[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.21 # The Compendium of Suśruta 6.21: ekoviṃśatitamo+adhyāyaḥ/ Suśrutasaṃhitā 6.21 - **Language:** Sanskrit ### ekoviṃśatitamo+adhyāyaḥ/ ### [6.21.1](https://indike.org/pramana/in.med.samhita.susruta.6.21.1) athātaḥ karṇagatarogapratiṣedhaṃ vyākhyāsyāmaḥ// ### [6.21.2](https://indike.org/pramana/in.med.samhita.susruta.6.21.2) yathovāca bhagavān dhanvantariḥ// ### [6.21.3](https://indike.org/pramana/in.med.samhita.susruta.6.21.3) sāmānyaṃ karṇarodheṣu ghṛtapānaṃ rasāyanam/ avyāyāmo+aśiraḥsnānaṃ brahmacaryamakatthanam// ### [6.21.4](https://indike.org/pramana/in.med.samhita.susruta.6.21.4) karṇaśūle praṇāde ca bādhiryakṣveḍayorapi/ caturṇāmapi rogāṇāṃ sāmānyaṃ bheṣajaṃ viduḥ// ### [6.21.5](https://indike.org/pramana/in.med.samhita.susruta.6.21.5) snigdhaṃ vātaharaiḥ svedairnaraṃ snehavirecitam/ nāḍīsvedairupacaretpiṇḍasvedaistathaiva ca// ### [6.21.6](https://indike.org/pramana/in.med.samhita.susruta.6.21.6) bilvairaṇḍārkavarṣābhūdadhitthonmattaśigrubhiḥ/ bastagandhāśvagandhābhyāṃ tarkārīyavaveṇubhiḥ// ### [6.21.7](https://indike.org/pramana/in.med.samhita.susruta.6.21.7) āranālaśṛtairebhirnāḍīsvedaḥ prayojitaḥ/ kaphavātasamutthānaṃ karṇaśūlaṃ nirasyati// ### [6.21.8](https://indike.org/pramana/in.med.samhita.susruta.6.21.8) mīnakukkuṭalāvānāṃ māṃsajaiḥ payasā+api vā/ piṇḍaiḥ svedaṃ ca kurvīta karṇaśūlanivāraṇam// ### [6.21.9](https://indike.org/pramana/in.med.samhita.susruta.6.21.9) aśvatthapatrakhallaṃ vā vidhāya bahupatrakam/ tadaṅgāraiḥ susaṃpūrṇaṃ nidadhyāchravaṇopari// ### [6.21.10](https://indike.org/pramana/in.med.samhita.susruta.6.21.10) yattailaṃ cyavate tasmāt khallādaṅgāratāpitāt/ tat prāptaṃ śravaṇasrotaḥ sadyo gṛhṇāti vedanām// ### [6.21.11](https://indike.org/pramana/in.med.samhita.susruta.6.21.11) kṣaumaguggulvagurubhiḥ saghṛtairdhūpayecca tam/ bhaktopari hitaṃ sarpirbastikarma ca pūjitam// ### [6.21.12](https://indike.org/pramana/in.med.samhita.susruta.6.21.12) niranno niśi tatsarpiḥ pītvopari pibet payaḥ/ mūrdhvastiṣu nasye ca mastiṣke pariṣecane// ### [6.21.13](https://indike.org/pramana/in.med.samhita.susruta.6.21.13) śatapākaṃ balātailaṃ praśastaṃ cāpi bhojane/ kaṇṭakārīmajākṣīre paktvā kṣīreṇa tena ca// ### [6.21.14](https://indike.org/pramana/in.med.samhita.susruta.6.21.14) vipacet kukkuṭavasāṃ karṇayostatprapūraṇam/ taṇḍulīyakamūlāni phalamaṅkolajaṃ tathā// ### [6.21.15](https://indike.org/pramana/in.med.samhita.susruta.6.21.15) ahiṃsākendukānmūlaṃ saralaṃ devadāru ca/ laśunaṃ śṛṅgaveraṃ ca tathā vaṃśāvalekhanam// ### [6.21.16](https://indike.org/pramana/in.med.samhita.susruta.6.21.16) kalkaireṣāṃ tathā+amlaiśca pacet snehaṃ caturvidham/ vedanāyāḥ praśāntyarthaṃ hitaṃ tatkarṇapūraṇam// ### [6.21.17](https://indike.org/pramana/in.med.samhita.susruta.6.21.17) laśunārdrakaśigrūṇāṃ muraṅgyā mūlakasya ca/ kadalyāḥ svarasaḥ śreṣṭhaḥ kaduṣṇaḥ karṇapūraṇe// ### [6.21.18](https://indike.org/pramana/in.med.samhita.susruta.6.21.18) śṛṅgaverarasaḥ kṣaudraṃ saindhavaṃ tailameva ca/ kaduṣṇaṃ karṇayordeyametadvā vedanāpaham// ### [6.21.19](https://indike.org/pramana/in.med.samhita.susruta.6.21.19) vaṃśāvalekhanāyukte mūtre cājāvike bhiṣak/ sarpiḥ pacettena karṇaṃ pūrayet karṇaśūlinaḥ// ### [6.21.20](https://indike.org/pramana/in.med.samhita.susruta.6.21.20) mahataḥ pañcamūlasya kāṇḍamaṣṭādaśāṅgulam/ kṣaumeṇāveṣṭya saṃsicya tailenādīpayettataḥ// ### [6.21.21](https://indike.org/pramana/in.med.samhita.susruta.6.21.21) yattailaṃ cyavate tebhyo dhṛtebhyo bhājanopari/ jñeyaṃ taddīpikātailaṃ sadyo gṛhṇāti vedanām// ### [6.21.22](https://indike.org/pramana/in.med.samhita.susruta.6.21.22) kuryādevaṃ bhadrakāṣṭhe kuṣṭhe kāṣṭhe ca sārale/ matimān dīpikātailaṃ karṇaśūlanibarhaṇam// ### [6.21.23](https://indike.org/pramana/in.med.samhita.susruta.6.21.23) arkāṅkurānamlapiṣṭāṃstailāktān lavaṇānvitān/ sannidadhyāt sruhīkāṇḍe korite tacchadāvṛte// ### [6.21.24](https://indike.org/pramana/in.med.samhita.susruta.6.21.24) puṭapākakramasvinnān pīḍayedārasāgamāt/ sukhoṣṇaṃ tadrasaṃ karṇe dāpayecchūlaśāntaye// ### [6.21.25](https://indike.org/pramana/in.med.samhita.susruta.6.21.25) kapitthamātuluṅgāmlaśṛṅgaverarasaiḥ śubhaiḥ/ sukhoṣṇaiḥ pūrayet karṇaṃ tacchūlavinivṛttaye// ### [6.21.26](https://indike.org/pramana/in.med.samhita.susruta.6.21.26) karṇaṃ koṣṇena cukreṇa pūrayet karṇaśūlinaḥ/ samudraphenacūrṇena yuktyā cāpyavacūrṇayet// ### [6.21.27](https://indike.org/pramana/in.med.samhita.susruta.6.21.27) aṣṭānāmiha mūtrāṇāṃ mūtreṇānyatamena tu/ koṣṇena pūrayet karṇaṃ karṇaśūlopaśāntaye// ### [6.21.28](https://indike.org/pramana/in.med.samhita.susruta.6.21.28) mūtreṣvamleṣu vātaghne gaṇe ca kvathite bhiṣak/ paceccaturvidhaṃ snehaṃ pūraṇaṃ tacca karṇayoḥ// ### [6.21.29](https://indike.org/pramana/in.med.samhita.susruta.6.21.29) etā eva kriyāḥ kuryāt pittaghnaiḥ pittasaṃyute/ kākolyādau daśakṣīraṃ tiktaṃ cātra hitaṃ haviḥ// ### [6.21.30](https://indike.org/pramana/in.med.samhita.susruta.6.21.30) kṣīravṛkṣapravāleṣu madhuke candane tathā/ kalkakvāthe paraṃ pakvaṃ śarkarāmadhukaiḥ saraiḥ// ### [6.21.31](https://indike.org/pramana/in.med.samhita.susruta.6.21.31) iṅgudīsarṣapasnehau sakaphe pūraṇe hitau/ tiktauṣadhānāṃ yūṣāśca svedāśca kaphanāśanāḥ// ### [6.21.32](https://indike.org/pramana/in.med.samhita.susruta.6.21.32) surasādau kṛtaṃ tailaṃ pañcamūle mahatyapi/ mātuluṅgarasaḥ śuktaṃ laśunārdrakayo rasaḥ// ### [6.21.33](https://indike.org/pramana/in.med.samhita.susruta.6.21.33) ekaikaḥ pūraṇe pathyastailaṃ teṣvapi vā kṛtam/ tīkṣṇā mūrdhavirekāśca kavalāścātra pūjitāḥ// ### [6.21.34](https://indike.org/pramana/in.med.samhita.susruta.6.21.34) karṇaśūlavidhiḥ kṛtsnaḥ pittaghnaḥ śoṇitāvṛte/ śūlapraṇādabādhiryakṣveḍānāṃ tu prakīrtitam// ### [6.21.35](https://indike.org/pramana/in.med.samhita.susruta.6.21.35) sāmānyato viśeṣeṇa† bādhirye pūraṇaṃ śṛṇu/ gavāṃ mūtreṇa bilvāni piṣṭvā tailaṃ vipācayet// ### [6.21.36](https://indike.org/pramana/in.med.samhita.susruta.6.21.36) sajalaṃ ca sadugdhaṃ ca bādhirye karṇapūraṇam/ sitāmadhukabimbībhiḥ siddhaṃ vā++āje payasyapi// ### [6.21.37](https://indike.org/pramana/in.med.samhita.susruta.6.21.37) bimbīkvāthe vimathyoṣṇaṃ śītībhūtaṃ taduddhṛtam/ punaḥ paceddaśakṣīraṃ sitāmadhukacandanaiḥ// ### [6.21.38](https://indike.org/pramana/in.med.samhita.susruta.6.21.38) bilvāmbugāḍhaṃ tattailaṃ bādhirye karṇapūraṇam/ vakṣyate yaḥ pratiśyāye vidhiḥ so+apyatra pūjitaḥ// ### [6.21.39](https://indike.org/pramana/in.med.samhita.susruta.6.21.39) vātavyādhiṣu yaścokto vidhiḥ sa ca hito bhavet/ karṇasrāve pūtikarṇe tathaiva kṛmikarṇake// ### [6.21.40](https://indike.org/pramana/in.med.samhita.susruta.6.21.40) samānaṃ karma kurvīta yogān vaiśeṣikānapi/ śirovirecanaṃ caiva dhūpanaṃ pūraṇaṃ tathā// ### [6.21.41](https://indike.org/pramana/in.med.samhita.susruta.6.21.41) pramārjanaṃ dhāvanaṃ ca vīkṣya vīkṣyāvcārayet/ rājavṛkṣāditoyena surasādigaṇena vā// ### [6.21.42](https://indike.org/pramana/in.med.samhita.susruta.6.21.42) karṇaprakṣālanaṃ kāryaṃ cūrṇaireṣāṃ ca pūraṇam/ kvāthaṃ pañjcakaṣāyaṃ tu kapittharasayojitam// ### [6.21.43](https://indike.org/pramana/in.med.samhita.susruta.6.21.43) karṇasrāve praśaṃsanti pūraṇaṃ madhunā saha/ sarjatvakcūrṇasaṃyuktaḥ kārpāsīphalajo rasaḥ// ### [6.21.44](https://indike.org/pramana/in.med.samhita.susruta.6.21.44) yojito madhunā vā+api karṇasrāve praśasyate/ lākṣā rasāñjanaṃ sarjaścūrṇitaṃ karṇapūraṇam// ### [6.21.45](https://indike.org/pramana/in.med.samhita.susruta.6.21.45) saśaivalaṃ mahāvṛkṣajambvāmraprasavāyutam/ kulīrakṣaudramaṇḍūkīsiddhaṃ tailaṃ ca pūjitam// ### [6.21.46](https://indike.org/pramana/in.med.samhita.susruta.6.21.46) tindukānyabhayā rodhraṃ samaṅgā++āmalakaṃ madhu/ pūraṇaṃ cātra† pathyaṃ syātkapittharasayojitam// ### [6.21.47](https://indike.org/pramana/in.med.samhita.susruta.6.21.47) rasamāmrakapitthānāṃ madhūkadhavaśālajam/ pūraṇārthaṃ praśaṃsanti tailaṃ vā tairvipācitam// ### [6.21.48](https://indike.org/pramana/in.med.samhita.susruta.6.21.48) priyaṅgumadhukāmbaṣṭhādhātakīśilaparṇibhiḥ/ mañjiṣṭhālobhralākṣābhiḥ kapitthasya rasena vā// ### [6.21.49](https://indike.org/pramana/in.med.samhita.susruta.6.21.49) pacettailaṃ tadāsrāvamavagṛhṇāti pūraṇāt/ ghṛtaṃ rasāñjnaṃ nāryāḥ kṣīreṇa madhusaṃyutam// ### [6.21.50](https://indike.org/pramana/in.med.samhita.susruta.6.21.50) tatpraśastaṃ cirotthe+api sāsrāve pūtikarṇake/ nirguṇḍīsvarasastailaṃ sindhurdhūmarajo guḍaḥ// ### [6.21.51](https://indike.org/pramana/in.med.samhita.susruta.6.21.51) pūraṇaḥ pūtikarṇasya śamano madhusaṃyutaḥ/ kṛmikarṇakanāśārthaṃ kṛmighnaṃ yojayedvidhim// ### [6.21.52](https://indike.org/pramana/in.med.samhita.susruta.6.21.52) vārtākudhūmaśca hitaḥ sārṣapasneha eva ca/ kṛmighnaṃ haritālena gavāṃ mūtrayutena ca// ### [6.21.53](https://indike.org/pramana/in.med.samhita.susruta.6.21.53) gugguloḥ karṇadaurgandhye dhūpanaṃ śreṣṭhamucyate/ chardanaṃ dhūmapānaṃ ca kavalasya ca dhāraṇam// ### [6.21.54](https://indike.org/pramana/in.med.samhita.susruta.6.21.54) karṇakṣveḍe hitaṃ tailaṃ sārṣapaṃ caiva pūraṇam/ vidradhau cāpi kurvīta vidradhyuktaṃ cikitsitam// ### [6.21.55](https://indike.org/pramana/in.med.samhita.susruta.6.21.55) prakledya dhīmāṃstailena svedena pravilāyya ca/ śodhayetkarṇaviṭkaṃ tu bhiṣak samyak śalākayā// ### [6.21.56](https://indike.org/pramana/in.med.samhita.susruta.6.21.56) nāḍīsvedo+atha vamanaṃ dhūmo mūrdhavirecanam/ vidhiśca kaphahṛtsarvaḥ karṇakaṇḍūmapohati// ### [6.21.57](https://indike.org/pramana/in.med.samhita.susruta.6.21.57) atha karṇapratīnāhe snehasvedau prayojayet/ tato viriktaśirasaḥ kriyāṃ prāptāṃ samācaret// ### [6.21.58](https://indike.org/pramana/in.med.samhita.susruta.6.21.58) karṇapākasya bhaiṣajyaṃ kuryātpittavisarpavat/ karṇacchidre vartamānaṃ kīṭaṃ kledamalādi vā// ### [6.21.59](https://indike.org/pramana/in.med.samhita.susruta.6.21.59) śṛṅgeṇāpahareddhīmānathavā+api śalākayā/ śeṣāṇāṃ tu vikārāṇāṃ prāk cikitsitamīritam// ### [6.21.59\_1](https://indike.org/pramana/in.med.samhita.susruta.6.21.59_1) iti suśrutasaṃhitāyāmuttaratantrāntargate śālākyatantre karṇagatarogapratiṣedho nāmaikaviṃśo+adhyāyaḥ //21// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.154.28) — Ḍalhaṇa, Sanskrit ## Linked texts (1) - [Vīrasiṃha](https://indike.org/pramana/in.med.sangraha.karmavipaka.virasimha.26.p5) — Bhoja, Sanskrit --- Source: [https://indike.org/pramana/in.med.samhita.susruta.6.21](https://indike.org/pramana/in.med.samhita.susruta.6.21) · Pramāṇa