Pramāṇa · Search · About · API

Siddhayoga (Vrindamadhava) 2

Siddhayoga (Vṛndamādhava) 2

Language
Sanskrit

2.1

pṛthaguktanidānena jvarātīsāranirṇayaḥ ..
kartavyo bhiṣajā cātra tatkrameṇa vidhiryataḥ .. 1 ..

2.2

jvarātisārayoruktaṃ bheṣajaṃ yatpṛthakpṛthak ..
na tanmilitayoḥ kāryamanyonyaṃ vardhayedyataḥ .. 2 ..

2.3

atastau pratikurvīta viśeṣoditabheṣajaiḥ ..
laṅghanamubhayoruktaṃ milite kāryaṃ viśeṣatastadanu ..
utpalaṣaṣṭhakasiddhaṃ lājāmaṇḍādikaṃ sakalam .. 3 ..

2.4

pṛśniparṇībalābilvanāgarotpaladhānyakaiḥ ..
jvarātisārī peyāṃ vā pibetsāmlāṃ śṛtāṃ naraḥ .. 4 ..

2.5

nāgarātiviṣāmustābhūnimbāmṛtavatsakaiḥ ..
sarvajvaraharaḥ kvāthaḥ sarvātīsāranāśanaḥ .. 5 ..

2.6

pāṭhendrayavabhūnimbamustāparpaṭakāmṛtāḥ ..
jayantyāmamatīsāraṃ jvaraṃ ca samahauṣadhāḥ .. 6 ..

2.7

hrīverātiviṣāmustābilvanāgaradhānyakam .. 7 ..

2.8

pibetpicchāvibandhaghnaṃ śūladoṣāmapācanam ..
saraktaṃ hantyatīsāraṃ sajvaraṃ vā'tha vijvaram .. 8 ..

2.9

guḍūcyativiṣādhānyaśuṇṭhībilvābdavālakaiḥ ..
pāṭhābhūnimbakuṭajaiścandanośīrapadmakaiḥ .. 9 ..

2.10

kaṣāyaḥ śītalaḥ peyo jvarātīsāraśāntaye ..
hṛllāsārocakacchardiḥpipāsādāhanāśanaḥ .. 10 ..

2.11

kaliṅgātiviṣāśuṇṭhīkirātāmbuyavāsakam ..
jvarātīsārasaṃtāpaṃ nāśayedavikalpataḥ .. 11 ..

2.12

vatsakasya phalaṃ dāru rohiṇī gajapippalī ..
śvadaṃṣṭrā pippalī dhānyaṃ bilvaṃ pāṭhā yavānikā .. 12 ..

2.13

dvāvapyetau siddhayogau ślokārdhenābhibhāṣitau ..
jvarātisāraśamanau viśeṣāddāhanāśanau .. 13 ..

2.14

pañcamūlībalāvilbaguḍūcīmustanāgaraiḥ ..
pāṭhābhūnimbahrīverakuṭajatvakpalaiḥ śṛtam .. 14 ..

2.15

hanti sarvānatīsārāñjvaradoṣaṃ vamiṃ tathā ..
saśūlopadravaṃ śvāsaṃ kāsaṃ hanyātsudustaram .. 15 ..

2.16

pañcamūlīti sāmānyādyojyā pitte kanīyasī ..
mahatī pañcamūlī tu vātaśleṣmādhike hitā .. 16 ..

2.17

utpalaṃ dāḍimatvakca padmakesarameva ca ..
pibettaṇḍulatoyena jvarātīsāranāśanam .. 17 ..

2.18

uśīraṃ vālakaṃ mustaṃ dhānyakaṃ bilvameva ca ..
samaṅgā dhātakī rodhraṃ viśvaṃ pācanadīpanam .. 18 ..

2.19

hantyarocakapicchāmaṃ vibandhaṃ sātivedanam ..
saśoṇitamatīsāraṃ sajvaraṃ vā'tha vijvaram .. 19 ..

2.20

daśamūlīkaṣāyeṇa viśvamakṣasamaṃ pibet ..
jvare caivātisāre ca saśophe grahaṇīgade .. 20 ..

2.21

viḍaṅgā'tiviṣā mustaṃ dāru pāṭhā kaliṅgakam ..
maricena samāyuktaṃ śophātīsāranāśanam .. 21 ..

2.22

guḍūcīcitrabilvābdaraktacandanavālakaiḥ ..
kaliṅgaikasamāyuktairjvarātīsāraśophanut .. 22 ..

2.23

kirātābdāmṛtānimbacandanodīcyavatsakaiḥ ..
śoṣātīsāraśamanaṃ viśeṣājjvaranāśanam .. 23 ..

2.24

sitāñjanakaṇālājamadhukaṃ nīlamutpalam ..
pittajvarātisāraghnaṃ pralīḍhaṃ madhunā saha .. 24 ..

Linked texts (7)