[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.36 # The Compendium of Suśruta 4.36: ṣaṭtriṃśattamo+adhyāyaḥ/ Suśrutasaṃhitā 4.36 - **Language:** Sanskrit ### ṣaṭtriṃśattamo+adhyāyaḥ/ ### [4.36.1](https://indike.org/pramana/in.med.samhita.susruta.4.36.1) athāto netrabastivyāpaccikitsitaṃ vyākhyāsyāmaḥ// ### [4.36.2](https://indike.org/pramana/in.med.samhita.susruta.4.36.2) yathovāca bhagavān dhanvantariḥ// ### [4.36.3](https://indike.org/pramana/in.med.samhita.susruta.4.36.3) atha netre vicalite tathā caiva vivartite/ gude kṣataṃ rujā vā syāttatra sadyaḥkṣatakriyāḥ// ### [4.36.4](https://indike.org/pramana/in.med.samhita.susruta.4.36.4) atyutkṣipte+avasanne ca netre pāyau bhavedrujā/ vidhiratrāpi pittaghnaḥ kāryaḥ snehaiśca secanam// ### [4.36.5](https://indike.org/pramana/in.med.samhita.susruta.4.36.5) tiryakpraṇihite netre tathā pārśvāvapīḍite/ mukhasyāvaraṇādbastirna samyak pratipadyate/ ṛju netraṃ vidheyaṃ syāttatra samyagvijānatā// ### [4.36.6](https://indike.org/pramana/in.med.samhita.susruta.4.36.6) atisthūle karkaśe ca netre+astrimati† gharṣaṇāt/ gude bhavet kṣataṃ ruk ca sādhanaṃ tasya pūrvavat// ### [4.36.7](https://indike.org/pramana/in.med.samhita.susruta.4.36.7) †āsannakarṇike netre bhinne+aṇau vā+apyapārthakaḥ/ avaseko bhavedbastestasmāddoṣān vivarjayet// ### [4.36.8](https://indike.org/pramana/in.med.samhita.susruta.4.36.8) prakṛṣṭakarṇike raktaṃ gudamarmaprapīḍanāt/ kṣaratyatrāpi pittaghno vidhirbastiśca picchilaḥ// ### [4.36.9](https://indike.org/pramana/in.med.samhita.susruta.4.36.9) hrasve tvaṇusrotasi ca kleśo bastiśca pūrvavat/ pratyāgacchaṃstataḥ kuryādrogān bastivighātajān// ### [4.36.10](https://indike.org/pramana/in.med.samhita.susruta.4.36.10) dīrghe mahāsrotasi ca jñeyamatyavapīḍavat/ prastīrṇe bahale cāpi bastau durbaddhadoṣavat// ### [4.36.11](https://indike.org/pramana/in.med.samhita.susruta.4.36.11) bastāvalpe+alpatā vā+api dravyasyālpā guṇā matāḥ/ durbaddhe †cāṇubhinne ca vijñeyaṃ bhinnanetravat// ### [4.36.12](https://indike.org/pramana/in.med.samhita.susruta.4.36.12) atiprapīḍito bastiḥ prayātyāmāśayaṃ† tataḥ/ vāterito nāsikābhyāṃ mukhato vā prapadyate// ### [4.36.13](https://indike.org/pramana/in.med.samhita.susruta.4.36.13) tatra tūrṇaṃ galāpīḍaṃ kuryāccāpyavadhūnanam/ śiraḥkāyavirekau ca tīkṣṇau sekāṃśca śītalān// ### [4.36.14](https://indike.org/pramana/in.med.samhita.susruta.4.36.14) śanaiḥ prapīḍito bastiḥ pakvādhānaṃ ca gacchati/ na ca saṃpādayatyarthaṃ tasmādyuktaṃ prapīḍayet// ### [4.36.15](https://indike.org/pramana/in.med.samhita.susruta.4.36.15) bhūyo bhūyo+avapīḍena vāyurantaḥ prapīḍyate/ tenādhmānaṃ rujaścogrā yathāsvaṃ tatra bastayaḥ// ### [4.36.16](https://indike.org/pramana/in.med.samhita.susruta.4.36.16) kālātikramaṇāt kleśo vyādhiścābhipravardhate/ tatra vyādhibalaghnaṃ tu bhūyo bastiṃ nidhāpayet// ### [4.36.17](https://indike.org/pramana/in.med.samhita.susruta.4.36.17) godopadehaśophau tu sneho+apakvaḥ karoti hi/ tatra saṃśodhano bastirhitaṃ cāpi virecanam// ### [4.36.18](https://indike.org/pramana/in.med.samhita.susruta.4.36.18) hīnamātrāvubhau bastī nātikāryakarau matau/ atimātrau tathā++ānāhaklamātīsārakārakau// ### [4.36.19](https://indike.org/pramana/in.med.samhita.susruta.4.36.19) mūrcchāṃ †dāhamatīsāraṃ pittaṃ cātyuṣṇatīkṣṇakau/ mṛduśītāvubhau vātavibandhādhmānakārakau// ### [4.36.20](https://indike.org/pramana/in.med.samhita.susruta.4.36.20) tatra hīnādiṣu hitaḥ pratyanīkaḥ kriyāvidhiḥ/ gudabastyupadehaṃ tu kuryāt sāndro nirūhaṇaḥ// ### [4.36.21](https://indike.org/pramana/in.med.samhita.susruta.4.36.21) pravāhikāṃ vā janayettanuralpaguṇāvahaḥ/ tatra sāndre tanuṃ bastiṃ tanau sāndraṃ ca dāpayet// ### [4.36.22](https://indike.org/pramana/in.med.samhita.susruta.4.36.22) snigdho+atijāḍyakṛdrūkṣaḥ stambhādhmānakṛducyate/ bastiṃ rūkṣamatisnigdhe snigdhaṃ rūkṣe ca dāpayet// ### [4.36.23](https://indike.org/pramana/in.med.samhita.susruta.4.36.23) atipīḍitavaddoṣān viddhi† cāpyavaśīrṣake/ ucchīrṣake samunnāhaṃ bastiḥ kuryācca mehanam// ### [4.36.24](https://indike.org/pramana/in.med.samhita.susruta.4.36.24) tatrottaro hito bastiḥ susvinnasya† sukhāvahaḥ/ nyubjasya bastirnāpnoti pakvādhānaṃ vimārgagaḥ// ### [4.36.25](https://indike.org/pramana/in.med.samhita.susruta.4.36.25) hṛdgudaṃ bādhate cātra vāyuḥ koṣṭhamathāpi ca/ uttānasyāvṛte mārge bastirnāntaḥ prapadyate// ### [4.36.26](https://indike.org/pramana/in.med.samhita.susruta.4.36.26) netrasaṃvejanabhrānto vāyuścāntaḥ prakupyati/ dehe saṅkucite dattaḥ sakthnorapyubhayostathā// ### [4.36.27](https://indike.org/pramana/in.med.samhita.susruta.4.36.27) na samyaganilāviṣṭo bastiḥ pratyeti dehinaḥ/ sthitasya bastirdattastu kṣipramāyātyavāṅmukhaḥ// ### [4.36.28](https://indike.org/pramana/in.med.samhita.susruta.4.36.28) na cāśayaṃ tarpayati tasmānnārthakaro hi saḥ/ nāpnoti bastirdattastu kṛtsnaṃ pakvāśayaṃ punaḥ// ### [4.36.29](https://indike.org/pramana/in.med.samhita.susruta.4.36.29) dakṣiṇāśritapārśvasya vāmapārśvānugo yataḥ†/ nyubjādīnāṃ pradānaṃ ca basternaiva praśasyate// ### [4.36.30](https://indike.org/pramana/in.med.samhita.susruta.4.36.30) †paścādanilakopo+atra yathāsvaṃ tatra kārayet/ vyāpadaḥ snehabastestu vakṣyante †taccikitsite// ### [4.36.31](https://indike.org/pramana/in.med.samhita.susruta.4.36.31) ayogādyāstu vakṣyāmi vyāpadaḥ sacikitsitāḥ/ anuṣṇo+alpauṣadho hīno bastirnaiti prayojitaḥ// ### [4.36.32](https://indike.org/pramana/in.med.samhita.susruta.4.36.32) viṣṭambhādhmānaśūlaiśca tamayogaṃ pracakṣate/ tatra tīkṣṇo hito bastistīkṣṇaṃ cāpi virecanam// ### [4.36.33](https://indike.org/pramana/in.med.samhita.susruta.4.36.33) saśeṣānne+athavā bhukte bahudoṣe ca yojitaḥ/ atyāśitasyātibahurbastirmandoṣṇa eva ca// ### [4.36.34](https://indike.org/pramana/in.med.samhita.susruta.4.36.34) anuṣṇalavaṇasneho hyatimātro+athavā punaḥ/ tathā bahupurīṣaṃ ca kṣipramādhmāpayennaram// ### [4.36.35](https://indike.org/pramana/in.med.samhita.susruta.4.36.35) hṛtkaṭīpārśvapṛṣṭheṣu śūlaṃ tatrātidāruṇam/ tatra tīkṣṇataro bastirhitaṃ cāpyanuvāsanam// ### [4.36.36](https://indike.org/pramana/in.med.samhita.susruta.4.36.36) atitīkṣṇotilavaṇo rūkṣo bastiḥ prayojitaḥ/ sapittaṃ kopayedvāyuṃ kuryācca parikartikām// ### [4.36.37](https://indike.org/pramana/in.med.samhita.susruta.4.36.37) nābhibastigudaṃ tatra chinattīvātidehinaḥ/ picchābastirhitastasya snehaśca madhuraiḥ śṛtaḥ// ### [4.36.38](https://indike.org/pramana/in.med.samhita.susruta.4.36.38) atyamlalavaṇastīkṣṇaḥ parisrāvāya kalpate/ daurbalyamaṅgasādaśca jāyate tatra dehinaḥ// ### [4.36.39](https://indike.org/pramana/in.med.samhita.susruta.4.36.39) parisravettataḥ pittaṃ dāhaṃ sañjanayedgude/ picchābastirhitastatra bastiḥ kṣīraghṛtena ca// ### [4.36.40](https://indike.org/pramana/in.med.samhita.susruta.4.36.40) pravāhikā bhavettīkṣṇānnirūhāt sānuvāsanāt/ sadāhaśūlaṃ kṛcchreṇa kaphāsṛgupaveśyate// ### [4.36.41](https://indike.org/pramana/in.med.samhita.susruta.4.36.41) picchābastirhitastatra payasā caiva bhojanam/ sarpirmadhurakaiḥ siddhaṃ tailaṃ cāpyanuvāsanam// ### [4.36.42](https://indike.org/pramana/in.med.samhita.susruta.4.36.42) atitīkṣṇo nirūho vā savāte cānuvāsanaḥ/ hṛdayasyopasaraṇaṃ kurute vā savāte cānuvāsanaḥ// ### [4.36.43](https://indike.org/pramana/in.med.samhita.susruta.4.36.43) doṣaistatra rujastāstā mado mūrcchā+aṅgagauravam/ sarvadoṣaharaṃ bastiṃ śodhanaṃ tatra dāpayet// ### [4.36.44](https://indike.org/pramana/in.med.samhita.susruta.4.36.44) rūksasya bahuvātasya tathā duḥśāyitasya ca/ bastiraṅgagrahaṃ kuryādrūkso mṛdvalpabheṣajaḥ// ### [4.36.45](https://indike.org/pramana/in.med.samhita.susruta.4.36.45) tatrāṅgasādaḥ prastambho jṛmbhodveṣṭanavepakāḥ/ parvabhedaśca tatreṣṭāḥ svedābhyañjanabastayaḥ// ### [4.36.46](https://indike.org/pramana/in.med.samhita.susruta.4.36.46) atyuṣṇatīkṣṇo+atibahurdatto+atisveditasya ca/ alpadoṣasya vā bastiratiyogāya kalpate// ### [4.36.47](https://indike.org/pramana/in.med.samhita.susruta.4.36.47) virecanātiyogena samānaṃ tasya lakṣaṇam/ picchābastiprayogaśca tatra śītaḥ sukhāvahaḥ// ### [4.36.48](https://indike.org/pramana/in.med.samhita.susruta.4.36.48) atiyogāt paraṃ yatra jīvādānaṃ viriktavat/ deyastatra hitaścāpsu picchābastiḥ saśoṇitaḥ// ### [4.36.49](https://indike.org/pramana/in.med.samhita.susruta.4.36.49) navaitā vyāpado yāstu nirūhaṃ pratyudāhṛtāḥ/ snehabastiṣvapi hi tā vijñeyāḥ kuśalairiha// ### [4.36.50](https://indike.org/pramana/in.med.samhita.susruta.4.36.50) ityuktā vyāpadaḥ sarvāḥ salakṣaṇacikitsitāḥ/ bhiṣajā ca tathā kāryaṃ yathaitā na bhavanti hi// ### [4.36.51](https://indike.org/pramana/in.med.samhita.susruta.4.36.51) paksādvireko vāntasya †tataścāpi nirūhaṇam/ sadyo nirūḍho+anuvāsyaḥ saptarātrādvirecitaḥ// ### [4.36.51\_1](https://indike.org/pramana/in.med.samhita.susruta.4.36.51_1) iti suśrutasaṃhitāyāṃ cikitsāsthāne netrabastivyāpaccikitsitaṃ nāma ṣaṭtriṃśo+adhyāyaḥ //36// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.119.32) — Ḍalhaṇa, Sanskrit ## Linked texts (2) - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.11.19) — Śārṅgadhara (physician), Sanskrit - [Paribhāṣāpradīpa](https://indike.org/pramana/in.med.paribhasa.paribhasapradipa.4.102) — Govindasena, Sanskrit --- Source: [https://indike.org/pramana/in.med.samhita.susruta.4.36](https://indike.org/pramana/in.med.samhita.susruta.4.36) · Pramāṇa