[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 4.9 # The Compendium of Suśruta 4.9: navamo+adhyāyaḥ/ Suśrutasaṃhitā 4.9 - **Language:** Sanskrit ### navamo+adhyāyaḥ/ ### [4.9.1](https://indike.org/pramana/in.med.samhita.susruta.4.9.1) athātaḥ kuṣṭhacikitsitaṃ vyākhyāsyāmaḥ// ### [4.9.2](https://indike.org/pramana/in.med.samhita.susruta.4.9.2) yathovāca bhagavān dhanvantariḥ// ### [4.9.3](https://indike.org/pramana/in.med.samhita.susruta.4.9.3) viruddhādhyaśanāsātmyavegavighātaiḥ snehādīnaṃ cāyathārambhaiḥ pāpakriyayā purākṛtakarmayogācca tvagdoṣā bhavanti// ### [4.9.4](https://indike.org/pramana/in.med.samhita.susruta.4.9.4) tatra tvagdoṣī māṃsavasādugdhadadhitailakulatthamāṣaniṣpāvekṣupiṣṭavikārāmlaviruddhādhyaśanājīrṇavidāhyabhiṣyandīni divāsvapnaṃ †vyavāyaṃ ca pariharet// ### [4.9.5](https://indike.org/pramana/in.med.samhita.susruta.4.9.5) tataḥ śāliṣaṣṭikayavagodhūmakoradūṣaśyāmākoddālakādīnanavān bhuñjīta mudgāḍhakyoranyatarasya yūṣeṇa sūpena vā nimbapatrāruṣkaravyāmiśreṇa, maṇḍūkaparṇyavalgujāṭarūpikāpuṣpaiḥ sarpiḥsiddhaiḥ sarṣapatailasiddhairvā, tiktavargeṇa vā+abhihitena; māṃsasātmyāya vā jāṅgalamāṃsamamedaskaṃ vitaret; tailaṃ vajrakamabhyaṅgārthe; āragvadhādikaṣāyamutsādanārthe; pānapariṣekāvagāhādiṣu ca khadirakaṣāyam; ityeṣa āhārācāravibhāgaḥ// ### [4.9.6](https://indike.org/pramana/in.med.samhita.susruta.4.9.6) tatra pūrvarūpeṣūbhayataḥ saṃśodhanamāseveta/ tatra tvaksaṃprāpte śodhanālepanāni, śoṇitaprāpte saṃśodhanālepanakaṣāyapānaśoṇitāvasecanāni, māṃsaprāpte śodhanālepanakaṣāyapānaśoṇitāvasecanāriṣṭamanthaprāśāḥ, caturthakarmaguṇaprāptaṃ yāpyamātmavataḥ saṃvidhānavataśca, tatra saṃśodhanācchoṇitāvasecanāccordhvaṃ bhallātaśilājatudhātumākṣīkaguggulvagurutuvarakakhadirāsanāyaskṛtividhānamāseveta; pañcamaṃ naivopakramet// ### [4.9.7](https://indike.org/pramana/in.med.samhita.susruta.4.9.7) tatra prathamameva kuṣṭhinaṃ snehapānavidhānenopapādayet/ meṣaśṛṅgīśvadaṃṣṭrāśārṅgeṣṭāgudūcīdvipañcamūlīsiddhaṃ tailaṃ ghṛtaṃ vā vātakuṣṭināṃ pānābhyaṅgayorvidadhyāt, dhavāśvakarṇakakubhapalāśapicumardaparpaṭakamadhukarodhrasamaṅgāsiddhaṃ sarpiḥ pittakuṣṭhināṃ, priyālaśālāragvadhanimbasaptaparṇacitrakamaricavacākuṣṭhasiddhaṃ śleṣmakuṣṭhināṃ bhallātakābhayāviḍaṅgasiddhaṃ vā, sarveṣāṃ tuvarakatailaṃ bhallātakatailaṃ veti// ### [4.9.8](https://indike.org/pramana/in.med.samhita.susruta.4.9.8) saptaparṇāragvadhātiviṣekṣurapāṭhākaṭurohiṇyamṛtātriphalāpaṭolapicumardaparpaṭakadurālabhātrāyamāṇāmustācandanapadmakaharidropakulyāviśālāmūrvāśatāvarīsārivendrayavāṭarūṣakaṣaṭgranthāmadhukabhūnimbagṛṣṭikā iti samabhāgāḥ kalkaḥ syāt, kalkāccaturguṇaṃ sarpiḥ prakṣipya taddviguṇo dhātrīphalarasastaccaturguṇā āpāstadaikadhyaṃ samāloḍya vipacet, etanmahātiktakaṃ nāma sarpiḥ kuṣṭhaviṣamajvararaktapittahṛdrogonmādāpasmāragulmapiḍākāsṛgdaragalagaṇḍagaṇḍamālāślīpadapāṇḍurogavisarpārśaḥṣāṇḍhyakaṇḍūpāmādīñchamayediti// ### [4.9.9](https://indike.org/pramana/in.med.samhita.susruta.4.9.9) triphalāpaṭolapicumandāṭarūṣakakaṭurohiṇīdurālabhātrāyamāṇāḥ parpaṭakaścaiteṣāṃ dvipalikān bhāgāñjaladroṇe prakṣipya pādāvaśeṣaṃ kaṣāyamādāya kalkapeṣyāṇīmāni †bheṣajānyardhapalikāni trāyamāṇāmustendrayavacandanakirātatiktāni pippalyaścaitāni ghṛtaprasthe samāvāpya vipacet, etattiktakaṃ nāma sarpiḥ kuṣṭhaviṣamajvaragulmārśograhaṇīdoṣaśophapāṇḍurogavisarpaṣāṇḍhyaśamanamūrdhvajatrugatarogaghnaṃ ceti// ### [4.9.10](https://indike.org/pramana/in.med.samhita.susruta.4.9.10) ato+anyatamena ghṛtena snigdhasvinnasyaikāṃ dve tisraścatasraḥ pañca vā sirā vidhyet; maṇḍalāni cotsannānyavalikhedabhīṣṇaṃ, pracchayedvā, samudraphenaśākagojīkākodumbarikāpatrairvā+avaghṛṣyālepayellākṣāsarjarasarasāñjanaprapunnāḍāvalgujatejovatyaśvamārakārkakuṭajārevatamūlakalkairmūtrapiṣṭaiḥ pittapiṣṭairvā, svarjikātutthakāsīsaviḍaṅgāgāradhūmacitrakakaṭukasudhāharidrāsaindhavakalkairvā, etānyevāvāpya kṣārakalpena niḥsrute pālāśe kṣāre tato vipācya phāṇītamiva saṃjātamavatārya lepayet, jyotiṣkaphalalākṣāmaricappilīsumanaḥpatrairvā, haritālamanaḥśilārkakṣīratilaśigrumaricakalkairvā, svarjikākuṣṭhatutthakuṭajacitrakaviḍaṅgamaricarodhramanaḥśilākalairvā, harītakīkarañjikāviḍaṅgasiddhārthakalavaṇarocanāvalgujaharidrākalkairvā// ### [4.9.11](https://indike.org/pramana/in.med.samhita.susruta.4.9.11) sarve kuṣṭhāpahāḥ siddhā lepāḥ sapta prakīrtitāḥ/ vaiśeṣikānatastūrdhvaṃ dadrūśvitreṣu me śṛṇu// ### [4.9.12](https://indike.org/pramana/in.med.samhita.susruta.4.9.12) lākṣā kuṣṭhaṃ sarṣapāḥ śrīniketaṃ rātrirvyeṣaṃ cakramardasya bījam/ kṛtvaikasthaṃ takrapiṣṭaḥ pralepo dadrūṣūkto mūlakādbījayuktaḥ// ### [4.9.13](https://indike.org/pramana/in.med.samhita.susruta.4.9.13) sindhūdbhūtaṃ cakramardasya bījamikṣūdbhūtaṃ keśaraṃ tārkṣyaśailam/ piṣṭo lepo+ayaṃ kapitthādrasena dadrūstūrṇaṃ nāśayatyeṣa yogaḥ†// ### [4.9.14](https://indike.org/pramana/in.med.samhita.susruta.4.9.14) hemakṣīrī vyādhighātaḥ śirīṣo nimbaḥ sarjo vatsakaḥ sājakarṇaḥ/ śīghraṃ tīvrā nāśayantīha dadrūḥ snānālepodgharṣaṇeṣūpayuktāḥ// ### [4.9.15](https://indike.org/pramana/in.med.samhita.susruta.4.9.15) bhadrāsaṃjñodumbarīmūlatulyaṃ dattvā mūlaṃ kṣodayitvā malapvāḥ/ siddhaṃ toyaṃ pītamuṣṇe sukhoṣṇaṃ sphoṭāñchvitre puṇḍarīke ca kuryāt// ### [4.9.16](https://indike.org/pramana/in.med.samhita.susruta.4.9.16) dvaipaṃ dagdhaṃ carma mātaṅgajaṃ vā bhinne sphoṭe tailayuktaṃ pralepaḥ/ pūtiḥ kīṭo rājavṛkṣodbhavena kṣāreṇāktaḥ śvitrameko nihanti// ### [4.9.17](https://indike.org/pramana/in.med.samhita.susruta.4.9.17) kṛṣṇasya sarpasya masī sudagdhā baibhītakaṃ tailamatha dvitīyam/ etat samastaṃ mṛditaṃ pralepācchvitrāṇi sarvāṇyapahanti śīghram// ### [4.9.18](https://indike.org/pramana/in.med.samhita.susruta.4.9.18) adhyardhatoye †sumatisrutasya kṣārasya kalpena tu saptakṛtvaḥ/ tailaṃ śṛtaṃ tena caturguṇena śvitrāpahaṃ mrakṣaṇametadagryam// ### [4.9.19](https://indike.org/pramana/in.med.samhita.susruta.4.9.19) ghṛtena yuktaṃ prapunāḍabījaṃ kuṣṭhaṃ ca yaṣṭīmadhukaṃ ca piṣṭvā/ śvetāya dadyādgṛhakukkuṭāya caturthabhaktāya bubhukṣitāya// ### [4.9.20](https://indike.org/pramana/in.med.samhita.susruta.4.9.20) tasyopasaṃgṛhya ca tat purīṣamutpācitaṃ† sarvata eva lompet/ abhyantaraṃ māsamimaṃ prayogaṃ prayojayecchvitramatho nihanti// ### [4.9.21](https://indike.org/pramana/in.med.samhita.susruta.4.9.21) kṣāre sudagdhe jalagaṇḍaje† tu gajasya mūtreṇa bahusrute ca/ droṇapramāṇe daśabhāgayuktaṃ dattvā pacedbījamavalgujasya// ### [4.9.22](https://indike.org/pramana/in.med.samhita.susruta.4.9.22) etadyadā cikkaṇatāmupaiti tadā samastaṃ† guṭikā vidadhyāt/ śvitraṃ pralimpedatha saṃpraghṛṣya† tayā vrajedāśu savarṇabhāvam// ### [4.9.23](https://indike.org/pramana/in.med.samhita.susruta.4.9.23) kaṣāyakalpena subhāvitāṃ tu †jalaṃ tvacā cūtaharītakīnām/ tāṃ tāmradīpe praṇidhāya dhīmān vartiṃ vaṭakṣīrasubhāvitāṃ tu// ### [4.9.24](https://indike.org/pramana/in.med.samhita.susruta.4.9.24) ādīpya tajjātamasīṃ gṛhītvā tāṃ cāpi pathyāmbhasi bhagvayitvā/ †saṃpracchitaṃ tadbahuśaḥ kilāsaṃ tailena siktaṃ kaṭunā prayāti// ### [4.9.25](https://indike.org/pramana/in.med.samhita.susruta.4.9.25) āvalgujaṃ bījamagryaṃ nadījaṃ kākāhvānodumbarī yā ca lākṣā/ lauhaṃ cūrṇaṃ māgadhī tārkṣyaśailaṃ tulyāḥ kāryāḥ kṛṣṇavarṇāstilāśca// ### [4.9.26](https://indike.org/pramana/in.med.samhita.susruta.4.9.26) vartiṃ kṛtvā tāṃ gavāṃ pittapiṣṭāṃ lepaḥ kāryaḥ śvitriṇāṃ śvitrahārī/ lepāt pittaṃ śaikhinaṃ śvitrahāri hrīberaṃ vā dagdhametena yuktam// ### [4.9.27](https://indike.org/pramana/in.med.samhita.susruta.4.9.27) tutthālakaṭukāvyoṣasiṃhārkahayamārakāḥ†/ kuṣṭhāvalgujabhallātakṣīriṇīsarṣapāḥ sruhī// ### [4.9.28](https://indike.org/pramana/in.med.samhita.susruta.4.9.28) tilvakāriṣṭapīlūnāṃ patrāṇyāragvadhasya ca/ bījaṃ viḍaṅgāśvahantrorharidre bṛhatīdvayam// ### [4.9.29](https://indike.org/pramana/in.med.samhita.susruta.4.9.29) ābhyāṃ śvitrāṇi yogābhyāṃ lepānnaśyantyaśeṣataḥ/ vāyasīphalgutiktānāṃ śataṃ dattvā pṛthak pṛthak// ### [4.9.30](https://indike.org/pramana/in.med.samhita.susruta.4.9.30) dve loharajasaḥ prasthe triphalātryāḍhakaṃ tathā/ tridroṇe+apāṃ pacedyāvadbhāgau dvāvasanādapi// ### [4.9.31](https://indike.org/pramana/in.med.samhita.susruta.4.9.31) śiṣṭau ca vipacedbhūya etaiḥ ślakṣṇaprapeṣitaiḥ/ kalkairindrayavabyoṣatvagdārucaturaṅgulaiḥ// ### [4.9.32](https://indike.org/pramana/in.med.samhita.susruta.4.9.32) pārāvatapadīdamtībākucīkeśarāhvayaiḥ/ kaṇṭakāryā ca tatpkvaṃ ghṛtaṃ kuṣṭhiṣu yojayet// ### [4.9.33](https://indike.org/pramana/in.med.samhita.susruta.4.9.33) doṣadhātvāśritaṃ pānādabhyaṅgāttvaggataṃ tathā/ apyasādhyaṃ nṛṇāṃ kuṣṭhaṃ nāmnā nīlaṃ niyacchati// ### [4.9.34](https://indike.org/pramana/in.med.samhita.susruta.4.9.34) triphalātvak trikaṭukaṃ surasā madayantikā/ vāyasyāragvadhaścaiṣāṃ tulāṃ kuryāt pṛthak pṛthak// ### [4.9.35](https://indike.org/pramana/in.med.samhita.susruta.4.9.35) kākamācyarkavaruṇadantīkuṭajacitrakāt/ dārvīnidigdhikābhyāṃ tu pṛthagdaśapalaṃ tathā// ### [4.9.36](https://indike.org/pramana/in.med.samhita.susruta.4.9.36) tridroṇe+apāṃ pacedyāvat ṣaṭprasthaṃ pariśeṣitam/ śakṛdrasadadhikṣīramūtrāṇāṃ pṛthagāḍhakam// ### [4.9.37](https://indike.org/pramana/in.med.samhita.susruta.4.9.37) tadvadghṛtasya tatsādhyaṃ bhūnimbavyoṣacitrakaiḥ/ karañjaphalanīlikāśyāmāvalgujapīlubhiḥ// ### [4.9.38](https://indike.org/pramana/in.med.samhita.susruta.4.9.38) nīlinīnimbakusumaiḥ siddhaṃ kuṣṭhāpahaṃ ghṛtam/ mrakṣaṇādaṅgasāvarṇyaṃ śvitriṇāṃ janayennṛṇām/ bhagandaraṃ kṛmīnarśo mahānīlaṃ niyacchati// ### [4.9.39](https://indike.org/pramana/in.med.samhita.susruta.4.9.39) mūtraṃ gavyaṃ citrakavyoṣayuktaṃ sarpiḥkumbhe kṣaudrayuktaṃ sthitaṃ hi/ pakṣādūrdhvaṃ śvitribhiḥ peyametat kuryāccāsmin kuṣṭhadiṣṭaṃ vidhānam// ### [4.9.40](https://indike.org/pramana/in.med.samhita.susruta.4.9.40) pūtīkārkasruṅnarendradrumāṇāṃ mūtraiḥ piṣṭāḥ pallavāḥ saumanāśca/ lepaḥ śvitraṃ hanti dadrūrvraṇāṃśca duṣṭānyarśāṃsyeṣa †nāḍīvraṇāṃśca// ### [4.9.41](https://indike.org/pramana/in.med.samhita.susruta.4.9.41) †asmādūrdhvaṃ niḥsrute duṣṭarakte jātaprāṇaṃ sarpiṣā snehayitvā/ tīkṣṇairyogaiśchardayitvā prāgāḍhaṃ paścāddoṣaṃ nirhareccāpramattaḥ// ### [4.9.42](https://indike.org/pramana/in.med.samhita.susruta.4.9.42) durvānto vā durvirikto+api vā syāt kuṣṭhī doṣairuddhatairvyāptadehaḥ/ niḥsandigdhaṃ yātyasādhyatvamāśu tasmāt kṛtsnānnirharettasya doṣān// ### [4.9.43](https://indike.org/pramana/in.med.samhita.susruta.4.9.43) pakṣāt pakṣācchardanānyabhyupeyānmāsānmāsāt sraṃsanaṃ cāpi deyam/ srāvyaṃ raktaṃ vatsare hi dviralpaṃ nasyaṃ dadyācca trirātrāttrirātrāt// ### [4.9.44](https://indike.org/pramana/in.med.samhita.susruta.4.9.44) pathyā vyoṣaṃ sekṣujātaṃ satailaṃ līḍhvā śīghraṃ mucyate kuṣṭharogāt/ dhātrīpathyākṣopakulyāviḍaṅgān kṣaudrājyābhyāmekato vā+avalihyāt// ### [4.9.45](https://indike.org/pramana/in.med.samhita.susruta.4.9.45) pītvā māsaṃ vā palāṃśāṃ haridrāṃ mūtreṇāntaṃ pāparogasya gacchet/ evaṃ peyaścitrakaḥ ślakṣṇapiṣṭaḥ pippalyo vā pūrvavanmūtrayuktāḥ// ### [4.9.46](https://indike.org/pramana/in.med.samhita.susruta.4.9.46) tadvattārkṣyaṃ māsamātraṃ ca peyaṃ tenājasraṃ dehamālepayecca/ āriṣṭītvak sāptaparṇī ca tulyā lākṣā mustaṃ pañcamūlyau haridre// ### [4.9.47](https://indike.org/pramana/in.med.samhita.susruta.4.9.47) mañjiṣṭhākṣau vāsako devadāru pathyāvahnī vyoṣadhātrīviḍaṅgāḥ/ sāmānyāṃśaṃ yojayitvā viḍaṅgaiścūrṇaṃ kṛtvā tatpalonmānamaśnan// ### [4.9.48](https://indike.org/pramana/in.med.samhita.susruta.4.9.48) kuṣṭhājjanturmucyate traiphalaṃ vā sarpirdroṇaṃ vyoṣayuktaṃ ca yuñjan/ gomūtrāmbudroṇasiddhe+akṣapīḍe siddhaṃ sarpirnāśayeccāpi kuṣṭham// ### [4.9.49](https://indike.org/pramana/in.med.samhita.susruta.4.9.49) āragvadhe saptaparṇe paṭole savṛkṣake naktamāle sanimbe jīrṇaṃ pakvaṃ taddharidrādvayena hanyāt kuṣṭhaṃ muṣkake cāpi sarpiḥ// ### [4.9.50](https://indike.org/pramana/in.med.samhita.susruta.4.9.50) rodhrāriṣṭaṃ padmakaṃ raktasāraḥ saptāhvākṣau vṛkṣako bījakaśca/ yojyāḥ snāne dahyamānasya jantoḥ peyā vā syāt kṣaudrayuktā tribhaṇḍī// ### [4.9.51](https://indike.org/pramana/in.med.samhita.susruta.4.9.51) khādet kuṣṭhī māṃsaśā(pā)te purāṇān mudgān siddhānnimbatoye satailān/ nimbakvāthaṃ jātasattvaḥ pibedvā kvāthaṃ vā+arkālarkasaptacchadānām// ### [4.9.52](https://indike.org/pramana/in.med.samhita.susruta.4.9.52) jagdheṣvaṅgeṣvaśvamārasya mūlaṃ lepo yuktaḥ syādviḍaṅgaiḥ samūtraiḥ/ mūtraiścainaṃ secayedbhojayecca sarvāhārān saṃprayuktān viḍaṅgaiḥ// ### [4.9.53](https://indike.org/pramana/in.med.samhita.susruta.4.9.53) kārañjaṃ vā sārṣapaṃ vā kṣateṣu kṣepyaṃ tailaṃ śigrukośāmrayorvā/ pakvaṃ sarvairvā kaṭūṣṇaiḥ satikaiḥ śeṣaṃ ca syādduṣṭavat saṃvidhānam// ### [4.9.54](https://indike.org/pramana/in.med.samhita.susruta.4.9.54) saptaparṇakarañjārkamālatīkaravīrajam/ snuhīśirīṣayormūlaṃ citrakāsphotayorapi// ### [4.9.55](https://indike.org/pramana/in.med.samhita.susruta.4.9.55) viṣalāṅgalavajrākhyakāsīsālamanaḥśilāḥ/ karañjabījaṃ trikaṭu triphalāṃ rajanīdvayam// ### [4.9.56](https://indike.org/pramana/in.med.samhita.susruta.4.9.56) siddhārthakān viḍaṅgāni prapunnāḍaṃ ca saṃharet/ mūtrapiṣṭaiḥ pacedetaistailaṃ kuṣṭhavināśanam// ### [4.9.57](https://indike.org/pramana/in.med.samhita.susruta.4.9.57) etadvajrakamabhyaṅgānnāḍīduṣṭavraṇāpaham/ siddhārthakaḥ karañjau dvau dve haridre rasāñjanam// ### [4.9.58](https://indike.org/pramana/in.med.samhita.susruta.4.9.58) kuṭajaśca prapunnāḍasaptaparṇau mṛgādanī/ lākṣā sarjaraso+arkaśca sāsphotāragvadhau snuhī// ### [4.9.59](https://indike.org/pramana/in.med.samhita.susruta.4.9.59) śirīṣastuvarākhyastu kuṭajāruṣkarau vacā/ kuṣṭhaṃ kṛmighnaṃ mañjiṣṭhā lāṅgalī citrakaṃ tathā// ### [4.9.60](https://indike.org/pramana/in.med.samhita.susruta.4.9.60) mālatī kaṭutumbī ca gandhāhvā mūlakaṃ tathā/ saindhavaṃ karavīraśca gṛhadhūmaṃ viṣaṃ tathā// ### [4.9.61](https://indike.org/pramana/in.med.samhita.susruta.4.9.61) kampillakaṃ sasindūraṃ tejohvātutthakāhvaye/ samabhāgāni sarvāṇi kalkapeṣyāṇi kārayet// ### [4.9.62](https://indike.org/pramana/in.med.samhita.susruta.4.9.62) gomūtraṃ dviguṇaṃ dadyāttilatailāccaturguṇam/ kārañjaṃ yā mahāvīryaṃ sārṣapaṃ vā mahāguṇam// ### [4.9.63](https://indike.org/pramana/in.med.samhita.susruta.4.9.63) abhyaṅgāt sarvakuṣṭhāni gaṇḍamālābhagandarān/ nāḍīduṣṭavraṇān ghorān nāśayennātra saṃśayaḥ// ### [4.9.64](https://indike.org/pramana/in.med.samhita.susruta.4.9.64) mahāvajrakamityetannāmnā tailaṃ mahāguṇam/ pittāvāpairmūtrapiṣṭastailaṃ lākṣādikaiḥ kṛtam// ### [4.9.65](https://indike.org/pramana/in.med.samhita.susruta.4.9.65) saptāhaṃ kaṭukālābvāṃ nidadhīta cikitsakaḥ/ pītavantaṃ tato mātrāṃ tenābhyaktaṃ ca mānavam// ### [4.9.66](https://indike.org/pramana/in.med.samhita.susruta.4.9.66) śāyayedātape tasya doṣā gacchanti sarvaśaḥ/ srutadoṣaṃ samutthāpya snātaṃ khadiravāriṇā// ### [4.9.67](https://indike.org/pramana/in.med.samhita.susruta.4.9.67) yavāgūṃ pāyayedenaṃ sādhitāṃ khadirāmbunā/ evaṃ saṃśodhane varge kuṣṭhaghneṣvauṣadheṣu ca// ### [4.9.68](https://indike.org/pramana/in.med.samhita.susruta.4.9.68) kuryāttailāni sarpīṣi pradehodgharṣaṇāni ca/ prātaḥ prātaśca seveta yogān vairecanāñ śubhān/ pañca ṣaṭ sapta cāṣṭau vā yairutthānaṃ na gacchati// ### [4.9.69](https://indike.org/pramana/in.med.samhita.susruta.4.9.69) kārabhaṃ vā pibenmūtraṃ jīrṇe tatkṣīrabhojanam/ jātasattvāni kuṣṭhāni māsaiḥ ṣaḍbhirapohati// ### [4.9.70](https://indike.org/pramana/in.med.samhita.susruta.4.9.70) didṛkṣurantaṃ kuṣṭhasya khadiraṃ kuṣṭhapīḍitaḥ/ sarvathaiva prayuñjīta snānapānāśanādiṣu// ### [4.9.71](https://indike.org/pramana/in.med.samhita.susruta.4.9.71) yathā hanti pravṛddhatvāt kuṣṭhamāturamojasā/ tathā hantyupayuktastu khadiraḥ kuṣṭhamojasā// ### [4.9.72](https://indike.org/pramana/in.med.samhita.susruta.4.9.72) †nīcaromanakhaḥ śrānto hitāśyauṣadhatatparaḥ/ yoṣinmāṃsasurāvarjī kuṣṭhī kuṣṭhamapohati// ### [4.9.72\_1](https://indike.org/pramana/in.med.samhita.susruta.4.9.72_1) iti suśrutasaṃhitāyāṃ cikitsāsthāne kuṣṭhacikitsitaṃ nāma navamo+adhyāyaḥ //9// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.93.24) — Ḍalhaṇa, Sanskrit --- Source: [https://indike.org/pramana/in.med.samhita.susruta.4.9](https://indike.org/pramana/in.med.samhita.susruta.4.9) · Pramāṇa