[Pramāṇa](https://indike.org/pramana/) › [Indian literature](https://indike.org/pramana/in) › [Polity, Pleasure & Law](https://indike.org/pramana/in.niti) › [Law and Social-Religious Duty](https://indike.org/pramana/in.niti.dharma) › [Legal Digests](https://indike.org/pramana/in.niti.dharma.nibandha) › [Dharmapradipa](https://indike.org/pramana/in.niti.dharma.nibandha.dharmapradipa) › 16.p2 # Dharmapradipa 16.p2 Dharmapradīpa 16.p2 - **Language:** Sanskrit ### [16.p2](https://indike.org/pramana/in.niti.dharma.nibandha.dharmapradipa.16.p2) āśvinaśuklapakṣīyapratipadāditithinirṇayaḥ| pra0 1-atra navarātravratārambhastatra pūrvāhṇavyāpinī | taduktam "āśvinasya site pakṣe navarātramupoṣitaḥ | susnātastilatailena pūrvāhne pūjayecchivām ||" iti | ubhayadine tattve | "na darśakalyā yuktā pratipaccaṇḍikārcane | udaye dvimuhūrttāpi grāhyā sodayagāminī ||" iti nirṇayasindhubhagavantabhāskarayoḥ | jasmantabhāskare tu trimuhūrttavyāpinī gauḍanibandhemuhūrttavyāpinī| ete pakṣā amāniṣedhaparāḥ | yāni tu nṛsiṃhaprāsāde dvitīyāyutapratipanniṣedhavākyāni likhitāni tāni pratipadvṛddhikṣayaviṣayāṇīti tithivṛddhau kṣaye ca pūrvā pratipadgrāhyā | kalaśasthāpane citrāvaidhṛtiniṣedho bhārgavārcanadīpikāyāṃ devīpurāṇe"tvāṣṭravaidhṛtiyuktā cetpratipaccaṇḍikārcane | tayorante vidhātavyaṃ kalaśāropaṇaṃ gṛhe||" iti | citrāvaidhṛtiyutāpi dvitīyāyutā cetsaiva grāhye tyuktaṃdurgotsave - "bhadrānvitā cetpratipannu labhyate viruddhayogairapi saṃyutā satī|saivā'parāhne vibudhairvidheyā śrīputrarājyādivivṛddhihetuḥ||" iti | yadā tu vaidhṛtyādiparihāreṇa pratipanna labhyate tadoktaṃ tatraiva kātyāyanena“pratipadyāśvine māsi bhave dvaidhṛticitrayoḥ | ādyapādau parityajya prārabhennavarātrakam ||” bhaviṣye pūrvapādatrayaṃ tyaktam | rudrayāmale tu sampūrṇapratipadi citrāvaidhṛtisattve madhyadine'bhijinmuhūrtte kalaśasthāpanamuktaṃ citrāniṣedhamūlaṃ cintyam| idaṃ kalaśasthāpanaṃ dinaiva na rātrau | taduktaṃ“na rātrau sthāpanaṃ kāryaṃ na ca kumbhābhiṣecanam” iti | atra sūtake'pi vrataṃ kāryaṃ brāhmaṇabhojanādi sūtakānte | malamāse satyayaṃ navadurgotsavaḥ śuddhe kārya iti nirṇayasindhujasmantabhāskarādimatam | iyaṃ snānadānayorudayavyāpinī | dvi0 2-iyamupāśivābhipūjane pūrvāhnavyāpinī dīpikāyāmubhayatra tattve ca paretyapi | iyaṃ snānadānayorudayavyāpinī | tṛ0 3-... ... ... ... ... ca0 4-... ... ... ... ... pa05-iyamupāṅglalitā madhyāhnavyāpinī grāhyātatraiva pūjāvidhānāt | mādhavīyepyevam | jasmantabhāskarepi dinadvaye tatsattve'sattve vā pūrvetyapi ca yugmavākyātpūrvāviddheti nirṇayasindhuḥ | vratārke'pyevam | ṣa0 6-atra sāyaṃkāle jyeṣṭharkṣayutāyāṃ ṣaṣṭhyāṃ vilvābhimantraṇam | mūlayutasaptamyāṃ patrikāpraveśaḥ | pūrvāṣāḍhāyutāṣṭamyāṃ pūjāhomādi | uttarāṣāḍhāyutanavamyāṃ pūjābalidānādi | śravaṇayutadaśamyāṃ visarjanam | tattattithau tattannakṣatrābhāve kevalatithau kāryyamiti nirṇayasindhuḥ - [Previous: 16.p1.4](https://indike.org/pramana/in.niti.dharma.nibandha.dharmapradipa.16.p1.4) - [Next: 16.p3.1](https://indike.org/pramana/in.niti.dharma.nibandha.dharmapradipa.16.p3.1) - [Up: 16](https://indike.org/pramana/in.niti.dharma.nibandha.dharmapradipa.16) ## Linked texts (2) - [Puraścaryārṇava](https://indike.org/pramana/in.niti.dharma.prayoga.purascarana.purascaryarnava.3.20.76) — Sanskrit - [Dharmapradīpa (Bhairavadatta Dvivedin)](https://indike.org/pramana/in.niti.dharma.nibandha.kalajyotisa.dharmapradipa.16.p2) — Bhairavadatta Dvivedin, Sanskrit --- Source: [https://indike.org/pramana/in.niti.dharma.nibandha.dharmapradipa.16.p2](https://indike.org/pramana/in.niti.dharma.nibandha.dharmapradipa.16.p2) · Pramāṇa