[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.1 # The Compendium of Suśruta 6.1: prathamo+adhyāyaḥ/ Suśrutasaṃhitā 6.1 - **Language:** Sanskrit ### prathamo+adhyāyaḥ/ ### [6.1.1](https://indike.org/pramana/in.med.samhita.susruta.6.1.1) athāta aupadravikamadhyāyaṃ vyākhyāsyāmaḥ// ### [6.1.2](https://indike.org/pramana/in.med.samhita.susruta.6.1.2) yathovāca bhagavān dhanvantariḥ// ### [6.1.3](https://indike.org/pramana/in.med.samhita.susruta.6.1.3) adhyāyānāṃ śate viṃśe yaduktamasakṛnmayā/ vakṣyāmi bahudhā samyaguttare+arthānimāniti// ### [6.1.4](https://indike.org/pramana/in.med.samhita.susruta.6.1.4) idānīṃ tat pravakṣyāmi tantramuttaramuttamam/ nikhilenopadiśyante yatra rogāḥ pṛthagvidhāḥ// ### [6.1.5](https://indike.org/pramana/in.med.samhita.susruta.6.1.5) śālākyatantrābhihitā videhādhipakīrtitāḥ/ ye ca vistarato dṛṣṭāḥ kumārābādhahetavaḥ// ### [6.1.6](https://indike.org/pramana/in.med.samhita.susruta.6.1.6) ṣaṭsu kāyacikitsāsu ye coktāḥ paramarṣibhiḥ/ upasargādayo rogā ye cāpyāgantavaḥ smṛtāḥ// ### [6.1.7](https://indike.org/pramana/in.med.samhita.susruta.6.1.7) triṣaṣṭī rasasaṃsargāḥ svasthavṛttaṃ tathaiva ca/ yuktārthā yuktayaścaiva doṣabhedāstathaiva ca// ### [6.1.8](https://indike.org/pramana/in.med.samhita.susruta.6.1.8) yatroktā vividhā arthā rogasādhanahetavaḥ/ mahatastasya tantrasya durgādhasyāmbudheriva// ### [6.1.9](https://indike.org/pramana/in.med.samhita.susruta.6.1.9) ādāvevottamāṅgasthān rogānabhidadhāmyaham/ saṅkhyayā lakṣaṇaiścāpi sādhyāsādhyakrameṇa ca// ### [6.1.10](https://indike.org/pramana/in.med.samhita.susruta.6.1.10) vidyāddvayaṅgulabāhulyaṃ svāṅguṣṭhodarasaṃmitam/ dvyaṅgulaṃ sarvataḥ sārdhaṃ bhiṣaṅnayanabudbudam// ### [6.1.11](https://indike.org/pramana/in.med.samhita.susruta.6.1.11) suvṛttaṃ gostanākāraṃ sarvabhūtaguṇodbhavam/ palaṃ bhuvo+agnito raktaṃ vātāt kṛṣṇaṃ sitaṃ jalāt// ### [6.1.12](https://indike.org/pramana/in.med.samhita.susruta.6.1.12) ākāśādaśrumārgāśca jāyante netrabudbude/ dṛṣṭiṃ cātra tathā vakṣye yathā brūyādviśāradaḥ// ### [6.1.13](https://indike.org/pramana/in.med.samhita.susruta.6.1.13) netrāyāmatribhāgaṃ tu kṛṣṇamaṇḍalamucyate/ kṛṣṇāt saptamamicchanti dṛṣṭiṃ dṛṣṭiviśāradāḥ// ### [6.1.14](https://indike.org/pramana/in.med.samhita.susruta.6.1.14) maṇḍalāni ca sandhīṃśca paṭalāni ca locane/ yathākramaṃ vijānīyāt pañca ṣaṭ ca ṣaḍeva ca// ### [6.1.15](https://indike.org/pramana/in.med.samhita.susruta.6.1.15) pakṣmavartmaśvetakṛṣṇadṛṣṭīnāṃ maṇḍalāni tu/ anupūrvaṃ tu te madhyāścatvāro+antyā yathottaram// ### [6.1.16](https://indike.org/pramana/in.med.samhita.susruta.6.1.16) pakṣmavartmagataḥ sandhirvartmaśuklagato+aparaḥ/ śuklakṛṣṇagatastvanyaḥ kṛṣṇadṛṣṭigato+aparaḥ/ tataḥ kanīnakagataḥ ṣaṣṭhaścāpāṅgagaḥ smṛtaḥ// ### [6.1.17](https://indike.org/pramana/in.med.samhita.susruta.6.1.17) dve vartmapaṭale vidyāccatvāryanyāni cākṣiṇi/ jāyate timiraṃ yeṣu vyādhiḥ paramadāruṇaḥ// ### [6.1.18](https://indike.org/pramana/in.med.samhita.susruta.6.1.18) tejojalāśritaṃ bāhyaṃ teṣvanyat piśitāśritam/ medastṛtīyaṃ paṭalamāśritaṃ tvasthi cāparam// ### [6.1.19](https://indike.org/pramana/in.med.samhita.susruta.6.1.19) pañcamāṃśasamaṃ dṛṣṭesteṣāṃ bāhulpamiṣyate/ sirāṇāṃ kaṇḍarāṇāṃ ca medasaḥ kālakasya ca// ### [6.1.20](https://indike.org/pramana/in.med.samhita.susruta.6.1.20) guṇāḥ kālāt paraḥ śleṣmā bandhane+akṣṇoḥ sirāyutaḥ/ sirānusāribhirdoṣairviguṇairūrdhvamāgataiḥ// ### [6.1.21](https://indike.org/pramana/in.med.samhita.susruta.6.1.21) jāyante netrabhāgeṣu rogāḥ paramadāruṇāḥ/ tatrāvilaṃ sasaṃrambhamaśrukaṇḍūpadehavat†// ### [6.1.22](https://indike.org/pramana/in.med.samhita.susruta.6.1.22) gurūṣātodarāgādyairjuṣṭaṃ cāvyaktalakṣaṇaiḥ/ saśūlaṃ vartmakoṣeṣu śūkapūrṇābhameva ca// ### [6.1.23](https://indike.org/pramana/in.med.samhita.susruta.6.1.23) vihanyamānaṃ rūpe vā kriyāsvakṣi yathā purā/ dṛṣṭvaiva dhīmān budhyeta doṣeṇādhiṣṭhitaṃ tu tat// ### [6.1.24](https://indike.org/pramana/in.med.samhita.susruta.6.1.24) tatra saṃbhavamāsādya yathādoṣaṃ bhiṣagjitam/ vidadhyānnetrajā rogā balavantaḥ syuranyathā// ### [6.1.25](https://indike.org/pramana/in.med.samhita.susruta.6.1.25) saṅkṣepataḥ kriyāyogo nidānaparivarjanam/ vātādīnāṃ pratīghātaḥ prokto vistarataḥ punaḥ// ### [6.1.26](https://indike.org/pramana/in.med.samhita.susruta.6.1.26) uṣṇābhitaptasya jalapraveśāddūrekṣaṇāt svapnaviparyayācca/ prasaktasaṃrodanakopaśokakleśābhighātādatimaithunācca// ### [6.1.27](https://indike.org/pramana/in.med.samhita.susruta.6.1.27) śuktāranālāmlakulatthamāṣaniṣevaṇādvegavinigrahācca/ svedādatho dhūmaniṣevaṇācca chardervighātādvamanātiyogāt/ bāṣpagrahāt sūkṣmanirīkṣaṇācca netre vikārān janayanti doṣāḥ// ### [6.1.28](https://indike.org/pramana/in.med.samhita.susruta.6.1.28) vātāddaśa tathā pittāt kaphāccaiva trayodaśa/ raktāt ṣoḍaśa vijñeyāḥ sarvajāḥ pañcaviṃśatiḥ// ### [6.1.29](https://indike.org/pramana/in.med.samhita.susruta.6.1.29) tathā bāhyau punardvau ca rogāḥ ṣaṭsaptatiḥ smṛtāḥ/ hatādhimantho nimiṣo dṛṣṭirgambhīrikā ca yā// ### [6.1.30](https://indike.org/pramana/in.med.samhita.susruta.6.1.30) yacca vātahataṃ vartma na te sidhyanti vātajāḥ/ yāpyo+atha tanmayaḥ kācaḥ sādhyāḥ syuḥsānyamārutāḥ// ### [6.1.31](https://indike.org/pramana/in.med.samhita.susruta.6.1.31) śuṣkākṣipākādhīmanthasyandamārutapryayāḥ/ asādhyo hrasvajāḍyo yo jalasrāvaśca paittikaḥ// ### [6.1.32](https://indike.org/pramana/in.med.samhita.susruta.6.1.32) parimlāyī ca nīlaśca yāpyaḥ kāco+atha tanmayaḥ/ abhiṣyando+adhimantho+amlādhyuṣitaṃ śuktikā ca yā// ### [6.1.33](https://indike.org/pramana/in.med.samhita.susruta.6.1.33) dṛṣṭiḥ pittavidagdhā ca dhūmadarśī ca sidhyati/ asādhyaḥ kaphajaḥ srāvo yāpyaḥ kācaśca tanmayaḥ// ### [6.1.34](https://indike.org/pramana/in.med.samhita.susruta.6.1.34) abhiṣyando+adhimanthaśca balāsagrathitaṃ ca yat/ dṛṣṭiḥ śleṣmavidagdhā ca pothakyo lagaṇaśca yaḥ// ### [6.1.35](https://indike.org/pramana/in.med.samhita.susruta.6.1.35) †krimigranthipariklinnavartmaśuklārmapiṣṭakāḥ/ śleṣmopanāhaḥ sādhyāstu kathitāḥ śleṣmajeṣu tu// ### [6.1.36](https://indike.org/pramana/in.med.samhita.susruta.6.1.36) raktasrāvo+ajakājātaṃ śoṇitārśovraṇānvitam†/ śukraṃ na sādhyaṃ kācaśca yāpyastajjaḥ prakīrtitaḥ// ### [6.1.37](https://indike.org/pramana/in.med.samhita.susruta.6.1.37) manthasyandau †kliṣṭavartma harṣotpātau tathaiva ca/ sirājātā+añjanākhyā ca sirājālaṃ ca yat smṛtam// ### [6.1.38](https://indike.org/pramana/in.med.samhita.susruta.6.1.38) parvaṇyathāvraṇaṃ śukraṃ śoṇitārmārjunaśca yaḥ/ ete sādhyā vikāreṣu raktajeṣu bhavanti hi// ### [6.1.39](https://indike.org/pramana/in.med.samhita.susruta.6.1.39) pūyāsrāvo nākulāndhyamakṣipākātyayo+alajī/ asādhyāḥ sarvajā yāpyaḥ kācaḥ kopaśca pakṣmaṇaḥ// ### [6.1.40](https://indike.org/pramana/in.med.samhita.susruta.6.1.40) vartmāvabandho yo vyādhiḥ sirāsu piḍakā ca yā/ prastāryarmādhimāṃsārma snāyvarmotsaṅginī ca yā// ### [6.1.41](https://indike.org/pramana/in.med.samhita.susruta.6.1.41) pūyālasaścārbudaṃ ca śyāvakardamavartmanī/ tathā+arśovartma śuṣkārśaḥ śarkarāvartma yacca vai// ### [6.1.42](https://indike.org/pramana/in.med.samhita.susruta.6.1.42) saśophaścāpyaśophaśca pāko bahalavartma ca/ aklinnavartma kumbhīkā bisavartma ca sidhyati// ### [6.1.43](https://indike.org/pramana/in.med.samhita.susruta.6.1.43) sanimitto+animittaśca dvāvasādhyau tu bāhyajau/ ṣaṭsaptatirvikārāṇāmeṣā saṃgrahakīrtitā†// ### [6.1.44](https://indike.org/pramana/in.med.samhita.susruta.6.1.44) nava sandhyāśrayāsteṣu vartmajāstvekaviṃśatiḥ/ śuklabhāge daśaikaśca catvāraḥ kṛṣṇabhāgajāḥ// ### [6.1.45](https://indike.org/pramana/in.med.samhita.susruta.6.1.45) sarvāśrayāḥ saptadaśa dṛṣṭijā dvādaśaiva tu/ bāhyajau dvau samākhyātau rogau paramadāruṇau/ bhūya etān pravakṣyāmi saṅkhyārūpacikitsitaiḥ// ### [6.1.45\_1](https://indike.org/pramana/in.med.samhita.susruta.6.1.45_1) iti suśrutasaṃhitāyāmuttaratantrāntargate śālākyatantre aupadraviko nāma prathamo+adhyāyaḥ //1// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.133.2) — Ḍalhaṇa, Sanskrit ## Linked texts (1) - [Vaidyakasāroddhāra](https://indike.org/pramana/in.med.cikitsa.gauda.vaidyakasaroddhara.1.p74) — Brajanāthaśarman, Sanskrit --- Source: [https://indike.org/pramana/in.med.samhita.susruta.6.1](https://indike.org/pramana/in.med.samhita.susruta.6.1) · Pramāṇa