[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.35 # The Compendium of Suśruta 4.35: pañcatriṃśattamo+adhyāyaḥ/ Suśrutasaṃhitā 4.35 - **Language:** Sanskrit ### pañcatriṃśattamo+adhyāyaḥ/ ### [4.35.1](https://indike.org/pramana/in.med.samhita.susruta.4.35.1) athāto netrabastipramāṇapravibhāgacikitsitaṃ vyākhyāsyāmaḥ// ### [4.35.2](https://indike.org/pramana/in.med.samhita.susruta.4.35.2) yathovāca bhagavān dhanvantariḥ// ### [4.35.3](https://indike.org/pramana/in.med.samhita.susruta.4.35.3) tatra snehādīnāṃ karmaṇāṃ bastikarma pradhānatamamāhurācāryāḥ/ kasmāt anekakarmakaratvādbasteḥ; iha khalu bastirnānāvidhadravyasaṃyogāddoṣāṇāṃ saṃśodhanasaṃśamanasaṃgrahaṇāni karoti, kṣīṇaśukraṃ vājīkaroti, kṛśaṃ bṛṃhayati, sthūlaṃ karśayati, cakṣuḥ prīṇayati, valīpalitamapahanti, vayaḥ sthāpayati// ### [4.35.4](https://indike.org/pramana/in.med.samhita.susruta.4.35.4) śarīropacayaṃ varṇaṃ balamārogyamāyuṣaḥ/ kurute parivṛddhiṃ ca bastiḥ samyagupāsitaḥ// ### [4.35.5](https://indike.org/pramana/in.med.samhita.susruta.4.35.5) tathā jvarātīsāratimirapratiśyāyaśirorogādhimanthārditākṣepakapakṣāghātaikāṅgasarvāṅgarogādhmānodarayoniśūlaśarkarāśūlavṛddhyupadaṃśānāhamūtrakṛcchragulmavātaśoṇitavātamūtrapurīṣodāvartaśukrārtavastanyanāśahṛddhanumanyāgrahaśarkarāśmarīmūḍhagarbhaprabhṛtiṣu† cāsyarthamupayujyate// ### [4.35.6](https://indike.org/pramana/in.med.samhita.susruta.4.35.6) bhavati cātra bastirvāte ca pitte ca kaphe rakte ca śasyate/ saṃsarge sannipāte ca bastireva hitaḥ sadā// ### [4.35.7](https://indike.org/pramana/in.med.samhita.susruta.4.35.7) tatra sāṃvatsarikāṣṭadviraṣṭavarṣāṇāṃ ṣaḍaṣṭadaśāṅgulapramāṇāni kaniṣṭhikānāmikāmadhyamāṅgulipariṇāhānyagre+adhyardhāṅguladvyaṅgulārdhatṛtīyāṅgulasanniviṣṭakarṇikāni kaṅkaśyenabarhiṇapakṣanāḍītulyapraveśāni mudgamāṣakalāyamātrasrotāṃsi vidadhyānnetrāṇi/ teṣu cāsthāpanadravyapramāṇamāturahastasaṃmitena prasṛtena saṃmitau prasṛtau dvau catvāro+aṣṭau ca vidheyāḥ// ### [4.35.8](https://indike.org/pramana/in.med.samhita.susruta.4.35.8) varṣāntareṣu† netrāṇāṃ bastimānasya caiva hi/ vayobalaśarīrāṇi samīkṣyotkarṣayedvidhim†// ### [4.35.9](https://indike.org/pramana/in.med.samhita.susruta.4.35.9) pañcaviṃśaterūrdhvaṃ dvādaśāṅgulaṃ, mūle+aṅguṣṭhodaraparīṇāham, agre kaniṣṭhikodaraparīṇāham, agre tryaṅgulasanniviṣṭakarṇikaṃ, gṛdhrapakṣanāḍīṃtulyapraveśaṃ, kolāsthimātrachidraṃ, klinnakalāyamātrachidramityeke; sarvāṇi mūle bastinibandhanārthaṃ dvikarṇikāni/ āsthāpanadravyapraṇāṇaṃ tu vihitaṃ dvādaśaprasṛtāḥ/ saptatestūrdhvaṃ netrapramāṇametadeva, dravyapramāṇaṃ tu dviraṣṭavarṣavat// ### [4.35.10](https://indike.org/pramana/in.med.samhita.susruta.4.35.10) mṛdurbastiḥ prayoktavyo viśeṣādbālavṛddhayoḥ/ tayostīkṣṇaḥ prayuktastu bastirhiṃsyād balāyuṣī// ### [4.35.11](https://indike.org/pramana/in.med.samhita.susruta.4.35.11) (†vraṇanetramaṣṭāṅgulaṃ mudgavāhisrotaḥ; vraṇamavekṣya yathāsvaṃ snehakaṣāye vidadhīta//) ### [4.35.12](https://indike.org/pramana/in.med.samhita.susruta.4.35.12) tatra netrāṇi suvarṇarajatatāmrāyorītidantaśṛṅgamaṇitarusāramayāni ślakṣṇāni dṛḍhāni gopucchākṛtīnyṛjūni guṭikāmukhāni ca// ### [4.35.13](https://indike.org/pramana/in.med.samhita.susruta.4.35.13) bastayaśca †bandhyā mṛdavo nātivahalā dṛḍhāḥ pramāṇavanto gomahiṣavarāhājorabhrāṇām// ### [4.35.14](https://indike.org/pramana/in.med.samhita.susruta.4.35.14) netrālābhe hitā nāḍī nalavaṃśāsthisaṃbhavā/ bastyalābhe hitaṃ carma sūkṣmaṃ vā tāntavaṃ ghanam// ### [4.35.15](https://indike.org/pramana/in.med.samhita.susruta.4.35.15) bastiṃ nirupadigdhaṃ tu śuddhaṃ suparimārjitam/ mṛdvanuddhatahīnaṃ ca muhuḥ snehavimarditam// ### [4.35.16](https://indike.org/pramana/in.med.samhita.susruta.4.35.16) netrāmūle pratiṣṭhāpya nyubjaṃ tu vivṛtānanam/ baddhvā lohena taptena carmasrotasi nirdahet// ### [4.35.17](https://indike.org/pramana/in.med.samhita.susruta.4.35.17) parivartya tato bastiṃ baddhvā guptaṃ nidhāpayet/ āsthāpanaṃ ca tailaṃ ca yathāvattena dāpayet// ### [4.35.18](https://indike.org/pramana/in.med.samhita.susruta.4.35.18) tatra dvividho bastiḥ nairūhikaḥ, snaihikaśca/ āsthāpanaṃ, nirūha ityanarthāntaraṃ; tasya vikalpo mādhutailikaḥ; tasya prayāyaśabdo yāpano, yuktarathaḥ, siddhabastiriti/ sa doṣanirharaṇāccharīranīrohaṇādvā nirūhaḥ, bayaḥsthāpanādāyuḥsthāpanādvā āsthāpanam/ mādhutailikavidhānaṃ ca nirūhopakramacikitsite vakṣyāmaḥ/ yathāpramāṇaguṇavihitaḥ† snehabastivikalpo+anuvāsanaḥ pādāva(pādāpa)kṛṣṭaḥ/ anuvasannapi na duṣyatyanudivasaṃ vā dīyata ityanuvāsanaḥ/ tasyāpi vikalpo+†ardhārdhamātrāvakṛṣṭo+aparihāryo mātrābastiriti// ### [4.35.19](https://indike.org/pramana/in.med.samhita.susruta.4.35.19) nirūhaḥ śodhano lekhī snaihiko bṛṃhaṇo mataḥ/ nirūhaśodhitānmārgān samyak sneho+anugacchati/ apetasarvadoṣāsu nāḍīṣviva vahajjalam// ### [4.35.20](https://indike.org/pramana/in.med.samhita.susruta.4.35.20) sarvadoṣaharaścāsau śarīrasya ca jīvanaḥ/ tasmādviśuddhadehasya snehabastirvidhīyate// ### [4.35.21](https://indike.org/pramana/in.med.samhita.susruta.4.35.21) tatronmādabhayaśokapipāsārocakājīrṇārśaḥpāṇḍurogabhramamadamūrcchācchardikuṣṭhamehodarasthaulyaśvāsakāsakaṇṭhaśoṣaśophopasṛṣṭakṣatakṣīṇacatustrimāsagarbhiṇīdurbalāgnyasahā bālavṛddhau ca vātarogādṛte kṣīṇā nānuvāsyā nāsthāpayitavyāḥ// ### [4.35.22](https://indike.org/pramana/in.med.samhita.susruta.4.35.22) udarī ca pramehī ca kuṣṭhī sthūlaśca mānavaḥ/ avaśyaṃ sthāpanīyāste nānuvāsyāḥ kathañcana// ### [4.35.23](https://indike.org/pramana/in.med.samhita.susruta.4.35.23) asādhyatā vikārāṇāṃ syādeṣāmanuvāsanāt/ asādhyatve+api bhūyiṣṭhaṃ gātrāṇāṃ sadanaṃ bhavet// ### [4.35.24](https://indike.org/pramana/in.med.samhita.susruta.4.35.24) pakvāśaye tathā śroṇyāṃ nābhyadhastācca sarvataḥ/ samyakpraṇihito bastiḥ sthāneṣveteṣu tiṣṭhati// ### [4.35.25](https://indike.org/pramana/in.med.samhita.susruta.4.35.25) pakvāśayādbastivīryaṃ khairdehamanusarpati/ vṛkṣamūle niṣiktānāmapāṃ vīryamiva drumam// ### [4.35.26](https://indike.org/pramana/in.med.samhita.susruta.4.35.26) sa cāpi sahasā bastiḥ kevalaḥ samalo+api vā/ pratyeti vīryaṃ tvanilairapānādyairvinīyate// ### [4.35.27](https://indike.org/pramana/in.med.samhita.susruta.4.35.27) vīryeṇa bastirādatte doṣānāpādamastakāt(n)/ pakvāśayastho+ambarago bhūmerarko rasāniva// ### [4.35.28](https://indike.org/pramana/in.med.samhita.susruta.4.35.28) sa kaṭīpṛṣṭhakoṣṭhasthān vīryeṇāloḍya saṃcayān/ utkhātamūlān harati doṣāṇāṃ sādhuyojitaḥ// ### [4.35.29](https://indike.org/pramana/in.med.samhita.susruta.4.35.29) doṣatrayasya yasmācca prakope vāyurīśvaraḥ/ tasmāttasyātivṛddhasya śarīramabhinighnataḥ// ### [4.35.30](https://indike.org/pramana/in.med.samhita.susruta.4.35.30) vāyorviṣahate vegaṃ nānyā basterṛte kriyā/ pavanāviddhatoyasya velā vegamivodadheḥ// ### [4.35.31](https://indike.org/pramana/in.med.samhita.susruta.4.35.31) śarīropacayaṃ varṇaṃ balamārogyamāyuṣaḥ/ kurute parivṛddhiṃ ca bastiḥ samyagupāsitaḥ// ### [4.35.32](https://indike.org/pramana/in.med.samhita.susruta.4.35.32) ata ūrdhvaṃ vyāpado vakṣyāmaḥ/ tatra netraṃ vicalitaṃ, vivartitaṃ, pārśvāvapīḍitam, atyutkṣiptam, avasannaṃ, tiryakprakṣiptamiti ṣaṭ praṇidhānadoṣāḥ; atisthūlaṃ, karkaśam, avanataṃ, †aṇubhinnaṃ, sannikṛṣṭaviprakṛṣṭakarṇikaṃ, sūkṣmāticchidram, atidīrgham, †atihrasvam, asrimadityekādaśa netradoṣāḥ; bahalatā, alpatā, †sacchidratā, prastīrṇatā, durbaddhateti pañca bastidoṣāḥ; atipīḍitatā, śithilapīḍitatā, bhūyo bhūyo+avapīḍanaṃ, kālātikrama iti catvāraḥ pīḍanadoṣāḥ; āmatā, hīnatā, atimātratā, atiśītatā, atyuṣṇatā, atitīkṣṇatā, atimṛdutā, atisnigdhatā, atirūkṣatā, atisāndratā, atidravatā, ityekādaśa dravyadoṣāḥ; avākśīrṣocchīrṣanyubjottānasaṅkucitadehasthitadakṣiṇapārśvaśāyinaḥ pradānamiti sapta śayyādoṣāḥ; evametāścatuścatvāriṃśadvyāpado vaidyanimittāḥ/ āturanimittāḥ pañcadaśa āturopadravacikitsite vakṣyante/ snehastvaṣṭabhiḥ kāraṇaiḥ pratihato na pratyāgacchati tribhirdoṣaiḥ, aśanābhibhūto, malavyāmiśro, dūrānupraviṣṭo, asvinnasya, anuṣṇo, alpambhuktavato, alpaśceti vaidyāturanimittā bhavanti/ ayogastūbhayoḥ, ādhmānaṃ, parikartikā, parisrāvaḥ, pravāhikā, hṛdayopasaraṇam, aṅgapragraho, atiyogo, jīvādānamiti nava vyāpado vaidyanimittā bhavanti// ### [4.35.33](https://indike.org/pramana/in.med.samhita.susruta.4.35.33) bhavati cātra ṣaṭsaptatiḥ samāsena vyāpadaḥ parikīrtitāḥ/ tāsāṃ vakṣyāmi vijñānaṃ siddhiṃ ca tadanantaram// ### [4.35.33\_1](https://indike.org/pramana/in.med.samhita.susruta.4.35.33_1) iti suśrutasaṃhitāyāṃ cikitsāsthāne netrabastipramāṇapravibhāgacikitstitaṃ nāma pañcatriṃśo+adhyāyaḥ //35// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.119.2) — Ḍalhaṇa, Sanskrit ## Linked texts (5) - [Siddhayoga (Vṛndamādhava)](https://indike.org/pramana/in.med.sangraha.siddhayoga.75.1) — Vṛnda, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.11.15) — Śārṅgadhara (physician), Sanskrit - [Madanapālanighaṇṭu (Madanavinoda)](https://indike.org/pramana/in.med.nighantu.namaguna.madanapala.13.86) — Madanapāla (Ṭāka), Sanskrit - [Paribhāṣāpradīpa](https://indike.org/pramana/in.med.paribhasa.paribhasapradipa.4.99) — Govindasena, Sanskrit - [Madanapālavinodanighaṇṭu](https://indike.org/pramana/in.med.nighantu.namaguna.madanapalavinodanighantu.13.1-2.6) — Madanapāla (Ṭāka), Sanskrit --- Source: [https://indike.org/pramana/in.med.samhita.susruta.4.35](https://indike.org/pramana/in.med.samhita.susruta.4.35) · Pramāṇa