[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.49 # The Compendium of Suśruta 6.49: ekonapañcāśattamo+adhyāyaḥ/ Suśrutasaṃhitā 6.49 - **Language:** Sanskrit ### ekonapañcāśattamo+adhyāyaḥ/ ### [6.49.1](https://indike.org/pramana/in.med.samhita.susruta.6.49.1) athātaśchardipratiṣedhamadhyāyaṃ vyākhyāsyāmaḥ// ### [6.49.2](https://indike.org/pramana/in.med.samhita.susruta.6.49.2) yathovāca bhagavān dhanvantariḥ// ### [6.49.3](https://indike.org/pramana/in.med.samhita.susruta.6.49.3) atidravairatisnigdhairahṛdyairlavaṇairati/ akāle cātimātraiśca tathā+asātmyaiśca bhojanaiḥ// ### [6.49.4](https://indike.org/pramana/in.med.samhita.susruta.6.49.4) śramāt kṣayāttathodvegādajīrṇāt kṛmidoṣataḥ/ nāryāścāpannasattvāyāstathā+atidrutamaśnataḥ// ### [6.49.5](https://indike.org/pramana/in.med.samhita.susruta.6.49.5) atyantāmaparītasya chardervai saṃbhavo dhruvam/ (bībhatsairhetubhiścānyairdrutamutkleśito balāt†//) ### [6.49.6](https://indike.org/pramana/in.med.samhita.susruta.6.49.6) chādayannānanaṃ vegairardayannaṅgabhañjanaiḥ/ nirucyate chardiriti doṣo †vaktrādviniścaran// ### [6.49.7](https://indike.org/pramana/in.med.samhita.susruta.6.49.7) doṣānudīrayan vṛddhānudāno vyānasaṅgataḥ/ ūrdhvamāgacchati bhṛśaṃ viruddhāhārasevanāt†// ### [6.49.8](https://indike.org/pramana/in.med.samhita.susruta.6.49.8) †praseko hṛdayotkleśo bhaktasyānabhinandanam/ pūrvarūpaṃ mataṃ chardyā yathāsvaṃ ca vibhāvayet// ### [6.49.9](https://indike.org/pramana/in.med.samhita.susruta.6.49.9) †pracchardayet phenilamalpamalpaṃ śūlārdito+abhyarditapārśvapṛṣṭhaḥ/ śrāntaḥ saghoṣaṃ bahuśaḥ kaṣāyaṃ jīrṇe+adhikaṃ sā+anilajā vamistu// ### [6.49.10](https://indike.org/pramana/in.med.samhita.susruta.6.49.10) yo+amlaṃ bhṛśaṃ vā kaṭutiktavaktraḥ pītaṃ saraktaṃ haritaṃ vamedvā/ sadāhacoṣajvaravaktraśoṣo mūrcchānvitaḥ† pittanimittajā sā// ### [6.49.11](https://indike.org/pramana/in.med.samhita.susruta.6.49.11) yo hṛṣṭaromā madhuraṃ prabhūtaṃ śuklaṃ himaṃ sāndrakaphānuviddham/ abhaktaruggauravasādayukto† vamedvamī sā kaphakopajā syāt// ### [6.49.12](https://indike.org/pramana/in.med.samhita.susruta.6.49.12) sarvāṇi rūpāṇi bhavanti yasyāṃ sā sarvadoṣaprabhavā matā tu/ bībhatsajā dauhṛdajā++āmajā ca †sātmyaprakopāt kṛmijā ca †yā hi/ sā pañcamī †tāṃ ca vibhāvayettu doṣocchrayeṇaiva yathoktamādau// ### [6.49.13](https://indike.org/pramana/in.med.samhita.susruta.6.49.13) śūlahṛllāsabahulā† kṛmijā ca viśeṣataḥ/ kṛmihṛdrogatulyena lakṣaṇena ca lakṣitā// ### [6.49.14](https://indike.org/pramana/in.med.samhita.susruta.6.49.14) kṣīṇasyopadravairyuktāṃ sāsṛkpūyāṃ sacandrikām/ chardiṃ prasaktāṃ kuśalo nārabheta cikitsitum// ### [6.49.15](https://indike.org/pramana/in.med.samhita.susruta.6.49.15) āmāśayotkleśabhavā hi sarvāstasmāddhitaṃ laṅghanameva †tāsu// ### [6.49.16](https://indike.org/pramana/in.med.samhita.susruta.6.49.16) vamīṣu bahudoṣāsu chardanaṃ hitamucyate/ virecanaṃ vā kurvīta yathādoṣocchrayaṃ bhiṣak// ### [6.49.17](https://indike.org/pramana/in.med.samhita.susruta.6.49.17) †saṃsargaścānupūrveṇa yathāsvaṃ bheṣajāyutaḥ/ laghūni pariśuṣkāṇi sātmyānyannāni cācaret// ### [6.49.18](https://indike.org/pramana/in.med.samhita.susruta.6.49.18) yathāsvaṃ ca kaṣāyāṇi jvaraghnāni prayojayet/ hanyāt kṣīraghṛtaṃ pītaṃ chardiṃ pavanasaṃbhavām// ### [6.49.19](https://indike.org/pramana/in.med.samhita.susruta.6.49.19) sasaindhavaṃ pibet sarpirvātacchardinivāraṇam/ mudgāmalakayūṣo vā sasarpiṣkaḥ sasaindhavaḥ/ yavāgūṃ madhumiśrāṃ vā pañcamūlīkṛtāṃ pibet// ### [6.49.20](https://indike.org/pramana/in.med.samhita.susruta.6.49.20) pibedvā vyaktasindhūtthaṃ phalāmlaṃ vaiṣkiraṃ rasam/ sukhoṣṇalavaṇaṃ cātra hitaṃ snehavirecanam// ### [6.49.21](https://indike.org/pramana/in.med.samhita.susruta.6.49.21) pittopaśamanīyāni pākyāni† śiśirāṇi ca/ kaṣāyāṇyupayuktāni ghnanti pittakṛtāṃ vamīm// ### [6.49.22](https://indike.org/pramana/in.med.samhita.susruta.6.49.22) śodhanaṃ madhuraiścātra drākṣārasasamāyutaiḥ/ balavatyāṃ praśaṃsanti sarpistailvakameva ca// ### [6.49.23](https://indike.org/pramana/in.med.samhita.susruta.6.49.23) †āragvadhādiniryūhaṃ daśāṅgayogameva vā/ pāyayetātha sakṣaudraṃ kaphajāyāṃ cikitsakaḥ// ### [6.49.24](https://indike.org/pramana/in.med.samhita.susruta.6.49.24) kṛtaṃ guḍūcyā vidhivat kaṣāyaṃ himasaṃjñitam/ tisṛṣvapi bhavet pathyaṃ mākṣikeṇa samanvitam// ### [6.49.25](https://indike.org/pramana/in.med.samhita.susruta.6.49.25) bībhatsajāṃ hṛdyatamairdauhṛdīṃ kāṅkṣitaiḥ phalaiḥ/ laṅghanairvamanaiścāmāṃ †sātmyaiḥ sātmyaprakopajām// ### [6.49.26](https://indike.org/pramana/in.med.samhita.susruta.6.49.26) kṛmihṛdrogavaccāpi kṛmijāṃ sādhayedvamīm/ vitarecca yathādoṣaṃ śastaṃ vidhimanantaram// ### [6.49.27](https://indike.org/pramana/in.med.samhita.susruta.6.49.27) dadhittharasasṃsaktāṃ pippalīṃ mākṣikānvitām/ muhurmuhurnaro līḍhvā chardibhyaḥ pravimucyate(pratimucyate)// ### [6.49.28](https://indike.org/pramana/in.med.samhita.susruta.6.49.28) samākṣikā madhurasā pītā vā taṇḍulāmbunā/ tarpaṇaṃ vā madhuyutaṃ tisṛṇāmapi bheṣajam// ### [6.49.29](https://indike.org/pramana/in.med.samhita.susruta.6.49.29) svayaṅguptāṃ sayaṣṭyāhvāṃ taṇḍulāmbumadhudravām/ pibedyavāgūmathavā siddhāṃ patraiḥ karañjajaiḥ// ### [6.49.30](https://indike.org/pramana/in.med.samhita.susruta.6.49.30) yuktāmlalavaṇāḥ piṣṭāḥ kustumburyo+athavā hitāḥ/ taṇḍulāmbuyutaṃ khādet kapitthaṃ tryūṣaṇena vā// ### [6.49.31](https://indike.org/pramana/in.med.samhita.susruta.6.49.31) sitācandanamadhvāktaṃ lihyādvā makṣikāśakṛt/ pibet payo+agnitaptaṃ ca nirvāpya gṛhagodhikām†// ### [6.49.32](https://indike.org/pramana/in.med.samhita.susruta.6.49.32) sarpiḥkṣaudrayutān vā+api lājaśaktūn pibettathā/ sarpiḥkṣaudrasitopetāṃ māgadhīṃ vā lihettathā// ### [6.49.33](https://indike.org/pramana/in.med.samhita.susruta.6.49.33) dhātrīrase candanaṃ vā ghṛṣṭaṃ mudgadalāmbunā/ kolāmalakamajjānaṃ lihyādvā trisugandhikam// ### [6.49.34](https://indike.org/pramana/in.med.samhita.susruta.6.49.34) sakṣaudrāṃ śālilājānāṃ yavagūṃ vā pibennaraḥ/ ghreyāṇyupahareccāpi manoghrāṇasukhāni ca// ### [6.49.35](https://indike.org/pramana/in.med.samhita.susruta.6.49.35) jāṅgalāni ca māṃsāni śubhāni† pānakāni ca/ bhojanāni vicitrāṇi kuryātsarvāsvatandritaḥ// ### [6.49.35\_1](https://indike.org/pramana/in.med.samhita.susruta.6.49.35_1) iti suśrutasṃhitāyāmuttaratantrāntargate kāyacikitsātantre chardipratiṣedho nāma (ekādaśo+adhyāyaḥ, āditaḥ) ekonapañcāśattamo+adhyāyaḥ //49// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.183.2) — Ḍalhaṇa, Sanskrit ## Linked texts (2) - [Yogaratnākara (Mayūrapāda Bhikṣu)](https://indike.org/pramana/in.med.yoga.yogaratnakara-mayurapada-bhiksu.315.1-43) — Mayūrapāda Bhikṣu 1700, Sanskrit - [Siddhisāra](https://indike.org/pramana/in.med.sangraha.siddhisara.17.7) — Sanskrit --- Source: [https://indike.org/pramana/in.med.samhita.susruta.6.49](https://indike.org/pramana/in.med.samhita.susruta.6.49) · Pramāṇa