[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 5.2 # The Compendium of Suśruta 5.2: dvitīyo+adhyāyaḥ/ Suśrutasaṃhitā 5.2 - **Language:** Sanskrit ### dvitīyo+adhyāyaḥ/ ### [5.2.1](https://indike.org/pramana/in.med.samhita.susruta.5.2.1) athātaḥ sthāvaraviṣavijñānīyamadhyāyaṃ vyākhyāsyāmaḥ// ### [5.2.2](https://indike.org/pramana/in.med.samhita.susruta.5.2.2) yathovāca bhagavān dhanvantariḥ// ### [5.2.3](https://indike.org/pramana/in.med.samhita.susruta.5.2.3) sthābaraṃ jaṅgamaṃ caiva dvividhaṃ viṣamucyate/ ### [5.2.3\_1](https://indike.org/pramana/in.med.samhita.susruta.5.2.3_1) daśādhiṣṭhānamādyaṃ tu dvitīyaṃ ṣoḍaśāśrayam// ### [5.2.4](https://indike.org/pramana/in.med.samhita.susruta.5.2.4) mūlaṃ patraṃ phalaṃ puṣpaṃ tvak kṣīraṃ sāra eva ca/ niryāso dhātavaścaiva kandaśca daśamaḥ smṛtaḥ// ### [5.2.5](https://indike.org/pramana/in.med.samhita.susruta.5.2.5) tatra klītakāśvamāraguñjāsugandhagargarakakaraghāṭavidyucchikhāvijayānītyaṣṭau mūlaviṣāṇi; viṣapatrikālambāvaradārukarambhamahākarambhāṇi pañca patraviṣāṇi; kumudvatīveṇukākarambhamahākarambhakarkoṭakareṇukakhadyotakacarmarībhagandhāsarpaghātinandanasārapākānīti dvādaśa phalaviṣāṇi; vetrakādambavallījakarasbhamahākarambhāṇi pañca puṣpaviṣāṇi; antrapācakakartarīyasaurīyakakaraghāṭakarambhanandananārācakāni sapta tvaksāraniryāsaviṣāṇi; kumudaghnīsnuhījālakṣīrīṇi trīṇi kṣīraviṣāṇi; phenāśma(bhasma)haritālaṃ ca dve dhātuviṣe; kālakūṭavatsanābhasarṣapapālakakardamakavairāṭakamustakaśṛṅgīviṣaprapuṇḍarīkamūlakahālāhalamahāviṣakarkaṭakānīti trayodaśa kandaviṣāṇi; ityevaṃ pañcapañcāśat sthāvaraviṣāṇi bhavanti// ### [5.2.6](https://indike.org/pramana/in.med.samhita.susruta.5.2.6) catvāri vatsanābhāni mustake dve prakīrtite ṣaṭ caiva sarṣapāṇyāhuḥ śeṣāṇyekaikameva tu// ### [5.2.7](https://indike.org/pramana/in.med.samhita.susruta.5.2.7) udveṣṭanaṃ mūlaviṣaiḥ pralāpo moha eva ca/ jṛmbhāṅgodveṣṭanaśvāsā jñeyāḥ patraviṣeṇa tu// ### [5.2.8](https://indike.org/pramana/in.med.samhita.susruta.5.2.8) muṣkaśophaḥ phalaviṣairdāho+annadveṣa eva ca/ bhavet puṣpaviṣaiśchardirādhmānaṃ moha eva ca// ### [5.2.9](https://indike.org/pramana/in.med.samhita.susruta.5.2.9) tvaksāraniryāsaviṣairupayuktairbhavanti hi/ āsyadaurgandhyapāruṣyaśirorukkaphasaṃsravāḥ// ### [5.2.10](https://indike.org/pramana/in.med.samhita.susruta.5.2.10) phenāgamaḥ kṣīraviṣairviḍbhedo gurujihvatā/ hṛtpīḍanaṃ dhātuviṣairmūrcchā dāhaśca tāluni// ### [5.2.11](https://indike.org/pramana/in.med.samhita.susruta.5.2.11) prāyeṇa kālaghātīni viṣāṇyetāni nirdiśet/ kandajāni tu tīkṣṇāni teṣāṃ vakṣyāmi vistaram// ### [5.2.12](https://indike.org/pramana/in.med.samhita.susruta.5.2.12) sparśājñānaṃ kālakūṭe vepathuḥ stambha eva ca/ grīvāstambho vatsanābhe pītaviṇmūtranetratā// ### [5.2.13](https://indike.org/pramana/in.med.samhita.susruta.5.2.13) sarṣape vātavaiguṇyamānāho granthijanma ca/ grīvādaurbalyavāksaṅgau pālake+anumatāviha// ### [5.2.14](https://indike.org/pramana/in.med.samhita.susruta.5.2.14) prasekaḥ kardamākhyena viṅbhedo netrapītatā/ vairāṭakenāṅgaduḥkhaṃ śirorogaśca jāyate// ### [5.2.15](https://indike.org/pramana/in.med.samhita.susruta.5.2.15) gātrastambho vepathuśca jāyate mustakena tu/ śṛṅgīviṣeṇāṅgasādadāhodaravivṛddhayaḥ// ### [5.2.16](https://indike.org/pramana/in.med.samhita.susruta.5.2.16) puṇḍarīkeṇa raktatvamakṣṇorvṛddhistathodare/ vaivarṇyaṃ mūlakaiśchardirhikkāśophapramūḍhatāḥ// ### [5.2.17](https://indike.org/pramana/in.med.samhita.susruta.5.2.17) cireṇocchvasiti śyāvo naro hālāhalena vai/ mahāviṣeṇa hṛdaye granthiśūlodgamau bhṛśam// ### [5.2.18](https://indike.org/pramana/in.med.samhita.susruta.5.2.18) karkaṭenotpatatyūrdhvaṃ hasan dantān daśatyapi/ kandajānyugravīryāṇi pratyuktāni trayodaśa// ### [5.2.19](https://indike.org/pramana/in.med.samhita.susruta.5.2.19) sarvāṇi kuśalairjñeyānyetāni daśabhirguṇaiḥ/ rūkṣamuṣṇaṃ tathā tīkṣṇaṃ sūkṣmamāśuvyavāyi ca// ### [5.2.20](https://indike.org/pramana/in.med.samhita.susruta.5.2.20) vikāśi viśadaṃ caiva laghvapāki ca tat smṛtam/ tadraukṣyāt kopayedvāyumauṣṇyāt pittaṃ saśoṇitam// ### [5.2.21](https://indike.org/pramana/in.med.samhita.susruta.5.2.21) matiṃ ca mohayettaikṣṇyānmarmabandhān chinatti ca/ śarīrāvayavān saukṣmyāt praviśedvikaroti ca// ### [5.2.22](https://indike.org/pramana/in.med.samhita.susruta.5.2.22) āśutvādāśu taddhanti vyavāyāt prakṛtiṃ bhajet/ kṣapayecca vikāśitvāddoṣāndhātūnmalānapi// ### [5.2.23](https://indike.org/pramana/in.med.samhita.susruta.5.2.23) vaiśadyādatiricyeta duścikitsyaṃ ca lāghavāt/ durharaṃ cāvipākitvāttasmāt kleśayate ciram// ### [5.2.24](https://indike.org/pramana/in.med.samhita.susruta.5.2.24) sthāvaraṃ jaṅgamaṃ yacca kṛtrimaṃ cāpi yadviṣam/ sadyo vyāpādayettattu jñeyaṃ daśaguṇānvitam// ### [5.2.25](https://indike.org/pramana/in.med.samhita.susruta.5.2.25) yat sthāvaraṃ jaṅgamakṛtrimaṃ vā dehādaśeṣaṃ yadanirgataṃ tat/ jīrṇaṃ viṣaghnauṣadhibhirhataṃ vā dāvāgnivātātapaśoṣitaṃ vā// ### [5.2.26](https://indike.org/pramana/in.med.samhita.susruta.5.2.26) svabhāvato vā guṇaviprahīnaṃ viṣaṃ hi dūṣīviṣatāmupaiti/ vīryālpamāvānna nipātayettat kaphāvṛtaṃ varṣagaṇānubandhi// ### [5.2.27](https://indike.org/pramana/in.med.samhita.susruta.5.2.27) tenārdito bhinnapurīṣavarṇo vigandhavairasyamukhaḥ pipāsī/ mūrcchan vaman gadgadavāgviṣaṇṇo bhavecca duṣyodaraliṅgajuṣṭaḥ// ### [5.2.28](https://indike.org/pramana/in.med.samhita.susruta.5.2.28) āmāśayasthe kaphavātarogī pakvāśayasthe+anilapittarogī/ bhavennaro dhvastaśiroruhāṅgo vilūnapakṣastu yathā vihaṅgaḥ// ### [5.2.29](https://indike.org/pramana/in.med.samhita.susruta.5.2.29) sthitaṃ rasādiṣvathavā yathoktān karoti dhātuprabhavān vikārān/ kopaṃ ca śītāniladurdineṣu yātyāśu pūrvaṃ śṛṇu tatra rūpam// ### [5.2.30](https://indike.org/pramana/in.med.samhita.susruta.5.2.30) nidrā gurutvaṃ ca vijṛmbhaṇaṃ ca viśleṣaharṣāvathavā+aṅgamardaḥ/ tataḥ karotyannamadāvipākāvarocakaṃ maṇḍalakoṭhamohān// ### [5.2.31](https://indike.org/pramana/in.med.samhita.susruta.5.2.31) dhātukṣayaṃ pādakarāsyaśophaṃ dakodaraṃ chardimathātisāram/ vaivarṇyamūrcchāviṣamajvarān vā kuryāt pravṛddhāṃ prabalāṃ tṛṣāṃ vā// ### [5.2.32](https://indike.org/pramana/in.med.samhita.susruta.5.2.32) unmādamanyajjanayettathā+anyadānāhamanyat kṣapayecca śukram/ gādgadyamanyajjanayecca kuṣṭhaṃ tāṃstān vikārāṃśca bahuprakārān// ### [5.2.33](https://indike.org/pramana/in.med.samhita.susruta.5.2.33) dūṣitaṃ deśakālānnadivāsvapnairabhīkṣṇaśaḥ/ yasmāddūṣayate dhātūn tasmāddūṣīviṣaṃ smṛtam// ### [5.2.34](https://indike.org/pramana/in.med.samhita.susruta.5.2.34) sthāvarasyopayuktasya vege tu prathame nṛṇām/ śyāvā jihvā bhavetstabdhā mūrcchā śvāsaśca jāyate// ### [5.2.35](https://indike.org/pramana/in.med.samhita.susruta.5.2.35) dvitīye vepathuḥ sādo dāhaḥ kaṇṭharujastathā/ viṣamāmāśayaprāptaṃ kurute hṛdi vedanām// ### [5.2.36](https://indike.org/pramana/in.med.samhita.susruta.5.2.36) tāluśoṣaṃ tṛtīye tu śūlaṃ cāmāśaye bhṛśam/ durvarṇe harite śūne jāyete cāsya locane// ### [5.2.37](https://indike.org/pramana/in.med.samhita.susruta.5.2.37) pakvāmāśayayostodo hikkā kāso+antrakūjanam/ caturthe jāyate vege śirasaścātigauravam// ### [5.2.38](https://indike.org/pramana/in.med.samhita.susruta.5.2.38) kaphapraseko vaivarṇyaṃ parvabhedaśca pañcame/ sarvadoṣaprakopaśca pakvādhāne ca vedanā// ### [5.2.39](https://indike.org/pramana/in.med.samhita.susruta.5.2.39) ṣaṣṭhe prajñāpraṇāśaśca bhṛśaṃ cāpyatisāryate/ skandhapṛṣṭhakaṭībhaṅgaḥ sannirodhaśca saptame// ### [5.2.40](https://indike.org/pramana/in.med.samhita.susruta.5.2.40) prathame viṣavege tu vānte śītāmbusecitam/ agadaṃ madhusarpirbhyāṃ pāyayeta samāyutam// ### [5.2.41](https://indike.org/pramana/in.med.samhita.susruta.5.2.41) dvitīye pūrvavadvāntaṃ pāyayettu virecanam/ tṛtīye+agadapānaṃ tu hitaṃ nasyaṃ tathā+añjanam// ### [5.2.42](https://indike.org/pramana/in.med.samhita.susruta.5.2.42) caturthe snehasaṃmiśraṃ pāyayetāgadaṃ bhiṣak/ pañcame kṣaudramadhukakvāthayuktaṃ pradāpayet// ### [5.2.43](https://indike.org/pramana/in.med.samhita.susruta.5.2.43) ṣaṣṭhe+atīsāravat siddhiravapīḍaśca saptame/ mūrdhni kākapadaṃ kṛtvā sāsṛgvā piśitaṃ kṣipet// ### [5.2.44](https://indike.org/pramana/in.med.samhita.susruta.5.2.44) vegāntare tvanyatame kṛte karmaṇi śītalām/ yavāgūṃ saghṛtakṣaudrāmimāṃ dadyādviṣāpahām// ### [5.2.45](https://indike.org/pramana/in.med.samhita.susruta.5.2.45) koṣātakyo+agnikaḥ pāṭhāsūryavallyamṛtābhayāḥ/ śirīṣaḥ kiṇihī śelurgiryāhvā rajanīdvayam// ### [5.2.46](https://indike.org/pramana/in.med.samhita.susruta.5.2.46) punarnave hareṇuśca trikaṭuḥ sārive balā/ eṣāṃ yavāgūrniṣkvāthe kṛtā hanti viṣadvayam// ### [5.2.47](https://indike.org/pramana/in.med.samhita.susruta.5.2.47) madhukaṃ tagaraṃ kuṣṭhaṃ bhadradāru hareṇavaḥ/ punnāgailailavālūni nāgapuṣpotpalaṃ sitā// ### [5.2.48](https://indike.org/pramana/in.med.samhita.susruta.5.2.48) viḍaṅgaṃ candanaṃ patraṃ priyaṅgurdhyāmakaṃ tathā/ haridre dve bṛhatyau ca sārive ca sthirā sahā// ### [5.2.49](https://indike.org/pramana/in.med.samhita.susruta.5.2.49) kalkaireṣāṃ ghṛtaṃ siddhamajeyamiti viśrutam/ viṣāṇi hanti sarvāṇi śīghramevājitaṃ kvacit// ### [5.2.50](https://indike.org/pramana/in.med.samhita.susruta.5.2.50) dūṣīviṣārtaṃ susvinnamūrdhvaṃ cādhaśca śodhitam/ pāyayetāgadaṃ nityamimaṃ dūṣiviṣāpaham// ### [5.2.51](https://indike.org/pramana/in.med.samhita.susruta.5.2.51) pippalyo dhyāmakaṃ māṃsī śāvaraḥ paripelavam/ suvarcikā sasūkṣmailā toyaṃ kanakagairikam// ### [5.2.52](https://indike.org/pramana/in.med.samhita.susruta.5.2.52) kṣaudrayukto+agado hyeṣa dūṣīviṣamapohati/ nāmnā dūṣīviṣāristu na cānyatrāpi vāryate// ### [5.2.53](https://indike.org/pramana/in.med.samhita.susruta.5.2.53) jvare dāhe ca hikkāyāmānāhe śukrasaṃkṣaya/ śophe+atisāre mūrcchāyāṃ hṛdroge jaṭhare+api ca// ### [5.2.54](https://indike.org/pramana/in.med.samhita.susruta.5.2.54) unmāde vepathau caiva ye cānye syurupadravāḥ/ yathāsvaṃ teṣu kurvīta viṣaghnairauṣadhaiḥ kriyām// ### [5.2.55](https://indike.org/pramana/in.med.samhita.susruta.5.2.55) sādhyamātmavataḥ sadyo yāpyaṃ savatsarotthitam/ dūṣīviṣamasādhyaṃ tu kṣīṇasyāhitasevinaḥ// ### [5.2.55\_1](https://indike.org/pramana/in.med.samhita.susruta.5.2.55_1) iti suśrutasaṃhitāyāṃ kalpasthāne sthāvaraviṣavijñānīyo nāma dvitīyo+adhyāyaḥ //2// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.125.2) — Ḍalhaṇa, Sanskrit ## Linked texts (4) - [Aṣṭāṅgasaṃgraha](https://indike.org/pramana/in.med.samhita.astangasamgraha.40.47) — Vāgbhaṭa, Sanskrit - [Aṣṭāṅgahṛdayasaṃhitā](https://indike.org/pramana/in.med.samhita.astangahrdaya.7366) — Vāgbhaṭa, Sanskrit - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.24.1) — Sanskrit - [Yogaratnasamuccaya (Anantakumāra)](https://indike.org/pramana/in.med.yoga.yogaratnasamuccaya-anantakumara.15.405) — Anantakumāra, Sanskrit --- Source: [https://indike.org/pramana/in.med.samhita.susruta.5.2](https://indike.org/pramana/in.med.samhita.susruta.5.2) · Pramāṇa