[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.45 # The Compendium of Suśruta 6.45: pañcacatvāriṃśattamo+adhyāyaḥ/ Suśrutasaṃhitā 6.45 - **Language:** Sanskrit ### pañcacatvāriṃśattamo+adhyāyaḥ/ ### [6.45.1](https://indike.org/pramana/in.med.samhita.susruta.6.45.1) athāto raktapittapratiṣedhaṃ vyākhyāsyāmaḥ// ### [6.45.2](https://indike.org/pramana/in.med.samhita.susruta.6.45.2) yathovāca bhagavān dhanvantariḥ// ### [6.45.3](https://indike.org/pramana/in.med.samhita.susruta.6.45.3) krodhaśokabhayāyāsaviruddhānnātapānalān/ kaṭvamlalabaṇakṣāratīkṣṇoṣṇātividāhinaḥ// ### [6.45.4](https://indike.org/pramana/in.med.samhita.susruta.6.45.4) nityamabhyasato duṣṭo rasaḥ pittaṃ prakopayet/ vidagdhaṃ svaguṇaiḥ pittaṃ vidahatyāśu śoṇitam// ### [6.45.5](https://indike.org/pramana/in.med.samhita.susruta.6.45.5) tataḥ pravartate raktamūrdhvaṃ cādho dvidhā+api vā/ āmāśayādvrajedūrdhvamadhaḥ pakvāśayādvrajet// ### [6.45.6](https://indike.org/pramana/in.med.samhita.susruta.6.45.6) †vidagdhayordvayoścāpi dvidhābhāgaṃ† pravartate/ kecit sayakṛtaḥ plīhnaḥ pravadantyasṛjo gatim// ### [6.45.7](https://indike.org/pramana/in.med.samhita.susruta.6.45.7) ūrdhvaṃ sādhyamadhoyāpyamasādhyaṃ yugapadgatam†/ sadanaṃ śītakāmitvaṃ kaṇṭhadhūmāyanaṃ vamiḥ// ### [6.45.8](https://indike.org/pramana/in.med.samhita.susruta.6.45.8) lohagandhiśca niḥśvāso bhavatyasmin bhaviṣyati/ bāhyāsṛglakṣaṇaistasya saṅkhyādoṣocchritīrviduḥ// ### [6.45.9](https://indike.org/pramana/in.med.samhita.susruta.6.45.9) daurbalyaśvāsakāsajvaravamathumadāstandritādāhamūrcchā bhukte cānne vidāhastvadhṛtirapi sadā hṛdyatulyā ca pīḍā/ tṛṣṇā kaṇṭhasya bhedaḥ śirasi ca †davanaṃ pūtiniṣṭhīvanaṃ ca dveṣo bhakte+avipāko viratirapi rate raktapittopasargāḥ// ### [6.45.10](https://indike.org/pramana/in.med.samhita.susruta.6.45.10) māṃsaprakṣālanābhaṃ kvathitamiva ca yat kardamāmbhonibhaṃ vā medaḥpūyāsrakalpaṃ† yakṛdiva yadi vā pakvajambūphalābham/ yat kṛṣṇaṃ yacca nīlaṃ bhṛśamatikuṇapaṃ yatra coktā vikārāstadvarjyaṃ raktapittaṃ surapatidhanuṣā yacca tulyaṃ vibhāti// ### [6.45.11](https://indike.org/pramana/in.med.samhita.susruta.6.45.11) nādau saṃgrāhyamudriktaṃ yadasṛgbalino+aśnataḥ/ tat pāṇḍugrahaṇīkuṣṭhaplīhagulmajvarāvaham// ### [6.45.12](https://indike.org/pramana/in.med.samhita.susruta.6.45.12) adhaḥpravṛttaṃ vamanairūrdhvagaṃ ca virecanaiḥ/ jayedanyataradvā+api kṣīṇasya śamanairasṛk// ### [6.45.13](https://indike.org/pramana/in.med.samhita.susruta.6.45.13) atipravṛddhadoṣasya pūrvaṃ lohitapittinaḥ/ akṣīṇabalamāṃsāgneḥ kartavyamapatarpaṇam// ### [6.45.14](https://indike.org/pramana/in.med.samhita.susruta.6.45.14) laṅghitasya tataḥ peyāṃ vidadhyāt svalpataṇḍulām/ rasayūṣau pradātavyau surabhisnehasaṃskṛtau/ tarpaṇaṃ pācanaṃ lehān sarpīṣi vividhāni ca// ### [6.45.15](https://indike.org/pramana/in.med.samhita.susruta.6.45.15) drākṣāmadhukakāśmaryasitāyuktaṃ virecanam/ yaṣṭīmadhukayuktaṃ ca sakṣaudraṃ vamanaṃ hitam// ### [6.45.16](https://indike.org/pramana/in.med.samhita.susruta.6.45.16) payāṃsi śītāni rasāśca jāṅgalāḥ satīnayūṣāśca saśāliṣaṣṭikāḥ/ paṭolaśelūsuniṣaṇṇayūthikāvaṭātimuktāṅkurasinduvārajam// ### [6.45.17](https://indike.org/pramana/in.med.samhita.susruta.6.45.17) hitaṃ ca śākaṃ ghṛtasaṃskṛtaṃ sadā tathaiva dhātrīphaladāḍimānvitam/ rasāśca pārāvataśaṅkhakūrmajāstathā yavāgvo vihitā ghṛtottarāḥ// ### [6.45.18](https://indike.org/pramana/in.med.samhita.susruta.6.45.18) santānikāścotpalavargasādhite kṣīre praśastā madhuśarkarottarāḥ/ himāḥ pradehā madhurā gaṇāśca ye ghṛtāni pathyāni ca raktapittinām// ### [6.45.19](https://indike.org/pramana/in.med.samhita.susruta.6.45.19) madhūkaśobhāñjanakovidārajaiḥ priyaṅgukāyāḥ kusumaiśca cūrṇitaiḥ/ bhiṣagvidadhyāccaturaḥ samākṣikān hitāya lehānasṛjaḥ praśāntaye// ### [6.45.20](https://indike.org/pramana/in.med.samhita.susruta.6.45.20) lihyācca dūrvāvaṭajāṃśca pallavān madhudvitīyān sitakarṇikasya† ca/ hitaṃ ca kharjūraphalaṃ samākṣikaṃ phalāni cānyānyapi tadguṇānyatha// ### [6.45.21](https://indike.org/pramana/in.med.samhita.susruta.6.45.21) raktātisāraproktāṃśca yogānatrāpi yojayet/ śuddhekṣukāṇḍamāpothya nave kumbhe himāmbhasā// ### [6.45.22](https://indike.org/pramana/in.med.samhita.susruta.6.45.22) yojayitvā kṣipedrātrāvākāśe sotpalaṃ tu tat/ prātaḥ srutaṃ kṣaudrayutaṃ pibecchoṇitapittavān// ### [6.45.23](https://indike.org/pramana/in.med.samhita.susruta.6.45.23) pibecchītakaṣāyaṃ vā jambvāmrārjunasaṃbhavam/ udumbaraphalaṃ piṣṭvā pibettadrasameva vā// ### [6.45.24](https://indike.org/pramana/in.med.samhita.susruta.6.45.24) trapuṣīmūlakalkaṃ vā sakṣaudraṃ taṇḍulāmbunā/ pibedakṣasamaṃ kalkaṃ yaṣṭīmadhukameva vā// ### [6.45.25](https://indike.org/pramana/in.med.samhita.susruta.6.45.25) candnaṃ madhukaṃ rodhramevameva samaṃ pibet/ karañjabījamevaṃ vā sitākṣaudrayutaṃ pibet// ### [6.45.26](https://indike.org/pramana/in.med.samhita.susruta.6.45.26) majjānamiṅgudasyaivaṃ pibenmadhukasaṃyutam/ sukhoṣṇaṃ lavaṇaṃ bījaṃ kārañjaṃ dadhimastunā// ### [6.45.27](https://indike.org/pramana/in.med.samhita.susruta.6.45.27) pibedvā+api tryahaṃ martyo raktapittābhipīḍitaḥ/ raktapittaharāḥ śastāḥ ṣaḍete yogasattamāḥ// ### [6.45.28](https://indike.org/pramana/in.med.samhita.susruta.6.45.28) pathyāścaivāvapīḍeṣu ghrāṇataḥ prasrute+asṛji/ atinisrutarakto vā kṣaudrayuktaṃ pibedasṛk/ yakṛdvā bhakṣayedājamāmaṃ pittasamāyutam// ### [6.45.29](https://indike.org/pramana/in.med.samhita.susruta.6.45.29) palāśavṛkṣasvarase vipakvaṃ sarpiḥ pibet kṣaudrayutaṃ suśītam/ vanaspatīnāṃ svarasaiḥ kṛtaṃ vā saśarkaraṃ kṣīraghṛtaṃ pibedvā// ### [6.45.30](https://indike.org/pramana/in.med.samhita.susruta.6.45.30) drākṣāmuśīrāṇyatha padmakaṃ sitā pṛthakpalāṃśānyudake samāvapet/ sthitaṃ niśāṃ tadrudhirāmayaṃ jayet pītaṃ payo vā+ambusamaṃ hitāśinaḥ// ### [6.45.31](https://indike.org/pramana/in.med.samhita.susruta.6.45.31) turaṅgavarcaḥsvarasaṃ samākṣikaṃ pibet sitākṣaudrayutaṃ vṛṣasya vā/ lihettathā vāstukabījacūrṇaṃ kṣaudrānvitaṃ taṇḍulasāhvayaṃ vā// ### [6.45.32](https://indike.org/pramana/in.med.samhita.susruta.6.45.32) lihyācca lājāñjanacūrṇamekamevaṃ sitākṣaudrayutāṃ tugākhyām/ drākṣāṃ sitāṃ tiktakarohiṇīṃ ca himāmbunā vā madhukena yuktām// ### [6.45.33](https://indike.org/pramana/in.med.samhita.susruta.6.45.33) pathyāmahiṃsrāṃ rajanīṃ ghṛtaṃ ca lihyāttathā śoṇitapittarogī/ vāsākaṣāyotpalamṛtpriyaṅgurodhrāñjanāmbhoruhakeśarāṇi// ### [6.45.34](https://indike.org/pramana/in.med.samhita.susruta.6.45.34) pītvā sitākṣaudrayutāni jahyāt pittasṛjo vegamudīrṇamāśu/ gāyatrijambvarjunakovidāraśirīṣarodhrāśanaśālmalīnām// ### [6.45.35](https://indike.org/pramana/in.med.samhita.susruta.6.45.35) puṣpāṇi śigrośca vicūrṇya leho madhvanvitaḥ śoṇitapittaroge/ sakṣaudramindīvarabhasmavāri karañjabījaṃ †madhusarpiṣī ca// ### [6.45.36](https://indike.org/pramana/in.med.samhita.susruta.6.45.36) jambvarjunāmrakvathitaṃ ca toyaṃ ghnanti trayaḥ pittamasṛk ca yogāḥ/ mūlāni puṣpāṇi ca mātuluṅgyāḥ piṣṭvā pibettaṇḍuladhāvanena// ### [6.45.37](https://indike.org/pramana/in.med.samhita.susruta.6.45.37) ghrāṇapravṛtte jalamāśu deyaṃ saśarkaraṃ nāsikayā payo vā/ drākṣārasaṃ kṣīraghṛtaṃ pibedvā saśarkaraṃ cekṣurasaṃ himaṃ vā// ### [6.45.38](https://indike.org/pramana/in.med.samhita.susruta.6.45.38) śītopacāraṃ madhuraṃ ca kuryādviśeṣataḥ śoṇitapittaroge/ drākṣāghṛtakṣaudrasitāyutena vidārigandhādivipācitena// ### [6.45.39](https://indike.org/pramana/in.med.samhita.susruta.6.45.39) kṣīreṇa cāsthāpanamagryamuktaṃ hitaṃ ghṛtaṃ cāpyanuvāsanārtham/ priyaṅgurodhrāñjanagairikotpalaiḥ suvarṇakālīyakaraktacandanaiḥ// ### [6.45.40](https://indike.org/pramana/in.med.samhita.susruta.6.45.40) sitāśvagandhāmbudayaṣṭikāhvayairmṛṇālasaugandhikatulyapeṣitaiḥ/ nirūhya cainaṃ payasā samākṣikairghṛtaplutaiḥ śītajalāvasecitam// ### [6.45.41](https://indike.org/pramana/in.med.samhita.susruta.6.45.41) kṣīraudanaṃ bhuktamathānuvāsayedghṛtena yaṣṭīmadhusādhitena ca/ adhovahaṃ śoṇitameṣa nāśayettathā+atisāraṃ rudhirasya dustaram// ### [6.45.42](https://indike.org/pramana/in.med.samhita.susruta.6.45.42) virekayoge tvati caiva śasyate vāmyaśca rakte vijite balānvitaḥ// ### [6.45.43](https://indike.org/pramana/in.med.samhita.susruta.6.45.43) evaṃvidhā uttarabāstayaśca mūtrāśayasthe rudhire vidheyāḥ/ pravṛttarakteṣu ca pāyujeṣu kuryādvidhānaṃ khalu raktapaittam// ### [6.45.44](https://indike.org/pramana/in.med.samhita.susruta.6.45.44) vidhiścāsṛgdare+apyeṣa strīṇāṃ kāryo vijānatā/ śastrakarmaṇi raktaṃ ca yasyātīva pravartate// ### [6.45.45](https://indike.org/pramana/in.med.samhita.susruta.6.45.45) trayāṇāmapi doṣāṇāṃ śoṇite+api ca sarvaśaḥ/ liṅgānyālokya kartavyaṃ cikitsitamanantaram// ### [6.45.45\_1](https://indike.org/pramana/in.med.samhita.susruta.6.45.45_1) iti suśrutasaṃhitāyāmuttaratantrāntargate kāyacikitsātantre raktapittapratiṣedho nāma (saptamo+adhyāyaḥ, āditaḥ) pañcacatvāriṃśattamo+adhyāyaḥ //45// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.179.2) — Ḍalhaṇa, Sanskrit ## Linked texts (3) - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.105.10) — Trimalla, Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.107.10) — Trimalla, Sanskrit - [Vaidyakasāroddhāra](https://indike.org/pramana/in.med.cikitsa.gauda.vaidyakasaroddhara.2.p149) — Brajanāthaśarman, Sanskrit --- Source: [https://indike.org/pramana/in.med.samhita.susruta.6.45](https://indike.org/pramana/in.med.samhita.susruta.6.45) · Pramāṇa