[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Times of rites](https://indike.org/pramana/in.niti.dharma.kala) › [Determination of lunar days](https://indike.org/pramana/in.niti.dharma.kala.tithi) › [Tithyarka](https://indike.org/pramana/in.niti.dharma.kala.tithi.tithyarka) › 2.p1.38 # Tithyarka 2.p1.38 Tithyarka 2.p1.38 - **Language:** Sanskrit ### [2.p1.38](https://indike.org/pramana/in.niti.dharma.kala.tithi.tithyarka.2.p1.38) raudram—bharaṇī | taduktaṃ varāhamihireṇa— “raudrāṇi pūrvābharaṇī pitryāṇīti |” māghaśuklāṣṭamyāṃ bhīṣmatarpaṇaṃ śrāddhaṃ coktaṃ hemādrau pādme— “māghe māsi sitāṣṭamyāṃ satilaṃ bhīṣmatarpaṇam śrāddhaṃ ca ye narāḥ kuryuste syuḥ santatibhāginaḥ ||” iti mantrastu bhārate— “bhīṣmaḥ śāntanavo vīraḥ satyavādī jitendriyaḥ ābhiradbhiravāpnotu putrapautrocitāṃ kriyām vaiyāghrapādagotrāya sāṅkṛtyapravarāya ca aputrāya dadāmyetajjalaṃ bhīṣmāya varmaṇe vasūnāmavatārāya śantanorātmajāya ca arghyaṃ dadāmi bhīṣmāya ābālyabrahmacāriṇe brāhmaṇādyāśca ye varṇā dadyurbhīṣmāya no jalam saṃvatsaraṃ kṛtaṃ teṣāṃ puṇyaṃ naśyati tatkṣaṇāt ||” iti padmavacanāt tarpaṇaṃ nityam śrāddhaṃ tu “te syuḥ santatibhāginaḥ” iti pūrvoktavākyaśeṣāt kāmyam | atra tarpaṇe sapitṛkāṇāmapyadhikāraḥ, “jīvatpitāpi kurvīta tarpaṇaṃ yamabhīṣmayoḥ |” iti samayamayūkhe pādmāt | phālgunaśuklāṣṭamī bahulāṣṭamī| tasyāṃ lakṣmīpūjā sītāpūjā ca kāryā| taduktaṃ nirṇayāmṛte brahmapurāṇe— "phālgune bahulāṣṭamyāṃ susnātaiśca svalaṅkṛtaiḥ lakṣmīḥ sītā ca sampūjyā gandhamālyādibhiḥ sadā tataḥ pradoṣasamaye dīpā deyāḥ sahasraśaḥ dattaśiṣṭaṃ tadā bhojyaṃ bhakṣitavyañca bandhubhiḥ ||” iti iyaṃ pradoṣavyāpinī grāhyā, tatraiva dīpadānādyuktatvāt | dinadvaye tadvyāptāvavyāptau vā paraiva, "śuklapakṣe'ṣṭamī caiva śuklapakṣe caturdaśī pūrvaviddhā na karttavyā karttavyā parasaṃyutā ||” iti naigamāt | . athaṃ sāmānyataḥ śuklāṣṭamyāṃ budhavārayoge bhavati tadaikabhaktavrataṃ kāryamityuktaṃ nirṇayāmṛte bhaviṣyottare— - [Previous: 2.p1.37](https://indike.org/pramana/in.niti.dharma.kala.tithi.tithyarka.2.p1.37) - [Next: 2.p1.39](https://indike.org/pramana/in.niti.dharma.kala.tithi.tithyarka.2.p1.39) - [Up: 2.p1](https://indike.org/pramana/in.niti.dharma.kala.tithi.tithyarka.2.p1) ## Linked texts (2) - [Bhagavantabhāskara](https://indike.org/pramana/in.niti.dharma.nibandha.mahanibandha.bhagavantabhaskara.27.p15) — Nīlakaṇṭha Dīkṣita 1625, Sanskrit - [Kālamayūkha](https://indike.org/pramana/in.niti.dharma.kala.bhatta.kalamayukha.11.p17) — Nīlakaṇṭha Dīkṣita, Sanskrit --- Source: [https://indike.org/pramana/in.niti.dharma.kala.tithi.tithyarka.2.p1.38](https://indike.org/pramana/in.niti.dharma.kala.tithi.tithyarka.2.p1.38) · Pramāṇa