Abdadidhiti 2.p43
Abdadīdhiti 2.p43
- Language
- Sanskrit
2.p43.1
atha kathā | sūta uvāca-kailāsaśikhare ramye gaurī pṛcchati śaṃkaram | guhyādguhyataraṃ guhyaṃ kathayasva maheśvara 1 sarveṣāṃ dharmasarvasvamalpāẏāsaṃ mahatphalam | prasanno'si jagannātha satyaṃ brūhi mamāgrataḥ 2 kena cāsi mayā prāpto dānena tapasāpi vā | anādimadhyanidhano bhartā tvaṃ ca jagatprabhuḥ 3 mahādeva uvāca | śṛṇu priye pravakṣyāmi tavāgre vratamuttamam | guhyaṃ mamaitatsarvasvaṃ kathayāmi tava priye 4 yathā coḍugaṇe candro grahāṇāṃ bhānureva ca | yathā vipro manuṣyāṇāṃ devānāṃ viṣṇureva ca 5 nadīnāṃ ca yathā gaṅgā purāṇānāṃ ca bhāratam | vedānāṃ ca yathā sāma indriyāṇāṃ mano yathā 6 purāṇavedasarvasvamāgamena yathoditam | śraddhayā ca śṛṇuṣvedaṃ yathā dṛṣṭaṃ purākṛtam 7 yena vrataprabhāveṇa prāptamardhāsanaṃ mama | tatsarvaṃ kathayiṣyāmi yathā dṛṣṭaṃ himālaye 8 bhādre māsi site pakṣe tṛtīyā hastasaṃyutā | tadanuṣṭhānamātreṇa sarvapāpaiḥ pramucyate 9 śṛṇu devi tvayā pūrvamajānantyā kṛtaṃ vratam | vakṣye yatopi tatprāptaṃ yathā dṛṣṭaṃ himālaye 10 pārvatyuvāca | yathā kṛtaṃ mayā pūrvaṃ vrataṃ me phalitaṃ ca tat | tatsarvaṃ śrotumicchāmi tvatsakāśānmaheśvara 11 īśvara uvāca | asti te pārvati pitā himavānnaga uttamaḥ | nānāpakṣiravai ramyo nānāśṛṅgavicitritaḥ 12 yatra devāḥ sagandharvāḥ siddhacāraṇaguhyakāḥ | vicaranti sadā hṛṣṭā gandharvā gītatatparāḥ 13 sphāṭikaiḥ kāñcanaiḥ śṛṅgairmaṇivaiḍūryabhūṣitaiḥ | śliṣyanbhujairivākāśaṃ yathā prītaḥ priyaṃ sakhā 14 himena pūritaḥ sarvo gaṅgāpātavicitritaḥ|
2.p43.2
apsaronṛtyagītaiśca śobhito yo nageśvaraḥ 15 tatra pārvati pūrvaṃ tvaṃ carantī sumahattapaḥ | abdadvādaśakaṃ devi dhūmrapānamadhomukham | 16 saṃvatsaracatuḥṣaṣṭiḥ pakvaparṇāśanaṃ tataḥ | dṛṣṭvā tātena tatkaṣṭaṃ cintayā duḥkhitaḥ param | kasmai deyā mayā kanyā iti cintāparo'bhavat 17 evaṃ vicintyamāne tu nārado munirāyayau | arghyādibhistamabhyarcya himavānabhyabhāṣata 18 himavānuvāca | kimarthamāgato deva kathyatāṃ munisattama | mahābhāgyena me jātaṃ tvadīyāgamanaṃ mune 19 nārada uvāca | śṛṇuṣvādre yadarthaṃ hi viṣṇunā preṣito'smyaham | yogyaṃ yogyāya dātavyaṃ kanyāratnamidaṃ tvayā 20 vāsudevasamo nāsti brahmeśānādiṣu triṣu | tenāsmai svasya kanyeyaṃ dīyatāṃ mama saṃmatam 21 himavānuvāca | vāsudevasamo devaḥ kanyāṃ prārthayate yadi | tato mayā pradātavyā tvadāgamanagauravāt 22 tacchrutvā prayayau tūrṇaṃ nāradaḥ keśavaṃ prati | upagamya munirdaivaṃ śaṅkhacakragadādharam 23 kṛtāñjalipuṭo bhūtvā munīndraḥ pratyabhāṣata 24 nārada uvāca | deva siddhaṃ tvayā kāryaṃ vaivāhikaparo bhava | himavānabravīdyattu tatsarvaṃ śrūyatāṃ vacaḥ| iyaṃ kanyā mayā dattā devāya garuḍadhvaje 25 tacchrutvā tu munervākyaṃ pārvatī duḥkhitā'bhavat | karṇopakaṇaistacchrutvā atha taṃ ko nivārayet 26 balāvaṣṭambhataḥ siddhamīśvarāṇāṃ manīṣitam | duḥkhabhārātisaṃtaptāṃ sakhī papraccha tāṃ śivām 27 sakhya uvāca | kathaṃ tvaṃ duḥkhitā devi kathayasva mamāgrataḥ | bhadrāyāstena bhadraṃ te kariṣyāmi na saṃśayaḥ 28 pārvatyuvāca | śṛṇu bho tvaṃ mahāprajñe manasā cintitaṃ mayā |
2.p43.3
kapardinaṃ tu bhartāraṃ kariṣye'haṃ na saṃśayaḥ 29 pārvatyā vacanaṃ śrutvā sakhī vacanamabravīt 30 sakhya uvāca | nagaputri mahadbhāgyaṃ prārthitā viṣṇunā yadi | yaḥ prārthyo daivataiḥ sarvairmahendrādipurogamaiḥ 31 yasyaikaguṇaleśena guṇavanto bhavanti hi | sa guṇānāmanantatvādanta iti viśrutaḥ 32 devānāṃ kanyakā bhadre svakīyā iṣṭadevatāḥ | saṃpūjya yasya dāsyaṃ tāḥ prārthayanti divāniśam 33 atibhāgyavaśāddevi māhiṣaṃ prāpyate yayā | kiṃ tayā pāyasaṃ tyajya bhikṣārthaṃ gamyate'nyataḥ 34 prāpyāpi kāmadaṃ devaṃ prāpyate kāmadohakam | narottamāya dattāsi tava pitrā śubhaṃ kṛtam 35 mā śocasva nivartasva na jānāsi guṇāṃstayoḥ | bhramitāsyatha vā kena śṛṇuṣvaikamanā'naghe 36 kirīṭī keśavo devo jaṭī mṛtyuñjayo'naghe | keśavaḥ sumukho bhadre sa ca bhīmamukhaḥ sadā 37 supaṅktī ratnadaṃṣṭraśca viṣaddhirdīrghadaṃṣṭrakaḥ | ratnakuṇḍalavānviṣṇurnāgakuṇḍalavān śivaḥ 38 viṣṇuḥ kamalanetraśca jvalanetraḥ sadāśivaḥ | caturbhujadharo viṣṇuḥ sa vai daśabhujo mahān 39 śrīvatsalāñchanaṃ viṣṇoḥ śivasya brahmaṇaḥ śiraḥ | pītāmbaradharo viṣṇuḥ sa ca carmāmbaraḥ sadā 40 vāhanaṃ garuḍo viṣṇorjaraṭhokṣāḥ śivasya ca | śeṣaparyaṅkaśāyī sa citābhasmaśayaḥ sa ca 41 gandharvadhvaninā hṛṣṭo bhūtānāṃ rodanena saḥ | viṣṇurbhāgī sa yogī ca kathaṃ kāmayase śivam 42
Linked texts (2)
- Smṛtikaustubha — Anantadeva 1638, Sanskrit
- Saṃvatsaradīdhiti — Anantadeva 1650, Sanskrit