[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Early and ascribed compendia](https://indike.org/pramana/in.med.samhita) › [The Compendium of Suśruta](https://indike.org/pramana/in.med.samhita.susruta) › 6.7 # The Compendium of Suśruta 6.7: saptamo+adhyāyaḥ/ Suśrutasaṃhitā 6.7 - **Language:** Sanskrit ### saptamo+adhyāyaḥ/ ### [6.7.1](https://indike.org/pramana/in.med.samhita.susruta.6.7.1) athāto dṛṣṭigatarogavijñānīyamadhyāyaṃ vyākhyāsyāmaḥ// ### [6.7.2](https://indike.org/pramana/in.med.samhita.susruta.6.7.2) yathovāca bhagavān dhanvantariḥ// ### [6.7.3](https://indike.org/pramana/in.med.samhita.susruta.6.7.3) marūradalamātrāṃ tu pañcabhūtaprasādajām/ khadyotavisphuliṅgābhāmiddhāṃ† tejobhiravyayaiḥ// ### [6.7.4](https://indike.org/pramana/in.med.samhita.susruta.6.7.4) āvṛtāṃ paṭalenākṣṇorbāhyena vivarākṛtim/ śītasātmyāṃ nṛṇāṃ dṛṣṭimāhurnayanacintakāḥ// ### [6.7.5](https://indike.org/pramana/in.med.samhita.susruta.6.7.5) rogāṃstadāśrayān ghorān ṣaṭ ca ṣaṭ ca pracakṣmahe/ paṭalānupraviṣṭasya timirasya ca lakṣaṇam// ### [6.7.6](https://indike.org/pramana/in.med.samhita.susruta.6.7.6) sirābhirabhisaṃprāpya viguṇo+abhyantare bhṛśam/ prathame paṭale doṣo yasya dṛṣṭau vyavathitaḥ// ### [6.7.7](https://indike.org/pramana/in.med.samhita.susruta.6.7.7) avyaktāni sa rūpāṇi sarvāṇyeva prapaśyati/ dṛṣṭirbhṛśaṃ vihvalati dvitīyaṃ paṭalaṃ gate// ### [6.7.8](https://indike.org/pramana/in.med.samhita.susruta.6.7.8) makṣikā maśakān keśāñjālakāni ca paśyati/ maṇḍalāni patākāṃśca marīcīḥ kuṇḍalāni ca// ### [6.7.9](https://indike.org/pramana/in.med.samhita.susruta.6.7.9) †pariplavāṃśca vividhān varṣamabhraṃ tamāṃsi ca/ dūrasthānyapi rūpāṇi manyate ca samīpataḥ// ### [6.7.10](https://indike.org/pramana/in.med.samhita.susruta.6.7.10) samīpasthāni dūre ca dṛṣṭergocaravibhramāt/ yatnavānapi cātyarthaṃ sūcīpāśaṃ na paśyati// ### [6.7.11](https://indike.org/pramana/in.med.samhita.susruta.6.7.11) ūrdhvaṃ paśyati gādhastāttṛtīyaṃ paṭalaṃ gate/ mahāntyapi ca rūpāṇi cchāditānīva vāsasā// ### [6.7.12](https://indike.org/pramana/in.med.samhita.susruta.6.7.12) karṇanāsākṣiyuktāni viparītāni vīkṣate†/ yathādoṣaṃ ca rajyeta dṛṣṭirdoṣe balīyasi// ### [6.7.13](https://indike.org/pramana/in.med.samhita.susruta.6.7.13) adhaḥsthite samīpasthaṃ dūrasthaṃ coparisthite/ pārśvasthite tathā doṣe pārśvasthāni na paśyati// ### [6.7.14](https://indike.org/pramana/in.med.samhita.susruta.6.7.14) samantataḥ sthite doṣe saṅkulānīva† paśyati/ dṛṣṭimadhyagate doṣe sa ekaṃ manyate dvidhā// ### [6.7.15](https://indike.org/pramana/in.med.samhita.susruta.6.7.15) dvidhāsthite tridhā paśyedbahudhā cānavasthite/ timirākhyaḥ sa vai doṣaḥ caturthaṃ paṭalaṃ gataḥ// ### [6.7.16](https://indike.org/pramana/in.med.samhita.susruta.6.7.16) ruṇaddhi sarvato dṛṣṭiṃ liṅganāśaḥ sa ucyate/ tasminnapi tamobhūte nātirūḍhe mahāgade// ### [6.7.17](https://indike.org/pramana/in.med.samhita.susruta.6.7.17) candrādityau sanakṣatrāvantarīkṣe ca vidyutaḥ/ nirmalāni ca tejāṃsi bhrājiṣṇūni† ca paśyati// ### [6.7.18](https://indike.org/pramana/in.med.samhita.susruta.6.7.18) sa eva liṅganāśastu nīlikākācasaṃjñitaḥ/ tatra vātena rūpāṇi bhramantīva sa paśyati// ### [6.7.19](https://indike.org/pramana/in.med.samhita.susruta.6.7.19) āvilānyaruṇābhāni vyāviddhāni ca mānavaḥ/ pittenādityakhadyotaśakracāpataḍidguṇān// ### [6.7.20](https://indike.org/pramana/in.med.samhita.susruta.6.7.20) śikhibarhavicitrāṇi nīlakṛṣṇāni paśyati/ kaphena paśyedrūpāṇi snigdhāni ca sitāni ca// ### [6.7.21](https://indike.org/pramana/in.med.samhita.susruta.6.7.21) gauracāmaragaurāṇi śvetābhrapratimāni ca/ paśyedasūkṣmāṇyatyarthaṃ vyabhre caivābhrasaṃplavam// ### [6.7.22](https://indike.org/pramana/in.med.samhita.susruta.6.7.22) salilaplāvitānīva parijāḍyāni mānavaḥ// tathā raktena raktāni tamāṃsi vividhāni ca// ### [6.7.23](https://indike.org/pramana/in.med.samhita.susruta.6.7.23) haritaśyāvakṛṣṇāni dhūmadhūmrāṇi cekṣate/ sannipātena citrāṇi viplutāni ca paśyati// ### [6.7.24](https://indike.org/pramana/in.med.samhita.susruta.6.7.24) bahudhā vā dvidhā vā+api sarvāṇyeva samantataḥ/ hīnādhikāṅgānyathavā jyotīṃṣyapi ca †paśyati// ### [6.7.25](https://indike.org/pramana/in.med.samhita.susruta.6.7.25) pittaṃ kuryāt parimlāyi mūrcchitaṃ raktatejasā/ pītā diśastathodyantamādityamiva paśyati// ### [6.7.26](https://indike.org/pramana/in.med.samhita.susruta.6.7.26) vikīryamāṇān khadyotairvṛkṣāṃstejobhireva ca/ vakṣyāmi ṣaḍvidhaṃ† rāgairliṅganāśamataḥ param// ### [6.7.27](https://indike.org/pramana/in.med.samhita.susruta.6.7.27) rāgo+aruṇo mārutajaḥ pradiṣṭaḥ pittāt parimlāyyathavā+api nīlaḥ/ kaphāt sitaḥ śoṇitajastu raktaḥ samastadoṣo+atha vicitrarūpaḥ†// ### [6.7.28](https://indike.org/pramana/in.med.samhita.susruta.6.7.28) raktajaṃ maṇḍalaṃ dṛṣṭau sthūlakācānalaprabham†/ parimlāyini roge syānmlāyyānīlaṃ ca maṇḍalam// ### [6.7.29](https://indike.org/pramana/in.med.samhita.susruta.6.7.29) doṣakṣayāt kadācit syātsvayaṃ tatra ca darśanam/ aruṇaṃ maṇḍalaṃ vātāccañcalaṃ paruṣaṃ tathā// ### [6.7.30](https://indike.org/pramana/in.med.samhita.susruta.6.7.30) pittānmaṇḍalamānīlaṃ kāṃsyābhaṃ pītameva vā/ śleṣmaṇā bahalaṃ snigdhaṃ śaṅkhakundendupāṇḍuram// ### [6.7.31](https://indike.org/pramana/in.med.samhita.susruta.6.7.31) calatpadmapalāśasthaḥ śuklo bindurivāmbhasaḥ/ saṃkucatyātape+atyarthaṃ chāyāyāṃ vistṛto bhavet// ### [6.7.32](https://indike.org/pramana/in.med.samhita.susruta.6.7.32) mṛdyamāne ca nayane maṇḍalaṃ tadvisarpati/ pravālapadmapatrābhaṃ maṇḍalaṃ śoṇitātmakam// ### [6.7.33](https://indike.org/pramana/in.med.samhita.susruta.6.7.33) dṛṣṭirāgo bhaveccitro liṅganāśe tridoṣaje/ yathāsvaṃ doṣaliṅgāni sarveṣveva bhavanti hi// ### [6.7.34](https://indike.org/pramana/in.med.samhita.susruta.6.7.34) ṣaḍ liṅganāśāḥ ṣaḍime ca rogā dṛṣṭyāśrayāḥ ṣaṭ ca ṣaḍeva ca syuḥ/ tathā naraḥ pittavidagdhadṛṣṭiḥ kaphena cānyastvatha dhūmadarśī// ### [6.7.35](https://indike.org/pramana/in.med.samhita.susruta.6.7.35) yo hrasvajāḍyo†(hrasvajātyo) nakulāndhatā ca gambhīrasaṃjñā ca tathaiva dṛṣṭiḥ/ pittena duṣṭena gatena dṛṣṭiṃ pītā bhavedyasya narasya dṛṣṭiḥ// ### [6.7.36](https://indike.org/pramana/in.med.samhita.susruta.6.7.36) pītāni rūpāṇi ca manyate yaḥ sa mānavaḥ pittavidagdhadṛṣṭiḥ/ prāpte tṛtīyaṃ paṭalaṃ tu doṣe divā na paśyenniśi vīkṣate ca// ### [6.7.37](https://indike.org/pramana/in.med.samhita.susruta.6.7.37) (†rātrau sa śītānugṛhītadṛṣṭiḥ pittālpabhāvādapi tāni paśyet)/ tathā naraḥ śleṣmavidagdhadṛṣṭistānyeva śuklāni hi manyate tu// ### [6.7.38](https://indike.org/pramana/in.med.samhita.susruta.6.7.38) triṣu sthitolpaḥ paṭaleṣu doṣo naktāndhyamāpādayati prasahya/ divā sa †sūryānugṛhītacakṣurīkṣeta rūpāṇi kaphālpabhāvāt// ### [6.7.39](https://indike.org/pramana/in.med.samhita.susruta.6.7.39) śokajvarāyāsaśirobhitāpairabhyāhatā yasya narasya dṛṣṭiḥ/ sadhūmakān paśyati sarvabhāvāṃstaṃ dhūmadarśīti vadanti rogam// ### [6.7.40](https://indike.org/pramana/in.med.samhita.susruta.6.7.40) sa †hrasvajāḍyo divaseṣu kṛcchrāddhrasvāni rūpāṇi ca yena paśyet/ vidyotate yena narasya dṛṣṭirdoṣābhipannā nakulasya yadvat// ### [6.7.41](https://indike.org/pramana/in.med.samhita.susruta.6.7.41) citrāṇi rūpāṇi divā sa paśyet sa vai vikāro nakulāndhyasaṃjñaḥ/ dṛṣṭirvirūpā śvasanopasṛṣṭā saṅkucyate+abhyantarataśca yāti// ### [6.7.42](https://indike.org/pramana/in.med.samhita.susruta.6.7.42) rujāvagāḍhā ca tamakṣirogaṃ gambhīriketi pravadanti tajjñāḥ/ bāhyau punardvāviha saṃpradiṣṭau nimittataścāpyanimittataśca// ### [6.7.43](https://indike.org/pramana/in.med.samhita.susruta.6.7.43) nimittatastatra śirobhitāpājjñeyastvabhiṣyandanidarśanaiśca†/ surarṣigandharvamahoragāṇāṃ sandarśanenāpi ca bhāsvarāṇām// ### [6.7.44](https://indike.org/pramana/in.med.samhita.susruta.6.7.44) hanyeta dṛṣṭirmanujasya yasya sa liṅganāśastvanimittasaṃjñaḥ/ tatrākṣi vispaṣṭamivāvabhāti vaidūryavarṇā vimalā ca dṛṣṭiḥ// ### [6.7.45](https://indike.org/pramana/in.med.samhita.susruta.6.7.45) vidīryate sīdati hīyate vā nṛṇāmabhīghātahatā tu dṛṣṭiḥ// ### [6.7.46](https://indike.org/pramana/in.med.samhita.susruta.6.7.46) ityete nayanagatā mayā vikārāḥ saṃkhyātāḥ pṛthagiha ṣaṭ ca saptatiśca/ eteṣāṃ pṛthagiha vistareṇa sarvaṃ vakṣye+ahaṃ tadanu cikitsitaṃ yathāvat// ### [6.7.46\_1](https://indike.org/pramana/in.med.samhita.susruta.6.7.46_1) iti suśrutasaṃhitāyāmuttaratantrāntargate śālākyatantre dṛṣṭigatarogavijñānīyo nāma saptamo+adhyāyaḥ //7// ## Commentaries (1) - [Nibandhasaṅgraha](https://indike.org/pramana/in.med.samhita.susruta!dalhana.138.2) — Ḍalhaṇa, Sanskrit ## Linked texts (4) - [Mādhavanidāna (Rugviniścaya)](https://indike.org/pramana/in.med.sangraha.madhavanidana.63.31) — Mādhavakara, Sanskrit - [Mādhavacikitsā](https://indike.org/pramana/in.med.nidana.madhavacikitsa.71.33) — Mādhava Bhaṭṭa, Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.79.227) — Vaṅgasena, Sanskrit - [Basavarājīya](https://indike.org/pramana/in.med.cikitsa.daksina.basavarajiya.p1942) — Nīlakaṇṭhakoṭṭūru Basavarāja 1500, Sanskrit --- Source: [https://indike.org/pramana/in.med.samhita.susruta.6.7](https://indike.org/pramana/in.med.samhita.susruta.6.7) · Pramāṇa