[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 5.1 # The Compendium of Suśruta 5.1: prathamo+adhyāyaḥ/ Suśrutasaṃhitā 5.1 - **Language:** Sanskrit ### prathamo+adhyāyaḥ/ ### [5.1.1](https://indike.org/pramana/in.med.samhita.susruta.5.1.1) athāto+annapānarakṣakalpaṃ vyākhyāsyāmaḥ// ### [5.1.2](https://indike.org/pramana/in.med.samhita.susruta.5.1.2) yathovāca bhagavān dhanvantariḥ// ### [5.1.3](https://indike.org/pramana/in.med.samhita.susruta.5.1.3) dhanvantariḥ kāśipatistapodharmabhṛtāṃ varaḥ/ suśrutaprabhṛtīñchiṣyāñchaśāsāhataśāsanaḥ// ### [5.1.4](https://indike.org/pramana/in.med.samhita.susruta.5.1.4) ripavo vikramākrāntā ye ca sve kṛtyatāṃ gatāḥ/ sisṛkṣavaḥ krodhaviṣaṃ vivaraṃ prāpya tādṛśam// ### [5.1.5](https://indike.org/pramana/in.med.samhita.susruta.5.1.5) viṣairnihanyurnipuṇaṃ nṛpatiṃ duṣṭacetasaḥ/ striyo vā vividhān yogān kadācitsubhagecchayā// ### [5.1.6](https://indike.org/pramana/in.med.samhita.susruta.5.1.6) viṣakanyopayogādvā kṣaṇājjahyādasūnnaraḥ/ tasmādvaidyena satataṃ viṣādrakṣyo narādhipaḥ// ### [5.1.7](https://indike.org/pramana/in.med.samhita.susruta.5.1.7) yasmācca ceto+anityatvamaśvavat prathitaṃ nṛṇām/ na viśvasyāttato rājā kadācidapi kasyacit// ### [5.1.8](https://indike.org/pramana/in.med.samhita.susruta.5.1.8) kulīnaṃ dhārmikaṃ snigdhaṃ subhṛtaṃ saṃtatotthitam/ alubdhamaśaṭhaṃ bhaktaṃ kṛtajñaṃ priyadarśanam// ### [5.1.9](https://indike.org/pramana/in.med.samhita.susruta.5.1.9) krodhapāruṣyamātsaryamāyālasyavivarjitam/ jitendriyaṃ kṣamāvantaṃ śuciṃ śīladayānvitam// ### [5.1.10](https://indike.org/pramana/in.med.samhita.susruta.5.1.10) medhāvinamasaṃśrāntamanuraktaṃ† hitaiṣiṇam/ paṭuṃ pragalbhaṃ nipuṇaṃ dakṣamālasyavarjitam†// ### [5.1.11](https://indike.org/pramana/in.med.samhita.susruta.5.1.11) pūrvoktaiśca guṇairyuktaṃ nityaṃ sannihitāgadam/ mahānase prayuñjīta vaidyaṃ tadvidyapūjitam// ### [5.1.12](https://indike.org/pramana/in.med.samhita.susruta.5.1.12) praśastadigdeśakṛtaṃ śucibhāṇḍaṃ mahacchuci/ sajālakaṃ gavākṣāḍhyamāptavarganiṣevitam// ### [5.1.13](https://indike.org/pramana/in.med.samhita.susruta.5.1.13) vikakṣasṛṣṭasaṃsṛṣṭaṃ savitānaṃ kṛtārcanam/ parīkṣitastrīpuruṣaṃ bhaveccāpi mahānasam// ### [5.1.14](https://indike.org/pramana/in.med.samhita.susruta.5.1.14) tatrādhyakṣaṃ niyuñjīta prāyo vaidyaguṇānvitam/ śucayo dakṣiṇā dakṣā vinītāḥ priyadarśanāḥ// ### [5.1.15](https://indike.org/pramana/in.med.samhita.susruta.5.1.15) saṃvibhaktāḥ sumanaso nīcakeśanakhāḥ sthirāḥ/ snātā dṛḍhaṃ saṃyaminaḥ kṛtoṣṇīṣāḥ susaṃyatāḥ// ### [5.1.16](https://indike.org/pramana/in.med.samhita.susruta.5.1.16) tasya cājñāvidheyāḥ syurvividhāḥ parikarmiṇaḥ/ āhārasthitayaścāpi bhavanti prāṇino yataḥ// ### [5.1.17](https://indike.org/pramana/in.med.samhita.susruta.5.1.17) tasmānmahānase vaidyaḥ pramādarahito bhavet/ māhānasikavoḍhāraḥ saupaudanikapaupikāḥ// ### [5.1.18](https://indike.org/pramana/in.med.samhita.susruta.5.1.18) bhaveyurvaidyavaśagā ye cāpyanye+atra kecana/ iṅgitajño manuṣyāṇāṃ vākceṣṭāmukhavaikṛtaiḥ// ### [5.1.19](https://indike.org/pramana/in.med.samhita.susruta.5.1.19) vidyādviṣasya dātāramebhirliṅgaiśca buddhimān/ na dadātyuttaraṃ pṛṣṭo vivakṣan mohameti ca// ### [5.1.20](https://indike.org/pramana/in.med.samhita.susruta.5.1.20) apārthaṃ bahu saṅkīrṇaṃ bhāṣate cāpi mūḍhavat/ sphoṭayatyaṅgulīrbhūmimakasmādvilikheddhaset// ### [5.1.21](https://indike.org/pramana/in.med.samhita.susruta.5.1.21) vepathurjāyate tasya trastaścānyo+anyamīkṣate/ †kṣāmo vivarṇavaktraśca nakhaiḥ kiñcicchinattyapi// ### [5.1.22](https://indike.org/pramana/in.med.samhita.susruta.5.1.22) ālabhetāsakṛddīnaḥ kareṇa ca śiroruhān/ niryiyāsurapadvārairvīkṣate ca punaḥ punaḥ// ### [5.1.23](https://indike.org/pramana/in.med.samhita.susruta.5.1.23) vartate viparītaṃ tu viṣadātā vicetanaḥ/ kecidbhayāt pārthivasya tvaritā vā tadājñayā// ### [5.1.24](https://indike.org/pramana/in.med.samhita.susruta.5.1.24) asatāmapi santo+api ceṣṭāṃ kurvanti mānavāḥ/ tasmāt parīkṣaṇaṃ kāryaṃ bhṛtyānāmādṛtairnṛpaiḥ// ### [5.1.25](https://indike.org/pramana/in.med.samhita.susruta.5.1.25) anne pāne dantakāṣṭhe tathā+abhyaṅge+avalekhane/ utsādane kaṣāye ca pariṣeke+anulepane// ### [5.1.26](https://indike.org/pramana/in.med.samhita.susruta.5.1.26) srukṣu vastreṣu śayyāsu kavacābharaṇeṣu ca/ pādukāpādapīṭheṣu pṛṣṭheṣu gajavājinām// ### [5.1.27](https://indike.org/pramana/in.med.samhita.susruta.5.1.27) viṣajuṣṭeṣu cānyeṣu nasyadhūmāñjanādiṣu/ lakṣaṇāni pravakṣyāmi cikitsāmapyanantaram// ### [5.1.28](https://indike.org/pramana/in.med.samhita.susruta.5.1.28) nṛpabhaktādbaliṃ nyastaṃ saviṣaṃ bhakṣayanti ye/ tatraiva te vinaśyanti makṣikāvāyasādayaḥ// ### [5.1.29](https://indike.org/pramana/in.med.samhita.susruta.5.1.29) hutabhuk tena cānnena bhṛśaṃ caṭacaṭāyate/ mayūrakaṇṭhapratimo jāyate cāpi duḥsahaḥ// ### [5.1.30](https://indike.org/pramana/in.med.samhita.susruta.5.1.30) bhinnārcistīkṣṇadhūmaśca nacirāccopaśāmyati/ cakorasyākṣivairāgyaṃ jāyate kṣiprameva tu// ### [5.1.31](https://indike.org/pramana/in.med.samhita.susruta.5.1.31) dṛṣṭvā+annaṃ viṣasaṃsṛṣṭaṃ mriyante jīvajīvakāḥ/ kokilaḥ svaravaikṛtyaṃ krauñcastu madamṛcchati// ### [5.1.32](https://indike.org/pramana/in.med.samhita.susruta.5.1.32) hṛṣyenmayūra udvignaḥ krośataḥ śukasārike/ haṃsaḥ kṣveḍati cātyarthaṃ bhṛṅgarājastu kūjati// ### [5.1.33](https://indike.org/pramana/in.med.samhita.susruta.5.1.33) pṛṣato visṛjatyaśruṃ viṣṭhāṃ muñcati markaṭaḥ/ sannikṛṣṭāṃstataḥ kuryādrājñastān mṛgapakṣiṇaḥ// ### [5.1.34](https://indike.org/pramana/in.med.samhita.susruta.5.1.34) veśmano+atha vibhūṣārthaṃ rakṣārthaṃ cātmanaḥ sadā/ upakṣiptasya cānnasya bāṣpeṇordhvaṃ prasarpatā// ### [5.1.35](https://indike.org/pramana/in.med.samhita.susruta.5.1.35) hṛtpīḍā bhrāntanetratvaṃ śiroduḥkhaṃ ca jāyate/ tatra nasyāñjane kuṣṭhaṃ lāmajjaṃ naladaṃ madhu// ### [5.1.36](https://indike.org/pramana/in.med.samhita.susruta.5.1.36) kuryācchirīṣarajanīcandanaiśca pralepanam/ hṛdi candanalepastu tathā sukhamavāpnuyāt// ### [5.1.37](https://indike.org/pramana/in.med.samhita.susruta.5.1.37) pāṇiprāptaṃ pāṇidāhaṃ nakhaśātaṃ karoti ca/ atra pralepaḥ śyāmendragopāsomotpalāni ca// ### [5.1.38](https://indike.org/pramana/in.med.samhita.susruta.5.1.38) sa cet pramādānmohādvā tadannamupasevate/ aṣṭhīlāvattato jihvā bhavatyarasavedinī// ### [5.1.39](https://indike.org/pramana/in.med.samhita.susruta.5.1.39) tudyate dahyate cāpi śleṣmā cāsyāt prasicyate/ tatra bāṣperitaṃ karma yacca syāddāntakāṣṭhikam// ### [5.1.40](https://indike.org/pramana/in.med.samhita.susruta.5.1.40) mūrcchāṃ chardimatīsāramādhmānaṃ dāhavepathū/ indriyāṇāṃ ca vaikṛtyaṃ kuryādāmāśayaṃ gatam// ### [5.1.41](https://indike.org/pramana/in.med.samhita.susruta.5.1.41) tatrāśu madanālābubimbīkośātakīphalaiḥ/ chardanaṃ dadhyudaśvidbhyāmathavā taṇḍulāmbunā// ### [5.1.42](https://indike.org/pramana/in.med.samhita.susruta.5.1.42) dāhaṃ mūrcchāmatīsāraṃ tṛṣṇāmindriyavaikṛtam/ āṭopaṃ pāṇḍutāṃ kārśyaṃ kuryāt pakvāśayaṃ gatam// ### [5.1.43](https://indike.org/pramana/in.med.samhita.susruta.5.1.43) virecanaṃ sasarpiṣkaṃ tatroktaṃ nīlinīphalam/ dadhnā dūṣīviṣāriśca peyo vā madhusaṃyutaḥ// ### [5.1.44](https://indike.org/pramana/in.med.samhita.susruta.5.1.44) dravadravyeṣu sarveṣu kṣīramadyodakādiṣu/ bhavanti vividhā rājyaḥ phenabudbudajanma ca// ### [5.1.45](https://indike.org/pramana/in.med.samhita.susruta.5.1.45) chāyāścātra na dṛśyante dṛśyante yadi vā punaḥ/ bhavanti yamalāśchidrāstanvyo vā vikṛtāstathā// ### [5.1.46](https://indike.org/pramana/in.med.samhita.susruta.5.1.46) śākasūpānnamāṃsāni klinnāni virasāni ca/ sadyaḥ paryuṣitānīva vigandhāni bhavanti ca// ### [5.1.47](https://indike.org/pramana/in.med.samhita.susruta.5.1.47) gandhavarṇarasairhīnāḥ sarve bhakṣyāḥ phalāni ca/ pakvānyāśu viśīryante pākamāmāni yānti ca// ### [5.1.48](https://indike.org/pramana/in.med.samhita.susruta.5.1.48) viśīryate kūrcakastu dantakāṣṭhagate viṣe/ jihvādantauṣṭhamāṃsānāṃ śvayathuścopajāyate// ### [5.1.49](https://indike.org/pramana/in.med.samhita.susruta.5.1.49) athāsya dhātakīpuṣpapathyājambūphalāsthibhiḥ/ sakṣaudraiḥ pracchite śophe kartavyaṃ pratisāraṇam// ### [5.1.50](https://indike.org/pramana/in.med.samhita.susruta.5.1.50) athāvā+aṅkoṭhamūlāni tvacaḥ saptacchadasya vā/ śirīṣamāṣakā vā+api sakṣaudrāḥ pratisāraṇam// ### [5.1.51](https://indike.org/pramana/in.med.samhita.susruta.5.1.51) jihvānirlekhavalau dantakāṣṭhavadādiśet/ picchilo bahulo+abhyaṅgo vivarṇo vā viṣānvitaḥ// ### [5.1.52](https://indike.org/pramana/in.med.samhita.susruta.5.1.52) sphoṭajanmarujāsrāvatvakpākaḥ svedanaṃ jvaraḥ/ daraṇaṃ cāpi māṃsānāmabhyaṅge viṣasaṃyute// ### [5.1.53](https://indike.org/pramana/in.med.samhita.susruta.5.1.53) tatra śītāmbusiktasya kartavyamanulepanam/ candanaṃ tagaraṃ kuṣṭhamuśīraṃ veṇupatrikā// ### [5.1.54](https://indike.org/pramana/in.med.samhita.susruta.5.1.54) somavallyamṛtā śvetā padmaṃ kālīyakaṃ tvacam/ kapittharasamūtrābhyāṃ pānametacca yujyate// ### [5.1.55](https://indike.org/pramana/in.med.samhita.susruta.5.1.55) utsādane parīṣeke kaṣāye cānulepane/ śayyāvastratanutreṣu jñeyamabhyaṅgalakṣaṇaiḥ// ### [5.1.56](https://indike.org/pramana/in.med.samhita.susruta.5.1.56) keśaśātaḥ śiroduḥkhaṃ khebhyaśca rudhirāgamaḥ/ granthijanmottamāṅgeṣu viṣajuṣṭe+avalekhane// ### [5.1.57](https://indike.org/pramana/in.med.samhita.susruta.5.1.57) pralepo bahuśastatra bhavitāḥ kṛṣṇamṛttikāḥ/ ṛṣyapittaghṛtaśyāmāpālindītaṇḍulīyakaiḥ// ### [5.1.58](https://indike.org/pramana/in.med.samhita.susruta.5.1.58) gomayasvaraso vā+api hito vā mālatīrasaḥ/ raso mūṣikaparṇyā vā dhūmo vā+agārasaṃbhavaḥ// ### [5.1.59](https://indike.org/pramana/in.med.samhita.susruta.5.1.59) śiro+abhyaṅgaḥ śirastrāṇaṃ snānamuṣṇīṣameva ca/ srajaśca viṣasaṃsṛṣṭāḥ sādhayedavalekhanāt// ### [5.1.60](https://indike.org/pramana/in.med.samhita.susruta.5.1.60) mukhālepe mukhaṃ śyāvaṃ yuktamabhyaṅgalakṣaṇaiḥ/ padminīkaṇṭakaprakhyaiḥ kaṇṭakaiścopacīyate// ### [5.1.61](https://indike.org/pramana/in.med.samhita.susruta.5.1.61) tatra kṣaudraghṛtaṃ pānaṃ pralepaścandanaṃ ghṛtam/ payasyā madhukaṃ phañjī bandhujīvaḥ punarnavā// ### [5.1.62](https://indike.org/pramana/in.med.samhita.susruta.5.1.62) asvāsthyaṃ kuñjarādīnāṃ lālāsrāvo+akṣiraktatā/ sphikpāyumeḍhramuṣkeṣu yātuśca sphoṭasaṃbhavaḥ// ### [5.1.63](https://indike.org/pramana/in.med.samhita.susruta.5.1.63) tatrābhyaṅgavadeveṣṭā yātṛvāhanayoḥ kriyā/ śoṇitāgamanaṃ khebhyaḥ śirorukkaphasṃsravaḥ// ### [5.1.64](https://indike.org/pramana/in.med.samhita.susruta.5.1.64) nasyadhūmagate liṅgamindiryāṇāṃ ca vaikṛtam/ tatra dugdhairgavādīnāṃ sarpiḥ sātiviṣaiḥ śṛtam// ### [5.1.65](https://indike.org/pramana/in.med.samhita.susruta.5.1.65) pāne nasye ca saśvetaṃ hitaṃ samadayantikam/ gandhahānirvivarṇatvaṃ puṣpāṇāṃ mlānatā bhavet// ### [5.1.66](https://indike.org/pramana/in.med.samhita.susruta.5.1.66) jighrataśca śiroduḥkhaṃ vāripūrṇe ca locane/ tatra bāṣperitaṃ karma mukhālepe ca yat smṛtam// ### [5.1.67](https://indike.org/pramana/in.med.samhita.susruta.5.1.67) karṇatailagate śrotravaiguṇyaṃ śophavedane/ karṇasrāvaśca tatrāśu kartavyaṃ pratipūraṇam// ### [5.1.68](https://indike.org/pramana/in.med.samhita.susruta.5.1.68) svaraso bahuputrāyāḥ saghṛtaḥ kṣaudrasaṃyutaḥ/ somavalkarasaścāpi suśīto hita iṣyate// ### [5.1.69](https://indike.org/pramana/in.med.samhita.susruta.5.1.69) aśrūpadeho dāhaśca vedanā dṛṣṭivibhramaḥ/ añjane viṣasaṃsṛṣṭe bhavedāndhyamathāpi ca// ### [5.1.70](https://indike.org/pramana/in.med.samhita.susruta.5.1.70) tatra sadyo ghṛtaṃ peyaṃ tarpaṇaṃ ca samāgadham/ añjanaṃ meṣaśṛṅgasya niryāso varuṇasya ca// ### [5.1.71](https://indike.org/pramana/in.med.samhita.susruta.5.1.71) muṣkakasyājakarṇasya pheno gopittasaṃyutaḥ/ kapitthameṣaśṛṅgyośca puṣpaṃ bhallātakasya vā// ### [5.1.72](https://indike.org/pramana/in.med.samhita.susruta.5.1.72) ekaikaṃ kārayet puṣpaṃ bandhūkāṅkoṭayorapi/ śophaḥ srāvastathā svāpaḥ pādayoḥ sphoṭajanma ca// ### [5.1.73](https://indike.org/pramana/in.med.samhita.susruta.5.1.73) bhavanti viṣajuṣṭābhyāṃ pādukābhyāmasaṃśayam/ upānatpādapīṭhāni pādukāvat prasādhayet// ### [5.1.74](https://indike.org/pramana/in.med.samhita.susruta.5.1.74) bhūṣaṇāni hatārcīṃṣi na vibhānti yathā purā/ svāni sthānāni hanyuśca dāhapākāvadāraṇaiḥ// ### [5.1.75](https://indike.org/pramana/in.med.samhita.susruta.5.1.75) pādukābhūṣaṇeṣūktamabhyaṅgavidhimācaret/ viṣopasargo bāṣpādirbhūṣaṇānto ya īritaḥ// ### [5.1.76](https://indike.org/pramana/in.med.samhita.susruta.5.1.76) samīkṣyopadravāṃstasya vidadhīta cikitsitam/ mahāsugandhimagadaṃ yaṃ pravakṣyāmi taṃ bhiṣak// ### [5.1.77](https://indike.org/pramana/in.med.samhita.susruta.5.1.77) pānālepananasyeṣu vidadhītāñjaneṣu ca/ virecanāni tīkṣṇāni kuryāt pracchardanāni ca// ### [5.1.78](https://indike.org/pramana/in.med.samhita.susruta.5.1.78) sirāśca vyadhayet kṣipraṃ prāptaṃ visrāvaṇaṃ yadi/ mūsikā+ajaruhā vā+api haste baddhā tu bhūpateḥ// ### [5.1.79](https://indike.org/pramana/in.med.samhita.susruta.5.1.79) karoti nirviṣaṃ sarvamannaṃ viṣasamāyutam/ hṛdayāvaraṇaṃ nityaṃ kuryācca mitramadhyagaḥ// ### [5.1.80](https://indike.org/pramana/in.med.samhita.susruta.5.1.80) pibedghṛtamajeyākhyamamṛtākhyaṃ ca buddhimān/ sarpirdadhi payaḥ kṣaudraṃ pibedvā śītalaṃ jalam// ### [5.1.81](https://indike.org/pramana/in.med.samhita.susruta.5.1.81) mayūrānnakulān godhāḥ pṛṣatān hariṇānapi/ satataṃ bhakṣayeccāpi rasāṃsteṣāṃ pibedapi// ### [5.1.82](https://indike.org/pramana/in.med.samhita.susruta.5.1.82) godhānakulamāṃseṣu hariṇasya ca buddhimān/ dadyāt supiṣṭāṃ pālindīṃ madhukaṃ śarkarāṃ tathā// ### [5.1.83](https://indike.org/pramana/in.med.samhita.susruta.5.1.83) śarkarātiviṣe deye māyūre samahauṣadhe/ pārṣate cāpi deyāḥ syuḥ pippalyaḥ samahauṣadhāḥ// ### [5.1.84](https://indike.org/pramana/in.med.samhita.susruta.5.1.84) sakṣaudraḥ saghṛtaścaiva śimbīyūṣo hitaḥ sadā/ viṣaghnāni ca seveta bhakṣyabhojyāni buddhimān// ### [5.1.85](https://indike.org/pramana/in.med.samhita.susruta.5.1.85) pippalīmadhukakṣaudraśarkarekṣurasāmbubhiḥ/ chardayedguptahṛdayo bhakṣitaṃ yadi vai viṣam// ### [5.1.85\_1](https://indike.org/pramana/in.med.samhita.susruta.5.1.85_1) iti suśrutasaṃhitāyāṃ kalpasthāne+annapānarakṣākalpo nāma prathamo+adhyāyaḥ// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.124.2) — Ḍalhaṇa, Sanskrit ## Linked texts (2) - [Bṛhadyogataraṅgiṇī](https://indike.org/pramana/in.med.yoga.brhadyogatarangini.23.24) — Trimalla, Sanskrit - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.23.24) — Trimalla, Sanskrit --- Source: [https://indike.org/pramana/in.med.samhita.susruta.5.1](https://indike.org/pramana/in.med.samhita.susruta.5.1) · Pramāṇa