[Pramāṇa](https://indike.org/pramana/) › [Indian literature](https://indike.org/pramana/in) › [Medicine](https://indike.org/pramana/in.med) › [Later Compendia, Diagnosis and Therapeutics](https://indike.org/pramana/in.med.sangraha) › [Siddhayoga (Vrindamadhava)](https://indike.org/pramana/in.med.sangraha.siddhayoga) › 1 # Siddhayoga (Vrindamadhava) 1 Siddhayoga (Vṛndamādhava) 1 - **Language:** Sanskrit ### [1.1](https://indike.org/pramana/in.med.sangraha.siddhayoga.1.1) dhyātvā śivaṃ paramatattvavicāravedyaṃ caṇḍīmabhīṣṭaphaladāṃ sagaṇaṃ gaṇeśam .. dhanvantariṃ munivaraṃ munisuśrutādīnātreyamugratapasaṃ manasā praṇamya .. 1 .. ### [1.2](https://indike.org/pramana/in.med.sangraha.siddhayoga.1.2) nānāmataprathitadṛṣṭaphalaprayogaiḥ prastāvavākyasahitairiha siddhayogaḥ .. vṛndena mandamatinā''tmahitārthinā'yaṃ saṃlikhyate gadaviniścayajakrameṇa .. 2 .. ### [1.3](https://indike.org/pramana/in.med.sangraha.siddhayoga.1.3) rogamādau parīkṣeta tato'nantaramauṣadham .. tataḥ karma bhiṣakpaścājjñānapūrvaṃ samācaret .. 3 .. ### [1.4](https://indike.org/pramana/in.med.sangraha.siddhayoga.1.4) yastu rogamavijñāya karmāṇyārabhate bhiṣak .. apyauṣadhavidhānajñastasya siddhiryadṛcchayā .. 4 .. ### [1.5](https://indike.org/pramana/in.med.sangraha.siddhayoga.1.5) yastu rogaviśeṣajñaḥ sarvabhaiṣajyakovidaḥ .. deśakālaviśeṣajñastasya siddhirasaṃśayam .. 5 .. ### [1.6](https://indike.org/pramana/in.med.sangraha.siddhayoga.1.6) ādāvante rujāṃ jñāne prayateta cikitsakaḥ .. sādhyāsādhyavibhāgajñastataḥ kuryāccikitsitam .. 6 .. ### [1.7](https://indike.org/pramana/in.med.sangraha.siddhayoga.1.7) nāsti rogo vinā doṣairyasmāttasmādvicakṣaṇaḥ .. anuktamapi doṣāṇāṃ liṅgairvyādhimupācaret .. 7 .. ### [1.8](https://indike.org/pramana/in.med.sangraha.siddhayoga.1.8) vikāranāmākuśalo na jihvīyātkathaṃcana .. na hi sarvavikārāṇāṃ nāmato'sti dhruvā sthitiḥ .. 8 .. ### [1.9](https://indike.org/pramana/in.med.sangraha.siddhayoga.1.9) sa eva kupito doṣaḥ samutthānaviśeṣataḥ .. sthānāntaragataścāpi vikārānkurute bahūn .. 9 .. ### [1.10](https://indike.org/pramana/in.med.sangraha.siddhayoga.1.10) darśanasparśanapraśnairvyādhijñānaṃ tridhā matam .. āyurādi dṛśā sparśācchītādi praśnato'param .. 10 .. ### [1.11](https://indike.org/pramana/in.med.sangraha.siddhayoga.1.11) kṛcchropāyaḥ sukhopāyo dvividhaḥ sādhya ucyate .. asādhyo dvividho jñeyo yāpyo yaścāpratikriyaḥ .. 11 .. ### [1.12](https://indike.org/pramana/in.med.sangraha.siddhayoga.1.12) yāpyāḥ kecitprakṛtyaiva sādhyā yāpyā upekṣayā .. svabhāvādvyādhayo'sādhyāḥ kecidyāpyā upekṣitāḥ .. 12 .. ### [1.13](https://indike.org/pramana/in.med.sangraha.siddhayoga.1.13) sādhyā yāpyatvamāyānti yāpyāścāsādhyatāṃ tathā .. ghnanti prāṇānasādhyāstu narāṇāmakriyāvatām .. 13 .. ### [1.14](https://indike.org/pramana/in.med.sangraha.siddhayoga.1.14) jātamātraścikitsyastu nopekṣyo'lpatayā gadaḥ .. vahniśatruviṣaistulyaḥ svalpo'pi vikarotyasau .. 14 .. ### [1.15](https://indike.org/pramana/in.med.sangraha.siddhayoga.1.15) nivṛtto'pi punarvyādhiḥ svalpenā''yāti hetunā .. kṣīṇe mārgīkṛte doṣe śeṣaḥ sūkṣma ivānalaḥ .. 15 .. ### [1.16](https://indike.org/pramana/in.med.sangraha.siddhayoga.1.16) tasmāttamanubadhnīyātprayogeṇānapāyinā .. yāvanna prakṛtisthaḥ syāddoṣataḥ prāṇatastathā .. 16 .. ### [1.17](https://indike.org/pramana/in.med.sangraha.siddhayoga.1.17) vyādhestattvaparijñānaṃ vedanāyāśca nigrahaḥ .. etadvaidyasya vaidyatvaṃ na vaidyaḥ prabhurāyuṣaḥ .. 17 .. ### [1.18](https://indike.org/pramana/in.med.sangraha.siddhayoga.1.18) karmajā vyādhayaḥ keciddoṣajāḥ santi cāpare .. karmadoṣodbhavāścānye karmajāsteṣvahetukāḥ .. 18 .. ### [1.19](https://indike.org/pramana/in.med.sangraha.siddhayoga.1.19) yathāśāstraṃ sunirṇīto yathāvyādhi cikitsitaḥ .. na śamaṃ yāti yo vyādhiḥ sa jñeyaḥ karmajo budhaiḥ .. svalpadoṣo garīyānyaḥ sa jñeyaḥ karmadoṣajaḥ .. 19 .. ### [1.20](https://indike.org/pramana/in.med.sangraha.siddhayoga.1.20) karmakṣayātkarmakṛto doṣajaḥ svaśamauṣadhaiḥ .. karmadoṣodbhavo yāti karmadoṣakṣayātkṣayam .. 20 .. ### [1.21](https://indike.org/pramana/in.med.sangraha.siddhayoga.1.21) yathā viṣaṃ yathā śastraṃ yathā'gniraśaniryathā .. tathauṣadhamavijñātaṃ vijñātamamṛtaṃ yathā .. 21 .. ### [1.22](https://indike.org/pramana/in.med.sangraha.siddhayoga.1.22) yābhiḥ kriyābhirjāyante śarīre dhātavaḥ samāḥ .. sā cikitsā vikārāṇāṃ karma tadbhiṣajāṃ matam .. 22 .. ### [1.23](https://indike.org/pramana/in.med.sangraha.siddhayoga.1.23) utpadyate hi sā'vasthā deśakālabalaṃ prati .. yasyāṃ kāryamakāryaṃ syātkarma kāryaṃ vivarjitam .. 23 .. ### [1.24](https://indike.org/pramana/in.med.sangraha.siddhayoga.1.24) svedāvarodhaḥ saṃtāpaḥ sarvāṃgagrahaṇaṃ tathā .. yugapadyatra roge tu sa jvaro vyapadiśyate .. 24 .. ### [1.25](https://indike.org/pramana/in.med.sangraha.siddhayoga.1.25) āmāśayastho hatvā'gniṃ sāmo mārgānpidhāya ca .. vidadhāti jvaraṃ doṣastasmāllaṅghanamācaret .. 25 .. ### [1.26](https://indike.org/pramana/in.med.sangraha.siddhayoga.1.26) No verses of the Siddhayoga on this page. The commentary Kusumāvali was not digitized. ### [1.27](https://indike.org/pramana/in.med.sangraha.siddhayoga.1.27) laṅghanena kṣayaṃ nīte doṣe saṃdhukṣite'nale .. vijvaratvaṃ laghutvaṃ ca kṣuccaivāsyopajāyate .. 26 .. ### [1.28](https://indike.org/pramana/in.med.sangraha.siddhayoga.1.28) sadyo bhuktasya saṃjāte jvare sāme viśeṣataḥ .. vamanaṃ vamanārhasya śastamityāha vāgbhaṭaḥ .. 27 .. ### [1.29](https://indike.org/pramana/in.med.sangraha.siddhayoga.1.29) anutkliṣṭeṣu doṣeṣu mohādyastaruṇe vamet .. prāpnuyātso'ṅgabhaṅgādīnhṛdrogaviṣamajvarān .. 28 .. ### [1.30](https://indike.org/pramana/in.med.sangraha.siddhayoga.1.30) anavasthitadoṣāgnerlaṅghanaṃ doṣapācanam .. jvaraghnaṃ dīpanaṃ kāṅkṣārucilāghavakārakam .. 29 .. ### [1.31](https://indike.org/pramana/in.med.sangraha.siddhayoga.1.31) vamitaṃ laṅghayetprājño laṅghitaṃ na tu vāmayet .. vamanaṃ kleśabāhulyāddhanyāllaṅghanakarśitam .. 30 .. ### [1.32](https://indike.org/pramana/in.med.sangraha.siddhayoga.1.32) avekṣya doṣaṃ prāṇaṃ ca kāryaṃ syādapatarpaṇam .. 31 .. ### [1.33](https://indike.org/pramana/in.med.sangraha.siddhayoga.1.33) taddhi mārutakṣuttṛṣṇāmukhaśoṣabhramānvite .. kāryaṃ na bāle vṛddhe vā na garbhiṇyāṃ na durbale .. na tathā'dhvaśramakrodhaśokakāmakṣayajvare .. 32 .. ### [1.34](https://indike.org/pramana/in.med.sangraha.siddhayoga.1.34) balāvirodhinā cainaṃ laṅghanenopapādayet .. balādhiṣṭhānamārogyaṃ yadartho'yaṃ kriyākramaḥ .. 33 .. ### [1.35](https://indike.org/pramana/in.med.sangraha.siddhayoga.1.35) vātamūtrapurīṣāṇāṃ visarge gātralāghave .. hṛdayodgārakaṇṭhāsyaśuddhau tandrāklame gate .. 34 .. ### [1.36](https://indike.org/pramana/in.med.sangraha.siddhayoga.1.36) svede jāte rucau vā'pi kṣutpipāsāsahodaye .. kṛtaṃ laṅghanamādeśyaṃ nirvyathe cāntarātmani .. 35 .. ### [1.37](https://indike.org/pramana/in.med.sangraha.siddhayoga.1.37) parvabhedo'ṅgamardaśca kāsaḥ śoṣo mukhasya ca .. kṣutpraṇāśo'rucistṛṣṇā daurbalyaṃ śrotranetrayoḥ .. 36 .. ### [1.38](https://indike.org/pramana/in.med.sangraha.siddhayoga.1.38) manasaḥ saṃbhramo'bhīkṣṇamūrdhvavātastamo hṛdi .. dehāgnibalahāniśca laṅghane'tikṛte bhavet .. 37 .. ### [1.39](https://indike.org/pramana/in.med.sangraha.siddhayoga.1.39) vinā'pi bheṣajairvyādhiḥ pathyādeva nivartate .. na tu pathyavihīnasya bheṣajānāṃ śatairapi .. 38 .. ### [1.40](https://indike.org/pramana/in.med.sangraha.siddhayoga.1.40) raktaśālyādayaḥ śastāḥ purāṇāḥ ṣaṣṭikaiḥ saha .. yavāgvodanalājāśca jvaritānāṃ jvarāpahāḥ .. 39 .. ### [1.41](https://indike.org/pramana/in.med.sangraha.siddhayoga.1.41) dīpanī pācanī laghvī jvarārtānāṃ jvarāpahā .. annakāle hitā peyā yathāsvaṃ pācanaiḥ kṛtā .. 40 .. ### [1.42](https://indike.org/pramana/in.med.sangraha.siddhayoga.1.42) dāhacchardyarditaṃ kṣāmaṃ nirannaṃ tṛṣṇayā'nvitam .. śarkarāmadhusaṃyuktaṃ pāyayellājatarpaṇam .. 41 .. ### [1.43](https://indike.org/pramana/in.med.sangraha.siddhayoga.1.43) śramopavāsānilaje hito nityaṃ rasaudanaḥ .. 42 .. ### [1.44](https://indike.org/pramana/in.med.sangraha.siddhayoga.1.44) mudgayūṣaudanaścāpi deyaḥ kaphasamutthite .. sa eva sitayā yuktaḥ śītaḥ pittajvare hitaḥ .. 43 .. ### [1.45](https://indike.org/pramana/in.med.sangraha.siddhayoga.1.45) mudgāmalakayūṣastu vātapittātmake hitaḥ .. hrasvamūlakayūṣastu kaphavātātmake hitaḥ .. 44 .. ### [1.46](https://indike.org/pramana/in.med.sangraha.siddhayoga.1.46) nimbakūlakayūṣastu hitaḥ pittakaphātmake .. yathāsvaṃ pācanaiḥ siddhaṃ vātapittakaphātmake .. 45 .. ### [1.47](https://indike.org/pramana/in.med.sangraha.siddhayoga.1.47) laghunā pañcamūlena pippalyā saha dhānyayā .. mahatyā pañcamūlyā tu vyāghrīduḥsparśagokṣuraiḥ .. 46 .. ### [1.48](https://indike.org/pramana/in.med.sangraha.siddhayoga.1.48) siddhāni bhiṣagannāni prayuñjīta yathākramam .. vātapitte śleṣmapitte kaphavāte tridoṣaje .. 47 .. ### [1.49](https://indike.org/pramana/in.med.sangraha.siddhayoga.1.49) kvāthyadravyāñjaliṃ kṣuṇṇaṃ śrapayitvā jalāḍhake .. ardhaśṛtena tenātha yavāgvādyupakalpayet .. 48 .. ### [1.50](https://indike.org/pramana/in.med.sangraha.siddhayoga.1.50) vṛddhavaidyāḥ palaṃ dravyaṃ grāhayantyāḍhake'mbhasi .. bheṣajasyātibāhulyātkadācidarucirbhavet .. 49 .. ### [1.51](https://indike.org/pramana/in.med.sangraha.siddhayoga.1.51) yadapsu śṛtaśītāsu ṣaḍaṅgādi prayujyate .. karṣamātraṃ tato dravyaṃ sādhayetprāsthike'mbhasi .. ardhaśṛtaṃ prayoktavyaṃ pāne peyādisaṃvidhau .. 50 .. ### [1.52](https://indike.org/pramana/in.med.sangraha.siddhayoga.1.52) karṣārdhaṃ vā kaṇāśuṇṭhyoḥ kalkadravyasya vā palam .. 51 .. ### [1.53](https://indike.org/pramana/in.med.sangraha.siddhayoga.1.53) vinīya pācayedyuktyā vāri prasthena cāparān .. yūṣānnarasakāṃścaiva kalpenānena sādhayet .. 52 .. ### [1.54](https://indike.org/pramana/in.med.sangraha.siddhayoga.1.54) kaphavātajvare deyaṃ jalamuṣṇaṃ pipāsave .. pittamadyaviṣottheṣu tiktakaiḥ śṛtaśītalam .. 53 .. ### [1.55](https://indike.org/pramana/in.med.sangraha.siddhayoga.1.55) mustāparpaṭakośīracandanodīcyanāgaraiḥ .. śṛtaśītaṃ jalaṃ dadyātpipāsājvaraśāntaye .. 54 .. ### [1.56](https://indike.org/pramana/in.med.sangraha.siddhayoga.1.56) pādaśiṣṭaḥ kaṣāyaḥ syādyaḥ ṣoḍaśaguṇāmbhasā .. kvathito'taḥ ṣaḍaṅgādirna niṣiddho navajvare .. 55 .. ### [1.57](https://indike.org/pramana/in.med.sangraha.siddhayoga.1.57) arucau mātuluṅgasya kesaraṃ sājyasaindhavam .. dhātrīdrākṣāsitānāṃ vā kalkamāsyena dhārayet .. 56 .. ### [1.58](https://indike.org/pramana/in.med.sangraha.siddhayoga.1.58) jvarito hitamaśnīyādyadyapyasyārucirbhavet .. annakāle hyabhuñjānaḥ kṣīyate mriyate'pi vā .. 57 .. ### [1.59](https://indike.org/pramana/in.med.sangraha.siddhayoga.1.59) gurvabhiṣyandyakāle ca jvarī nādyātkathaṃcana .. na tu tasyāhitaṃ bhuktamāyuṣe vā sukhāya vā .. 58 .. ### [1.60](https://indike.org/pramana/in.med.sangraha.siddhayoga.1.60) jvaritaṃ jvaramuktaṃ vā dinānte bhojayellaghu .. śleṣmakṣayavivṛddhoṣmā balavānanalastadā .. 59 .. ### [1.61](https://indike.org/pramana/in.med.sangraha.siddhayoga.1.61) sātatyātsvādvabhāvācca pathyaṃ dveṣyatvamāgatam .. kalpanāvidhibhistaistaiḥ priyatvaṃ gamayetpunaḥ .. 60 .. ### [1.62](https://indike.org/pramana/in.med.sangraha.siddhayoga.1.62) pariṣekānpradehāṃśca snehānsaṃśodhanāni ca .. divāsvapnaṃ vyavāyaṃ ca vyāyāmaṃ śiśiraṃ jalam .. krodhapravātabhojyāni varjayettaruṇajvarī .. 61 .. ### [1.63](https://indike.org/pramana/in.med.sangraha.siddhayoga.1.63) śoṣacchardirmado mūrchā bhramastṛṣṇā hyarocakaḥ .. prāpnotyupadravānetānpariṣekādisevanāt .. 62 .. ### [1.64](https://indike.org/pramana/in.med.sangraha.siddhayoga.1.64) āsaptarātrāttaruṇaṃ jvaramāhurmanīṣiṇaḥ .. madhyaṃ caturdaśāhaṃ tu purāṇamata uttaram .. 63 .. ### [1.65](https://indike.org/pramana/in.med.sangraha.siddhayoga.1.65) mṛdau jvare laghau dehe pracaleṣu maleṣu ca .. pakvaṃ doṣaṃ vijānīyājjvare deyaṃ tadauṣadham .. 64 .. ### [1.66](https://indike.org/pramana/in.med.sangraha.siddhayoga.1.66) doṣaprakṛtivaikṛtyādekeṣāṃ pakvalakṣaṇam .. 65 .. ### [1.67](https://indike.org/pramana/in.med.sangraha.siddhayoga.1.67) vātikaḥ saptarātreṇa daśarātreṇa paittikaḥ .. ślaiṣmiko dvādaśāhena jvaraḥ pākaṃ niyacchati .. 66 .. ### [1.68](https://indike.org/pramana/in.med.sangraha.siddhayoga.1.68) pakvo hyanirhṛto doṣo dehe tiṣṭhanmahātyayam .. viṣamaṃ vā jvaraṃ kuryādbalavyāpadameva vā .. 67 .. ### [1.69](https://indike.org/pramana/in.med.sangraha.siddhayoga.1.69) saptarātrātparaṃ kecinmanyante deyamauṣadham .. daśarātrātparaṃ keciddātavyamiti niścitāḥ .. 68 .. ### [1.70](https://indike.org/pramana/in.med.sangraha.siddhayoga.1.70) No verses of the Siddhayoga on this page. The commentary Kusumāvali was not digitized. ### [1.71](https://indike.org/pramana/in.med.sangraha.siddhayoga.1.71) na kaṣāyaṃ praśaṃsanti narāṇāṃ taruṇajvare .. kaṣāyeṇā''kulībhūtā doṣā jetuṃ sudustarāḥ .. 69 .. ### [1.72](https://indike.org/pramana/in.med.sangraha.siddhayoga.1.72) na tu kalpanamuddiśya kaṣāyaḥ pratiṣidhyate .. yaḥ kaṣāyaḥ kaṣāyaḥ syātsa varjyastaruṇajvare .. 70 .. ### [1.73](https://indike.org/pramana/in.med.sangraha.siddhayoga.1.73) doṣā baddhāḥ kaṣāyeṇa stambhitvāttaruṇajvare .. stabhyante na vipacyante kurvanti viṣamajvaram .. 71 .. ### [1.74](https://indike.org/pramana/in.med.sangraha.siddhayoga.1.74) pāyayeddoṣaharaṇaṃ mohādāmajvare tu yaḥ .. sa suptaṃ kṛṣṇasarpaṃ tu karāgreṇa parāmṛśet .. 72 .. ### [1.75](https://indike.org/pramana/in.med.sangraha.siddhayoga.1.75) pītāmburlaṅghitaḥ kṣīṇo'jīrṇī bhuktaḥ pipāsitaḥ .. na pibedauṣadhaṃ jantuḥ saṃśodhanamathetarat .. 73 .. ### [1.76](https://indike.org/pramana/in.med.sangraha.siddhayoga.1.76) roge śodhanasādhye tu yaṃ vidyāddoṣadurbalam .. taṃ samīkṣya bhiṣakkuryāddoṣapracyāvanaṃ mṛdu .. 74 .. ### [1.77](https://indike.org/pramana/in.med.sangraha.siddhayoga.1.77) cale doṣe mṛdau koṣṭhe nekṣetātra balaṃ nṛṇām .. avyāpaddurbalasyāpi śodhanaṃ hi tadā bhavet .. 75 .. ### [1.78](https://indike.org/pramana/in.med.sangraha.siddhayoga.1.78) dvicatvāriṃśatā māṣairaṣṭādaśanibaddhakaiḥ .. palaṃ dvādaśabaddhaṃ syādguñjāṣaṭkasamanvitaiḥ .. 76 .. ### [1.79](https://indike.org/pramana/in.med.sangraha.siddhayoga.1.79) uttamasya palaṃ mātrā tribhiścākṣaiśca madhyame .. jaghanyasya palārdhena snehakvāthyauṣadheṣu ca .. 77 .. ### [1.80](https://indike.org/pramana/in.med.sangraha.siddhayoga.1.80) kvāthyadravyapale vāri dviraṣṭaguṇabhiṣyate .. caturbhāgāvaśiṣṭaṃ tu peyaṃ palacatuṣṭayam .. 78 .. ### [1.81](https://indike.org/pramana/in.med.sangraha.siddhayoga.1.81) dīptānalaṃ mahākāyaṃ pāyayantyañjaliṃ jalam .. anye tvardhaṃ parityajya prasṛtiṃ tu cikitsakāḥ .. 79 .. ### [1.82](https://indike.org/pramana/in.med.sangraha.siddhayoga.1.82) kvāthatyāgamanicchantastvaṣṭabhāgāvaśeṣitam .. pāraṃparyopadeśena vṛddhavaidyāḥ paladvayam .. 80 .. ### [1.83](https://indike.org/pramana/in.med.sangraha.siddhayoga.1.83) pāyayedāturaṃ sāmaṃ pācanaṃ saptame dine .. śamanenāthavā dṛṣṭvā nirāmaṃ tamupācaret .. 81 .. ### [1.84](https://indike.org/pramana/in.med.sangraha.siddhayoga.1.84) nāgaraṃ devakāṣṭhaṃ ca dhānyakaṃ bṛhatīdvayam .. dadyātpācanakaṃ pūrvaṃ sarvajvareṣu pācanam .. 82 .. ### [1.85](https://indike.org/pramana/in.med.sangraha.siddhayoga.1.85) vīryādhikaṃ bhavati bheṣajamannahīnaṃ hanyāttadāmayamasaṃśayamāśu caiva .. tadbālavṛddhavanitāmṛdavo'tha pītvā glāniṃ parāṃ samupayānti balakṣayaṃ ca .. 83 .. ### [1.86](https://indike.org/pramana/in.med.sangraha.siddhayoga.1.86) anulomānilaḥ svāsthyaṃ kṣuttṛṣṇā sumanaskatā .. laghutvamindriyodgāraśuddhirjīrṇauṣadhākṛtiḥ .. 84 .. ### [1.87](https://indike.org/pramana/in.med.sangraha.siddhayoga.1.87) klamo dāho'ṅgasadanaṃ bhramo mūrchā śirorujā .. aratirbalahāniśca sāvaśeṣauṣadhākṛtiḥ .. 85 .. ### [1.88](https://indike.org/pramana/in.med.sangraha.siddhayoga.1.88) auṣadhaśeṣe bhuktaṃ pītaṃ ca tathauṣadhaṃ hi śeṣe'nne .. na karoti gadopaśamaṃ prakopayatyanyarogāṃśca .. 86 .. ### [1.89](https://indike.org/pramana/in.med.sangraha.siddhayoga.1.89) śīghraṃ vipākamupayāti balaṃ na hiṃsyādannāvṛtaṃ na ca muhurvadanānnireti .. prāgbhaktasevitamathauṣadhametadeva dadyācca vṛddhaśiśubhīruvarāṅganābhyaḥ .. 87 .. ### [1.90](https://indike.org/pramana/in.med.sangraha.siddhayoga.1.90) bilvādipañcamūlāmbu pācanaṃ vātike jvare .. na śodhayati yaddoṣānsamānnodīrayatyapi .. samī karoti yatkruddhāṃstatsaṃśamanamucyate .. 88 .. ### [1.91](https://indike.org/pramana/in.med.sangraha.siddhayoga.1.91) kirātābdāmṛtodīcyabṛhatīdvayagokṣuraiḥ .. sasthirākalaśīviśvaiḥ kvātho vātajvarāpahaḥ .. 89 .. ### [1.92](https://indike.org/pramana/in.med.sangraha.siddhayoga.1.92) pippalīsārivādrākṣāśatapuṣpāhareṇubhiḥ .. kṛtaḥ kaṣāyaḥ saguḍo hanyācchvasanajaṃ jvaram .. 90 .. ### [1.93](https://indike.org/pramana/in.med.sangraha.siddhayoga.1.93) guḍūcīsārivādrākṣāśatapuṣpāpunarnavāḥ .. saguḍo'yaṃ kaṣāyaḥ syādvātajvaravināśanaḥ .. 91 .. ### [1.94](https://indike.org/pramana/in.med.sangraha.siddhayoga.1.94) drākṣāguḍūcīkāśmaryatrāyamāṇāḥ sasārivāḥ .. niṣkvāthya saguḍaṃ kvāthaṃ pibedvātajvarāpaham .. 92 .. ### [1.95](https://indike.org/pramana/in.med.sangraha.siddhayoga.1.95) sakṣaudraṃ pācanaṃ paitte tiktābdendrayavaiḥ kṛtam .. 93 .. ### [1.96](https://indike.org/pramana/in.med.sangraha.siddhayoga.1.96) lodhrotpalāmṛtāpadmasārivāṇāṃ saśarkaraḥ .. kvāthaḥ pittajvaraṃ hanyādathavā parpaṭodbhavaḥ .. 94 .. ### [1.97](https://indike.org/pramana/in.med.sangraha.siddhayoga.1.97) durālabhāparpaṭakapriyaṅgūbhūnimbavāsākaṭurohiṇīnām .. jalaṃ pibeccharkarayā'vagāḍhaṃ tṛṣṇāsrapittajvaradāhayuktaḥ .. 95 .. ### [1.98](https://indike.org/pramana/in.med.sangraha.siddhayoga.1.98) paṭolayavaniṣkvātho madhunā madhurīkṛtaḥ .. tīvrapittajvarāmardī pānāttṛḍdāhanāśanaḥ .. 96 .. ### [1.99](https://indike.org/pramana/in.med.sangraha.siddhayoga.1.99) ekaḥ parpaṭakaḥ śreṣṭhaḥ pittajvaranivarhaṇaḥ .. kiṃ punaryadi yujyeta candanodīcyanāgaraiḥ .. 97 .. ### [1.100](https://indike.org/pramana/in.med.sangraha.siddhayoga.1.100) viśvāmbuparpaṭośīraghanacandanasādhitam .. dadyātsuśītalaṃ vāri tṛṭchardijvaradāhanut .. 98 .. ### [1.101](https://indike.org/pramana/in.med.sangraha.siddhayoga.1.101) parpaṭāmṛtadhātrīṇāṃ kvāthaḥ pittajvaraṃ jayet .. drākṣāragvadhayoścāpi kāśmaryasyāthavā punaḥ .. 99 .. ### [1.102](https://indike.org/pramana/in.med.sangraha.siddhayoga.1.102) drākṣābhayāparpaṭakābdatiktākvāthaṃ saśamyākaphalaṃ vidadhyāt .. pralāpamūrchābhramadāhaśoṣatṛṣṇānvite pittabhave jvare ca .. 100 .. ### [1.103](https://indike.org/pramana/in.med.sangraha.siddhayoga.1.103) paryuṣitaṃ dhānyajalaṃ prātaḥ pītaṃ saśarkaraṃ puṃsām .. antardāhaṃ śamayetpravṛddhamapi tatkṣaṇādeva .. 101 .. ### [1.104](https://indike.org/pramana/in.med.sangraha.siddhayoga.1.104) amlapiṣṭaiḥ suśītairvā palāśatarujairdihet .. badarīpallavotthena phenenāriṣṭakasya ca .. 102 .. ### [1.105](https://indike.org/pramana/in.med.sangraha.siddhayoga.1.105) vidārī dāḍimaṃ lodhraṃ dadhitthaṃ bījapūrakam .. ebhiḥ pradihyānmūrdhānaṃ tṛḍdāhārtasya dehinaḥ .. 103 .. ### [1.106](https://indike.org/pramana/in.med.sangraha.siddhayoga.1.106) uttānasuptasya gabhīratāmrakāṃsyādipātraṃ praṇidhāya nābhau .. tatrāmbudhārā bahalā patantī nihanti dāhaṃ tvaritaṃ suśītā .. 104 .. ### [1.107](https://indike.org/pramana/in.med.sangraha.siddhayoga.1.107) vāpyaḥ kamalahāsinyo dalayantragṛhāḥ śubhāḥ .. nāryaścandanadigdhāṅgyo dāhadainyaharā matāḥ .. 105 .. ### [1.108](https://indike.org/pramana/in.med.sangraha.siddhayoga.1.108) harmye śubhrābhrasaṃkāśe śaśāṅkakaraśītale .. malayodakasikte vā svapyātpittajvarī naraḥ .. 106 .. ### [1.109](https://indike.org/pramana/in.med.sangraha.siddhayoga.1.109) jihvātālugalaklomaśoṣe mūrdhni tu dāpayet .. kesaraṃ mātuluṅgasya madhusaindhavasaṃyutam .. 107 .. ### [1.110](https://indike.org/pramana/in.med.sangraha.siddhayoga.1.110) pippalyādikaṣāyaṃ tu pācanaṃ kaphaje jvare .. kuṣṭhamindrayavaṃ mūrvā paṭolaṃ cāpi sādhitam .. pibenmaricasaṃyuktaṃ sakṣaudraṃ ślaiṣmike jvare .. 108 .. ### [1.111](https://indike.org/pramana/in.med.sangraha.siddhayoga.1.111) triphalā paṭolavāsā chinnaruhā tiktarohiṇī ca ṣaḍgranthā .. madhunā śleṣmasamutthe daśamūlīvāsakasya vā kvāthaḥ .. 109 .. ### [1.112](https://indike.org/pramana/in.med.sangraha.siddhayoga.1.112) mātrākṣaudraghṛtādīnāṃ kvāthasneheṣu cūrṇavat .. 110 .. ### [1.113](https://indike.org/pramana/in.med.sangraha.siddhayoga.1.113) āmalakyabhayā kṛṣṇā citrakaścetyayaṃ gaṇaḥ .. sarvajvarakaphātaṅkabhedī dīpanapācanaḥ .. 111 .. ### [1.114](https://indike.org/pramana/in.med.sangraha.siddhayoga.1.114) kaṭphalaṃ pauṣkaraṃ śṛṅgī kṛṣṇā ca madhunā saha .. śvāsakāsajvaraharaḥ śreṣṭho lehaḥ kaphāntakṛt .. 112 .. ### [1.115](https://indike.org/pramana/in.med.sangraha.siddhayoga.1.115) kṣaudropakulyāsaṃyogaḥ kāsaśvāsajvarāpahaḥ .. plīhānaṃ hanti hikkāṃ ca bālānāṃ tu praśasyate .. 113 .. ### [1.116](https://indike.org/pramana/in.med.sangraha.siddhayoga.1.116) karṣaścūrṇasya kalkasya guṭikānāṃ tu sarvaśaḥ .. dravaśuktyā'valeḍhavyaḥ pātavyaśca caturdravaḥ .. 114 .. ### [1.117](https://indike.org/pramana/in.med.sangraha.siddhayoga.1.117) mātrāyā nāstyavasthānaṃ doṣamagniṃ balaṃ vayaḥ .. vyādhiṃ dravyaṃ ca koṣṭhaṃ ca vīkṣya mātrāṃ prayojayet .. 115 .. ### [1.118](https://indike.org/pramana/in.med.sangraha.siddhayoga.1.118) saṃsṛṣṭadoṣeṣu hitaṃ saṃsṛṣṭamatha pācanam .. triphalāśālmalīrāsnārājavṛkṣāṭarūṣakaiḥ .. śṛtamambu harettūrṇaṃ vātapittodbhavaṃ jvaram .. 116 .. ### [1.119](https://indike.org/pramana/in.med.sangraha.siddhayoga.1.119) viśvāmṛtābdabhūnimbaiḥ pañcamūlīsāmanvitaiḥ .. kṛtaḥ kaṣāyo hantyāśu vātapittodbhavaṃ jvaram .. 17 .. ### [1.120](https://indike.org/pramana/in.med.sangraha.siddhayoga.1.120) kirātatiktamamṛtāṃ drākṣāmāmalakīṃ śaṭhīm .. niṣkvāthya pittānilaje tatkvāthaṃ saguḍaṃ pibet .. 118 .. ### [1.121](https://indike.org/pramana/in.med.sangraha.siddhayoga.1.121) nidigdhikābalārāsnātrāyamāṇāmṛtāyutaiḥ .. masūravidalaiḥ kvātho vātapittajvaraṃ jayet .. 119 .. ### [1.122](https://indike.org/pramana/in.med.sangraha.siddhayoga.1.122) guḍūcī parpaṭaṃ mustaṃ kirātaṃ viśvabheṣajam .. vātapittajvare deyaṃ pañcabhadramidaṃ śubham .. 120 .. ### [1.123](https://indike.org/pramana/in.med.sangraha.siddhayoga.1.123) kirātaṃ nāgaraṃ mustaṃ guḍūcīṃ ca kaphādhike .. pāṭhodīcyamṛṇālaiśca saha pittādhike pibet .. 121 .. ### [1.124](https://indike.org/pramana/in.med.sangraha.siddhayoga.1.124) kaṇṭakāryamṛtābhārṅgīnāgarendrayavāsakam .. bhūnimbaṃ candanaṃ mustaṃ paṭolaṃ kaṭurohiṇī .. 122 .. ### [1.125](https://indike.org/pramana/in.med.sangraha.siddhayoga.1.125) kaṣāyaṃ pāyayedenaṃ pittaśleṣmajvarāpaham .. dāhatṛṣṇājvaracchardikāsahṛtpārśvaśūlanut .. 123 .. ### [1.126](https://indike.org/pramana/in.med.sangraha.siddhayoga.1.126) guḍūcīnimbadhānyākaṃ candanaṃ padmakāni ca .. 124 .. ### [1.127](https://indike.org/pramana/in.med.sangraha.siddhayoga.1.127) eṣa sarvajvarānhanti guḍūcyādistu dīpanaḥ .. hṛllāsārocakacchardiḥpipāsādāhanāśanaḥ .. 125 .. ### [1.128](https://indike.org/pramana/in.med.sangraha.siddhayoga.1.128) paṭolaṃ candanaṃ mūrvāpāṭhātiktāmṛtāgaṇaḥ .. pittaśleṣmajvaracchardidāhakaṇḍūviṣāpahaḥ .. 126 .. ### [1.129](https://indike.org/pramana/in.med.sangraha.siddhayoga.1.129) sapatrapuṣpavāsāyā rasaḥ kṣaudrasitāyutaḥ .. kaphapittajvaraṃ hanti sāsṛkpittaṃ sakāmalam .. 127 .. ### [1.130](https://indike.org/pramana/in.med.sangraha.siddhayoga.1.130) saśarkarāmakṣamātrāṃ kaṭukāmuṣṇavāriṇā .. pītvā jvaraṃ jayejjantuḥ kaphapittasamudbhavam .. 128 .. ### [1.131](https://indike.org/pramana/in.med.sangraha.siddhayoga.1.131) paṭolaṃ picumandaṃ ca triphalāṃ madhukaṃ balām .. sādhito'yaṃ kaṣāyaḥ syātpittaśleṣmodbhave jvare .. 129 .. ### [1.132](https://indike.org/pramana/in.med.sangraha.siddhayoga.1.132) dīpanaṃ kaphavicchedi pittavātānulomanam .. jvaraghnaṃ pācanaṃ bhedi śṛtaṃ dhānyapaṭolayoḥ .. 130 .. ### [1.133](https://indike.org/pramana/in.med.sangraha.siddhayoga.1.133) kharparabhṛṣṭapaṭasthitakāñjikasikto hi vālukāsvedaḥ .. śamayati vātakaphāmayamastakaśūlāṅgabhaṅgādīn .. 131 .. ### [1.134](https://indike.org/pramana/in.med.sangraha.siddhayoga.1.134) srotasāṃ mārdavaṃ kṛtvā nītvā pāvakamāśayam .. hatvā vātakaphastambhaṃ svedo jvaramapohati .. 132 .. ### [1.135](https://indike.org/pramana/in.med.sangraha.siddhayoga.1.135) mātuluṅgaphalakesaro dhṛtaḥ sindhujanmamaricānvito mukhe .. hanti vātakapharogamāsyagaṃ śoṣamāśujaḍatāmarocakam .. 133 .. ### [1.136](https://indike.org/pramana/in.med.sangraha.siddhayoga.1.136) pippalīpippalīmūlacavyacitrakanāgaraiḥ .. dīpanīyaḥ smṛto vargaḥ kaphānilagadāpahaḥ .. 134 .. ### [1.137](https://indike.org/pramana/in.med.sangraha.siddhayoga.1.137) āragvadhagranthikamustatiktāharītakībhiḥ kvathitaḥ kaṣāyaḥ .. sāme saśūle kaphavātayukte jvare hito dīpanapācanaśca .. 135 .. ### [1.138](https://indike.org/pramana/in.med.sangraha.siddhayoga.1.138) pippalībhiḥ śṛtaṃ toyamanabhiṣyandi dīpanam .. vātaśleṣmavikāraghnaṃ plīhaghnaṃ jvaranāśanam .. 136 .. ### [1.139](https://indike.org/pramana/in.med.sangraha.siddhayoga.1.139) mustaparpaṭadusparśaguḍūcīviśvabheṣajam .. kaphavātārucicchardidāhaśoṣajvarāpaham .. 137 .. ### [1.140](https://indike.org/pramana/in.med.sangraha.siddhayoga.1.140) kṣudrāmṛtānāgarapuṣkarāhvayaiḥ kṛtaḥ kaṣāyaḥ kaphamārutottare .. saśvāsakāsārucipārśvarukkare jvare tridoṣaprabhave'pi śasyate .. 138 .. ### [1.141](https://indike.org/pramana/in.med.sangraha.siddhayoga.1.141) daśamūlīrasaḥ peyaḥ kaṇāyuktaḥ kaphānile .. avipāke'tinidrāyāṃ pārśvarukśvāsakāsake .. 139 .. ### [1.142](https://indike.org/pramana/in.med.sangraha.siddhayoga.1.142) śleṣmanigrahamevā''dau kuryādvyādhau tridoṣaje .. niraste śleṣmaṇi hyasya srotaḥsūddhāṭiteṣu ca .. lāghavaṃ jāyate sadyastandrā caivopaśāmyati .. 140 .. ### [1.143](https://indike.org/pramana/in.med.sangraha.siddhayoga.1.143) durge'mbhasi yathā majjadbhājanaṃ tvarayā budhaḥ .. gṛhṇīyāttalamaprāptaṃ tathā'bhinyāsapīḍitam .. 141 .. ### [1.144](https://indike.org/pramana/in.med.sangraha.siddhayoga.1.144) nidropetamabhinyāsaṃ kṣīṇaṃ vidyāddhataujasam .. 142 .. ### [1.145](https://indike.org/pramana/in.med.sangraha.siddhayoga.1.145) laṅghanaṃ vālukāsvedo nasyaṃ niṣṭhīvanaṃ tathā .. avaleho'ñjanaṃ caiva prākprayojyaṃ tridoṣaje .. 143 .. ### [1.146](https://indike.org/pramana/in.med.sangraha.siddhayoga.1.146) trirātraṃ pañcarātraṃ vā daśarātramathāpi vā .. laṅghanaṃ saṃnipāteṣu kuryādārogyadarśanāt .. 144 .. ### [1.147](https://indike.org/pramana/in.med.sangraha.siddhayoga.1.147) doṣāṇāmeva sā śaktirlaṅghane yā sahiṣṇutā .. na tu doṣakṣaye kaścitsahate laṅghanādikam .. 145 .. ### [1.148](https://indike.org/pramana/in.med.sangraha.siddhayoga.1.148) kaphapitte drave dhātū sahete laṅghanaṃ mahat .. āmakṣayādūrdhvamapi vāyurna sahate kṣaṇam .. 146 .. ### [1.149](https://indike.org/pramana/in.med.sangraha.siddhayoga.1.149) ārdrakasvarasopetaṃ saindhavaṃ kaṭukatrayam .. ākaṇṭhaṃ dhārayedāsye niṣṭhīvecca punaḥ punaḥ .. 147 .. ### [1.150](https://indike.org/pramana/in.med.sangraha.siddhayoga.1.150) tenāsya hṛdgataḥ śleṣmā manyāpārśvaśirogalāt .. līno'pyākṛṣyate śuṣko lāghavaṃ cāsya jāyate .. 148 .. ### [1.151](https://indike.org/pramana/in.med.sangraha.siddhayoga.1.151) parvabhedo jvaro mūrchā nidrākāsagalāmayāḥ .. mukhākṣigauravaṃ jāḍyamutkleśaścopaśāmyati .. 149 .. ### [1.152](https://indike.org/pramana/in.med.sangraha.siddhayoga.1.152) sakṛddvitricatuḥ kuryāddṛṣṭvā doṣabalābalam .. etaddhi paramaṃ prāhurbheṣajaṃ saṃnipātinām .. 150 .. ### [1.153](https://indike.org/pramana/in.med.sangraha.siddhayoga.1.153) mātuluṅgārdrakarasaṃ koṣṇaṃ trilavaṇānvitam .. anyadvā siddhivihitaṃ nasyaṃ tīkṣṇaṃ prayojayet .. 151 .. ### [1.154](https://indike.org/pramana/in.med.sangraha.siddhayoga.1.154) tena prabhidyate śleṣmā prabhinnaśca prasicyate .. śirotdṛdayakaṇṭhāsyapārśvarukcopaśāmyati .. 152 .. ### [1.155](https://indike.org/pramana/in.med.sangraha.siddhayoga.1.155) madhūkasārasindhūtthavacoṣaṇakaṇāḥ samāḥ .. ślakṣṇaṃ piṣṭvā'mbhasā nasyaṃ kuryātsaṃjñāprabodhanam .. 153 .. ### [1.156](https://indike.org/pramana/in.med.sangraha.siddhayoga.1.156) śirīṣabījagomūtrakṛṣṇāmaricasaindhavaiḥ .. añjanaṃ syātprabodhāya sarasonaśilālakaiḥ .. 154 .. ### [1.157](https://indike.org/pramana/in.med.sangraha.siddhayoga.1.157) kaṭphalaṃ pauṣkaraṃ śṛṅgī vyoṣaṃ yāsaśca kāravī .. ślakṣṇaṃ cūrṇīkṛtaṃ caitanmadhunā saha lehayet .. 155 .. ### [1.158](https://indike.org/pramana/in.med.sangraha.siddhayoga.1.158) eṣā'valehikā hanti saṃnipātaṃ sudāruṇam .. hikkāṃ śvāsaṃ ca kāsaṃ ca kaṇṭharodhaṃ niyacchati .. etadyojyaṃ kaphodreke cūrṇamārdrakajai rasaiḥ .. 156 .. ### [1.159](https://indike.org/pramana/in.med.sangraha.siddhayoga.1.159) sarveṣu saṃnipāteṣu na kṣaudramavacārayet .. śītopacāri kṣaudraṃ syācchītaṃ cātra virudhyate .. 157 .. ### [1.160](https://indike.org/pramana/in.med.sangraha.siddhayoga.1.160) kriyābhistulyarūpābhiḥ kriyāsāṃkaryamiṣyate .. bhinnarūpatayā tāstu tanna kurvanti dūṣaṇam .. 158 .. ### [1.161](https://indike.org/pramana/in.med.sangraha.siddhayoga.1.161) śastaṃ sulaṅghitasyā''dau vidhāya kavalagraham .. lājasaktukapathyaṃ syātsaindhavenāvacūrṇitam .. 159 .. ### [1.162](https://indike.org/pramana/in.med.sangraha.siddhayoga.1.162) raktapittahitatvena dāhajvarahṛtestathā .. saktavaḥ śītavīryāḥ syurlājapūrvā hitā na te .. 160 .. ### [1.163](https://indike.org/pramana/in.med.sangraha.siddhayoga.1.163) pācano dīpano lājamaṇḍastenoṣṇa iṣyate .. 161 .. ### [1.164](https://indike.org/pramana/in.med.sangraha.siddhayoga.1.164) ato'yaṃ daśamūlādisādhito bhiṣajāṃ mataḥ .. taccejjīryatyavighnena jvarī jīvettadā dhruvam .. 162 .. ### [1.165](https://indike.org/pramana/in.med.sangraha.siddhayoga.1.165) pañcamuṣṭikayūṣeṇa trikaṇṭakakṛtena vā .. ā doṣaśamanātpathyaṃ trikaṇṭenaiva sādhayet .. 163 .. ### [1.166](https://indike.org/pramana/in.med.sangraha.siddhayoga.1.166) yavakolakulatthānāṃ mudgamūlakaśuṇṭhayoḥ .. ekaikaṃ muṣṭimāhṛtya pacedaṣṭaguṇe jale .. 164 .. ### [1.167](https://indike.org/pramana/in.med.sangraha.siddhayoga.1.167) pañcamuṣṭika ityeṣa vātapittakaphāṣahaḥ .. śasyate gulmaśūle ca śvāse kāse kṣaye jvare .. 165 .. ### [1.168](https://indike.org/pramana/in.med.sangraha.siddhayoga.1.168) pañcamūlī kirātādirgaṇo yojyastridoṣaje .. pittotkaṭe ca madhunā kaṇayā vā kaphotkaṭe .. 166 .. ### [1.169](https://indike.org/pramana/in.med.sangraha.siddhayoga.1.169) bilvasyonākagambhārīpāṭalīgaṇakārikā .. dīpanaṃ śleṣmavātaghnaṃ pañcamūlamidaṃ mahat .. 167 .. ### [1.170](https://indike.org/pramana/in.med.sangraha.siddhayoga.1.170) śāliparṇī pṛthakparṇī bṛhatīdvayagokṣuram .. vātapittaharaṃ vṛṣyaṃ kanīyaḥ pañcamūlakam .. 168 .. ### [1.171](https://indike.org/pramana/in.med.sangraha.siddhayoga.1.171) ubhayaṃ daśamūlaṃ tu saṃnipātajvarāpaham .. kāse śvāse ca tandrāyāṃ pārśvaśūle ca śasyate .. pippalīcūrṇasaṃyuktaṃ kaṇṭhahṛdgrahanāśanam .. 169 .. ### [1.172](https://indike.org/pramana/in.med.sangraha.siddhayoga.1.172) cirajvare vātakapholbaṇe vā tridoṣaje vā daśamūlamiśraḥ .. kirātatiktādigaṇaḥ prayojyaḥ śuddhyarthine vā trivṛtā vimiśraḥ .. 170 .. ### [1.173](https://indike.org/pramana/in.med.sangraha.siddhayoga.1.173) daśamūlī śaṭhī śṛṅgī pauṣkaraṃ sadurālabham .. bhārgī kuṭajabījaṃ ca paṭolaṃ kaṭurohiṇī .. 171 .. ### [1.174](https://indike.org/pramana/in.med.sangraha.siddhayoga.1.174) aṣṭādaśāṅga ityeṣa saṃnipātajvarāpahaḥ .. kāsahṛdgrahapārśvārtiśvāsahikkāvamīharaḥ .. 172 .. ### [1.175](https://indike.org/pramana/in.med.sangraha.siddhayoga.1.175) bhūnimbadārudaśamūlamahauṣadhābda- tiktendrabījadhanikebhakaṇākaṣāyaḥ .. tandrāpralāpakasanārucidāhamoha- śvāsādiyuktamakhilaṃ jvaramāśu hanti .. 173 .. ### [1.176](https://indike.org/pramana/in.med.sangraha.siddhayoga.1.176) drākṣā'mṛtā śaṭhī śṛṅgī mustakaṃ raktacandanam .. 174 .. ### [1.177](https://indike.org/pramana/in.med.sangraha.siddhayoga.1.177) nāgaraṃ kaṭukaṃ pāṭhā bhūnimbaṃ sadurālabham .. uśīraṃ padmakaṃ dhānyaṃ vālakaṃ kaṇṭakārikā .. 175 .. ### [1.178](https://indike.org/pramana/in.med.sangraha.siddhayoga.1.178) puṣkaraṃ picumandaṃ cāṣṭādaśāṅgamidaṃ śubham .. jīrṇajvarāruciśvāsakāsaśvayathunāśanam .. 176 .. ### [1.179](https://indike.org/pramana/in.med.sangraha.siddhayoga.1.179) kaṭphalaṃ pauṣkaraṃ śṛṅgī mustakaṃ kaṭukaṃ śaṭhī .. samāṃśānyekaśo vā'pi ślakṣṇacūrṇāni kārayet .. 177 .. ### [1.180](https://indike.org/pramana/in.med.sangraha.siddhayoga.1.180) ārdrakasvarasakṣaudraṃ lihyātkaphavināśanam .. śūlānilārucicchardikāsaśvāsakṣayāpaham .. 178 .. ### [1.181](https://indike.org/pramana/in.med.sangraha.siddhayoga.1.181) mustāparpaṭakośīradevadārumahauṣadham .. triphalā dhanvayāsaśca nīlī kampillakaṃ trivṛt .. 179 .. ### [1.182](https://indike.org/pramana/in.med.sangraha.siddhayoga.1.182) kirātatiktakaṃ pāṭhā balā kaṭukarohiṇī .. madhukaṃ pippalīmūlaṃ mustādyo gaṇa ucyate .. 180 .. ### [1.183](https://indike.org/pramana/in.med.sangraha.siddhayoga.1.183) aṣṭādaśāṅgamuditametadvā saṃnipātanut .. pittottare saṃnipāte hitaṃ coktaṃ manīṣibhiḥ .. manyāstambha uroghāta uraḥpārśvaśirograhe .. 181 .. ### [1.184](https://indike.org/pramana/in.med.sangraha.siddhayoga.1.184) bṛhatyau pauṣkaraṃ bhārgī śaṭhī śṛṅgī durālabhā .. vatsakasya ca bījāni paṭolaṃ kaṭurohiṇī .. 182 .. ### [1.185](https://indike.org/pramana/in.med.sangraha.siddhayoga.1.185) bṛhatyādirgaṇaḥ proktaḥ saṃnipātajvarāpahaḥ .. kāsādiṣu ca sarveṣu hitaḥ sopadraveṣu ca .. 183 .. ### [1.186](https://indike.org/pramana/in.med.sangraha.siddhayoga.1.186) śaṭhī puṣkaramūlaṃ ca vyāghrī śṛṅgī durālabhā .. guḍūcī nāgaraṃ pāṭhā kirātaṃ kaṭurohiṇī .. 184 .. ### [1.187](https://indike.org/pramana/in.med.sangraha.siddhayoga.1.187) eṣa śaṭhyādiko vargaḥ saṃnipātajvarāpahaḥ .. kāsahṛdgrahapārśvārtiśvāse tandryāṃ ca śasyate .. 185 .. ### [1.188](https://indike.org/pramana/in.med.sangraha.siddhayoga.1.188) svedodgame bhṛṣṭakulatthacūrṇanipātanaṃ śastamiti bruvanti .. 186 .. ### [1.189](https://indike.org/pramana/in.med.sangraha.siddhayoga.1.189) mṛtyuśca tasminbahupicchilatvācchītasya jantoḥ paritaḥ saratvāt .. svedo lalāṭe himavānnarasya śītārditasyaiti supicchilaśca .. kaṇṭhasthito yasya na yāti vakṣo nūnaṃ yamasyaiti gṛhaṃ sa martyaḥ .. 187 .. ### [1.190](https://indike.org/pramana/in.med.sangraha.siddhayoga.1.190) trivṛdviśālākaṭukātriphalāragvadhaiḥ kṛtaḥ .. sakṣāro bhedanaḥ kvāthaḥ peyaḥ sarvajvarāpahaḥ .. 188 .. ### [1.191](https://indike.org/pramana/in.med.sangraha.siddhayoga.1.191) pittakaphānilavṛddhyā daśadivasadvādaśāhasaptāhāt .. hanti vimuñcati puruṣaṃ tridoṣajo dhātumalapākāt .. 189 .. ### [1.192](https://indike.org/pramana/in.med.sangraha.siddhayoga.1.192) saptamī dviguṇā yā tu navamyekādaśī tathā .. eṣā tridoṣamaryādā mokṣāya ca vadhāya ca .. 190 .. ### [1.193](https://indike.org/pramana/in.med.sangraha.siddhayoga.1.193) saṃnipāte prakampantaṃ vilapantaṃ ca yo naram .. bhojayetpiśitaiḥ sārdhaṃ sa vaidyākhyāṃ vrajetkatham .. 191 .. ### [1.194](https://indike.org/pramana/in.med.sangraha.siddhayoga.1.194) saṃnipāte prakampantaṃ vilapantaṃ ca yo ghṛtam .. bhojayetpāyayeccāpi tau syātāṃ ca kathaṃ śubhau .. 192 .. ### [1.195](https://indike.org/pramana/in.med.sangraha.siddhayoga.1.195) saṃnipāteṣu dāhārtaṃ yaḥ siñcecchītavāriṇā .. āturaḥ sa kathaṃ jīvedbhiṣagvā sa kathaṃ bhavet .. 193 .. ### [1.196](https://indike.org/pramana/in.med.sangraha.siddhayoga.1.196) saṃnipātārṇave magnaṃ yo'bhyuddharati mānavam .. kastena na kṛto dharmaḥ kāṃ tu pūjā na so'rhati .. 194 .. ### [1.197](https://indike.org/pramana/in.med.sangraha.siddhayoga.1.197) mṛtyunā saha yoddhavyaṃ saṃnipātaṃ cikitsatā .. yaśca tatra bhavejjetā sa jetā''mayasaṃkare .. 195 .. ### [1.198](https://indike.org/pramana/in.med.sangraha.siddhayoga.1.198) saṃnipātāntakarṇasya śophe mahati dāruṇe .. 196 .. ### [1.199](https://indike.org/pramana/in.med.sangraha.siddhayoga.1.199) raktāvasecanaiḥ pūrvaṃ sarpiṣpānaiśca taṃ jayet .. pradehaiḥ kaphapittaghnairvamanaiḥ kavalagrahaiḥ .. 197 .. ### [1.200](https://indike.org/pramana/in.med.sangraha.siddhayoga.1.200) bījapūrakamūlāni agnimanthastathaiva ca .. sanāgaraṃ devadāru rāsnācitrakapeṣitam .. 198 .. _First 200 of 277 passages. [Read on](https://indike.org/pramana/in.med.sangraha.siddhayoga.1)_ ## Linked texts (33) - [Cakradatta (Cikitsāsaṅgraha)](https://indike.org/pramana/in.med.sangraha.cakradatta.1.6) — Cakrapāṇidatta, Sanskrit - [Bhāvaprakāśa (another edition)](https://indike.org/pramana/in.med.sangraha.bhavaprakasa*alt.3.1.23) — Sanskrit - [Hārītasaṃhitā](https://indike.org/pramana/in.med.samhita.haritasamhita.3.3.2.14) — Hārīta, Sanskrit - [Aṣṭāṅgahṛdayasaṃhitā](https://indike.org/pramana/in.med.samhita.astangahrdaya.3120) — Vāgbhaṭa, Sanskrit - [Aṣṭāṅgasaṃgraha](https://indike.org/pramana/in.med.samhita.astangasamgraha.1.6_4) — Vāgbhaṭa, Sanskrit - [Śārṅgadharasaṃhitā](https://indike.org/pramana/in.med.sangraha.sarngadharasamhita.2.5.9) — Śārṅgadhara (physician), Sanskrit - [Carakasaṃhitā](https://indike.org/pramana/in.med.samhita.caraka.6.3.234) — Agniveśa (Āyurveda) & Caraka, Sanskrit - [Garuḍapurāṇa](https://indike.org/pramana/in.purana.garuda.1.170.2) — Vyāsa, Sanskrit - [Agnipurāṇa](https://indike.org/pramana/in.purana.agni.284.5) — Vyāsa, Sanskrit - [Rasamañjarī](https://indike.org/pramana/in.med.rasa.cikitsa.rasamanjari.6.125) — Śālinātha, Sanskrit - [Yogaśataka](https://indike.org/pramana/in.bauddha.sanskrit.vidya.cikitsa.yogasataka.4) — Sanskrit - [Yogaśataka](https://indike.org/pramana/in.med.sangraha.yogasataka.4) — Nāgārjuna, Sanskrit - [Gadanigraha](https://indike.org/pramana/in.med.sangraha.gadanigraha.14.127) — Soḍhala, Sanskrit - [Cikitsāsārasaṅgraha (Vaṅgasena)](https://indike.org/pramana/in.med.sangraha.vangasena.1.30) — Vaṅgasena, Sanskrit - [Bhaiṣajyaratnāvalī (ed. Rājeśvaradatta Śāstrī)](https://indike.org/pramana/in.med.cikitsa.gauda.bhaisajyaratnavali*sastri1978.5.12) — Sanskrit - [Bṛhadyogataraṅgiṇī](https://indike.org/pramana/in.med.yoga.brhadyogatarangini.85.13) — Trimalla, Sanskrit - [Yogataraṅgiṇī (Trimalla)](https://indike.org/pramana/in.med.yoga.yogatarangini-trimalla-bhatta.83.13) — Trimalla, Sanskrit - [Jvaratimirabhāskara (Cāmuṇḍa Kāyastha)](https://indike.org/pramana/in.med.cikitsa.jvara.jvaratimirabhaskara.2.42) — Cāmuṇḍa Kāyastha 1598, Sanskrit - [Vaidyakasāroddhāra](https://indike.org/pramana/in.med.cikitsa.gauda.vaidyakasaroddhara.1.p26) — Brajanāthaśarman, Sanskrit - [Paribhāṣāpradīpa](https://indike.org/pramana/in.med.paribhasa.paribhasapradipa.2.38) — Govindasena, Sanskrit - [Vaidyamanoramā](https://indike.org/pramana/in.med.cikitsa.vaidyamanorama.1.p31) — Kālidāsa, Sanskrit - [Pathyāpathyaviniścaya (Viśvanātha)](https://indike.org/pramana/in.med.pathya.pathyapathyaviniscaya.1.6) — Viśvanātha, Sanskrit - [ĀYURVEDĪYAPARIBHĀṢĀ](https://indike.org/pramana/in.med.paribhasa.ayurvediyaparibhasa.6.4) — Gaṅgādhara, Sanskrit - [Siddhisāra](https://indike.org/pramana/in.med.sangraha.siddhisara.5.18) — Sanskrit - [Mādhavacikitsā](https://indike.org/pramana/in.med.nidana.madhavacikitsa.5.12) — Mādhava Bhaṭṭa, Sanskrit - [Ārogyacintāmaṇi (Dāmodaramiśra)](https://indike.org/pramana/in.med.sangraha.arogyacintamani-damodara.50.38) — Dāmodaramiśra, Sanskrit - [Siddhasāra](https://indike.org/pramana/in.med.sangraha.siddhasara.p53) — Ravigupta, Sanskrit - [Rasendrasārasaṃgraha (Gopāla Kṛṣṇā)](https://indike.org/pramana/in.med.rasa.cikitsa.rasendrasarasamgraha.15.33-2) — Gopāla Kṛṣṇā, Sanskrit - [Āyurvedasaukhya](https://indike.org/pramana/in.med.sangraha.ayurvedasaukhya.2.167-2) — Ṭoḍaramalla 1565, Sanskrit - [Bhojanakutūhala](https://indike.org/pramana/in.med.pathya.bhojanakutuhala.12.p18) — Raghunātha, Sanskrit - [Kumāratantra (Rāvaṇa)](https://indike.org/pramana/in.med.kaumara.kumaratantra-ravana.49.53) — Rāvaṇa, Sanskrit - [Pathyāpathyaviniścaya (Ḍakṣarūpa, Mādhavakara, or Śivadāsa)](https://indike.org/pramana/in.med.pathya.pathyapathyaviniscaya-daksarupa-madhavakara-or-sivadasa.2.6) — Ḍakṣarūpa, Mādhavakara, or Śivadāsa, Sanskrit - [Cikitsāñjana](https://indike.org/pramana/in.med.yoga.cikitsanjana.23) — Vidyāpati, Sanskrit --- Source: [https://indike.org/pramana/in.med.sangraha.siddhayoga.1](https://indike.org/pramana/in.med.sangraha.siddhayoga.1) · Pramāṇa