[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.54 # The Compendium of Suśruta 6.54: catuḥpañcāśattamo+adhyāyaḥ/ Suśrutasaṃhitā 6.54 - **Language:** Sanskrit ### catuḥpañcāśattamo+adhyāyaḥ/ ### [6.54.1](https://indike.org/pramana/in.med.samhita.susruta.6.54.1) athātaḥ kṛmirogapratiṣedhamadhyāyaṃ vyākhyāsyāmaḥ// ### [6.54.2](https://indike.org/pramana/in.med.samhita.susruta.6.54.2) yathovāca bhagavān dhanvantariḥ// ### [6.54.3](https://indike.org/pramana/in.med.samhita.susruta.6.54.3) ajīrṇādhyaśanāsātmyaviruddhamalināśanaiḥ/ avyāyāmadivāsvapnagurvatisnigdhaśītalaiḥ// ### [6.54.4](https://indike.org/pramana/in.med.samhita.susruta.6.54.4) māṣapiṣṭānnavidalabisaśālūkaserukaiḥ/ parṇaśākasurāśuktadadhikṣīraguḍekṣubhiḥ// ### [6.54.5](https://indike.org/pramana/in.med.samhita.susruta.6.54.5) palalānūpapiśitapiṇyākapṛthukādibhiḥ/ svādvamladravapānaiśca śleṣmā pittaṃ ca kupyati// ### [6.54.6](https://indike.org/pramana/in.med.samhita.susruta.6.54.6) kṛmīn bahuvidhākārān karoti vividhāśrayān/ āmapakvāśaye teṣāṃ kaphaviḍjanmanāṃ punaḥ/ dhamanyāṃ raktajānāṃ ca prasavaḥ prāyaśaḥ smṛtaḥ// ### [6.54.7](https://indike.org/pramana/in.med.samhita.susruta.6.54.7) viṃśateḥ kṛmijātīnāṃ trividhaḥ saṃbhavaḥ smṛtaḥ/ purīṣakapharaktāni tāsāṃ vakṣyāmi vistaram// ### [6.54.8](https://indike.org/pramana/in.med.samhita.susruta.6.54.8) ajavā vijavāḥ† kipyāścipyā gaṇḍūpadāstathā/ cūravo dvimukhāścaiva jñeyāḥ sapta purīṣajāḥ// ### [6.54.9](https://indike.org/pramana/in.med.samhita.susruta.6.54.9) śvetāḥ sūkṣmāstudantyete gudaṃ pratisaranti ca/ teṣāmevāpare pucchaiḥ pṛthavaśca bhavanti hi// ### [6.54.10](https://indike.org/pramana/in.med.samhita.susruta.6.54.10) śūlāgnimāndyapāṇḍutvaviṣṭambhabalasaṃkṣayāḥ/ prasekārucihṛdrogaviḍbhedāstu purīṣajaiḥ// ### [6.54.11](https://indike.org/pramana/in.med.samhita.susruta.6.54.11) raktā gaṇḍūpadā dīrghā gudakaṇḍūnipātinaḥ/ śūlāṭopaśakṛdbhedapaktināśakarāśca te// ### [6.54.12](https://indike.org/pramana/in.med.samhita.susruta.6.54.12) darbhapuṣpā mahāpuṣpāḥ pralūnāścipiṭāstathā/ pipīlikā dāruṇāśca kaphakopasamudbhavāḥ// ### [6.54.13](https://indike.org/pramana/in.med.samhita.susruta.6.54.13) romaśā romamūrdhānaḥ sapucchāḥ śyāvamaṇḍalāḥ/ rūḍhadhānyāṅkurākārāḥ śuklāste tanavastathā// ### [6.54.14](https://indike.org/pramana/in.med.samhita.susruta.6.54.14) majjādā netraleḍhārastāluśrotrabhujastathā/ śirohṛdrogavamathupratiśyāyakarāśca te// ### [6.54.15](https://indike.org/pramana/in.med.samhita.susruta.6.54.15) keśaromanakhādāśca dantādāḥ kikkiśāstathā/ kuṣṭhajāḥ saparīsarpā jñeyāḥ śoṇitasaṃbhavāḥ// ### [6.54.16](https://indike.org/pramana/in.med.samhita.susruta.6.54.16) te saraktāśca kṛṣṇāśca snigdhāśca pṛthavastathā/ raktādhiṣṭhānajān prāyo vikārān janayanti te// ### [6.54.17](https://indike.org/pramana/in.med.samhita.susruta.6.54.17) māṣapiṣṭānnavidalaparṇaśākaiḥ purīṣajāḥ/ māṃsamāṣaguḍakṣīradadhitailaiḥ kaphodbhavāḥ// ### [6.54.18](https://indike.org/pramana/in.med.samhita.susruta.6.54.18) viruddhājīrṇaśākādyaiḥ śoṇitotthā bhavanti hi/ jvaro vivarṇatā śūlaṃ hṛdrogaḥ sadanaṃ bhramaḥ// ### [6.54.19](https://indike.org/pramana/in.med.samhita.susruta.6.54.19) bhaktadveṣo+atisāraśca saṃjātakṛmilakṣaṇam/ dṛśyāstrayodaśādyāstu kṛmīṇāṃ parikīrtitāḥ// ### [6.54.20](https://indike.org/pramana/in.med.samhita.susruta.6.54.20) keśādādyāstvadṛśyāste dvāvādyau parivarjayet/ eṣāmanyatamaṃ jñātvā jighāṃsuḥ snigdhamāturam// ### [6.54.21](https://indike.org/pramana/in.med.samhita.susruta.6.54.21) surasādivipakvena sarpiṣā vāntamāditaḥ/ virecayettīkṣṇatarairyogairāsthāpayecca tam// ### [6.54.22](https://indike.org/pramana/in.med.samhita.susruta.6.54.22) yavakolakulatthānāṃ surasādergaṇasya ca/ viḍaṅgasnehayuktena kvāthena lavaṇena ca// ### [6.54.23](https://indike.org/pramana/in.med.samhita.susruta.6.54.23) pratyāgate nirūhe tu naraṃ snātaṃ sukhāmbunā/ yuñjyāt kṛmighnairaśanaistataḥ śīghraṃ bhiṣagvaraḥ// ### [6.54.24](https://indike.org/pramana/in.med.samhita.susruta.6.54.24) snehenoktena cainaṃ tu yojayet snehabastinā/ tataḥ śirīṣakiṇihīrasaṃ kṣaudrayutaṃ pibet// ### [6.54.25](https://indike.org/pramana/in.med.samhita.susruta.6.54.25) kevūkasvarasaṃ vā+api pūrvavattīkṣṇabhojanaḥ/ palāśabījasvarasaṃ kalkaṃ vā taṇḍulāmbunā// ### [6.54.26](https://indike.org/pramana/in.med.samhita.susruta.6.54.26) pāribhadrakapatrāṇāṃ kṣaudreṇa svarasaṃ pibet/ pattūrasvarasaṃ vā+api pibedvā surasādijam// ### [6.54.27](https://indike.org/pramana/in.med.samhita.susruta.6.54.27) lihyādaśvaśakṛccūrṇaṃ vaiḍaṅgaṃ vā samākṣikam/ patrairmūṣikaparṇyā vā supiṣṭaiḥ piṣṭamiśritaiḥ// ### [6.54.28](https://indike.org/pramana/in.med.samhita.susruta.6.54.28) khādet pūpalikāḥ pakvā dhānyāmlaṃ ca pibedanu/ surasādigaṇe pakvaṃ tailaṃ vā pānamiṣyate// ### [6.54.29](https://indike.org/pramana/in.med.samhita.susruta.6.54.29) viḍaṅgacūrṇayuktairvā piṣṭairbhakṣyāṃstu kārayet†/ tatkaṣāyaprapītānāṃ tilānāṃ snehameva vā// ### [6.54.30](https://indike.org/pramana/in.med.samhita.susruta.6.54.30) śvāvidhaḥ śakṛtaścūrṇaṃ saptakṛtvaḥ subhāvitam/ viḍaṅgānāṃ kaṣāyeṇa traiphalena tathaiva ca// ### [6.54.31](https://indike.org/pramana/in.med.samhita.susruta.6.54.31) kṣaudreṇa līḍhvā+anupibedrasamāmalakodbhavam/ akṣābhayārasaṃ vā+api vidhireṣo+ayasāmapi// ### [6.54.32](https://indike.org/pramana/in.med.samhita.susruta.6.54.32) pūtīkasvarasaṃ vā+api pibedvā madhunā saha/ pibedvā pippalīmūlamajāmūtreṇa saṃyutam// ### [6.54.33](https://indike.org/pramana/in.med.samhita.susruta.6.54.33) saptarātraṃ pibedghṛṣṭaṃ trapu vā dadhimastunā/ purīṣajān kaphotthāṃśca hanyādevaṃ kṛmīn bhiṣak// ### [6.54.34](https://indike.org/pramana/in.med.samhita.susruta.6.54.34) śirohṛdghrāṇakarṇākṣisaṃśritāṃśca pṛthagvidhān/ viśeṣeṇāñjanairnasyairavapīḍaiśca sādhayet// ### [6.54.35](https://indike.org/pramana/in.med.samhita.susruta.6.54.35) śakṛdrasaṃ turaṅgasya suśuṣkaṃ bhāvayedati/ niṣkvāthena viḍaṅgānāṃ cūrṇaṃ pradhamanaṃ tu tat// ### [6.54.36](https://indike.org/pramana/in.med.samhita.susruta.6.54.36) ayaścūrṇānyanenaiva vidhinā yojayedbhiṣak/ sakāṃsyanīlaṃ tailaṃ ca nasyaṃ syātsurasādike// ### [6.54.37](https://indike.org/pramana/in.med.samhita.susruta.6.54.37) indraluptavidhiścāpi vidheyo romabhojiṣu/ dantādānāṃ samuddiṣṭaṃ vidhānaṃ mukharogikam// ### [6.54.38](https://indike.org/pramana/in.med.samhita.susruta.6.54.38) raktajānāṃ pratīkāraṃ kuryāt kuṣṭhacikitsite/ surasādiṃ tu sarveṣu sarvathauvopayojayet// ### [6.54.39](https://indike.org/pramana/in.med.samhita.susruta.6.54.39) pravyaktatikatakaṭukaṃ bhojanaṃ ca hitaṃ bhavet/ kulatthakṣārasaṃsṛṣṭaṃ kṣārapānaṃ ca pūjitam†// ### [6.54.40](https://indike.org/pramana/in.med.samhita.susruta.6.54.40) kṣīrāṇi māṃsāni ghṛtāni caiva dadhīni śākāni ca parṇavanti/ samāsato+amlānmadhurān himāṃśca kṛmīn jighāṃsuḥ parivarjayettu// ### [6.54.40\_1](https://indike.org/pramana/in.med.samhita.susruta.6.54.40_1) iti suśrutasaṃhitāyāmuttaratantrāntargate kāyacikitsātantre kṛmipratiṣedho nāma (ṣoḍaśo+adhyāyaḥ, āditaḥ) catuḥpañcāśattamo+adhyāyaḥ //54// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.189.6) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.54](https://indike.org/pramana/in.med.samhita.susruta.6.54) · Pramāṇa