[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.39 # The Compendium of Suśruta 4.39: ekonacatvāriṃśattamo+adhyāyaḥ/ Suśrutasaṃhitā 4.39 - **Language:** Sanskrit ### ekonacatvāriṃśattamo+adhyāyaḥ/ ### [4.39.1](https://indike.org/pramana/in.med.samhita.susruta.4.39.1) athāta āturopadravacikitsitaṃ vyākhyāsyāmaḥ// ### [4.39.2](https://indike.org/pramana/in.med.samhita.susruta.4.39.2) yathovāca bhagavān dhanvantariḥ// ### [4.39.3](https://indike.org/pramana/in.med.samhita.susruta.4.39.3) snehapītasya vāntasya viriktasya srutāsṛjaḥ/ nirūḍhasya ca kāyāgnirmando bhavati dehinaḥ// ### [4.39.4](https://indike.org/pramana/in.med.samhita.susruta.4.39.4) so+agnairatyarthagurubhirupayuktaiḥ praśāmyati/ alpo mahadbhirbahubhiśchādito+agnirivendhanaiḥ// ### [4.39.5](https://indike.org/pramana/in.med.samhita.susruta.4.39.5) sa cālpairlaghubhiścānnairupayuktairvivardhate/ kāṣṭhairaṇubhiralpaiśca sandhukṣita ivānalaḥ// ### [4.39.6](https://indike.org/pramana/in.med.samhita.susruta.4.39.6) hṛtadoṣapramāṇena sadā++āhāravidhiḥ smṛtaḥ/ trīṇi cātra pramāṇāni prastho+ardhāḍhakamāḍhakam// ### [4.39.7](https://indike.org/pramana/in.med.samhita.susruta.4.39.7) tatrāvaraṃ prasthamātraṃ dve śeṣe madhyamottame/ prasthe parisrute deyā yavāgūḥ khalpataṇḍulā// ### [4.39.8](https://indike.org/pramana/in.med.samhita.susruta.4.39.8) dve caivārdhāḍhake deye tisraścāpyāḍhake gate/ vilepīmucitādbhaktāccaturthāṃśakṛtāṃ tataḥ// ### [4.39.9](https://indike.org/pramana/in.med.samhita.susruta.4.39.9) dadyāduktena vidhinā klinnasikthāmapicchilām/ †agnigdhalavaṇaṃ svacchamudgayūṣayutaṃ tataḥ// ### [4.39.10](https://indike.org/pramana/in.med.samhita.susruta.4.39.10) aṃśadvayapramāṇena dadyāt susvinnamodanam/ tatastu kṛtasaṃjñena hṛdyenendriyabodhinā// ### [4.39.11](https://indike.org/pramana/in.med.samhita.susruta.4.39.11) trīnaṃśān vitaredbhoktumāturāyaudanaṃ mṛdu/ tato yathocitaṃ bhaktaṃ bhoktumasmai vicakṣaṇaḥ// ### [4.39.12](https://indike.org/pramana/in.med.samhita.susruta.4.39.12) lāvaiṇahariṇādīnāṃ rasairdadyāt susaṃskṛtaiḥ/ hīnamadhyottameṣveṣu virekeṣu prakīrtitaḥ// ### [4.39.13](https://indike.org/pramana/in.med.samhita.susruta.4.39.13) ekadvitriguṇaḥ samyagāhārasya kramastvayam/ kaphapittādhikānmadyanityān hīnaviśodhitān// ### [4.39.14](https://indike.org/pramana/in.med.samhita.susruta.4.39.14) peyā+abhiṣyandayetteṣāṃ tarpaṇādikramo hitaḥ/ vedanālābhaniyamaśokavaicittyahetubhiḥ// ### [4.39.15](https://indike.org/pramana/in.med.samhita.susruta.4.39.15) narānupoṣitāṃścāpi viriktavadupācaret/ āḍhakārdhāḍhakaprasthasaṃkhyā hyeṣā virecane// ### [4.39.16](https://indike.org/pramana/in.med.samhita.susruta.4.39.16) śleṣmāntatvādvirekasya na tāmicchati tadvidaḥ/ eko virekaḥ śleṣmānto na dvitīyo+asti kaścana// ### [4.39.17](https://indike.org/pramana/in.med.samhita.susruta.4.39.17) balaṃ yattrividhaṃ proktamatastatra kramastridhā/ tatrānukramamekaṃ tu balasthaḥ sakṛdācaret// ### [4.39.18](https://indike.org/pramana/in.med.samhita.susruta.4.39.18) dvirācarenmadhyabalastrīn vārān durbalastathā/ kecidevaṃ kramaṃ prāhurmandamadhyottamāgniṣu// ### [4.39.19](https://indike.org/pramana/in.med.samhita.susruta.4.39.19) saṃsargeṇa vivṛddhe+agnau doṣakopabhayādbhajet/ prāk svādutiktau snigdhāmlalavaṇān kaṭukaṃ tataḥ// ### [4.39.20](https://indike.org/pramana/in.med.samhita.susruta.4.39.20) svādvamlalavaṇān bhūyaḥ svādutiktāvataḥ param/ snigdharūkṣān rasāṃścaiva vyatyāsāt svasthavattataḥ// ### [4.39.21](https://indike.org/pramana/in.med.samhita.susruta.4.39.21) kevalaṃ snehapīto vā vānto yaścāpi kevalam/ sa saptarātraṃ manujo bhuñjīta laghu bhojanam// ### [4.39.22](https://indike.org/pramana/in.med.samhita.susruta.4.39.22) kṛtaḥ sirāvyadho yasya kṛtaṃ yasya ca śodhanam/ sa nā pariharenmāsaṃ yāvadvā balavān bhavet// ### [4.39.23](https://indike.org/pramana/in.med.samhita.susruta.4.39.23) tryahaṃ tryahaṃ pariharedekaikaṃ bastimāturaḥ†// tṛtīye tu parīhāre yathāyogaṃ samācaret// ### [4.39.24](https://indike.org/pramana/in.med.samhita.susruta.4.39.24) tailapūrṇāmṛdbhāṇḍasadharmāṇo vraṇāturāḥ/ snigdhaśuddhākṣirogārtā jvarātīsāriṇaśca ye// ### [4.39.25](https://indike.org/pramana/in.med.samhita.susruta.4.39.25) krudhyataḥ kupitaṃ pittaṃ kuryāttāṃstānupadravān/ āyāsyataḥ śocato vā cittaṃ vibhramamṛcchati// ### [4.39.26](https://indike.org/pramana/in.med.samhita.susruta.4.39.26) maithunopagamādghorān vyādhīnāpnoti durmatiḥ/ ākṣepakaṃ pakṣaghātamaṅgapragrahameva ca// ### [4.39.27](https://indike.org/pramana/in.med.samhita.susruta.4.39.27) guhyapradeśe śvayathuṃ kāsaśvāsau ca dāruṇau/ rudhiraṃ śukravaccāpi sarajaskaṃ pravartate// ### [4.39.28](https://indike.org/pramana/in.med.samhita.susruta.4.39.28) labhate ca divāsvapnāttāṃstān vyādhīn kaphātmakān/ plīhodaraṃ pratiśyāyaṃ pāṇḍutāṃ śvayathuṃ jvaram// ### [4.39.29](https://indike.org/pramana/in.med.samhita.susruta.4.39.29) mohaṃ sadanamaṅgānāmavipākaṃ tathā+arucim/ tamasā cābhibhūtastu svapnamevābhinandati// ### [4.39.30](https://indike.org/pramana/in.med.samhita.susruta.4.39.30) uccaiḥ saṃbhāṣaṇādvāyuḥ śirasyāpādayedrujam/ †āndhyaṃ jāḍyamajighratvaṃ bādhiryaṃ mūkatāṃ tathā// ### [4.39.31](https://indike.org/pramana/in.med.samhita.susruta.4.39.31) hanumokṣamadhīmanthamarditaṃ ca sudāruṇam/ netrastambhaṃ nimeṣaṃ vā tṛṣṇāṃ kāsaṃ prajāgaram// ### [4.39.32](https://indike.org/pramana/in.med.samhita.susruta.4.39.32) labhate dantacālaṃ ca tāṃstāṃścānyānupadravān/ yānayānena labhate chardimūrcchābhramaklamān// ### [4.39.33](https://indike.org/pramana/in.med.samhita.susruta.4.39.33) tathaivāṅgagrahaṃ ghoramindriyāṇāṃ ca vibhramam/ cirāsanāttathā sthānācchroṇyāṃ bhavati vedanā// ### [4.39.34](https://indike.org/pramana/in.med.samhita.susruta.4.39.34) aticaṅkramaṇādvāyurjaṅghayoḥ kurute rujaḥ/ sakthipraśoṣaṃ śophaṃ vā pādaharṣamathāpi vā// ### [4.39.35](https://indike.org/pramana/in.med.samhita.susruta.4.39.35) śītasaṃbhogatoyānāṃ sevā mārutavṛddhaye/ tato+aṅgamardaviṣṭambhaśūlādhmānapravepakāḥ// ### [4.39.36](https://indike.org/pramana/in.med.samhita.susruta.4.39.36) vātātapābhyāṃ vaivarṇyaṃ jvaraṃ cāpi samāpnuyāt/ viruddhādhyaśanānmṛtyuṃ vyādhiṃ vā ghoramṛcchati// ### [4.39.37](https://indike.org/pramana/in.med.samhita.susruta.4.39.37) asātmyabhojanaṃ hanyādbalavarṇamasaṃśayam/ anātmavantaḥ paśuvadbhuñjate ye+apramāṇataḥ/ rogānīkasya te mūlamajīrṇaṃ prāpnuvanti hi// ### [4.39.38](https://indike.org/pramana/in.med.samhita.susruta.4.39.38) vyāpadāṃ kāraṇaṃ vīkṣya vyāpatsvetāsu buddhimān/ prayatetāturārogye pratyanīkena hetunā// ### [4.39.39](https://indike.org/pramana/in.med.samhita.susruta.4.39.39) viriktavāntairhariṇaiṇalāvakāḥ śaśaśca sevyaḥ samayūratittiriḥ/ saṣaṣṭikāścaiva purāṇaśālayastathaiva mudgā laghu yacca kīrtitam// ### [4.39.39\_1](https://indike.org/pramana/in.med.samhita.susruta.4.39.39_1) iti suśrutasaṃhitāyāṃ cikitsāsthāne āturopadravacikitsitaṃ nāmaikonacatvāriṃśo+adhyāyaḥ //39// ## Linked texts (1) - [Siddhayoga (Vṛndamādhava)](https://indike.org/pramana/in.med.sangraha.siddhayoga.75.92) — Vṛnda, Sanskrit --- Source: [https://indike.org/pramana/in.med.samhita.susruta.4.39](https://indike.org/pramana/in.med.samhita.susruta.4.39) · Pramāṇa