[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.39 # The Compendium of Suśruta 6.39: ekonacatvāriṃśattamo+adhyāyaḥ/ Suśrutasaṃhitā 6.39 - **Language:** Sanskrit ### ekonacatvāriṃśattamo+adhyāyaḥ/ ### [6.39.1](https://indike.org/pramana/in.med.samhita.susruta.6.39.1) athāto jvarapratiṣedhaṃ vyākhyāsyāmaḥ// ### [6.39.2](https://indike.org/pramana/in.med.samhita.susruta.6.39.2) yathovāca bhagavān dhanvantariḥ// ### [6.39.3](https://indike.org/pramana/in.med.samhita.susruta.6.39.3) yenāmṛtamapāṃ madhyāduddhṛtaṃ pūrvajanmani/ yato+amaratvaṃ saṃprāptāstridaśāstridiveśvarāt// ### [6.39.4](https://indike.org/pramana/in.med.samhita.susruta.6.39.4) śiṣyāstaṃ devamāsīnaṃ papracchuḥ suśrutādayaḥ/ vraṇasyopadravāḥ proktā vraṇināmapyataḥ param// ### [6.39.5](https://indike.org/pramana/in.med.samhita.susruta.6.39.5) samāsād vyāsataścaiva brūhi no bhiṣajāṃvara/ upadraveṇa juṣṭasya vraṇaḥ kṛcchreṇa sidhyati// ### [6.39.6](https://indike.org/pramana/in.med.samhita.susruta.6.39.6) upadravāstu vraṇinaḥ kṛcchrasādhyāḥ prakīrtitāḥ/ prakṣīṇabalamāṃsasya śeṣadhātuparikṣayāt// ### [6.39.7](https://indike.org/pramana/in.med.samhita.susruta.6.39.7) tasmādupadravān kṛtsnān brūhi naḥ sacikitsitān/ sarvakāyacikitsāsu ye dṛṣṭāḥ paramarṣiṇā// ### [6.39.8](https://indike.org/pramana/in.med.samhita.susruta.6.39.8) teṣāṃ tadvacanaṃ śrutvā prābravīdbhiṣajāṃvaraḥ/ jvaramādau pravakṣyāmi sa rogānīkarāṭ smṛtaḥ// ### [6.39.9](https://indike.org/pramana/in.med.samhita.susruta.6.39.9) rudrakopāgnisaṃbhūtaḥ sarvabhūtapratāpanaḥ/ taistairnāmabhiranyeṣāṃ sattvānāṃ parikīrtyate// ### [6.39.10](https://indike.org/pramana/in.med.samhita.susruta.6.39.10) janmādau nidhane caiva prāyo viśati dehinam†/ ataḥ sarvavikārāṇāmayaṃ rājā prakīrtitaḥ// ### [6.39.11](https://indike.org/pramana/in.med.samhita.susruta.6.39.11) ṛte devamanuṣyebhyo nānyo viṣahate tu tam/ karmaṇā labhate yasmāddevatvaṃ mānusādapi// ### [6.39.12](https://indike.org/pramana/in.med.samhita.susruta.6.39.12) punaścaiva cyutaḥ svargānmānuṣyamanuvartate/ tasmātte devabhāvena sahante mānuṣā jvaram// ### [6.39.13](https://indike.org/pramana/in.med.samhita.susruta.6.39.13) śeṣāḥ sarve vipadyante tairyagyonā jvarārditāḥ/ svedāvarodhaḥ† santāpaḥ sarvāṅgagrahaṇaṃ tathā// ### [6.39.14](https://indike.org/pramana/in.med.samhita.susruta.6.39.14) vikārā yugapadyasmin jvaraḥ sa parikīrtitaḥ/ doṣaiḥ pṛthak samastaiśca dvandvairāgantureva ca// ### [6.39.15](https://indike.org/pramana/in.med.samhita.susruta.6.39.15) anekakāraṇotpannaḥ smṛtastvaṣṭavidho jvaraḥ/ doṣāḥ prakupitāḥ sveṣu kāleṣu svaiḥ prakopaṇaiḥ// ### [6.39.16](https://indike.org/pramana/in.med.samhita.susruta.6.39.16) vyāpya dehamaśeṣeṇa jvaramāpādayanti hi/ duṣṭāḥ svahetubhirdoṣāḥ prāpyāmāśayamūṣmaṇā// ### [6.39.17](https://indike.org/pramana/in.med.samhita.susruta.6.39.17) sahitā rasamāgatya rasasvedapravāhiṇām/ srotasāṃ mārgamāvṛtya mandīkṛtya hutāśanam// ### [6.39.18](https://indike.org/pramana/in.med.samhita.susruta.6.39.18) nirasya bahirūṣmāṇaṃ paktisthānācca kevalam/ śarīraṃ samabhivyāpya svakāleṣu jvarāgamam// ### [6.39.19](https://indike.org/pramana/in.med.samhita.susruta.6.39.19) janayatyatha vṛddhiṃ vā svavarṇaṃ ca tvagādiṣu/ mithyātiyuktairapi ca snehādyaiḥ karmabhirnṛṇām// ### [6.39.20](https://indike.org/pramana/in.med.samhita.susruta.6.39.20) vividhādabhighātācca rogotthānāt prapākataḥ/ śramāt kṣayādajīrṇācca viṣātsātmyartuparyayāt// ### [6.39.21](https://indike.org/pramana/in.med.samhita.susruta.6.39.21) oṣadhīpuṣpagandhācca śokānnakṣatrapīḍayā†/ abhicārābhiśāpābhyāṃ manobhūtābhiśaṅkayā// ### [6.39.22](https://indike.org/pramana/in.med.samhita.susruta.6.39.22) strīṇāmapaprajātānāṃ prajātānāṃ tathā+ahitaiḥ/ stanyāvataraṇe caiva jvaro doṣaiḥ pravartate// ### [6.39.23](https://indike.org/pramana/in.med.samhita.susruta.6.39.23) tairvegavadbhirbahudhā samudbhrāntairvimārgagaiḥ/ vikṣipyamāṇo+antaragnirbhavatyāśu bahiścaraḥ// ### [6.39.24](https://indike.org/pramana/in.med.samhita.susruta.6.39.24) ruṇaddhi cāpyapāṃdhātuṃ yasmāttasmājjvarāturaḥ/ bhavatyatyuṣṇagātraśca †jvaritastena cocyate// ### [6.39.25](https://indike.org/pramana/in.med.samhita.susruta.6.39.25) śramo+aratirvivarṇatvaṃ vairasyaṃ nayanaplavaḥ/ icchādveṣau muhuścāpi śītavātātapādiṣu// ### [6.39.26](https://indike.org/pramana/in.med.samhita.susruta.6.39.26) jṛmbhā+aṅgamardo gurutā romaharṣo+arucistamaḥ/ apraharṣaśca śītaṃ ca bhavatyutpatsyati jvare// ### [6.39.27](https://indike.org/pramana/in.med.samhita.susruta.6.39.27) sāmānyato viśeṣāttu jṛmbhā+atyarthaṃ samīraṇāt/ pittānnayanayordāhaḥ kaphānnannābhinandanam// ### [6.39.28](https://indike.org/pramana/in.med.samhita.susruta.6.39.28) sarvaliṅgasamavāyaḥ sarvadoṣaprakopaje/ dvayordvayostu rūpeṇa saṃsṛṣṭaṃ dvandvajaṃ viduḥ// ### [6.39.29](https://indike.org/pramana/in.med.samhita.susruta.6.39.29) vepathurviṣamo vegaḥ kaṇṭhauṣṭhapariśoṣaṇam/ nidrānāśaḥ kṣutaḥ stambho gātrāṇāṃ raukṣyameva ca// ### [6.39.30](https://indike.org/pramana/in.med.samhita.susruta.6.39.30) śirohṛdgātrarugvaktravairasyaṃ baddhaviṭkatā/ jṛmbhā++ādhmānṃa tathā śūlaṃ bhavatyanilaje jvare// ### [6.39.31](https://indike.org/pramana/in.med.samhita.susruta.6.39.31) vegastīkṣṇo+atisāraśca nidrālpatvaṃ tathā vamiḥ/ kaṇṭhauṣṭhamukhanāsānāṃ pākaḥ svedaśca jāyate// ### [6.39.32](https://indike.org/pramana/in.med.samhita.susruta.6.39.32) pralāpaḥ kaṭutā vaktre mūrcchā dāho madastṛṣā/ pītaviṇmūtranetratvaṃ paittike bhrama eva ca// ### [6.39.33](https://indike.org/pramana/in.med.samhita.susruta.6.39.33) gauravaṃ śītamutkleśo romaharṣo+atinidratā/ srotorodho †rugalpatvaṃ praseko madhurāsyatā// ### [6.39.34](https://indike.org/pramana/in.med.samhita.susruta.6.39.34) nātyuṣṇagātratā chardiraṅgasādo+avipākatā/ pratiśyāyo+aruciḥ kāsaḥ kaphaje+akṣṇośca† śuklatā// ### [6.39.35](https://indike.org/pramana/in.med.samhita.susruta.6.39.35) nidrānāśo bhramaḥ śvāsastandrā suptāṅgatā+aruciḥ/ tṛṣṇā moho madaḥ stambho dāhaḥ śītaṃ hṛdi vyathā// ### [6.39.36](https://indike.org/pramana/in.med.samhita.susruta.6.39.36) paktiścireṇa doṣāṇāmunmādaḥ śyāvadantatā/ rasanā paruṣā kṛṣṇā sandhimūrdhāsthijā rujaḥ// ### [6.39.37](https://indike.org/pramana/in.med.samhita.susruta.6.39.37) nirbhugne kaluṣe netre karṇau śabdaruganvitau/ pralāpaḥ srotasāṃ pākaḥ kūjanaṃ cetanācyutiḥ// ### [6.39.38](https://indike.org/pramana/in.med.samhita.susruta.6.39.38) svedamūtrapurīṣāṇāmalpaśaḥ sucirāt srutiḥ/ sarvaje sarvaliṅgāni viśeṣaṃ cātra me śṛṇu// ### [6.39.39](https://indike.org/pramana/in.med.samhita.susruta.6.39.39) nātyuṣṇaśīto+alpasaṃjño bhrāntaprekṣī hatasvaraḥ/ kharajihvaḥ śuṣkakaṇṭhaḥ svedaviṇmūtravarjitaḥ// ### [6.39.40](https://indike.org/pramana/in.med.samhita.susruta.6.39.40) sāsro nirbhugnahṛdayo† bhaktadveṣī hataprabhaḥ/ śvasannipatitaḥ śete pralāpopadravāyutaḥ// ### [6.39.41](https://indike.org/pramana/in.med.samhita.susruta.6.39.41) tamabhinyāsamityāhurhataujasamathāpare/ sannipātajvaraṃ kṛcchramasādhyamapare viduḥ// ### [6.39.42](https://indike.org/pramana/in.med.samhita.susruta.6.39.42) nidropetamabhinyāsaṃ kṣīṇamenaṃ hataujasam/ saṃnyastagātraṃ saṃnyāsaṃ vidyātsarvātmake jvare// ### [6.39.43](https://indike.org/pramana/in.med.samhita.susruta.6.39.43) ojo visraṃsate yasya pittānilasamucchrayāt/ sa gātrastambhaśītābhyāṃ †śayanepsuracetanaḥ// ### [6.39.44](https://indike.org/pramana/in.med.samhita.susruta.6.39.44) api jāgrat svapan jantustandrāluśca pralāpavān/ saṃhṛṣṭaromā srastāṅgo mandasantāpavedanaḥ// ### [6.39.45](https://indike.org/pramana/in.med.samhita.susruta.6.39.45) ojonirodhajaṃ tasya jānīyāt kuśalo bhisak/ saptame vidase prāpte daśame dvādaśe+api vā// ### [6.39.46](https://indike.org/pramana/in.med.samhita.susruta.6.39.46) punardhorataro bhūtvā praśamaṃ yāti hanti vā/ dvidoṣocchrāyaliṅgāstu dvandvajāstrividhāḥ smṛtāḥ// ### [6.39.47](https://indike.org/pramana/in.med.samhita.susruta.6.39.47) tṛṣṇā mūrcchā bhramo dāhaḥ svapnanāśaḥ śirorujā/ kaṇṭhāsyaśoṣo vamathū romaharṣo+arucistathā// ### [6.39.48](https://indike.org/pramana/in.med.samhita.susruta.6.39.48) parvbhedaśca jṛmbhā ca vātapittajvarākṛtiḥ/ staimityaṃ parvaṇaṃ bhedo nidrā gauravameva ca// ### [6.39.49](https://indike.org/pramana/in.med.samhita.susruta.6.39.49) śirograhaḥ pratiśyāyaḥ kāsaḥ svedapravartanam/ santāpo madhyavegaśca vātaśleṣmajvarākṛtiḥ// ### [6.39.50](https://indike.org/pramana/in.med.samhita.susruta.6.39.50) liptātiktāsyatā tandrā mohaḥ kāso+arucistṛṣā/ muhurdāho muhuḥ śītaṃ śleṣmapittajvarākṛtiḥ// (/ jṛmbhādhmānamadotkampaparvabhedaparikṣayāḥ/ tṛṭpralāpābhitāpāḥ syurjvare mārutapaittike// śūlakāsakakotkleśaśītavepathupīnasāḥ/ gauravāruciviṣṭambhā vātaśleṣmasamudbhave// śītadāhārucistambhasvedamohamadabhramāḥ/ kāsāṅgasādahṛllāsā bhavanti kaphapaittike//) ### [6.39.51](https://indike.org/pramana/in.med.samhita.susruta.6.39.51) †kṛśānāṃ jvaramuktānāṃ mithyāhāravihāriṇām/ doṣaḥ svalpo+api saṃvṛddho dehināmanileritaḥ// ### [6.39.52](https://indike.org/pramana/in.med.samhita.susruta.6.39.52) satatānyedyuṣkatryākhyacāturthān sapralepakān/ kaphasthānavibhāgena yathāsaṃkhyaṃ karoti hi// ### [6.39.53](https://indike.org/pramana/in.med.samhita.susruta.6.39.53) ahorātrādahorātrāt sthānāt sthānaṃ prapadyate/ tataścāmāśayaṃ prāpya doṣaḥ† kuryājjvaraṃ nṛṇām// ### [6.39.54](https://indike.org/pramana/in.med.samhita.susruta.6.39.54) tathā pralepako jñeyaḥ† śoṣiṇāṃ prāṇanāśanaḥ/ duścikitsyatamo mandaḥ sukaṣṭo dhātuśoṣakṛt// ### [6.39.55](https://indike.org/pramana/in.med.samhita.susruta.6.39.55) kaphasthāneṣu vā doṣastiṣṭan dvitricaturṣu vā/ viparyayākhyān kurute viṣamān kṛcchrasādhanān// ### [6.39.56](https://indike.org/pramana/in.med.samhita.susruta.6.39.56) paro hetuḥ svabhāvo vā viṣame kaiścidīritaḥ/ āgantuścanubandho hi prāyaśo viṣamajvare// ### [6.39.57](https://indike.org/pramana/in.med.samhita.susruta.6.39.57) vātādhikatvāt pravadanti tajjñāstṛtīyakaṃ† cāpi caturthakaṃ ca/ aupatyake madyasamudbhave ca hetuṃ jvare pittakṛtaṃ vadanti// ### [6.39.58](https://indike.org/pramana/in.med.samhita.susruta.6.39.58) pralepakaṃ vātabalāsakaṃ ca kaphādhikatvena vadanti tajjñāḥ/ mūrcchānubandhā viṣamajvarā ye prāyeṇa te dvandvasamutthitāstu// ### [6.39.59](https://indike.org/pramana/in.med.samhita.susruta.6.39.59) tvaksthau śleṣmānilau śītamādau janayato jvare/ tayoḥ †praśāntayoḥ pittamante dāhaṃ karoti ca// ### [6.39.60](https://indike.org/pramana/in.med.samhita.susruta.6.39.60) karotyādau tathā pittaṃ tvaksthaṃ dāhamatīva ca/ praśānte kurutastasmiṃśchītamante ca tāvapi// ### [6.39.61](https://indike.org/pramana/in.med.samhita.susruta.6.39.61) dvāvetau dāhaśītādī jvarau saṃsargajau smṛtau/ dāhapūrvastayoḥ kaṣṭaḥ kṛcchrasādhyaśca sa smṛtaḥ// ### [6.39.62](https://indike.org/pramana/in.med.samhita.susruta.6.39.62) prasaktaścābhighātotthaścetanāprabhavastu† yaḥ/ rātryahnoḥ ṣaṭsu kāleṣu kīrtiteṣu tathā purā// ### [6.39.63](https://indike.org/pramana/in.med.samhita.susruta.6.39.63) prasahya viṣamo+abhyeti mānavaṃ bahudhā jvaraḥ/ sa cāpi viṣamo dehaṃ na kadācidvimuñcati// ### [6.39.64](https://indike.org/pramana/in.med.samhita.susruta.6.39.64) †glānigauravakārśyebhyaḥ sa yasmānna pramucyate/ vege tu samatikrānte gato+ayamiti lakṣyate// ### [6.39.65](https://indike.org/pramana/in.med.samhita.susruta.6.39.65) dhātvantarastho līnatvānna saukṣmyādupalabhyate/ alpadoṣendhanaḥ kṣīṇaḥ kṣīṇendhana ivānalaḥ// ### [6.39.66](https://indike.org/pramana/in.med.samhita.susruta.6.39.66) doṣo+alpo+ahitasaṃbhūto jvarotsṛṣṭasya vā punaḥ/ dhātumanyatamaṃ prāpya karoti viṣamajvaram// ### [6.39.67](https://indike.org/pramana/in.med.samhita.susruta.6.39.67) †satataṃ rasaraktasthaḥ so+anyedyuḥ piśitāśritaḥ/ medogatastṛtīye+ahni tvasthimajjagataḥ punaḥ// ### [6.39.68](https://indike.org/pramana/in.med.samhita.susruta.6.39.68) kuryāccāturthakaṃ ghoramantakaṃ rogasaṃkaram/ kecidbhūtābhiṣaṅgotthaṃ bruvate viṣamajvaram// ### [6.39.69](https://indike.org/pramana/in.med.samhita.susruta.6.39.69) saptāhaṃ vā daśāhaṃ vā dvādaśāhamathāpi vā/ santatyā yo+avisargī syātsantataḥ sa nigadyate// ### [6.39.70](https://indike.org/pramana/in.med.samhita.susruta.6.39.70) ahorātre satatako dvau kālāvanuvartate/ anyedyuṣkastvahorātrādekakālaṃ pravartate// ### [6.39.71](https://indike.org/pramana/in.med.samhita.susruta.6.39.71) tṛtīyakastṛtīye+ahni caturthe+ahni caturthakaḥ/ vātenodīryamāṇāśca hrīyamāṇāśca sarvataḥ/ ekadvidoṣā martyānāṃ tasminnevodite+ahani// ### [6.39.72](https://indike.org/pramana/in.med.samhita.susruta.6.39.72) velāṃ tāmeva kurvanti jvaravege muhurmuhuḥ/ (†vātenoddhūyamānastu yathā pūryeta sāgaraḥ// ### [6.39.73](https://indike.org/pramana/in.med.samhita.susruta.6.39.73) vātenodīritāstadvaddoṣāḥ kurvanti vai jvarān/ yathā vegāgame velāṃ chādayitvā mahodadheḥ// ### [6.39.74](https://indike.org/pramana/in.med.samhita.susruta.6.39.74) vegahānau tadevāmbhastatraivāntarnilīyate/ doṣavegodaye tadvadudīryeta jvaro+asya vai// ### [6.39.75](https://indike.org/pramana/in.med.samhita.susruta.6.39.75) vegahānau praśāmyeta yathā+ambhaḥ sāgare tathā/ vividhenābhighātena jvaro yaḥ saṃpravartate// ### [6.39.76](https://indike.org/pramana/in.med.samhita.susruta.6.39.76) yathādoṣaprakopaṃ tu tathā manyeta taṃ jvaram/ śyāvāsyatā viṣakṛte dāhātīsārahṛdgrahāḥ// ### [6.39.77](https://indike.org/pramana/in.med.samhita.susruta.6.39.77) abhaktaruk pipāsā ca todo mūrcchā balakṣayaḥ/ oṣadhīgandhaje mūrcchā śiroruk vamathuḥ kṣavaḥ// ### [6.39.78](https://indike.org/pramana/in.med.samhita.susruta.6.39.78) kāmaje cittavibhraṃśastandrā++ālasyamarocakaḥ/ hṛdaye vedanā cāsya gātraṃ ca pariśuṣyati// ### [6.39.79](https://indike.org/pramana/in.med.samhita.susruta.6.39.79) bhayāt pralāpaḥ śokācca bhavet kopācca vepathuḥ/ abhicārābhiśāpābhyāṃ mohastṛṣṇā ca jāyate// ### [6.39.80](https://indike.org/pramana/in.med.samhita.susruta.6.39.80) bhūtābhiṣaṅgādudvegahāsyakampanarodanam/ śramakṣayābhighātebhyo dehināṃ kupito+anilaḥ// ### [6.39.81](https://indike.org/pramana/in.med.samhita.susruta.6.39.81) pūrayitvā+akhilaṃ dehaṃ jvaramāpādayedbhṛśam/ rogāṇāṃ tu samutthānādvidāhāgantutastathā// ### [6.39.82](https://indike.org/pramana/in.med.samhita.susruta.6.39.82) jvaro+aparaḥ saṃbhavati taistairanyaiśca hetubhiḥ/ doṣāṇāṃ sa tu liṅgāni kadācinnātivartate// ### [6.39.83](https://indike.org/pramana/in.med.samhita.susruta.6.39.83) gurutā hṛdayotkleśaḥ sadanaṃ chardyarocakau/ rasasthe tu jvare liṅgaṃ dainyaṃ cāsyopajāyate// ### [6.39.84](https://indike.org/pramana/in.med.samhita.susruta.6.39.84) raktaniṣṭhīvanaṃ dāhaḥ svedaśchardanavibhramau/ pralāpaḥ piṭikā tṛṣṇā raktaprāpte jvare nṛṇām// ### [6.39.85](https://indike.org/pramana/in.med.samhita.susruta.6.39.85) piṇḍikodveṣṭanaṃ tṛṣṇā sṛṣṭamūtrapurīṣatā/ †ūṣmā+antardāhavikṣepau glāniḥ syānmāṃsage jvare// ### [6.39.86](https://indike.org/pramana/in.med.samhita.susruta.6.39.86) bhṛśaṃ svedastṛṣā mūrcchā pralāpaśchardireva ca/ daurgandhyārocakau glānirmedaḥsthe cāsahiṣṇutā// ### [6.39.87](https://indike.org/pramana/in.med.samhita.susruta.6.39.87) bhedo+asthnāṃ kuñcanaṃ(kuñcajanaṃ) śvāso virekaśchardireva ca/ vikṣepaṇaṃ ca gātrāṇāmetadasthigate jvare// ### [6.39.88](https://indike.org/pramana/in.med.samhita.susruta.6.39.88) tamaḥpraveśanaṃ hikkā kāsaḥ śaityaṃ vamistathā/ antardāho mahāśvāso marmacchedaśca majjage/ maraṇaṃ prāpruyāttatra śukrasthānagate jvare// ### [6.39.89](https://indike.org/pramana/in.med.samhita.susruta.6.39.89) śephasaḥ stabdhatā mokṣaḥ śukrasya tu viśeṣataḥ/ dagdhvendhanaṃ yathā vahnirdhātūn hatvā yathā viṣam// ### [6.39.90](https://indike.org/pramana/in.med.samhita.susruta.6.39.90) kṛtakṛtyo vrajecchāntiṃ dehaṃ hatvā tathā jvaraḥ/ vātapittakaphotthānāṃ jvarāṇāṃ lakṣaṇaṃ yathā// ### [6.39.91](https://indike.org/pramana/in.med.samhita.susruta.6.39.91) tathā teṣāṃ bhiṣagbrūyādrasādiṣvapi buddhimān/ samastaiḥ sannipātena dhātusthamapi nirdiśet// ### [6.39.92](https://indike.org/pramana/in.med.samhita.susruta.6.39.92) dvandvajaṃ dvandvajaireva doṣaiścāpi vadet kṛtam/ gambhīrastu jvaro jñeyo hyantardāhena tṛṣṇayā// ### [6.39.93](https://indike.org/pramana/in.med.samhita.susruta.6.39.93) ānaddhatvena cātyarthaṃ śvāsakāsodgamena ca/ hataprabhendriyaṃ †kṣīṇamarocakanipīḍitam// ### [6.39.94](https://indike.org/pramana/in.med.samhita.susruta.6.39.94) gambhīratīkṣṇavegārtaṃ jvaritaṃ parivarjayet/ hīnamadhyādhikairdoṣaistrisaptadvādaśāhikaḥ// ### [6.39.95](https://indike.org/pramana/in.med.samhita.susruta.6.39.95) jvaravego bhavettīvro yathāpūrvaṃ sukhakriyaḥ/ kālo hyeṣa yamaścaiva niyatirmṛtyureva ca// ### [6.39.96](https://indike.org/pramana/in.med.samhita.susruta.6.39.96) tasmin vyapagate dehājjanmeha punarucyate/ iti jvarāḥ samākhyātāḥ karmedānīṃ pravakṣyate// ### [6.39.97](https://indike.org/pramana/in.med.samhita.susruta.6.39.97) jvarasya pūrvarūpeṣu vartamāneṣu buddhimān/ pāyayeta ghṛtaṃ svacchaṃ tataḥ sa labhate sukham// ### [6.39.98](https://indike.org/pramana/in.med.samhita.susruta.6.39.98) vidhirmārutajeṣveṣa paittikeṣu virecanam/ mṛdu pracchardanaṃ tadvatkaphajeṣu vidhīyate// ### [6.39.99](https://indike.org/pramana/in.med.samhita.susruta.6.39.99) sarvadvidoṣajeṣūktaṃ yathādoṣaṃ vikalpayet/ asnehanīyo+aśodhyaśca saṃyojyo laṅghanādinā// ### [6.39.100](https://indike.org/pramana/in.med.samhita.susruta.6.39.100) rūpaprāgrūpayorvidyānnānātvaṃ vahnidhūmavat/ pravyaktarūpeṣu hitamekāntenāpatarpaṇam// ### [6.39.101](https://indike.org/pramana/in.med.samhita.susruta.6.39.101) āmāśayasthe doṣe tu sotkleśe vamanaṃ param/ ānaddhaḥ stimitairdoṣairyāvantaṃ kālamāturaḥ// ### [6.39.102](https://indike.org/pramana/in.med.samhita.susruta.6.39.102) kuryādanaśanaṃ tāvattataḥ saṃargamācaret/ na laṅghayenmārutaje kṣayaje mānase tathā// ### [6.39.103](https://indike.org/pramana/in.med.samhita.susruta.6.39.103) alaṅghyāścāpi ye pūrvaṃ dvivraṇīye prakīrtitāḥ/ anavasthitadoṣāgnerlaṅghanaṃ doṣapācanam// ### [6.39.104](https://indike.org/pramana/in.med.samhita.susruta.6.39.104) jvaraghnaṃ dīpanaṃ kāṅkṣārucilāghavakārakam/ sṛṣṭamārutaviṇmūtraṃ kṣutpipāsā+asahaṃ laghum// ### [6.39.105](https://indike.org/pramana/in.med.samhita.susruta.6.39.105) prasannātmendriyaṃ kṣāmaṃ naraṃ vidyāt sulaṅghitam/ balakṣayastṛṣā śoṣastandrānidrābhramaklamāḥ// ### [6.39.106](https://indike.org/pramana/in.med.samhita.susruta.6.39.106) upadravāśca śvāsādyāḥ saṃbhavantyatilaṅghanāt/ dīpanaṃ kaphavicchedi pittavātānulomanam// ### [6.39.107](https://indike.org/pramana/in.med.samhita.susruta.6.39.107) kaphavātajvarārtebhyo hitamuṣṇāmbu tṛṭchidam/ taddhi mārdavakṛddoṣasrotasāṃ śītamanyathā// ### [6.39.108](https://indike.org/pramana/in.med.samhita.susruta.6.39.108) sevyamānena toyena jvaraḥ śītena vardhate/ pittamadyaviṣottheṣu śītalaṃ tiktakaiḥ śṛtam// ### [6.39.109](https://indike.org/pramana/in.med.samhita.susruta.6.39.109) gāṅgeyanāgarośīraparpaṭodīcyacandanaiḥ/ dīpanī pācanī laghvī jvarārtānāṃ jvarāpahā// ### [6.39.110](https://indike.org/pramana/in.med.samhita.susruta.6.39.110) annakāle hitā peyā yathāsvaṃ pācanaiḥ kṛtā/ bahudoṣasya mandāgneḥ saptarātrāt paraṃ jvare// ### [6.39.111](https://indike.org/pramana/in.med.samhita.susruta.6.39.111) †laṅghanāmbuyavāgūbhiryadā doṣo na pacyate/ tadā taṃ mukhavairasyatṣṇārocakanāśanaiḥ// ### [6.39.112](https://indike.org/pramana/in.med.samhita.susruta.6.39.112) kaṣāyaiḥ pācanairhṛdyairjvaraghnaiḥ samupācaret/ pañcamūlīkaṣāyaṃ tu pācanaṃ pavanajvare// ### [6.39.113](https://indike.org/pramana/in.med.samhita.susruta.6.39.113) sakṣaudraṃ paittike mustakaṭukendrayavaiḥ kṛtam/ pippalyādikaṣāyaṃ tu kaphaje paripācanam// ### [6.39.114](https://indike.org/pramana/in.med.samhita.susruta.6.39.114) dvandvajeṣu tu saṃsṛṣṭaṃ dadyādatha vivarjayet/ pītāmburlaṅghito bhukto+ajīrṇī kṣīṇaḥ pipāsitaḥ// ### [6.39.115](https://indike.org/pramana/in.med.samhita.susruta.6.39.115) (tīkṣṇe jvare gurau dehe vibaddheṣu maleṣu ca/ sāmadoṣaṃ vijānīyājjvaraṃ pakvamato+ayathā†//) mṛdau jvare laghau dehe pracaleṣu maleṣu ca/ pakvaṃ doṣaṃ vijānīyājjvare deyaṃ tadauṣadham// ### [6.39.116](https://indike.org/pramana/in.med.samhita.susruta.6.39.116) doṣaprakṛtivaikṛtyādekeṣāṃ pakvalakṣaṇam/ hṛdayodveṣṭanaṃ tandrā lālāsrutirarocakaḥ// ### [6.39.117](https://indike.org/pramana/in.med.samhita.susruta.6.39.117) doṣāpravṛttirālasyaṃ vibandho bahumūtratā/ gurūdaratvamasvedo na paktiḥ śakṛto+aratiḥ// ### [6.39.118](https://indike.org/pramana/in.med.samhita.susruta.6.39.118) svāpaḥ stambho gurutvaṃ ca gātrāṇāṃ vahnimārdavam/ mukhasyāśuddhiraglāniḥ prasaṅgī balavāñjvaraḥ// ### [6.39.119](https://indike.org/pramana/in.med.samhita.susruta.6.39.119) liṅgairebhirvijānīyājjvaramāmaṃ vicakṣaṇaḥ/ saptarātrātparaṃ kecinmanyante deyamauṣadham// ### [6.39.120](https://indike.org/pramana/in.med.samhita.susruta.6.39.120) daśarātrātparaṃ keciddātavyamiti niścitāḥ/ paittike vā jvare deyamalpakālasamutthite// ### [6.39.121](https://indike.org/pramana/in.med.samhita.susruta.6.39.121) acirajvaritasyāpi deyaṃ syāddoṣapākataḥ/ bheṣajaṃ hyāmadoṣasya bhūyo jvalayati jvaram// ### [6.39.122](https://indike.org/pramana/in.med.samhita.susruta.6.39.122) śodhanaṃ śamanīyaṃ tu karoti viṣamajvaram/ cyavamānaṃ jvarotkliṣṭamupekṣeta malaṃ sadā// ### [6.39.123](https://indike.org/pramana/in.med.samhita.susruta.6.39.123) atipravartamānaṃ ca sādhayedatisāravat/ yadā koṣṭhānugāḥ pakvā vibaddhāḥ srotasāṃ malāḥ// ### [6.39.124](https://indike.org/pramana/in.med.samhita.susruta.6.39.124) acirajvaritasyāpi tadā dadyādvirecanam/ pakvo hyanirhṛto doṣo dehe tiṣṭhan mahātyayam// ### [6.39.125](https://indike.org/pramana/in.med.samhita.susruta.6.39.125) viṣamaṃ vā jvaraṃ kuryādbalavyāpadameva ca/ tasmānnirharaṇaṃ kāryaṃ doṣāṇāṃ vamanādibhiḥ// ### [6.39.126](https://indike.org/pramana/in.med.samhita.susruta.6.39.126) prakkarma vamanaṃ cāsya kāryamāsthāpanaṃ tathā/ virecanaṃ tathā kuryācchirasaśca virecanam// ### [6.39.127](https://indike.org/pramana/in.med.samhita.susruta.6.39.127) kramaśaḥ baline deyaṃ vamanaṃ ślaiṣmike jvare/ pittaprāye virekastu kāryaḥ praśithilāśaye// ### [6.39.128](https://indike.org/pramana/in.med.samhita.susruta.6.39.128) saruje+anilaje kāryaṃ sodāvarte nirūhaṇam/ kaṭīpṛṣṭhagrahārtasya dīptāgneranuvāsanam// ### [6.39.129](https://indike.org/pramana/in.med.samhita.susruta.6.39.129) śirogauravaśūlaghnamindriyapratibodhanam/ kaphābhipanne śirasi kāryaṃ mūrdhavirecanam// ### [6.39.130](https://indike.org/pramana/in.med.samhita.susruta.6.39.130) durbalasya samādhmātamudaraṃ sarujaṃ dihet/ dāruhaimavatīkuṣṭhaśatāhvāhiṅgusaindhavaiḥ// ### [6.39.131](https://indike.org/pramana/in.med.samhita.susruta.6.39.131) amlapiṣṭaiḥ sukhoṣṇaiśca pavane tūrdhvamāgate/ ruddhamūtrapurīṣāya gude vartiṃ nidhāpayet// ### [6.39.132](https://indike.org/pramana/in.med.samhita.susruta.6.39.132) pippālīpippalīmūlayavānīcavyasādhitām/ pāyayeta yavāgūṃ vā mārutādyanulominīm// ### [6.39.133](https://indike.org/pramana/in.med.samhita.susruta.6.39.133) śuddhasyobhayato yasya jvaraḥ śāntiṃ na gacchati/ saśeṣadoṣarūkṣasya tasya taṃ sarpiṣā jayet// ### [6.39.134](https://indike.org/pramana/in.med.samhita.susruta.6.39.134) kṛśaṃ caivālpadoṣaṃ ca śamanīyairupācaret/ upavāsairbalasthaṃ tu jvare santarpaṇotthite// ### [6.39.135](https://indike.org/pramana/in.med.samhita.susruta.6.39.135) klinnāṃ yavāgūṃ mandāgniṃ tṛṣārtaṃ pāyayennaram/ tṛṭchardidāhagharmārtaṃ madyapaṃ lājatarpaṇam// ### [6.39.136](https://indike.org/pramana/in.med.samhita.susruta.6.39.136) sakṣaudramambhasā paścājjīrṇe yūṣarasaudanam/ upavāsaśramakṛte kṣīṇaṃ(kṣīṇe) vātādhike jvare// ### [6.39.137](https://indike.org/pramana/in.med.samhita.susruta.6.39.137) dīptāgniṃ bhojayet prājño naraṃ māṃsarasaudanam/ mudgayūṣaudanaścāpi hitaḥ kaphasamutthite// ### [6.39.138](https://indike.org/pramana/in.med.samhita.susruta.6.39.138) sa eva sitayā yuktaḥ śītaḥ pittajvare hitaḥ/ dāḍimāmalamudgānāṃ yūṣaścānilapaittike// ### [6.39.139](https://indike.org/pramana/in.med.samhita.susruta.6.39.139) †hrasvamūlakayūṣastu vātaśleṣmādhike hitaḥ/ paṭolanimbayūṣastu pathyaḥ pittakaphātmake// ### [6.39.140](https://indike.org/pramana/in.med.samhita.susruta.6.39.140) dāhacchardiyutaṃ kṣāmaṃ nirannaṃ tṛṣṇayā+arditam/ sitākṣaudrayutaṃ lājatarpaṇaṃ pāyayeta ca// ### [6.39.141](https://indike.org/pramana/in.med.samhita.susruta.6.39.141) kaphapittaparītasya grīṣme+asṛkpittinastathā/ madyanityasya na hitā yavāgūstamupācaret// ### [6.39.142](https://indike.org/pramana/in.med.samhita.susruta.6.39.142) yūṣairamlairanamlairvā jāṅgalaiśca rasairhitaiḥ/ madyaṃ purāṇaṃ mandāgneryavānnopahitaṃ hitam// ### [6.39.143](https://indike.org/pramana/in.med.samhita.susruta.6.39.143) savyoṣaṃ vitarettakraṃ kaphārocakapīḍite/ kṛśo+alpadoṣo dīnaśca naro jīrṇajvarārditaḥ// ### [6.39.144](https://indike.org/pramana/in.med.samhita.susruta.6.39.144) vibaddhaḥ sṛṣṭadoṣaśca rūkṣaḥ pittānilajvarī/ pipāsārtaḥ sadāho vā payasā sa sukhī bhavet// ### [6.39.145](https://indike.org/pramana/in.med.samhita.susruta.6.39.145) †tadeva taruṇe pītaṃ viṣavaddhanti mānavam/ sarvajvareṣu sulaghu mātrāvadbhojanaṃ hitam// ### [6.39.146](https://indike.org/pramana/in.med.samhita.susruta.6.39.146) vegāpāye+anyathā taddhi jvaravegābhivardhanam/ jvarito hitamaśnīyādyadyapyasyārucirbhavet// ### [6.39.147](https://indike.org/pramana/in.med.samhita.susruta.6.39.147) annakāle hyabhuñjānaḥ kṣīyate mriyate+athavā/ sa kṣīṇaḥ kṛcchratāṃ yāti yātyasādhyatvameva ca// ### [6.39.148](https://indike.org/pramana/in.med.samhita.susruta.6.39.148) tasmādrakṣedbalaṃ puṃsāṃ bale sati hi jīvitam/ gurvabhiṣyandyakāle ca jvarī nādyāt kathañcana// ### [6.39.149](https://indike.org/pramana/in.med.samhita.susruta.6.39.149) na tu tasyāhitaṃ bhuktamāyuṣe vā sukhāya vā/ saṃtataṃ viṣamaṃ vā+api kṣīṇasya sucirotthitam// ### [6.39.150](https://indike.org/pramana/in.med.samhita.susruta.6.39.150) jvaraṃ saṃbhojanaiḥ pathyairlaghubhiḥ samupācaret/ mudgānmasūrāṃścaṇakān kulatthān samakuṣṭhakān// ### [6.39.151](https://indike.org/pramana/in.med.samhita.susruta.6.39.151) āhārakāle yūṣārthaṃ jvaritāya pradāpayet/ paṭolapatraṃ vārtākaṃ kaṭhillaṃ pāpacailikam// ### [6.39.152](https://indike.org/pramana/in.med.samhita.susruta.6.39.152) karkāṭakaṃ parpaṭakaṃ gojihvāṃ bālamūlakam/ patraṃ guḍūcyāḥ śākārthe jvaritānāṃ pradāpayet// ### [6.39.153](https://indike.org/pramana/in.med.samhita.susruta.6.39.153) lāvān kapiñjalāneṇān pṛṣatāñcharabhāñchaśān/ kālapucchān kuraṅgāṃśca tathaiva mṛgamātṛkān// ### [6.39.154](https://indike.org/pramana/in.med.samhita.susruta.6.39.154) māṃsārthe māṃsasātmyānāṃ †jvaritānāṃ pradāpayet/ sārasakrauñcaśikhinaḥ kukkuṭāṃstittirāṃs(tittirīṃ)tathā// ### [6.39.155](https://indike.org/pramana/in.med.samhita.susruta.6.39.155) gurūṣṇatvānna śaṃsanti jvare keciccikitsakāḥ/ jvaritānāṃ prakopaṃ tu yadā yāti samīraṇaḥ// ### [6.39.156](https://indike.org/pramana/in.med.samhita.susruta.6.39.156) tadaite+api hi śasyante mātrākālopapāditāḥ/ pariṣekān pradehāṃśca snehān saṃśodhanāni ca// ### [6.39.157](https://indike.org/pramana/in.med.samhita.susruta.6.39.157) (snānābhyaṅgadivāsvapnaśītavyāyāmayoṣitaḥ)/ kaṣāyagururūkṣāṇi krodhādīni tathaiva ca// ### [6.39.158](https://indike.org/pramana/in.med.samhita.susruta.6.39.158) sāravanti ca bhojyāni varjayettaruṇajvarī/ tathaiva navadhānyādiṃ varjayecca samāsataḥ// ### [6.39.159](https://indike.org/pramana/in.med.samhita.susruta.6.39.159) anavasthitadoṣāgnerebhiḥ sandhukṣito jvaraḥ/ gambhīratīkṣṇavegatvaṃ yātyamādhyatvameva ca// ### [6.39.160](https://indike.org/pramana/in.med.samhita.susruta.6.39.160) śītatoyadivāsvapnakrodhavyāyāmayoṣitaḥ/ na seveta jvarotsṛṣṭo yāvanna balavān bhavet// ### [6.39.161](https://indike.org/pramana/in.med.samhita.susruta.6.39.161) muktasyāpi jvareṇāśu durbalasyāhitairjvaraḥ/ pratyāpanno daheddehaṃ śuṣkaṃ vṛkṣamivānalaḥ// ### [6.39.162](https://indike.org/pramana/in.med.samhita.susruta.6.39.162) tasmātkāryaḥ parīhāro jvaramuktairviriktavat/ yāvanna prakṛtisthaḥ syāddoṣataḥ prāṇatastathā// ### [6.39.163](https://indike.org/pramana/in.med.samhita.susruta.6.39.163) jvare pramoho bhavati svalpairapyavaceṣṭitaiḥ/ niṣaṇṇaṃ bhojayettasmānmūtroccārau ca kārayet// ### [6.39.164](https://indike.org/pramana/in.med.samhita.susruta.6.39.164) arocake gātrasāde vaivarṇye+aṅgamalādiṣu/ śāntajvaro+api śodhyaḥ syādanubandhabhayānnaraḥ// ### [6.39.165](https://indike.org/pramana/in.med.samhita.susruta.6.39.165) na jātu †snāpayet prājñaḥ sahasā jvarakarśitam/ tena saṃdūṣito hyasya punareva bhavejjvaraḥ// ### [6.39.166](https://indike.org/pramana/in.med.samhita.susruta.6.39.166) cikitsecca jvarān sarvānnimittānāṃ viparyayaiḥ/ śramakṣayābhighātotthe mūlavyādhimupācaret// ### [6.39.167](https://indike.org/pramana/in.med.samhita.susruta.6.39.167) strīṇāmapaprajātānāṃ stanyāvataraṇe ca yaḥ/ tatra saṃśamanaṃ kuryādyathādoṣaṃ vidhānavit// ### [6.39.168](https://indike.org/pramana/in.med.samhita.susruta.6.39.168) ataḥ saṃśamanīyāni kaṣāyāṇi nibodha me/ sarvajvareṣu deyāni yāni vaidyena jānatā// ### [6.39.169](https://indike.org/pramana/in.med.samhita.susruta.6.39.169) pippalīsārivādrākṣāśatapuṣoāhareṇubhiḥ/ kṛtaḥ kaṣāyaḥ saguḍo hanyācchvasanajaṃ jvaram// ### [6.39.170](https://indike.org/pramana/in.med.samhita.susruta.6.39.170) śṛtaṃ śītakaṣāyaṃ vā guḍūcyāḥ peyameva tu/ balādarbhaśvadaṃṣṭrāṇāṃ kaṣāyaṃ pādaśeṣitam// ### [6.39.171](https://indike.org/pramana/in.med.samhita.susruta.6.39.171) śarkarāghṛtasaṃyuktaṃ pibedvātajvarāpaham/ śatapuṣpāvacākuṣṭhadevadāruhareṇukāḥ// ### [6.39.172](https://indike.org/pramana/in.med.samhita.susruta.6.39.172) kustumburūṇi naladaṃ †mustaṃ caivāpsu sādhayet/ kṣaudreṇa sitayā cāpi yuktaḥ kvātho+anilādhike// ### [6.39.173](https://indike.org/pramana/in.med.samhita.susruta.6.39.173) drākṣāguḍūcīkāśmaryatrāyamāṇāḥ sasārivāḥ/ niṣkvāthya saguḍaṃ kvāthaṃ pibedvātakṛte jvare// ### [6.39.174](https://indike.org/pramana/in.med.samhita.susruta.6.39.174) guḍūcyāḥ svaraso grāhyaḥ śatāvaryāśca tatsamaḥ/ nihanyātsaguḍaḥ pītaḥ sadyo+anilakṛtaṃ jvaram// ### [6.39.175](https://indike.org/pramana/in.med.samhita.susruta.6.39.175) ghṛtābhyaṅgasvedalepānavasthāsu ca yojayet/ śrīparṇīcandanośīraparūṣakamadhūkajaḥ// ### [6.39.176](https://indike.org/pramana/in.med.samhita.susruta.6.39.176) śarkarāmadhuro hanti kaṣāyaḥ paittikaṃ jvaram/ pītaṃ pittajvaraṃ hanyātsārivādyaṃ saśarkaram// ### [6.39.177](https://indike.org/pramana/in.med.samhita.susruta.6.39.177) sayaṣṭīmadhukaṃ hanyāttathaivotpalapūrvakam/ śṛtaṃ śītakaṣāyaṃ vā sotpalaṃ śarkarāyutam// ### [6.39.178](https://indike.org/pramana/in.med.samhita.susruta.6.39.178) guḍūcīpadmarodhrāṇāṃ sārivotpalayostathā/ śarkarāmadhuraḥ kvāthaḥ śītaḥ pittajvarāpahaḥ// ### [6.39.179](https://indike.org/pramana/in.med.samhita.susruta.6.39.179) drākṣāragvadhayoścāpi kāśmaryasyāthavā punaḥ/ svādutiktakaṣāyāṇāṃ kaṣāyaiḥ śarkarāyutaiḥ// ### [6.39.180](https://indike.org/pramana/in.med.samhita.susruta.6.39.180) suśītaiḥ śamayettṛṣṇāṃ pravṛddhāṃ dāhameva ca/ śītaṃ madhuyutaṃ toyamākaṇṭhādvā pipāsitam// ### [6.39.181](https://indike.org/pramana/in.med.samhita.susruta.6.39.181) vāmayetpāyayitvā tu tena tṛṣṇā praśāmyati/ kṣīraiḥ kṣīrikaṣāyaiśca suśītaiścandanāyutaiḥ// ### [6.39.182](https://indike.org/pramana/in.med.samhita.susruta.6.39.182) antardāhe vidhātavyamebhiścānyaiśca śītalaiḥ/ padmakaṃ madhukaṃ drākṣāṃ puṇḍarīkamathotpalam// ### [6.39.183](https://indike.org/pramana/in.med.samhita.susruta.6.39.183) yavān bhṛṣṭānuśīrāṇi samaṅgāṃ kaśmarīphalam/ nidadhyādapsu cāloḍya niśāparyuṣitaṃ tataḥ// ### [6.39.184](https://indike.org/pramana/in.med.samhita.susruta.6.39.184) kṣaudreṇa yuktaṃ pibato jvaradāhau praśāmyataḥ/ jihvātālugalaklomaśoṣe mūrdhni ca dāpayet// ### [6.39.185](https://indike.org/pramana/in.med.samhita.susruta.6.39.185) keśaraṃ mātuluṅgasya madhusaindhavasaṃyutam/ śarkarādāḍimābhyāṃ vā drākṣākharjūrayostathā// ### [6.39.186](https://indike.org/pramana/in.med.samhita.susruta.6.39.186) vairasye dhārayetkalkaṃ gaṇḍūṣaṃ ca tathā hitam/ saptacchadaṃ guḍūcīṃ ca nimbaṃ sphūrjakameva ca// ### [6.39.187](https://indike.org/pramana/in.med.samhita.susruta.6.39.187) kvāthayitvā pibet kvāthaṃ sakṣaudraṃ kaphaje jvare/ kaṭutrikaṃ nāgapuṣpaṃ haridrā kaṭurohiṇī// ### [6.39.188](https://indike.org/pramana/in.med.samhita.susruta.6.39.188) kauṭajaṃ ca phalaṃ hanyāt sevyamānaṃ kaphajvaram/ haridrāṃ ciatrakaṃ nimbamuśīrātiviṣe vacām// ### [6.39.189](https://indike.org/pramana/in.med.samhita.susruta.6.39.189) kuṣṭhamindrayavān mūrvāṃ paṭolaṃ cāpi sādhitam/ pibenmaricasaṃyuktaṃ sakṣaudraṃ kaphaje jvare// ### [6.39.190](https://indike.org/pramana/in.med.samhita.susruta.6.39.190) sārivātiviṣākuṣṭhapurākhyaiḥ sadurālabhaiḥ/ mustena ca kṛtaḥ kvāthaḥ pīto hanyāt kaphajvaram// ### [6.39.191](https://indike.org/pramana/in.med.samhita.susruta.6.39.191) mustaṃ vṛkṣakabījāni triphalā kaṭurohiṇī/ parūṣakāṇi ca kvāthaḥ kaphajvaravināśanaḥ// ### [6.39.192](https://indike.org/pramana/in.med.samhita.susruta.6.39.192) rājavṛkṣādivargasya kaṣāyo madhusaṃyutaḥ/ kaphavātajvaraṃ hanyācchīghraṃ kāle+avacāritaḥ// ### [6.39.193](https://indike.org/pramana/in.med.samhita.susruta.6.39.193) nāgaraṃ dhānyakaṃ bhārgīmabhayāṃ suradāru ca/ vacāṃ parpaṭakaṃ mustaṃ bhūtīkamatha kaṭphalam// ### [6.39.194](https://indike.org/pramana/in.med.samhita.susruta.6.39.194) niṣkvāthya kaphavātotthe kṣaudrahiṅgusamanvitam/ dātavyaṃ(apātavyaṃ) śvāsakāsaghnaṃ śleṣmotseke galagrahe// ### [6.39.195](https://indike.org/pramana/in.med.samhita.susruta.6.39.195) hikkāsu kaṇṭhaśvayathau śūle hṛdayapārśvaje/ balāpaṭolatriphalāyaṣṭyāhvānāṃ vṛṣasya ca// ### [6.39.196](https://indike.org/pramana/in.med.samhita.susruta.6.39.196) kvātho madhuyutaḥ pīto hanti pittakaphajvaram/ kaṭukāvijayādrākṣāmustaparpaṭakaiḥ kṛtaḥ// ### [6.39.197](https://indike.org/pramana/in.med.samhita.susruta.6.39.197) kaṣāyo nāśayet pītaḥ śleṣmapittabhavaṃ jvaram/ bhārgīvacāparpaṭakadhānyahiṅgvabhayāghanaiḥ// ### [6.39.198](https://indike.org/pramana/in.med.samhita.susruta.6.39.198) kāśmaryanāgaraiḥ kvāthaḥ sakṣaudraḥ śleṣmapittaje/ saśarkarāmakṣamātrāṃ kaṭukāmuṣṇavāriṇā// ### [6.39.199](https://indike.org/pramana/in.med.samhita.susruta.6.39.199) pītvā jvaraṃ jayejjantuḥ kaphapittasamudbhavam/ kirātatiktamamṛtāṃ drākṣāmāmalakaṃ śaṭīm// ### [6.39.200](https://indike.org/pramana/in.med.samhita.susruta.6.39.200) niṣkvāthya vātapittotthe taṃ kvāthaṃ saguḍaṃ pibet/ rāsnā vṛṣo+atha triphalā rājavṛkṣaphalaiḥ saha// _First 200 of 326 passages. [Read on](https://indike.org/pramana/in.med.samhita.susruta.6.39)_ ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.172.2) — Ḍalhaṇa, Sanskrit ## Linked texts (10) - [Hārītasaṃhitā](https://indike.org/pramana/in.med.samhita.haritasamhita.3.3.1.66) — Hārīta, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.4.3.33) — Śārṅgadhara (physician), Sanskrit - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.81.23) — Trimalla, Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.83.24) — Trimalla, Sanskrit - [Bhaiṣajyaratnāvalī (ed. Rājeśvaradatta Śāstrī)](https://indike.org/pramana/in.med.cikitsa.gauda.bhaisajyaratnavali*sastri1978.5.13) — Sanskrit - [Jvaratimirabhāskara (Cāmuṇḍa Kāyastha)](https://indike.org/pramana/in.med.cikitsa.jvara.jvaratimirabhaskara.12.21) — Cāmuṇḍa Kāyastha 1598, Sanskrit - [Śivatattvaratnākara](https://indike.org/pramana/in.niti.dharma.rajadharma.sivatattvaratnakara.74.134) — Basappa Nāyaka 1684, Sanskrit - [Śivattvaratnākara](https://indike.org/pramana/in.med.pasu.sivattvaratnakara.74.134) — Basava, Sanskrit - [Ārogyacintāmaṇi (Dāmodaramiśra)](https://indike.org/pramana/in.med.sangraha.arogyacintamani-damodara.99.12) — Dāmodaramiśra, Sanskrit - [Vaidyakasāroddhāra](https://indike.org/pramana/in.med.cikitsa.gauda.vaidyakasaroddhara.2.p3) — Brajanāthaśarman, Sanskrit --- Source: [https://indike.org/pramana/in.med.samhita.susruta.6.39](https://indike.org/pramana/in.med.samhita.susruta.6.39) · Pramāṇa