[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.56 # The Compendium of Suśruta 6.56: ṣaṭpañcāśattamo+adhyāyaḥ/ Suśrutasaṃhitā 6.56 - **Language:** Sanskrit ### ṣaṭpañcāśattamo+adhyāyaḥ/ ### [6.56.1](https://indike.org/pramana/in.med.samhita.susruta.6.56.1) athāto visūcikāpratiṣedhamadhyāyaṃ vyākhyāsyāmaḥ// ### [6.56.2](https://indike.org/pramana/in.med.samhita.susruta.6.56.2) yathovāca bhagavān dhanvantariḥ// ### [6.56.3](https://indike.org/pramana/in.med.samhita.susruta.6.56.3) ajīrṇamāmaṃ viṣṭabdhaṃ vidagdhaṃ ca yadīritam/ visūcyalasakau tasmādbhaveccāpi vilambikā// ### [6.56.4](https://indike.org/pramana/in.med.samhita.susruta.6.56.4) sūcībhiriva gātrāṇi tudan saṃtiṣṭhate+anilaḥ/ yasyājīrṇena sā vaidyairucyate ti† visūcikā// ### [6.56.5](https://indike.org/pramana/in.med.samhita.susruta.6.56.5) na tāṃ parimitāhārā labhante viditāgamāḥ/ mūḍhāstāmajitātmāno labhante †kaluṣāśayāḥ// ### [6.56.6](https://indike.org/pramana/in.med.samhita.susruta.6.56.6) mūrcchātisārau vamathuḥ pipāsā śūlaṃ bhramodveṣṭanajṛmbhadāhāḥ/ vaivarṇyakampau hṛdaye rujaśca bhavanti tasyāṃ śirasaśca bhedaḥ// ### [6.56.7](https://indike.org/pramana/in.med.samhita.susruta.6.56.7) kukṣirānahyate+atyarthaṃ pratāmyati vikūjati/ niruddho mārutaścāpi kukṣau† viparidhāvati// ### [6.56.8](https://indike.org/pramana/in.med.samhita.susruta.6.56.8) vātavarconirodhaśca kukṣau yasya bhṛśaṃ bhavet/ tasyālasakamācaṣṭe †tṛṣṇodgārāvarodhakau// ### [6.56.9](https://indike.org/pramana/in.med.samhita.susruta.6.56.9) duṣṭaṃ tu bhuktaṃ kaphamārutābhyāṃ pravartate nordhvamadhaśca yasya/ vilambikāṃ tāṃ †bhṛśaduścikitsyāmācakṣate śāstravidaḥ purāṇāḥ// ### [6.56.10](https://indike.org/pramana/in.med.samhita.susruta.6.56.10) yatrasthamāmaṃ virujettameva deśaṃ viśeṣeṇa vikārajātaiḥ/ doṣeṇa yenāvatataṃ †svaliṅgaistaṃ lakṣayedāmasamudbhavaiśca// ### [6.56.11](https://indike.org/pramana/in.med.samhita.susruta.6.56.11) yaḥ śyāvadantauṣṭhanakho+alpasaṃjñaśchardyardito+abhyantarayātanetraḥ/ kṣāmasvaraḥ sarvavimuktasandhiryāyānnaraḥ so+apunarāgamāya// ### [6.56.12](https://indike.org/pramana/in.med.samhita.susruta.6.56.12) sādhyāsu pārṣṇyordahanaṃ praśastamagnipratāpo vamanaṃ ca tīkṣṇam/ pakve tato+anne tu vilaṅghanaṃ syāt saṃpācanaṃ cāpi virecanaṃ ca// ### [6.56.13](https://indike.org/pramana/in.med.samhita.susruta.6.56.13) viśuddhadehasya hi sadya eva mūrcchātisārādirupaiti śāntim/ āsthāpanaṃ cāpi vadanti pathyaṃ sarvāsu yogānaparānnibodha// ### [6.56.14](https://indike.org/pramana/in.med.samhita.susruta.6.56.14) pathyāvacāhiṅgukaliṅgagṛñjasauvarcalaiḥ sātiviṣaiśca cūrṇam/ sukhāmbupītaṃ vinihantyajīrṇaṃ śūlaṃ visūcīmaruciṃ ca sadyaḥ// ### [6.56.15](https://indike.org/pramana/in.med.samhita.susruta.6.56.15) kṣārāgadaṃ vā lavaṇaṃ viṣaṃ vā guḍapragāḍhānatha sarṣapān vā/ amlena vā saindhavahiṅguyuktau sabījapūrṇau saghṛtau trivargau// ### [6.56.16](https://indike.org/pramana/in.med.samhita.susruta.6.56.16) kaṭutrikaṃ vā lavaṇairupetaṃ pibet snuhīkṣīravimiśritaṃ tu/ kalyāṇakaṃ vā lavaṇaṃ pibettu yaduktamādāvanilāmayeṣu// ### [6.56.17](https://indike.org/pramana/in.med.samhita.susruta.6.56.17) kṛṣṇājamodakṣavakāṇi vā+api tulyau pibedvā magadhānikumbhau/ dantīyuta vā magadhodbhavānāṃ kalkaṃ pibet koṣavatīrasena// ### [6.56.18](https://indike.org/pramana/in.med.samhita.susruta.6.56.18) uṣṇābhiradbhirmagadhodbhavānāṃ kalkaṃ pibennāgarakalkayuktam/ vyoṣaṃ karañjasya phalaṃ haridre mūlaṃ samaṃ cāpyatha mātuluṅgyāḥ// ### [6.56.19](https://indike.org/pramana/in.med.samhita.susruta.6.56.19) chāyāviśuṣkā guṭikāḥ kṛtāstā hanyurvisūcīṃ nayanāñjanena/ suvāmitaṃ sādhuvirecitaṃ vā sulaṅghataṃ vā manujaṃ viditvā// ### [6.56.20](https://indike.org/pramana/in.med.samhita.susruta.6.56.20) peyādibhirdīpanapācanīyaiḥ samyakkṣudhārtaṃ samupakrameta/ āmaṃ śakṛdvā nicitaṃ krameṇa bhūyo vibaddhaṃ viguṇānilena// ### [6.56.21](https://indike.org/pramana/in.med.samhita.susruta.6.56.21) pravartamānaṃ na yathāsvamenaṃ vikāramānāhamudāharanti/ tasmin bhavantyāmasamudbhave tu tṛṣṇāpratiśyāyaśirovidāhāḥ// ### [6.56.22](https://indike.org/pramana/in.med.samhita.susruta.6.56.22) āmāśaye śūlamatho gurutvaṃ hṛllāsa udgāravighātanaṃ ca/ stambhaḥ kaṭīpṛṣṭhapurīṣamūtre śūlo+atha mūrcchā †sa śakṛdvamecca// ### [6.56.23](https://indike.org/pramana/in.med.samhita.susruta.6.56.23) śvāsaśca pakvāśayaje bhavanti liṅgāni cātrālasakodbhavāni/ āmodbhave vāntamupakrameta saṃsargabhaktakramadīpanīyaiḥ// ### [6.56.24](https://indike.org/pramana/in.med.samhita.susruta.6.56.24) athetaraṃ yo na śakṛdvamettamāmaṃ jayet svedanapācanaiśca/ visūcikāyāṃ parikīrtitāni dravyāṇi vairecanikāni yāni// ### [6.56.25](https://indike.org/pramana/in.med.samhita.susruta.6.56.25) tānyeva vartīrviracedvicūrṇya mahiṣyajāvībhagavāṃ tu mūtraiḥ/ svinnasya pāyau viniveśya tāśca cūrṇāni caiṣāṃ pradhamettu nāḍyā// ### [6.56.26](https://indike.org/pramana/in.med.samhita.susruta.6.56.26) mūtreṣu saṃsādhya yathāvidhānaṃ dravyāṇi yānyūrdhvamadhaśca yānti/ kvāthena tenāśu nirūhayecca mūtrārdhayuktena samākṣikeṇa// ### [6.56.27](https://indike.org/pramana/in.med.samhita.susruta.6.56.27) tribhaṇḍiyuktaṃ lavaṇaprakuñcaṃ dattvā viriktakramamācarecca/ eṣveva tailena ca sādhitena prāptaṃ yadi syādanuvāsayecca// ### [6.56.27\_1](https://indike.org/pramana/in.med.samhita.susruta.6.56.27_1) iti suśrutasaṃhitāyāmuttaratantre kāyacikitsātantre visūcikāpratiṣedho nāma (aṣṭādaśo+adhyāyaḥ, āditaḥ) ṣaṭpañcāśattamo+adhyāyaḥ //56// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.191.2) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.56](https://indike.org/pramana/in.med.samhita.susruta.6.56) · Pramāṇa