[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.3 # The Compendium of Suśruta 6.3: tṛtīyo+adhyāyaḥ/ Suśrutasaṃhitā 6.3 - **Language:** Sanskrit ### tṛtīyo+adhyāyaḥ/ ### [6.3.1](https://indike.org/pramana/in.med.samhita.susruta.6.3.1) athāto vartmagatarogavijñānīyamadhyāyaṃ vyākhyāsyāmaḥ// ### [6.3.2](https://indike.org/pramana/in.med.samhita.susruta.6.3.2) yathovāca bhagavān dhanvantariḥ// ### [6.3.3](https://indike.org/pramana/in.med.samhita.susruta.6.3.3) pṛthagdoṣāḥ samastā vā yadā vartmavyapāśrayāḥ/ sirā vyāpyāvatiṣṭhante vartmasvadhikamūrcchitāḥ// ### [6.3.4](https://indike.org/pramana/in.med.samhita.susruta.6.3.4) †vivardhya māṃsaṃ raktaṃ ca tadā vartmavyapāśrayān/ vikārāñjanayantyāśu nāmatastānnibodhata// ### [6.3.5](https://indike.org/pramana/in.med.samhita.susruta.6.3.5) utsaṅginyatha kumbhīkā pothakyo vartmaśarkarā/ tathā+arśovartma śuṣkārśastathaivāñjananāmikā// ### [6.3.6](https://indike.org/pramana/in.med.samhita.susruta.6.3.6) bahalaṃ vartma yaccāpi vyādhirvartmāvabandhakaḥ/ kliṣṭakardamavartmākhyau śyāvavartma tathaiva ca// ### [6.3.7](https://indike.org/pramana/in.med.samhita.susruta.6.3.7) praklinnamapariklinnaṃ vartma vātahataṃ tu yat/ arbudaṃ nimiṣaścāpi śoṇitārśaśca yat smṛtam// ### [6.3.8](https://indike.org/pramana/in.med.samhita.susruta.6.3.8) lagaṇo biśanāmā ca pakṣmakopastathaiva ca/ ekaviṃśatirityete vikārā vartmasaṃśrayāḥ// ### [6.3.9](https://indike.org/pramana/in.med.samhita.susruta.6.3.9) nāmabhiste samuddiṣṭā lakṣaṇaistān pracakṣmahe/ abhyantaramukhī bāhyotsaṅge+adho vartmanaśca† yā// ### [6.3.10](https://indike.org/pramana/in.med.samhita.susruta.6.3.10) vijñeyotsaṅginī nāma tadrūpapiḍakācitā/ kumbhīkabījapratimāḥ piḍakā †yāstu vartmajāḥ// ### [6.3.11](https://indike.org/pramana/in.med.samhita.susruta.6.3.11) †ādhmāpayanti bhinnā yāḥ kumbhīkapiḍakāstu tāḥ/ srāviṇyaḥ †kaṇḍurā gurvyo raktasarṣapasannibhāḥ/ piḍakāśca rujāvatyaḥ pothakya iti saṃjñitāḥ// ### [6.3.12](https://indike.org/pramana/in.med.samhita.susruta.6.3.12) piḍakābhiḥ susūkṣmābhirghanābhirabhisaṃvṛtā/ piḍakā yā kharā sthūlā sā jñeyā vartmaśarkarā// ### [6.3.13](https://indike.org/pramana/in.med.samhita.susruta.6.3.13) †ervārubījapratimāḥ piḍakā mandavedanāḥ/ sūkṣmāḥ kharāśca vartmasthāstadarśovartma kīrtyate// ### [6.3.14](https://indike.org/pramana/in.med.samhita.susruta.6.3.14) dīrgho+aṅkuraḥ kharaḥ stabdho dāruṇo vartmasaṃbhavaḥ/ vyādhireṣa samākhyātaḥ śuṣkārśa iti saṃjñitaḥ// ### [6.3.15](https://indike.org/pramana/in.med.samhita.susruta.6.3.15) dāhatodavatī tāmrā piḍakā vartmasaṃbhavā/ mṛdvī mandarujā sūkṣmā jñeyā sā+añjananāmikā// ### [6.3.16](https://indike.org/pramana/in.med.samhita.susruta.6.3.16) vartmopacīyate yasya piḍakābhiḥ samantataḥ/ savarṇābhiḥ samābhiśca vidyādbahalavartma tat// ### [6.3.17](https://indike.org/pramana/in.med.samhita.susruta.6.3.17) kaṇḍūmatā+alpatodena vartmaśophena yo naraḥ/ na samaṃ chādayedakṣi bhavedbandhaḥ sa vartmanaḥ// ### [6.3.18](https://indike.org/pramana/in.med.samhita.susruta.6.3.18) mṛdvalpavedanaṃ tāmraṃ yadvartma samameva ca/ akasmācca bhavedraktaṃ kliṣṭavartma tadādiśet// ### [6.3.19](https://indike.org/pramana/in.med.samhita.susruta.6.3.19) kliṣṭaṃ punaḥ pittayutaṃ vidahecchoṇitaṃ yadā/ tadā klinnatvamāpannamucyate vartmakardamaḥ// ### [6.3.20](https://indike.org/pramana/in.med.samhita.susruta.6.3.20) yadvartma bāhyato+anyaśca śyāvaṃ śūnaṃ savedanam/ dāhakaṇḍūparikledi† śyāvavartmeti tanmatam// ### [6.3.21](https://indike.org/pramana/in.med.samhita.susruta.6.3.21) arujaṃ bāhyataḥ śūnamantaḥ klinnaṃ sravatyapi/ kaṇḍūnistodabhūyiṣṭhaṃ klinnavartma taducyate// ### [6.3.22](https://indike.org/pramana/in.med.samhita.susruta.6.3.22) yasya dhautāni dhautāni saṃbadhyante punaḥ punaḥ/ vartmānyaparipakvāni vidyādaklinnavartma tat// ### [6.3.23](https://indike.org/pramana/in.med.samhita.susruta.6.3.23) vimuktasandhi niśceṣṭaṃ vartma yasya na mīlyate/ etadvātahataṃ vidyāt sarujaṃ yadi vā+arujam// ### [6.3.24](https://indike.org/pramana/in.med.samhita.susruta.6.3.24) vartmāntarasthaṃ viṣamaṃ granthibhūtamavedanam/ vijñeyamarbudaṃ puṃsāṃ saraktamavalambitam// ### [6.3.25](https://indike.org/pramana/in.med.samhita.susruta.6.3.25) nimeṣaṇīḥ sirā vāyuḥ praviṣṭo vartmasaṃśrayāḥ/ †cālayatyati vartmāni nimeṣaḥ sa gado mataḥ// ### [6.3.26](https://indike.org/pramana/in.med.samhita.susruta.6.3.26) chinnāśchinā vivardhante vartmasthā mṛdavo+aṅkurāḥ/ dāhakaṇḍūrujopetāste+arśaḥ śoṇitasaṃbhavāḥ†// ### [6.3.27](https://indike.org/pramana/in.med.samhita.susruta.6.3.27) apākaḥ kaṭhinaḥ sthūlo granthirvartmabhavo+arujaḥ/ sakaṇḍūḥ picchilaḥ kolapramāṇo lagaṇastu saḥ// ### [6.3.28](https://indike.org/pramana/in.med.samhita.susruta.6.3.28) śūnaṃ yadvartma bahubhiḥ sūkṣmaiśchidraiḥ samanvitam/ bisamantarjala iva bisavartmeti tanmatam// ### [6.3.29](https://indike.org/pramana/in.med.samhita.susruta.6.3.29) doṣāḥ pakṣmāśayagatāstīkṣṇāgrāṇi kharāṇi ca/ nirvartayanti pakṣmāṇi tairghuṣṭaṃ cākṣi dūyate// ### [6.3.30](https://indike.org/pramana/in.med.samhita.susruta.6.3.30) uddhṛtairuddhṛtaiḥ† śāntiḥ pakṣmabhiścopajāyate/ vātātapānaladveṣī pakṣmakopaḥ sa ucyate// ### [6.3.30\_1](https://indike.org/pramana/in.med.samhita.susruta.6.3.30_1) iti suśrutasaṃhitāyāmuttaratantre vartmagatarogavijñānīyo nāma tṛtīyo+adhyāyaḥ //3// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.135.2) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.3](https://indike.org/pramana/in.med.samhita.susruta.6.3) · Pramāṇa