[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.53 # The Compendium of Suśruta 6.53: tripañcāśattamo+adhyāyaḥ/ Suśrutasaṃhitā 6.53 - **Language:** Sanskrit ### tripañcāśattamo+adhyāyaḥ/ ### [6.53.1](https://indike.org/pramana/in.med.samhita.susruta.6.53.1) athātaḥ svarabhedapratiṣedhamadhyāyaṃ vyākhyāsyāmaḥ// ### [6.53.2](https://indike.org/pramana/in.med.samhita.susruta.6.53.2) yathovāca bhagavān dhanvantariḥ// ### [6.53.3](https://indike.org/pramana/in.med.samhita.susruta.6.53.3) atyuccabhāṣaṇaviṣādhyayanātigītaśītādibhiḥ† prakupitāḥ pavanādayastu/ srotaḥsu te svaravaheṣu gatāḥ pratiṣṭhāṃ hanyuḥ svaraṃ bhavati cāpi hi ṣaḍvidhaḥ saḥ// ### [6.53.4](https://indike.org/pramana/in.med.samhita.susruta.6.53.4) vātena kṛṣṇanayanānanamūtravarcā bhinnaṃ śanairvadati gadgadavat svaraṃ ca/ pittena pītavadanākṣipurīṣamūtro brūyādgalena †paridāhasamanvitena// ### [6.53.5](https://indike.org/pramana/in.med.samhita.susruta.6.53.5) kṛcchrāt kaphena satataṃ kapharuddhakaṇṭho mandaṃ śanairvadati cāpi divā viśeṣaḥ†/ sarvātmake bhavati sarvavikārasaṃpadavyaktatā ca vacasastamasādhyamāhuḥ// ### [6.53.6](https://indike.org/pramana/in.med.samhita.susruta.6.53.6) dhūpyeta vāk kṣayakṛte kṣayamāpnuyācca vāgeṣa cāpi(vāpi) hatavāk parivarjanīyaḥ/ †antargalaṃ svaramalakṣyapadaṃ cireṇa †medaścayādvadati digdhagalauṣṭhatāluḥ// ### [6.53.7](https://indike.org/pramana/in.med.samhita.susruta.6.53.7) kṣīṇasya vṛddhasya kṛśasya cāpi cirotthito yaśca sahopajātaḥ/ medasvinaḥ sarvasamudbhavaśca svarāmayo yo na sa siddhimeti// ### [6.53.8](https://indike.org/pramana/in.med.samhita.susruta.6.53.8) snigdhān svarāturanarānapakṛṣṭadoṣān nyāyena †tān vamanarecanabastibhiśca/ nasyāvapīḍamukhadhāvanadhūmalehaiḥ saṃpādayecca vividhaiḥ kavalagrahaiśca// ### [6.53.9](https://indike.org/pramana/in.med.samhita.susruta.6.53.9) yaḥ śvāsakāsavidhirādita eva coktastaṃ cāpyaśeṣamavatārayituṃ yateta/ vaiśeṣikaṃ ca vidhimūrdhvamato vadāmi taṃ vai svarāturahitaṃ nikhilaṃ nibodha// ### [6.53.10](https://indike.org/pramana/in.med.samhita.susruta.6.53.10) svaropaghāte+anilaje bhuktopari ghṛtaṃ pibet/ kāsamardakavātārkamārkavasvarase śṛtam// ### [6.53.11](https://indike.org/pramana/in.med.samhita.susruta.6.53.11) pītaṃ ghṛtaṃ hantyanilaṃ siddhamārtagale rase/ yavakṣārājamodābhyāṃ citrakāmalakeṣu vā// ### [6.53.12](https://indike.org/pramana/in.med.samhita.susruta.6.53.12) devadārvagnikābhyāṃ vā siddhāmājaṃ samākṣikam/ sukhodakānupāno vā sasarpiṣko guḍaudanaḥ// ### [6.53.13](https://indike.org/pramana/in.med.samhita.susruta.6.53.13) kṣīrānupānaṃ pitte tu pibet sarpiratandritaḥ/ aśnīyācca sasarpiṣkaṃ yaṣṭīmadhukapāyasam// ### [6.53.14](https://indike.org/pramana/in.med.samhita.susruta.6.53.14) lihyānmadhurakāṇāṃ vā cūrṇaṃ madhughṛtāplutam/ śatāvarīcūrṇayogaṃ balācūrṇamathāpi vā// ### [6.53.15](https://indike.org/pramana/in.med.samhita.susruta.6.53.15) pibet kaṭūni mūtreṇa kaphaje svarasaṃkṣaye/ lihyādvā madhutailābhyāṃ bhuktvā khādet kaṭūni vā// ### [6.53.16](https://indike.org/pramana/in.med.samhita.susruta.6.53.16) svaropaghāte medoje kaphavadvidhiriṣyate/ sarvaje kṣayaje cāpi pratyākhyāyācaret kriyām// ### [6.53.17](https://indike.org/pramana/in.med.samhita.susruta.6.53.17) śarkarāmadhumiśrāṇi śṛtāni madhuraiḥ saha/ pibet payāṃsi yasyoccairvadato+abhihataḥ svaraḥ// ### [6.53.17\_1](https://indike.org/pramana/in.med.samhita.susruta.6.53.17_1) iti suśrutasaṃhitāyāmuttaratantrāntargate kāyacikitsātantre chardipratiṣedho nāma (pañcadaśo+adhyāyaḥ, āditaḥ) tripañcāśattamo+adhyāyaḥ //53// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.188.2) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.53](https://indike.org/pramana/in.med.samhita.susruta.6.53) · Pramāṇa