[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.38 # The Compendium of Suśruta 4.38: aṣṭatriṃśattamo+adhyāyaḥ/ Suśrutasaṃhitā 4.38 - **Language:** Sanskrit ### aṣṭatriṃśattamo+adhyāyaḥ/ ### [4.38.1](https://indike.org/pramana/in.med.samhita.susruta.4.38.1) athāto nirūhakramacikitsitaṃ vyākhyāsyāmaḥ// ### [4.38.2](https://indike.org/pramana/in.med.samhita.susruta.4.38.2) yathovāca bhagavān dhanvantariḥ// ### [4.38.3](https://indike.org/pramana/in.med.samhita.susruta.4.38.3) athānuvāsitamāsthāpayet; svabhyaktasvinnaśarīramutsṛṣṭabahirvegamavāte śucau veśmani madhyāhne pratatāyāṃ śayyāyāmadhaḥsuparigrahāyāṃ śroṇipradeśaprativyūḍhāyāmanupadhānāyāṃ vāmapārśvaśāyinamākuñcitadakṣiṇasakthimitaraprasāritasakthiṃ sumanasaṃ jīrṇānnaṃ vāgyataṃ suniṣaṇṇadehaṃ viditvā, tato vāmapādasyopari netraṃ kṛtvetarapādāṅguṣṭhāṅgulibhyāṃ karṇikāmupari niṣpīḍya, savyapāṇikaniṣṭhikānāmikābhyāṃ bastermukhārdhaṃ saṅkocya, madhyamāpradeśinyaṅguṣṭhairardhaṃ† tu vivṛtāsyaṃ kṛtvā, bastāvauṣadhaṃ prakṣipya, dakṣiṇahastāṅguṣṭhena pradeśinīmadhyamābhyāṃ cānusiktamanāyatamabudbudamasaṅkucitamavātamauṣadhāsannamupasaṃgṛhya†, punarupari taditareṇa gṛhītvā dakṣiṇenāvasiñcet, tataḥ sūtreṇaivauṣadhānte dvistrirvā++āveṣṭya badhnīyāt, atha dakṣiṇenottānena pāṇinā bastiṃ gṛhītvā vāmahastamadhyamāṅgulipradeśinībhyāṃ netramupasaṃgṛhyāṅguṣṭena netradvāraṃ pidhāya, ghṛtābhyaktāgranetraṃ ghṛtāktamupādāya prayacchedanupṛṣṭhavaṃśaṃ samamunmukhamākarṇikaṃ netraṃ praṇidhatsveti brūyāt// ### [4.38.4](https://indike.org/pramana/in.med.samhita.susruta.4.38.4) bastiṃ savye kare kṛtvā dakṣiṇenāvapīḍayet/ ekenaivāvapīḍena na drutaṃ na vilambitam// ### [4.38.5](https://indike.org/pramana/in.med.samhita.susruta.4.38.5) tato netramapanīya triṃśanmātrāḥ †pīḍanakālādupekṣyottiṣṭhetyāturaṃ brūyāt/ athāturamupaveśayedutkuṭukaṃ† bastyāgamanārtham/ nirūhapratyāgamanakālastu muhūrto bhavati// ### [4.38.6](https://indike.org/pramana/in.med.samhita.susruta.4.38.6) anena vidhinā bastiṃ dadyādbastiviśāradaḥ/ dvitīyaṃ vā tṛtīyaṃ vā caturthaṃ vā yathārthataḥ// ### [4.38.7](https://indike.org/pramana/in.med.samhita.susruta.4.38.7) samyaṅnirūḍhaliṅge tu prāote bastiṃ nivārayet/ viśeṣāt sukumārāṇāṃ hīna eva kramo hitaḥ// ### [4.38.8](https://indike.org/pramana/in.med.samhita.susruta.4.38.8) api hīnakramaṃ kuryānna tu kuryādatikramam/ yasya †syādbastiralpo+alpavego hīnamalānilaḥ// ### [4.38.9](https://indike.org/pramana/in.med.samhita.susruta.4.38.9) durnirūḍhaḥ sa vijñeyo mūtrārtyarucijāḍyavān/ yānyeva prāṅmayoktāni liṅgānyativirecite// ### [4.38.10](https://indike.org/pramana/in.med.samhita.susruta.4.38.10) tānyevātinirūḍhe+api vijñeyāni vipaścitā/ yasya krameṇa gacchanti viṭpittakaphavāyavaḥ// ### [4.38.11](https://indike.org/pramana/in.med.samhita.susruta.4.38.11) lāghavaṃ copajāyeta sunirūḍhaṃ tamādiśet/ sunirūḍhaṃ tato jantuṃ snātavantaṃ tu bhojayet†// ### [4.38.12](https://indike.org/pramana/in.med.samhita.susruta.4.38.12) pittaśleṣmānilāviṣṭaṃ kṣīrayūṣarasaiḥ kramāt/ sarvaṃ vā jāṅgalarasairbhojayedavikāribhiḥ// ### [4.38.13](https://indike.org/pramana/in.med.samhita.susruta.4.38.13) tribhāgahīnamardhaṃ vā hīnamātramathāpi vā/ yathāgnidoṣaṃ mātreyaṃ bhojanasya vidhīyate// ### [4.38.14](https://indike.org/pramana/in.med.samhita.susruta.4.38.14) anantaraṃ tato yuñjyādyathāsvaṃ snehabastinā/ viviktatā manastuṣṭiḥ snigdhatā vyādhinigrahaḥ// ### [4.38.15](https://indike.org/pramana/in.med.samhita.susruta.4.38.15) āsthāpanasnehabastyoḥ samyagdāne tu lakṣaṇam/ tadahastasya pavanādbhayaṃ balavadiṣyate// ### [4.38.16](https://indike.org/pramana/in.med.samhita.susruta.4.38.16) rasaudanastena śastastadahaścānuvāsanam/ paścādagnibalaṃ matvā pavanasya ca ceṣṭitam// ### [4.38.17](https://indike.org/pramana/in.med.samhita.susruta.4.38.17) annopastambhite koṣṭhe snehabastirvidhīyate/ anāyāntaṃ muhūrtāttu nirūhaṃ śodhanairharet// ### [4.38.18](https://indike.org/pramana/in.med.samhita.susruta.4.38.18) tīkṣṇairnirūhairmatimān kṣāramūtrāmlasaṃyutaiḥ/ viguṇānilaviṣṭabdhaṃ ciraṃ tiṣṭhannirūhaṇam// ### [4.38.19](https://indike.org/pramana/in.med.samhita.susruta.4.38.19) śūlāratijvarānāhānmaraṇaṃ vā pravartayet/ natu bhuktavato deyamāsthāpanamiti sthitiḥ// ### [4.38.20](https://indike.org/pramana/in.med.samhita.susruta.4.38.20) visūcikāṃ vā janayecchadiṃ vā+api sudāruṇām/ kopayet sarvadoṣān vā tasmāddadyādabhojine// ### [4.38.21](https://indike.org/pramana/in.med.samhita.susruta.4.38.21) jīrṇānnasyāśaye doṣāḥ puṃsaḥ pravyaktimāgatāḥ/ niḥśeṣāḥ sukhamāyānti bhojanenāprapīḍitāḥ// ### [4.38.22](https://indike.org/pramana/in.med.samhita.susruta.4.38.22) navā++āsthāpanavikṣiptamannamagniḥ pradhāvati/ tasmādāsthāpanaṃ deyaṃ nirāhārāya jānatā// ### [4.38.23](https://indike.org/pramana/in.med.samhita.susruta.4.38.23) āvasthikaṃ kramaṃ cāpi buddhvā kāryaṃ nirūhaṇam/ male+apakṛṣṭe doṣāṇāṃ balavattvaṃ na vidyate// ### [4.38.24](https://indike.org/pramana/in.med.samhita.susruta.4.38.24) kṣīrāṇyamlāni mūtrāṇi snehāḥ kvāthā rasāstathā/ lavaṇāni phalaṃ kṣaudraṃ śatāhvā sarṣapaṃ vacā// ### [4.38.25](https://indike.org/pramana/in.med.samhita.susruta.4.38.25) elā trikaṭukaṃ rāsnā saralo devadāru ca/ rajanī madhukaṃ hiṅgu kuṣṭhaṃ saṃśodhanāni ca// ### [4.38.26](https://indike.org/pramana/in.med.samhita.susruta.4.38.26) kaṭukā śarkarā mustamuśīraṃ candanaṃ śaṭī/ mañjiṣṭhā madanaṃ caṇḍā trāyamāṇā rasāñjanam// ### [4.38.27](https://indike.org/pramana/in.med.samhita.susruta.4.38.27) bilvamadhyaṃ yavānī ca phalinī śakrajā yavāḥ/ kākolī kṣīrakākolī jīvakarṣabhakāvubhau// ### [4.38.28](https://indike.org/pramana/in.med.samhita.susruta.4.38.28) tathā medā mahāmedā ṛddhirvṛddhirmadhūlikā/ nirūheṣu yathālābhameṣa vargo vidhīyate// ### [4.38.29](https://indike.org/pramana/in.med.samhita.susruta.4.38.29) svasthe kvāthasya †catvāro bhāgāḥ snehasya pañcamaḥ/ kuddhe+anile caturthastu ṣaṣṭhaḥ pitte kaphe+aṣṭamaḥ// ### [4.38.30](https://indike.org/pramana/in.med.samhita.susruta.4.38.30) sarveṣu cāṣṭamo bhāgaḥ kalkānāṃ lavaṇaṃ punaḥ/ kṣaudraṃ mūtraṃ phalaṃ kṣīramamlaṃ māṃsarasaṃ tathā// ### [4.38.31](https://indike.org/pramana/in.med.samhita.susruta.4.38.31) yuktyā prakalpayeddhīmān nirūh kalpanā tviyam// ### [4.38.32](https://indike.org/pramana/in.med.samhita.susruta.4.38.32) kalkasnehakaṣāyāṇāmavivekādbhiṣagvaraiḥ/ †basteḥ sukalpanā proktā tasya dānaṃ yathārthakṛt// ### [4.38.33](https://indike.org/pramana/in.med.samhita.susruta.4.38.33) dattvā++ādau saindhavasyākṣaṃ madhunaḥ prasṛtadvayam/ pātre talena mathnīyāttadvat †snehaṃ śanaiḥ śanaiḥ// ### [4.38.34](https://indike.org/pramana/in.med.samhita.susruta.4.38.34) samyak sumathite dadyāt phalakalkamataḥ param/ tato yathocitān kalkān bhāgaiḥ svaiḥ ślakṣṇapeṣitān// ### [4.38.35](https://indike.org/pramana/in.med.samhita.susruta.4.38.35) gambhīre bhājane+anyasminmaśnīyāttaṃ khajena ca/ yathā vā sādhu manyeta na sāndro na tanuḥ samaḥ// ### [4.38.36](https://indike.org/pramana/in.med.samhita.susruta.4.38.36) rasakṣīrāmlamūtrāṇāṃ doṣāvasthāmavekṣya tu/ kaṣāyaprasṛtān pañca supūtāṃstatra dāpayet// ### [4.38.37](https://indike.org/pramana/in.med.samhita.susruta.4.38.37) ata ūrdhvaṃ dvādaśaprasṛtān† vakṣyāmaḥ/ dattvā++ādau saindhavasyākṣaṃ madhunaḥ prasṛtidvayam/ vinirmathya tato dadyāt snehasya prasṛtitrayam// ### [4.38.38](https://indike.org/pramana/in.med.samhita.susruta.4.38.38) ekībhūte tataḥ snehe kalkasya prasṛtiṃ kṣipet/ saṃmūrcchite kaṣāyaṃ tu catuḥprasṛtisaṃmitam// ### [4.38.39](https://indike.org/pramana/in.med.samhita.susruta.4.38.39) vitarecca tadāvāpamante dviprasṛtonmitam/ evaṃ prakalpito bastirdvādaśaprasṛto bhavet// ### [4.38.40](https://indike.org/pramana/in.med.samhita.susruta.4.38.40) jyeṣṭhāyāḥ khalu mātrāyāḥ pramāṇamidamīritam/ apahrāse bhiṣakkuryāttadvat prasṛtihāpanam// ### [4.38.41](https://indike.org/pramana/in.med.samhita.susruta.4.38.41) yathāvayo nirūhāṇāṃ kalpaneyamudāhṛtā/ saindhavādidravāntānāṃ siddhikāmairbhiṣagvaraiḥ// ### [4.38.42](https://indike.org/pramana/in.med.samhita.susruta.4.38.42) ata ūrdhvaṃ pravakṣyante bastayo+atra vibhāgaśaḥ/ yathādoṣaṃ prayuktā ye hanyurnānāvidhān gadān// ### [4.38.43](https://indike.org/pramana/in.med.samhita.susruta.4.38.43) śampākorubuvarṣābhūvājigandhāniśācchadaiḥ/ pañcamūlībalārāsnāguḍūcīsuradārubhiḥ// ### [4.38.44](https://indike.org/pramana/in.med.samhita.susruta.4.38.44) kvathitaiḥ pālikairebhirmadanāṣṭakasaṃyutaiḥ/ kalkairmāgadhikāmbhodahapuṣāmisisaindhavaiḥ// ### [4.38.45](https://indike.org/pramana/in.med.samhita.susruta.4.38.45) vatsāhvayapriyaṅgūgrāyaṣṭyāhvayarasāñjanaiḥ/ dadyādāsthāpanaṃ koṣṇaṃ kṣaudrādyairabhisaṃskṛtam// ### [4.38.46](https://indike.org/pramana/in.med.samhita.susruta.4.38.46) pṛṣṭhorutrikaśūlāśmaviṇmūtrānilasaṅginām/ grahaṇīmārutārśoghnaṃ raktamāṃsabalapradam// ### [4.38.47](https://indike.org/pramana/in.med.samhita.susruta.4.38.47) guḍūcītriphalārāsnādaśamūlabalāpalaiḥ/ kvathitaiḥ ślakṣṇapiṣṭastu priyaṅgughanasaindhavaiḥ†// ### [4.38.48](https://indike.org/pramana/in.med.samhita.susruta.4.38.48) śatapuṣpāvacākṛṣṇāyavānīkuṣṭhabilvajaiḥ/ saguḍairakṣamātraistu madanārdhapalānvitaiḥ// ### [4.38.49](https://indike.org/pramana/in.med.samhita.susruta.4.38.49) kṣaudratailaghṛtakṣīraśuktakāñjikamastubhiḥ/ samāloḍya ca mūtreṇa dadyādāsthāpanaṃ param// ### [4.38.50](https://indike.org/pramana/in.med.samhita.susruta.4.38.50) tejovarṇabalotsāhavīryāgniprāṇavardhanam/ sarvamārutarogaghnaṃ vayaḥsthāpanamuttamam// ### [4.38.51](https://indike.org/pramana/in.med.samhita.susruta.4.38.51) kuśādipañcamūlābdatriphalotpalavāsakaiḥ/ sārivośīramañjiṣṭhārāsnāreṇuparūṣakaiḥ// ### [4.38.52](https://indike.org/pramana/in.med.samhita.susruta.4.38.52) pālikaiḥ kvathitaiḥ samyag dravyairebhiśca peṣitaiḥ/ śṛṅgāṭakātmaguptebhakesarāgurucandanaiḥ// ### [4.38.53](https://indike.org/pramana/in.med.samhita.susruta.4.38.53) vidārīmisimañjiṣṭhāśyāmendrayavasindhujaiḥ/ phalapadmakayaṣṭyāhvaiḥ kṣaudrakṣīraghṛtāplutaiḥ// ### [4.38.54](https://indike.org/pramana/in.med.samhita.susruta.4.38.54) dattamāsthāpanaṃ śītamamlahīnaistathā dravaiḥ/ dāhāsṛgdarapittāsṛkpittagulmajvarāñjayet// ### [4.38.55](https://indike.org/pramana/in.med.samhita.susruta.4.38.55) rodhracandanamañjiṣṭhārāsnānantābalardhibhiḥ/ sārivāvṛṣakāśmaryamedāmadhukapadmakaiḥ// ### [4.38.56](https://indike.org/pramana/in.med.samhita.susruta.4.38.56) sthirāditṛṇamūlaiśca kvāthaḥ karṣatrayonmitaiḥ/ piṣṭairjīvakakākolīyugardhimadhukotpalaiḥ// ### [4.38.57](https://indike.org/pramana/in.med.samhita.susruta.4.38.57) prapauṇḍarīkajīvantīmedāreṇuparūṣakaiḥ/ abhīrumisisindhūtthavatsakośīrapadmakaiḥ// ### [4.38.58](https://indike.org/pramana/in.med.samhita.susruta.4.38.58) kaseruśarkarāyuktaiḥ sarpirmadhupayaḥplutaiḥ/ dravaistīkṣṇāmlavarjyaiśca datto bastiḥ suśītalaḥ// ### [4.38.59](https://indike.org/pramana/in.med.samhita.susruta.4.38.59) gulmāsṛgdarahṛtpāṇḍurogān saviṣamajvarān/ asṛkpittātisārau ca hanyātpittakṛtān gadān// ### [4.38.60](https://indike.org/pramana/in.med.samhita.susruta.4.38.60) bhadrānimbakulatthārkakośātakyamṛtāmaraiḥ/ sārivābṛhatīpāṭhāmūrvāragvadhavatsakaiḥ// ### [4.38.61](https://indike.org/pramana/in.med.samhita.susruta.4.38.61) kvāthaḥ kalkastu kartavyo †vacāmadanasarṣapaiḥ/ saindhavāmarakuṣṭhailāpippalībilvanāgaraiḥ// ### [4.38.62](https://indike.org/pramana/in.med.samhita.susruta.4.38.62) kaṭutailamadhukṣāramūtratailāmlasaṃyutaiḥ/ kāryamāsthāpanaṃ tūrṇaṃ kāmalāpāṇḍumehinām// ### [4.38.63](https://indike.org/pramana/in.med.samhita.susruta.4.38.63) medasvināmanagnīnāṃ kapharogāśanadviṣām/ galagaṇḍagaraglāniślīpadodararogiṇām// ### [4.38.64](https://indike.org/pramana/in.med.samhita.susruta.4.38.64) daśamūlīniśābilvapaṭolatriphalāmaraiḥ/ kvathitaiḥ kalkapiṣṭaistu mustasaindhavadārubhiḥ// ### [4.38.65](https://indike.org/pramana/in.med.samhita.susruta.4.38.65) pāṭhāmāgadhikendrāhvaistailakṣāramadhuplutaiḥ/ kuryādāsthāpanaṃ samyaṅmūtrāmlaphalayojitaiḥ// ### [4.38.66](https://indike.org/pramana/in.med.samhita.susruta.4.38.66) kaphapāṇḍugadālasyamūtramārutasaṃginām/ āmāṭopāpacīśleṣmagulmakrimivikāriṇām// ### [4.38.67](https://indike.org/pramana/in.med.samhita.susruta.4.38.67) vṛṣāśmabhedavarṣābhūdhānyagandharvahastakaiḥ/ daśamūlabalāmūrvāyavakolaniśācchadaiḥ// ### [4.38.68](https://indike.org/pramana/in.med.samhita.susruta.4.38.68) kulatthabilvabhūnimbaiḥ kvāthitaiḥ palasaṃmitaiḥ/ kalkairmadanayaṣṭyāhvaṣaḍgranthāmarasarṣapaiḥ// ### [4.38.69](https://indike.org/pramana/in.med.samhita.susruta.4.38.69) pippalīmūlasindhūtthayavānīmisivatsakaiḥ/ kṣaudrekṣukṣīragomūtrasarpistailarasāplutaiḥ// ### [4.38.70](https://indike.org/pramana/in.med.samhita.susruta.4.38.70) tūrṇamāsthāpanaṃ kāryaṃ saṃsṛṣṭabahurogiṇām/ gṛdhrasīśarkarāṣṭhīlātūnīgulmagadāpaham// ### [4.38.71](https://indike.org/pramana/in.med.samhita.susruta.4.38.71) rāsnāragvadhavarṣābhūkaṭukośīravāridaiḥ/ trāyamāṇāmṛtāraktāpañcamūlībibhītakaiḥ// ### [4.38.72](https://indike.org/pramana/in.med.samhita.susruta.4.38.72) sabalaiḥ pālikaiḥ kvāthaḥ kalkastu madanānvitaiḥ/ yaṣṭyāhvamisisindhūtthaphalinīndrayavāhvayaiḥ// ### [4.38.73](https://indike.org/pramana/in.med.samhita.susruta.4.38.73) rasāñjanarasakṣaudradrākṣāsauvīrasaṃyutaiḥ/ yukto bastiḥ sukhoṣṇo+ayaṃ māṃsaśukrabalaujasām// ### [4.38.74](https://indike.org/pramana/in.med.samhita.susruta.4.38.74) āyuṣo+agneśca saṃskartā hanti cāśu gadānimān/ gulmāsṛgdaravīsarpamūtrakṛcchrakṣatakṣayān// ### [4.38.75](https://indike.org/pramana/in.med.samhita.susruta.4.38.75) †viṣamajvaramarśāsi grahaṇīṃ vātakuṇḍalīm/ jānujaṅghāśirobastigrahodāvartamārutān// ### [4.38.76](https://indike.org/pramana/in.med.samhita.susruta.4.38.76) vātāsṛkśarkarāṣṭhīlākukṣiśūlodarārucīḥ/ raktapittakaphonmādapramehādhmānahṛdgrahān// ### [4.38.77](https://indike.org/pramana/in.med.samhita.susruta.4.38.77) vātaghnauṣadhaniṣkvāthāḥ saindhavatrivṛtāyutāḥ/ sāmlāḥ sukhoṣṇā yojyāḥ syurbastayaḥ kupite+anile// ### [4.38.78](https://indike.org/pramana/in.med.samhita.susruta.4.38.78) nyagrodhādigaṇakvāthāḥ kākolyādisamāyutāḥ/ vidheyā bastayaḥ pitte sasarpiṣkāḥ saśarkarāḥ// ### [4.38.79](https://indike.org/pramana/in.med.samhita.susruta.4.38.79) āragvadhādiniṣkvāthāḥ pippalyādisamāyutāḥ/ sakṣaudramūtrā deyāḥ syurbastayaḥ kupite kaphe// ### [4.38.80](https://indike.org/pramana/in.med.samhita.susruta.4.38.80) śarkarekṣurasakṣīraghṛtayuktāḥ suśītalāḥ/ kṣīravṛkṣakaṣāyāḍhyā bastayaḥ śoṇite hitāḥ// ### [4.38.81](https://indike.org/pramana/in.med.samhita.susruta.4.38.81) śodhanadravyaniṣkvāthāstatkalkasnehasaindhavaiḥ/ yuktāḥ khajena mathitabastayaḥ śodhanāḥ smṛtāḥ// ### [4.38.82](https://indike.org/pramana/in.med.samhita.susruta.4.38.82) triphalākvāthagomūtrakṣaudrakṣārasamāyutāḥ/ ūṣakādipratīvāpā bastayo lekhanāḥ smṛtāḥ// ### [4.38.83](https://indike.org/pramana/in.med.samhita.susruta.4.38.83) bṛṃhaṇadravyaniṣkvāthāḥ kalkairmadhurakairyutāḥ/ sarpirmāṃsarasopetā bastayo bṛṃhaṇāḥ smṛtāḥ// ### [4.38.84](https://indike.org/pramana/in.med.samhita.susruta.4.38.84) caṭakāṇḍoccaṭākvāthāḥ sakṣīraghṛtaśarkarāḥ/ ātmaguptāphalāvāpāḥ smṛtā vājīkarā nṛṇām// ### [4.38.85](https://indike.org/pramana/in.med.samhita.susruta.4.38.85) badaryairāvatīśeluśālmalīdhanvanāṅkurāḥ/ kṣīrasiddhāḥ kṣaudrayutāḥ sāsrāḥ picchilasaṃjñitāḥ// ### [4.38.86](https://indike.org/pramana/in.med.samhita.susruta.4.38.86) vārāhamāhiṣaurabhrabaiḍālaiṇeyakaukkuṭam/ †sadyaskamasṛgājaṃ vā deyaṃ picchilabastiṣu// ### [4.38.87](https://indike.org/pramana/in.med.samhita.susruta.4.38.87) priyaṅgvādigaṇakvāthā ambaṣṭhādyena saṃyutāḥ/ sakṣaudrāḥ saghṛtāścaiva grāhiṇo bastayaḥ smṛtāḥ// ### [4.38.88](https://indike.org/pramana/in.med.samhita.susruta.4.38.88) eteṣveva ca yogeṣu snehāḥ siddhāḥ pṛthak pṛthak/ samasteṣvathavā samyagvidheyāḥ snehabastayaḥ// ### [4.38.89](https://indike.org/pramana/in.med.samhita.susruta.4.38.89) vandhyānāṃ śatapākena śodhitānāṃ yathākramam/ balātailena deyāḥ syurbastayastraivṛtena ca// ### [4.38.90](https://indike.org/pramana/in.med.samhita.susruta.4.38.90) narasyottamasattvasya tīkṣṇaṃ bastiṃ nidhāpayet/ madhyamaṃ madhyasattvasya viparītasya vai mṛdum// ### [4.38.91](https://indike.org/pramana/in.med.samhita.susruta.4.38.91) evaṃ kālaṃ balaṃ doṣaṃ vikāraṃ ca vikāravit/ bastidravyabalaṃ caiva vīkṣya bastīn prayojayet// ### [4.38.92](https://indike.org/pramana/in.med.samhita.susruta.4.38.92) dadyādutkleśanaṃ pūrvaṃ madhye doṣaharaṃ punaḥ/ paścāt saṃśamanīyaṃ ca dadyādbastiṃ vicakṣaṇaḥ// ### [4.38.93](https://indike.org/pramana/in.med.samhita.susruta.4.38.93) eraṇḍabījaṃ madhukaṃ pippalī saindhavaṃ vacā/ hapuṣāphalakalkaśca bastirutkleśanaḥ smṛtaḥ// ### [4.38.94](https://indike.org/pramana/in.med.samhita.susruta.4.38.94) śatāhvā madhukaṃ bījaṃ kauṭajaṃ phalameva ca/ sakāñjikaḥ sagomūtro bastirdoṣaharaḥ smṛtaḥ// ### [4.38.95](https://indike.org/pramana/in.med.samhita.susruta.4.38.95) priyaṅgurmadhukaṃ mustā tathaiva ca rasāñjanam/ sakṣīraḥ śasyate bastirdoṣāṇāṃ śamanaḥ paraḥ// ### [4.38.96](https://indike.org/pramana/in.med.samhita.susruta.4.38.96) nṛpāṇāṃ tatsamānānāṃ tathā sumahatāmapi/ nārīṇāṃ sukumārāṇāṃ śiśusthavirayorapi// ### [4.38.97](https://indike.org/pramana/in.med.samhita.susruta.4.38.97) doṣanirharaṇārthāya balavarṇodayāya ca/ samāsenopadekṣyāmi vidhānaṃ mādhutailikam// ### [4.38.98](https://indike.org/pramana/in.med.samhita.susruta.4.38.98) yānastrībhojyapāneṣu niyamaścātra nocyate/ phalaṃ ca vipulaṃ dṛṣṭaṃ vyāpadāṃ cāpyasaṃbhavaḥ// ### [4.38.99](https://indike.org/pramana/in.med.samhita.susruta.4.38.99) yojyastvataḥ sukhenaiva nirūhakramamicchatā/ yadecchati tadaivaiṣa prayoktavyo vipaścitā// ### [4.38.100](https://indike.org/pramana/in.med.samhita.susruta.4.38.100) madhutaile same syātāṃ kvāthaścairaṇḍamūlajaḥ/ palārdhaṃ śatapuṣpāyāstato+ardhaṃ saindhavasya ca// ### [4.38.101](https://indike.org/pramana/in.med.samhita.susruta.4.38.101) phalenaikena saṃyuktaḥ khajena ca viloḍitaḥ/ deyaḥ sukhoṣṇo bhiṣajā mādhutailikasaṃjñitaḥ// ### [4.38.102](https://indike.org/pramana/in.med.samhita.susruta.4.38.102) vacāmadhukatailaṃ ca kvāthaḥ sarasasaindhavaḥ/ pippalīphalasaṃyukto bastiryuktarathaḥ smṛtaḥ// ### [4.38.103](https://indike.org/pramana/in.med.samhita.susruta.4.38.103) suradāru varā rāsnā śatapuṣpā vacā madhu/ hiṅgusaindhavasaṃyukto bastirdoṣaharaḥ smṛtaḥ// ### [4.38.104](https://indike.org/pramana/in.med.samhita.susruta.4.38.104) pañcamūlīkaṣāyaṃ ca tailaṃ māgadhikā madhu/ bastireṣa vidhātavyaḥ saśatāhvaḥ sasaindhavaḥ// ### [4.38.105](https://indike.org/pramana/in.med.samhita.susruta.4.38.105) yavakolakulatthānāṃ kvātho māgadhikā madhu/ sasaindhavaḥ sayaṣṭyāhvaḥ siddhabastiriti smṛtaḥ// ### [4.38.106](https://indike.org/pramana/in.med.samhita.susruta.4.38.106) mustāpāṭhāmṛtātiktābalārāsnāpunarnavāḥ/ mañjiṣṭhāragvadhośīratrāyamāṇākhyagokṣurān// ### [4.38.107](https://indike.org/pramana/in.med.samhita.susruta.4.38.107) pālikān pañcamūlālpasahitānmadanāṣṭakam/ jalāḍhake pacet kvāthaṃ pādaśeṣaṃ punaḥ pacet// ### [4.38.108](https://indike.org/pramana/in.med.samhita.susruta.4.38.108) †kṣīrārdhāḍhakasaṃyuktamākṣīrāt suparisrutam/ apadena jāṅgalarasastatahā madhughṛtaṃ samam// ### [4.38.109](https://indike.org/pramana/in.med.samhita.susruta.4.38.109) śatāhvāphalinīyaṣṭīvatsakaiḥ sarasāñjanaiḥ/ kārṣikaiḥ saindhavonmiśraiḥ kalkairbastiḥ prayojitaḥ// ### [4.38.110](https://indike.org/pramana/in.med.samhita.susruta.4.38.110) vātāsṛṅmehaśophārśogulmamūtravibandhanut/ visarpajvaraviḍbhaṅgaraktapittavināśanaḥ// ### [4.38.111](https://indike.org/pramana/in.med.samhita.susruta.4.38.111) balyaḥ saṃjīvano vṛṣyaścakṣuṣyaḥ śūlanāśanaḥ/ yāpanānāmayaṃ rājā bastirmustādiko mataḥ// ### [4.38.112](https://indike.org/pramana/in.med.samhita.susruta.4.38.112) avekṣya bheṣajaṃ buddhyā vikāraṃ ca vikāravit/ bījenānena śāstrajñaḥ kuryādbastiśatānyapi// ### [4.38.113](https://indike.org/pramana/in.med.samhita.susruta.4.38.113) ajīrṇe na prayuñjīta divāsvapnaṃ ca varjayet/ āhārācārikaṃ †śeṣamanyat kāmaṃ samācaret// ### [4.38.114](https://indike.org/pramana/in.med.samhita.susruta.4.38.114) yasmānmadhu ca tailaṃ ca prādhānyena† pradīyate/ mādhutailika ityevaṃ bhiṣagbhirbastirucyate// ### [4.38.115](https://indike.org/pramana/in.med.samhita.susruta.4.38.115) ratheṣvapi ca yukteṣu hastyaśve cāpi kalpite/ yasmānna pratiṣiddho+ayamato yuktarathaḥ smṛtaḥ// ### [4.38.116](https://indike.org/pramana/in.med.samhita.susruta.4.38.116) balopacayavarṇānāṃ yasmād vyādhiśatasya ca/ bhavatyetena siddhistu siddhabastirato mataḥ// ### [4.38.117](https://indike.org/pramana/in.med.samhita.susruta.4.38.117) sukhināmalpadoṣāṇāṃ nityaṃ snigdhāśca ye narāḥ/ mṛdukoṣṭhāśca ye teṣāṃ vidheyā mādhutailikāḥ// ### [4.38.118](https://indike.org/pramana/in.med.samhita.susruta.4.38.118) mṛdutvāt pādahīnatvādakṛtsnavidhisevanāt/ ekabastipradānācca siddhabastiṣvayantraṇā// ### [4.38.118\_1](https://indike.org/pramana/in.med.samhita.susruta.4.38.118_1) iti suśrutasaṃhitāyāṃ cikitsāsthāne nirūhakramacikitsitaṃ nāmāṣṭatriṃśo+adhyāyaḥ //38// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.121.127) — Ḍalhaṇa, Sanskrit ## Linked texts (6) - [Siddhayoga (Vṛndamādhava)](https://indike.org/pramana/in.med.sangraha.siddhayoga.75.43) — Vṛnda, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.14.13) — Śārṅgadhara (physician), Sanskrit - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.72.11) — Cakrapāṇidatta, Sanskrit - [Bheḷasaṃhitā](https://indike.org/pramana/in.med.samhita.bhela.8.5.25) — Bheḷa, Sanskrit - [Vaidyamanoramā](https://indike.org/pramana/in.med.cikitsa.vaidyamanorama.12.p530) — Kālidāsa, Sanskrit - [Siddhasāra](https://indike.org/pramana/in.med.sangraha.siddhasara.p439) — Ravigupta, Sanskrit --- Source: [https://indike.org/pramana/in.med.samhita.susruta.4.38](https://indike.org/pramana/in.med.samhita.susruta.4.38) · Pramāṇa