[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.24 # The Compendium of Suśruta 6.24: caturviṃśatitamo+adhyāyaḥ/ Suśrutasaṃhitā 6.24 - **Language:** Sanskrit ### caturviṃśatitamo+adhyāyaḥ/ ### [6.24.1](https://indike.org/pramana/in.med.samhita.susruta.6.24.1) athātaḥ pratiśyāyapratiṣedhaṃ vyākhyāsyāmaḥ// ### [6.24.2](https://indike.org/pramana/in.med.samhita.susruta.6.24.2) yathovāca bhagavān dhanvantariḥ// ### [6.24.3](https://indike.org/pramana/in.med.samhita.susruta.6.24.3) nārīprasaṅgaḥ śiraso+abhitāpo dhūmo rajaḥ śītamatipratāpaḥ/ saṃdhāraṇaṃ mūtrapurīṣayośca sadyaḥ pratiśyāyanidānamuktam// ### [6.24.4](https://indike.org/pramana/in.med.samhita.susruta.6.24.4) cayaṃ gatā mūrdhani mārutādayaḥ pṛthak samastāśca tathaiva śoṇitam/ prakopyamāṇā vividhaiḥ prakopaṇairnṛṇāṃ pratiśyāyakarā bhavanti hi// ### [6.24.5](https://indike.org/pramana/in.med.samhita.susruta.6.24.5) śirogurutvaṃ kṣavathoḥ pravartanaṃ tathā+aṅgamardaḥ parihṛṣṭaromatā/ upadravāścāpyapare pṛthagvidhā nṛṇāṃ pratiśyāyapuraḥsarāḥ smṛtāḥ// ### [6.24.6](https://indike.org/pramana/in.med.samhita.susruta.6.24.6) ānaddhā pihitā nāsā tanusrāvapravartinī/ galatālvoṣṭhaśoṣaśca nistodaḥ śaṅkhayostathā// ### [6.24.7](https://indike.org/pramana/in.med.samhita.susruta.6.24.7) svaropaghātaśca bhavet pratiśyāye+anilātmake/ uṣṇaḥ sapītakaḥ srāvo ghrāṇāt sravati paittike// ### [6.24.8](https://indike.org/pramana/in.med.samhita.susruta.6.24.8) kṛśo+atipāṇḍuḥ santapto bhavettṛṣṇānipīḍitaḥ(tṛṣṇābhipīḍitaḥ)/ sadhūmaṃ sahasā vahniṃ vamatīva ca mānavaḥ// ### [6.24.9](https://indike.org/pramana/in.med.samhita.susruta.6.24.9) kaphaḥ kaphakṛte ghrāṇācchuklaḥ śītaḥ sravenmuhuḥ/ śuklāvabhāsaḥ śūnākṣo bhavedguruśiromukhaḥ// ### [6.24.10](https://indike.org/pramana/in.med.samhita.susruta.6.24.10) śirogalauṣṭhatālūnāṃ kaṇḍūyanamatīva ca/ bhūtvā bhūtvā pratiśyāyo yo+akasmādvinivartate// ### [6.24.11](https://indike.org/pramana/in.med.samhita.susruta.6.24.11) saṃpakvo vā+apyapakvo vā sa sarvaprabhavaḥ smṛtaḥ/ liṅgāni caiva sarveṣāṃ pīnasānāṃ ca sarvaje// ### [6.24.12](https://indike.org/pramana/in.med.samhita.susruta.6.24.12) raktaje tu pratiśyāye raktāsrāvaḥ pravartate/ tāmrākṣaśca bhavejjantururoghātaprapīḍitaḥ// ### [6.24.13](https://indike.org/pramana/in.med.samhita.susruta.6.24.13) durgandhocchvāsavadanastathā gandhānna vetti ca/ mūrcchanti cātra kṛmayaḥ śvetāḥ †snigdhāstathā+aṇavaḥ// ### [6.24.14](https://indike.org/pramana/in.med.samhita.susruta.6.24.14) kṛmimūrdhavikāreṇa samānaṃ cāsya lakṣaṇam/ praklidyati punarnāsā puanaśca pariśuṣyati// ### [6.24.15](https://indike.org/pramana/in.med.samhita.susruta.6.24.15) muhurānahyate cāpi muhurvivriyate tathā/ niḥśvāsocchvāsadaurgandhyaṃ tathā gandhānna vetti ca// ### [6.24.16](https://indike.org/pramana/in.med.samhita.susruta.6.24.16) evaṃ duṣṭapratiśyāyaṃ jānīyāt kṛcchrasādhanam/ sarva eva pratiśyāyā narasyāpratikāriṇaḥ// ### [6.24.17](https://indike.org/pramana/in.med.samhita.susruta.6.24.17) kālena rogajananā jāyante duṣṭapīnasāḥ/ bādhiryamāndhyamaghrāṇaṃ ghorāṃśca nayanāmayān/ kāsāgnisādaśophāṃśca vṛddhāḥ kurvanti pīnasāḥ// ### [6.24.18](https://indike.org/pramana/in.med.samhita.susruta.6.24.18) navaṃ pratiśyāyamapāsya sarvamupācaret sarpiṣa eva pānaiḥ/ svedairvicitrairvamanaiśca yuktaiḥ kālopapannairavapīḍanaiśca// ### [6.24.19](https://indike.org/pramana/in.med.samhita.susruta.6.24.19) apacyamānasya hi pācanārthaṃ svedo hito+amlairahimaṃ ca bhojyam/ niṣevyamāṇaṃ payasā++ārdrakaṃ vā saṃpācayedikṣuvikārayogaiḥ// ### [6.24.20](https://indike.org/pramana/in.med.samhita.susruta.6.24.20) pakvaṃ ghanaṃ cāpyavalambamānaṃ śirovirekairapakarṣayettam/ virecanāsthāpanadhūmapānairavekṣya doṣān kavalagrahaiśca// ### [6.24.21](https://indike.org/pramana/in.med.samhita.susruta.6.24.21) nivātaśayyāsanaceṣṭanāni mūrdhno gurūṣṇaṃ ca tathaiva vāsaḥ/ tīkṣṇā virekāḥ śirasaḥ sadhūmā rūkṣaṃ †yavānnaṃ vijayā ca sevyā// ### [6.24.22](https://indike.org/pramana/in.med.samhita.susruta.6.24.22) śītāmbuyoṣicchiśirāvagāhacintātirūkṣāśanavegarodhān/ śokaṃ ca madyāni navāni caiva vivarjayet pīnasarogajuṣṭaḥ// ### [6.24.23](https://indike.org/pramana/in.med.samhita.susruta.6.24.23) chardyaṅgasādajvaragauravārtamarocakāratyatisārayuktam/ vilaṅghanaiḥ pācanadīpanīyairupācaret pīnasinaṃ yathāvat// ### [6.24.24](https://indike.org/pramana/in.med.samhita.susruta.6.24.24) bahudravairvātakaphopasṛṣṭaṃ pracchardayet pīnasinaṃ vayaḥstham/ upadravāṃścāpi yathopadeśaṃ svairbheṣajairbhojanasaṃvidhānaiḥ/ jayedviditvā mṛdutāṃ gateṣu prāglakṣaṇeṣūktamathādiśecca// ### [6.24.25](https://indike.org/pramana/in.med.samhita.susruta.6.24.25) vātike tu pratiśyāye pibet sarpiryathākramam/ pañcabhirlavaṇaiḥ siddhaṃ prathamena gaṇena ca// ### [6.24.26](https://indike.org/pramana/in.med.samhita.susruta.6.24.26) nasyādiṣu vidhiṃ kṛtsnamavekṣetārditeritam/ pittaraktotthayoḥ peyaṃ sarpirmadhurakaiḥ śṛtam// ### [6.24.27](https://indike.org/pramana/in.med.samhita.susruta.6.24.27) pariṣekān pradehāṃśca kuryādapi ca śītalān/ śrīsarjarasapattaṅgapriyaṅgumadhuśarkarāḥ// ### [6.24.28](https://indike.org/pramana/in.med.samhita.susruta.6.24.28) drākṣāmadhūlikāgojīśrīparṇīmadhuphaistathā/ yujyante kavalāścātra vireko madhurairapi// ### [6.24.29](https://indike.org/pramana/in.med.samhita.susruta.6.24.29) dhavatvaktriphalāśyāmātilvakairmadhukena ca/ śrīparṇīrajanīmiśraiḥ kṣīre daśaguṇe pacet// ### [6.24.30](https://indike.org/pramana/in.med.samhita.susruta.6.24.30) tailaṃ kālopapannaṃ tannasyaṃ syādanayorhitam/ kaphaje sarpiṣā snigdhaṃ tilamāṣavipakvayā// ### [6.24.31](https://indike.org/pramana/in.med.samhita.susruta.6.24.31) yavāgvā vāmayedvāntaḥ kaphaghnaṃ kramamācaret/ ubhe bale bṛhatyau ca viḍaṅgaṃ satrikaṇṭakam// ### [6.24.32](https://indike.org/pramana/in.med.samhita.susruta.6.24.32) śvetāmūlaṃ †sadābhadrāṃ varṣabhūṃ cātra saṃharet/ tailamebhirvipakvaṃ tu nasyamasyopakalpayet// ### [6.24.33](https://indike.org/pramana/in.med.samhita.susruta.6.24.33) saralākiṇihīdārunikumbheṅgudibhiḥ kṛtāḥ/ vartayaścopayojyāḥ syurdhūmapāne yathāvidhi// ### [6.24.34](https://indike.org/pramana/in.med.samhita.susruta.6.24.34) sarpīṃṣi kaṭutiktāni tīkṣṇadhūmāḥ kaṭūni ca/ bheṣajānyupayuktāni hanyuḥ sarvaprakopajam// ### [6.24.35](https://indike.org/pramana/in.med.samhita.susruta.6.24.35) rasāñjane sātiviṣe mustāyāṃ bhadradāruṇi/ tailaṃ vipakvaṃ nasyārthe vidadhyāccātra buddhimān// ### [6.24.36](https://indike.org/pramana/in.med.samhita.susruta.6.24.36) mustā tejovatī pāṭhā kaṭphalaṃ kaṭukā vacā/ sarṣapāḥ pippalīmūlaṃ pippalyaḥ saindhavāgnikau// ### [6.24.37](https://indike.org/pramana/in.med.samhita.susruta.6.24.37) tutthaṃ karañjabījaṃ ca lavaṇaṃ bhadradāru ca/ etaiḥ kṛtaṃ kaṣāyaṃ tu kavale saṃprayojayet// ### [6.24.38](https://indike.org/pramana/in.med.samhita.susruta.6.24.38) hitaṃ mūrdhavireke ca tailamebhirvipācitam/ kṣīramardhajale kvāthyaṃ jāṅgalairmṛgapakṣibhiḥ// ### [6.24.39](https://indike.org/pramana/in.med.samhita.susruta.6.24.39) puṣpairvimiśraṃ jalajairvātaghnairauṣadhairapi/ hime kṣīrāvaśiṣṭe+asmin ghṛtamutpādya yatnataḥ// ### [6.24.40](https://indike.org/pramana/in.med.samhita.susruta.6.24.40) sarvagandhasitānantāmadhukaṃ† candanaṃ tathā/ āvāpya vipacedbhūyo daśakṣīraṃ tu tadghṛtam// ### [6.24.41](https://indike.org/pramana/in.med.samhita.susruta.6.24.41) nasye prayuktamudriktān pratiśyāyān vyapohati/ yathāsvaṃ doṣaśamanaistailaṃ kuryācca yatnataḥ// ### [6.24.42](https://indike.org/pramana/in.med.samhita.susruta.6.24.42) samūtrapittāścoddiṣṭāḥ kriyāḥ kṛmiṣu yojayet/ yāpanārthaṃ kṛmighnāni bheṣajāni ca buddhimān// ### [6.24.42\_1](https://indike.org/pramana/in.med.samhita.susruta.6.24.42_1) iti suśrutasaṃhitāyāmuttaratantrāntargate śālākyatantre pratiśyāyapratiṣedho nāma caturviṃśatitamo+adhyāyaḥ //24// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.157.2) — Ḍalhaṇa, Sanskrit ## Linked texts (2) - [Basavarājīya](https://indike.org/pramana/in.med.cikitsa.daksina.basavarajiya.p2101) — Nīlakaṇṭhakoṭṭūru Basavarāja 1500, Sanskrit - [Vīrasiṃha](https://indike.org/pramana/in.med.sangraha.karmavipaka.virasimha.26.p10) — Bhoja, Sanskrit --- Source: [https://indike.org/pramana/in.med.samhita.susruta.6.24](https://indike.org/pramana/in.med.samhita.susruta.6.24) · Pramāṇa