[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.3 # The Compendium of Suśruta 4.3: tṛtīyo+adhyāyaḥ/ Suśrutasaṃhitā 4.3 - **Language:** Sanskrit ### tṛtīyo+adhyāyaḥ/ ### [4.3.1](https://indike.org/pramana/in.med.samhita.susruta.4.3.1) athāto bhagnānāṃ cikitsitaṃ vyākhyāsyāmaḥ// ### [4.3.2](https://indike.org/pramana/in.med.samhita.susruta.4.3.2) yathovāca bhagavān dhanvantariḥ// ### [4.3.3](https://indike.org/pramana/in.med.samhita.susruta.4.3.3) alpāśino+anātmavato jantorvātātmakasya ca/ upadravairvā juṣṭasya bhagnaṃ kṛcchreṇa sidhyati// ### [4.3.4](https://indike.org/pramana/in.med.samhita.susruta.4.3.4) lavaṇaṃ kaṭukaṃ kṣāramamlaṃ maithunamātapam/ vyāyāmaṃ ca na seveta bhagno rūkṣānnameva ca// ### [4.3.5](https://indike.org/pramana/in.med.samhita.susruta.4.3.5) śālirmāṃsarasaḥ kṣīraṃ sarpiryūṣaḥ satīnajaḥ/ bṛṃhaṇaṃ cānnapānaṃ syāddeyaṃ bhagnāya jānatā// ### [4.3.6](https://indike.org/pramana/in.med.samhita.susruta.4.3.6) madhūkodumbarāśvatthapalāśakakubhatvacaḥ/ vaṃśasarjavaṭānāṃ ca kuśārthamupasaṃharet// ### [4.3.7](https://indike.org/pramana/in.med.samhita.susruta.4.3.7) ālepanārthaṃ mañjiṣṭhāṃ madhukaṃ raktacandanam/ śatadhautaghṛtonmiśraṃ śālipiṣṭaṃ ca saṃharet// ### [4.3.8](https://indike.org/pramana/in.med.samhita.susruta.4.3.8) saptāhādatha saptāhāt saumyeṣvṛtuṣu bandhanam/ sādhāraṇeṣu kartavyaṃ pañcame pañcame+ahani// ### [4.3.9](https://indike.org/pramana/in.med.samhita.susruta.4.3.9) āgneyeṣu tryahātu kuryādbhagnadoṣavaśena vā/ tatrātiśithilaṃ baddhe sandhisthairyaṃ na jāyate// ### [4.3.10](https://indike.org/pramana/in.med.samhita.susruta.4.3.10) gāḍhenāpi tvagādīnāṃ śopho ruk pāka eva ca/ tasmāt sādhāraṇaṃ bandhaṃ bhagne śaṃsanti tadvidaḥ// ### [4.3.11](https://indike.org/pramana/in.med.samhita.susruta.4.3.11) nyagrodhādikaṣāyaṃ tu suśītaṃ pariṣecane/ pañcamūlīvipakvaṃ tu kṣīraṃ kuryāt savedane// ### [4.3.12](https://indike.org/pramana/in.med.samhita.susruta.4.3.12) sukhoṣṇamavacāryaṃ vā cakratailaṃ vijānatā/ vibhajya kālaṃ doṣaṃ ca doṣaghnauṣadhasaṃyutam// ### [4.3.13](https://indike.org/pramana/in.med.samhita.susruta.4.3.13) pariṣekaṃ pradehaṃ ca vidadhyācchītameva ca/ gṛṣṭikṣīraṃ sasarpiṣkaṃ madhurauṣadhasādhitam// ### [4.3.14](https://indike.org/pramana/in.med.samhita.susruta.4.3.14) śītalaṃ lākṣayā yuktaṃ prātarbhagnaḥ pibennaraḥ/ savraṇasya tu bhagnasya vraṇaṃ sarpirmadhūttaraiḥ// ### [4.3.15](https://indike.org/pramana/in.med.samhita.susruta.4.3.15) pratisārya kaṣāyaistu śeṣaṃ bhagnavadācaret/ prathame vayasi tvevaṃ bhagnaṃ sukaramādiśet// ### [4.3.16](https://indike.org/pramana/in.med.samhita.susruta.4.3.16) alpadoṣasya jantostu kāle ca śiśirātmake/ prathame vayasi tvevaṃ māsāt sandhiḥ sthiro bhavet// ### [4.3.17](https://indike.org/pramana/in.med.samhita.susruta.4.3.17) madhyame dviguṇāt kālāduttare triguṇāt smṛtaḥ/ avanāmitamunnahyedunnataṃ cavapīḍayet// ### [4.3.18](https://indike.org/pramana/in.med.samhita.susruta.4.3.18) āñchedatikṣiptamadho gataṃ copari vartayet/ āñchanaiḥ pīḍanaiścaiva saṅgepairbandhanaistathā// ### [4.3.19](https://indike.org/pramana/in.med.samhita.susruta.4.3.19) sandhīñcharīre sarvāṃstu calānapyacalānapi/ etaistu sthāpanopāyaiḥ sthāpayenmatimān bhiṣak// ### [4.3.20](https://indike.org/pramana/in.med.samhita.susruta.4.3.20) utpiṣṭamatha viśliṣṭaṃ sandhiṃ vaidyo na ghaṭṭayet/ tasya śītān parīṣekān pradehāṃścāvacārayet// ### [4.3.21](https://indike.org/pramana/in.med.samhita.susruta.4.3.21) abhighāte hṛte sandhiḥ svāṃ yāti prakṛtiṃ punaḥ/ ghṛtadigdhena paṭṭena veṣṭayitvā yathāvidhi// ### [4.3.22](https://indike.org/pramana/in.med.samhita.susruta.4.3.22) paṭṭopari kuśān dattvā yathāvadvandhamācaret/ pratyaṅgabhagnasya vidhirata ūrdhvaṃ pravakṣyate// ### [4.3.23](https://indike.org/pramana/in.med.samhita.susruta.4.3.23) nakhasandhiṃ samutpiṣṭaṃ raktānugatamārayā/ avamathya srute rakte śālipiṣṭena lepayet// ### [4.3.24](https://indike.org/pramana/in.med.samhita.susruta.4.3.24) bhagnāṃ vā sandhimuktāṃ vā sthāpayitvā+aṅgulīṃ samām/ aṇunā++āveṣṭya paṭṭena ghṛtasekaṃ pradāpayet// ### [4.3.25](https://indike.org/pramana/in.med.samhita.susruta.4.3.25) abhyajya sapiṣā pādaṃ talabhagnaṃ kuśottaram/ vastrapaṭṭena badhnīyānna ca vyāyāmamācaret// ### [4.3.26](https://indike.org/pramana/in.med.samhita.susruta.4.3.26) abhyajyāyāmayejjaṅghāmūruṃ ca susamāhitaḥ/ dattvā vṛkṣatvacaḥ śītā vastrapaṭṭena veṣṭayet// ### [4.3.27](https://indike.org/pramana/in.med.samhita.susruta.4.3.27) matimāṃścakrayogena hyāñchedūrvasthi nirgatam/ sphuṭitaṃ piccitaṃ cāpi badhnīyāt pūrvavadbhiṣak// ### [4.3.28](https://indike.org/pramana/in.med.samhita.susruta.4.3.28) āñchedūrdhvamadho vā+api kaṭibhagnaṃ tu mānavam/ tataḥ sthānasthite saṃdhau bastibhiḥ samupācaret// ### [4.3.29](https://indike.org/pramana/in.med.samhita.susruta.4.3.29) parśukāsvatha bhagnāsu ghṛtābhyaktasya tiṣṭhataḥ/ dakṣiṇāsvathavā vāmāsvanumṛjya nibandhanīḥ// ### [4.3.30](https://indike.org/pramana/in.med.samhita.susruta.4.3.30) tataḥ kavalikāṃ dattvā veṣṭayet susamāhitaḥ/ tailapūrṇe kaṭāhe vā droṇyāṃ vā śāyayennaram// ### [4.3.31](https://indike.org/pramana/in.med.samhita.susruta.4.3.31) musalenotkṣipet kakṣāmaṃsasandhau visaṃhate/ sthānasthitaṃ ca badhnīyāt svastikena vicakṣaṇaḥ// ### [4.3.32](https://indike.org/pramana/in.med.samhita.susruta.4.3.32) kaurparaṃ tu tathā sandhimaṅguṣṭhenānumārjayet/ anumṛjya tataḥ sandhiṃ pīḍayet kūrparāccyutam// ### [4.3.33](https://indike.org/pramana/in.med.samhita.susruta.4.3.33) prasāryākuñcayeccainaṃ snehasekaṃ ca dāpayet/ evaṃ jānuni gulphe ca maṇibandhe ca kārayet// ### [4.3.34](https://indike.org/pramana/in.med.samhita.susruta.4.3.34) ubhe tale same kṛtvā talabhagnasya dehinaḥ/ badhnīyādāmatailena pariṣekaṃ ca kārayet// ### [4.3.35](https://indike.org/pramana/in.med.samhita.susruta.4.3.35) †mṛtpiṇḍaṃ dhārayet pūrvaṃ lavaṇaṃ ca tataḥ param/ haste jātabale cāpi kuryāt pāṣāṇadhāraṇam// ### [4.3.36](https://indike.org/pramana/in.med.samhita.susruta.4.3.36) sannamunnamayet svinnamakṣakaṃ musalena tu/ tathonnataṃ pīḍayecca badhnīyādgāḍhameva ca// ### [4.3.37](https://indike.org/pramana/in.med.samhita.susruta.4.3.37) ūruvaccāpi kartavyaṃ bāhubhagnacikitsitam/ grīvāyāṃ tu vivṛttāyāṃ praviṣṭāyāmadho+api vā// ### [4.3.38](https://indike.org/pramana/in.med.samhita.susruta.4.3.38) avaṭāvatha hanvośca pragṛhyonnamayennaram/ tataḥ kuśāṃ samaṃ dattvā vastrapaṭṭena veṣṭayet// ### [4.3.39](https://indike.org/pramana/in.med.samhita.susruta.4.3.39) uttānaṃ śāyayeccainaṃ saptarātramatandriyaḥ/ hanvasthinī samānīya hanusandhau visaṃhate// ### [4.3.40](https://indike.org/pramana/in.med.samhita.susruta.4.3.40) svedayitvā sthiten samyak pañcāṅgīṃ vitaredbhiṣak/ vātaghnamadhuraiḥ sarpiḥ siddhaṃ nasye ca pūjitam// ### [4.3.41](https://indike.org/pramana/in.med.samhita.susruta.4.3.41) abhagnāṃścalitān dantān saraktānavapīḍayet/ taruṇasya manuṣyasya śītairālepayedvahiḥ// ### [4.3.42](https://indike.org/pramana/in.med.samhita.susruta.4.3.42) siktvā+ambubhistataḥ śītaiḥ sandhānīyairupācaret/ utpalasya ca nālena kṣīrapānaṃ vidhīyate// ### [4.3.43](https://indike.org/pramana/in.med.samhita.susruta.4.3.43) jīrṇasya tu manuṣyasya varjayeccalitān dvijān/ nāsāṃ sannāṃ vivṛttāṃ vā ṛjvīṃ kṛtvā śalākayā// ### [4.3.44](https://indike.org/pramana/in.med.samhita.susruta.4.3.44) pṛthaṅnasikayornāḍyau dvimukhyau saṃpraveśayet/ tataḥ paṭṭena saṃveṣṭya ghṛtasekaṃ pradāpayet// ### [4.3.45](https://indike.org/pramana/in.med.samhita.susruta.4.3.45) bhagnaṃ karṇaṃ tu badhnīyāt samaṃ kṛtvā ghṛtaplutam/ sadyaḥkṣatavidhānaṃ ca tataḥ pañcāt samācaret// ### [4.3.46](https://indike.org/pramana/in.med.samhita.susruta.4.3.46) mastuluṅgādvinā† bhinne kapāle madhusarpiṣī/ dattvā tato nibadhnīyāt saptāhaṃ ca pibedghṛtam// ### [4.3.47](https://indike.org/pramana/in.med.samhita.susruta.4.3.47) patanādabhighātādvā śūnamaṅgaṃ yadakṣatam/ śītān pradehān sekāṃśca bhiṣak tasyāvacārayet// ### [4.3.48](https://indike.org/pramana/in.med.samhita.susruta.4.3.48) atha jaṅghorubhagnānāṃ kapāṭaśayanaṃ hitam/ kīlakā bandhanārthaṃ ca pañca kāryā vijānatā// ### [4.3.49](https://indike.org/pramana/in.med.samhita.susruta.4.3.49) yathā na calanaṃ tasya bhagnasya kriyate tathā/ sandherubhayato dvau dvau tale caikaśca kīlakaḥ// ### [4.3.50](https://indike.org/pramana/in.med.samhita.susruta.4.3.50) śroṇyāṃ vā pṛṣṭhavaṃśe vā vakṣasyakṣakayostathā/ bhagnasandhivimokṣeṣu vidhimenaṃ samācaret// ### [4.3.51](https://indike.org/pramana/in.med.samhita.susruta.4.3.51) sandhīṃściravimuktāṃstu snigdhān svinnān mṛdūkṛtān/ uktairvidhānairbuddhyā ca samyak prakṛtimānayet// ### [4.3.52](https://indike.org/pramana/in.med.samhita.susruta.4.3.52) kāṇḍabhagne prarūḍhe tu viṣamolbaṇasaṃhite/ āpothya samayedbhagnaṃ tato bhagnavadācaret// ### [4.3.53](https://indike.org/pramana/in.med.samhita.susruta.4.3.53) kalpayennirgataṃ śuṣkaṃ vraṇānte+asthi samāhitaḥ/ sandhyante vā kriyāṃ kuryāt savraṇe vraṇabhagnavat// ### [4.3.54](https://indike.org/pramana/in.med.samhita.susruta.4.3.54) ūrdhvakāye tu bhagnānāṃ mastiṣkyaṃ karṇapūraṇam/ ghṛtapānaṃ hitaṃ nasyaṃ praśākhāsvanuvāsanam// ### [4.3.55](https://indike.org/pramana/in.med.samhita.susruta.4.3.55) ata ūrdhvaṃ pravakṣyāmi tailaṃ bhagnaprasādhakam/ rātrau rātrau tilān kṛṣṇān vāsayedasthire jale// ### [4.3.56](https://indike.org/pramana/in.med.samhita.susruta.4.3.56) divā divā śoṣayitvā gavāṃ kṣīreṇa bhāvayet/ tṛtīyaṃ saptarātraṃ tu bhāvayenmadhukāmbunā// ### [4.3.57](https://indike.org/pramana/in.med.samhita.susruta.4.3.57) tataḥ kṣīraṃ punaḥ pītān suśuṣkāṃścūrṇayedbhiṣak/ kākolyādiṃ sayaṣṭyāhvaṃ mañjiṣṭhāṃ sārivāṃ tathā// ### [4.3.58](https://indike.org/pramana/in.med.samhita.susruta.4.3.58) kuṣṭhaṃ sarjarasaṃ māṃsīṃ suradāru sacandanam/ śatapuṣpāṃ ca saṃcūrṇya tilacūrṇena yojayet// ### [4.3.59](https://indike.org/pramana/in.med.samhita.susruta.4.3.59) pīḍanārthaṃ ca kartavyaṃ sarvagandhaśṛtaṃ payaḥ/ caturguṇena payasā tattailaṃ vipacedbhiṣak// ### [4.3.60](https://indike.org/pramana/in.med.samhita.susruta.4.3.60) elāmaṃśumatīṃ patraṃ jīvakaṃ tagaraṃ tathā/ rodhraṃ prapauṇḍarīkaṃ ca tathā kālānusāri(vā)ṇam// ### [4.3.61](https://indike.org/pramana/in.med.samhita.susruta.4.3.61) saireyakaṃ kṣīraśuklāmanantāṃ samadhūlikām/ piṣṭvā śṛṅgāṭakaṃ caiva pūrvoktānyauṣadhāni ca// ### [4.3.62](https://indike.org/pramana/in.med.samhita.susruta.4.3.62) ebhistadvipacettailaṃ śāstravinmṛdunā+agninā/ etattailaṃ sadā pathyaṃ bhagnānāṃ sarvakarmasu// ### [4.3.63](https://indike.org/pramana/in.med.samhita.susruta.4.3.63) ākṣepake pakṣaghāte tāluśoṣe tathā+ardite/ manyāstambhe śiroroge karṇaśūle hanugrahe// ### [4.3.64](https://indike.org/pramana/in.med.samhita.susruta.4.3.64) bādhirye timire caiva ye ca strīṣu kṣayaṃ gatāḥ/ pathyaṃ pāne tathā+abhyaṅge nasye bastiṣu bhojane†// ### [4.3.65](https://indike.org/pramana/in.med.samhita.susruta.4.3.65) grīvāskandhorasāṃ vṛddhiramunaivopajāyate/ mukhaṃ ca padmapratimaṃ sasugandhisamīraṇam// ### [4.3.66](https://indike.org/pramana/in.med.samhita.susruta.4.3.66) gandhatailamidaṃ nāmnā sarvavātavikāranut/ rājārhametat kartavyaṃ rājñāmeva vicakṣaṇaiḥ// ### [4.3.67](https://indike.org/pramana/in.med.samhita.susruta.4.3.67) trapuṣākṣpriyālānāṃ tailāni madhuraiḥ saha/ vasāṃ dattvā yathālābhaṃ kṣīre daśaguṇe pacet// ### [4.3.68](https://indike.org/pramana/in.med.samhita.susruta.4.3.68) snehottamamidaṃ cāśu kuryādbhagnaprasādhanam/ pānābhyañjananasyeṣu bastikarmaṇi secane// ### [4.3.69](https://indike.org/pramana/in.med.samhita.susruta.4.3.69) bhagnaṃ naiti yathāpākaṃ prayateta tathā bhiṣak/ pakvamāṃsasirāsnāyu taddhi kṛcchreṇa sidhyati// ### [4.3.70](https://indike.org/pramana/in.med.samhita.susruta.4.3.70) bhagnaṃ sandhimanāviddhamahīnāṅgamanulbaṇam/ sukhaceṣṭāpracāraṃ ca saṃhitaṃ samyagādiśet// ### [4.3.70\_1](https://indike.org/pramana/in.med.samhita.susruta.4.3.70_1) iti suśrutasaṃhitāyāṃ cikitsāsthāne bhagnacikitsitaṃ nāma tṛtīyo+adhyāyaḥ //3// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.87.3) — Ḍalhaṇa, Sanskrit ## Linked texts (8) - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.4.8) — Sanskrit - [Aṣṭāṅgasaṃgraha](https://indike.org/pramana/in.med.samhita.astangasamgraha.32.38) — Vāgbhaṭa, Sanskrit - [Aṣṭāṅgahṛdayasaṃhitā](https://indike.org/pramana/in.med.samhita.astangahrdaya.6990) — Vāgbhaṭa, Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.62.7) — Vaṅgasena, Sanskrit - [Yogaratnasamuccaya (Anantakumāra)](https://indike.org/pramana/in.med.yoga.yogaratnasamuccaya-anantakumara.9.242) — Anantakumāra, Sanskrit - [Parahitasaṃhitā](https://indike.org/pramana/in.med.sangraha.samhitasara.parahitasamhita.2.170) — Śrīnātha Paṇḍita, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.71.110) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.71.110) — Basava, Sanskrit --- Source: [https://indike.org/pramana/in.med.samhita.susruta.4.3](https://indike.org/pramana/in.med.samhita.susruta.4.3) · Pramāṇa