[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.58 # The Compendium of Suśruta 6.58: aṣṭāpañcāśattamo+adhyāyaḥ/ Suśrutasaṃhitā 6.58 - **Language:** Sanskrit ### aṣṭāpañcāśattamo+adhyāyaḥ/ ### [6.58.1](https://indike.org/pramana/in.med.samhita.susruta.6.58.1) athāto mūtrāghātapratiṣedhamadhyāyaṃ vyākhyāsyāmaḥ// ### [6.58.2](https://indike.org/pramana/in.med.samhita.susruta.6.58.2) yathovāca bhagavān dhanvantariḥ// ### [6.58.3](https://indike.org/pramana/in.med.samhita.susruta.6.58.3) vātakuṇḍalikā+aṣṭhīlā vātabastistathaiva ca/ mūtrātītaḥ sajaṭharo mūtrotsaṅgaḥ kṣayastathā// ### [6.58.4](https://indike.org/pramana/in.med.samhita.susruta.6.58.4) mūtragranthirmūtraśukramuṣṇavātastathaiva ca/ mūtraukasādau dvau cāpi rogā dvādaśa kīrtitāḥ// ### [6.58.5](https://indike.org/pramana/in.med.samhita.susruta.6.58.5) raukṣyādvegavighātādvā vāyurantaramāśirtaḥ†/ mūtraṃ carati saṃgṛhya viguṇaḥ kuṇḍalīkṛtaḥ// ### [6.58.6](https://indike.org/pramana/in.med.samhita.susruta.6.58.6) sṛjedalpālpamathavā sarujaskaṃ śanaiḥ śanaiḥ/ vātakuṇḍalikāṃ taṃ tu vyādhiṃ vidyāt sudāruṇam// ### [6.58.7](https://indike.org/pramana/in.med.samhita.susruta.6.58.7) śakṛnmārgasya basteśca cāyurantaramāśritaḥ/ aṣṭhīlāvadghanaṃ granthiṃ karotyacalamunnatam// ### [6.58.8](https://indike.org/pramana/in.med.samhita.susruta.6.58.8) viṇmūtranilasaṅgaśca tatrādhmānaṃ ca jāyate/ vedanā ca parā bastau vātāṣṭhīleti tāṃ viduḥ// ### [6.58.9](https://indike.org/pramana/in.med.samhita.susruta.6.58.9) vegaṃ vidhārayedyastu mūtrasyākuśalo naraḥ/ niruṇaddhi mukhaṃ tasya basterbastigato+anilaḥ// ### [6.58.10](https://indike.org/pramana/in.med.samhita.susruta.6.58.10) mūtrasaṅgo bhavettena bastikukṣinipīḍitaḥ/ vātabastiḥ sa vijñeyo vyādhiḥ kṛcchraprasādhanaḥ// ### [6.58.11](https://indike.org/pramana/in.med.samhita.susruta.6.58.11) vegaṃ sandhārya mūtrasya yo bhūyaḥ sraṣṭumicchati/ tasya nābhyeti yadi vā kathañcitsaṃpravartate// ### [6.58.12](https://indike.org/pramana/in.med.samhita.susruta.6.58.12) pravāhato mandarujamalpamalpaṃ punaḥ punaḥ/ mūtrātītaṃ tu taṃ vidyānmūtravegavighātajam// ### [6.58.13](https://indike.org/pramana/in.med.samhita.susruta.6.58.13) mūtrasya vihate vege tadudāvartahetunā/ apānaḥ kupito vāyurudaraṃ pūrayedbhṛśam// ### [6.58.14](https://indike.org/pramana/in.med.samhita.susruta.6.58.14) nābheradhastādādhmānaṃ janayettīvravedanam/ taṃ mūtrajaṭharaṃ vidyādadhaḥsrotonirodhanam// ### [6.58.15](https://indike.org/pramana/in.med.samhita.susruta.6.58.15) bastau vā+apyathavā nāle maṇau vā yasya dehinaḥ/ mūtraṃ pravṛttaṃ sajjeta †saraktaṃ vā pravāhataḥ// ### [6.58.16](https://indike.org/pramana/in.med.samhita.susruta.6.58.16) sravecchanairalpamalpaṃ sarujaṃ vā+atha nīrujam/ viguṇānilajo vyādhiḥ sa mūtrotsaṅgasaṃjñitaḥ// ### [6.58.17](https://indike.org/pramana/in.med.samhita.susruta.6.58.17) rūkṣasya klāntadehasya bastisthau pittamārutau/ sadāhavedanaṃ kṛcchraṃ kuryātāṃ mūtrasaṃkṣayam// ### [6.58.18](https://indike.org/pramana/in.med.samhita.susruta.6.58.18) abhyantare bastimukhe vṛtto+alpaḥ sthira eva ca/ vedanāvānati †sadā mūtramārganirodhanaḥ// ### [6.58.19](https://indike.org/pramana/in.med.samhita.susruta.6.58.19) jāyate sahasā yasya granthiraśmarilakṣaṇaḥ/ sa mūtragranthirityevamucyate †vedanādibhiḥ// ### [6.58.20](https://indike.org/pramana/in.med.samhita.susruta.6.58.20) pratyupasthitamūtrastu maithunaṃ yo+abhinandati/ tasya mūtrayutaṃ retaḥ sahasā saṃpravartate// ### [6.58.21](https://indike.org/pramana/in.med.samhita.susruta.6.58.21) purastādvā+api mūtrasya paścādvā+api kadācana/ bhasmodakapratīkāśaṃ mūtraśukraṃ taducyate// ### [6.58.22](https://indike.org/pramana/in.med.samhita.susruta.6.58.22) vyāyāmādhvātapaiḥ pittaṃ bastiṃ prāpyānilāvṛtam/ bastiṃ meḍhraṃ gudaṃ caiva pradahan srāvayedadhaḥ// ### [6.58.23](https://indike.org/pramana/in.med.samhita.susruta.6.58.23) mūtraṃ hāridramathavā saraktaṃ raktameva vā/ kṛcchrāt pravartate jantoruṣṇavātaṃ vadanti tam// ### [6.58.24](https://indike.org/pramana/in.med.samhita.susruta.6.58.24) viśadaṃ pītakaṃ mūtraṃ sadāhaṃ bahalaṃ tathā/ śuṣkaṃ bhavati yaccāpi rocanācūrṇasannibham// ### [6.58.25](https://indike.org/pramana/in.med.samhita.susruta.6.58.25) mūtraukasādaṃ taṃ vidyādrogaṃ pittakṛtaṃ budhaḥ/ picchilaṃ saṃhataṃ śvetaṃ tathā kṛcchrapravartanam// ### [6.58.26](https://indike.org/pramana/in.med.samhita.susruta.6.58.26) śuṣkaṃ bhavati yaccāpi śaṅkhacūrṇaprapāṇḍuram/ mūtraukasāhaṃ taṃ vidyādāmayaṃ †dvādaśaṃ kaphāt// ### [6.58.27](https://indike.org/pramana/in.med.samhita.susruta.6.58.27) kaṣāyakalkasarpiṃṣi bhakṣyān lehān payāṃsi ca/ kṣāramadyāsavasvedān(kṣāramadhvāsavasvedān) bastīṃścottarasaṃjñitān// ### [6.58.28](https://indike.org/pramana/in.med.samhita.susruta.6.58.28) vidadhyānmatimāṃstatra vidhiṃ cāśmarināśanam/ mūtrodāvartayogāṃśca kārtsnyenātra† prayojayet// ### [6.58.29](https://indike.org/pramana/in.med.samhita.susruta.6.58.29) kalkamervārubījānāmakṣamātraṃ sasaindhavam/ dhānyāmlayuktaṃ pītvaiva mūtrakṛcchrāt pramucyate// ### [6.58.30](https://indike.org/pramana/in.med.samhita.susruta.6.58.30) surāṃ sauvarcalavatīṃ mūtrakṛcchrī pibennaraḥ/ madhu māṃsopadaṃśaṃ vā pibedvā+apyatha gauḍikam// ### [6.58.31](https://indike.org/pramana/in.med.samhita.susruta.6.58.31) pibet kuṅkumakarṣaṃ vā madhūdakasamāyutam/ rātriparyuṣitaṃ prātastathā sukhamavāpnuyāt// ### [6.58.32](https://indike.org/pramana/in.med.samhita.susruta.6.58.32) dāḍimāmlāṃ †yutāṃ mukhyāmelājīrakanāgaraiḥ/ pītvā surāṃ salavaṇāṃ mūtrakṛcchrāt pramucyate// ### [6.58.33](https://indike.org/pramana/in.med.samhita.susruta.6.58.33) pṛthakparṇyādivargasya mūlaṃ gokṣurakasya ca/ ardhaprasthena toyasya pacet kṣīracaturguṇam// ### [6.58.34](https://indike.org/pramana/in.med.samhita.susruta.6.58.34) kṣīrāvaśiṣṭaṃ tacchītaṃ †sitākṣaudrayutaṃ pibet/ naro mārutapittotthamūtraghātanivāraṇam// ### [6.58.35](https://indike.org/pramana/in.med.samhita.susruta.6.58.35) niṣpīḍya vāsasā samyagvarco rāsabhavājinoḥ/ rasasya kuḍavaṃ tasya pibenmūtrarujāpaham// ### [6.58.36](https://indike.org/pramana/in.med.samhita.susruta.6.58.36) mustābhayādevadārumūrvāṇāṃ madhukasya ca/ pibedakṣasamaṃ kalkaṃ mūtradoṣanivāraṇam// ### [6.58.37](https://indike.org/pramana/in.med.samhita.susruta.6.58.37) abhayāmalakākṣāṇāṃ kalkaṃ badarasaṃmitam/ ambhasā+alavaṇopetaṃ pibenmūtrarujāpaham// ### [6.58.38](https://indike.org/pramana/in.med.samhita.susruta.6.58.38) udumbarasamaṃ kalkaṃ drākṣāyā jalasaṃyutam/ pibet paryuṣitaṃ †rātrau śītaṃ mūtrarujāpaham// ### [6.58.39](https://indike.org/pramana/in.med.samhita.susruta.6.58.39) nidigdhikāyāḥ svarasaṃ pibet kuḍavasaṃmitam/ mūtradoṣaharaṃ kalyamathavā kṣaudrasaṃyutam// ### [6.58.40](https://indike.org/pramana/in.med.samhita.susruta.6.58.40) prapīḍyāmalakānāṃ tu rasaṃ kuḍavasaṃmitam/ pītvā+agadī bhavejjanturmūtradoṣarujāturaḥ// ### [6.58.41](https://indike.org/pramana/in.med.samhita.susruta.6.58.41) dhātrīphalarasenaivaṃ sūkṣmailāṃ vā pibennaraḥ/ piṣṭvā+athavā suśītena śālitaṇḍulavāriṇā// ### [6.58.42](https://indike.org/pramana/in.med.samhita.susruta.6.58.42) tālasya taruṇaṃ mūlaṃ trapusasya rasaṃ tathā/ śvetaṃ karkaṭakaṃ caiva prātastu payasā pibet// ### [6.58.43](https://indike.org/pramana/in.med.samhita.susruta.6.58.43) śṛtaṃ vā madhuraiḥ kṣīraṃ sarpirmiśraṃ pibennaraḥ/ mūtradoṣaviśuddhyarthaṃ tathaivāśmarināśanam†// ### [6.58.44](https://indike.org/pramana/in.med.samhita.susruta.6.58.44) balāśvadaṃṣṭrākrauñcāsthikokilākṣakataṇḍulān/ śataparvakamūlaṃ ca devadāru sacitrakam// ### [6.58.45](https://indike.org/pramana/in.med.samhita.susruta.6.58.45) akṣabījaṃ ca surayā kalkīkṛtya pibennaraḥ/ mūtradoṣaviśuddhyarthaṃ tathaivāśmarināśanam†// ### [6.58.46](https://indike.org/pramana/in.med.samhita.susruta.6.58.46) pāṭalākṣāramāhṛtya saptakṛtvaḥ parisrutam/ pibenmūtravikāraghnaṃ saṃsṛṣṭaṃ tailamātrayā// ### [6.58.47](https://indike.org/pramana/in.med.samhita.susruta.6.58.47) nalāśmabhedadarbhekṣutrapusairvārubījakān/ kṣīre pariśṛtān tatra pibet sarpiḥ samāyutān// ### [6.58.48](https://indike.org/pramana/in.med.samhita.susruta.6.58.48) pāṭalyā yāvaśūkācca pāribhadrāttilādapi/ kṣārodakena matimān tvageloṣaṇacūrṇakam// ### [6.58.49](https://indike.org/pramana/in.med.samhita.susruta.6.58.49) pibedguḍena miśraṃ vā lihyāllehān pṛthak pṛthak/ ata ūrdhvaṃ pravakṣyāmi mūtradoṣe kramaṃ hitam// ### [6.58.50](https://indike.org/pramana/in.med.samhita.susruta.6.58.50) snehasvedopapannānāṃ hitaṃ teṣu virecanam/ tataḥ saṃśuddhadehānāṃ hitāścottarabastayaḥ// ### [6.58.51](https://indike.org/pramana/in.med.samhita.susruta.6.58.51) strīṇāmatiprasaṅgena śoṇitaṃ yasya dṛśyate†/ maithunoparamastasya bṛṃhaṇaśca vidhiḥ smṛtaḥ// ### [6.58.52](https://indike.org/pramana/in.med.samhita.susruta.6.58.52) tāmracūḍavasā tailaṃ hitaṃ cottarabastiṣu/ vidhānaṃ tasya pūrvaṃ hi vyāsataḥ parikīrtitam// ### [6.58.53](https://indike.org/pramana/in.med.samhita.susruta.6.58.53) kṣaudrārdhapātraṃ dattvā ca pātraṃ tu kṣīrasarpiṣaḥ/ śarkarāyāśca cūrṇaṃ ca drākṣācūrṇaṃ ca tatsamam// ### [6.58.54](https://indike.org/pramana/in.med.samhita.susruta.6.58.54) svayaṅguptāphalaṃ caiva tathivekṣurakasya ca/ pippalīcūrṇasaṃyuktamardhabhāgaṃ prakalpayet// ### [6.58.55](https://indike.org/pramana/in.med.samhita.susruta.6.58.55) tadaikadhyaṃ samānīya khajenābhipramanthayet/ tataḥ pāṇitalaṃ cūrṇaṃ līḍhvā kṣīraṃ tataḥ pibet// ### [6.58.56](https://indike.org/pramana/in.med.samhita.susruta.6.58.56) etat sarpiḥ prayuñjānaḥ śuddhadeho naraḥ sadā/ mūtradoṣāñjayet †sarvānanyayogaiḥ sudurjayān// ### [6.58.57](https://indike.org/pramana/in.med.samhita.susruta.6.58.57) jayecchoṇitadoṣāṃśca vandhyā garbhaṃ labheta ca/ nārī caitat prayuñjānā yonidosāt pramucyate// ### [6.58.58](https://indike.org/pramana/in.med.samhita.susruta.6.58.58) balā kolāsthi madhukaṃ śvadaṃṣṭrā+atha śatāvarī/ mṛṇālaṃ ca kaśeruśca bījānīkṣurakasya ca// ### [6.58.59](https://indike.org/pramana/in.med.samhita.susruta.6.58.59) sahasravīryā+aṃśumatī payasyā saha kālayā/ śṛgālavinnā+atibalā bṛṃhaṇīyo gaṇastathā// ### [6.58.60](https://indike.org/pramana/in.med.samhita.susruta.6.58.60) etāni samabhāgāni matimān saha sādhayet/ caturguṇena payasā guḍasya tulayā saha// ### [6.58.61](https://indike.org/pramana/in.med.samhita.susruta.6.58.61) droṇāvaśiṣṭaṃ tat pūtaṃ pacettena ghṛtāḍhakam/ tat siddhaṃ kalaśe sthāpyaṃ kṣaudraprasthena saṃyutam// ### [6.58.62](https://indike.org/pramana/in.med.samhita.susruta.6.58.62) sarpiretat prayuñjāno mūtradoṣāt pramucyate/ tugākṣīryāśca cūrṇāni śarkarāyāstathaiva ca// ### [6.58.63](https://indike.org/pramana/in.med.samhita.susruta.6.58.63) kṣaudreṇa tulyānyāloḍya praśaste+ahani lehayet/ tasya khādedyathāśakti mātrāṃ kṣīraṃ tataḥ pibet// ### [6.58.64](https://indike.org/pramana/in.med.samhita.susruta.6.58.64) śukradoṣāñjayenmartyaḥ prāśya samyak suyantritaḥ/ vyavāyakṣīṇaretāstu sadyaḥ saṃlabhate sukham// ### [6.58.65](https://indike.org/pramana/in.med.samhita.susruta.6.58.65) ojasvī balavānmartyaḥ pibenneva ca hṛṣyati/ citrakaḥ sārivā caiva balā kālānusārivā// ### [6.58.66](https://indike.org/pramana/in.med.samhita.susruta.6.58.66) drākṣā viśālā pippalyastathā citraphalā bhevet/ tathaiva madhukaṃ pathyāṃ dadyādāmalakāni ca// ### [6.58.67](https://indike.org/pramana/in.med.samhita.susruta.6.58.67) ghṛtāḍhakaṃ pacedebhiḥ †kalkaiḥ karṣasamanvitaiḥ/ kṣīradroṇe jaladroṇe tatsiddhamavatārayet// ### [6.58.68](https://indike.org/pramana/in.med.samhita.susruta.6.58.68) śītaṃ parisrutaṃ caiva śarkarāprasthasaṃyutam/ tugākṣīryāśca tat sarvaṃ matimān parimiśrayet// ### [6.58.69](https://indike.org/pramana/in.med.samhita.susruta.6.58.69) tato mitaṃ pibetkāle yathādoṣaṃ yathābalam/ vātaretāḥ śleṣmaretāḥ pittaretāstu yo bhavet// ### [6.58.70](https://indike.org/pramana/in.med.samhita.susruta.6.58.70) raktaretā granthiretāḥ pibedicchannarogatām/ jīvanīyaṃ ca vṛṣyaṃ ca sarpiretadbalāvaham// ### [6.58.71](https://indike.org/pramana/in.med.samhita.susruta.6.58.71) †prakṣāhitaṃ ca dhanyaṃ ca sarvarogāpahaṃ śivam/ sarpiretat prayuñjānā strī garbhaṃ labhate+acirāt// ### [6.58.72](https://indike.org/pramana/in.med.samhita.susruta.6.58.72) asṛgdoṣāñjayeccāpi yonidoṣāṃśca saṃhatān/ mūtradoṣeṣu sarveṣu kuryādetaccikitsitam// ### [6.58.72\_1](https://indike.org/pramana/in.med.samhita.susruta.6.58.72_1) iti suśrutasaṃhitāyāmuttaratantrāntargate kāyacikitsātantre mūtrāghātapratiṣedho nāma (viṃśo+adhyāyaḥ, āditaḥ) aṣṭapañcāśattamo+adhyāyaḥ //58// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.193.2) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.58](https://indike.org/pramana/in.med.samhita.susruta.6.58) · Pramāṇa