[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.59 # The Compendium of Suśruta 6.59: ūnaṣaṣṭitamo+adhyāyaḥ/ Suśrutasaṃhitā 6.59 - **Language:** Sanskrit ### ūnaṣaṣṭitamo+adhyāyaḥ/ ### [6.59.1](https://indike.org/pramana/in.med.samhita.susruta.6.59.1) athāto mūtrakṛcchrapratiṣedhamadhyāyaṃ vyākhyāsyāmaḥ// ### [6.59.2](https://indike.org/pramana/in.med.samhita.susruta.6.59.2) yathovāca bhagavān dhanvantariḥ// ### [6.59.3](https://indike.org/pramana/in.med.samhita.susruta.6.59.3) vātena pittena kaphena sarvaistathā+ābhighātaiḥ śakṛdaśmarībhyām/ tathā+aparaḥ śarkarayā sukaṣṭo mūtropaghātaḥ kathito+aṣṭamastu// ### [6.59.4](https://indike.org/pramana/in.med.samhita.susruta.6.59.4) alpamalpaṃ samutpīḍya muṣkamehanabastibhiḥ/ phaladbhiriva kṛcchreṇa vātāghātena mehati// ### [6.59.5](https://indike.org/pramana/in.med.samhita.susruta.6.59.5) hāridramuṣṇaṃ raktaṃ vā muṣkamehanabastibhiḥ/ agninā dahyamānābhaiḥ pittāghātena mehati// ### [6.59.6](https://indike.org/pramana/in.med.samhita.susruta.6.59.6) snigdhaṃ śuklamanuṣṇaṃ ca muṣkamehanabastibhiḥ/ saṃhṛṣṭaromā gurubhiḥ śleṣmāghātena mehati// ### [6.59.7](https://indike.org/pramana/in.med.samhita.susruta.6.59.7) dāhaśītarujāviṣṭo nānāvarṇaṃ muhurmuhuḥ/ tāmyamānastu kṛcchreṇa sannipātena mehati// ### [6.59.8](https://indike.org/pramana/in.med.samhita.susruta.6.59.8) mūtravāhiṣu śalyena kṣateṣvabhihateṣu ca/ srotaḥsu mūtrāghātastu jāyate bhṛśavedanaḥ†// ### [6.59.9](https://indike.org/pramana/in.med.samhita.susruta.6.59.9) vātabastestu tulyāni tasya liṅgāni lakṣayet/ śakṛtastu pratīghātādvāyurviguṇatāṃ gataḥ// ### [6.59.10](https://indike.org/pramana/in.med.samhita.susruta.6.59.10) ādhmānaṃ ca saśūlaṃ ca mūtrasaṅgaṃ karoti hi/ aśmarīhetukaḥ pūrvaṃ mūtraghāta udāhṛtaḥ// ### [6.59.11](https://indike.org/pramana/in.med.samhita.susruta.6.59.11) aśmarī śarkarā caiva †tulye saṃbhavalakṣaṇaiḥ/ śarkarāyā viśeṣaṃ tu śṛṇu kīrtayato mama// ### [6.59.12](https://indike.org/pramana/in.med.samhita.susruta.6.59.12) pacyamānasya pittena bhidyamānasya vāyunā/ śleṣmaṇo+avayavā bhinnāḥ śarkarā iti saṃjñitāḥ// ### [6.59.13](https://indike.org/pramana/in.med.samhita.susruta.6.59.13) hṛtpīḍā vepathuḥ śūlaṃ kukṣau† vahniḥ sudurbalaḥ/ tābhirbhavati mūrcchā ca mūtrāghātaśca dāruṇaḥ// ### [6.59.14](https://indike.org/pramana/in.med.samhita.susruta.6.59.14) mūtraveganirastāsu tāsu śāmyati vedanā/ †yāvadanyā punarnaiti guḍikā srotaso mukham// ### [6.59.15](https://indike.org/pramana/in.med.samhita.susruta.6.59.15) śarkarāsaṃbhavasyaitanmūtrāghātasya lakṣaṇam/ cikitsitamathaiteṣāmaṣṭānāmapi vakṣyate// ### [6.59.16](https://indike.org/pramana/in.med.samhita.susruta.6.59.16) aśmarīṃ ca samāśritya yaduktaṃ prasamīkṣya tat/ yathādoṣaṃ prayuñjīta snehādimapi ca kramam// ### [6.59.17](https://indike.org/pramana/in.med.samhita.susruta.6.59.17) śvadaṃṣṭrāśmabhidau kumbhīṃ hapuṣāṃ kaṇṭakārikām/ balāṃ śatāvarīṃ rāsnāṃ varuṇaṃ girikarṇikām// ### [6.59.18](https://indike.org/pramana/in.med.samhita.susruta.6.59.18) tathā vidārigandhādiṃ saṃhṛtya traivṛtaṃ pacet/ tailaṃ ghṛtaṃ vā tat peyaṃ tena vā+apyanuvāsanam// ### [6.59.19](https://indike.org/pramana/in.med.samhita.susruta.6.59.19) dadyāduttarabastiṃ ca vātakṛcchropaśāntaye/ śvadaṃṣṭrāsvarase tailaṃ saguḍakṣīranāgaram// ### [6.59.20](https://indike.org/pramana/in.med.samhita.susruta.6.59.20) paktvā tat pūrvavadyojyaṃ tatrānilarujāpaham/ tṛṇotpalādikākolīnyagrodhādigaṇaiḥ kṛtam(śṛtam)// ### [6.59.21](https://indike.org/pramana/in.med.samhita.susruta.6.59.21) pītaṃ ghṛtaṃ pittakṛcchraṃ nāśayet kṣīrameva vā/ dadyāduttarabastiṃ ca pittakṛcchropaśāntaye// ### [6.59.22](https://indike.org/pramana/in.med.samhita.susruta.6.59.22) ebhireva kṛtaḥ snehastrividheṣvapi bastiṣu/ hitaṃ virecanaṃ cekṣukṣīradrākṣārasairyutam// ### [6.59.23](https://indike.org/pramana/in.med.samhita.susruta.6.59.23) surasoṣakamustādau varuṇādau ca †yat kṛtam/ tailaṃ tathā yavāgvādi †kaphāghāte praśasyate// ### [6.59.24](https://indike.org/pramana/in.med.samhita.susruta.6.59.24) yathādoṣocchrayaṃ kuryādetāneva ca sarvaje/ phalguvṛścīradarbhāśmasāracūrṇaṃ ca vāriṇā// ### [6.59.25](https://indike.org/pramana/in.med.samhita.susruta.6.59.25) surekṣurasadarbhāmbupītaṃ kṛcchrarujāpaham/ tathā+abhighātaje kuryāt sadyovraṇacikitsitam// ### [6.59.26](https://indike.org/pramana/in.med.samhita.susruta.6.59.26) mūtrakṛcchre śakṛjjāte kāryā vātaharī kriyā/ svedāvagāhāvabhyaṅgabasticūrṇakriyāstathā// ### [6.59.27](https://indike.org/pramana/in.med.samhita.susruta.6.59.27) ye tvanye tu tathā kṛcchre tayoḥ proktaḥ kriyāvidhiḥ// ### [6.59.27\_1](https://indike.org/pramana/in.med.samhita.susruta.6.59.27_1) iti suśrutasaṃhitāyāmuttaratantrāntargate kāyacikitsātantre mūtrakṛcchrapratiṣedho nāma (ekaviṃśatitamo+adhyāyaḥ, āditaḥ) ekonaṣaṣṭitamo+adhyāyaḥ //59// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.193.72) — Ḍalhaṇa, Sanskrit ## Linked texts (1) - [Siddhisāra](https://indike.org/pramana/in.med.sangraha.siddhisara.21.194) — Sanskrit --- Source: [https://indike.org/pramana/in.med.samhita.susruta.6.59](https://indike.org/pramana/in.med.samhita.susruta.6.59) · Pramāṇa