[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.7 # The Compendium of Suśruta 4.7: saptamo+adhyāyaḥ/ Suśrutasaṃhitā 4.7 - **Language:** Sanskrit ### saptamo+adhyāyaḥ/ ### [4.7.1](https://indike.org/pramana/in.med.samhita.susruta.4.7.1) athāto+aśmarīcikitsitaṃ vyākhyāsyāmaḥ// ### [4.7.2](https://indike.org/pramana/in.med.samhita.susruta.4.7.2) yathovāca bhagavān dhanvantariḥ// ### [4.7.3](https://indike.org/pramana/in.med.samhita.susruta.4.7.3) aśmarī dāruṇo vyādhirantakapratimo mataḥ/ auṣadhaistaruṇaḥ sādhyaḥ pravṛddhaśchedamarhati// ### [4.7.4](https://indike.org/pramana/in.med.samhita.susruta.4.7.4) tasya pūrveṣu rūpeṣu snehādikrama iṣyate/ tenāsyāpacayaṃ yānti vyādhermūlānyaśeṣataḥ// ### [4.7.5](https://indike.org/pramana/in.med.samhita.susruta.4.7.5) pāṣāṇamedo vasuko vaśirāśmantakau tathā/ śatāvarī śvadaṃṣṭrā ca bṛhatī kaṇṭakārikā// ### [4.7.6](https://indike.org/pramana/in.med.samhita.susruta.4.7.6) kapotavaṅkā++ārtagalaḥ kaccakośīrakubjakāḥ†// vṛkṣādanī bhallukaśca varuṇaḥ śākajaṃ phalam// ### [4.7.7](https://indike.org/pramana/in.med.samhita.susruta.4.7.7) yavāḥ kulatthāḥ kolāni katakasya phalāni ca/ ūṣakādipratīvāpameṣāṃ kvāthairghṛtaṃ kṛtam// ### [4.7.8](https://indike.org/pramana/in.med.samhita.susruta.4.7.8) bhinatti vātasaṃbhūtāmaśmarīṃ kṣiprameva tu/ kṣārān yavāgūryūṣāṃśca kaṣāyāṇi payāṃsi ca// ### [4.7.9](https://indike.org/pramana/in.med.samhita.susruta.4.7.9) bhojanāni ca kurvīta varge+asmin vātanāśane/ kuśaḥ kāśaḥ saro gundrā itkaṭo moraṭo+aśmabhit// ### [4.7.10](https://indike.org/pramana/in.med.samhita.susruta.4.7.10) varī vidārī vārāhī śālimūlatrikaṇṭakam/ bhallūkaḥ pāṭalā pāṭhā pattūro+atha kuruṣṭikā// ### [4.7.11](https://indike.org/pramana/in.med.samhita.susruta.4.7.11) punarnavā śirīṣaśca kvathitāsteṣu sādhitam/ ghṛtaṃ śilājamadhukabījairindīvarasya ca// ### [4.7.12](https://indike.org/pramana/in.med.samhita.susruta.4.7.12) trapusairvārukādīnāṃ bījaiścāvāpitaṃ śubham/ bhinatti pittasaṃbhūtāmaśmarīṃ kṣiprameva tu// ### [4.7.13](https://indike.org/pramana/in.med.samhita.susruta.4.7.13) kṣārān yavāgūryūṣāṃśca kaṣāyāṇi payāṃsi ca/ bhojanāni ca kurvīta varge+asmin pittanāśane// ### [4.7.14](https://indike.org/pramana/in.med.samhita.susruta.4.7.14) gaṇo varuṇakādistu guggulvelāhareṇavaḥ/ kuṣṭhabhadrādimaricaciktrakaiḥ sasurāhvayaiḥ// ### [4.7.15](https://indike.org/pramana/in.med.samhita.susruta.4.7.15) etaiḥ siddhamajāsarpirūṣakādigaṇena ca/ bhinatti kaphasaṃbhūtāmaśmarīṃ kṣiprameva tu// ### [4.7.16](https://indike.org/pramana/in.med.samhita.susruta.4.7.16) kṣārān yavāgūryūṣāṃśca kaṣāyāṇi payāṃsi ca/ bhojanāni ca kurvīta varge+asmin kaphanāśane// ### [4.7.17](https://indike.org/pramana/in.med.samhita.susruta.4.7.17) picukāṅkolakatakaśākendīvarajaiḥ phalaiḥ/ cūrṇitaiḥ saguḍaṃ toyaṃ śarkarāśamanaṃ pibet// ### [4.7.18](https://indike.org/pramana/in.med.samhita.susruta.4.7.18) krauñcoṣṭrarāsabhāsthīni śvadaṃṣṭrā †tālamūlikā/ ajamodā kadambarasya mūlaṃ nāgarameva ca// ### [4.7.19](https://indike.org/pramana/in.med.samhita.susruta.4.7.19) pītāni śarkarāṃ bhindyuḥ surayoṣṇodakena vā/ trikaṇṭakasya bījānāṃ cūrṇaṃ mākṣikasaṃyutam// ### [4.7.20](https://indike.org/pramana/in.med.samhita.susruta.4.7.20) avikṣīreṇa saptāhamaśmarībhedanaṃ pibet/ dravyāṇāṃ tu ghṛtoktānāṃ kṣāro+avimūtragālitaḥ// ### [4.7.21](https://indike.org/pramana/in.med.samhita.susruta.4.7.21) grāmyasattvaśakṛtkṣāraiḥ saṃyuktaḥ sādhitaḥ śanaiḥ/ tatroṣakādirāvāpaḥ kāryastrikaṭukānvitaḥ// ### [4.7.22](https://indike.org/pramana/in.med.samhita.susruta.4.7.22) eṣa kṣāro+aśmarīṃ gulmaṃ śarkarāṃ ca bhinattyapi/ tilāpāmārgakadalīpalāśayavakalkajaḥ// ### [4.7.23](https://indike.org/pramana/in.med.samhita.susruta.4.7.23) kṣāraḥ peyo+avimūtreṇa śarkarānāśanaḥ paraḥ/ pāṭalākaravīrāṇāṃ kṣāramevaṃ samācaret// ### [4.7.24](https://indike.org/pramana/in.med.samhita.susruta.4.7.24) śvadaṃṣṭrāyaṣṭikābrahmīkalkaṃ vā+akṣasamaṃ pibet/ sahaiḍakākhyau peyau vā śobhāñjanakamārkavau// ### [4.7.25](https://indike.org/pramana/in.med.samhita.susruta.4.7.25) kapotavaṅkāmūlaṃ vā pibedamlaiḥ surādibhiḥ/ tatsiddhaṃ vā pibet kṣīraṃ vedanābhirupadrutaḥ// ### [4.7.26](https://indike.org/pramana/in.med.samhita.susruta.4.7.26) harītakyādisiddhaṃ vā varṣābhūsiddhameva vā/ sarvathaivopayojyaḥ syādgaṇo vīratarādikaḥ// ### [4.7.27](https://indike.org/pramana/in.med.samhita.susruta.4.7.27) ghṛtaiḥ kṣāraiḥ kaṣāyaiśca kṣīraiḥ sottarabastibhiḥ/ yadi nopaśamaṃ †gacchecchedastatrottaro vidhiḥ// ### [4.7.28](https://indike.org/pramana/in.med.samhita.susruta.4.7.28) kuśalasyāpi vaidyasya yataḥ siddhirihādhruvā/ upakramo jaghanyo+ayamataḥ saṃparikīrtitaḥ// ### [4.7.29](https://indike.org/pramana/in.med.samhita.susruta.4.7.29) akriyāyāṃ dhruvo mṛtyuḥ kriyāyāṃ saṃśayo bhavet/ tasmādāpṛcchya kartavyamīśvaraṃ sādhukāriṇā// ### [4.7.30](https://indike.org/pramana/in.med.samhita.susruta.4.7.30) atha †rogānvitamupasnigdhamapakṛṣṭakoṣamīṣatkarśitamabhyaktasvinnaśarīraṃ bhuktavantaṃ kṛtabalimaṅgalasvastivācanamagropaharaṇīyoktena vidhānenopakalpitasambhāramāśvāsya, tato balavantamaviklavamājānusame phalake prāgupaviṣṭānyapuruṣasyotsaṅge niṣaṇṇapūrvakāyamuttānamunnatakaṭīkaṃ vastrādhārakopaviṣṭaṃ saṅkucitajānukūrparamitareṇa sahāvabaddhaṃ sūtreṇa śāṭakairvā, tataḥ svabhyaktanābhipradeśasya vāmapārśvaṃ vimṛdya muṣṭinā+avapīḍayedadhonābheryāvadaśmaryadhaḥ prapanneti, tataḥ snehābhyakte kḷptanakhe vāmahastapradeśinīmadhyame aṅgulyau pāyau praṇidhāyānusevanīmāsādya prayatnabalābhyāṃ pāyumeḍhrāntaramānīya, nirvyalīkamanāyatamaviṣamaṃ ca bastiṃ sanniveśya, bhṛśamutpīḍayedaṅgulibhyāṃ yathā granthirivonnataṃ śalyaṃ bhavati// ### [4.7.31](https://indike.org/pramana/in.med.samhita.susruta.4.7.31) sa cedgṛhītaśalye tu vivṛtākṣo vicetanaḥ/ hatavallambaśīrṣaśca nirvikāro mṛtopamaḥ// ### [4.7.32](https://indike.org/pramana/in.med.samhita.susruta.4.7.32) na tasya nirharecchalyaṃ nirharettu mriyeta saḥ/ vinā tveteṣu rūpeṣu nirhartuṃ prayateta† vai// ### [4.7.33](https://indike.org/pramana/in.med.samhita.susruta.4.7.33) tataḥ savye pārśve sevanīṃ yavamātreṇa muktvā+avacārayecchastramaśmarīpramāṇaṃ, dakṣīṃato vā kriyāsaukaryahetorityeke, yathā sā na bhidyate cūrṇyate vā tathā prayateta, cūrṇamalpamapyavasthitaṃ hi punaḥ parivṛddhimeti, tasmāt samastāmagravakreṇādadīta; strīṇāṃ tu bastipārśvagato garbhāśayaḥ sannikṛṣṭaḥ, tasmāttāsāmutsaṅgavacchastraṃ† pātayet, ato+anyathā khalvāsāṃ mūtrasrāvī vraṇo bhavet, puruṣasya vā mūtraprasekakṣaṇanānmūtrakṣaraṇam; aśmarīvraṇādṛte† bhinnabastirekadhā+api na bhavati, dvidhā bhinnabastirāśmariko na sidhyati, †aśmarīvraṇanimittamekadhābhinnabastirjīvati, kriyābhyāsācchāstravihitacchedānniḥsyandaparivṛddhatvācca śalyasyeti/ uddhṛtaśalyaṃ tūṣṇodakadroṇyāmavagāhya svedayet, tathā hi bastirasṛjā na pūryate; pūrṇe vā kṣīravṛkṣakaṣāyaṃ puṣpanetreṇa vidadhyāt// ### [4.7.34](https://indike.org/pramana/in.med.samhita.susruta.4.7.34) bhavati cātra kṣīravṛkṣakaṣāyastu puṣpanetreṇa yojitaḥ/ nirharedaśmarīṃ tūrṇaṃ raktaṃ bastigataṃ ca yat// ### [4.7.35](https://indike.org/pramana/in.med.samhita.susruta.4.7.35) mūtramārgaviśodhanārthaṃ cāsmai guḍasauhityaṃ vitaret; uddhṛtya cainaṃ madhughṛtābhyaktavraṇaṃ mūtraviśodhanadravyasiddhāmuṣṇāṃ saghṛtāṃ yavāgūṃ pāyayetobhayakālaṃ trirātraṃ; trirātrādūrdhvaṃ guḍapragāḍhena payasā mṛdvodanamalpaṃ bhojayeddaśarātraṃ (†mūtrāsṛgviśuddhyarthaṃ vraṇakledanārthaṃ ca), daśarātrādūrdhvaṃ phalāmlairjāṅgalarasairupācaret; tato daśarātraṃ cainamapramattaḥ svedayet snehena dravasvedena vā; kṣīravṛkṣakaṣāyeṇa cāsya vraṇaṃ prakṣālayet; rodhramadhukamañjiṣṭhāprapauṇḍarīkakalkairvraṇaṃ pratigrāhayet; eteṣveva haridrāyuteṣu tailaṃ ghṛtaṃ vā vipakvaṃ vraṇābhyañjanamiti; styānaśoṇitaṃ cottarabastibhirupācaret; saptarātrācca svamārgamapratipadyamāne mūtre vraṇaṃ yathoktena vidhinā dahedagninā, svamārgapratipanne cottarabastyāsthāpanānuvāsanairupācarenmadhurakaṣāyairiti; yadṛcchayā vā mūtramārgapratipannāmantarāsaktāṃ śukrāśmarīṃ śarkarāṃ vā srotasā+apaharet, evaṃ cāśakye vidārya nāḍīṃ śastreṇa baḍiśenoddharet/ rūḍhavraṇaścāṅganāśvanaganāgarathadrumān nāroheta varṣaṃ, nāpsu plaveta, bhuñjīta vā guru// ### [4.7.36](https://indike.org/pramana/in.med.samhita.susruta.4.7.36) mūtravahaśukravahamuṣkasrotomūtraprasekasevanīyonigudabastīnaṣṭau pariharet/ tatra mūtravahacchedānmaraṇaṃ mūtrapūrṇabasteḥ, śukravahacchedānmaraṇaṃ klaibyaṃ vā, muṣkasrotaupaghātād dhvajabhaṅgaḥ, mūtrprasekakṣaṇanānmūtraprakṣaraṇaṃ, sevanīyonicchedādrujaḥ prādurbhāvaḥ, bastigudaviddhalakṣaṇaṃ prāguktamiti// ### [4.7.37](https://indike.org/pramana/in.med.samhita.susruta.4.7.37) bhavati cātra marmāṇyaṣṭāvasaṃbudhya srotojāni śarīriṇām/ vyāpādayedbahūnmartyān śastrakarmāpaṭurbhiṣak// ### [4.7.38](https://indike.org/pramana/in.med.samhita.susruta.4.7.38) sevanī śukraharaṇī srotasī phalayorgudam/ mūtrasekaṃ mūtravahaṃ yonirbastistathā+aṣṭamaḥ// ### [4.7.38\_1](https://indike.org/pramana/in.med.samhita.susruta.4.7.38_1) iti suśrutasaṃhitāyāṃ cikitsāsthāne+aśmarīcikitsitaṃ nāma saptamo+adhyāyaḥ //7// ## Linked texts (2) - [Siddhayoga (Vṛndamādhava)](https://indike.org/pramana/in.med.sangraha.siddhayoga.34.6) — Vṛnda, Sanskrit - [Carakasaṃhitā](https://indike.org/pramana/in.med.samhita.caraka.6.13.177) — Agniveśa (Āyurveda) & Caraka, Sanskrit --- Source: [https://indike.org/pramana/in.med.samhita.susruta.4.7](https://indike.org/pramana/in.med.samhita.susruta.4.7) · Pramāṇa