[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.37 # The Compendium of Suśruta 4.37: saptatriṃśattamo+adhyāyaḥ/ Suśrutasaṃhitā 4.37 - **Language:** Sanskrit ### saptatriṃśattamo+adhyāyaḥ/ ### [4.37.1](https://indike.org/pramana/in.med.samhita.susruta.4.37.1) athāto+anuvāsanottarabasticikitsitaṃ vyākhyāsyāmaḥ// ### [4.37.2](https://indike.org/pramana/in.med.samhita.susruta.4.37.2) yathovāca bhagavān dhanvantariḥ// ### [4.37.3](https://indike.org/pramana/in.med.samhita.susruta.4.37.3) virecanāt saptarātre gate jātabalāya vai/ kṛtānnāyānuvāsyāya samyagdeyo+anuvāsanaḥ// ### [4.37.4](https://indike.org/pramana/in.med.samhita.susruta.4.37.4) yathāvayo nirūhāṇāṃ yā mātrāḥ parikīrtitāḥ/ pādāvakṛṣṭāstāḥ kāryāḥ snehabastiṣu dehinām// ### [4.37.5](https://indike.org/pramana/in.med.samhita.susruta.4.37.5) utsṛṣṭānilaviṇmūtre nare bastiṃ vidhāpayet/ etairhi vihataḥ sneho naivāntaḥ pratipadyate// ### [4.37.6](https://indike.org/pramana/in.med.samhita.susruta.4.37.6) snehavastirvidheyastu nāviśuddhasya dehinaḥ/ snehavīryaṃ tathā datte dehaṃ cānuvisarpati// ### [4.37.7](https://indike.org/pramana/in.med.samhita.susruta.4.37.7) ata ūrdhvaṃ pravakṣyāmi tailānīha yathākramam/ pānānvāsananasyeṣu yāni hanyurgadān bahūn// ### [4.37.8](https://indike.org/pramana/in.med.samhita.susruta.4.37.8) śaṭīpuṣkarakṛpṇāhvāmadanāmaradārubhiḥ/ śatāhvākuṣṭhayaṣṭyāhvavacābilvahutāśanaiḥ// ### [4.37.9](https://indike.org/pramana/in.med.samhita.susruta.4.37.9) supiṣṭairdviguṇakṣīraṃ tailaṃ toyacaturguṇam/ paktvā bastau vidhātavyaṃ mūḍhavātānulomanam// ### [4.37.10](https://indike.org/pramana/in.med.samhita.susruta.4.37.10) arśāṃsi grahaṇīdoṣamānāhaṃ viṣamajvaram/ kaṭhyūrupṛṣṭhakoṣṭhasthān vātarogāṃśca nāśayet// ### [4.37.11](https://indike.org/pramana/in.med.samhita.susruta.4.37.11) vacāpuṣkarakuṣṭhailāmadanāmarasindhujaiḥ/ kākolīdvayayaṣṭyāhvamedāyugmanarādhipaiḥ// ### [4.37.12](https://indike.org/pramana/in.med.samhita.susruta.4.37.12) pāṭhājīvakajīvantībhārgīcandanakaṭophalaiḥ/ saralāgurubilvāmbuvājigandhāgnivṛddhibhiḥ// ### [4.37.13](https://indike.org/pramana/in.med.samhita.susruta.4.37.13) viḍaṅgāragvadhaśyāmātrivṛnmāgadhikardhibhiḥ/ piṣṭaistailaṃ pacet kṣīrapañcamūlarasānvitam// ### [4.37.14](https://indike.org/pramana/in.med.samhita.susruta.4.37.14) gulmānāhāgniṣaṅgārśograhaṇīmūtrasaṅginām/ anvāsasnavidhau yuktaṃ śasyate+anilarogiṇām// ### [4.37.15](https://indike.org/pramana/in.med.samhita.susruta.4.37.15) citrakātiviṣāpāṭhādantībilvavacāmipaiḥ/ saralāṃśumatīrāsnānīlinīcaturaṅgulaiḥ// ### [4.37.16](https://indike.org/pramana/in.med.samhita.susruta.4.37.16) cavyājamodakākolīmedāyugmasuradrumaiḥ/ jīvakarṣabhavarṣābhūvastagandhāśatāhvayaiḥ// ### [4.37.17](https://indike.org/pramana/in.med.samhita.susruta.4.37.17) reṇvaśvagandhāmañjiṣṭhāśaṭīpuṣkarataskaraiḥ/ sakṣīraṃ vipacettailaṃ mārutāmayanāśanam// ### [4.37.18](https://indike.org/pramana/in.med.samhita.susruta.4.37.18) gṛdhrasīkhañjakubjāṭhyamūtrodāvartarogiṇām/ śasyate+alpabalāgnīnāṃ bastāvāśu niyojitam// ### [4.37.19](https://indike.org/pramana/in.med.samhita.susruta.4.37.19) bhūtikairaṇḍavarṣābhūrāsnāvṛṣakarohiṣaiḥ/ daśamūlasahābhārgīṣaḍgranthāmaradārubhiḥ// ### [4.37.20](https://indike.org/pramana/in.med.samhita.susruta.4.37.20) balānāgabalāmūrvāvājigandhāmṛtādvayaiḥ/ sahācaravarīviśvākākanāsāvidāribhiḥ// ### [4.37.21](https://indike.org/pramana/in.med.samhita.susruta.4.37.21) yavamāṣātasīkolakulatthaiḥ kvathitaiḥ śṛtam/ jīvanīyapratīvāpaṃ tailaṃ kṣīracaturguṇam/ ### [4.37.22](https://indike.org/pramana/in.med.samhita.susruta.4.37.22) jaṅghorutrikapārśvāṃsabāhumanyāśiraḥsthitān/ hanyādvātavikārāṃstu bastiyogairniṣevitam// ### [4.37.23](https://indike.org/pramana/in.med.samhita.susruta.4.37.23) jīvantyatibalāmedākākolīdvayajīvakaiḥ/ ṛṣabhātiviṣākṛṣṇākākanāsāvacāmaraiḥ// ### [4.37.24](https://indike.org/pramana/in.med.samhita.susruta.4.37.24) rāsnāmadanayaṣṭyāhvasaralābhīrucandanaiḥ/ svayaṅguptāśaṭīśṛṅgīkalasīsārivādvayaiḥ// ### [4.37.25](https://indike.org/pramana/in.med.samhita.susruta.4.37.25) piṣṭaistailaghṛtaṃ pakvaṃ kṣīreṇāṣṭaguṇena tu/ taccānuvāsane deyaṃ śukrāgnibalavardhanam// ### [4.37.26](https://indike.org/pramana/in.med.samhita.susruta.4.37.26) bṛṃhaṇaṃ vātapittaghnaṃ gulmānāhaharaṃ param/ nasye pāne ca saṃyuktamūrdhvajatrugadāpaham// ### [4.37.27](https://indike.org/pramana/in.med.samhita.susruta.4.37.27) madhukośīrakāśmaryakaṭukotpalacandanaiḥ/ śyāmāpadmakajīmūtaśakrāhvātiviṣāmbubhiḥ// ### [4.37.28](https://indike.org/pramana/in.med.samhita.susruta.4.37.28) tailapādaṃ pacet sarpiḥ payasā+aṣṭaguṇena ca/ nyagrodhādigaṇakvāthayuktaṃ bastiṣu yojitam// ### [4.37.29](https://indike.org/pramana/in.med.samhita.susruta.4.37.29) dāhāsṛgdaravīsarpavātaśoṇitavidradhīn/ pittaraktajvarādyāṃśca hanyāt pittakṛtān gadān// ### [4.37.30](https://indike.org/pramana/in.med.samhita.susruta.4.37.30) mṛṇālotpalaśālūkasārivādvayakeśaraiḥ/ candanadvayabhūnimbapadmabījakaserukaiḥ// ### [4.37.31](https://indike.org/pramana/in.med.samhita.susruta.4.37.31) paṭolakaṭukāraktāgundrāparpaṭavāsakaiḥ/ piṣṭaistailaghṛtaṃ† pakvaṃ tṛṇamūlarasena ca// ### [4.37.32](https://indike.org/pramana/in.med.samhita.susruta.4.37.32) kṣīradviguṇasṃyuktaṃ bastikarmaṇi yojitam/ nasye+abhyañjanapāne vā hanyāt pittagadān bahūn// ### [4.37.33](https://indike.org/pramana/in.med.samhita.susruta.4.37.33) triphalātiviṣāmūrvātrivṛccitrakavāsakaiḥ/ nimbāragvadhaṣaṭgranthāsaptaparṇaniśādvayaiḥ// ### [4.37.34](https://indike.org/pramana/in.med.samhita.susruta.4.37.34) guḍūcīndrasurākṛṣṇākuṣṭhasarṣapanāgaraiḥ/ tailamebhiḥ samaiḥ pakvaṃ surasādirasāplutam// ### [4.37.35](https://indike.org/pramana/in.med.samhita.susruta.4.37.35) pānābhyañjanagaṇḍūṣanasyabastiṣu yojitam/ sthūlatālasyakaṇḍvādīn jayetkaphakṛtān gadān// ### [4.37.36](https://indike.org/pramana/in.med.samhita.susruta.4.37.36) pāṭhājamodāśārṅgeṣṭāpippalīdvayanāgaraiḥ/ saralāgurukālīyabhārgīcavyāmaradrumaiḥ// ### [4.37.37](https://indike.org/pramana/in.med.samhita.susruta.4.37.37) maricailābhayākaṭvīśaṭīgranthikakaṭphalaiḥ/ tailameraṇḍatailaṃ vā pakvamebhiḥ †samāyutam// ### [4.37.38](https://indike.org/pramana/in.med.samhita.susruta.4.37.38) vallīkaṇṭakamūlābhyāṃ kvāthena dviguṇena ca/ hanyādanvāsanairdattaṃ sarvān kaphakṛtān gadān// ### [4.37.39](https://indike.org/pramana/in.med.samhita.susruta.4.37.39) viḍaṅgodīcyasindhūtthaśaṭīpuṣkaracitrakaiḥ/ kaṭphalātiviṣābhārgīvacākuṣṭhasurāhvayaiḥ// ### [4.37.40](https://indike.org/pramana/in.med.samhita.susruta.4.37.40) medāmadanayaṣṭyāhvaśyāmāniculanāgaraiḥ/ śatāhvānīlinīrāsnākalasīvṛṣareṇubhiḥ// ### [4.37.41](https://indike.org/pramana/in.med.samhita.susruta.4.37.41) bilvājamodakṛṣṇāhvādantīcavyanarādhipaiḥ/ tailameraṇḍatailaṃ vā muṣkakādirasāplutam// ### [4.37.42](https://indike.org/pramana/in.med.samhita.susruta.4.37.42) plīhodāvartavātāsṛggulmānāhakaphāmayān/ pramehaśarkarārśāṃsi hanyādāśvanuvāsanaiḥ// ### [4.37.43](https://indike.org/pramana/in.med.samhita.susruta.4.37.43) aśuddhamapi vātena kevalenātipīḍitam/ ahorātrasya kāleṣu sarveṣvevānuvāsayet// ### [4.37.44](https://indike.org/pramana/in.med.samhita.susruta.4.37.44) rūkṣasya bahūvātasya dvau trīnapyanuvāsanān/ dattvā snigdhatanuṃ jñātvā tataḥ paścānnirūhayet// ### [4.37.45](https://indike.org/pramana/in.med.samhita.susruta.4.37.45) asnigdhamapi vātena kevalenātipīḍitam/ snehapragāḍhairmatimānnirūhaiḥ samupācaret// ### [4.37.46](https://indike.org/pramana/in.med.samhita.susruta.4.37.46) atha samyaṅgirūḍhaṃ tu vātādiṣvanuvāsayet/ bilvayaṣṭyāhvamadanaphalatailairyathākramam// ### [4.37.47](https://indike.org/pramana/in.med.samhita.susruta.4.37.47) rātrau bastiṃ na dadyāttu doṣotkleśo hi rātrijaḥ/ snehavīryayutaḥ kuryādādhmānaṃ gauravaṃ jvaram// ### [4.37.48](https://indike.org/pramana/in.med.samhita.susruta.4.37.48) ahni sthānasthite doṣe vahnau cānnarasānvite/ sphuṭasrotomukhe dehe snehaujaḥ parisarpati// ### [4.37.49](https://indike.org/pramana/in.med.samhita.susruta.4.37.49) pitte+adhike kaphe kṣīṇe rūkṣe vātarugardite/ nare rātrau tu dātavyaṃ kāle coṣṇe+anuvāsanam// ### [4.37.50](https://indike.org/pramana/in.med.samhita.susruta.4.37.50) uṣṇe pittādhike vā+api divā dāhādayo gadāḥ/ saṃbhavanti †yatastasmāt pradoṣe yojayedbhiṣak// ### [4.37.51](https://indike.org/pramana/in.med.samhita.susruta.4.37.51) śīte vasante ca divā grīṣmaprāvṛṅghanātyaye/ snehyo dinānte pānoktān doṣān parijihīrṣatā// ### [4.37.52](https://indike.org/pramana/in.med.samhita.susruta.4.37.52) ahorātrasya kāleṣu sarveṣvevānilādhikam/ tīvrāyāṃ ruji jīrṇānnaṃ bhojayitvā+anuvāsayet// ### [4.37.53](https://indike.org/pramana/in.med.samhita.susruta.4.37.53) na cābhuktavataḥ snehaḥ praṇidheyaḥ kathañcana/ śuddhatvācchūnyakoṣṭhasya sneha ūrdhvaṃ samutpatet// ### [4.37.54](https://indike.org/pramana/in.med.samhita.susruta.4.37.54) sadā+anuvāsayeccāpi bhojayitvā++ārdrapāṇinam/ jvaraṃ vidagdhabhuktasya kuryāt snehaḥ prayojitaḥ// ### [4.37.55](https://indike.org/pramana/in.med.samhita.susruta.4.37.55) na cātisnigdhamaśanaṃ bhojayitvā+anuvāsayet/ madaṃ mūrcchāṃ ca janayed dvidhā snehaḥ prayojitaḥ// ### [4.37.56](https://indike.org/pramana/in.med.samhita.susruta.4.37.56) rūkṣaṃ bhuktavato hyannaṃ balaṃ varṇaṃ ca hāpayet/ yuktasnehamato jantuṃ bhojayitvā+anuvāsayet// ### [4.37.57](https://indike.org/pramana/in.med.samhita.susruta.4.37.57) yūṣakṣīrarasaistasmādyathāvyādhi samīkṣya vā/ yathocitāt pādahīnaṃ bhojayitvā+anuvāsayet// ### [4.37.58](https://indike.org/pramana/in.med.samhita.susruta.4.37.58) athānuvāsyaṃ svabhyaktamuṣṇāmbusveditaṃ śanaiḥ/ bhojayitvā yathāśāstraṃ kṛtacaṅkramṇaṃ tataḥ// ### [4.37.59](https://indike.org/pramana/in.med.samhita.susruta.4.37.59) visṛjya ca śakṛnmūtraṃ yojayet snehabastinā/ praṇidhānavidhānaṃ tu nirūhe saṃpravakṣyate// ### [4.37.60](https://indike.org/pramana/in.med.samhita.susruta.4.37.60) tataḥ praṇihitasneha uttāno vākśataṃ bhavet/ prasāritaiḥ sarvagātraistathā vīryaṃ visarpati// ### [4.37.61](https://indike.org/pramana/in.med.samhita.susruta.4.37.61) tāḍayettalayorenaṃ trīṃstrīn vārāñchanaiḥ śanaiḥ/ sphicoścainaṃ tataḥ śayyāṃ trīn vārānutkṣipettataḥ// ### [4.37.62](https://indike.org/pramana/in.med.samhita.susruta.4.37.62) evaṃ praṇihite bastau mandāyāso+atha mandavāk/ svāstīrṇe śayane kāmamāsītācārike rataḥ// ### [4.37.63](https://indike.org/pramana/in.med.samhita.susruta.4.37.63) sa tu saindhavacūrṇena †śatāhvena ca yojitaḥ/ deyaḥ sukhoṣṇaśca tathā nireti sahasā sukham// ### [4.37.64](https://indike.org/pramana/in.med.samhita.susruta.4.37.64) yasyānuvāsano dattaḥ sakṛdanvakṣamāvrajet/ atyauṣṇyādatitaikṣṇyādvā vāyunā vā prapīḍitaḥ// ### [4.37.65](https://indike.org/pramana/in.med.samhita.susruta.4.37.65) savāto+adhikamātro vā gurutvādvā sabheṣajaḥ/ tasyānyo+alpataro deyo na hi snihyatyatiṣṭhati// ### [4.37.66](https://indike.org/pramana/in.med.samhita.susruta.4.37.66) viṣṭabdhānilaviṇmūtraḥ snehahīne+anuvāsane†/ dāhaklamapravāhārtikaraścātyanuvāsanaḥ// ### [4.37.67](https://indike.org/pramana/in.med.samhita.susruta.4.37.67) sānilaḥ sapurīṣaśca snehaḥ pratyeti yasya tu/ oṣacoṣau vinā śīghraṃ sa samyaganuvāsitaḥ// ### [4.37.68](https://indike.org/pramana/in.med.samhita.susruta.4.37.68) jīrṇānnamatha sāyāhne snehe pratyāgate punaḥ/ laghvannaṃ bhojayet kāmaṃ dīptāgnistu naro yadi// ### [4.37.69](https://indike.org/pramana/in.med.samhita.susruta.4.37.69) prātaruṣṇodakaṃ †deyaṃ dhānyanāgarasādhitam/ tenāsya dīpyate vahnirbhaktākāṅkṣā ca jāyate// ### [4.37.70](https://indike.org/pramana/in.med.samhita.susruta.4.37.70) snehabastikrameṣvevaṃ vidhimāhurmanīṣiṇaḥ/ anena vidhinā ṣaḍ vā sapta vā+aṣṭau navaiva vā// ### [4.37.71](https://indike.org/pramana/in.med.samhita.susruta.4.37.71) vidheyā bastayasteṣāmantarā tu nirūhaṇam/ dattastu prathamo bastiḥ snehayedbastivaṅkṣaṇau// ### [4.37.72](https://indike.org/pramana/in.med.samhita.susruta.4.37.72) samyagdatto dvitīyastu mūrdhasthamanilaṃ jayet/ janayedbalavarṇau ca tṛtīyastu prayojitaḥ// ### [4.37.73](https://indike.org/pramana/in.med.samhita.susruta.4.37.73) rasaṃ caturtho raktaṃ tu pañcamaḥ snehayettathā/ ṣaṣṭhastu snehayenmāṃsaṃ medaḥ saptama eva ca// ### [4.37.74](https://indike.org/pramana/in.med.samhita.susruta.4.37.74) aṣṭamo navamaścāsthi majjānaṃ ca yathākramam/ evaṃ śukragatān doṣān dviguṇaḥ sādhu sādhayet// ### [4.37.75](https://indike.org/pramana/in.med.samhita.susruta.4.37.75) aṣṭādaśāṣṭādaśakān bastīnāṃ yo niṣevate/ yathokena vidhānena parihārakrameṇa ca// ### [4.37.76](https://indike.org/pramana/in.med.samhita.susruta.4.37.76) sa kuñjarabalo+aśvasya javaistulyo+amaraprabhaḥ/ vītapāpmā śrutadharaḥ sahasrāyurnaro bhavet// ### [4.37.77](https://indike.org/pramana/in.med.samhita.susruta.4.37.77) snehabastiṃ nirūhaṃ vā naikamevātiśīlayet/ snehādagnivadhotkleśau nirūhāt pavanādbhayam// ### [4.37.78](https://indike.org/pramana/in.med.samhita.susruta.4.37.78) tasmānnirūḍho+anuvāsyo nirūhyaścānuvāsitaḥ/ naivaṃ pittakaphotkleśau syātāṃ na pavanādbhayam// ### [4.37.79](https://indike.org/pramana/in.med.samhita.susruta.4.37.79) rūkṣāya bahuvātāya snehavastiṃ dine dine/ dadyādvaidyastato+anyeṣāmagnyābādhabhayāttryahāt// ### [4.37.80](https://indike.org/pramana/in.med.samhita.susruta.4.37.80) sneho+alpamātro rūkṣāṇāṃ dīrghakālamanatyayaḥ/ tathā nirūhaḥ snigdhānāmalpamātraḥ praśasyate// ### [4.37.81](https://indike.org/pramana/in.med.samhita.susruta.4.37.81) ata ūrdhvaṃ pravakṣyāmi vyāpadaḥ snehabastijāḥ/ balavanto yadā doṣāḥ koṣṭhe syuranilādayaḥ// ### [4.37.82](https://indike.org/pramana/in.med.samhita.susruta.4.37.82) alpavīryaṃ tadā snehamabhibhūya pṛthagvidhān/ kurvantyupadravān snehaḥ sa cāpi na nivartate// ### [4.37.83](https://indike.org/pramana/in.med.samhita.susruta.4.37.83) tatra vātābhibhūte tu snehe mukhakaṣāyatā/ jṛmbhā vātarujastāstā vepathurviṣamajvaraḥ// ### [4.37.84](https://indike.org/pramana/in.med.samhita.susruta.4.37.84) pittābhibhūte snehe tu mukhasya kaṭutā bhavet/ †dāhastṛṣṇā jvaraḥ svedo netramūtrāṅgapītatā// ### [4.37.85](https://indike.org/pramana/in.med.samhita.susruta.4.37.85) śleṣmābhibhūte snehe tu praseko madhurāsyatā/ gauravaṃ chardirucchvāsaḥ kṛcchrācchītajvaro+aruciḥ// ### [4.37.86](https://indike.org/pramana/in.med.samhita.susruta.4.37.86) tatra doṣābhibhūte tu snehe bastiṃ nidhāpayet/ yathāsvaṃ doṣaśamanānyupayojyāni yāni ca// ### [4.37.87](https://indike.org/pramana/in.med.samhita.susruta.4.37.87) atyāśite+annābhibhavāt sneho naiti yadā tadā/ gururāmāśayaḥ śūlaṃ vāyoścāpratisaṃcaraḥ// ### [4.37.88](https://indike.org/pramana/in.med.samhita.susruta.4.37.88) hṛtpīḍā mukhavairasyṃa śvāso mūrcchā bhramo+aruciḥ/ tatrāpatarpaṇasyānte dīpano vidhiriṣyate// ### [4.37.89](https://indike.org/pramana/in.med.samhita.susruta.4.37.89) aśuddhasya malonmiśraḥ sneho naiti yadā punaḥ/ tadā+aṅgasadanādhmāne śvāsaḥ śūlaṃ ca jāyate// ### [4.37.90](https://indike.org/pramana/in.med.samhita.susruta.4.37.90) pakvāśayagurutvaṃ ca tatra dadyānnirūhaṇam/ tīkṣṇaṃ tīkṣṇauṣadhaireva siddhaṃ cāpyanuvāsanam// ### [4.37.91](https://indike.org/pramana/in.med.samhita.susruta.4.37.91) śuddhasya dūrānusṛte snehe snehasya darśanam/ gātreṣu sarvendriyāṇāmupalepo+avasādanam// ### [4.37.92](https://indike.org/pramana/in.med.samhita.susruta.4.37.92) snehagandhi mukhaṃ cāpi kāsaśvāsāvarocakaḥ/ atipīḍitavattatra siddhirāsthāpanaṃ tathā// ### [4.37.93](https://indike.org/pramana/in.med.samhita.susruta.4.37.93) asvinnasyāviśuddhasya sneho+alpaḥ saṃprayojitaḥ/ śīto mṛduśca nābhyeti tato mandaṃ †pravāhate// ### [4.37.94](https://indike.org/pramana/in.med.samhita.susruta.4.37.94) vibandhagauravādhmānaśūlāḥ pakvāśayaṃ prati/ tatrāsthāpanamevāśu prayojyaṃ sānuvāsanam// ### [4.37.95](https://indike.org/pramana/in.med.samhita.susruta.4.37.95) alpaṃ bhuktavato+alpo hi sneho mandaguṇastathā/ datto naiti klamotkleśau bhṛśaṃ cāratimāvahet// ### [4.37.96](https://indike.org/pramana/in.med.samhita.susruta.4.37.96) tatrāpyāsthāpanaṃ kāryaṃ śodhanīyena bastinā/ (anvāsanaṃ ca snehena śodhanīyena śasyate†)// ### [4.37.97](https://indike.org/pramana/in.med.samhita.susruta.4.37.97) ahorātrādapi snehaḥ pratyāgacchanna duṣyati/ kuryādbastiguṇāṃścāpi jīrṇastvalpaguṇo bhavet// ### [4.37.98](https://indike.org/pramana/in.med.samhita.susruta.4.37.98) yasya nopadravaṃ kuryāt snehabastiraniḥsṛtaḥ/ sarvo+alpo vā++āvṛto raukṣyādupekṣyaḥ sa vijānatā// ### [4.37.99](https://indike.org/pramana/in.med.samhita.susruta.4.37.99) anāyāntaṃ tvahorātrāt snehaṃ saṃśodhanairharet/ snehabastāvanāyāte nānyaḥ sneho vidhīyate// ### [4.37.100](https://indike.org/pramana/in.med.samhita.susruta.4.37.100) ityuktā vyāpadaḥ sarvā salakṣaṇacikitsitāḥ/ basteruttarasaṃjñasya vidhiṃ vakṣyāmyataḥ param// ### [4.37.101](https://indike.org/pramana/in.med.samhita.susruta.4.37.101) caturdaśāṅgulaṃ netramāturāṅgulasaṃmitam/ †mālatīpuṣpavṛntāgraṃ chidraṃ sarṣapanirgamam// ### [4.37.102](https://indike.org/pramana/in.med.samhita.susruta.4.37.102) snehapramāṇaṃ paramaṃ prakuñcaścātra kīrtitaḥ/ pañcaviṃśādadho mātrāṃ vidadhyādbuddhikalpitam// ### [4.37.103](https://indike.org/pramana/in.med.samhita.susruta.4.37.103) niviṣṭakarṇikaṃ madhye nārīṇāṃ caturaṅgule/ mūtrasrotaḥparīṇāhaṃ mudgavāhi daśāṅgulam// ### [4.37.104](https://indike.org/pramana/in.med.samhita.susruta.4.37.104) meḍhrāyāmasamaṃ kecidicchanti khalu tadvidaḥ/ tāsāmapatyamārge tu nidadhyāccaturaṅgulam// ### [4.37.105](https://indike.org/pramana/in.med.samhita.susruta.4.37.105) dvyaṅgulaṃ mūtramārge tu kanyānāṃ tvekamaṅgulam/ vidheyaṃ cāṅgulaṃ tāsāṃ vidhivadvakṣyate yathā// ### [4.37.106](https://indike.org/pramana/in.med.samhita.susruta.4.37.106) snehasya prasṛtaṃ cātra svāṅgulīmūlasaṃmitam/ deyaṃ pramāṇaṃ paramamarvāg buddhivikalpitam// ### [4.37.107](https://indike.org/pramana/in.med.samhita.susruta.4.37.107) aurabhraḥ śaukaro vā+api bastirājaśca pūjitaḥ/ tadalābhe prayuñjīta galacarma tu pakṣiṇām// ### [4.37.108](https://indike.org/pramana/in.med.samhita.susruta.4.37.108) (tasyālābhe dṛteḥ pādo mṛducarma tato+api vā†)/ athāturamupasnigdhaṃ svinnaṃ praśithilāśayam// ### [4.37.109](https://indike.org/pramana/in.med.samhita.susruta.4.37.109) yavāgūṃ saghṛtakṣīrāṃ pītavantaṃ yathābalam/ niṣaṇṇamājānusame pīṭhe sopāśraye samam// ### [4.37.110](https://indike.org/pramana/in.med.samhita.susruta.4.37.110) svabhyaktabastimūrdhānaṃ tailenoṣṇena mānavam/ tataḥ samaṃ sthāpayitvā nālamasya praharṣitam// ### [4.37.111](https://indike.org/pramana/in.med.samhita.susruta.4.37.111) pūrvaṃ śalākayā+anviṣya tato netramanantaram/ śanaiḥ śanairghṛtābhyaktaṃ vidadhyādaṅgulāni ṣaṭ// ### [4.37.112](https://indike.org/pramana/in.med.samhita.susruta.4.37.112) meḍhrayāmasamaṃ kecidicchanti praṇidhānakam/ tato+avapīḍayedbastiṃ śanairnetraṃ ca nirharet// ### [4.37.113](https://indike.org/pramana/in.med.samhita.susruta.4.37.113) tataḥ pratyāgatasnehamaparāhṇe vicakṣaṇaḥ/ bhojayet payasā †mātrāṃ yūṣeṇātha rasena vā// ### [4.37.114](https://indike.org/pramana/in.med.samhita.susruta.4.37.114) anena vidhinā dadyādbastīṃstrīṃścaturo+api vā/ ūrdhvajānvai striyai dadyāduttānāyai vicakṣaṇaḥ// ### [4.37.115](https://indike.org/pramana/in.med.samhita.susruta.4.37.115) samyak prapīḍayedyoniṃ dadyāt sumṛdupīḍitam/ trikarṇikena netreṇa dadyādyonimukhaṃ prati// ### [4.37.116](https://indike.org/pramana/in.med.samhita.susruta.4.37.116) garbhāśayaviśuddhyarthaṃ snehena dviguṇena tu/ †kvāthapramāṇaṃ prasṛtaṃ striyā dviprasṛtaṃ bhavet// ### [4.37.117](https://indike.org/pramana/in.med.samhita.susruta.4.37.117) kanyetarasyāḥ kanyāyāstadvadbastipramāṇakam/ apratyāgacchati bhiṣag bastāvuttarasaṃjñite// ### [4.37.118](https://indike.org/pramana/in.med.samhita.susruta.4.37.118) bhūyo bastiṃ nidadhyāttu saṃyuktaṃ śodhanairgaṇaiḥ/ gude vartiṃ nidadhyādvā śodhanadravyasaṃbhṛtām// ### [4.37.119](https://indike.org/pramana/in.med.samhita.susruta.4.37.119) praveśayedvā matimān bastidvāramathaiṣaṇīm/ pīḍayedvā+apyadho nābherbalenottaramuṣṭinā// ### [4.37.120](https://indike.org/pramana/in.med.samhita.susruta.4.37.120) āragvadhasya patraistu nirguṇḍyāḥ svarasena ca/ kuryādgomūtrapiṣṭeṣu vartīrvā+api sasaindhavāḥ// ### [4.37.121](https://indike.org/pramana/in.med.samhita.susruta.4.37.121) mudgailāsarṣapasamāḥ pravibhajya vayāṃsi tu/ basterāgamanārthāya tā nidadhyāchalākayā// ### [4.37.122](https://indike.org/pramana/in.med.samhita.susruta.4.37.122) āgāradhūmabṛhatīpippalīphalasaindhavaiḥ/ kṛtā vā śuktagomūtrasurāpiṣṭaiḥ sanāgaraiḥ// ### [4.37.123](https://indike.org/pramana/in.med.samhita.susruta.4.37.123) anuvāsanasiddhiṃ ca vīkṣya karma prayojayet/ śarkarāmadhumiśreṇa śītena madhukāmbunā// ### [4.37.124](https://indike.org/pramana/in.med.samhita.susruta.4.37.124) dahyamāne tadā bastau dadyādbastiṃ vicakṣaṇaḥ/ kṣīravṛkṣakaṣāyeṇa payasā śītalena ca// ### [4.37.125](https://indike.org/pramana/in.med.samhita.susruta.4.37.125) śukraṃ duṣṭaṃ śoṇitaṃ cāṅganānāṃ puṣpodrekaṃ tasya nāṇaṃ ca kaṣṭam/ mūtrāghātānmūtradoṣān pravṛddhān yonivyādhiṃ saṃsthitiṃ cāparāyāḥ// ### [4.37.126](https://indike.org/pramana/in.med.samhita.susruta.4.37.126) śukrotsekaṃ śarkarāmaśmarīṃ ca śūlaṃ bastau vaṅkṣaṇe mehane ca/ ghorānanyān bastijāṃścāpi rogān hitvā mehānuttaro hanti bastiḥ// ### [4.37.127](https://indike.org/pramana/in.med.samhita.susruta.4.37.127) samyagdattasya liṅgāni vyāpadaḥ krama eva ca/ basteruttarasaṃjñasya samānaṃ snehabastinā// ### [4.37.127\_1](https://indike.org/pramana/in.med.samhita.susruta.4.37.127_1) iti suśrutasaṃhitāyāṃ cikitsāsthāne+anuvāsanottarabasticikitsitaṃ nāma saptaviṃśo+adhyāyaḥ//37// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.120.51) — Ḍalhaṇa, Sanskrit ## Linked texts (9) - [Siddhayoga (Vṛndamādhava)](https://indike.org/pramana/in.med.sangraha.siddhayoga.75.2) — Vṛnda, Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.71.2) — Cakrapāṇidatta, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.11.22) — Śārṅgadhara (physician), Sanskrit - [Āyurvedadīpikā (Carakatātparyaṭīkā) (ed. Yādavjī Trikamjī Ācārya, 1981 printing)](https://indike.org/pramana/in.med.samhita.caraka!cakrapani*jadavji.8.1.18.1) — Sanskrit - [Tantrayuktivicāra](https://indike.org/pramana/in.med.paribhasa.tantrayuktivicara.17_67) — Nīlamegha, Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.14.14) — Trimalla, Sanskrit - [Paribhāṣāpradīpa](https://indike.org/pramana/in.med.paribhasa.paribhasapradipa.5.154) — Govindasena, Sanskrit - [Siddhasāra](https://indike.org/pramana/in.med.sangraha.siddhasara.p418) — Ravigupta, Sanskrit - [Vīrasiṃhāvaloka](https://indike.org/pramana/in.med.sangraha.karmavipaka.virasimhavaloka.33.p4.5) — Vīrasiṃha, Sanskrit --- Source: [https://indike.org/pramana/in.med.samhita.susruta.4.37](https://indike.org/pramana/in.med.samhita.susruta.4.37) · Pramāṇa