[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.8 # The Compendium of Suśruta 4.8: aṣṭamo+adhyāyaḥ/ Suśrutasaṃhitā 4.8 - **Language:** Sanskrit ### aṣṭamo+adhyāyaḥ/ ### [4.8.1](https://indike.org/pramana/in.med.samhita.susruta.4.8.1) athāto bhagandarāṇāṃ cikitsitaṃ vyākhyāsyāmaḥ// ### [4.8.2](https://indike.org/pramana/in.med.samhita.susruta.4.8.2) yathovāca bhagavān dhanvantariḥ// ### [4.8.3](https://indike.org/pramana/in.med.samhita.susruta.4.8.3) pañca bhagandarā vyākhyātāḥ†, teṣvasādhyaḥ śambūkāvartaḥ śalyanimittaśca; śeṣāḥ kṛcchrasādhyāḥ// ### [4.8.4](https://indike.org/pramana/in.med.samhita.susruta.4.8.4) tatra bhagandarapiḍakopadrutamāturamapatarpaṇādivirecanāntenaikādaśavidhenopakrameṇopakrametāpakvapiḍakaṃ, pakveṣu copasnigdhamavagāhasvinnaṃ śayyāyāṃ sanniveśyārśasamiva yantrayitvā, bhagandaraṃ samīkṣya parācīnamavācīnaṃ vā, tataḥ praṇidhāyaiṣaṇīmunnamya sāśayamuddharecchastreṇa; antarmukhe caivaṃ samyagyantraṃ praṇidhāya pravāhamāṇasya bhagandaramukhamāsādyaiṣaṇīṃ dattvā śastraṃ pātayet; āsādya vā+agniṃ kṣāraṃ ceti; etat sāmānyaṃ sarveṣu// ### [4.8.5](https://indike.org/pramana/in.med.samhita.susruta.4.8.5) viśeṣatastu nāḍyantare vraṇān kuryādbhiṣak tu śataponake/ tatasteṣūparūḍheṣu śeṣā nāḍīrupācaret// ### [4.8.6](https://indike.org/pramana/in.med.samhita.susruta.4.8.6) gatayo+anyonyasaṃbaddhā bāhyāśchedyāstvanekadhā/ nāḍīranabhisaṃbaddhā yaśchinattyekadhā bhiṣak// ### [4.8.7](https://indike.org/pramana/in.med.samhita.susruta.4.8.7) sa kuryādvivṛtaṃ jantorvraṇaṃ gudavidāraṇam/ tasya tadvivṛtaṃ mārgaṃ viṇmūtramanugacchati// ### [4.8.8](https://indike.org/pramana/in.med.samhita.susruta.4.8.8) āṭopaṃ gudaśūlaṃ ca karoti pavano bhṛśam/ tatrādhigatatantro+api bhiṣaṅguhyedasaṃśayam// ### [4.8.9](https://indike.org/pramana/in.med.samhita.susruta.4.8.9) tasmānna vivṛtaḥ kāryo vraṇastu śataponake/ vyādhau tatra bahucchidre bhiṣajā vai vijānatā// ### [4.8.10](https://indike.org/pramana/in.med.samhita.susruta.4.8.10) ardhalāṅgalakaśchedaḥ kāryo lāṅgalako+api vā/ sarvatobhadrako vā+api kāryo gotīrthako+api vā// ### [4.8.11](https://indike.org/pramana/in.med.samhita.susruta.4.8.11) sarvataḥ snāvamārgāstu dahedvaidyastathā+agninā/ sukumārasya bhīrorhi duṣkaraḥ śataponakaḥ// ### [4.8.12](https://indike.org/pramana/in.med.samhita.susruta.4.8.12) rujāsnāvāpahaṃ tatra svedamāśu prayojayet/ svedadravyairyathoddiṣṭaiḥ kṛśarāpāyasādibhiḥ// ### [4.8.13](https://indike.org/pramana/in.med.samhita.susruta.4.8.13) grāmyānūpaudakairmāṃsairlāvādyairvā+api viṣkiraiḥ/ vṛkṣādanīmathairaṇḍaṃ bilvādiṃ ca gaṇaṃ tathā// ### [4.8.14](https://indike.org/pramana/in.med.samhita.susruta.4.8.14) kaṣāyaṃ sukṛtaṃ kṛtvā snehakumbhe niṣecayet/ nāḍīsvedena tenāsya taṃ vraṇaṃ svedayedbhiṣak// ### [4.8.15](https://indike.org/pramana/in.med.samhita.susruta.4.8.15) tilairaṇḍātasīmāṣayavagodhūmasarṣapān/ lavaṇānyamlavargaṃ ca sthālyāmevopasādhayet// ### [4.8.16](https://indike.org/pramana/in.med.samhita.susruta.4.8.16) āturaṃ svedayettena tathā sidhyati kurvataḥ/ svinnaṃ ca pāyayedenaṃ kuṣṭhaṃ ca lavaṇāni ca// ### [4.8.17](https://indike.org/pramana/in.med.samhita.susruta.4.8.17) vacāhiṅgvajamodaṃ ca samabhāgāni sarpiṣā/ mārdvīkenāthavā+amlena surāsauvīrakeṇa vā// ### [4.8.18](https://indike.org/pramana/in.med.samhita.susruta.4.8.18) tato madhukatailena tasya siñcedbhiṣagbraṇam/ pariṣiñcedgudaṃ cāsya tailairvātarujāpahaiḥ// ### [4.8.19](https://indike.org/pramana/in.med.samhita.susruta.4.8.19) vidhinā+anena viṇmūtraṃ svamārgamadhigacchati/ anye copadravāstīvrāḥ sidhyantyatra na saṃśayaḥ// ### [4.8.20](https://indike.org/pramana/in.med.samhita.susruta.4.8.20) śataponaka ākhyāta uṣṭragrīve kriyāṃ śṛṇu/ athoṣṭragrīvameṣitvā chittvā kṣāraṃ nipātayet// ### [4.8.21](https://indike.org/pramana/in.med.samhita.susruta.4.8.21) pṛtimāṃsavyapohārthamagniratra na pūjitaḥ/ athainaṃ ghṛtasaṃsṛṣṭaistilaiḥ †piṣṭaiḥ prapepayet// ### [4.8.22](https://indike.org/pramana/in.med.samhita.susruta.4.8.22) bandhaṃ tato+anukurvīta pariṣekaṃ tu sarpiṣā/ tṛtīye divase muktvā yathāsvaṃ śodhayedbhiṣak†// ### [4.8.23](https://indike.org/pramana/in.med.samhita.susruta.4.8.23) tataḥ śuddhaṃ viditvā ca ropayettu yathākramam/ utkṛtyāsrāvamārgaṃstu parisrāviṇi buddhimān// ### [4.8.24](https://indike.org/pramana/in.med.samhita.susruta.4.8.24) kṣāreṇa vā srāvagatiṃ daheddhutavahena vā/ sukhoṣṇenāṇutailena secayedgudamaṇḍalam// ### [4.8.25](https://indike.org/pramana/in.med.samhita.susruta.4.8.25) upanāhāḥ pradehāśca mūtrakṣārasamanvitāḥ/ vāmanīyauṣadhaiḥ kāryāḥ pariṣekāśca mātrayā// ### [4.8.26](https://indike.org/pramana/in.med.samhita.susruta.4.8.26) mṛdubhūtaṃ viditvainamalpasrāvaruganvitam/ gatimanviṣya śastreṇa chindyāt †kharujūrapatrakam// ### [4.8.27](https://indike.org/pramana/in.med.samhita.susruta.4.8.27) candrārdhaṃ candracakraṃ ca sūcīmusvamavāṅmukham/ chittvā+agninā dahet samyagevaṃ kṣāreṇa vā punaḥ// ### [4.8.28](https://indike.org/pramana/in.med.samhita.susruta.4.8.28) tataḥ saṃśodhanaireva mṛdupūrvairviśodhayet/ bahirantarmukhaścāpi śiśoryasya bhagandaraḥ// ### [4.8.29](https://indike.org/pramana/in.med.samhita.susruta.4.8.29) tasyāhitaṃ virekāgniśastrakṣārāvacāraṇam/ yadyanmṛdu ca tīkṣṇaṃ ca tattattasyāvacārayet// ### [4.8.30](https://indike.org/pramana/in.med.samhita.susruta.4.8.30) āragvadhaniśākālācūrṇaṃ madhughṛtāplutam/ agravartipraṇihitaṃ vraṇānāṃ śodhanaṃ hitam// ### [4.8.31](https://indike.org/pramana/in.med.samhita.susruta.4.8.31) yogo+ayaṃ nāśayatyāśu gatiṃ meghamivānilaḥ/ āgantuje bhiṣaṅnāḍīṃ śastreṇotkṛtya yatnataḥ// ### [4.8.32](https://indike.org/pramana/in.med.samhita.susruta.4.8.32) jambvoṣṭenāgnivarṇena taptayā vā śalākayā/ dahedyathoktaṃ matimāṃstaṃ vraṇaṃ susamāhitaḥ// ### [4.8.33](https://indike.org/pramana/in.med.samhita.susruta.4.8.33) kṛmighnaṃ ca vidhiṃ kuryācchalyānayanameva ca/ pratyākhyāyaiṣa cārabhyo varjyaścāpi tridoṣajaḥ// ### [4.8.34](https://indike.org/pramana/in.med.samhita.susruta.4.8.34) etat karma samākhyātaṃ sarveṣāmanupūrvaśaḥ/ eṣāṃ tu śastrapatanādvedanā yatra† jāyate// ### [4.8.35](https://indike.org/pramana/in.med.samhita.susruta.4.8.35) tatrāṇutailenoṣṇena pariṣekaḥ praśasyate/ vātaghnauṣadhasaṃpūrṇāṃ sthālīṃ chidraśarāvikām// ### [4.8.36](https://indike.org/pramana/in.med.samhita.susruta.4.8.36) snehābhyaktagudastaptāmadhyāsīta sabāṣpikām/ nāḍyā vā+asyāharet svedaṃ śayānasya rujāpaham/ uṣṇodake+avagāhyo vā tathā śāmyati vedanā// ### [4.8.37](https://indike.org/pramana/in.med.samhita.susruta.4.8.37) kadalīmṛgalopākapriyakājinasaṃbhṛtān/ kārayedupanāhāṃśca sālvaṇādīna vicakṣaṇaḥ// ### [4.8.38](https://indike.org/pramana/in.med.samhita.susruta.4.8.38) kaṭutrikaṃ vacāhiṅgulavaṇānyatha dīpyakam/ pāyayeccāmlakaulatthasurāsauvīrakādibhiḥ// ### [4.8.39](https://indike.org/pramana/in.med.samhita.susruta.4.8.39) jyotiṣmatīlāṅgalakīśyāmādantītrivṛttilāḥ/ kuṣṭhaṃ śatāhvā golomī tilvako girikarṇikā// ### [4.8.40](https://indike.org/pramana/in.med.samhita.susruta.4.8.40) kāsīsaṃ kāñcanaksīryau vargaḥ śodhana iṣyate/ trivṛttilā nāgadantī mañjiṣṭhā payāa saha// ### [4.8.41](https://indike.org/pramana/in.med.samhita.susruta.4.8.41) utsādanaṃ bhavedetat saindhavakṣaudrasaṃyutam/ rasāñjanaṃ haridre dve mañjiṣṭhānimbapallavāḥ// ### [4.8.42](https://indike.org/pramana/in.med.samhita.susruta.4.8.42) trivṛttejovatīdantīkalko† nāḍīvraṇāpahaḥ/ kuṣṭhaṃ trivṛttilā dantī māgadhyaḥ saindhavaṃ madhu// ### [4.8.43](https://indike.org/pramana/in.med.samhita.susruta.4.8.43) rajanī triphalā tutthaṃ hitaṃ syādvraṇaśodhanam/ māgadhyo madhukaṃ rodhraṃ kuṣṭhamelā hareṇavaḥ// ### [4.8.44](https://indike.org/pramana/in.med.samhita.susruta.4.8.44) samaṅgā dhātakī caiva sārivā rajanīdvayam/ priyaṅgavaḥ sarjarasaḥ padmakaṃ padmakesaram// ### [4.8.45](https://indike.org/pramana/in.med.samhita.susruta.4.8.45) †sudhā vacā lāṅgalakī madhūcchiṣṭaṃ sasaindhavam/ etat saṃbhṛtya saṃbhāraṃ tailaṃ dhīro vipācayet// ### [4.8.46](https://indike.org/pramana/in.med.samhita.susruta.4.8.46) etadvai gaṇḍamālāsu maṇḍaleṣvatha mehiṣu/ ropaṇārthaṃ hitaṃ tailaṃ bhagandaravināśanam// ### [4.8.47](https://indike.org/pramana/in.med.samhita.susruta.4.8.47) nyagrodhādigaṇaścaiva hitaḥ śodhanaropaṇe†/ tailaṃ ghṛtaṃ vā tatpakvaṃ bhagandaravināśanam// ### [4.8.48](https://indike.org/pramana/in.med.samhita.susruta.4.8.48) trivṛddantīharidrārkamūlaṃ lohāśvamārakau/ viḍaṅgasāraṃ triphalā snuhyarkapayasī madhu// ### [4.8.49](https://indike.org/pramana/in.med.samhita.susruta.4.8.49) madhūcchiṣṭasamāyuktaistailametairvipācayet/ bhagandaravināśārthametadyojyaṃ viśeṣataḥ// ### [4.8.50](https://indike.org/pramana/in.med.samhita.susruta.4.8.50) citrakārkau trivṛtpāṭhe malapūṃ hayamārakam/ sudhāṃ vacāṃ lāṅgalakīṃ saptaparṇaṃ suvarcikām// ### [4.8.51](https://indike.org/pramana/in.med.samhita.susruta.4.8.51) jyotiṣmatīṃ ca sambhṛtya tailaṃ dhīro vipācayet/ etaddhi syandanaṃ tailaṃ bhṛśaṃ dadyādbhagandare// ### [4.8.52](https://indike.org/pramana/in.med.samhita.susruta.4.8.52) śodhanaṃ ropaṇaṃ caiva sarvaṇakaraṇaṃ tathā/ dvivraṇīyamavekṣeta vraṇāvasthāsu buddhimān// ### [4.8.53](https://indike.org/pramana/in.med.samhita.susruta.4.8.53) chidrādūrdhvaṃ haredoṣṭhamarśoyantrasya yantravit/ tato bhagandare dadyādetadardhendusannibham// ### [4.8.54](https://indike.org/pramana/in.med.samhita.susruta.4.8.54) vyāyāmaṃ maithunaṃ kopaṃ pṛṣṭhayānaṃ gurūṇi ca/ saṃvatsaraṃ parihareduparūḍhavraṇo naraḥ// ### [4.8.54\_1](https://indike.org/pramana/in.med.samhita.susruta.4.8.54_1) iti suśrutasaṃhitāyāṃ cikitsāsthāne bhagandaracikitsitaṃ nāmāṣṭamo+adhyāyaḥ //8// ## Linked texts (4) - [Bheḷasaṃhitā](https://indike.org/pramana/in.med.samhita.bhela.7.7.3) — Bheḷa, Sanskrit - [Yogaratnasamuccaya (Anantakumāra)](https://indike.org/pramana/in.med.yoga.yogaratnasamuccaya-anantakumara.10.12) — Anantakumāra, Sanskrit - [Vaidyamanoramā](https://indike.org/pramana/in.med.cikitsa.vaidyamanorama.12.p97) — Kālidāsa, Sanskrit - [Parahitasaṃhitā](https://indike.org/pramana/in.med.sangraha.samhitasara.parahitasamhita.2.230) — Śrīnātha Paṇḍita, Sanskrit --- Source: [https://indike.org/pramana/in.med.samhita.susruta.4.8](https://indike.org/pramana/in.med.samhita.susruta.4.8) · Pramāṇa