[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.46 # The Compendium of Suśruta 6.46: ṣaṭcatvāriṃśattamo+adhyāyaḥ/ Suśrutasaṃhitā 6.46 - **Language:** Sanskrit ### ṣaṭcatvāriṃśattamo+adhyāyaḥ/ ### [6.46.1](https://indike.org/pramana/in.med.samhita.susruta.6.46.1) athāto mūrcchāpratiṣedhaṃ vyākhyāsyāmaḥ// ### [6.46.2](https://indike.org/pramana/in.med.samhita.susruta.6.46.2) yathovāca bhagavān dhanvantariḥ// ### [6.46.3](https://indike.org/pramana/in.med.samhita.susruta.6.46.3) kṣīṇasya bahudoṣasya viruddhāhārasevinaḥ/ vegāghātādabhīghātāddhīnasattvasya vā punaḥ// ### [6.46.4](https://indike.org/pramana/in.med.samhita.susruta.6.46.4) karaṇāyataneṣūgrā bāhyeṣvābhyantareṣu ca/ niviśante yadā doṣāstadā mūrcchanti mānavāḥ// ### [6.46.5](https://indike.org/pramana/in.med.samhita.susruta.6.46.5) hṛtpīḍā jṛmbhaṇaṃ glāniḥ saṃjñānāśo balasya ca/ sarvāsāṃ pūrvarūpāṇi †yathāsvaṃ tā vibhāvayet// ### [6.46.6](https://indike.org/pramana/in.med.samhita.susruta.6.46.6) saṃjñāvahāsu nāḍīṣu pihitāsvanilādibhiḥ/ tamo+abhyupaiti sahasā sukhaduḥkhavyapohakṛt// ### [6.46.7](https://indike.org/pramana/in.med.samhita.susruta.6.46.7) sukhaduḥkhavyapohācca naraḥ patati kāṣṭhavat/ moho mūrccheti tāṃ prāhuḥ ṣaḍvidhā sā prakīrtitā// ### [6.46.8](https://indike.org/pramana/in.med.samhita.susruta.6.46.8) vātādibhiḥ śoṇitena madyena ca viṣeṇa ca/ ṣaṭsvapyetāsu† pittaṃ hi prabhutvenāvatiṣṭhate// ### [6.46.9](https://indike.org/pramana/in.med.samhita.susruta.6.46.9) apasmāroktaliṅgāni tāsāmuktāni tattvataḥ/ pṛthivyambhastamorūpaṃ raktagandhaśca† tanmayaḥ// ### [6.46.10](https://indike.org/pramana/in.med.samhita.susruta.6.46.10) tasmādraktasya gandhena mūrcchanti bhuvi mānavāḥ/ dravyasvabhāva ityeke sthitāstu viṣamadyayoḥ// ### [6.46.11](https://indike.org/pramana/in.med.samhita.susruta.6.46.11) guṇāstīvrataratvena† sthitāstu viṣamadyayoḥ/ ta eva tasmājjāyeta mohastābhyāṃ yatheritaḥ// ### [6.46.12](https://indike.org/pramana/in.med.samhita.susruta.6.46.12) madyena vilapaṃśchete naṣṭavibhrāntamānasaḥ/ gātrāṇi vikṣipan bhūmau jarāṃ yāvanna yāti tat// ### [6.46.13](https://indike.org/pramana/in.med.samhita.susruta.6.46.13) vepathusvapnatṛṣṇāḥ syuḥ stambhaśca viṣamūrcchite/ veditavyaṃ tīvrataraṃ yathāsvaṃ viṣalakṣaṇaiḥ// ### [6.46.14](https://indike.org/pramana/in.med.samhita.susruta.6.46.14) sekāvagāhau maṇayaḥ sahārāḥ śītāḥ pradehā vyajanānilāśca/ śītāni pānāni ca gandhavanti sarvāsu mūrcchāsvanivāritāni// ### [6.46.15](https://indike.org/pramana/in.med.samhita.susruta.6.46.15) sitāpriyālekṣurasaplutāni drākṣāmadhūkasvarasānvitāni/ kharjūrakāśmaryarasaiḥ śṛtāni pānāni sarpīṃṣi ca jīvanāni// ### [6.46.16](https://indike.org/pramana/in.med.samhita.susruta.6.46.16) siddhāni varge madhure payāṃsi sadāḍimā jāṅgalajā rasāśca/ tathā yavā lohitaśālayaśca mūrcchāsu pathyāśca sadā satīnāḥ// ### [6.46.17](https://indike.org/pramana/in.med.samhita.susruta.6.46.17) bhujaṅgapuṣpaṃ maricānyuśīraṃ kolasya madhyaṃ ca pibet samāni/ śītena toyena† bisaṃ mṛṇālaṃ kṣaudreṇa kṛṣṇāṃ sitayā ca pathyām// ### [6.46.18](https://indike.org/pramana/in.med.samhita.susruta.6.46.18) kuryācca nāsāvadanāvarodhaṃ kṣīraṃ pibedvā+apyatha mānuṣīṇām/ mūrcchāṃ prasaktāṃ tu śirovirekairjayedabhīkṣṇaṃ vamanaiśca tīkṣṇaiḥ// ### [6.46.19](https://indike.org/pramana/in.med.samhita.susruta.6.46.19) †harītakīkvāthaśṛtaṃ ghṛtaṃ vā dhātrīphalānāṃ svarasaiḥ kṛtaṃ vā/ drākṣāsitādāḍimalājavanti śītāni nīlotpalapadmavanti// ### [6.46.20](https://indike.org/pramana/in.med.samhita.susruta.6.46.20) pibet kaṣāyāṇi ca gandhavanti pittajvaraṃ yāni śamaṃ nayanti/ prabhūtadoṣastamaso+atirekāt saṃmūrcchito naiva vibudhyate yaḥ// ### [6.46.21](https://indike.org/pramana/in.med.samhita.susruta.6.46.21) saṃnyastasaṃjño bhṛśaduścikitsyo jñeyastadā buddhimatā manuṣyāḥ/ yathā++āmaloṣṭaṃ salile niṣiktaṃ samuddheredāśvavilīnameva// ### [6.46.22](https://indike.org/pramana/in.med.samhita.susruta.6.46.22) tadvaccikitsettvarayā bhiṣaktamasvedanaṃ mṛtyuvaśaṃ prayātam/ tīkṣṇāñjanābhyañjanadhūmayogaistathā nakhābhyantaratotrapātaiḥ// ### [6.46.23](https://indike.org/pramana/in.med.samhita.susruta.6.46.23) vāditragītānunayairapūrvairvighaṭṭanairguptaphalāvagharṣaiḥ/ ābhiḥ kriyābhiśca na labdhasaṃjñaḥ sānāhalālāśvasanaśca varjyaḥ// ### [6.46.24](https://indike.org/pramana/in.med.samhita.susruta.6.46.24) prabuddhasaṃjñaṃ vamanānulomyaistīkṣṇairviśuddhaṃ laghupathyabhuktam/ phalatrikaiścitrakanāgarāḍhyaistathā+aśmajātājjatunaḥ prayogaiḥ/ saśarkarairmāsamupakrameta viśeṣato jīrṇaghṛtaṃ sa pāyyaḥ// ### [6.46.25](https://indike.org/pramana/in.med.samhita.susruta.6.46.25) yathāsvaṃ ca jvaraghnāni kaṣāyāṇyupayojayet/ sarvamūrcchāparītānāṃ viṣajāyāṃ viṣāpaham// ### [6.46.25\_1](https://indike.org/pramana/in.med.samhita.susruta.6.46.25_1) iti suśrutasaṃhitāyāmuttaratantrāntargate kāyacikitsātantre mūrcchāpratiṣedho nāma (aṣṭamo+adhyāyaḥ, āditaḥ) ṣaṭcatvāriṃśattamo+adhyāyaḥ //46// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.180.5) — Ḍalhaṇa, Sanskrit ## Linked texts (1) - [Vaidyakasāroddhāra](https://indike.org/pramana/in.med.cikitsa.gauda.vaidyakasaroddhara.2.p287) — Brajanāthaśarman, Sanskrit --- Source: [https://indike.org/pramana/in.med.samhita.susruta.6.46](https://indike.org/pramana/in.med.samhita.susruta.6.46) · Pramāṇa