[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.61 # The Compendium of Suśruta 6.61: ekaṣaṣṭitamo+adhyāyaḥ/ Suśrutasaṃhitā 6.61 - **Language:** Sanskrit ### ekaṣaṣṭitamo+adhyāyaḥ/ ### [6.61.1](https://indike.org/pramana/in.med.samhita.susruta.6.61.1) athāto+apasmārapratiṣedhamadhyāyaṃ vyākhyāsyāmaḥ// ### [6.61.2](https://indike.org/pramana/in.med.samhita.susruta.6.61.2) yathovāca bhagavān dhanvantariḥ// ### [6.61.3](https://indike.org/pramana/in.med.samhita.susruta.6.61.3) smṛtirbhūtārthavijñānamapaśca parivarjane/ apasmāra iti proktastato+ayaṃ vyādhirantakṛt// ### [6.61.4](https://indike.org/pramana/in.med.samhita.susruta.6.61.4) mithyātiyogendriyārthakarmaṇāmabhisevanāt/ viruddhamalināhāravihārakupitairmalaiḥ// ### [6.61.5](https://indike.org/pramana/in.med.samhita.susruta.6.61.5) veganigrahaśīlānāmahitāśucibhojinām/ rajastamobhibhūtānāṃ gacchatāṃ ca rajasvalām// ### [6.61.6](https://indike.org/pramana/in.med.samhita.susruta.6.61.6) tathā kāmabhayodvegakrodhaśokādibhirbhṛśam/ cetasyabhihate puṃsāmapasmāro+abhijāyate// ### [6.61.7](https://indike.org/pramana/in.med.samhita.susruta.6.61.7) hṛtkampaḥ śūnyatā svedo dhyānaṃ mūrcchā pramūḍhatā/ nidrānāśaśca tasmiṃstu bhaviṣyati bhavantyatha// ### [6.61.8](https://indike.org/pramana/in.med.samhita.susruta.6.61.8) saṃjñāvaheṣu srotaḥsu doṣavyāpteṣu mānavaḥ/ rajastamaḥparīteṣu mūḍho bhrāntena cetasā// ### [6.61.9](https://indike.org/pramana/in.med.samhita.susruta.6.61.9) vikṣipan hastapādaṃ ca vijihmabhrūrvilocanaḥ/ dantān khādan vaman phenaṃ vivṛtākṣaḥ patet kṣitau// ### [6.61.10](https://indike.org/pramana/in.med.samhita.susruta.6.61.10) alpakālānataraṃ cāpi punaḥ saṃjñāṃ labheta saḥ/ so+apasmāra iti proktaḥ sa ca dṛṣṭaścaturvidhaḥ// ### [6.61.11](https://indike.org/pramana/in.med.samhita.susruta.6.61.11) vātapittakaphairnṝṇāṃ caturthaḥ sannipātataḥ/ vepamāno daśan dantān śvasan phenaṃ vamannapi// ### [6.61.12](https://indike.org/pramana/in.med.samhita.susruta.6.61.12) yo brūyādvikṛtaṃ sattvaṃ kṛṣṇaṃ māmanudhāvati/ tato me cittanāśaḥ syāt so+apasmāro+anilātmakaḥ// ### [6.61.13](https://indike.org/pramana/in.med.samhita.susruta.6.61.13) tṛṭtāpasvedamūrcchārto dhunvannaṅgāni vihvalaḥ/ yo brūyādvikṛtaṃ sattvaṃ pītaṃ māmanudhāvati// ### [6.61.14](https://indike.org/pramana/in.med.samhita.susruta.6.61.14) tato me cittanāśaḥ syāt sa pittabhava ucyate/ śītahṛllāsanidrārtaḥ patan bhūmau vaman kapham// ### [6.61.15](https://indike.org/pramana/in.med.samhita.susruta.6.61.15) yo brūyādvikṛtaṃ sattvaṃ śuklaṃ māmanudhāvati/ tato me cittanāśaḥ syāt so+apasmāraḥ kaphātmakaḥ// ### [6.61.16](https://indike.org/pramana/in.med.samhita.susruta.6.61.16) hṛdi todastṛḍutkledastriṣvapyeteṣu saṃkhyayā/ pralāpaḥ kūjanaṃ kleśaḥ pratyekaṃ tu bhavediha// ### [6.61.17](https://indike.org/pramana/in.med.samhita.susruta.6.61.17) sarvaliṅgasamavāyaḥ sarvadoṣaprakopaje/ animittāgamādvyādhergamanādakṛte+api ca// ### [6.61.18](https://indike.org/pramana/in.med.samhita.susruta.6.61.18) āgamāccāpyapasmāraṃ vadantyanye na doṣajam/ kramopayogāddoṣāṇāṃ kṣaṇikatvāttathaiva ca// ### [6.61.19](https://indike.org/pramana/in.med.samhita.susruta.6.61.19) āgamādvaiśvarūpyācca sa tu nirvarṇyate budhaiḥ/ deve varṣatyapi yathā bhūmau bījāni kānicit// ### [6.61.20](https://indike.org/pramana/in.med.samhita.susruta.6.61.20) śaradi pratirohanti tathā vyādhisamudbhavaḥ/ sthāyinaḥ kecidalpena kālenābhipravardhitāḥ// ### [6.61.21](https://indike.org/pramana/in.med.samhita.susruta.6.61.21) darśayanti vikārāṃstu viśvarūpānnisargataḥ/ apasmāro mahāvyādhistasmāddoṣaja eva tu// ### [6.61.22](https://indike.org/pramana/in.med.samhita.susruta.6.61.22) tasya kāryo vidhiḥ sarvo ya unmādeṣu vakṣyate/ purāṇasarpiṣaḥ pānamabhyaṅgaścaiva pūjitaḥ// ### [6.61.23](https://indike.org/pramana/in.med.samhita.susruta.6.61.23) upayogo grahoktānāṃ yogānāṃ tu viśeṣataḥ/ tataḥ sidhyanti te sarve yogairanyaiśca sādhayet/ śigrukaṭvaṅgakiṇvāhinimbatvagrasasādhitam// ### [6.61.24](https://indike.org/pramana/in.med.samhita.susruta.6.61.24) caturguṇe gavāṃ mūtre tailābhyañjane hitam/ godhānakulanāgānāṃ pṛṣatarkṣagavāmapi// ### [6.61.25](https://indike.org/pramana/in.med.samhita.susruta.6.61.25) pitteṣu siddhaṃ tailaṃ ca pānābhyaṅgeṣu pūjitam/ tīkṣṇairubhayatobhāgaiḥ śiraścāpi viśodhayet// ### [6.61.26](https://indike.org/pramana/in.med.samhita.susruta.6.61.26) pūjāṃ rudrasya kurvīta tadgaṇānāṃ ca nityaśaḥ/ vātikaṃ bastibhiścāpi paittikaṃ tu virecanaiḥ// ### [6.61.27](https://indike.org/pramana/in.med.samhita.susruta.6.61.27) kaphajaṃ vamanairdhīmānapasmāramupācaret/ kulatthayavakolāni śaṇabījaṃ palaṅkaṣām// ### [6.61.28](https://indike.org/pramana/in.med.samhita.susruta.6.61.28) jaṭilāṃ pañcamūlyau dve pathyāṃ cotkvāthya yatnataḥ/ bastamūtrayutaṃ sarpiḥ pacettadvātike hitam// ### [6.61.29](https://indike.org/pramana/in.med.samhita.susruta.6.61.29) kākolyādipratīvāpaṃ siddhaṃ ca prathame gaṇe/ payomadhusitāyuktaṃ ghṛtaṃ tat paittike hitam// ### [6.61.30](https://indike.org/pramana/in.med.samhita.susruta.6.61.30) kākolyādipratīvāpaṃ siddhaṃ ca prathame gaṇe/ payomadhusitāyuktaṃ ghṛtaṃ tat paittike hitam// ### [6.61.31](https://indike.org/pramana/in.med.samhita.susruta.6.61.31) suradrumavacākuṣṭhasiddhārthavyoṣahiṅgubhiḥ/ mañjiṣṭhārajanīyugmasamaṅgātriphalāmbudaiḥ// ### [6.61.32](https://indike.org/pramana/in.med.samhita.susruta.6.61.32) karañjabījaśairīṣagirikarṇīhutāśanaiḥ/ siddhaṃ siddhārthakaṃ nāma sarpirmūtracaturguṇam// ### [6.61.33](https://indike.org/pramana/in.med.samhita.susruta.6.61.33) kṛmikuṣṭhagaraśvāsabalāsaviṣamajvarān/ sarvabhūtagrahonmādānapasmārāṃśca nāśayet// ### [6.61.34](https://indike.org/pramana/in.med.samhita.susruta.6.61.34) daśamūlendravṛkṣatvaṅmūrvābhārgīphalatrikaiḥ/ śampākaśreyasīsaptaparṇāpāmārgaphalgubhiḥ// ### [6.61.35](https://indike.org/pramana/in.med.samhita.susruta.6.61.35) śṛtaiḥ kalkaiśca bhūnimbapūtīkavyoṣacitrakaiḥ/ trivṛtpāṭhāniśāyugmasārivādvayapauṣkaraiḥ// ### [6.61.36](https://indike.org/pramana/in.med.samhita.susruta.6.61.36) kaṭukāyāsadantyugrānīlinīkrimiśatrubhiḥ†/ sarpirebhiśca gokṣīradadhimūtraśakṛdrasaiḥ// ### [6.61.37](https://indike.org/pramana/in.med.samhita.susruta.6.61.37) sādhitaṃ pañcagavyākhyaṃ sarvāpasmārabhūtanut/ cāturthakakṣayaśvāsānunmādāṃśca niyacchati// ### [6.61.38](https://indike.org/pramana/in.med.samhita.susruta.6.61.38) bhārgīśṛte pacet kṣīre śālitaṇḍulapāyasam/ tryahaṃ śuddhāya taṃ bhoktuṃ varāhāyopakalpayet// ### [6.61.39](https://indike.org/pramana/in.med.samhita.susruta.6.61.39) jñātvā ca madhurībhūtaṃ taṃ viśasyānnamuddharet/ trīn bhāgāṃstasya cūrṇasya kiṇvabhāgena saṃsṛjet// ### [6.61.40](https://indike.org/pramana/in.med.samhita.susruta.6.61.40) maṇḍodakārthe deyaśca bhārgīkvāthaḥ suśītalaḥ/ śuddhe kumbhe nidadhyācca saṃbhāraṃ taṃ surāṃ tataḥ// ### [6.61.41](https://indike.org/pramana/in.med.samhita.susruta.6.61.41) jātagandhāṃ jātarasāṃ pāyayedāturaṃ bhiṣak/ sirāṃ vidhyedatha prāptāṃ maṅgalyāni ca dhārayet// ### [6.61.41\_1](https://indike.org/pramana/in.med.samhita.susruta.6.61.41_1) iti susrutasaṃhitāyāmuttaratantrāntargate bhūtavidyātantre+apasmārapratiṣedho nāma (dvitīyo+adhyāyaḥ, āditaḥ) ekaṣaṣṭitamo+adhyāyaḥ //61// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.195.60) — Ḍalhaṇa, Sanskrit --- Source: [https://indike.org/pramana/in.med.samhita.susruta.6.61](https://indike.org/pramana/in.med.samhita.susruta.6.61) · Pramāṇa