita.susruta.4.33.43) virūkṣya snehasātmyaṃ tu bhūyaḥ saṃsnehya śodhayet/ tena doṣā hṛtāstasya bhavanti balavardhanāḥ// ### [4.33.44](https://indike.org/pramana/in.med.samhita.susruta.4.33.44) prāgapītaṃ naraṃ śodhyaṃ pāyayetauṣadhaṃ mṛdu/ tato vijñātakoṣṭhasya kāryaṃ saṃśodhanaṃ punaḥ// ### [4.33.45](https://indike.org/pramana/in.med.samhita.susruta.4.33.45) sukhaṃ dṛṣṭaphalaṃ hṛdyamalpamātraṃ mahāguṇam/ vyāpatsvalpātyayaṃ cāpi pibennṛpatirauṣadham// ### [4.33.46](https://indike.org/pramana/in.med.samhita.susruta.4.33.46) snehasvedāvanabhyasya yastu saṃśodhanaṃ pibet/ dāru śuṣkamivānāme dehastasya viśīryate// ### [4.33.47](https://indike.org/pramana/in.med.samhita.susruta.4.33.47) snehasvedapracalitā rasaiḥ snigdhairudīritāḥ/ doṣāḥ koṣṭhagatā jantoḥ sukhā hartuṃ viśodhanaiḥ// ### [4.33.47\_1](https://indike.org/pramana/in.med.samhita.susruta.4.33.47_1) iti suśrutasaṃhitāyāṃ cikitsāsthāne vamanavirecanasādhyopadravacikitsitaṃ nāma trayastriṃśo+adhyāyaḥ //33// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.116.24) — Ḍalhaṇa, Sanskrit ## Linked texts (10) - [Siddhayoga (Vṛndamādhava)](https://indike.org/pramana/in.med.sangraha.siddhayoga.73.12) — Vṛnda, Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.69.24) — Cakrapāṇidatta, Sanskrit - [Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing)](https://indike.org/pramana/in.med.samhita.caraka!cakrapani*jadavji.7.1.13.1) — Sanskrit - [Gadanigraha](https://indike.org/pramana/in.med.sangraha.gadanigraha.115.89) — Soḍhala, Sanskrit - [Ārogyacintāmaṇi (Dāmodaramiśra)](https://indike.org/pramana/in.med.sangraha.arogyacintamani-damodara.94.16) — Dāmodaramiśra, Sanskrit - [Vīrasiṃhāvaloka](https://indike.org/pramana/in.med.sangraha.karmavipaka.virasimhavaloka.33.p4.3) — Vīrasiṃha, Sanskrit - [Madanapālanighaṇṭu (Madanavinoda)](https://indike.org/pramana/in.med.nighantu.namaguna.madanapala.13.84) — Madanapāla (Ṭāka), Sanskrit - [Pathyāpathyaviniścaya (Viśvanātha)](https://indike.org/pramana/in.med.pathya.pathyapathyaviniscaya.3.6) — Viśvanātha, Sanskrit - [Paribhāṣāpradīpa](https://indike.org/pramana/in.med.paribhasa.paribhasapradipa.4.22) — Govindasena, Sanskrit - [Madanapālavinodanighaṇṭu](https://indike.org/pramana/in.med.nighantu.namaguna.madanapalavinodanighantu.13.1-2.5) — Madanapāla (Ṭāka), Sanskrit --- Source: [https://indike.org/pramana/in.med.samhita.susruta.4.33](https://indike.org/pramana/in.med.samhita.susruta.4.33) · Pramāṇa