[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.18 # The Compendium of Suśruta 6.18: aṣṭādaśo+adhyāyaḥ/ Suśrutasaṃhitā 6.18 - **Language:** Sanskrit ### aṣṭādaśo+adhyāyaḥ/ ### [6.18.1](https://indike.org/pramana/in.med.samhita.susruta.6.18.1) athātaḥ kriyākalpaṃ vyākhyāsyāmaḥ// ### [6.18.2](https://indike.org/pramana/in.med.samhita.susruta.6.18.2) yathovāca bhagavān dhanvantariḥ// ### [6.18.3](https://indike.org/pramana/in.med.samhita.susruta.6.18.3) sarvaśāstrārthatattvajñastapodṛṣṭirudāradhīḥ†/ vaiśvāmitraṃ śaśāsātha śiṣyaṃ kāśipatirmuniḥ// ### [6.18.4](https://indike.org/pramana/in.med.samhita.susruta.6.18.4) tarpaṇaṃ puṭapākaśca seka āścyotanāñjane/ tatra tatropadiṣṭāni teṣāṃ vyāsaṃ nibodha me// ### [6.18.5](https://indike.org/pramana/in.med.samhita.susruta.6.18.5) saṃśuddhadehaśiraso jīrṇānnasya śubhe dine/ pūrvāhṇe vā+aparāhṇe vā kāryamakṣṇostu tarpaṇam// ### [6.18.6](https://indike.org/pramana/in.med.samhita.susruta.6.18.6) vātātaparajohīne veśmanyuttānaśāyinaḥ/ ādhārau māṣacūrṇena klinnena parimaṇḍalau// ### [6.18.7](https://indike.org/pramana/in.med.samhita.susruta.6.18.7) samau dṛḍhāvasaṃbādhau kartavyau netrakośayoḥ/ pūrayedghṛtamaṇḍasya vilīnasya sukhodake// ### [6.18.8](https://indike.org/pramana/in.med.samhita.susruta.6.18.8) āpakṣmāgrāttataḥ sthāpyaṃ pañca tadvākśatāni tu/ svasthe kaphe ṣaṭ pitte+aṣṭau daśa vāte taduttamam// ### [6.18.9](https://indike.org/pramana/in.med.samhita.susruta.6.18.9) rogasthānaviśeṣeṇa kecit kālaṃ pracakṣate/ yathākramopadiṣṭeṣu trīṇyekaṃ pañca sapta ca// ### [6.18.10](https://indike.org/pramana/in.med.samhita.susruta.6.18.10) daśa dṛṣṭyāmathāṣṭau ca vākśatāni vibhāvayet/ tataścāpāṅgataḥ snehaṃ srāvayitvā+akṣi śodhayet// ### [6.18.11](https://indike.org/pramana/in.med.samhita.susruta.6.18.11) svinnena yavapiṣṭena snehavīryeritaṃ tataḥ/ yathāsvaṃ dhūmapānena kaphamasya viśodhayet// ### [6.18.12](https://indike.org/pramana/in.med.samhita.susruta.6.18.12) ekāhaṃ vā tryahaṃ vā+api pañcāhaṃ ceṣyate param/ tarpaṇe tṛptiliṅgāni netrasyemāni lakṣayet// ### [6.18.13](https://indike.org/pramana/in.med.samhita.susruta.6.18.13) sukhasvapnāvabodhatvaṃ vaiśadyaṃ varṇapāṭavam/ nirvṛtirvyādhividhvaṃsaḥ kriyālāghavameva ca// ### [6.18.14](https://indike.org/pramana/in.med.samhita.susruta.6.18.14) gurvāvilamatisnigdhamaśrukaṇḍūpadehavat/ jñeyaṃ doṣasamutkliṣṭaṃ netramatyarthatarpitam// ### [6.18.15](https://indike.org/pramana/in.med.samhita.susruta.6.18.15) rūkṣamāvilamasrāḍhyamasahaṃ rūpadarśane/ vyādhivṛddhiśca tajjñeyaṃ hīnatarpitamakṣi ca// ### [6.18.16](https://indike.org/pramana/in.med.samhita.susruta.6.18.16) ajayordoṣabāhulyāt prayateta cikitsite/ dhūmanasyāñjanaiḥ sekai rūkṣaiḥ snigdhaiśca yogavit// ### [6.18.17](https://indike.org/pramana/in.med.samhita.susruta.6.18.17) tāmyatyativiśuṣkaṃ yadrūkṣaṃ yaccātidāruṇam/ śīrṇapakṣmāvilaṃ jihmaṃ rogakliṣṭaṃ ca yadbhṛśam// ### [6.18.18](https://indike.org/pramana/in.med.samhita.susruta.6.18.18) tadakṣi tarpaṇādeva labhetorjāmasaṃśayam/ durdinātyuṣṇaśīteṣu cintāyāsabhrameṣu ca// ### [6.18.19](https://indike.org/pramana/in.med.samhita.susruta.6.18.19) aśāntopadrave cākṣiṇa tarpaṇaṃ na praśasyate/ puṭapākastathaiteṣu nasyaṃ yeṣu ca garhitam// ### [6.18.20](https://indike.org/pramana/in.med.samhita.susruta.6.18.20) tarpaṇārhā na ye proktāḥ snehapānākṣamāśca ye/ tataḥ praśāntadoṣeṣu puṭapākakṣameṣu ca// ### [6.18.21](https://indike.org/pramana/in.med.samhita.susruta.6.18.21) puṭapākaḥ prayoktavyo netreṣu bhiṣajā bhavet/ snehano lekhanīyaśca ropaṇīyaśca sa tridhā// ### [6.18.22](https://indike.org/pramana/in.med.samhita.susruta.6.18.22) hitaḥ snigdho+atirūkṣasya snigdhasyāpi ca lekhanaḥ/ dṛṣṭerbalārthamaparaḥ pittāsṛgvraṇavātanut// ### [6.18.23](https://indike.org/pramana/in.med.samhita.susruta.6.18.23) snehamāṃsavasāmajjamedaḥsvādvauṣadhaiḥ kṛtaḥ/ snehataḥ puṭapākastu dhāryo dve vākśate tu saḥ// ### [6.18.24](https://indike.org/pramana/in.med.samhita.susruta.6.18.24) jāṅgalānāṃ yakṛnmāṃsairlekhanadravyasaṃbhṛtaiḥ/ kṛṣṇaloharajastāmraśaṅkhavidrumasindhujaiḥ// ### [6.18.25](https://indike.org/pramana/in.med.samhita.susruta.6.18.25) samudraphenakāsīsasrotojadadhimastubhiḥ/ lehano vākśataṃ tasya paraṃ dhāraṇamucyate// ### [6.18.26](https://indike.org/pramana/in.med.samhita.susruta.6.18.26) stanyajāṅgalamadhvājyatiktadravyavipācitaḥ/ lekhanāttriguṇaṃ dhāryaḥ puṭapākastu ropaṇaḥ// ### [6.18.27](https://indike.org/pramana/in.med.samhita.susruta.6.18.27) vitarettarpaṇoktaṃ tu dhūmaṃ hitvā tu ropaṇam/ snehasvedau dvayoḥ kāryau kāryo naiva ca ropaṇe// ### [6.18.28](https://indike.org/pramana/in.med.samhita.susruta.6.18.28) ekāhaṃ vā dvyahaṃ vā+api tryahaṃ vā+apyavacāraṇam/ yantraṇā tu kriyākālāddviguṇaṃ kālamiṣyate// ### [6.18.29](https://indike.org/pramana/in.med.samhita.susruta.6.18.29) tejāṃsyanilamākāśamādarśaṃ bhāsvarāṇi ca/ nekṣeta tarpite netre puṭapākakṛte tathā// ### [6.18.30](https://indike.org/pramana/in.med.samhita.susruta.6.18.30) mithyopacārādanayoryo vyādhirupajāyate/ añjanāścyotanasvedairyathāsvaṃ tamupācaret// ### [6.18.31](https://indike.org/pramana/in.med.samhita.susruta.6.18.31) prasannavarṇaṃ viśadaṃ vātātapasahaṃ laghu/ sukhasvapnāvabodhyakṣi puṭapākaguṇānvitam// ### [6.18.32](https://indike.org/pramana/in.med.samhita.susruta.6.18.32) atiyogādrujaḥ śophaḥ piḍakāstimirodgamaḥ/ pāko+aśru harṣaṇaṃ cāpi hīne doṣodgamastathā// ### [6.18.33](https://indike.org/pramana/in.med.samhita.susruta.6.18.33) ata ūrdhvaṃ pravakṣyāmi puṭapākaprasādhanam/ dvau bilvamātrau ślakṣṇasya piṇḍau māṃsasya peṣitau// ### [6.18.34](https://indike.org/pramana/in.med.samhita.susruta.6.18.34) dravyāṇāṃ bilvamātraṃ tu dravāṇāṃ kuḍavo mataḥ/ tadaikadhyaṃ samāloḍya patraiḥ supariveṣṭitam// ### [6.18.35](https://indike.org/pramana/in.med.samhita.susruta.6.18.35) (†kāśmarīkumudairaṇḍapadminīkadalībhavaiḥ/ ) mṛdāvaliptamaṅgāraiḥ khādirairavakūlayet// ### [6.18.36](https://indike.org/pramana/in.med.samhita.susruta.6.18.36) katakāśmantakairaṇḍapāṭalāvṛṣabādaraiḥ/ sakṣīradrumakāṣṭhairvā gomayairvā+api yuktitaḥ// ### [6.18.37](https://indike.org/pramana/in.med.samhita.susruta.6.18.37) svinnamuddhṛtya niṣpīḍya rasamādāya taṃ nṛṇām/ tarpaṇoktena vidhinā yathāvadavacārayet// ### [6.18.38](https://indike.org/pramana/in.med.samhita.susruta.6.18.38) kanīnake niṣecyaḥ syānnityamuttānaśāyinaḥ/ rakte pitte ca tau śītau koṣṇau vātakaphāpahau// ### [6.18.39](https://indike.org/pramana/in.med.samhita.susruta.6.18.39) atyuṣṇatīkṣṇau satataṃ dāhapākakarau smṛtau/ aplutau śītalau cāśrustambharuggharṣakārakau// ### [6.18.40](https://indike.org/pramana/in.med.samhita.susruta.6.18.40) atimātrau kaṣāyatvasaṅkocasphuraṇāvahau/ hīnapramāṇau doṣāṇāmutkleśajananau bhṛśam// ### [6.18.41](https://indike.org/pramana/in.med.samhita.susruta.6.18.41) yuktau kṛtau dāhaśopharuggharṣasrāvanāśanau/ kaṇḍūpadehadūṣīkāraktarājivināśanau// ### [6.18.42](https://indike.org/pramana/in.med.samhita.susruta.6.18.42) tasmāt pariharan doṣān vidadhyāttau sukhāvahau/ vyāpadaśca yathādoṣaṃ nasyadhūmāñjanairjayet// ### [6.18.43](https://indike.org/pramana/in.med.samhita.susruta.6.18.43) ādyantayoścāpyanayoḥ sveda uṣṇāmbucailikaḥ/ tathā hito+avasāne ca dhūmaḥ śleṣmasamucchritau// ### [6.18.44](https://indike.org/pramana/in.med.samhita.susruta.6.18.44) yathādoṣopayuktaṃ tu nātiprabalamojasā/ rogamāścyotanaṃ hanti sekastu balavattaram// ### [6.18.45](https://indike.org/pramana/in.med.samhita.susruta.6.18.45) tau tridhaivopayujyete rogeṣu puṭapākavat/ lekhane sapta cāṣṭau vā bindavaḥ snaihike daśa// ### [6.18.46](https://indike.org/pramana/in.med.samhita.susruta.6.18.46) āścyotane prayoktavyā dvādaśaiva tu ropaṇe/ sekasya dviguṇaḥ kālaḥ puṭapākāt paro mataḥ// ### [6.18.47](https://indike.org/pramana/in.med.samhita.susruta.6.18.47) athavā kāryanirvṛtterupayogo yathākramam/ pūrvāparāhṇe madhyāhne rujākāleṣu cobhayoḥ// ### [6.18.48](https://indike.org/pramana/in.med.samhita.susruta.6.18.48) yogāyogāt snehaseke tarpaṇoktān pracakṣate/ rogāñchirasi saṃbhūtān hatvā+atiprabalān guṇān// ### [6.18.49](https://indike.org/pramana/in.med.samhita.susruta.6.18.49) karoti śiraso bastiruktā ye mūrdhatailikāḥ/ śuddhadehasya sāyāhne yathāvyādhyaśitasya tu// ### [6.18.50](https://indike.org/pramana/in.med.samhita.susruta.6.18.50) ṛjvāsīnasya badhnīyādbastikośaṃ tato dṛḍham/ yathāvyādhiśṛtasnehapūrṇaṃ saṃyamya dhārayet// ### [6.18.51](https://indike.org/pramana/in.med.samhita.susruta.6.18.51) tarpaṇoktaṃ daśaguṇaṃ yathādoṣaṃ vidhānavit// vyaktarūpeṣu doṣeṣu śuddhakāyasya kevale// ### [6.18.52](https://indike.org/pramana/in.med.samhita.susruta.6.18.52) netra eva sthite doṣe prāptamañjanamācaret/ lekhanaṃ ropaṇaṃ cāpi prasādanamathāpi vā// ### [6.18.53](https://indike.org/pramana/in.med.samhita.susruta.6.18.53) tatra pañca rasān vyastānādyaikarasavarjitān/ pañcadhā lekhanaṃ yuñjyādyathādoṣamatandritaḥ// ### [6.18.54](https://indike.org/pramana/in.med.samhita.susruta.6.18.54) netravartmasirākośasrotaḥśṛṅgāṭakāśritam/ mukhanāsākṣibhirdoṣamojasā srāvayettu tat// ### [6.18.55](https://indike.org/pramana/in.med.samhita.susruta.6.18.55) kaṣāyaṃ tiktakaṃ vā+api sasnehaṃ ropaṇaṃ matam/ †tatsnehaśaityādvarṇyaṃ syāddṛṣṭeśca balavardhanam// ### [6.18.56](https://indike.org/pramana/in.med.samhita.susruta.6.18.56) madhuraṃ snehasaṃpannamañjanaṃ tu prasādanam/ dṛṣṭidoṣaprasādārthaṃ snehanārthaṃ ca taddhitam// ### [6.18.57](https://indike.org/pramana/in.med.samhita.susruta.6.18.57) yathādoṣaṃ prayojyāni tāni rogaviśāradaiḥ/ añjanāni yathoktāni prāhṇasāyāhnarātriṣu// ### [6.18.58](https://indike.org/pramana/in.med.samhita.susruta.6.18.58) guṭikārasacūrṇāni trividhānyañjanāni tu/ yathāpūrvaṃ balaṃ teṣāṃ śreṣṭhamāhurmanīṣiṇaḥ// ### [6.18.59](https://indike.org/pramana/in.med.samhita.susruta.6.18.59) hareṇumātrā vartiḥ syāllekhanasya pramāṇataḥ/ prasādanasya cādhyardhā dviguṇā ropaṇasya ca// ### [6.18.60](https://indike.org/pramana/in.med.samhita.susruta.6.18.60) rasāñjanasya mātrā tu †yathāvartimitā matā/ dvitricatuḥśalākāśca cūrṇasyāpyanupūrvaśaḥ// ### [6.18.61](https://indike.org/pramana/in.med.samhita.susruta.6.18.61) teṣāṃ tulyaguṇānyeva vidadhyādbhājanānyapi/ sauvarṇaṃ rājataṃ śārṅgaṃ tāmraṃ vaidūryakāṃsyajam// ### [6.18.62](https://indike.org/pramana/in.med.samhita.susruta.6.18.62) āyasāni ca yojyāni śalākāśca yathākramam/ vaktrayormukulākārā kalāyaparimaṇḍalā// ### [6.18.63](https://indike.org/pramana/in.med.samhita.susruta.6.18.63) aṣṭāṅgulā tanurmadhye sukṛtā sādhunigrahā/ audumbaryaśmajā vā+api śārīrī vā hitā bhavet// ### [6.18.64](https://indike.org/pramana/in.med.samhita.susruta.6.18.64) vāmenākṣi vinirbhujya hastena susamāhitaḥ/ śalākayā dakṣiṇena kṣipet kānīnamañjanam// ### [6.18.65](https://indike.org/pramana/in.med.samhita.susruta.6.18.65) āpāṅgyaṃ vā yathāyogaṃ kuryāccāpi gatāgatam/ vartmopalepi vā yattadaṅgulyaiva prayojayet// ### [6.18.66](https://indike.org/pramana/in.med.samhita.susruta.6.18.66) akṣi nāsyantayorañjyādbādhamāno+api vā bhiṣak/ na cānirvāntadoṣe+akṣṇi dhāvanaṃ saṃprayojayet// ### [6.18.67](https://indike.org/pramana/in.med.samhita.susruta.6.18.67) doṣaḥ pratinivṛttaḥ san hanyād dṛṣṭerbalaṃ tathā/ gatadoṣamapetāśru paśyedyat samyagambhasā// ### [6.18.68](https://indike.org/pramana/in.med.samhita.susruta.6.18.68) prakṣālyākṣi yathādoṣaṃ kāryaṃ pratyañjanaṃ tataḥ/ śramodāvartaruditamadyakrodhabhayajvaraiḥ// ### [6.18.69](https://indike.org/pramana/in.med.samhita.susruta.6.18.69) vegāghātaśirodoṣaiścārtānāṃ neṣyate+añjanam/ rāgaruktimirāsrāvaśūlasaṃrambhasaṃbhavāt// ### [6.18.70](https://indike.org/pramana/in.med.samhita.susruta.6.18.70) nidrākṣaye kriyāśaktiṃ pravāte dṛgbalakṣayam/ rajodhūmahate rāgasrāvādhīmanthasaṃbhavam// ### [6.18.71](https://indike.org/pramana/in.med.samhita.susruta.6.18.71) saṃrambhaśūlau nasyānte śiroruji śirorujam/ śiraḥsnāte+atiśīte ca ravāvanudite+api ca// ### [6.18.72](https://indike.org/pramana/in.med.samhita.susruta.6.18.72) doṣasthairyādapārthaṃ syāddoṣotkleśaṃ karoti ca/ ajīrṇe+apyevameva syāt srotomārgāvarodhanāt// ### [6.18.73](https://indike.org/pramana/in.med.samhita.susruta.6.18.73) doṣavegodaye dattaṃ kuryāttāṃstānupadravān/ tasmāt pariharan doṣānañjanaṃ sādhu yojayet// ### [6.18.74](https://indike.org/pramana/in.med.samhita.susruta.6.18.74) lekhanasya viśeṣeṇa kāla eṣa prakīrtitaḥ/ vyāpadaśca jayedetāḥ sekāścyotanalepanaiḥ// ### [6.18.75](https://indike.org/pramana/in.med.samhita.susruta.6.18.75) yathāsvaṃ dhūmakavalairnasyaiścāpi samutthitāḥ/ viśadaṃ laghvanāsrāvi kriyāpaṭu sunirmalam// ### [6.18.76](https://indike.org/pramana/in.med.samhita.susruta.6.18.76) saṃśāntopadravaṃ netraṃ viriktaṃ samyagādiśet/ jihmaṃ dāruṇadurvarṇaṃ srastaṃ rūkṣamatīva ca// ### [6.18.77](https://indike.org/pramana/in.med.samhita.susruta.6.18.77) netraṃ virekātiyoge syandate cātimātraśaḥ/ tatra saṃtarpaṇaṃ kāryaṃ vidhānaṃ cānilāpaham// ### [6.18.78](https://indike.org/pramana/in.med.samhita.susruta.6.18.78) akṣi mandaviriktaṃ syādudagrataradoṣavat/ dhūmanasyāñjanaistatra hitaṃ doṣāvasecanam// ### [6.18.79](https://indike.org/pramana/in.med.samhita.susruta.6.18.79) snehavarṇabalopetaṃ prasannaṃ doṣavarjitam/ jñeyaṃ prasādane samyagupayukte+akṣi nirvṛtam// ### [6.18.80](https://indike.org/pramana/in.med.samhita.susruta.6.18.80) kiñciddhīnavikāraṃ syāttarpaṇāddhi kṛtādati/ tatra doṣaharaṃ rūkṣaṃ bheṣajaṃ śasyate mṛdu// ### [6.18.81](https://indike.org/pramana/in.med.samhita.susruta.6.18.81) sādhāraṇamapi jñeyamevaṃ ropaṇalakṣaṇam/ prasādanavadācaṣṭe tasmin yukte+atibheṣajam// ### [6.18.82](https://indike.org/pramana/in.med.samhita.susruta.6.18.82) snehanaṃ ropaṇaṃ vā+api hīnayuktamapārthakam/ kartavyaṃ mātrayā tasmādañjanaṃ siddhimicchatā// ### [6.18.83](https://indike.org/pramana/in.med.samhita.susruta.6.18.83) puṭapākakriyādyāsu kriyāsveṣaiva(kriyāsvekaiva) kalpanā/ sahasraśaścāñjaneṣu bījenoktena pūjitāḥ// ### [6.18.84](https://indike.org/pramana/in.med.samhita.susruta.6.18.84) dṛṣṭerbalavivṛddhyarthaṃ yāpyarogakṣayāya ca/ rājārhānyañjanāgryāṇi nibodhemānyataḥ param// ### [6.18.85](https://indike.org/pramana/in.med.samhita.susruta.6.18.85) aṣṭau bhāgānañjanasya nīlotpalasamatviṣaḥ/ auḍumbaraṃ śātakumbhaṃ rājataṃ ca samāsataḥ// ### [6.18.86](https://indike.org/pramana/in.med.samhita.susruta.6.18.86) ekādaśaitān bhāgāṃstu yojayet kuśalo bhiṣak/ mūṣākṣiptaṃ tadādhmātamāvṛtaṃ jātavedasi// ### [6.18.87](https://indike.org/pramana/in.med.samhita.susruta.6.18.87) khadirāśmantakāṅgarairgośakṛdbhirathāpi vā/ gavāṃ śakṛdrase mūtre dadhni sarpiṣi mākṣike// ### [6.18.88](https://indike.org/pramana/in.med.samhita.susruta.6.18.88) tailamadyavasāmajjasarvagandhodakeṣu ca/ drākṣārasekṣutriphalāraseṣu suhimeṣu ca// ### [6.18.89](https://indike.org/pramana/in.med.samhita.susruta.6.18.89) sārivādikaṣāye ca kaṣāye cotpalādike/ niṣecayet pṛthak cainaṃ dhmātaṃ dhmātaṃ punaḥ punaḥ// ### [6.18.90](https://indike.org/pramana/in.med.samhita.susruta.6.18.90) tato+antarīkṣe saptāhaṃ plotabaddhaṃ sthitaṃ jale/ viśoṣya cūrṇayenmuktāṃ sphaṭikaṃ vidrumaṃ tathā// ### [6.18.91](https://indike.org/pramana/in.med.samhita.susruta.6.18.91) kālānusārivāṃ cāpi śucirāvāpya yogataḥ/ etaccūrṇāñjanaṃ śreṣṭhaṃ nihitaṃ bhājane śubhe// ### [6.18.92](https://indike.org/pramana/in.med.samhita.susruta.6.18.92) dantasphaṭikavaidūryaśaṅkhaśailāsanodbhave/ śātakumbhe+atha śārṅge vā rājate vā susaṃskṛte/ sahasrapākavat pūjāṃ kṛtvā rājñaḥ prayojayet// ### [6.18.93](https://indike.org/pramana/in.med.samhita.susruta.6.18.93) tenāñjitākṣo nṛpatirbhavet sarvajanapriyaḥ/ adhṛṣyaḥ sarvabhūtānāṃ dṛṣṭirogavivarjitaḥ// ### [6.18.94](https://indike.org/pramana/in.med.samhita.susruta.6.18.94) kuṣṭhaṃ candanamelāśca patraṃ madhukamañjanam/ meṣaśṛṅgasya puṣpāṇi vakraṃ ratnāpi sapta ca// ### [6.18.95](https://indike.org/pramana/in.med.samhita.susruta.6.18.95) utpalasya bṛhatyośca padmasyāpi ca keśaram/ nāgapuṣpamuśīrāṇi pippalī tutthamuttamam// ### [6.18.96](https://indike.org/pramana/in.med.samhita.susruta.6.18.96) kukkuṭāṇḍakapālāni dārvīṃ pathyāṃ sarocanām/ maricānyakṣamajjānaṃ tulyāṃ ca gṛhagopikām// ### [6.18.97](https://indike.org/pramana/in.med.samhita.susruta.6.18.97) kṛtvā sūkṣmaṃ tataścūrṇaṃ nyasedabhyarcya pūrvavat/ etadbhadrodayaṃ nāma sadaivārhati bhūmipaḥ// ### [6.18.98](https://indike.org/pramana/in.med.samhita.susruta.6.18.98) vakraṃ samaricaṃ caiva māṃsīṃ śaileyameva ca/ tulyāṃśāni samānaistaiḥ samagraiśca manaḥśilā// ### [6.18.99](https://indike.org/pramana/in.med.samhita.susruta.6.18.99) patrasya bhāgāścatvāro dviguṇaṃ sarvato+añjanam/ tāvacca yaṣṭīmadhukaṃ pūrvavaccaitadañjanam// ### [6.18.100](https://indike.org/pramana/in.med.samhita.susruta.6.18.100) manaḥśilāṃ devakāṣṭhaṃ rajanyau triphaloṣaṇam/ lākṣālaśunamañjiṣṭhāsaindhavailāḥ samākṣikāḥ// ### [6.18.101](https://indike.org/pramana/in.med.samhita.susruta.6.18.101) rodhraṃ sāvarakaṃ cūrṇamāyasaṃ tāmrameva ca/ kālānusārivāṃ caiva kukkuṭāṇḍadalāni ca// ### [6.18.102](https://indike.org/pramana/in.med.samhita.susruta.6.18.102) tulyāni payasā piṣṭvā guṭikāṃ kārayedbudhaḥ/ kaṇḍūtimiraśuklārmaraktarājyupaśāntaye// ### [6.18.103](https://indike.org/pramana/in.med.samhita.susruta.6.18.103) kāṃsyāpamārjanamasī madhukaṃ saindhavaṃ tathā/ eraṇḍamūlaṃ ca samaṃ bṛhatyaṃśadvayānvitam// ### [6.18.104](https://indike.org/pramana/in.med.samhita.susruta.6.18.104) ājena payasā piṣṭvā tāmrapātraṃ pralepayet/ saptakṛtvastu tā vartyaśchāyāśuṣkā rujāpahāḥ// ### [6.18.105](https://indike.org/pramana/in.med.samhita.susruta.6.18.105) pathyātutthakayaṣṭyāhvaistulyairmaricaṣoḍaśā/ pathyā sarvavikāreṣu vartiḥ śītāmbupeṣitā// ### [6.18.106](https://indike.org/pramana/in.med.samhita.susruta.6.18.106) rasakriyāvidhānena yathoktavidhikovidaḥ/ piṇḍāñjanāni kurvīta yathāyogamatandritaḥ// ### [6.18.106\_1](https://indike.org/pramana/in.med.samhita.susruta.6.18.106_1) iti suśrutasaṃhitāyāmuttaratantrāntargate śālākyatantre kriyākalpo nāmāṣṭadaśo+adhyāyaḥ //18// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.150.3) — Ḍalhaṇa, Sanskrit ## Linked texts (2) - [Śārṅgadharasaṃhitā](https://indike.org/pramana/in.med.sangraha.sarngadharasamhita.3.43.42) — Śārṅgadhara (physician), Sanskrit - [Pathyāpathyaviniścaya (Viśvanātha)](https://indike.org/pramana/in.med.pathya.pathyapathyaviniscaya.3.37) — Viśvanātha, Sanskrit --- Source: [https://indike.org/pramana/in.med.samhita.susruta.6.18](https://indike.org/pramana/in.med.samhita.susruta.6.18) · Pramāṇa