[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 5.8 # The Compendium of Suśruta 5.8: aṣṭamo+adhyāyaḥ/ Suśrutasaṃhitā 5.8 - **Language:** Sanskrit ### aṣṭamo+adhyāyaḥ/ ### [5.8.1](https://indike.org/pramana/in.med.samhita.susruta.5.8.1) athātaḥ kīṭakalpaṃ vyākhyāsyāmaḥ// ### [5.8.2](https://indike.org/pramana/in.med.samhita.susruta.5.8.2) yathovāca bhagavān dhanvantariḥ// ### [5.8.3](https://indike.org/pramana/in.med.samhita.susruta.5.8.3) sarpāṇāṃ śukraviṇmūtraśavapūtyaṇḍasaṃbhavāḥ/ vāyvagnyambuprakṛtayaḥ kīṭāstu vividhāḥ† smṛtāḥ// ### [5.8.4](https://indike.org/pramana/in.med.samhita.susruta.5.8.4) sarvadoṣaprakṛtibhiryuktāste pariṇāmataḥ/ kīṭatve+api †sughorāḥ syuḥ sarva eva caturvidhāḥ// ### [5.8.5](https://indike.org/pramana/in.med.samhita.susruta.5.8.5) kumbhīnasastuṇḍikerī śṛṅgī śatakulīrakaḥ/ ucciṭiṅgo+agnināmā ca cicciṭiṅgo mayūrikā// ### [5.8.6](https://indike.org/pramana/in.med.samhita.susruta.5.8.6) āvartakastathorabhraḥ sārikāmukhavaidalau/ śarāvakurdo+abhīrājiḥ paruṣaścitraśīrṣakaḥ†// ### [5.8.7](https://indike.org/pramana/in.med.samhita.susruta.5.8.7) śatabāhuśca yaścāpi raktarājiśca kīrtitaḥ/ aṣṭādaśeti vāyavyāḥ† kīṭāḥ pavanakopanāḥ// ### [5.8.8](https://indike.org/pramana/in.med.samhita.susruta.5.8.8) tairbhavantīha daṣṭānāṃ rogā vātanimittajāḥ/ kauṇḍinyakaḥ kaṇabhako varaṭī patravṛścikaḥ// ### [5.8.9](https://indike.org/pramana/in.med.samhita.susruta.5.8.9) vināsikā brāhmaṇikā bindulo bhramarastathā/ bāhyakī picciṭaḥ kumbhī varcaḥkīṭo+arimedakaḥ// ### [5.8.10](https://indike.org/pramana/in.med.samhita.susruta.5.8.10) padmakīṭo dundubhiko makaraḥ śatapādakaḥ/ pañcālakaḥ pākamatsyaḥ †kṛṣṇatuṇḍo+atha gardabhī// ### [5.8.11](https://indike.org/pramana/in.med.samhita.susruta.5.8.11) klītaḥ kṛmisarārī ca yaścāpyutkleśakastathā/ ete hyagniprakṛtayaścaturviṃśatireva ca// ### [5.8.12](https://indike.org/pramana/in.med.samhita.susruta.5.8.12) tairbhavantīha daṣṭānāṃ rogāḥ pittanimittajāḥ/ viśvambharaḥ pañcaśuklaḥ †pañcakṛṣṇo+atha kokilaḥ// ### [5.8.13](https://indike.org/pramana/in.med.samhita.susruta.5.8.13) saireyakaḥ pracalako valabhaḥ kiṭibhastathā/ sūcīmukhaḥ kṛṣṇagodhā yaśca kāṣāyavāsikaḥ// ### [5.8.14](https://indike.org/pramana/in.med.samhita.susruta.5.8.14) kīṭo gardabhakaścaiva† tathā troṭaka eva ca/ trayodaśaite saumyāḥ syuḥ kīṭāḥ śleṣmaprakopaṇāḥ// ### [5.8.15](https://indike.org/pramana/in.med.samhita.susruta.5.8.15) tairbhavantīha daṣṭānāṃ rogāḥ kaphanimittajāḥ/ tuṅgīnāso vicilakastālako vāhakastathā// ### [5.8.16](https://indike.org/pramana/in.med.samhita.susruta.5.8.16) koṣṭhāgārī krimikaro yaśca maṇḍalapucchakaḥ/ tuṇḍanābhaḥ(tuṅganābhaḥ) sarṣapiko valguliḥ śambukastathā// ### [5.8.17](https://indike.org/pramana/in.med.samhita.susruta.5.8.17) agnikīṭaśca vijñeyā dvādaśa prāṇanāśanāḥ/ tairbhavantīha daṣṭānāṃ vegajñānāni sarpavat// ### [5.8.18](https://indike.org/pramana/in.med.samhita.susruta.5.8.18) tāstāśca vedanāstīvrā rogā vai sānnipātikāḥ/ kṣarāgnidagdhavaddaṃśo raktapītasitāruṇaḥ// ### [5.8.19](https://indike.org/pramana/in.med.samhita.susruta.5.8.19) jvarāṅgamardaromāñcavedanābhiḥ samanvitaḥ/ chardyatīsāratṛṣṇāśca dāho mūrcchā vijṛmbhikā// ### [5.8.20](https://indike.org/pramana/in.med.samhita.susruta.5.8.20) vepathuśvāsahikkāśca dāhaḥ śītaṃ ca dāruṇam/ piḍakopacayaḥ śopho granthayo maṇḍalāni ca// ### [5.8.21](https://indike.org/pramana/in.med.samhita.susruta.5.8.21) dadravaḥ karṇikāścaiva visarpāḥ kiṭibhāni ca/ tairbhavantīha daṣṭānāṃ yathāsvaṃ cāpyupadravāḥ// ### [5.8.22](https://indike.org/pramana/in.med.samhita.susruta.5.8.22) ye+anye teṣāṃ viśeṣāstu tūrṇaṃ teṣāṃ samādiśet/ dūṣīviṣaprakopācca tathaiva viṣalepanāt// ### [5.8.23](https://indike.org/pramana/in.med.samhita.susruta.5.8.23) liṅgaṃ tīkṣṇaviṣeṣvetacchṛṇu mandaviṣeṣvataḥ/ prasekārocakacchardiśirogauravaśītakāḥ// ### [5.8.24](https://indike.org/pramana/in.med.samhita.susruta.5.8.24) piḍakākoṭhakaṇḍūnāṃ †janma doṣavibhāgataḥ/ yogairnānāvidhaireṣāṃ cūrṇāni garamādiśet// ### [5.8.25](https://indike.org/pramana/in.med.samhita.susruta.5.8.25) †dūṣīviṣaprakārāṇāṃ tathā cāpyanulepanāt/ ekajātīnatastūrdhvaṃ kīṭān vakṣyāmi bhedataḥ// ### [5.8.26](https://indike.org/pramana/in.med.samhita.susruta.5.8.26) sāmānyato daṣṭaliṅgaiḥ sādhyāsādhyakrameṇa ca/ †trikaṇṭaḥ kariṇī cāpi hastikakṣo+aparājitaḥ/ catvāra ete kaṇabhā vyākhyātāstīvravedanāḥ// ### [5.8.27](https://indike.org/pramana/in.med.samhita.susruta.5.8.27) tairdaṣṭasya śvayathuraṅgamardo gurutā gātrāṇāṃ daṃśaḥ kṛṣṇaśca bhavati// ### [5.8.28](https://indike.org/pramana/in.med.samhita.susruta.5.8.28) †pratisūryakaḥ, piṅgābhāso, bahuvarṇo, †nirūpamo godhereka iti pañca godherakāḥ†; tairdaṣṭasya śopho dāharujau ca bhavataḥ, godherakeṇaitadeva granthiprādurbhāvo jvaraśca// ### [5.8.29](https://indike.org/pramana/in.med.samhita.susruta.5.8.29) †galagolikā śvetā, kṛṣṇā, raktarājī, raktamaṇḍalā, sarvaśvetā, sarṣapiketyevaṃ ṣaṭ; tābhirdaṣṭe sarṣapikāvarjaṃ dāhaśophakledā bhavanti, sarṣapikayā hṛdayapiḍā+atisāraśca, tāsu madhye sarṣapikā prāṇaharī// ### [5.8.30](https://indike.org/pramana/in.med.samhita.susruta.5.8.30) śatapadyastu paruṣā, kṛṣṇā, citrā, kapilā, pītikā, raktā, śvetā, agniprabhā, ityaṣṭau; tābhirdaṣṭe śopho vedanā dāhaśca hṛdaye, śvetāgniprabhābhyāmetadeva dāho mūrcchā cātimātraṃ śvetapiḍakotpattiśca// ### [5.8.31](https://indike.org/pramana/in.med.samhita.susruta.5.8.31) maṇḍūkāḥ kṛṣṇaḥ, sāraḥ, kuhako, harito, rakto, yavavarṇābho, bhṛkuṭī, koṭikaścetyaṣṭau; tairdaṣṭasya daṃśe kaṇḍūrbhavati pītaphenāgamaśca vaktrāt, bhṛkuṭīkoṭikābhyāmetadeva dāhaśchardirmūrcchā cātimātram// ### [5.8.32](https://indike.org/pramana/in.med.samhita.susruta.5.8.32) viśvambharābhirdaṣṭe daṃśaḥ sarṣapākārābhiḥ piḍakābhiḥ sarujābhiścīyate, śītajvarārtaśca puruṣo bhavati// ### [5.8.33](https://indike.org/pramana/in.med.samhita.susruta.5.8.33) ahiṇḍukābhirdaṣṭe todadāhakaṇḍuścayathavo bhavanti mohaśca; kaṇḍūmakābhirdaṣṭe pītāṅgaśchardyatīsārajvarādibhirabhihanyate; śūkavṛntābhirdaṣṭe kaṇḍūkoṭhāḥ pravardhante śūkaṃ cātra lakṣyate// ### [5.8.34](https://indike.org/pramana/in.med.samhita.susruta.5.8.34) pipīlikāḥ sthūlaśīrṣā, saṃvāhikā, brahmaṇikā, aṅgulikā; kapilikā, citravarṇeti ṣaṭ; tābhirdaṣṭe† daṃśe śvayathuragnisparśavaddāhaśophau bhavataḥ// ### [5.8.35](https://indike.org/pramana/in.med.samhita.susruta.5.8.35) makṣikāḥ kāntārikā, kṛṣṇā, piṅgalā, madhūlikā, kāṣāyī, sthāliketyevaṃ ṣaṭ; tābhirdaṣṭasya kaṇḍuśophadāharujo bhavanti, sthālikākāṣāyībhyāmetadeva śyāvapiḍakotpattirupadravāśca jvarādayo bhavanti, kāṣāyī sthālikā ca prāṇahare†// ### [5.8.36](https://indike.org/pramana/in.med.samhita.susruta.5.8.36) maśakāḥ sāmudraḥ, parimaṇḍalo, hastimaśakaḥ, kṛṣṇaḥ, pārvatīya iti pañca; tairdaṣṭasya tīvrā kaṇḍūrdaṃśaśophaśca, pārvatīyastu kīṭaiḥ prāṇaharaistulyalakṣaṇaḥ// ### [5.8.37](https://indike.org/pramana/in.med.samhita.susruta.5.8.37) nakhāvakṛṣṭe+atyarthaṃ piḍakādāhapākā bhavanti/ jalaukasāṃ daṣṭalakṣaṇamuktaṃ cikitsitaṃ ca// ### [5.8.38](https://indike.org/pramana/in.med.samhita.susruta.5.8.38) bhavanti cātra godherakaḥ sthālikā ca ye ca śvetāgnisaprabhe/ bhṛkuṭī koṭikaścaiva na sidhyantyekajātiṣu// ### [5.8.39](https://indike.org/pramana/in.med.samhita.susruta.5.8.39) śavamūtrapurīṣaistu saviṣairavamarśanāt/ syuḥ kaṇḍūdāhakoṭhāruḥpiḍakātodavedanāḥ// ### [5.8.40](https://indike.org/pramana/in.med.samhita.susruta.5.8.40) prakledavāṃstathā srāvo bhṛśaṃ saṃpācayettvacam/ digdhaviddhakriyāstatra yathāvadavacārayet// ### [5.8.41](https://indike.org/pramana/in.med.samhita.susruta.5.8.41) nāvasannaṃ na cotsannamatisaṃrambhavedanam/ daṃśādau viparītārti kīṭadaṣṭaṃ subādhakam// ### [5.8.42](https://indike.org/pramana/in.med.samhita.susruta.5.8.42) daṣṭānugraviṣaiḥ kīṭaiḥ sarpavat samupācaret/ trividhānāṃ tu pūrveṣāṃ† traividhyena kriyā hitāḥ// ### [5.8.43](https://indike.org/pramana/in.med.samhita.susruta.5.8.43) svedamālepanaṃ sekaṃ coṣṇamatrāvacārayet/ anyatra mūrcchitāddaṃśāt pākakothaprapīḍitāt// ### [5.8.44](https://indike.org/pramana/in.med.samhita.susruta.5.8.44) viṣaghnaṃ ca vidhiṃ sarvaṃ †bahuśaḥ śodhanāni ca/ śirīṣakaṭukākuṣṭhavacārajanisaindhavaiḥ†// ### [5.8.45](https://indike.org/pramana/in.med.samhita.susruta.5.8.45) kṣīramajjavasāsarpiḥśuṇṭhīpippalidāruṣu/ utkārikā sthirādau vā sukṛtā svedane hitā// ### [5.8.46](https://indike.org/pramana/in.med.samhita.susruta.5.8.46) na svedayeta cādaṃśaṃ dhūmaṃ vakṣyāmi vṛścike/ agadānekajātīṣu pravakṣyāmi pṛthak pṛthak// ### [5.8.47](https://indike.org/pramana/in.med.samhita.susruta.5.8.47) kuṣṭhaṃ vakraṃ vacā pāṭhā bilvamūlaṃ suvarcikā/ gṛhadhūmaṃ haridre dve trikaṇṭakaviṣe hitāḥ// ### [5.8.48](https://indike.org/pramana/in.med.samhita.susruta.5.8.48) rajanyāgāradhūmaśca vakraṃ kuṣṭhaṃ palāśajam/ galagolikadaṣṭānāmagado viṣanāśanaḥ// ### [5.8.49](https://indike.org/pramana/in.med.samhita.susruta.5.8.49) kuṅkumaṃ tagaraṃ śigru padmakaṃ rajanīdvayam/ agado jalapiṣṭo+ayaṃ śatapadviṣanāśanaḥ// ### [5.8.50](https://indike.org/pramana/in.med.samhita.susruta.5.8.50) meṣaśṛṅgī vacā pāṭhā niculo rohiṇī jalam/ sarvamaṇḍūkadaṣṭānāmagado+ayaṃ viṣāpahaḥ// ### [5.8.51](https://indike.org/pramana/in.med.samhita.susruta.5.8.51) †dhavāśvagandhātibalābalāsātiguhāguhāḥ/ viśvambharābhidaṣṭānāmagado+ayaṃ viṣāpahaḥ// ### [5.8.52](https://indike.org/pramana/in.med.samhita.susruta.5.8.52) śirīṣaṃ tagaraṃ kuṣṭhaṃ śāliparṇī sahā niśe/ ahiṇḍukābhirdaṣṭānāmagado viṣanāśanaḥ// ### [5.8.53](https://indike.org/pramana/in.med.samhita.susruta.5.8.53) kaṇḍūmakābhirdaṣṭānāṃ rātrau śītāḥ kriyā hitāḥ/ divā te naiva sidhyanti sūryaraśmibalārditāḥ// ### [5.8.54](https://indike.org/pramana/in.med.samhita.susruta.5.8.54) vakraṃ kuṣṭhamapāmārgaḥ śūkavṛntaviṣe+agadaḥ/ bhṛṅgasvarasapiṣṭā vā kṛṣṇavalmīkamṛttikā// ### [5.8.55](https://indike.org/pramana/in.med.samhita.susruta.5.8.55) pipīlikābhirdaṣṭānāṃ makṣikāmaśakaistathā/ gomūtreṇa yuto lepaḥ kṛṣṇavalmīkamṛttikā// ### [5.8.56](https://indike.org/pramana/in.med.samhita.susruta.5.8.56) nakhāvaghṛṣṭasaṃjāte śophe bhṛṅgaraso hitaḥ†/ pratisūryakadaṣṭānāṃ sarpadaṣṭavadāceret/ trividhā vṛścikāḥ proktā mandamadhyamahāviṣāḥ// ### [5.8.57](https://indike.org/pramana/in.med.samhita.susruta.5.8.57) gośakṛtkothajā mandā madhyāḥ kāṣṭheṣṭikodbhavāḥ/ sarpakothodbhavāstīkṣṇā ye cānye viṣasaṃbhavāḥ// ### [5.8.58](https://indike.org/pramana/in.med.samhita.susruta.5.8.58) mandā dvādaśa madhyāstu trayaḥ pañcadaśottamāḥ/ daśa viṃśatirityete saṃkhyayā parikīrtitāḥ// ### [5.8.59](https://indike.org/pramana/in.med.samhita.susruta.5.8.59) kṛṣṇaḥ śyāvaḥ karburaḥ †pāṇḍuvarṇo gomūtrābhaḥ †karkaśo mecakaśca/ †pīto dhūmro romaśaḥ śāḍvalābho raktaḥ śvetenodareṇeti mandāḥ†// ### [5.8.60](https://indike.org/pramana/in.med.samhita.susruta.5.8.60) yuktāścaite vṛścikāḥ pucchadeśe syurbhūyobhiḥ parvabhiścetarebhyaḥ/ ebhirdaṣṭe vedanā vepathuśca gātrastambhaḥ kṛṣṇaraktāgamaśca// ### [5.8.61](https://indike.org/pramana/in.med.samhita.susruta.5.8.61) śākhādaṣṭe vedanā cordhvameti dāhasvedau daṃśaśopho jvaraśca/ raktaḥ pītaḥ kāpilenodareṇa sarve dhūmrāḥ parvabhiśca tribhiḥ syuḥ// ### [5.8.62](https://indike.org/pramana/in.med.samhita.susruta.5.8.62) ete mūtroccārapūtyaṇḍajātā madhyā jñeyāstriprakāroragāṇām/ yasyaiteṣāmanvayādyaḥ prasūto doṣotpattiṃ tatsvarūpāṃ sa kuryāt// ### [5.8.63](https://indike.org/pramana/in.med.samhita.susruta.5.8.63) jihvāśopho †bhojanasyāvarodho mūrcchā cogrā madhyavīryābhidaṣṭe†/ śvetaścitraḥ śyāmalo lohitābho† raktaḥ śveto raktanīlodarau ca// ### [5.8.64](https://indike.org/pramana/in.med.samhita.susruta.5.8.64) †pīto+arakto nīlapīto+aparastu rakto nīlo nīlaśuklastathā ca/ rakto babhruḥ pūrvavaccaikaparvā yaścāparvā parvaṇī dve ca yasya// ### [5.8.65](https://indike.org/pramana/in.med.samhita.susruta.5.8.65) nānārūpā varṇataścāpi ghorā jñeyāścaite vṛścikāḥ prāṇacaurāḥ†/ janmaiteṣāṃ sarpakothāt pradiṣṭaṃ dehebhyo vā ghātitānāṃ viṣeṇa// ### [5.8.66](https://indike.org/pramana/in.med.samhita.susruta.5.8.66) ebhirdaṣṭe sarpavegapravṛttiḥ sphoṭotpattirbhrāntidāhau jvaraśca/ khebhyaḥ kṛṣṇaṃ śoṇitaṃ yāti tīvraṃ tasmāt† prāṇaistyajyate śīghrameva// ### [5.8.67](https://indike.org/pramana/in.med.samhita.susruta.5.8.67) ugramadhyaviṣairdaṣṭaṃ cikitset sarpadaṣṭavat/ ādaṃśaṃ sveditaṃ cūrṇaiḥ pracchitaṃ pratisārayet// ### [5.8.68](https://indike.org/pramana/in.med.samhita.susruta.5.8.68) rajanīsaindhavavyoṣaśirīṣaphalapuṣpajaiḥ/ mātuluṅgāmlagomūtrapiṣṭaṃ ca surasāgrajam// ### [5.8.69](https://indike.org/pramana/in.med.samhita.susruta.5.8.69) lepe svede sukhoṣṇaṃ ca gomayaṃ hitamiṣyate/ pāne kṣaudrayutaṃ †sarpiḥ kṣīraṃ vā bahuśarkaram// ### [5.8.70](https://indike.org/pramana/in.med.samhita.susruta.5.8.70) daṃśaṃ mandaviṣāṇāṃ tu cakratailena secayet/ vidārīgaṇasiddhena sukhoṣṇenāthavā punaḥ// ### [5.8.71](https://indike.org/pramana/in.med.samhita.susruta.5.8.71) kuryāccotkārikāsvedaṃ viṣaghnairupanāhayet†/ guḍodakaṃ vā suhimaṃ cāturjātakasaṃyutam// ### [5.8.72](https://indike.org/pramana/in.med.samhita.susruta.5.8.72) pānamasmai pradātavyaṃ kṣīraṃ vā saguḍaṃ himam/ śikhikukkuṭabarhāṇi saindhavaṃ tailasarpiṣī// ### [5.8.73](https://indike.org/pramana/in.med.samhita.susruta.5.8.73) dhūmo hanti prayuktastu śīghraṃ vṛścikajaṃ viṣam/ kusumbhapuṣpaṃ rajanī niśā vā kodravaṃ tṛṇam// ### [5.8.74](https://indike.org/pramana/in.med.samhita.susruta.5.8.74) ebhirghṛtāktairdhūpastu pāyudeśe prayojitaḥ/ nāśayedāśu kīṭotthaṃ vṛścikasya ca yadviṣam// ### [5.8.75](https://indike.org/pramana/in.med.samhita.susruta.5.8.75) lūtāviṣaṃ ghoratamaṃ durvijñeyatamaṃ ca tat/ †duścikitsyatamaṃ cāpi bhiṣagbhirmandabuddhibhiḥ// ### [5.8.76](https://indike.org/pramana/in.med.samhita.susruta.5.8.76) saviṣaṃ nirviṣaṃ caitadityevaṃ pariśaṅkite/ viṣaghnameva kartavyamavirodhi yadauṣadham// ### [5.8.77](https://indike.org/pramana/in.med.samhita.susruta.5.8.77) agadānāṃ hi saṃyogo viṣajuṣṭasya yujyate/ nirviṣe mānave yukto+agadaḥ saṃpadyate+asukham// ### [5.8.78](https://indike.org/pramana/in.med.samhita.susruta.5.8.78) tasmāt †sarvaprayatnena jñātavyo viṣaniścayaḥ/ ajñātvā viṣasadbhāvaṃ bhiṣagvyāpādayennaram// ### [5.8.79](https://indike.org/pramana/in.med.samhita.susruta.5.8.79) prodbhidyamānastu yathā+aṅkureṇa na vyaktajātiḥ pravibhāti vṛkṣaḥ/ tadvaddurālakṣyatamaṃ hi tāsāṃ viṣaṃ śarīre pravikīrṇamātram// ### [5.8.80](https://indike.org/pramana/in.med.samhita.susruta.5.8.80) īṣatsakaṇḍu pracalaṃ sakoṭhamavyaktavarṇaṃ prathame+ahani syāt/ anteṣu śūnaṃ parinimnamadhyaṃ pravyaktarūpaṃ ca dine dvitīye// ### [5.8.81](https://indike.org/pramana/in.med.samhita.susruta.5.8.81) tryaheṇa taddarśayatīha rūpaṃ viṣaṃ caturthe+ahani kopameti/ ato+adhike+ahni prakaroti jantorviṣaprakopaprabhavān vikārān// ### [5.8.82](https://indike.org/pramana/in.med.samhita.susruta.5.8.82) ṣaṣṭhe dine viprasṛtaṃ tu sarvān marmapradeśān bhṛśamāvṛṇoti/ tat saptame+atyarthaparītagātraṃ vyāpādayenmartyamatipravṛddham// ### [5.8.83](https://indike.org/pramana/in.med.samhita.susruta.5.8.83) yāstīkṣṇacaṇḍograviṣā hi lūtāstāḥ saptarātreṇa naraṃ nihanyuḥ/ ato+adhikenāpi nihanyuranyā yāsāṃ viṣaṃ madhyamavīryamuktam// ### [5.8.84](https://indike.org/pramana/in.med.samhita.susruta.5.8.84) yāsāṃ kanīyo viṣavīryamuktaṃ tāḥ pakṣamātreṇa vināśayanti/ tasmāt prayatnaṃ bhiṣagatra kuryādādaṃśapātādviṣaghātiyogaiḥ// ### [5.8.85](https://indike.org/pramana/in.med.samhita.susruta.5.8.85) viṣaṃ tu lālānakhamūtradaṃṣṭrārajaḥpurīṣairatha cendriyeṇa/ saptaprakāraṃ visṛjanti lūtāstadugramadhyāvaravīryayuktam// ### [5.8.86](https://indike.org/pramana/in.med.samhita.susruta.5.8.86) sakaṇḍukoṭhaṃ sthiramalpamūlaṃ lālākṛtaṃ mandarujaṃ vadanti/ śophaśca kaṇḍūśca pulālikā† ca dhūmāyanaṃ caiva nakhāgradaṃśe// ### [5.8.87](https://indike.org/pramana/in.med.samhita.susruta.5.8.87) daṃśaṃ tu mūtreṇa sakṛṣṇamadhyaṃ saraktaparyanmavehi dīrṇam/ daṃṣṭrābhirugraṃ kaṭhinaṃ vivarṇaṃ jānīhi daṃśaṃ sthiramaṇḍalaṃ ca// ### [5.8.88](https://indike.org/pramana/in.med.samhita.susruta.5.8.88) rajaḥpurīṣendriyajaṃ hi viddhi sphoṭaṃ vipakvāmalapīlupāṇḍum/ etāvadetat samudāhṛtaṃ tu vakṣyāmi lūtāprabhavaṃ purāṇam// ### [5.8.89](https://indike.org/pramana/in.med.samhita.susruta.5.8.89) sāmānyato daṣṭamasādhyasādhyaṃ cikitsitaṃ cāpi yathāviśeṣam/ ### [5.8.90](https://indike.org/pramana/in.med.samhita.susruta.5.8.90) viśvāmitro nṛpavaraḥ kadācidṛṣisattamam/ vaśiṣṭhaṃ kopayāmāsa gatvā++āśramapadaṃ kila// ### [5.8.91](https://indike.org/pramana/in.med.samhita.susruta.5.8.91) kupitasya munestasya lalāṭāt svedabindavaḥ/ apatan darśanādeva †svestatsamatejasaḥ// ### [5.8.92](https://indike.org/pramana/in.med.samhita.susruta.5.8.92) tṛṇe maharṣiṇā lūne dhenvarthaṃ saṃbhṛte+api ca/ tato jātāstvimā ghorā nānārūpā mahāviṣāḥ/ apakārāya vartante nṛpasādhanavāhane// ### [5.8.93](https://indike.org/pramana/in.med.samhita.susruta.5.8.93) yasmāllūnaṃ tṛṇaṃ prāptā muneḥ prasvedabindavaḥ/ tasmāllūteti bhāṣyante saṅkhyayā tāśca ṣoḍaśa// ### [5.8.94](https://indike.org/pramana/in.med.samhita.susruta.5.8.94) kṛcchrasādhyāstathā+asādhyā lūtāstu dvividhāḥsmṛtāḥ/ tasmāmaṣṭau kṛcchrasādhyā varjyāstāvatya eva tu// ### [5.8.95](https://indike.org/pramana/in.med.samhita.susruta.5.8.95) trimaṇḍalā tathā śvetā kapilā pītikā tathā/ ālamūtraviṣā raktā kasanā cāṣṭamī smṛtā// ### [5.8.96](https://indike.org/pramana/in.med.samhita.susruta.5.8.96) tābhirdaṣṭe śiroduḥkhaṃ kaṇḍūrdaṃśe ca vedanā/ bhavanti ca viśeṣeṇa gadāḥ ślaiṣmikavātikāḥ// ### [5.8.97](https://indike.org/pramana/in.med.samhita.susruta.5.8.97) sauvarṇikā lājavarṇā jālinyeṇīpadī tathā/ kṛṣṇā+agnivarṇā kākāṇḍā mālāguṇā+aṣṭamī tathā// ### [5.8.98](https://indike.org/pramana/in.med.samhita.susruta.5.8.98) tābhirdaṣṭe daṃśakothaḥ pravṛttiḥ kṣatajasya ca/ jvaro dāho+astisāraśca gadāḥ syuśca tridoṣajāḥ// ### [5.8.99](https://indike.org/pramana/in.med.samhita.susruta.5.8.99) piḍakā vividhākārā maṇḍalāni mahānti ca/ mahānto mṛdavaḥ śophā raktāḥ śyāvāścalāstathā// ### [5.8.100](https://indike.org/pramana/in.med.samhita.susruta.5.8.100) sāmānyaṃ sarvalūtānāmetadādaṃśalakṣaṇam/ viśeṣalakṣaṇaṃ tāsāṃ vakṣyāmi sacikitsitam// ### [5.8.101](https://indike.org/pramana/in.med.samhita.susruta.5.8.101) trimaṇḍalāyā daṃśe+asṛk kṛṣṇaṃ sravati dīryate/ bādhiryaṃ kaluṣā dṛṣṭistathā dāhaśca netrayoḥ// ### [5.8.102](https://indike.org/pramana/in.med.samhita.susruta.5.8.102) tatrārkamūlaṃ rajanī nākulī pṛśniparṇikā/ pānakarmaṇi śasyante nasyālepāñjaneṣu ca// ### [5.8.103](https://indike.org/pramana/in.med.samhita.susruta.5.8.103) śvetāyāḥ piḍakā daṃśe śvetā kaṇḍūmatī bhavet/ dāhamūrcchājvaravatī visarpakledarukkarī// ### [5.8.104](https://indike.org/pramana/in.med.samhita.susruta.5.8.104) tatra candanarāsnailāhareṇunalavañjulāḥ/ kuṣṭhaṃ lāmajjakaṃ vakraṃ naladaṃ cāgado hitaḥ// ### [5.8.105](https://indike.org/pramana/in.med.samhita.susruta.5.8.105) ādaṃśe piḍakā tāmrā kapilāyāḥ sthirā bhavet/ śiraso gauravaṃ dāhastimiraṃ bhrama eva ca// ### [5.8.106](https://indike.org/pramana/in.med.samhita.susruta.5.8.106) tatra padmakakuṣṭhailākarañjakakubhatvacaḥ/ sthirārkaparṇyapāmārgadūrvābrāhmyo viṣāpahāḥ// ### [5.8.107](https://indike.org/pramana/in.med.samhita.susruta.5.8.107) ādaṃśe pītikāyāstu piḍakā pītikā sthirā/ bhavecchardirjvaraḥ śūlaṃ mūrdhni rakte tathā+akṣiṇī// ### [5.8.108](https://indike.org/pramana/in.med.samhita.susruta.5.8.108) tatreṣṭāḥ kuṭajośīratuṅgapadmakavañjulāḥ/ śirīṣakiṇihīśelukadambakakubhatvacaḥ// ### [5.8.109](https://indike.org/pramana/in.med.samhita.susruta.5.8.109) raktamaṇḍanibhe daṃśe piḍakāḥ sarṣapā iva/ jāyante tāluśoṣaśca dāhaścālaviṣārdite// ### [5.8.110](https://indike.org/pramana/in.med.samhita.susruta.5.8.110) tatra priyaṅguhrīberakuṣṭhalāmajjavañjulāḥ/ agadaḥ śatapuṣpā ca sapippalavaṭāṅkurāḥ// ### [5.8.111](https://indike.org/pramana/in.med.samhita.susruta.5.8.111) pūtirmūtraviṣādaṃśo visarpī kṛṣṇaśoṇitaḥ/ kāsaśvāsavamīmūrcchājvaradāhasamanvitaḥ// ### [5.8.112](https://indike.org/pramana/in.med.samhita.susruta.5.8.112) manaḥśilālamadhukakuṣṭhacandanapadmakaiḥ/ madhumiśraiḥ salāmajjairagadastatra kīrtitaḥ// ### [5.8.113](https://indike.org/pramana/in.med.samhita.susruta.5.8.113) āpāṇḍupiḍako daṃśo dāhakledasamanvitaḥ/ raktāyā raktaparyanto vijñeyo raktasaṃyutaḥ// ### [5.8.114](https://indike.org/pramana/in.med.samhita.susruta.5.8.114) kāryastatrāgadastoyacandanośīrapadmakaiḥ/ tathaivārjunaśelubhyāṃ tvagbhirāmrātakasya ca// ### [5.8.115](https://indike.org/pramana/in.med.samhita.susruta.5.8.115) picchilaṃ kasanādaṃśādrudhiraṃ śītalaṃ sravet/ kāsaśvāsau ca tatroktaṃ raktalūtāckitsitam// ### [5.8.116](https://indike.org/pramana/in.med.samhita.susruta.5.8.116) purīṣagandhiralpāsṛk kṛṣṇāyā daṃśa eva tu/ jvaramūrcchāvamīdāhakāsaśvāsasamanvitaḥ// ### [5.8.117](https://indike.org/pramana/in.med.samhita.susruta.5.8.117) tatrailāvakrasarpākṣīgandhanākulicandanaiḥ/ mahāsugandhisāhitaiḥ pratyākhyāyāgadaḥ smṛtaḥ// ### [5.8.118](https://indike.org/pramana/in.med.samhita.susruta.5.8.118) daṃśe dāho+agnivaktrāyāḥ srāvo+atyarthaṃ jvarastathā/ †coṣakaṇḍūromaharṣā dāhavisphoṭasaṃyutaḥ// ### [5.8.119](https://indike.org/pramana/in.med.samhita.susruta.5.8.119) kṛṣṇāpraśamanaṃ cātra pratyākhyāya prayojayet/ sārivośīrayaṣṭyāhvacandanotpalapadmakam// ### [5.8.120](https://indike.org/pramana/in.med.samhita.susruta.5.8.120) sarvāsāmeva yuñjīta viṣe śleṣmātakatvacam/ bhiṣak sarvaprakāreṇa tathā cākṣīvapippalam// ### [5.8.121](https://indike.org/pramana/in.med.samhita.susruta.5.8.121) kṛcchrasādhyaviṣā hyaṣṭau proktā dve ca yadṛcchayā/ avāryaviṣavīryāṇāṃ lakṣaṇāni nibodha me// ### [5.8.122](https://indike.org/pramana/in.med.samhita.susruta.5.8.122) dhyāmaḥ sauvarṇikādaṃśaḥ sapheno matsyagandhakaḥ/ śvāsaḥ kāso jvarastṛṣṇā mūrcchā cātra sudāruṇā// ### [5.8.123](https://indike.org/pramana/in.med.samhita.susruta.5.8.123) ādaṃśe lājavarṇāyā dhyāmaṃ pūti sravedasṛk/ dāho mūrcchā+atisāraśca †śiroduḥkhaṃ ca jāyate// ### [5.8.124](https://indike.org/pramana/in.med.samhita.susruta.5.8.124) ghoro daṃśastu jālinyā rājimānavakīryate/ stambhaḥ śvāsastamovṛddhistāluśoṣaśca jāyate// ### [5.8.125](https://indike.org/pramana/in.med.samhita.susruta.5.8.125) eṇīpadmāstathā daṃśo bhavet kṛṣṇatilākṛtiḥ/ †tṛṣṇāmūrcchājvaracchardikāsaśvāsasamanvitaḥ// ### [5.8.126](https://indike.org/pramana/in.med.samhita.susruta.5.8.126) daṃśaḥ kākāṇḍikādaṣṭe pāṇḍurakto+ativedanaḥ/ tṛṇmūrcchāśvāsahṛdrogahikkākāsāḥ syuruccritāḥ// ### [5.8.127](https://indike.org/pramana/in.med.samhita.susruta.5.8.127) rakto mālāguṇādaṃśo dhūmagandho+ativedanaḥ/ bahudhā ca viśīryeta dāhamūrcchājvarānvitaḥ// ### [5.8.128](https://indike.org/pramana/in.med.samhita.susruta.5.8.128) asādhyāsvapyabhihitaṃ pratyākhyāyāśu yojayet/ doṣocchrāyaviśeṣeṇa dāhacchedavivarjitam// ### [5.8.129](https://indike.org/pramana/in.med.samhita.susruta.5.8.129) sādhyābhirābhirlūtābhirdaṣṭamātrasya† dehinaḥ/ vṛddhipatreṇa matimān samyagādaṃśamuddharet// ### [5.8.130](https://indike.org/pramana/in.med.samhita.susruta.5.8.130) amarmaṇi vidhānajño varjitasya jvarādibhiḥ/ daṃśasyotkartanaṃ kuyādalpaśvayathukasya ca// ### [5.8.131](https://indike.org/pramana/in.med.samhita.susruta.5.8.131) madhusaindhavasaṃyuktairagadairlepayettataḥ/ priyaṅgurajanīkuṣṭhasamaṅgāmadhukaistathā// ### [5.8.132](https://indike.org/pramana/in.med.samhita.susruta.5.8.132) sārivāṃ madhukaṃ drākṣāṃ payasyāṃ kṣīramoraṭam/ vidārīgokṣurakṣaudramadhukaṃ pāyayeta vā// ### [5.8.133](https://indike.org/pramana/in.med.samhita.susruta.5.8.133) kṣīriṇāṃ tvakkaṣāyeṇa suśītena ca secayet/ upadravān yathādoṣaṃ viṣaghnaireva sādhayet// ### [5.8.134](https://indike.org/pramana/in.med.samhita.susruta.5.8.134) nasyāñjanābhyañjanapānadhūmaṃ tathā+avapīḍaṃ kavalagrahaṃ ca/ saṃśodhanaṃ cobhayataḥ pragāḍhaṃ kuryātsirāmokṣaṇameva cātra// ### [5.8.135](https://indike.org/pramana/in.med.samhita.susruta.5.8.135) kīṭadaṣṭavraṇān sarvānahidaṣṭavraṇānapi/ †ādāhapākāttān sarvāñcikitsedduṣṭavadbhiṣag// ### [5.8.136](https://indike.org/pramana/in.med.samhita.susruta.5.8.136) vinivṛtte tataḥ śophe karṇikāpātanaṃ hitam/ nimbapatraṃ trivṛddantī kusumbhaṃ kusumaṃ madhu// ### [5.8.137](https://indike.org/pramana/in.med.samhita.susruta.5.8.137) gugguluḥ saindhavaṃ kiṇvaṃ varcaḥ pārāvatasya ca/ viṣavṛddhikaraṃ cānnaṃ hitvā saṃbhojanaṃ hitam// ### [5.8.138](https://indike.org/pramana/in.med.samhita.susruta.5.8.138) viṣebhyaḥ khalu sarvebhyaḥ karṇikāmarujāṃ sthirām/ pracchayitvā madhūnmiśraiḥ śodhanīyairupācaret// ### [5.8.139](https://indike.org/pramana/in.med.samhita.susruta.5.8.139) saptaṣaṣṭhasya kīṭānāṃ śatasyaitadvibhāgaśaḥ/ daṣṭalakṣaṇamākhyātaṃ cikitsā cāpyanantaram// ### [5.8.140](https://indike.org/pramana/in.med.samhita.susruta.5.8.140) saviṃśamadhyāyaśatametaduktaṃ vibhāgaśaḥ/ ihoddiṣṭānanirdiṣṭānarthān vakṣyāmyathottare// ### [5.8.141](https://indike.org/pramana/in.med.samhita.susruta.5.8.141) sanātanatvādvedānāmakṣaratvāttathaiva ca/ tathā dṛṣṭaphalatvācca hitatvādapi dehinām// ### [5.8.142](https://indike.org/pramana/in.med.samhita.susruta.5.8.142) vāksamūhārthavistārāt pūjitatvācca dehibhiḥ/ cikitsitāt puṇyatamaṃ na kiṃcidapi śuśrumaḥ// ### [5.8.143](https://indike.org/pramana/in.med.samhita.susruta.5.8.143) ṛṣerindraprabhāvasyāmṛtayonerbhiṣagguroḥ/ dhārayitvā tu vimalaṃ mataṃ paramasaṃmatam/ uktāhārasamācāra iha pretya ca modate// ### [5.8.143\_1](https://indike.org/pramana/in.med.samhita.susruta.5.8.143_1) iti suśrutasaṃhitāyāṃ kalpasthāne kiṭakalpo nāmāṣṭamo+adhyāyaḥ//8// ### [5.8.143\_2](https://indike.org/pramana/in.med.samhita.susruta.5.8.143_2) iti bhagavatā śrīdhanvantariṇopadiṣṭāyāṃ tacchiṣyeṇa maharṣiṇā suśrutena viracitāyāṃ suśrutasaṃhitāyāṃ pañcamaṃ kalpasthānaṃ samāptam// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.131.32) — Ḍalhaṇa, Sanskrit ## Linked texts (3) - [Aṣṭāṅgasaṃgraha](https://indike.org/pramana/in.med.samhita.astangasamgraha.43.5) — Vāgbhaṭa, Sanskrit - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.24.51) — Sanskrit - [Aṣṭāṅgahṛdayasaṃhitā](https://indike.org/pramana/in.med.samhita.astangahrdaya.7536) — Vāgbhaṭa, Sanskrit --- Source: [https://indike.org/pramana/in.med.samhita.susruta.5.8](https://indike.org/pramana/in.med.samhita.susruta.5.8) · Pramāṇa