[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.55 # The Compendium of Suśruta 6.55: pañcapañcāśattamo+adhyāyaḥ/ Suśrutasaṃhitā 6.55 - **Language:** Sanskrit ### pañcapañcāśattamo+adhyāyaḥ/ ### [6.55.1](https://indike.org/pramana/in.med.samhita.susruta.6.55.1) athāta udāvartapratiṣedhamadhyāyaṃ vyākhyāsyāmaḥ// ### [6.55.2](https://indike.org/pramana/in.med.samhita.susruta.6.55.2) yathovāca bhagavān dhanvantariḥ// ### [6.55.3](https://indike.org/pramana/in.med.samhita.susruta.6.55.3) adhaścordhvaṃ ca bhāvānāṃ pravṛttānāṃ svabhāvataḥ/ na vegān dhārayet prājño vātādīnāṃ jijīviṣuḥ// ### [6.55.4](https://indike.org/pramana/in.med.samhita.susruta.6.55.4) vātaviṇmūtrajṛmbhāśrukṣavodgāravamīndriyaiḥ/ vyāhanyamānairuditairudāvarto nirucyate// ### [6.55.5](https://indike.org/pramana/in.med.samhita.susruta.6.55.5) kṣuttṛṣṇāśvāsanidrāṇāmudāvarto vidhāraṇāt/ tasyābhidhāsye vyāsena lakṣaṇaṃ ca cikitsitam// ### [6.55.6](https://indike.org/pramana/in.med.samhita.susruta.6.55.6) trayodaśavidhaścāsau bhinna etaistu kāraṇaiḥ/ apathyabhojanāccāpi vakṣyate ca tathā+aparaḥ// ### [6.55.7](https://indike.org/pramana/in.med.samhita.susruta.6.55.7) ādhmānaśūlau hṛdayoparodhaṃ śirorujaṃ śvāsamatīva hikkām/ kāsapratiśyāyagalagrahāṃśca balāsapittaprasaraṃ ca ghoram// ### [6.55.8](https://indike.org/pramana/in.med.samhita.susruta.6.55.8) kuryādapāno+abhihataḥ svamārge hanyāt purīṣaṃ mukhataḥ kṣipedvā/ āṭopaśūlau parikartanaṃ ca saṅgaḥ purīṣasya tathordhvavātaḥ// ### [6.55.9](https://indike.org/pramana/in.med.samhita.susruta.6.55.9) purīṣamāsyādapi vā nireti purīṣavege+abhihate narasya/ mūtrasya vege+abhihate narastu kṛcchreṇa mūtraṃ kurute+alpamalpam// ### [6.55.10](https://indike.org/pramana/in.med.samhita.susruta.6.55.10) meḍhre gude vaṅkṣaṇabastimuṣkanābhipradeśeṣvathavā†+api mūrdhni/ †ānaddhabastiśca bhavanti tīvrāḥ śūlāśca śūlairiva bhinnamūrteḥ// ### [6.55.11](https://indike.org/pramana/in.med.samhita.susruta.6.55.11) manyāgalastambhaśirovikārā jṛmbhopaghātāt pavanātmakāḥ syuḥ/ śrotrānanaghrāṇavilocanotthā bhavanti tīvrāśca tathā vikārāḥ// ### [6.55.12](https://indike.org/pramana/in.med.samhita.susruta.6.55.12) ānandajaṃ śokasamudbhavaṃ vā netrodakaṃ prāptamamuñcato hi/ śirogurutvaṃ nayanāmayāśca bhavanti tīvrāḥ saha pīnasena// ### [6.55.13](https://indike.org/pramana/in.med.samhita.susruta.6.55.13) bhavanti gāḍhaṃ kṣavathorvighātācchirokṣināsāśravaṇeṣu rogāḥ/ kaṇṭhāsyapūrṇatvamatīva todaḥ kūjaśca vāyoruta vā+apravṛttiḥ// ### [6.55.14](https://indike.org/pramana/in.med.samhita.susruta.6.55.14) udgāravege+abhihate bhavanti ghorā vikārāḥ pavanaprasūtāḥ/ chardervighātena bhavecca kuṣṭhaṃ yenaiva doṣeṇa vidagdhamannam// ### [6.55.15](https://indike.org/pramana/in.med.samhita.susruta.6.55.15) mūtrāśaye †pāyuni muṣkayośca śopho rujo mūtravinigrahaśca/ śukrāśmarī tatsravaṇaṃ bhavedvā te te vikārā vihate tu śukre// ### [6.55.16](https://indike.org/pramana/in.med.samhita.susruta.6.55.16) tandrāṅgamardārucivibhramāḥ †syuḥ kṣudho+abhighātāt kṛśatā ca dṛṣṭeḥ/ kaṇṭhāsyaśoṣaḥ śravaṇāvarodhastṛṣṇābhighātāddhṛdaye vyathā ca// ### [6.55.17](https://indike.org/pramana/in.med.samhita.susruta.6.55.17) śrāntasya niḥśvāsavinigraheṇa hṛdrogamohāvathavā+api gulmaḥ/ jṛmbhā+aṅgamardo+aṅgaśirokṣijāḍyaṃ nidrābhighātādathavā+api tandrā// ### [6.55.18](https://indike.org/pramana/in.med.samhita.susruta.6.55.18) tṛṣṇārditaṃ parikliṣṭaṃ kṣīṇaṃ śūlairabhidrutam/ śakṛdvamantaṃ matimānudāvartinamutsṛjet// ### [6.55.19](https://indike.org/pramana/in.med.samhita.susruta.6.55.19) sarveṣveteṣu vidhivadudāvarteṣu kṛtsnaśaḥ/ vāyoḥ kriyā vidhātavyāḥ svamārgapratipattaye// ### [6.55.20](https://indike.org/pramana/in.med.samhita.susruta.6.55.20) sāmānyataḥ pṛthaktvena kriyāṃ bhūyo nibodha me/ āsthāpanaṃ mārutaje snigdhasvinne viśiṣyate// ### [6.55.21](https://indike.org/pramana/in.med.samhita.susruta.6.55.21) purīṣaje tu kartavyo vidhirānāhiko bhavet/ sauvarcalāḍhyāṃ madirāṃ mūtre tvabhihate pibet// ### [6.55.22](https://indike.org/pramana/in.med.samhita.susruta.6.55.22) elāṃ vā+apyatha madyena kṣīraṃ vā+api pibennaraḥ/ dhātrīphalānāṃ svarasaṃ sajalaṃ vā pibettryaham// ### [6.55.23](https://indike.org/pramana/in.med.samhita.susruta.6.55.23) rasamaśvapurīṣasya gardabhasyāthavā pibet/ māṃsopadaṃśaṃ madhu vā pibedvā sīdhu gauḍikam// ### [6.55.24](https://indike.org/pramana/in.med.samhita.susruta.6.55.24) bhadradāru ghanaṃ mūrvā haridrā madhukaṃ tathā/ kolapramāṇāni pibedāntarikṣeṇa vāriṇā// ### [6.55.25](https://indike.org/pramana/in.med.samhita.susruta.6.55.25) duḥsparśāsvarasaṃ vā+api kaṣāyaṃ kuṅkumasya ca/ ervārubījaṃ toyena pibedvā+alavaṇīkṛtam// ### [6.55.26](https://indike.org/pramana/in.med.samhita.susruta.6.55.26) pañcamūlīśṛtaṃ kṣīraṃ drākṣārasamathāpi vā/ yogāṃśca vitaredatra pūrvoktānaśmarībhidaḥ// ### [6.55.27](https://indike.org/pramana/in.med.samhita.susruta.6.55.27) mūtrakṛcchrakramaṃ cāpi kuryānniravaśeṣataḥ/ bhūyo vakṣyāmi yogān yān mūtrāghātopaśāntaye// ### [6.55.28](https://indike.org/pramana/in.med.samhita.susruta.6.55.28) snehaiḥ svedairudāvartaṃ jṛmbhājaṃ samupācaret/ aśrumokṣo+aśruje kāryaḥ snigdhasvinnasya dehinaḥ// ### [6.55.29](https://indike.org/pramana/in.med.samhita.susruta.6.55.29) tīkṣṇāñjanāvapīḍābhyāṃ tīkṣṇagandhopaśiṅghanaiḥ/ vartiprayogairathavā kṣavasaktiṃ pravartayet// ### [6.55.30](https://indike.org/pramana/in.med.samhita.susruta.6.55.30) (tīkṣṇaiṣadhapradhamanairathavā++ādityaraśmibhiḥ/ ) udgāraje kramopetaṃ snaihikaṃ dhūmamācaret// ### [6.55.31](https://indike.org/pramana/in.med.samhita.susruta.6.55.31) surāṃ sauvarcalavatīṃ bījapūrarasānvitām/ chardyāghātaṃ yathādoṣaṃ samyak snehādibhirjayet// ### [6.55.32](https://indike.org/pramana/in.med.samhita.susruta.6.55.32) sakṣāralavaṇopetamabhyaṅgaṃ cātra dāpayet/ bastiśuddhikarāvāpaṃ caturguṇajalaṃ payaḥ// ### [6.55.33](https://indike.org/pramana/in.med.samhita.susruta.6.55.33) āvārināśāt kvathitaṃ pītavantaṃ prakāmataḥ/ ramayeyuḥ† priyā nāryaḥ śukrodāvartinaṃ naram// ### [6.55.34](https://indike.org/pramana/in.med.samhita.susruta.6.55.34) kṣudvighāte hitaṃ snigdhamuṣṇamalpaṃ ca bhojanam/ tṛṣṇāghāte pibenmanthaṃ yavāgūṃ vā+api śītalām// ### [6.55.35](https://indike.org/pramana/in.med.samhita.susruta.6.55.35) bhojyo rasena viśrāntaḥ śramaśvāsāturo naraḥ/ nidrāghāte pibet kṣīraṃ svapyācceṣṭakathā† naraḥ// ### [6.55.36](https://indike.org/pramana/in.med.samhita.susruta.6.55.36) ādhmānādyeṣu rogeṣu yathāsvaṃ prayateta hi/ yacca yatra bhavetprāptaṃ tacca tasmin prayojayet// ### [6.55.37](https://indike.org/pramana/in.med.samhita.susruta.6.55.37) vāyuḥ koṣṭhānugo rūkṣaiḥ kaṣāyakaṭutiktakaiḥ/ bhojanaiḥ kupitaḥ sadya udāvartaṃ karoti hi// ### [6.55.38](https://indike.org/pramana/in.med.samhita.susruta.6.55.38) vātamūtrapurīṣāsṛkkaphamedovahāni vai/ srotāṃsyudāvartayati purīṣaṃ cātivartayet// ### [6.55.39](https://indike.org/pramana/in.med.samhita.susruta.6.55.39) tato hṛdbastiśūlārto gauravārucipīḍitaḥ/ vātamūtrapurīṣāṇi kṛcchreṇa kurute naraḥ// ### [6.55.40](https://indike.org/pramana/in.med.samhita.susruta.6.55.40) śvāsakāsapratiśyāyadāhamohavamijvarān/ tṛṣṇāhikkāśirorogamanaḥśravaṇavibhramān// ### [6.55.41](https://indike.org/pramana/in.med.samhita.susruta.6.55.41) labhate ca bahūnanyān vikārān vātakopajān/ taṃ tailalavaṇābhyaktaṃ snigdhaṃ svinnaṃ nirūhayet// ### [6.55.42](https://indike.org/pramana/in.med.samhita.susruta.6.55.42) doṣato bhinnavarcaskaṃ bhuktaṃ cāpyanuvāsayet/ na cecchāntiṃ vrajatyevamudāvartaḥ sudāruṇaḥ// ### [6.55.43](https://indike.org/pramana/in.med.samhita.susruta.6.55.43) athainaṃ bahuśaḥ svinnaṃ yuñjyāt snehavirecanaiḥ/ pāyayeta trivṛtpīluyavānīramlapācanaiḥ// ### [6.55.44](https://indike.org/pramana/in.med.samhita.susruta.6.55.44) hiṅgukuṣṭhavacāsvarjiviḍaṅgaṃ vā dviruttaram/ yogāvetāvudāvartaṃ śūlaṃ †cānilajaṃ hataḥ// ### [6.55.45](https://indike.org/pramana/in.med.samhita.susruta.6.55.45) devadārvagnikau kuṣṭhaṃ †śuṇṭhīṃ pathyāṃ palaṅkaṣām/ pauṣkarāṇi ca mūlāni toyasyardhāḍhake pacet// ### [6.55.46](https://indike.org/pramana/in.med.samhita.susruta.6.55.46) pādāvaśiṣṭaṃ tat pītamudāvartamapohati/ mūlakaṃ śuṣkamārdraṃ ca varṣābhūḥ pañcamūlakam// ### [6.55.47](https://indike.org/pramana/in.med.samhita.susruta.6.55.47) ārevataphalaṃ cāpsu paktvā tena ghṛtaṃ pacet/ tat pīyamānaṃ †śāstyugramudāvartamaśeṣataḥ// ### [6.55.48](https://indike.org/pramana/in.med.samhita.susruta.6.55.48) vacāmativiṣāṃ kuṣṭhaṃ yavakṣāraṃ harītakīm/ kṛṣṇāṃ nirdahanīṃ cāpi pibeduṣṇena vāriṇā// ### [6.55.49](https://indike.org/pramana/in.med.samhita.susruta.6.55.49) ikṣvākumūlaṃ madanaṃ viśalyātiviṣe vacām/ kuṣṭhaṃ kiṇvāgnikau caiva pibettulyāni pūrvavat// ### [6.55.50](https://indike.org/pramana/in.med.samhita.susruta.6.55.50) mūtreṇa devadārvagnitriphalābṛhatīḥ pibet/ yavaprasthaṃ phalaiḥ sārdhaṃ kaṇṭakāryā jalāḍhake// ### [6.55.51](https://indike.org/pramana/in.med.samhita.susruta.6.55.51) paktvā+ardhaprasthaśeṣaṃ tu pibeddhiṅgusamanvitam/ madanālābubījāni pippalīṃ sanidigdhikām// ### [6.55.52](https://indike.org/pramana/in.med.samhita.susruta.6.55.52) saṃcūrṇya pradhamennāḍyā viśatyetadyathā gudam/ cūrṇaṃ nikumbhakampillaśyāmekṣvākvagnikodbhavam// ### [6.55.53](https://indike.org/pramana/in.med.samhita.susruta.6.55.53) kṛtavedhanamāgadhyorlavaṇānāṃ ca sādhayet/ gavāṃ mūtreṇa tā vartīḥ kārayettu gudānugāḥ/ sadyaḥ śarmakarāvetau yogāvamṛtasaṃmatau// ### [6.55.53\_1](https://indike.org/pramana/in.med.samhita.susruta.6.55.53_1) iti suśrutasaṃhitāyāmuttaratantrāntargate kāyacikitsātantre udāvartapratiṣedho nāma (saptadaśo+ādhyāyaḥ, āditaḥ) pañcapañcāśattamo+adhyāyaḥ //55// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.190.2) — Ḍalhaṇa, Sanskrit ## Linked texts (1) - [Vaidyakasāroddhāra](https://indike.org/pramana/in.med.cikitsa.gauda.vaidyakasaroddhara.3.p69) — Brajanāthaśarman, Sanskrit --- Source: [https://indike.org/pramana/in.med.samhita.susruta.6.55](https://indike.org/pramana/in.med.samhita.susruta.6.55) · Pramāṇa