[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.60 # The Compendium of Suśruta 6.60: ṣaṣṭitamo+adhyāyaḥ/ Suśrutasaṃhitā 6.60 - **Language:** Sanskrit ### ṣaṣṭitamo+adhyāyaḥ/ ### [6.60.1](https://indike.org/pramana/in.med.samhita.susruta.6.60.1) athāto+amānuṣopasargapratiṣedhamadhyāyaṃ vyākhyāsyāmaḥ// ### [6.60.2](https://indike.org/pramana/in.med.samhita.susruta.6.60.2) yathovāca bhagavān dhanvantariḥ// ### [6.60.3](https://indike.org/pramana/in.med.samhita.susruta.6.60.3) niśācarebhyo rakṣyastu nityameva kṣatāturaḥ/ iti yat prāgabhihitaṃ vistarastasya vakṣyate// ### [6.60.4](https://indike.org/pramana/in.med.samhita.susruta.6.60.4) guhyānāgatavijñānamanavasthā+asahiṣṇutā/ kriyā vā+amānuṣī yasmin sagrahaḥ parikīrtyate// ### [6.60.5](https://indike.org/pramana/in.med.samhita.susruta.6.60.5) aśuciṃ bhinnamaryādaṃ kṣataṃ vā yadi vā+akṣatam/ hiṃsyurhiṃsāvihārārthaṃ satkārārthamathāpi vā// ### [6.60.6](https://indike.org/pramana/in.med.samhita.susruta.6.60.6) asaṅkhyeyā grahagaṇā grahādhipatayastu ye/ vyajyante vividhākārā bhidyante te tathā+aṣṭadhā// ### [6.60.7](https://indike.org/pramana/in.med.samhita.susruta.6.60.7) devāstathā śatrugaṇāśca teṣāṃ gandharvayakṣāḥ pitaro bhujaṅgāḥ/ rakṣāṃsi yā cāpi piśācajātireṣo+aṣṭako devagaṇo grahākhyaḥ// ### [6.60.8](https://indike.org/pramana/in.med.samhita.susruta.6.60.8) saṃtuṣṭaḥ śucirapi ceṣṭagandhamālyo nistandrī hyavitathasaṃskṛtaprabhāṣī/ tejasvī sthiranayano varapradātā brahmaṇyo bhavati naraḥ sa devajuṣṭaḥ// ### [6.60.9](https://indike.org/pramana/in.med.samhita.susruta.6.60.9) saṃsvedī dvijagurudevadoṣavaktā jihmākṣo vigatabhayo vimārgadṛṣṭiḥ/ santuṣṭo bhavati na cānnapānajātairduṣṭātmā bhavati ca devaśatrujuṣṭaḥ// ### [6.60.10](https://indike.org/pramana/in.med.samhita.susruta.6.60.10) hṛṣṭātmā pulinavanāntaropasevī svācāraḥ priyaparigītagandhamālyaḥ/ nṛtyan vai prahasati cāru cālpaśabdaṃ gandharvagrahaparipīḍito manuṣyaḥ// ### [6.60.11](https://indike.org/pramana/in.med.samhita.susruta.6.60.11) tāmrākṣaḥ priyatanuraktavastradhārī gambhīro †drutamatiralpavāk sahiṣśuḥ/ tejasvī vadati ca kiṃ dadāmi kasmai yo yakṣagrahaparipīḍito manuṣyaḥ// ### [6.60.12](https://indike.org/pramana/in.med.samhita.susruta.6.60.12) pretebhyo visṛjati saṃstareṣu piṇḍān śāntātmā jalamapi cāpasavyavastraḥ/ māṃsepsustilaguḍapāyasābhikāmastadbhukto† bhavati pitṛgrahābhibhūtaḥ// ### [6.60.13](https://indike.org/pramana/in.med.samhita.susruta.6.60.13) bhūmau yaḥ prasarati sarpavat kadācit sṛkkiṇyau vilikhati† jihvayā tathaiva/ nidrālurguḍamadhudugdhapāyasepsurvijñeyo bhavati bhujaṅgamena juṣṭaḥ// ### [6.60.14](https://indike.org/pramana/in.med.samhita.susruta.6.60.14) māṃsāsṛgvividhasurāvikāralipsurnirlajjo bhṛśamatiniṣṭhuro+atiśūraḥ/ krodhālurvipulabalo niśāvihārī śaucadviḍ bhavati ca rakṣasā gṛhītaḥ// ### [6.60.15](https://indike.org/pramana/in.med.samhita.susruta.6.60.15) uddhastaḥ kṛśaparuṣaścirapralāpī durgandho bhṛśamaśucistathā+atilolaḥ/ bahvāśī vijanahimāmburātrisevī †vyāvigno bhramati rudan piśācajuṣṭaḥ// ### [6.60.16](https://indike.org/pramana/in.med.samhita.susruta.6.60.16) sthūlākṣastvaritagatiḥ svaphenalehī nidrāluḥ patati ca kampate ca yo+ati/ yaścādridviradanagādivicyutaḥ san saṃsṛṣṭo na bhavati vārdhakena juṣṭaḥ// ### [6.60.17](https://indike.org/pramana/in.med.samhita.susruta.6.60.17) devagrahāḥ paurṇamāsyāmasurāḥ sandhyayorapi/ gandharvāḥ prāyaśo+aṣṭamyāṃ yakṣāśca pratipadyatha// ### [6.60.18](https://indike.org/pramana/in.med.samhita.susruta.6.60.18) kṛṣṇakṣaye ca pitaraḥ paścamyāmapi coragāḥ/ rakṣāṃsi niśi paiśācāścaturdaśyāṃ viśanti ca// ### [6.60.19](https://indike.org/pramana/in.med.samhita.susruta.6.60.19) darpaṇādīn yathā chāyā śītoṣṇaṃ prāṇino yathā/ svamaṇiṃ bhāskarasyosrā yathā dehaṃ ca dehadhṛk/ viśanti ca na dṛśyante grahāstadvaccharīriṇam// ### [6.60.20](https://indike.org/pramana/in.med.samhita.susruta.6.60.20) tapāṃsi tīvrāṇi tathaiva dānaṃ vratāni dharmo niyamāśca satyam/ guṇāstathā+aṣṭāvapi teṣu nityā vyastāḥ samastāśca yathāprabhāvam// ### [6.60.21](https://indike.org/pramana/in.med.samhita.susruta.6.60.21) na te manuṣyaiḥ saha saṃviśanti na vā manuṣyān kvacidāviśanti/ ye tvāviśantīti vadanti mohātte bhūtavidyāviṣayādapohyāḥ// ### [6.60.22](https://indike.org/pramana/in.med.samhita.susruta.6.60.22) teṣāṃ grahāṇāṃ paricārakā ye koṭīsahasrāyutapadmasaṃkhyāḥ/ asṛgvasāmāṃsabhujaḥ subhīmā niśāvihārāśca tamāviśanti// ### [6.60.23](https://indike.org/pramana/in.med.samhita.susruta.6.60.23) niśācarāṇāṃ teṣāṃ hi ye devagaṇamāśritāḥ/ te tu tatsattvasaṃsargādvijñeyāstu tadañjanāḥ// ### [6.60.24](https://indike.org/pramana/in.med.samhita.susruta.6.60.24) devagrahā iti punaḥ procyante+aśucayaśca† ye/ devavacca namasyante pratyarthyante ca devavat// ### [6.60.25](https://indike.org/pramana/in.med.samhita.susruta.6.60.25) †svāmiśīlakriyācārāḥ krama eṣa surādiṣu/ nirṛteryā duhitarastāsāṃ sa prasavaḥ smṛtaḥ// ### [6.60.26](https://indike.org/pramana/in.med.samhita.susruta.6.60.26) satyatvādapavṛtteṣu vṛttisteṣāṃ gaṇaiḥ kṛtā/ hiṃsāvihārā ye keciddevabhāvabhupāśritāḥ†// ### [6.60.27](https://indike.org/pramana/in.med.samhita.susruta.6.60.27) bhūtānīti kṛtā saṃjñā teṣāṃ saṃjñāpravaktṛbhiḥ/ grahasaṃjñāni bhūtāni yasmādvettyanayā bhiṣak// ### [6.60.28](https://indike.org/pramana/in.med.samhita.susruta.6.60.28) vidyayā bhūtavidyātvamata eva nirucyate/ teṣāṃ śāntyarthamanvicchan vaidyastu susamāhitaḥ// ### [6.60.29](https://indike.org/pramana/in.med.samhita.susruta.6.60.29) japaiḥ saniyamairhomairārabheta cikitsitum/ raktāni gandhamālyāni bījāni madhusarpiṣī// ### [6.60.30](https://indike.org/pramana/in.med.samhita.susruta.6.60.30) bhakṣyāśca sarve sarveṣāṃ sāmānyo vidhirucyate/ vastrāṇi gandhamālyāni māṃsāni† rudhirāṇi ca// ### [6.60.31](https://indike.org/pramana/in.med.samhita.susruta.6.60.31) yāni yeṣāṃ yatheṣṭāni tāni tebhyaḥ pradāpayet/ hiṃsanti manujān yeṣu prāyaśo divaseṣu tu// ### [6.60.32](https://indike.org/pramana/in.med.samhita.susruta.6.60.32) dineṣu teṣu deyāni tadbhūtavinivṛttaye/ devagrahe devagṛhe hutvā+agniṃ prāpayed(dāpayed)balim// ### [6.60.33](https://indike.org/pramana/in.med.samhita.susruta.6.60.33) kuśasvastikapūpājyacchatrapāyasasaṃbhṛtam/ asurāya yathākālaṃ vidadhyāccatvarādiṣu// ### [6.60.34](https://indike.org/pramana/in.med.samhita.susruta.6.60.34) gandharvasya gavāṃ madhye †madyamāṃsāmbujāṅgalam/ hṛdye veśmani yakṣasya kulmāṣāsṛksurādibhiḥ// ### [6.60.35](https://indike.org/pramana/in.med.samhita.susruta.6.60.35) atimuktakakundābjaiḥ puṣpaiśca vitaredbalim/ nadyāṃ pitṛgrahāyeṣṭaṃ kuśāstaraṇabhūṣitam// ### [6.60.36](https://indike.org/pramana/in.med.samhita.susruta.6.60.36) tatraivopahareccāpi nāgāya vividhaṃ balim/ catuṣpathe rākṣasasya bhīmeṣu gahaneṣu vā// ### [6.60.37](https://indike.org/pramana/in.med.samhita.susruta.6.60.37) śūnyāgāre piśācasya tīvraṃ balimupāharet/ pūrvamācaritairmantrairbhūtavidyānidarśitaiḥ// ### [6.60.38](https://indike.org/pramana/in.med.samhita.susruta.6.60.38) na śakyā balibhirjetuṃ yogaistān samupācaret/ ajarkṣacarmaromāṇi śalyakolūkayostathā// ### [6.60.39](https://indike.org/pramana/in.med.samhita.susruta.6.60.39) hiṅguṃ mūtraṃ ca bastasya dhūmamasya prayojayet/ etena śāmyati kṣipraṃ balavānapi yo grahaḥ// ### [6.60.40](https://indike.org/pramana/in.med.samhita.susruta.6.60.40) gajāhvapippalīmūlavyoṣāmalakasarṣapān/ godhānakulamārjāraṛṣyapittaprapeṣitān†// ### [6.60.41](https://indike.org/pramana/in.med.samhita.susruta.6.60.41) nasyābhyañjanasekeṣu vidadhyādyogatattvavit/ svarāśvāśvatarolūkakarabhaśvaśṛgālajam// ### [6.60.42](https://indike.org/pramana/in.med.samhita.susruta.6.60.42) purīṣaṃ †gṛdhrakākānāṃ varāhasya ca peṣayet/ bastamūtreṇa tatsiddhaṃ tailaṃ syāt pūrvavaddhitam// ### [6.60.43](https://indike.org/pramana/in.med.samhita.susruta.6.60.43) śirīṣabījaṃ laśunaṃ śuṇṭhīṃ siddhārthakaṃ vacām/ mañjiṣṭhāṃ rajanīṃ kṛṣṇāṃ bastamūtreṇa peṣayet// ### [6.60.44](https://indike.org/pramana/in.med.samhita.susruta.6.60.44) vartyaśchāyāviśuṣkāstāḥ sapittā nayanāñjanam/ naktamālaphalaṃ vyoṣaṃ mūlaṃ śyonākabilvayoḥ// ### [6.60.45](https://indike.org/pramana/in.med.samhita.susruta.6.60.45) haridre ca kṛtā vartyaḥ pūrvavannayanāñjanam/ saindhavaṃ kaṭukāṃ hiṅguṃ vayaḥsthāṃ ca vacāmapi/ bastamūtreṇa saṃpiṣṭaṃ matsyapittena pūrvavat// ### [6.60.46](https://indike.org/pramana/in.med.samhita.susruta.6.60.46) ye ye grahā na sidhyanti sarveṣāṃ nayanāñjanam/ pūrāṇasarpirlaśunaṃ hiṅgu siddhārthakaṃ vacā// ### [6.60.47](https://indike.org/pramana/in.med.samhita.susruta.6.60.47) golomī cājalomī ca bhūtakeśī jaṭā tathā/ kukkuṭā sarpagandhā ca tathā kāṇavikāṇike// ### [6.60.48](https://indike.org/pramana/in.med.samhita.susruta.6.60.48) vajraproktā† vayaḥsthā ca śṛṅgī mohanavallikā/ arkamūlaṃ trikaṭukaṃ latā srotojamañjanam// ### [6.60.49](https://indike.org/pramana/in.med.samhita.susruta.6.60.49) naipālī haritālaṃ ca rakṣoghnā ye ca kīrtitāḥ/ siṃhavyāghrarkṣamārjāradvīpivājigavāṃ tathā// ### [6.60.50](https://indike.org/pramana/in.med.samhita.susruta.6.60.50) śvāvicchalyakagodhānāmuṣṭrasya nakulasya ca/ viṭtvagromavasāmūtraraktapittanakhādayaḥ// ### [6.60.51](https://indike.org/pramana/in.med.samhita.susruta.6.60.51) asmin varge bhiṣak kuryāttailāni ca ghṛtāni ca/ pānābhyañjananasyeṣu tāni yojyāni jānatā// ### [6.60.52](https://indike.org/pramana/in.med.samhita.susruta.6.60.52) avapīḍe+añjane caiva vidadhyādguṭikīkṛtam/ vidadhīta parīṣeke kvathitaṃ cūrṇitaṃ tathā// ### [6.60.53](https://indike.org/pramana/in.med.samhita.susruta.6.60.53) uddhūlane ślakṣṇapiṣṭaṃ pradehe cāvacārayet/ eṣa sarvavikārāṃstu mānasānaparājitaḥ// ### [6.60.54](https://indike.org/pramana/in.med.samhita.susruta.6.60.54) hanyādalpena kālena snehādirapi ca †kramaḥ/ na †cācaukṣaṃ prayuñjīta prayogaṃ devatāgrahe// ### [6.60.55](https://indike.org/pramana/in.med.samhita.susruta.6.60.55) ṛte piśācādanyatra pratikūlaṃ na cācaret/ vaidyāturau nihanyuste dhruvaṃ kruddhā majaujasaḥ// ### [6.60.56](https://indike.org/pramana/in.med.samhita.susruta.6.60.56) hitāhitīye yaccoktaṃ nityameva samācaret/ tataḥ prāpsyati siddhiṃ ca yaśaśca vipulaṃ bhiṣak// ### [6.60.56\_1](https://indike.org/pramana/in.med.samhita.susruta.6.60.56_1) iti suśrutasaṃhitāyāmuttaratantrāntargate nāma (prathamo+adhyāyaḥ, āditaḥ) ṣaṣṭitamo+adhyāyaḥ //60// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.195.2) — Ḍalhaṇa, Sanskrit ## Linked texts (2) - [Southern recension](https://indike.org/pramana/in.lit.mahabharata.vyasa*southern.9.45.27) — Sanskrit - [Basavarājīya](https://indike.org/pramana/in.med.cikitsa.daksina.basavarajiya.p2304) — Nīlakaṇṭhakoṭṭūru Basavarāja 1500, Sanskrit --- Source: [https://indike.org/pramana/in.med.samhita.susruta.6.60](https://indike.org/pramana/in.med.samhita.susruta.6.60) · Pramāṇa