[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.42 # The Compendium of Suśruta 6.42: dvicatvāriṃśattamo+adhyāyaḥ/ Suśrutasaṃhitā 6.42 - **Language:** Sanskrit ### dvicatvāriṃśattamo+adhyāyaḥ/ ### [6.42.1](https://indike.org/pramana/in.med.samhita.susruta.6.42.1) athāto gulmapratiṣedhaṃ vyākhyāsyāmaḥ// ### [6.42.2](https://indike.org/pramana/in.med.samhita.susruta.6.42.2) yathovāca bhagavān dhanvantariḥ// ### [6.42.3](https://indike.org/pramana/in.med.samhita.susruta.6.42.3) yathoktaiḥ kopanairdoṣāḥ kupitāḥ koṣṭhamāgatāḥ/ janayanti nṛṇāṃ gulmaṃ sa pañcavidha ucyate// ### [6.42.4](https://indike.org/pramana/in.med.samhita.susruta.6.42.4) hṛdbastyorantare granthiḥ saṃcārī yadi vā+acalaḥ/ cayāpacayavān vṛttaḥ sa gulma iti kīrtitaḥ// ### [6.42.5](https://indike.org/pramana/in.med.samhita.susruta.6.42.5) pañca gulmāśrayā nṝṇāṃ pārśve hṛnnābhibastayaḥ/ †gupitānilamūlatvādgūḍhamūlodayādapi// ### [6.42.6](https://indike.org/pramana/in.med.samhita.susruta.6.42.6) gulmavadvā viśālatvādgulma ityabhidhīyate/ sa yasmādātmani cayaṃ gacchatyapsviva budbudaḥ// ### [6.42.7](https://indike.org/pramana/in.med.samhita.susruta.6.42.7) antaḥ sarati yasmācca na pākamupayātyataḥ/ sa vyastairjāyate doṣaiḥ samastairapi cocchritaiḥ// ### [6.42.8](https://indike.org/pramana/in.med.samhita.susruta.6.42.8) puruṣāṇāṃ tathā strīṇāṃ jñeyo raktena cāparaḥ/ sadanaṃ madantā vahnerāṭopo+antravikūjanam// ### [6.42.9](https://indike.org/pramana/in.med.samhita.susruta.6.42.9) viṇmūtrānilasaṅgaśca sauhityāsahatā tathā/ dveṣo+anne vāyurūrdhvaṃ ca pūrvarūpeṣu gulminām// ### [6.42.10](https://indike.org/pramana/in.med.samhita.susruta.6.42.10) hṛtkukṣiśūlaṃ mukhakaṇṭhaśoṣo vāyornirodho viṣamāgnitā ca/ te te vikārāḥ pavanātmakāśca bhavanti gulme+anilasaṃbhave tu// ### [6.42.11](https://indike.org/pramana/in.med.samhita.susruta.6.42.11) svedajvarāhāravidāhadāhāstṛṣṇā+aṅgarāgaḥ kaṭuvaktratā ca/ pittasya liṅgānyakhilāni yāni pittātmake tāni bhavanti gulme// ### [6.42.12](https://indike.org/pramana/in.med.samhita.susruta.6.42.12) staimityamanne+aruciraṅgasādaśchardiḥ praseko madhurāsyatā ca/ kaphasya liṅgāni ca yāni tāni bhavanti gulme kaphasaṃbhave tu// ### [6.42.13](https://indike.org/pramana/in.med.samhita.susruta.6.42.13) sarvātmakaḥ sarvavikārayuktaḥ so+asādhya uktaḥ kṣatajaṃ pravakṣye/ navaprasūtā+ahitabhojanā yā yā cāmagarbhaṃ visṛjedṛtau† vā// ### [6.42.14](https://indike.org/pramana/in.med.samhita.susruta.6.42.14) vāyurhi tasyāḥ parigṛhya raktaṃ karoti gulmaṃ sarujaṃ sadāham/ paittasya liṅgena samānaliṅgaṃ viśeṣaṇaṃ cāpyaparaṃ nibodha// ### [6.42.15](https://indike.org/pramana/in.med.samhita.susruta.6.42.15) na spandate nodarameti vṛddhiṃ bhavanti liṅgāni ca garbhiṇīnām/ taṃ garbhakālātigame caikitsyamasṛgbhavaṃ gulmamuśanti tajjñāḥ// ### [6.42.16](https://indike.org/pramana/in.med.samhita.susruta.6.42.16) vātagulmārditaṃ snigdhaṃ yuktaṃ snehavirecanaiḥ/ upācaredyathākālaṃ nirūhaiḥ sānuvāsanaiḥ// ### [6.42.17](https://indike.org/pramana/in.med.samhita.susruta.6.42.17) pittagulmārditaṃ snigdhaṃ kākolyādighṛtena tu/ viriktaṃ madhurairyogairnirūhaiḥ samupācaret// ### [6.42.18](https://indike.org/pramana/in.med.samhita.susruta.6.42.18) śleṣmagulmārditaṃ snigdhaṃ pippalyādighṛtena tu/ tīkṣṇairviriktaṃ tadrūpairnirūhaiḥ samupācaret// ### [6.42.19](https://indike.org/pramana/in.med.samhita.susruta.6.42.19) sannipātotthite gulme tridoṣaghno vidhirhitaḥ/ pittavadraktagulminyā nāryāḥ kāryaḥ kriyāvidhiḥ// ### [6.42.20](https://indike.org/pramana/in.med.samhita.susruta.6.42.20) viśeṣamaparaṃ cāsyāḥ śṛṇu raktavibhedanam/ †palāśakṣāratoyena siddhaṃ sarpiḥ prayojayet// ### [6.42.21](https://indike.org/pramana/in.med.samhita.susruta.6.42.21) dadyāduttarabastiṃ ca pippalyādighṛtena tu/ uṣṇairvā bhedayedbhinne vidhirāsṛgdaro hitaḥ// ### [6.42.22](https://indike.org/pramana/in.med.samhita.susruta.6.42.22) ānūpaudakamajjāno vasā tailaṃ ghṛtaṃ dadhi/ vipakvamekataḥ śastaṃ vātagulme+anuvāsanam// ### [6.42.23](https://indike.org/pramana/in.med.samhita.susruta.6.42.23) jāṅgalaikaśaphānāṃ tu vasā sarpiśca paittike/ tailaṃ jāṅgalamajjāna evaṃ gulme kaphotthite// ### [6.42.24](https://indike.org/pramana/in.med.samhita.susruta.6.42.24) dhātrīphalānāṃ svarase ṣaḍaṅgaṃ vipacedghṛtam/ śarkarāsaindhavopetaṃ taddhitaṃ vātagulmine// ### [6.42.25](https://indike.org/pramana/in.med.samhita.susruta.6.42.25) citrakavyoṣasindhūtthapṛthvīkācavyadāḍimaiḥ/ dīpyakagranthikājājīhapuṣādhānyakaiḥ samaiḥ// ### [6.42.26](https://indike.org/pramana/in.med.samhita.susruta.6.42.26) dadhyāranālabadaramūlakasvarasairghṛtam/ tatpibedvātagulmāgnidaurbalyāṭopaśūlanut// ### [6.42.27](https://indike.org/pramana/in.med.samhita.susruta.6.42.27) hiṅgusauvarcalājājīviḍadāḍimadīpyakaiḥ/ puṣkaravyoṣadhānyāmlavetasakṣāracitrakaiḥ// ### [6.42.28](https://indike.org/pramana/in.med.samhita.susruta.6.42.28) śaṭīvacājagandhailāsurasaiśca vipācitam/ śūlānāhaharaṃ sarpirdadhnā cānilagulminām// ### [6.42.29](https://indike.org/pramana/in.med.samhita.susruta.6.42.29) viḍadāḍimasindhūtthahutabhugvyoṣajīrakaiḥ/ hiṅgusauvarcalakṣārarugvṛkṣāmlāmlavetasaiḥ// ### [6.42.30](https://indike.org/pramana/in.med.samhita.susruta.6.42.30) bījapūrarasopetaṃ sarpirdadhicaturguṇam/ sādhitṃ dādhikaṃ nāma gulmahṛt plīhaśūlajit// ### [6.42.31](https://indike.org/pramana/in.med.samhita.susruta.6.42.31) rasonasvarase sarpiḥ pañcamūlarasānvitam/ surāranāladadhyamlamūlakasvarasaiḥ saha// ### [6.42.32](https://indike.org/pramana/in.med.samhita.susruta.6.42.32) vyoṣadāḍimavṛkṣāmlayavānīcavyasaindhavaiḥ/ hiṅgvamlavetasājājīdīpyakaiśca samāṃśikaiḥ// ### [6.42.33](https://indike.org/pramana/in.med.samhita.susruta.6.42.33) siddhaṃ gulmagrahaṇyarśaḥśvāsonmādakṣayajvarān/ kāsāpasmāramandāgniplīhaśūlānilāñjayet// ### [6.42.34](https://indike.org/pramana/in.med.samhita.susruta.6.42.34) dadhi sauvīrakaṃ sarpiḥ kvāthau mudgakulatthajau/ pañcāḍhakāni vipacedāvāpya dvipalānyatha// ### [6.42.35](https://indike.org/pramana/in.med.samhita.susruta.6.42.35) sauvarcalaṃ sarjikāṃ ca devadārvatha saindhavam/ vātagulmāpahaṃ sarpiretaddīpanameva ca// ### [6.42.36](https://indike.org/pramana/in.med.samhita.susruta.6.42.36) tṛṇamūlakaṣāye tu jīvanīyaiḥ pacedghṛtam/ nyagrodhādigaṇe vā+api gaṇe vā+apyutpalādike// ### [6.42.37](https://indike.org/pramana/in.med.samhita.susruta.6.42.37) raktapittotthitaṃ ghnanti ghṛtānyetānyasaṃśayam/ āragvadhādau vipaceddīpanīyayutaṃ ghṛtam// ### [6.42.38](https://indike.org/pramana/in.med.samhita.susruta.6.42.38) kṣāravarge paceccanyat pacenmūtragaṇe+aparam/ ghnanti gulmaṃ kaphodbhūtaṃ ghṛtānyetānyasaṃśayam// ### [6.42.39](https://indike.org/pramana/in.med.samhita.susruta.6.42.39) yathādoṣocchrayaṃ cāpi cikitsetsānnipātikam/ cūrṇaṃ hiṅgvādikaṃ vā+api ghṛtaṃ vā plīhanāśanam// ### [6.42.40](https://indike.org/pramana/in.med.samhita.susruta.6.42.40) pibedgulmāpahaṃ kāle sarpistailvakameva vā/ tilekṣurakapālāśasārṣapaṃ yāvanālajam// ### [6.42.41](https://indike.org/pramana/in.med.samhita.susruta.6.42.41) bhasma mūlakajaṃ cāpi gojāvikharahantinām/ mūtreṇa mahiṣīṇāṃ ca pālikaiścāvacūrṇitaiḥ// ### [6.42.42](https://indike.org/pramana/in.med.samhita.susruta.6.42.42) kuṣṭhasaindhavayaṣṭyāhvanāgarakṛmighātibhiḥ/ sājamodaiśca daśabhiḥ sāmudrācca palairyutam// ### [6.42.43](https://indike.org/pramana/in.med.samhita.susruta.6.42.43) ayaḥpātre+agninā+alpena paktvā lehyam(laham)athoddharet/ tasya mātrāṃ pibeddadhnā surayā sarpiṣā+api vā// ### [6.42.44](https://indike.org/pramana/in.med.samhita.susruta.6.42.44) dhānyāmlenoṣṇatoyena kaulatthena rasena vā/ gulmān vātavikārāṃśca kṣāro+ayaṃ hantyasaṃśayam// ### [6.42.45](https://indike.org/pramana/in.med.samhita.susruta.6.42.45) svarjikākuṣṭhasahitaḥ kṣāraḥ ketakijo+api vā/ tailena śamayet pīto gulmaṃ pavanasaṃbhavam// ### [6.42.46](https://indike.org/pramana/in.med.samhita.susruta.6.42.46) pītaṃ sukhāmbunā vā+api svarjikākuṣṭhasaindhavam/ vṛścīvamurubūkaṃ(vṛścīramurubūkaṃ)† ca varṣābhūrbṛhatīdvayam// ### [6.42.47](https://indike.org/pramana/in.med.samhita.susruta.6.42.47) citrakaṃ ca jaladroṇe paktvā pādāvaśeṣitam/ māgadhīciktrakakṣaudralipte kumbhe nidhāpayet// ### [6.42.48](https://indike.org/pramana/in.med.samhita.susruta.6.42.48) madhunaḥ prasthamāvāpya pathyācūrṇārdhasaṃyutam/ †busoṣitaṃ daśāhaṃ tu jīrṇabhaktaḥ pibennaraḥ// ### [6.42.49](https://indike.org/pramana/in.med.samhita.susruta.6.42.49) ariṣṭo+ayaṃ jayedgulmamavipākamarocakam/ pāṭhānikumbharajanītrikaṭutriphalāgnikam// ### [6.42.50](https://indike.org/pramana/in.med.samhita.susruta.6.42.50) lavaṇaṃ vṛkṣabījaṃ ca tulyaṃ syādanavo guḍaḥ/ pathyābhirvā †yutaṃ cūrṇaṃ gavāṃ mūtrayutaṃ pacet// ### [6.42.51](https://indike.org/pramana/in.med.samhita.susruta.6.42.51) guṭikāstadghṛnībhūtaṃ kṛtvā khādedabhuktavān/ gulmaplīhāgnisādāṃtā nāśayeyuraśeṣataḥ// ### [6.42.52](https://indike.org/pramana/in.med.samhita.susruta.6.42.52) hṛdrogaṃ grahaṇīdoṣaṃ pāṇḍurogaṃ ca dāruṇam/ saśūle sonnate+aspande dāhapākaruganvite// ### [6.42.53](https://indike.org/pramana/in.med.samhita.susruta.6.42.53) gulme raktaṃ jalaukobhiḥ sirāmokṣeṇa vā haret/ sukhoṣṇā jāṅgalarasāḥ susnigdhā vyaktasaindhavāḥ// ### [6.42.54](https://indike.org/pramana/in.med.samhita.susruta.6.42.54) kaṭutrikasamāyuktā hitāḥ pāne tu gulminām/ peyā vātaharaiḥ siddhāḥ kaulatthāḥ saṃskṛtā rasāḥ// ### [6.42.55](https://indike.org/pramana/in.med.samhita.susruta.6.42.55) khalāḥ sapañcamūlāśca gulmināṃ bhojane hitāḥ/ baddhavarconilānāṃ tu sārdrakaṃ kṣīramiṣyate// ### [6.42.56](https://indike.org/pramana/in.med.samhita.susruta.6.42.56) kumbhīpiṇḍeṣṭakāsvedān kārayet kuśalo bhiṣak/ gulminaḥ sarva evoktā durvirecyatamā bhṛśam// ### [6.42.57](https://indike.org/pramana/in.med.samhita.susruta.6.42.57) ataśaitāṃstu susvinnān sraṃsanenopapādayet/ vimlāpanābhyañjanāni† tathaiva dahanāni ca// ### [6.42.58](https://indike.org/pramana/in.med.samhita.susruta.6.42.58) upanāhāśca kartavyāḥ sukhoṣṇāḥ sālvaṇādayaḥ/ udaroktāni sarpīṃṣi †mūtravartikriyāstathā// ### [6.42.59](https://indike.org/pramana/in.med.samhita.susruta.6.42.59) lavaṇāni ca yojyāni yānyuktānyanilāmaye/ vātavarconirodhe tu sāmudrārdrakasarṣapaiḥ// ### [6.42.60](https://indike.org/pramana/in.med.samhita.susruta.6.42.60) kṛtvā pāyau vidhātavyā vartayo maricottarāḥ/ dantīcitrakamūleṣu tathā vātahareṣu ca// ### [6.42.61](https://indike.org/pramana/in.med.samhita.susruta.6.42.61) kuryādariṣṭān sarvāṃśca ślokasthāne yatheritān/ khādedvā+apyaṅkurān bhṛṣṭān pūtīkanṛpavṛkṣayoḥ// ### [6.42.62](https://indike.org/pramana/in.med.samhita.susruta.6.42.62) ūrdhvavātaṃ manuṣyaṃ ca gulminaṃ na nirūhayet/ pibettrivṛnnāgaraṃ vā saguḍāṃ vā harītakīm// ### [6.42.63](https://indike.org/pramana/in.med.samhita.susruta.6.42.63) gugguluṃ trivṛtāṃ dantīṃ dravantīṃ saindhavaṃ vacām/ mūtramadyapayodrākṣārasairvīkṣya balābalam// ### [6.42.64](https://indike.org/pramana/in.med.samhita.susruta.6.42.64) evaṃ pīlūni †bhṛṣṭāni pibet salavaṇāni tu/ pippalīpippalīmūlacavyacitrakasaindhavaiḥ// ### [6.42.65](https://indike.org/pramana/in.med.samhita.susruta.6.42.65) yuktā hanti surā gulmaṃ śīghraṃ kāle prayojitā/ baddhaviṇmāruto gulmī bhuñjīta payasā yavān// ### [6.42.66](https://indike.org/pramana/in.med.samhita.susruta.6.42.66) kulmāṣān vā bahusnehān bhakṣyellavaṇottarān/ athāsyopadravaḥ †śūlaḥ kathaṃcidupajāyate// ### [6.42.67](https://indike.org/pramana/in.med.samhita.susruta.6.42.67) †śūlaṃ nikhānitamivāsukhaṃ yena tu vattyasau/ tatra viṇmūtrasaṃrodhaḥ kṛcchrocchvāsaḥ sthirāṅgatā// ### [6.42.68](https://indike.org/pramana/in.med.samhita.susruta.6.42.68) tṛṣṇā dāho bhramo+annasya vidagdhaparivṛddhitā/ romaharṣo+aruciśchardirbhuktavṛddhirjaḍāṅgatā// ### [6.42.69](https://indike.org/pramana/in.med.samhita.susruta.6.42.69) vāyvādibhiryathāsaṅkhyāṃ miśrairvā vīkṣya yojayet/ pathyātrilavaṇaṃ kṣāraṃ hiṅgutumburupauṣkaram// ### [6.42.70](https://indike.org/pramana/in.med.samhita.susruta.6.42.70) yavānīṃ ca haridrāṃ ca viḍaṅgānyamlavetasam/ vidārītriphalā+abhīruśṛṅgāṭīguḍaśarkarāḥ// ### [6.42.71](https://indike.org/pramana/in.med.samhita.susruta.6.42.71) kāśmarīphalayaṣṭyāhvaparūṣakahimāni ca/ ṣaḍgranthātiviṣādārupathyāmaricavṛkṣajān// ### [6.42.72](https://indike.org/pramana/in.med.samhita.susruta.6.42.72) kṛṣṇāmūlakacanvyaṃ ca nāgarakṣāracitrakān/ uṣṇāmlakāñjikakṣīratoyaiḥ ślokasamāpanān// ### [6.42.73](https://indike.org/pramana/in.med.samhita.susruta.6.42.73) yathākramaṃ vimiśrāṃśca dvandve sarvāṃśca sarvaje/ tathaiva sekāvagāhapradehābhyaṅgabhojanam// ### [6.42.74](https://indike.org/pramana/in.med.samhita.susruta.6.42.74) śiśirodakapūrṇānāṃ bhājanānāṃ ca dhāraṇam/ vamanonmardanasvedalaṅghanakṣapaṇakriyāḥ// ### [6.42.75](https://indike.org/pramana/in.med.samhita.susruta.6.42.75) snehādiśca karamaḥ sarvo viśeṣeṇopadiśyate/ vallūraṃ mūlakaṃ matsyān śuṣkaśākāni vaidalam// ### [6.42.76](https://indike.org/pramana/in.med.samhita.susruta.6.42.76) na khādedālukaṃ gulmī madhurāṇi phalāni ca/ vinā gulmena yacchūlaṃ gulmasthāneṣu jāyate// ### [6.42.77](https://indike.org/pramana/in.med.samhita.susruta.6.42.77) nidānaṃ tasya vakṣyāmi rūpaṃ ca sacikitsitam/ vātamūtrapurīṣāṇāṃ nigrahādatibhojanāt// ### [6.42.78](https://indike.org/pramana/in.med.samhita.susruta.6.42.78) ajīrṇādhyaśanāyāsaviruddhānnopasevanāt/ pānīyapānāt kṣutkāle virūḍhānāṃ ca sevanāt// ### [6.42.79](https://indike.org/pramana/in.med.samhita.susruta.6.42.79) piṣṭānnaśuṣkamāṃsānāmupayogāttathaiva ca/ evaṃvidhānāṃ dravyāṇāmanyeṣāṃ copasevanāt// ### [6.42.80](https://indike.org/pramana/in.med.samhita.susruta.6.42.80) vāyuḥ prakupitaḥ koṣṭhe śūlaṃ saṃjanayedbhṛśam/ nirucchvāsī bhavettena vedanāpīḍito naraḥ// ### [6.42.81](https://indike.org/pramana/in.med.samhita.susruta.6.42.81) †śaṅkusphoṭanavattasya yasmāttīvrāśca vedanāḥ/ śūlāsaktasya lakṣyante tasmācchūlamihocyate// ### [6.42.82](https://indike.org/pramana/in.med.samhita.susruta.6.42.82) nirāhārasya yasyaiva tīvraṃ śūlamudīryate/ prastabdhagātro bhavati kṛcchreṇocchvasitīva ca// ### [6.42.83](https://indike.org/pramana/in.med.samhita.susruta.6.42.83) vātamūtrapurīṣāṇi kṛcchreṇa kurute naraḥ/ etairliṅgairvijānīyācchūlaṃ vātasamudbhavam// ### [6.42.84](https://indike.org/pramana/in.med.samhita.susruta.6.42.84) tṛṣṇā dāho mado mūrcchā tīvraṃ śūlaṃ tathaiva ca/ śītābhikāmo bhavati śītenaiva praśāmyati// ### [6.42.85](https://indike.org/pramana/in.med.samhita.susruta.6.42.85) etairliṅgairvijānīyācchūlaṃ pittasamudbhavam/ śūlenotpīḍyamānasya hṛllāsa upajāyate// ### [6.42.86](https://indike.org/pramana/in.med.samhita.susruta.6.42.86) atīva pūrṇakoṣṭhatvaṃ tathaiva gurugātratā/ etacchleṣmasamutthasya śūlasyoktaṃ nidarśanam// ### [6.42.87](https://indike.org/pramana/in.med.samhita.susruta.6.42.87) sarvāṇi dṛṣṭvā rūpāṇi nirdiśetsānnipātikam/ sannipātasamutthānamasādhyaṃ taṃ vinirdiśet// ### [6.42.88](https://indike.org/pramana/in.med.samhita.susruta.6.42.88) śūlānāṃ lakṣaṇaṃ proktaṃ cikitsāṃ tu nibodha me/ āśukārī hi pavanastasmāttaṃ tvarayā jayet// ### [6.42.89](https://indike.org/pramana/in.med.samhita.susruta.6.42.89) tasya śūlābhipannasya sveda eva sukhāvahaḥ/ pāyasaiḥ kṛśarāpiṇḍaiḥ snigdhairvā piśitairhitaḥ// ### [6.42.90](https://indike.org/pramana/in.med.samhita.susruta.6.42.90) trivṛcchākena vā snigdhamuṣṇaṃ bhiñjīta bhojanam/ cirabilvāṅkurān vāpi tailabhṛṣṭāṃstu bhakṣayet// ### [6.42.91](https://indike.org/pramana/in.med.samhita.susruta.6.42.91) vaihaṅgāṃśca rasān snigdhān jāṅgalān śūlapīḍitaḥ/ yathālābhaṃ niṣeveta māṃsāni bilaśāyinām// ### [6.42.92](https://indike.org/pramana/in.med.samhita.susruta.6.42.92) surā sauvīrakaṃ cukraṃ mastūdaśvittathā dadhi/ sakālalavaṇaṃ peyaṃ śūle vātasamudbhave// ### [6.42.93](https://indike.org/pramana/in.med.samhita.susruta.6.42.93) kulatthayūṣo yuktāmlo lāvakīyūṣasaṃskṛtaḥ/ sasaindhavaḥ samarico vātaśūlavināśanaḥ// ### [6.42.94](https://indike.org/pramana/in.med.samhita.susruta.6.42.94) viḍaṅgaśigrukampillapathyāśyāmāmlavetasān/ †surasāmaśvamūtrīṃ ca sauvarcalayutān pibet// ### [6.42.95](https://indike.org/pramana/in.med.samhita.susruta.6.42.95) madyena vātajaṃ śūlaṃ kṣiprameva praśāmyati/ pṛthvīkājājicavikāyavānīvyoṣacitrakāḥ// ### [6.42.96](https://indike.org/pramana/in.med.samhita.susruta.6.42.96) pippalyaḥ pippalīmūlaṃ saindhavaṃ ceti cūrṇayet/ tāni cūrṇāni payasā pibet kāmbalikena vā// ### [6.42.97](https://indike.org/pramana/in.med.samhita.susruta.6.42.97) madhvāsavena cukreṇa surāsauvīrakeṇa vā/ athavaitāni(athacaitāni) cūrṇāni mātuluṅgarasena vā// ### [6.42.98](https://indike.org/pramana/in.med.samhita.susruta.6.42.98) tathā badarayūṣeṇa bhāvitāni punaḥ punaḥ/ tāni hiṅgupragāḍhāni saha śarkarayā pibet// ### [6.42.99](https://indike.org/pramana/in.med.samhita.susruta.6.42.99) saha dāḍimasāreṇa vartiḥ kāryā bhiṣagjitā/ sā vartirvātikaṃ śūlaṃ kṣiprameva vyapohati// ### [6.42.100](https://indike.org/pramana/in.med.samhita.susruta.6.42.100) guḍatailena vā līḍhā pītā madyena vā punaḥ/ bubhukṣāprabhave śūle laghu saṃtarpaṇaṃ hitam// ### [6.42.101](https://indike.org/pramana/in.med.samhita.susruta.6.42.101) uṣṇaiḥ kṣīrairyavāgūbhiḥ snigdhairmāṃsarasaistathā/ vātaśūle samutpanne rūkṣaṃ snigdhena bhojayet// ### [6.42.102](https://indike.org/pramana/in.med.samhita.susruta.6.42.102) susaṃskṛtāḥ pradeyāḥ syurghṛtapūrā viśeṣataḥ/ vāruṇīṃ ca pibejjantustathā saṃpadyate sukhī// ### [6.42.103](https://indike.org/pramana/in.med.samhita.susruta.6.42.103) etadvātasamutthasya śūlasyoktaṃ cikitsitam/ atha pittasamutthasya kriyāṃ vakṣyāmyataḥ param// ### [6.42.104](https://indike.org/pramana/in.med.samhita.susruta.6.42.104) sa sukhaṃ chardayitvā tu pītvā śītodakaṃ naraḥ/ śītalāni ca seveta sarvāṇyuṣṇāni varjayet// ### [6.42.105](https://indike.org/pramana/in.med.samhita.susruta.6.42.105) maṇirājatatāmrāṇi bhājanāni ca sarvaśaḥ/ vāripūrṇāni tānyasya śūlasyopari nikṣipet// ### [6.42.106](https://indike.org/pramana/in.med.samhita.susruta.6.42.106) guḍaḥ śāliryavāḥ kṣīraṃ sarpiḥpānaṃ virecanam/ jāṅgalāni ca māṃsāni bheṣajaṃ pittaśūlinām// ### [6.42.107](https://indike.org/pramana/in.med.samhita.susruta.6.42.107) rasān seveta pittaghnān pittalāni vivarjayet/ pālāśaṃ dhānvanaṃ vā+api pibedyūṣaṃ saśarkaram// ### [6.42.108](https://indike.org/pramana/in.med.samhita.susruta.6.42.108) parūṣakāṇi mṛdvīkākharjūrodakajānyapi/ tat pibeccharkarāyuktaṃ pittaśūlanivāraṇam// ### [6.42.109](https://indike.org/pramana/in.med.samhita.susruta.6.42.109) aśane bhuktamātre tu prakopaḥ ślaiṣmikasya ca/ vamanaṃ kārayettatra pippalīvāriṇā bhiṣak// ### [6.42.110](https://indike.org/pramana/in.med.samhita.susruta.6.42.110) rūkṣaḥ svedaḥ prayojyaḥ syādanyāścoṣṇāḥ kriyā hitāḥ/ pippalī śṛṅgaveraṃ ca śleṣmaśūle bhiṣagjitam// ### [6.42.111](https://indike.org/pramana/in.med.samhita.susruta.6.42.111) pāṭhāṃ vacāṃ trikaṭukaṃ tathā kaṭukarohiṇīm/ citrakasya ca †niryūhe pibedyūṣaṃ sahārjakam// ### [6.42.112](https://indike.org/pramana/in.med.samhita.susruta.6.42.112) eraṇḍaphalamūlāni mūlaṃ gokṣurakasya ca/ śālaparṇīṃ †pṛśniparṇīṃ bṛhatīṃ kaṇṭakārikām// ### [6.42.113](https://indike.org/pramana/in.med.samhita.susruta.6.42.113) dadyācchṛgālavinnāṃ ca sahadevāṃ tathaiva ca/ mahāsahāṃ kṣudrasahāṃ mūlamikṣurakasya ca// ### [6.42.114](https://indike.org/pramana/in.med.samhita.susruta.6.42.114) etat saṃbhṛtya saṃbhāraṃ jaladroṇe vipācayet/ caturbhāgāvaśeṣaṃ tu yavakṣārayutaṃ pibet// ### [6.42.115](https://indike.org/pramana/in.med.samhita.susruta.6.42.115) vātikaṃ paittikaṃ vā+api ślaiṣmikaṃ sānnipātikam/ prasahya nāśayecchūlaṃ chinnābhramiva mārutaḥ// ### [6.42.116](https://indike.org/pramana/in.med.samhita.susruta.6.42.116) pippalī svarjikākṣāro yavāścitraka eva ca/ sevyaṃ caitat samānīya bhasma kuryādvicakṣaṇaḥ// ### [6.42.117](https://indike.org/pramana/in.med.samhita.susruta.6.42.117) taduṣṇavāriṇā pītaṃ śleṣmaśūle bhiṣagjitam/ ruṇaddhi mārutaṃ śleṣmā kukṣipārśvavyavasthitaḥ// ### [6.42.118](https://indike.org/pramana/in.med.samhita.susruta.6.42.118) sa saṃruddhaḥ karotyāśu †sādhmānaṃ guḍguḍāyanam/ sūcībhiriva nistodaṃ kṛcchrocchvāsī tadā naraḥ// ### [6.42.119](https://indike.org/pramana/in.med.samhita.susruta.6.42.119) nānnaṃ vāñchati no nidrāmupaityartinipīḍitaḥ/ pārśvaśūlaḥ sa vijñeyaḥ kaphānilasamudbhavaḥ// ### [6.42.120](https://indike.org/pramana/in.med.samhita.susruta.6.42.120) tatra puṣkaramūlāni hiṅgu sauvarcalaṃ viḍam/ saindhavaṃ tumburuṃ pathyāṃ cūrṇaṃ kṛtvā tu pāyayet// ### [6.42.121](https://indike.org/pramana/in.med.samhita.susruta.6.42.121) pārśvahṛdbastiśūleṣu yavakvāthena saṃyutam/ sarpiḥ plīhodaroktaṃ vā ghṛtaṃ vā hiṅgusaṃyutam// ### [6.42.122](https://indike.org/pramana/in.med.samhita.susruta.6.42.122) bījapūrakasāraṃ vā payasā saha sādhitam/ eraṇḍatailamathavā madyamastupayorasaiḥ// ### [6.42.123](https://indike.org/pramana/in.med.samhita.susruta.6.42.123) bhojayeccāpi payasā jāṅgalena rasena vā/ prakupyati yadā kukṣau vahnimākramya mārutaḥ// ### [6.42.124](https://indike.org/pramana/in.med.samhita.susruta.6.42.124) tadā+asya bhojanaṃ bhuktaṃ sopastambhaṃ na pacyate/ ucchvasityāmaśakṛtā śūlenāhanyate muhuḥ// ### [6.42.125](https://indike.org/pramana/in.med.samhita.susruta.6.42.125) naivāsane na śayane †tiṣṭhan vā labhate sukham/ kukṣiśūla iti khyāto vātādāmasamudbhavaḥ// ### [6.42.126](https://indike.org/pramana/in.med.samhita.susruta.6.42.126) vamanaṃ kārayettatra laṅghayedvā yathābalam/ saṃsargapācanaṃ kuryādamlairdīpanasaṃyutaiḥ// ### [6.42.127](https://indike.org/pramana/in.med.samhita.susruta.6.42.127) nāgaraṃ dīpyakaṃ cavyaṃ hiṅgu sauvarcalaṃ viḍam/ mātuluṅgasya bījāni tathā śyāmorubūkayoḥ// ### [6.42.128](https://indike.org/pramana/in.med.samhita.susruta.6.42.128) bṛhatyāḥ kaṇṭakāryāśca kvāthaṃ śūlaharaṃ pibet/ vacā sauvarcalaṃ hiṅgu kuṣṭhaṃ sātiviṣā+abhayā// ### [6.42.129](https://indike.org/pramana/in.med.samhita.susruta.6.42.129) kuṭajasya ca bījāni sadyaḥśūlaharāṇi tu/ virecane† prayuñjīta jñātvā doṣabalābalam// ### [6.42.130](https://indike.org/pramana/in.med.samhita.susruta.6.42.130) snehabastīnnirūhāṃśca kuryāddoṣanibarhaṇān/ upanāhāḥ snehasekā dhānyāmlapariṣecanam// ### [6.42.131](https://indike.org/pramana/in.med.samhita.susruta.6.42.131) avagāhāśca śasyante yaccānyadapi taddhitam/ kaphapittāvaruddhastu māruto rasamūrcchitaḥ// ### [6.42.132](https://indike.org/pramana/in.med.samhita.susruta.6.42.132) hṛdisthaḥ kurute śūlamucchvāsārodhakaṃ† param/ sa hṛcchūla iti khyāto rasamārutasaṃbhavaḥ// ### [6.42.133](https://indike.org/pramana/in.med.samhita.susruta.6.42.133) tatrāpi karmābhihitaṃ yaduktaṃ hṛdvikāriṇām/ saṃrodhāt kupito vāyurbastimāvṛtya tiṣṭhati// ### [6.42.134](https://indike.org/pramana/in.med.samhita.susruta.6.42.134) bastivaṅkṣaṇanābhīṣu tataḥ śūlo+asya jāyate/ viṇmūtravātasaṃrodhī bastiśūlaḥ sa †mārutāt// ### [6.42.135](https://indike.org/pramana/in.med.samhita.susruta.6.42.135) nābhyāṃ vaṅkṣaṇapārśveṣu kukṣau meḍhrāntramardakaḥ/ mūtramāvṛtya gṛhṇāti mūtraśūlaḥ sa †mārutāt// ### [6.42.136](https://indike.org/pramana/in.med.samhita.susruta.6.42.136) vāyuḥ prakupito yasya rūkṣāhārasya dehinaḥ/ malaṃ ruṇaddhi koṣṭhasthaṃ mandīkṛtya tu pāvakam// ### [6.42.137](https://indike.org/pramana/in.med.samhita.susruta.6.42.137) śūlaṃ saṃjanayaṃstīvraṃ srotāṃsyāvṛtya tasya hi/ dakṣiṇaṃ yadi vā vāmaṃ kukṣimādāya jāyate// ### [6.42.138](https://indike.org/pramana/in.med.samhita.susruta.6.42.138) sarvatra vardhate kṣipraṃ bhramannatha† saghoṣavān/ pipāsā vardhate tīvrā bhramo mūrcchā ca jāyate// ### [6.42.139](https://indike.org/pramana/in.med.samhita.susruta.6.42.139) uccārito mūtritaśca na śāntimadhigacchati/ viṭśūlametajjānīyādbhiṣak paramadāruṇam// ### [6.42.140](https://indike.org/pramana/in.med.samhita.susruta.6.42.140) kṣipraṃ doṣaharaṃ kāryaṃ bhiṣajā sādhu jānatā/ svedanaṃ śamanaṃ caiva nirūhāḥ snehabastayaḥ// ### [6.42.141](https://indike.org/pramana/in.med.samhita.susruta.6.42.141) pūrvoddiṣṭān pāyayeta yogān koṣṭhaviśodhanān/ udāvartaharāścāsya kriyāḥ sarvāḥ sukhāvahāḥ// ### [6.42.142](https://indike.org/pramana/in.med.samhita.susruta.6.42.142) atimātraṃ yadā bhuktaṃ pāvake mṛdutāṃ gate/ sthirībhūtaṃ tu tatkoṣṭhe vāyurāvṛtya tiṣṭhati// ### [6.42.143](https://indike.org/pramana/in.med.samhita.susruta.6.42.143) avipākagataṃ hyannaṃ śūlaṃ tīvraṃ karotyati/ mūrcchā++ādhmānaṃ vidāhaśca hṛdutkleśo vilambikā// ### [6.42.144](https://indike.org/pramana/in.med.samhita.susruta.6.42.144) viricyate chardayati kampate+atha vimuhyati/ avipākādbhavecchūlastvannadoṣasamudbhavaḥ// ### [6.42.145](https://indike.org/pramana/in.med.samhita.susruta.6.42.145) vamanaṃ laṅghanaṃ svedaḥ pācanaṃ phalavartayaḥ/ kṣārāścūrṇāni† guṭikāḥ śasyante śūlanāśanāḥ// gulmāvasthāḥ kriyāḥ kāryā yathāvat sarvaśūlinām// ### [6.42.145\_1](https://indike.org/pramana/in.med.samhita.susruta.6.42.145_1) iti suśrutasaṃhitāyāmuttaratantrāntargate kāyacikitsātantre gulmapratiṣedho nāma (caturtho+adhyāyaḥ, āditaḥ) dvicatvāriṃśo+adhyāyaḥ //42// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.175.58) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.42](https://indike.org/pramana/in.med.samhita.susruta.6.42) · Pramāṇa