[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.41 # The Compendium of Suśruta 6.41: ekacatvāriṃśattamo+adhyāyaḥ/ Suśrutasaṃhitā 6.41 - **Language:** Sanskrit ### ekacatvāriṃśattamo+adhyāyaḥ/ ### [6.41.1](https://indike.org/pramana/in.med.samhita.susruta.6.41.1) athātaḥ śoṣapratiṣedhaṃ vyākhyāsyāmaḥ// ### [6.41.2](https://indike.org/pramana/in.med.samhita.susruta.6.41.2) yathovāca bhagavān dhanvantariḥ// ### [6.41.3](https://indike.org/pramana/in.med.samhita.susruta.6.41.3) anekarogānugato bahurogapurogamaḥ/ durvijñeyo durnivāraḥ śoṣo vyādhirmahābalaḥ// ### [6.41.4](https://indike.org/pramana/in.med.samhita.susruta.6.41.4) saṃśoṣaṇādrasādīnāṃ śoṣa ityabhidhīyate/ kriyākṣayakaratvācca kṣaya ityucyate punaḥ// ### [6.41.5](https://indike.org/pramana/in.med.samhita.susruta.6.41.5) rājñaścandramaso yasmādabhūdeṣa kilāmayaḥ/ tasmāttaṃ rājayakṣmeti kecidāhuḥ† punarjanāḥ// ### [6.41.6](https://indike.org/pramana/in.med.samhita.susruta.6.41.6) sa vyastairjāyate doṣairiti kecidvadanti hi/ ekādaśānāmekasmin sānnidhyāttantrayuktitaḥ// ### [6.41.7](https://indike.org/pramana/in.med.samhita.susruta.6.41.7) kriyāṇāmavibhāgena prāgekotpādanena ca/ eka eva mataḥ śoṣaḥ sannipātātmako hyataḥ// ### [6.41.8](https://indike.org/pramana/in.med.samhita.susruta.6.41.8) udrekāttatra liṅgāni doṣāṇāṃ nipatanti hi/ ksayādvegapratīghātādāghātādviṣamāśanāt// ### [6.41.9](https://indike.org/pramana/in.med.samhita.susruta.6.41.9) jāyate kupitairdoṣairvyāptadehasya dehinaḥ/ kaphapradhānairdoṣairhi ruddheṣu rasavartmasu// ### [6.41.10](https://indike.org/pramana/in.med.samhita.susruta.6.41.10) ativyavāyino vā+api kṣīṇe retasyanantaram/ kṣīyante dhātavaḥ sarve tataḥ śuṣyanti mānavaḥ// ### [6.41.11](https://indike.org/pramana/in.med.samhita.susruta.6.41.11) bhaktadveṣo jvaraḥ śvāsaḥ kāsaḥ śoṇitadarśanam/ svarabhedaśca jāyeta ṣaḍrūpe rājayakṣmaṇi// ### [6.41.12](https://indike.org/pramana/in.med.samhita.susruta.6.41.12) svarabhedo+anilāñchūlaṃ saṃlocaścāṃsapārśvayoḥ/ jvaro dāho+atisāraśca pittādraktasya cāgamaḥ// ### [6.41.13](https://indike.org/pramana/in.med.samhita.susruta.6.41.13) śirasaḥ paripūrṇatvamabhaktacchanda eva ca/ kāsaḥ kaṇṭhasya coddhvaṃso vijñeyaḥ kaphakopataḥ// ### [6.41.14](https://indike.org/pramana/in.med.samhita.susruta.6.41.14) ekādaśabhirebhirvā ṣaḍbhirvā+api samanvitam/ (kāsātīsārapārśvārtisvarabhedārucijvaraiḥ// ### [6.41.15](https://indike.org/pramana/in.med.samhita.susruta.6.41.15) tribhirvā pīḍitaṃ liṅgairjvarakāsāsṛgāmayaiḥ/ ) jahyācchoṣārditaṃ jantumicchan suvipulaṃ yaśaḥ// ### [6.41.16](https://indike.org/pramana/in.med.samhita.susruta.6.41.16) vyāyaśokasthāviryavyāyāmadhvopavāsataḥ/ vraṇoraḥkṣatapīḍābhyāṃ śoṣānanye vadanti hi// ### [6.41.17](https://indike.org/pramana/in.med.samhita.susruta.6.41.17) vyavāyaśoṣī śukrasya kṣayaliṅgairupadrutaḥ/ pāṇḍudeho yathāpūrvaṃ kṣīyante cāsya dhātavaḥ// ### [6.41.18](https://indike.org/pramana/in.med.samhita.susruta.6.41.18) pradhyānaśīlaḥ srastāṅgaḥ śokaśoṣyapi tādṛśaḥ/ vinā śukraksayakṛtairvikārairabhilakṣitaḥ// ### [6.41.19](https://indike.org/pramana/in.med.samhita.susruta.6.41.19) jarāśoṣī kṛśo mandavīryabuddhibalendiryaḥ/ †kampano+arucimān bhinnakāṃsyapātrahatasvaraḥ(naḥ)// ### [6.41.20](https://indike.org/pramana/in.med.samhita.susruta.6.41.20) ṣṭhīvati śleṣmaṇā hīnaṃ gauravārucipīḍitaḥ†/ saṃprasrutāsyanāsākṣaḥ suptarūkṣamalacchaviḥ// ### [6.41.21](https://indike.org/pramana/in.med.samhita.susruta.6.41.21) adhvapraśoṣī srastāṅgaḥ saṃbhṛṣṭaparuṣacchaviḥ/ prasuptagātrāvayavaḥ śuṣkaklomagalānanaḥ// ### [6.41.22](https://indike.org/pramana/in.med.samhita.susruta.6.41.22) vyāyāmaśoṣī bhūyiṣṭhamebhireva samanvitaḥ/ uraḥkṣatakṛtairliṅgaiḥ saṃyuktaśca kṣatādvinā// ### [6.41.23](https://indike.org/pramana/in.med.samhita.susruta.6.41.23) raktakṣayādvedanābhistathaivāhārayantraṇāt/ vraṇitasya† bhavecchoṣaḥ sa cāsādhyatamaḥ smṛtaḥ// ### [6.41.24](https://indike.org/pramana/in.med.samhita.susruta.6.41.24) vyāyāmabhārādhyayanairabhighātātimaithunaiḥ/ karmaṇā †cāpyurasyena vakṣo yasya vidāritam/ tasyorasi kṣate raktaṃ pūyaḥ śleṣmā ca gacchati// ### [6.41.25](https://indike.org/pramana/in.med.samhita.susruta.6.41.25) kāsamānaśchardayecca pītaraktāsitāruṇam/ saṃtaptavakṣāḥ so+atyarthaṃ dūyanātparitāmyati// ### [6.41.26](https://indike.org/pramana/in.med.samhita.susruta.6.41.26) durgandhavadanocchvāso bhinnavarṇasvaro naraḥ/ keṣāṃcidevaṃ śoṣo hi kāraṇairbhedamāgataḥ// ### [6.41.27](https://indike.org/pramana/in.med.samhita.susruta.6.41.27) na tatra doṣaliṅgānāṃ samastānāṃ nipātanam/ kṣayā eva hi te jñeyāḥ pratyekaṃ dhātusaṃjñitāḥ// ### [6.41.28](https://indike.org/pramana/in.med.samhita.susruta.6.41.28) cikitsitaṃ tu teṣāṃ hi prāguktaṃ dhātusaṃkṣaye// ### [6.41.29](https://indike.org/pramana/in.med.samhita.susruta.6.41.29) śvāsāṅgasādakaphasaṃsravatāluśoṣacchardyagnisādamadapīnasapāṇḍunidrāḥ/ śoṣe bhaviṣyati bhavanti sa cāpi jantuḥ śuklekṣaṇe bhavati māṃsaparo ririṃsuḥ// ### [6.41.30](https://indike.org/pramana/in.med.samhita.susruta.6.41.30) svapneṣu kākaśukaśallakinīlakaṇṭhagṛdhrāstathaiva kapayaḥ kṛkalāsakāśca/ taṃ vāhayanti sa nadīrvijalāśca paśyecchuṣkāṃstarūn pavanadhūmadavārditāṃśca// ### [6.41.31](https://indike.org/pramana/in.med.samhita.susruta.6.41.31) mahāśanaṃ kṣīyamāṇamatīsāranipīḍitam/ śūnamuṣkodaraṃ caiva yakṣmiṇaṃ parivarjayet// ### [6.41.32](https://indike.org/pramana/in.med.samhita.susruta.6.41.32) upācaredātmavantaṃ dīptāgnimakṛśaṃ †navam/ sthirādivargasiddhena dhṛtenājāvikena ca// ### [6.41.33](https://indike.org/pramana/in.med.samhita.susruta.6.41.33) snigdhasya mṛdu kartavyamūrdhvaṃ cādhaśca śodhanam/ āsthāpanaṃ tathā kāryaṃ śirasaśca virecanam// ### [6.41.34](https://indike.org/pramana/in.med.samhita.susruta.6.41.34) yavagodhūmaśālīṃśca rasairbhuñjīta śodhitaḥ/ dṛḍhe+agnau bṛṃhayeccāpi nivṛttopadravaṃ naram// ### [6.41.35](https://indike.org/pramana/in.med.samhita.susruta.6.41.35) vyavāyaśoṣiṇaṃ prāyo bhajante vātajā gadāḥ/ bṛṃhaṇīyo vidhistasmai hitaḥ snighdo+anilāpahaḥ// ### [6.41.36](https://indike.org/pramana/in.med.samhita.susruta.6.41.36) kākānulūkānnakulān biḍālān gaṇḍūpadān vyālabileśayākhūn/ gṛdhrāṃśca dadyādvividhaiḥ †pravādaiḥ sasaindhavān sarṣapatailabhṛṣṭān// ### [6.41.37](https://indike.org/pramana/in.med.samhita.susruta.6.41.37) deyāni māṃsāni ca jāṅgalāni mudgāḍhakīsūparasāśca† hṛdyāḥ/ kharoṣṭranāgāśvatarāśvajāni deyāni māṃsāni sukalpitāni// ### [6.41.38](https://indike.org/pramana/in.med.samhita.susruta.6.41.38) māṃsopadaṃśāṃśca pibedariṣṭān mārdvīkayuktān madirāśca sevyāḥ/ arkāmṛtākṣārajaloṣitebhyaḥ kṛtvā yavebhyo vividhāṃśca bhakṣyān// ### [6.41.39](https://indike.org/pramana/in.med.samhita.susruta.6.41.39) khādet pibet sarpirajāvikaṃ vā kṛśo yavāgvā saha bhaktakāle/ sarpirmadhubhyāṃ trikaṭu pralihyāccavyāviḍaṅgopahitaṃ kṣayārtaḥ// ### [6.41.40](https://indike.org/pramana/in.med.samhita.susruta.6.41.40) māṃsādamāṃseṣu ghṛtaṃ ca siddhaṃ śosāpahaṃ kṣaudrakaṇāsametam/ drākṣāsitāmāgadhikāvalehaḥ sakṣaudratailaḥ kṣayarogaghātī// ### [6.41.41](https://indike.org/pramana/in.med.samhita.susruta.6.41.41) ghṛtena cājena samākṣikeṇa turaṅgagandhātilamāṣacūrṇam/ sitāśvagandhāmagadhodbhavānāṃ †cūrṇaṃ ghṛtakṣaudrayutaṃ pralihyāt// ### [6.41.42](https://indike.org/pramana/in.med.samhita.susruta.6.41.42) kṣīraṃ pibedvā+apyatha vājigandhāvipakvamevaṃ labhate+aṅgapuṣṭim/ tadutthitaṃ kṣīraghṛtaṃ sitāḍhyaṃ prātaḥ pibedvā+api payonupānam// ### [6.41.43](https://indike.org/pramana/in.med.samhita.susruta.6.41.43) utsādane cāpi turaṅgagandhā yojyā yavāścaiva punarnave ca/ kṛtsne vṛṣe tatkusumaiśca siddhaṃ sarpiḥ pibetkṣaudrayutaṃ hitāśī// ### [6.41.44](https://indike.org/pramana/in.med.samhita.susruta.6.41.44) yakṣmāṇametat prabalaṃ ca kāsaṃ śvāsaṃ ca hanyādapi pāṇḍutāṃ ca/ śakṛdrasā gośvagajāvyajānāṃ kvāthā mitāścāpi tathaiva bhāgaiḥ// ### [6.41.45](https://indike.org/pramana/in.med.samhita.susruta.6.41.45) mūrvāharidrākhadiradrumāṇāṃ kṣīrasya bhāgastvaparo ghṛtasya/ bhāgān daśautān vipacedvidhijño dattvā trivargaṃ madhuraṃ ca kṛtsnam// ### [6.41.46](https://indike.org/pramana/in.med.samhita.susruta.6.41.46) kaṭutrikaṃ caiva sabhadradāru ghṛtottamaṃ yakṣmanivāraṇāya/ dve pañcamūlyau varuṇaṃ karañjaṃ bhallātakaṃ bilvapunarnave ca// ### [6.41.47](https://indike.org/pramana/in.med.samhita.susruta.6.41.47) yavān kulatthān badarāṇi bhārgīṃ pāṭhāṃ hutāśaṃ samahīkadambam/ kṛtvā kaṣāyaṃ vipaceddhi tasya ṣaḍbhirhi pātrairghṛtapātramekam// ### [6.41.48](https://indike.org/pramana/in.med.samhita.susruta.6.41.48) vyoṣaṃ mahāvṛkṣapayo+abhayāṃ ca cavyaṃ surākhyaṃ lavaṇottamaṃ ca/ etaddhi śoṣaṃ jaṭharāṇi caiva hanyāt pramehāṃśca sahānilena// ### [6.41.49](https://indike.org/pramana/in.med.samhita.susruta.6.41.49) gośvāvyajebhaiṇakharoṣṭrajātaiḥ śakṛdrasakṣīrarasakṣatotthaiḥ/ drākṣāśvagandhāmagadhāsitābhiḥ siddhaṃ ghṛtaṃ yakṣmavikārahāri// ### [6.41.50](https://indike.org/pramana/in.med.samhita.susruta.6.41.50) elājamodāmalakābhayākṣagāyatryariṣṭāsanaśālasārān/ viḍaṅgabhallātakacitrakogrākaṭutrikāmbhodasurāṣṭrajāṃśca// ### [6.41.51](https://indike.org/pramana/in.med.samhita.susruta.6.41.51) paktvā jale tena paceddhi sarpistasmin susiddhe tvavatārite ca/ triṃśatpalānyatra sitopalāyā dattvā tugākṣīripalāni ṣaṭ ca// ### [6.41.52](https://indike.org/pramana/in.med.samhita.susruta.6.41.52) prasthe ghṛtasya dviguṇaṃ ca dadyāt kṣaudraṃ tato manthahataṃ vidadhyāt/ palaṃ palaṃ prātarataḥ pralihya paścāt pibet kṣīramatandritaśca// ### [6.41.53](https://indike.org/pramana/in.med.samhita.susruta.6.41.53) etaddhi medhyaṃ paramaṃ pavitraṃ cakṣuṣyamāyuṣyamatho yaśasyam/ yakṣmāṇamāśu vyapahanti caitat pāṇḍvāmayaṃ caiva bhagandaraṃ ca// ### [6.41.54](https://indike.org/pramana/in.med.samhita.susruta.6.41.54) śvāsaṃ ca hanti svarabhedakāsahṛtplīhagulmagrahaṇīgadāṃśca/ na cātra kiṃcit parivarjanīyaṃ rasāyanaṃ caitadupāsyamānam// ### [6.41.55](https://indike.org/pramana/in.med.samhita.susruta.6.41.55) plīhodaroktaṃ vihitaṃ ca sarpistrīṇyeva cānyāni hitāni cātra/ upadravāṃśca svaravaikṛtādīn jayedyathāsvaṃ prasamīkṣya śāstram// ### [6.41.56](https://indike.org/pramana/in.med.samhita.susruta.6.41.56) ajāśakṛnmūtrapayoghṛtāsṛṅmāṃsālayāni pratisevamānaḥ/ snānādinānāvidhinā jahāti māsādaśeṣaṃ niyamena śoṣam// ### [6.41.57](https://indike.org/pramana/in.med.samhita.susruta.6.41.57) rasonayogaṃ vidhivat kṣayārtaḥ kṣīreṇa vā nāgabalāprayogam/ seveta vā māgadhikāvidhānaṃ tathopayogaṃ jatuno+aśmajasya// ### [6.41.58](https://indike.org/pramana/in.med.samhita.susruta.6.41.58) śokaṃ striyaṃ krodhamasūyanaṃ ca tyajedudārān viṣayān bhajeta/ vaidyān dvijātīṃstridaśān gurūśca vācaśca puṇyāḥ śṛṇuyādbijebhyaḥ// ### [6.41.58\_1](https://indike.org/pramana/in.med.samhita.susruta.6.41.58_1) iti suśrutasaṃhitāyāmuttaratantrāntargate kāyacikitsātantre (tṛtīyo+adhyāyaḥ, ādita) ekacatvāriṃśo+adhyāyaḥ //41// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.175.2) — Ḍalhaṇa, Sanskrit ## Linked texts (1) - [Śārṅgadharasaṃhitā](https://indike.org/pramana/in.med.sangraha.sarngadharasamhita.4.4.11) — Śārṅgadhara (physician), Sanskrit --- Source: [https://indike.org/pramana/in.med.samhita.susruta.6.41](https://indike.org/pramana/in.med.samhita.susruta.6.41) · Pramāṇa