[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.64 # The Compendium of Suśruta 6.64: catuḥṣaṣṭitamo+adhyāyaḥ/ Suśrutasaṃhitā 6.64 - **Language:** Sanskrit ### catuḥṣaṣṭitamo+adhyāyaḥ/ ### [6.64.1](https://indike.org/pramana/in.med.samhita.susruta.6.64.1) athātaḥ svasthavṛttamadhyāyaṃ vyākhyāsyāmaḥ// ### [6.64.2](https://indike.org/pramana/in.med.samhita.susruta.6.64.2) yathovāca bhagavān dhanvantariḥ// ### [6.64.3](https://indike.org/pramana/in.med.samhita.susruta.6.64.3) sūtrasthāne samuddiṣṭaḥ svastho bhavati yādṛśaḥ/ tasya† yadrakṣaṇaṃ taddhi cikitsāyāḥ prayojanam// ### [6.64.4](https://indike.org/pramana/in.med.samhita.susruta.6.64.4) tasya yadvṛttamuktaṃ hi rakṣaṇaṃ ca mayā++āditaḥ/ tasminnarthaḥ samāsoktā vistareṇeha vakṣyate// ### [6.64.5](https://indike.org/pramana/in.med.samhita.susruta.6.64.5) yasmin yasminnṛtau ye ye doṣāḥ kupyanti dehinām/ teṣu teṣu pradātavyāḥ rasāste te vijānatā// ### [6.64.6](https://indike.org/pramana/in.med.samhita.susruta.6.64.6) praklinnatvāccharīrāṇāṃ varṣāsu bhiṣajā khalu†/ mande+agnau kopamāyānti sarveṣāṃ† mārutādayaḥ// ### [6.64.7](https://indike.org/pramana/in.med.samhita.susruta.6.64.7) tasmāt kledaviśuddhyarthaṃ doṣasaṃharaṇāya† ca/ kaṣāyatiktakaṭukai rasairyuktamapadravam// ### [6.64.8](https://indike.org/pramana/in.med.samhita.susruta.6.64.8) nātisnigdhaṃ nātirūkṣamuṣṇaṃ dīpanameva ca/ deyamannaṃ nṛpataye yajjalaṃ coktamāditaḥ// ### [6.64.9](https://indike.org/pramana/in.med.samhita.susruta.6.64.9) taptāvaratamambho vā pibenmadhusamāyutam/ ahni meghānilāviṣṭe+atyarthaśītāmbusaṅkule// ### [6.64.10](https://indike.org/pramana/in.med.samhita.susruta.6.64.10) taruṇatvādvidāhaṃ ca gacchantyoṣadhayastadā/ matimāṃstannimittaṃ ca nātivyāyāmamācaret// ### [6.64.11](https://indike.org/pramana/in.med.samhita.susruta.6.64.11) atyambupānāvaśyāyagrāmyadharmātapāṃstyajet/ bhūbāṣpaparihārārthaṃ śayīta ca vihāyasi// ### [6.64.12](https://indike.org/pramana/in.med.samhita.susruta.6.64.12) śīte sāgnau nivāte ca guruprāvaraṇe gṛhe/ yāyānnāgavadhūbhiśca praśastāgurubhūṣitaḥ// ### [6.64.13](https://indike.org/pramana/in.med.samhita.susruta.6.64.13) divāsvapnamajīrṇaṃ ca varjayettatra yatnataḥ/ sevyāḥ śaradi yatnena kaṣāyasvādutiktakāḥ// ### [6.64.14](https://indike.org/pramana/in.med.samhita.susruta.6.64.14) kṣīrekṣuvikṛtikṣaudraśālimudgādijāṅgalāḥ/ śvetasrajaścandrapādāḥ pradoṣe laghu cāmbaram// ### [6.64.15](https://indike.org/pramana/in.med.samhita.susruta.6.64.15) salilaṃ ca prasannatvāt sarvameva tadā hitam/ saraḥsvāplavanaṃ caiva kamalotpalaśāliṣu// ### [6.64.16](https://indike.org/pramana/in.med.samhita.susruta.6.64.16) pradoṣe śaśinaḥ pādāścandanaṃ cānulepanam/ tiktasya sarpiṣaḥ pānairasṛksrāvaiśca yuktitaḥ// ### [6.64.17](https://indike.org/pramana/in.med.samhita.susruta.6.64.17) varṣāsūpacitaṃ pittaṃ hareccāpi virecanaiḥ/ nopeyāttīkṣṇamamloṣṇaṃ kṣāraṃ svapnaṃ divā++ātapam// ### [6.64.18](https://indike.org/pramana/in.med.samhita.susruta.6.64.18) rātrau jāgagṇaṃ caiva maithunaṃ cāpi varjayet/ (†svāduśītajalaṃ medhyaṃ śucisphaṭikanirmalam// ### [6.64.19](https://indike.org/pramana/in.med.samhita.susruta.6.64.19) śaraccandrāṃśunirdhautamagastyodayanirviṣam/ prasannatvācca salilaṃ sarvameva tadā hitam// ### [6.64.20](https://indike.org/pramana/in.med.samhita.susruta.6.64.20) sacandanaṃ sakarpūraṃ vāsaścāmalinaṃ laghu/ bhajecca śāradaṃ mālyaṃ sīdhoḥ pānaṃ ca yuktitaḥ// ### [6.64.21](https://indike.org/pramana/in.med.samhita.susruta.6.64.21) pittapraśamanaṃ yacca tacca sarvaṃ samācaret/ ) (†hemantaḥ śītalo rūkṣo mandasūryo+anilākulaḥ// ### [6.64.22](https://indike.org/pramana/in.med.samhita.susruta.6.64.22) tatastu śītamāsādya vāyustatra prakupyati/ koṣṭhasthaḥ śītasaṃsparśādantaḥpiṇḍīkṛto+analaḥ// ### [6.64.23](https://indike.org/pramana/in.med.samhita.susruta.6.64.23) rasamucchoṣayatyāśu tasmāt snigdhaṃ tadā hitam/ ) hemante lavaṇakṣāratiktāmlakaṭukotkaṭam// ### [6.64.24](https://indike.org/pramana/in.med.samhita.susruta.6.64.24) sasarpistailamahimaśanaṃ hitamucyate/ tīkṣṇānyapi ca pānāni pibedagurubhūṣitaḥ†// ### [6.64.25](https://indike.org/pramana/in.med.samhita.susruta.6.64.25) tailāktasya sukhoṣṇe ca vārikoṣṭhe+avagāhanam/ sāṅgārayāne mahati kauśeyāstaraṇāstṛte// ### [6.64.26](https://indike.org/pramana/in.med.samhita.susruta.6.64.26) śayīta śayane taistairvṛto garbhagṛhodare/ strīḥ śliṣṭvā+agurudhūpāḍhyāḥ pīnorujaghanastanīḥ// ### [6.64.27](https://indike.org/pramana/in.med.samhita.susruta.6.64.27) prakāmaṃ ca niṣeveta maithunaṃ tarpito nṛpaḥ/ (†madhuraṃ tiktakaṭukamamlaṃ lavaṇameva ca// ### [6.64.28](https://indike.org/pramana/in.med.samhita.susruta.6.64.28) annapānaṃ tilān māṣāñchākāni ca dadhīni ca/ tathekṣuvikṛtīḥ śālīn sugandhāṃśca navānapi// ### [6.64.29](https://indike.org/pramana/in.med.samhita.susruta.6.64.29) prasahānūpamāṃsāni kravyādabilaśāyinām/ audakānāṃ plavānāṃ ca pādināṃ copasevayet// ### [6.64.30](https://indike.org/pramana/in.med.samhita.susruta.6.64.30) madyāni ca prasannāni yacca kiñcit balapradam/ kāmatastanniṣeveta puṣṭimicchan himāgame// ### [6.64.31](https://indike.org/pramana/in.med.samhita.susruta.6.64.31) divāsvapnamajīrṇaṃ ca varjayettatra yatnataḥ/ ) eṣa eva vidhiḥ kāryaḥ śiśire samudāhṛtaḥ// ### [6.64.32](https://indike.org/pramana/in.med.samhita.susruta.6.64.32) (†hemante nicitaḥ śleṣmā śaityācchītaśarīriṇām/ auṣṇyādvasante kupitaḥ kurute ca gadān bahūn// ### [6.64.33](https://indike.org/pramana/in.med.samhita.susruta.6.64.33) tato+amlamadhurasnigdhalavaṇāni gurūṇi ca/ varjayedvamanādīni karmāṇyapi ca kārayet// ### [6.64.34](https://indike.org/pramana/in.med.samhita.susruta.6.64.34) ṣaṣṭikānnaṃ yavāñchītān mudgān nīvārakodravān/ lāvādiviṣkirarasairdadyādyūsaiśca yuktitaḥ// ### [6.64.35](https://indike.org/pramana/in.med.samhita.susruta.6.64.35) paṭolanimbavārtākatiktakaiśca himātyaye/ sevenmadhvāsavāriṣṭān sīdhumādhvīkamādhavān// ### [6.64.36](https://indike.org/pramana/in.med.samhita.susruta.6.64.36) vyāyāmamañjanaṃ dhūmaṃ tīkṣṇaṃ ca kavalagraham/ sukhāmbunā ca sarvārthān seveta kusumāgame//) ### [6.64.37](https://indike.org/pramana/in.med.samhita.susruta.6.64.37) tīkṣṇarūkṣakaṭukṣārakaṣāyaṃ koṣṇamadravam/ yavamudgamadhuprāyaṃ vasante bhojanaṃ hitam// ### [6.64.38](https://indike.org/pramana/in.med.samhita.susruta.6.64.38) vyāyāmo+atra niyuddhādhvaśilānirghātajo/ utsādanaṃ tathā snānaṃ vanitāḥ kānanāni ca// ### [6.64.39](https://indike.org/pramana/in.med.samhita.susruta.6.64.39) seveta nirhareccāpi hemantopacitaṃ kapham/ śirovirekavamananirūhakavalādibhiḥ// ### [6.64.40](https://indike.org/pramana/in.med.samhita.susruta.6.64.40) varjayenmadhurasnigdhadivāsvapnagurudravān/ vyāyāmamuṣṇamāyāsaṃ maithunaṃ pariśoṣi ca// ### [6.64.41](https://indike.org/pramana/in.med.samhita.susruta.6.64.41) rasāṃścāgniguṇodrikatān nidāghe parivarjayet/ sarāṃsi sarito vāpīrvanāni rucirāṇi ca// ### [6.64.42](https://indike.org/pramana/in.med.samhita.susruta.6.64.42) candanāni parārdhyāni srajaḥ sakamalotpalāḥ/ tālavṛntānilāhārāṃstathā śītagṛhāṇi ca// ### [6.64.43](https://indike.org/pramana/in.med.samhita.susruta.6.64.43) gharmakāle niṣeveta vāsāṃsi sulaghūni ca/ śarkarākhaṇḍadigdhāni† sugandhīni himāni ca// ### [6.64.44](https://indike.org/pramana/in.med.samhita.susruta.6.64.44) pānakāni ca seveta manthāṃścāpi saśarkarān/ bhojanaṃ ca hitaṃ śītaṃ saghṛtaṃ madhuradravam// ### [6.64.45](https://indike.org/pramana/in.med.samhita.susruta.6.64.45) śṛtena payasā rātrau śarkarāmadhureṇa ca/ pratyagrakusumākīrṇe śayane harmyasaṃsthite// ### [6.64.46](https://indike.org/pramana/in.med.samhita.susruta.6.64.46) śayīta candanārdrāṅgaḥ spṛśyamāno+anilaiḥ sukhaiḥ/ tāpātyaye hitā nityaṃ rasā ye guravastrayaḥ// ### [6.64.47](https://indike.org/pramana/in.med.samhita.susruta.6.64.47) payo māṃsarasāḥ koṣṇāstailāni ca ghṛtāni ca/ bṛṃhaṇaṃ cāpi yatkiñcidabhiṣyandi tathaiva ca// ### [6.64.48](https://indike.org/pramana/in.med.samhita.susruta.6.64.48) nidāghopacitaṃ caiva prakupyantaṃ samīraṇam/ nihanyādanilaghnena vidhinā vidhikovidaḥ// ### [6.64.49](https://indike.org/pramana/in.med.samhita.susruta.6.64.49) (nadījalaṃ rūkṣamuṣṇamudamanthaṃ tathā++ātapam/ vyāyāmaṃ ca divāsvapnaṃ vyavāyaṃ cātra varjayet// ### [6.64.50](https://indike.org/pramana/in.med.samhita.susruta.6.64.50) navānnarūkṣaśītāmbusaktūṃścāpi vivarjayet/ yavaṣaṣṭikagodhūmān śālīṃścāpyanavāṃstathā// ### [6.64.51](https://indike.org/pramana/in.med.samhita.susruta.6.64.51) harmyamadhye nivāte ca bhajecchayyāṃ mṛdūttarām/ saviṣaprāṇiviṇmūtralālādiṣṭhīvanādibhiḥ// ### [6.64.52](https://indike.org/pramana/in.med.samhita.susruta.6.64.52) samāplutaṃ tadā toyamāntarīkṣaṃ viṣopamam/ vāyunā viṣaduṣṭena prāvṛṣeṇyena dūṣitam// ### [6.64.53](https://indike.org/pramana/in.med.samhita.susruta.6.64.53) taddhi srvopayogeṣu tasmin kāle vivarjayet/ ariṣṭāsavamaireyān sopadaṃśāṃstu yuktitaḥ// ### [6.64.54](https://indike.org/pramana/in.med.samhita.susruta.6.64.54) pibet prāvṛṣi jīrṇāṃstu rātrau tānapi varjayet/ nirūhairbastibhiścānyaistathā+anyairmārutāpahaiḥ// ### [6.64.55](https://indike.org/pramana/in.med.samhita.susruta.6.64.55) kupitaṃ śamayedvāyuṃ vārṣikaṃ cācaredvidhim/ ṛtāvṛtau ya etena vidhinā vartate naraḥ// ### [6.64.56](https://indike.org/pramana/in.med.samhita.susruta.6.64.56) ghorānṛtukṛtān rogānnāpnoti sa kadācana/ ata ūrdhvaṃ dvādaśāśanapravicārān vakṣyāmaḥ/ tatra śīroṣṇasnigdharūkṣadravaśuṣkaikakālikadvikālikauṣadhayuktamātrāhīnadoṣapraśamanavṛttyarthāḥ// ### [6.64.57](https://indike.org/pramana/in.med.samhita.susruta.6.64.57) tṛṣṇoṣṇamadadāhārtān raktapittaviṣāturān/ mūrcchārtān strīṣu ca kṣīṇān śītairannairupācaret// ### [6.64.58](https://indike.org/pramana/in.med.samhita.susruta.6.64.58) kaphavātamāmayāviṣṭān viriktān snehapāyinaḥ/ †aklinnakāyāṃśca narānuṣṇairannairupācaret// ### [6.64.59](https://indike.org/pramana/in.med.samhita.susruta.6.64.59) vātikān rūkṣadehāṃśca vyavāyopahatāṃstathā/ vyāyāminaścāpi narān snigdhairannairupācaret// ### [6.64.60](https://indike.org/pramana/in.med.samhita.susruta.6.64.60) medasā+abhiparītāṃstu †snigdhānmehāturānapi/ kaphābhipannadehāṃśca rūkṣairannairupācaret// ### [6.64.61](https://indike.org/pramana/in.med.samhita.susruta.6.64.61) śuṣkadehān pipāsārtān durbalānapi ca dravaiḥ/ praklinnakāyān vraṇinaḥ śuṣkairmehina eva ca// ### [6.64.62](https://indike.org/pramana/in.med.samhita.susruta.6.64.62) ekakālaṃ bhaveddeyo durbalāgnivivṛddhaye/ samāgnaye tathā++āhāro dvikālamapi† pūjitaḥ// ### [6.64.63](https://indike.org/pramana/in.med.samhita.susruta.6.64.63) auṣadhadveṣiṇe deyastathauṣadhasamāyutaḥ/ mandāgnaye rogiṇe ca mātrāhīnaḥ praśasyate// ### [6.64.64](https://indike.org/pramana/in.med.samhita.susruta.6.64.64) yathartudattastvāhāro doṣapraśamanaḥ smṛtaḥ/ ataḥ paraṃ tu svasthānāṃ vṛttyarthaṃ sarva eva ca/ pravicārānimānevaṃ dvādaśātra prayojayet†// ### [6.64.65](https://indike.org/pramana/in.med.samhita.susruta.6.64.65) ata ūrdhvaṃ daśauṣadhakālān vakṣyāmaḥ/ †tatrābhaktaṃ prāgbhaktamadhobhaktaṃ madhyebhaktamantarābhaktaṃ sabhaktaṃ sāmudgaṃ muhurmuhurgrāsaṃ grāsāntaraṃ ceti daśauṣadhakālāḥ// ### [6.64.66](https://indike.org/pramana/in.med.samhita.susruta.6.64.66) tatrābhaktaṃ tu yat kevalamevauṣadhamupayujyate// ### [6.64.67](https://indike.org/pramana/in.med.samhita.susruta.6.64.67) vīryādhikaṃ bhavati bheṣajamannahīnaṃ hanyāttathā†++āmayamasaṃśayamāśu caiva/ †tadbālavṛddhavanitāmṛdavastu pītvā glāniṃ parāṃ samupayānti balakṣayaṃ ca// ### [6.64.68](https://indike.org/pramana/in.med.samhita.susruta.6.64.68) prāgbhaktaṃ nāma yat prāgbhaktasyopayujyate// ### [6.64.69](https://indike.org/pramana/in.med.samhita.susruta.6.64.69) śīghraṃ vipākamupayāti balaṃ na hiṃsyādannāvṛtaṃ na ca muhurvardanānnireti/ prāgbhaktasevitamathauṣadhametadeva dadyācca vṛddhaśiśubhīrukṛśāṅganābhyaḥ// ### [6.64.70](https://indike.org/pramana/in.med.samhita.susruta.6.64.70) adhobhaktaṃ nāma †yadadho bhaktasyeti// ### [6.64.71](https://indike.org/pramana/in.med.samhita.susruta.6.64.71) madhyebhaktaṃ nāma yanmadhye bhaktasya pīyate// ### [6.64.72](https://indike.org/pramana/in.med.samhita.susruta.6.64.72) pītaṃ yadannamupayujya tadūrdhvakāye hanyādgadān bahuvidhāṃśca balaṃ dadāti/ madhye tu pītamapahantyavisāribhāvādye madhyadehamabhibhūya bhavanti rogāḥ// ### [6.64.73](https://indike.org/pramana/in.med.samhita.susruta.6.64.73) antarābhaktaṃ †nāma yadantarā pīyate pūrvāparayorbhaktayoḥ// ### [6.64.74](https://indike.org/pramana/in.med.samhita.susruta.6.64.74) sabhaktaṃ †nāma yat saha bhaktena// ### [6.64.75](https://indike.org/pramana/in.med.samhita.susruta.6.64.75) pathyaṃ sabhaktamabalābalayorhi nityaṃ taddveṣiṇāmapi tathā śiśuvṛddhayośca/ hṛdyaṃ manobalakaraṃ tvatha dīpanaṃ ca pathyaṃ sadā bhavati cāntarabhaktakaṃ yat// ### [6.64.76](https://indike.org/pramana/in.med.samhita.susruta.6.64.76) sāmudgaṃ †nāma yadbhaktasyādāvante ca pīyate// ### [6.64.77](https://indike.org/pramana/in.med.samhita.susruta.6.64.77) doṣe dvidhā pravisṛte tu samudgasaṃjñamādyantayoryadaśanasya niṣevyate tu// ### [6.64.78](https://indike.org/pramana/in.med.samhita.susruta.6.64.78) †muhurmuhurnāma sabhaktamabhaktaṃ vā yadauṣadhaṃ muhurmuhurupayujyate// ### [6.64.79](https://indike.org/pramana/in.med.samhita.susruta.6.64.79) śvāse muhurmuhuratiprasṛte ca kāse hikkāvamīṣu sa vadantyupayojyametat// ### [6.64.80](https://indike.org/pramana/in.med.samhita.susruta.6.64.80) grāsaṃ tu yatpiṇḍavyāmiśram// ### [6.64.81](https://indike.org/pramana/in.med.samhita.susruta.6.64.81) grāsāntaraṃ† tu yadgrāsāntareṣu// ### [6.64.82](https://indike.org/pramana/in.med.samhita.susruta.6.64.82) grāseṣu† cūrṇamabalāgniṣu dīpanīyaṃ vājīkarāṇyapi tu yojayituṃ yateta/ grāsāntareṣu vitaredvamanīyadhūmān śvāsādiṣu prathitadṛṣṭaguṇāṃśca lehān// ### [6.64.83](https://indike.org/pramana/in.med.samhita.susruta.6.64.83) evamete daśauṣadhakālāḥ// ### [6.64.84](https://indike.org/pramana/in.med.samhita.susruta.6.64.84) visṛṣṭe viṇmūtre viśadakaraṇe dehe ca sulaghau/ viśuddhe codgāre hṛdi suvimale vāte ca sarati/ tathā+annaśraddhāyāṃ klamaparigame kukṣau ca śithile/ pradeyastvāhāro bhavati bhiṣajāṃ kālaḥ sa tu mataḥ// ### [6.64.84\_1](https://indike.org/pramana/in.med.samhita.susruta.6.64.84_1) iti suśrutasaṃhitāyāmuttaratantre tantrabhūṣaṇādhyāyeṣu svasvavṛttādhyāyo nāma (dvitīyo+adhyāyaḥ, āditaḥ) catuḥṣaṣṭitamo+adhyāyaḥ //64// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.199.2) — Ḍalhaṇa, Sanskrit ## Linked texts (1) - [Hārītasaṃhitā](https://indike.org/pramana/in.med.samhita.haritasamhita.3.3.2.55) — Hārīta, Sanskrit --- Source: [https://indike.org/pramana/in.med.samhita.susruta.6.64](https://indike.org/pramana/in.med.samhita.susruta.6.64) · Pramāṇa