[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.26 # The Compendium of Suśruta 6.26: ṣaḍviṃśatitamo+adhyāyaḥ/ Suśrutasaṃhitā 6.26 - **Language:** Sanskrit ### ṣaḍviṃśatitamo+adhyāyaḥ/ ### [6.26.1](https://indike.org/pramana/in.med.samhita.susruta.6.26.1) athātaḥ śirorogapratiṣedhaṃ vyākhyāsyāmaḥ// ### [6.26.2](https://indike.org/pramana/in.med.samhita.susruta.6.26.2) yathovāca bhagavān dhanvantariḥ// ### [6.26.3](https://indike.org/pramana/in.med.samhita.susruta.6.26.3) vātavyādhividhiḥ kāryaḥ śiroroge+anilātmake/ payonupānaṃ seveta ghṛtaṃ tailamathāpi vā// ### [6.26.4](https://indike.org/pramana/in.med.samhita.susruta.6.26.4) mudgān kulatthānmāṣāṃśca khādecca niśi kevalān/ kaṭūṣṇāṃśca† sasarpiṣkānuṣṇaṃ cānu payaḥ pibet// ### [6.26.5](https://indike.org/pramana/in.med.samhita.susruta.6.26.5) pibedvā payasā tailaṃ tatkalkaṃ vā+api mānavaḥ/ vātaghnasiddhaiḥ kṣīraiśca sukhoṣṇaiḥ sekamācaret// ### [6.26.6](https://indike.org/pramana/in.med.samhita.susruta.6.26.6) tatsiddhaiḥ pāyasairvā+api sukhoṣṇairlepayecchiraḥ/ †svinnairvā matsyapiśitaiḥ kṛśarairvā sasaindhavaiḥ// ### [6.26.7](https://indike.org/pramana/in.med.samhita.susruta.6.26.7) candanotpalakuṣṭhairvā suślakṣṇairmagadhāyutaiḥ/ snigdhasya tailaṃ nasyaṃ syāt kulīrarasasādhitam// ### [6.26.8](https://indike.org/pramana/in.med.samhita.susruta.6.26.8) varuṇādau gaṇe kṣuṇṇe kṣīramardhodakaṃ pacet/ kṣīraśeṣaṃ ca tanmathyaṃ śītaṃ sāramupāharet// ### [6.26.9](https://indike.org/pramana/in.med.samhita.susruta.6.26.9) tato madhurakaiḥ siddhaṃ nasye tat pūjitaṃ haviḥ/ tasmin vipakve kṣīre tu peyaṃ sarpiḥ saśarkaram// ### [6.26.10](https://indike.org/pramana/in.med.samhita.susruta.6.26.10) dhūmaṃ cāsya yathākālaṃ snaihikaṃ yojayedbhiṣak/ pānābhyañjananasyeṣu basikarmaṇi secane// ### [6.26.11](https://indike.org/pramana/in.med.samhita.susruta.6.26.11) vidadhyāttraivṛtaṃ dhīmān balātailamathāpi vā/ bhojayecca rasaiḥ snigdhaiḥ payobhirvā susaṃskṛtaiḥ// ### [6.26.12](https://indike.org/pramana/in.med.samhita.susruta.6.26.12) pittaraktasamutthānau śirorogau nivārayet/ śirolepaiḥ sasarpiṣkaiḥ pariṣekaiśca śītalaiḥ// ### [6.26.13](https://indike.org/pramana/in.med.samhita.susruta.6.26.13) kṣīrekṣurasadhānyāmlamastukṣaudrasitājalaiḥ/ nalavañjulakahlāracandanotpalapadmakaiḥ// ### [6.26.14](https://indike.org/pramana/in.med.samhita.susruta.6.26.14) †vaṃśaśaivalayaṣṭyāhvamustāmbhoruhasaṃyutaiḥ/ śiraḥpralepaiḥ saghṛtairvaisarpaiśca tathāvidhaiḥ// ### [6.26.15](https://indike.org/pramana/in.med.samhita.susruta.6.26.15) madhuraiśca mukhālaipairnasyakarmabhireva ca/ āsthāpanairvirekaiśca pathyaiśca snehabastibhiḥ// ### [6.26.16](https://indike.org/pramana/in.med.samhita.susruta.6.26.16) kṣīrasarpirhitaṃ nasyaṃ vasā vā jāṅgalā śubhā/ utpalādivipakvena kṣīreṇāsthāpanaṃ hitam// ### [6.26.17](https://indike.org/pramana/in.med.samhita.susruta.6.26.17) bhojanaṃ jāṅgalarasaiḥ sarpiṣā cānuvāsanam/ madhuraiḥ kṣīrasarpistu snehane ca saśarkaram// ### [6.26.18](https://indike.org/pramana/in.med.samhita.susruta.6.26.18) pittaraktaghnamuddiṣṭaṃ yaccānyadapi taddhitam/ kaphotthitaṃ śirorogaṃ jayet kaphanivāraṇaiḥ// ### [6.26.19](https://indike.org/pramana/in.med.samhita.susruta.6.26.19) śirovirekairvamanaistīkṣṇairgaṇḍūṣadhāraṇaiḥ/ acchaṃ ca pāyayetsarpiḥ svedayeccāpyabhīkṣṇaśaḥ// ### [6.26.20](https://indike.org/pramana/in.med.samhita.susruta.6.26.20) śiro madhūkasāreṇa snigdhaṃ cāpi virecayet/ iṅgudasya tvacā vā+api meṣaśṛṅgasya† vā bhiṣak// ### [6.26.21](https://indike.org/pramana/in.med.samhita.susruta.6.26.21) ābhyāmeva kṛtāṃ vartiṃ dhūmapāne prayojayet/ ghreyaṃ kaṭphalacūrṇaṃ ca kavalāśca kaphāpahāḥ// ### [6.26.22](https://indike.org/pramana/in.med.samhita.susruta.6.26.22) saralākuṣṭhaśārṅgeṣṭādevakāṣṭhaiḥ sarohiṣaiḥ/ kṣārapiṣṭaiḥ salavaṇaiḥ sukhoṣṇairlepayecchiraḥ// ### [6.26.23](https://indike.org/pramana/in.med.samhita.susruta.6.26.23) yavaṣaṣṭikayoścānnaṃ vyoṣakṣārasamāyutam/ paṭolamudgakaulatthairmātrāvadbhojayedrasaiḥ// ### [6.26.24](https://indike.org/pramana/in.med.samhita.susruta.6.26.24) śiroroge tridoṣotthe tridoṣaghno vidhirhitaḥ/ sarpiḥpānaṃ viśeṣeṇa purāṇaṃ vā diśanti hi// ### [6.26.25](https://indike.org/pramana/in.med.samhita.susruta.6.26.25) kṣayaje kṣayamāsādya kartavyo bṛṃhaṇo vidhiḥ/ pāne nasye ca sarpiḥ syādvātaghnamadhuraiḥ śṛtam// ### [6.26.26](https://indike.org/pramana/in.med.samhita.susruta.6.26.26) kṣayakāsāpahaṃ cātra sarpiḥ pathyatamaṃ viduḥ/ kṛmibhirbhakṣyamāṇasya vakṣyate śirasaḥ kriyā// ### [6.26.27](https://indike.org/pramana/in.med.samhita.susruta.6.26.27) nasye hi śoṇitaṃ dadyāttena mūrcchanti jantavaḥ/ mattāḥ śoṇitagandhena samāyānti yatastataḥ// ### [6.26.28](https://indike.org/pramana/in.med.samhita.susruta.6.26.28) teṣāṃ nirharaṇaṃ kāryaṃ tato mūrdhavirecanaiḥ/ hrasvaśigrukabījairvā kāṃsyanīlīsamāyutaiḥ// ### [6.26.29](https://indike.org/pramana/in.med.samhita.susruta.6.26.29) kṛmighnairavapīḍaiśca mūtrapiṣṭairupācaret/ pūtimatsyayutān dhūmān kṛmighnāṃśca prayojayet// ### [6.26.30](https://indike.org/pramana/in.med.samhita.susruta.6.26.30) bhojanāni kṛmighnāni pānāni vividhāni ca/ sūryāvarte vidhātavyaṃ nasyakarmādibheṣajam// ### [6.26.31](https://indike.org/pramana/in.med.samhita.susruta.6.26.31) bhojanaṃ jāṅgalaprāyaṃ kṣīrānnavikṛtirghṛtam/ tathā+ardhabhedake vyādhau prāptamanyacca yadbhavet// ### [6.26.32](https://indike.org/pramana/in.med.samhita.susruta.6.26.32) śirīṣamūlakaphalairavapīḍo+anayorhitaḥ/ vaṃśamūlakaphalairavapīḍo+anayorhitaḥ// ### [6.26.33](https://indike.org/pramana/in.med.samhita.susruta.6.26.33) avapīḍo hitaścātra vacāmāgadhikāyutaḥ/ madhukenāvpīḍo vā madhunā saha saṃyutaḥ// ### [6.26.34](https://indike.org/pramana/in.med.samhita.susruta.6.26.34) manaḥśilāvapīḍo vā madhunā candanena vā/ teṣāmante hitaṃ nasyaṃ sarpirmadhurasānvitam// ### [6.26.35](https://indike.org/pramana/in.med.samhita.susruta.6.26.35) sārivotpalakuṣṭhāni madhukaṃ cāmlapeṣitam/ sarpistailayuto lepo dvayorapi sukhāvahaḥ// ### [6.26.36](https://indike.org/pramana/in.med.samhita.susruta.6.26.36) eṣa eva prayoktavyaḥ śiroroge kaphātmake/ anantavāte kartavyaḥ sūryāvartaharo† vidhiḥ// ### [6.26.37](https://indike.org/pramana/in.med.samhita.susruta.6.26.37) sirāvyadhaśca kartavyo+anantavātapraśāntaye/ āhāraśca vidhātavyo vātapittavināśanaḥ// ### [6.26.38](https://indike.org/pramana/in.med.samhita.susruta.6.26.38) madhumastakasaṃyāvaghṛtapūraiśca bhojanam/ kṣīrasarpiḥ praśaṃsanti nasye pāne ca śaṅkhake// ### [6.26.39](https://indike.org/pramana/in.med.samhita.susruta.6.26.39) jāṅgalānāṃ rasaiḥ snigdhairāhāraścātra śasyate/ śatāvarīṃ tilān kṛṣṇān madhukaṃ nīlamutpalam// ### [6.26.40](https://indike.org/pramana/in.med.samhita.susruta.6.26.40) dūrvāṃ punarnavāṃ caiva lepe sādhvavacārayet/ mahāsugandhāmathavā pālindīṃ cāmlapeṣitām// ### [6.26.41](https://indike.org/pramana/in.med.samhita.susruta.6.26.41) śītāṃścātra parīṣekān pradehāṃśca prayojayet/ avapīḍaśca deyo+atra sūryāvartanivāraṇaḥ// ### [6.26.42](https://indike.org/pramana/in.med.samhita.susruta.6.26.42) kṛmikṣayakṛtau hitvā śirorogeṣu buddhimān/ madhutailasamāyuktaiḥ śirāṃsyativirecayet// ### [6.26.43](https://indike.org/pramana/in.med.samhita.susruta.6.26.43) paścātsarṣapatailena tato nasyaṃ prayojayet/ na cecchāntiṃ vrajantyevaṃ snigdhasvinnāṃstato bhiṣak// ### [6.26.44](https://indike.org/pramana/in.med.samhita.susruta.6.26.44) paścādupācaretsamyak sirāṇāmatha mokṣaṇaiḥ/ ṣaṭsaptatirnetrarogā daśāṣṭādaśa karṇajāḥ// ### [6.26.45](https://indike.org/pramana/in.med.samhita.susruta.6.26.45) ekatriṃśad ghrāṇagatāḥ śirasyekādaśaiva tu/ iti vistarato dṛṣṭāḥ(diṣṭāḥ) salakṣaṇacikitsitāḥ// ### [6.26.46](https://indike.org/pramana/in.med.samhita.susruta.6.26.46) etāvanto yathāsthūlamuttamāṅgagatā gadāḥ/ asmiñchāstre nigaditāḥ saṅkhyārūpacikitsitaiḥ// ### [6.26.46\_1](https://indike.org/pramana/in.med.samhita.susruta.6.26.46_1) iti suśrutasaṃhitāyāmuttaratantrāntargate śālākyatantre śirorogapratiṣedho nāma ṣaṅviṃśo+adhyāyaḥ //26// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.159.3) — Ḍalhaṇa, Sanskrit ## Linked texts (2) - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.80.22) — Vaṅgasena, Sanskrit - [Basavarājīya](https://indike.org/pramana/in.med.cikitsa.daksina.basavarajiya.p2193) — Nīlakaṇṭhakoṭṭūru Basavarāja 1500, Sanskrit --- Source: [https://indike.org/pramana/in.med.samhita.susruta.6.26](https://indike.org/pramana/in.med.samhita.susruta.6.26) · Pramāṇa